The Latest
وحدت نیوز(بلتستان) مجلس وحدت مسلمین پاکستان بلتستان ڈویژن کے سیکرٹری جنرل علامہ آغا علی رضوی نے ایک ہنگامی اجلاس سے خطاب کرتے ہوئے کہا کہ سانحہ راولپنڈی نہایت افسوسناک اور ایک بڑی سازش کا حصہ ہے۔ پاکستان بھر کے شیعہ اور سنی مل کر اس سازش کو ناکام بنا دیں گے۔ حکومت اس واقعہ کو شیعہ سنی اختلافات قرار نہ دیں، پاکستان میں کوئی شیعہ سنی جھگڑا نہیں ہے۔ انہوں نے کہا کہ ملک بھر میں دہشت گرد اور تکفیریوں کے ہاتھوں جی ایچ کیو، ہسپتال، ائیر بیس، حساس ادارے غرض کوئی جگہ محفوظ نہیں۔ یہ سانحہ بھی ملک میں موجود دہشت گردوں کی سازشوں کا شاخسانہ ہے۔ سانحہ راجہ بازار راولپنڈی پاکستان میں شیعہ سنی اختلافات کو ہوا دینے کی کوشش ہے، جسے غیور مسلمانان پاکستان کامیاب ہونے نہیں دیں گے۔ انہوں نے کہا اسلام آباد راولپنڈی میں مقیم گلگت بلتستان کے طلباء کو بے جا تنگ کرنے اور ہراساں کرنے کی کوشش کی گئی تو مسلم لیگ نون کو بلتستان میں شدید مشکلات کا سامنا کرنا پڑے گی۔ اگر کسی بھی گلگت بلتستان کے بے گناہ طالب علم کو راولپنڈی میں تنگ کیا گیا تو ہم لیگی رہنماوں کو بلتستان میں چین سے رہنے نہیں دیں گے اور ان کو بھی رئیسانی کی راہ دکھانے پر مجبور ہونگے۔
وحدت نیوز(ملتان) مجلس وحدت مسلمین پاکستان کے مرکزی رہنما یافث نوید ہاشمی ایڈوکیٹ نے ایک وفد کے ہمراہ امیرجماعت اسلامی ملتان میاں آصف اخوانی سے دفتر جماعت میں ملاقات کی۔ اس موقع پر مجلس وحدت مسلمین ملتان کے قائمقام سیکرٹری جنرل محمد عباس صدیقی، جنوبی پنجاب کے میڈیا کوارڈینیٹر ثقلین نقوی بھی موجودتھے۔ دونوں رہنمائوں نے ملتان کی موجودہ صورتحال پر گفتگو کی۔ اس موقع پر یافث نوید ہاشمی نے میاں آصف اخوانی کو مجلس وحدت مسلمین کے زیراہتمام 20نومبر کو ہونے والی ''آل پارٹیز امن کانفرنس ''کی دعوت دی جسے امیر جماعت اسلامی نے قبول کرتے ہوئے کہا کہ اس وقت ملتان میں امن کے لیے ہرجماعت اور تنظیم کو اپنا کردار ادا کرنے کی ضرورت ہے۔ میاں آصف اخوانی کا کہناتھا کہ ملتان سمیت ملک بھر میں شرپسندی کے واقعات مذمت کرتے ہیں یہ واقعات ملک میں شیعہ سنی کو لڑانے کی سازش ہے۔ قائمقام سیکرٹری جنرل محمد عباس صدیقی نے کہا کہ مجلس وحدت مسلمین ملک بھر میں امن اور آشتی کا پیغام عام کررہی ہے اور ملتان میں ہونے والی امن کانفرنس اسی سلسلے کی ایک کڑی ہے۔
وحدت نیوز(اسلام آباد) مجلس و حدت مسلمین پاکستان کے مرکزی سیکریٹری تبلیغات علامہ اعجاز بہشتی کا کہنا تھا کہ سانحہ عاشورہ راولپنڈی ایک سوچی سمجھی سازش ہے جس کا مقصد عا شورہ امام حسین ؑ کو نقصان پہنچانا اورپاکستان میں فرقہ واریت کو پھیلانا ہے، ا ور اس سازش کو کامیاب بنانے میں انتظامیہ اور قانون نافذ کر نے والے اداروں نے اپنا حق ادا کیا اور اپنی نااہلی کا ثبوت دیا ہے اور حالات کو کنڑول کر نے کے بجائے خود تماشائی بنے رہے۔ان کاکہنا تھا کہ تمام محب وطن پاکستانی اچھی طرح جانتے ہیں کہ اس طر ح کے فرقہ ورانہ فسادات کے پیچھے کس کا ہاتھ ہے ۔مسجدو امام بارگاہ کو جلانے میں کسی بھی شیعہ سُنی کا ہاتھ نہیں ہو سکتا ،کو ئی بھی سچا مسلمان اسلام اور مسلمانوں کے تقدسات کو نقصان نہیں پہنچا سکتا ایسے کام کرنے والے نہ سنی ہیں اور نہ شیعہ بلکہ وہ منافقین ہیں جو اسلام کا لبادہ اوڑھ کر اسلام کو بدنا م کر نا چاہتے ہیں۔
علامہ اعجاز حسین بہشتی کا مزید کہنا تھا کہ اس سانحہ کے بعد مختلف شہروں میں دہشت گرد اور تکفیری گروہوں نے کئی امام بارگاہوں کو شہید کیا ، مگر حکومت نے اب تک کسی دہشت گرد کو گرفتار نہیں کیا بلکہ یوں لگتا ہے کہ حکومت اور انتظامیہ نے ان دہشت گردوں کو کھلی چھوٹ دے دی ہے کہ وہ جب اور جہاں چاہیں مسلمانوں کے مقدسات کو نقصان پہنچا ئیں۔علامہ اعجاز کا کہنا تھا کہ ہم حکومت کو خبر دار کر تے ہیں کہ ان دہشت گردوں کو لگام د ے اور ان سانحات میں ملوث عناصر کو جلد از جلد گرفتار کیا جائے اور مظلوموں کا زیادہ امتحان نہ لیا جائے ورنہ حالات کی ذمہ داری خود انتظامیہ پر عائد ہوگی۔
وحدت نیوز(پشاور) مجلس وحدت مسلمین خیبر پختونخوا کے ڈپٹی سیکرٹری جنرل علامہ سید عبدالحسین الحسینی نے کوہاٹ میں امام بارگاہ پر حملہ اور تیراہ بازار میں دکانوں کو نذر آتش کئے جانے کی شدید الفاظ میں مذمت کرتے ہوئے صوبائی حکومت سے مطالبہ کیا ہے کہ وہ قیام امن کیلئے فوری طور پر شرپسند عناصر کیخلاف کارروائی کرے، جاری کردہ بیان میں ایم ڈبلیو ایم کے صوبائی رہنما ء کا کہنا تھا کہ راولپنڈی سانحہ ملک دشمن عناصر کی کارروائی ہے، اگر حکومت بروقت اقدامات کرتی تو یہ آگ نہ پھیلتی۔ ان کا کہنا تھا کہ ملک میں شیعہ، سنی کا کوئی جھگڑا نہیں، بیرونی طاقتوں کے پیسوں پر پلنے والے ملک دشمن عناصر اب فرقہ واریت کے ذریعے ملک کا امن تہہ و بالا کرنے کے درپے ہیں۔ تاہم پاکستان کے باشعور عوام ملک دشمن عناصر کی ان مذموم سازشوں کو ناکام بنا دیں گے۔ انہوں نے کوہاٹ میں امام بارگاہ سید حبیب پرحملہ اور تین افراد کی شہادت پر افسوس کا اظہار کرتے ہوئے کہا کہ صوبائی حکومت صوبہ میں قیام امن کیلئے فوری طور پر شرپسندوں کیخلاف کارروائی کرے، کوہاٹ میں شرپسند امام بارگاہ پر حملہ آور ہوئے اور تیراہ بازار میں شناخت کرکے اہل تشیع کی دکانوں کو نذر آتش کیا گیا۔ تاہم انتظامیہ، پولیس اور فورسز نے شرپسندوں کیخلاف کسی قسم کی کارروائی نہ کی۔حکومت کی رٹ کہیں نظر نہیں آئی۔ انہوں نے کہا کہ اگر حکومت نے شرپسندوں کو لگام نہ دی تو عوام کے صبر کا پیمانہ لبریز ہوسکتا ہے۔ اور اگر امن و امان کی صورتحال خراب ہوئی تو اس کی ذمہ دار حکومت ہوگی۔ انہوں نے کوہاٹ اور ہنگو میں کرفیو کے نفاذ کو خوش آئند قرار دیتے ہوئے کہا کہ یوم عاشورہ سے لیکر اب تک حکومت کا رویہ انتہائی غیر سنجیدہ رہا ہے، فوری طور پر حقائق کو منظر عام پر لانے کی ضرورت تھی۔
وحدت نیوز(مظفرآباد) ریاستی سیکرٹری جنرل مجلس وحدت مسلمین آزاد جموں و کشمیر علامہ سید تصور حسین نقوی الجوادی کا اپنی کابینہ کے ہمراہ شیخ زید ہسپتال کا دورہ، نیلم جلوس پر پتھراؤ کے نتیجے میں زخمی ہونے والے احباب کی عیادت، تفصیلات کے مطابق یوم عاشور کے موقع پر نیلم میں میرپورہ کے مقام پر شرپسند عناصر کی جانب سے پتھراؤ کیا گیا تھا، جس کی وجہ سے 14سے زائد مؤمنین زخمی ہوئے ، انتظامیہ کی موجودگی میں جلوس پر پتھراؤ کیا گیا، زخمیوں میں ایم ڈبلیو ایم ضلع نیلم کی کابینہ کے معزز ممبران بھی شامل ہیں، انتظامیہ کی جانبداری کی بنا پر سڑک پر دھرنا دیا گیا اور سڑک پر ہی عزاداری کو جاری رکھا گیا، بعد ازاں انتظامیہ مطالبات منظور کرتے ہوئے ملزمان کے خلاف ایف آئی آر درج کی اور گرفتار کر کے کیفر کردار تک پہنچانے کی یقین دہانی کرائی گئی، یقین دہانی کی بنا پر دھرنے کو ختم کیا گیا،تا ہم دوسرے دن سادات بستی کا گھیراؤ اور امام بارگاہ پر پتھراؤ کیا گیا، علامہ تصور جوادی نے اس کی بھرپور مذمت کی ، اور انتظامیہ سے رابطہ کیا ، جلد کاروائی کا مطالبہ کیا، ریاستی سیکرٹری جنرل علامہ تصور جوادی نے اس کشیدہ صورتحال پر ریاستی کابینہ کا اجلاس طلب کیا، ریاستی کابینہ کے اس اجلا س میں نیلم ، کوٹلی ، روالپنڈی و دیگر علاقوں میں پیش آنے والے واقعات اور بعد کی صورتحال پر غور و حوض کیا گیا۔
علامہ سید تصور جوادی نے کہا کہ ہمیں فرقہ ورانہ ہم آہنگی کے لیئے اپنا کردار ادا کرنا ہو گا،ملک کو دہشت گردی فرقہ راریت سے بچانے کے لیئے بین المسالک یکجہتی کا فروغ ،برداشت تکریم انسانیت، جیو اور جینے دو کے سنہری اصولوں کو اپنا ہو گا، انہوں نے کہا کہ ہم نیلم کے مؤمنین کے ساتھ کھڑے ہیں ، ہمارا ادارہ مسلسل رابطے میں ہے اور وہاں کے حالات سے آگاہ ہے، نیلم واقعے کی کڑیاں بھی راولپنڈی و چشتیاں سے ملائی جائیں تو مختلف نہ ہو گا، انتظامیہ کی موجودگی میں جلوس پر پتھراؤ ہونا آزاد حکومت کے لیئے لمحہ فکریہ ہے، بعدازاں ریاستی سیکرٹری جنرل مجلس وحدت مسلمین آزاد جموں و کشمیر علامہ سید تصور حسین نقوی الجوادی نے ریاستی کابینہ کے ہمراہ شیخ زید ہسپتال کا دورہ کیا، اور زخمی مؤمنین کی عیادت کی، علامہ تصور جوادی کے ہمراہ سیکرٹری سیاسیات سید تصور عباس موسوی، سیکرٹری مالیات سید سجاد حسین، سیکرٹری روابط مولانا حمید حسین نقوی و سیکرٹری جنرل ضلع مظفرآباد مولانا طالب حسین ہمدانی تھے، ریاستی سیکرٹری جنرل نے زخمیوں کی عیادت کی، اور ہر ممکن تعاون کا یقین دلایا۔
وحدت نیوز(لاہور) سنی اتحاد کونسل پاکستان کے چیئرمین صاحبزادہ حامد رضا نے اعلان کیا ہے کہ سنی اتحاد کونسل دہشت گردی میں جانیں قربان کرنے والے پچاس ہزار شہداء کے ورثاء کا کنونشن بلائے گی۔ شہداء کے لواحقین سے رابطوں کے لیے کمیٹیاں بنا دی گئی ہیں۔ نیٹو سپلائی روکنے کی کوششوں کا ساتھ دیں گے۔ قومی اسمبلی، سینٹ اور چاروں صوبائی اسمبلیوں میں ڈرون حملوں کے خلاف متفقہ قراردادیں منظور کی جائیں اور تمام ممبران پارلیمنٹ امریکی سفارت خانے کے سامنے کھڑے ہو کر ڈرون حملوں کے خلاف اجتماعی احتجاج کریں۔ منور حسن کے بیان پر فوج کے سپریم کمانڈر صدر مملکت ممنون حسین کیوں خاموش ہیں۔ ان خیالات کا اظہار انہوں نے سنی اتحاد کونسل کے ہنگامی اجلاس سے خطاب کرتے ہوئے کیا۔
صاحبزادہ حامد رضا نے مزید کہا کہ پاکستان میں امریکہ اور بھارت فرقہ واریت کی آگ بھڑکا رہے ہیں۔ فرقہ وارانہ منافرت پھیلانے والوں کو سختی سے کچلا جائے۔ حکومت سانحۂ راولپنڈی کے اصل ملزمان کو عبرت کا نشان بنانے کے لیے کسی مصلحت اور دباؤ کا شکار نہ ہو، فرقہ وارانہ قتل و غارت میں ملوث گروہوں کی سرکوبی کے لیے دوٹوک فیصلے کیے جائیں، ہم قیام امن اور فرقہ وارانہ ہم آہنگی کے لیے حکومت کی ہر مخلصانہ کوشش کا ساتھ دیں گے۔ مسلکی اختلافات کی بنیاد پر ملک میں فساد پھیلانے کا کوئی جواز نہیں ہے۔ تمام مذہبی راہنما فرقہ وارانہ کشیدگی کو روکنے کے لیے اپنی ذمہ داریاں پوری کریں۔ تخت پر بیٹھنے والے نہیں مورچے میں بیٹھنے والے فوجی ملک کے اصل رکھوالے ہیں۔ شہداء کے خون کی حدت قوم کو نئی زندگی عطا کرتی رہے گی۔ سنی اتحاد کونسل نے ملک بھر میں ڈرون حملوں کے خلاف دستخطی مہم شروع کر رکھی ہے اور اب تک ہزاروں افراد احتجاجی یادداشت پر دستخط کر چکے ہیں۔ یہ احتجاجی یادداشت اقوام متحدہ کو ارسال کی جائے گی۔
وحدت نیوز(لاہور) سربراہ سنی تحریک محمد ثروت اعجاز قادری نے کہا ہے کہ کراچی سمیت ملک بھر میں یوم عاشور کے موقع پر رینجرز اور پولیس کی جانب سے کئے گئے اقدامات قابل ستائش ہیں، راولپنڈی سانحہ اور ملتان میں مذہبی کشیدگی کے پس پشت وہی عناصر ہیں جن کے تانے بانے طالبان سے ملتے ہیں جو اس ملک کی جمہوریت کو ڈی ریل کرنے کی سازشوں میں مصروف ہیں، ملک کو انتہا پسندوں اور دہشت گردوں سے بچانے کیلئے اپنی صفوں میں موجود دہشت گردوں اور ملک دشمنوں کو پہچاننا ہوگا۔ ان خیالات کا اظہار انہوں نے ہفتہ کو صوبائی آفس داتا دربار لاہورمیں ذمہ داران سے ٹیلی فونک خطاب کرتے ہوئے کیا۔
محمد ثروت اعجاز قادری نے کہا کہ کراچی میں محرم الحرام کے دوران کئے گئے سیکورٹی انتظامات اور حساس اداروں کی جانب سے دہشت گردوں کے خلاف کی جانے والی کامیاب کارروائیوں نے اس ملک و قوم کو بڑی تباہی سے بچایا ہے، جس کا سہرا رینجرز، پولیس اور قانون نافذ کرنے والے اداروں کے ان افسروں کو جاتا ہے جو ملک کو امن کا گہوارہ بنانا چاہتے ہیں اور سنی تحریک ایسے افسروں کی کارکردگی کو نہ صرف سراہتی ہے بلکہ ان کی کاوشوں پر انہیں خراج تحسین بھی پیش کرتی ہے۔ انہوں نے کہا کہ محرم الحرام اور بالخصوص 8 تا 10 محرم الحرام کے دوران کراچی میں سیکورٹی کے فول پروف انتظامات نے کراچی میں دہشت گردوں کی تمام سازشوں کو ناکام بنا دیا ہے۔ انہوں نے کہا کہ کراچی میں گزشتہ چند روز کے دوران امن و امان کی بحالی کے اداروں کی جانب سے کی جانیوالی کارروائیوں کے بعد اب یہ بات واضح ہو چکی ہے کہ دہشت گرد کالعدم تنظیموں کی چھتر چھایا میں اس شہر میں پل رہے ہیں اور انہیں مکمل سپورٹ بھی انہی کالعدم تنظیموں کا ہے، جن کے تانے بانے طالبان سے ملتے ہیں۔
انہوں نے کہا کہ راولپنڈی سانحہ میں بھی وہی عناصر شامل ہیں جو اس ملک میں جمہوریت کو غیر مستحکم کرنے کی سازشوں میں مصروف ہیں۔ انہوں نے کہا کہ پنجاب کی حکومت نے کالعدم انتہا پسند اور دہشت گرد جماعتوں اور ان کے کارندوں کو شیلٹر فراہم کیا ہوا ہے اور اس کے بھیانک نتائج آج سب کے سامنے آگئے ہیں۔ محمد ثروت اعجاز قادری نے کہا کہ ملک کو غیر مستحکم اور جمہوریت کو ڈی ریل کرنے والوں کے خلاف اب سب کو ایک ہونا ہو گا اور اب تمام سیاسی اور مذہبی جماعتوں کو اپنے اندر موجود ایسے ملک دشمن عناصر کو علیحدہ کرنا ہو گا۔
وحدت نیوز(لاہور) ناظم اعلیٰ جامعہ نعیمیہ مولانا محمد راغب حسین نعیمی نے کہا ہے کہ سانحہ راولپنڈی میں ملوث ملزمان کو بے نقاب کیے بغیر مستقبل میں بھی ملک کو دہشت گردی سے پاک نہیں کیا جا سکتا، عاشورہ کے موقع پر دہشت گردی کا واقعہ رونما ہونا انتظامیہ کی جانب سے انتہائی سستی اور کاہلی اور نااہلی کا نتیجہ ہے جس کی جتنی بھی مذمت کی جائے کم ہے۔ سانحہ راولپنڈی کے حوالے سے منعقدہ اجلاس سے خطاب کرتے ہوئے انہوں نے کہا کہ جڑواں شہروں میں افسوسناک واقعہ کی اعلیٰ سطحی تحقیقات ہونی چاہیے اور سانحہ میں ملوث ملزمان کو کسی صورت میں رعایت نہ دی جائے، جب تک قالین کے نیچے چھپے گند کو صاف نہیں کیا جائے گا اس وقت کا اسلامی جمہوریہ پاکستان سے دہشت گردی ختم نہیں ہو سکتی۔ انہوں نے مزید کہا اہل سنت پرامن ہیں لیکن باقی مسالک کے لوگوں کو بھی چاہیے کہ وہ اپنے کارکنوں کو ہوش کے ناخن دیں کہ ملکی حالات کس سمت جا رہے ہیں اور کالعدم تنظیموں کے رہنما ملک کو کس سمت لینے کی کوشش کر رہے ہیں۔ علامہ محمد راغب حسین نعیمی کا مزید کہنا تھا کہ جب تک کالعدم تنظیموں کو نئے ناموں سے کام کرنے سے روکا نہیں جائے گا اس وقت تک ملک میں جاری دہشت گردی ختم نہیں ہو سکتی۔
وحدت نیوز(کراچی) پنجاب حکومت سانحہ پنڈی اور امام حسین ؑ کی شان میں گستاخی کر نے والوں کی پشت پناہی کر رہی ہے ۔صوبائی وزیر قانون نے پریس کانفرنس میں اصل حقائق چُھپا کر جانب داری کا مظاہرہ کیا ۔ رانا ثناء اللہ عدالتی تحقیقات پر پردہ ڈالنے کی کوشش کر رہے ہیں۔مسجد سے پہلے عاشورہ کے جلوس پر حملہ پتھراؤاور فائرنگ کی گئی ۔مسجد کے لاؤڈ اسپیکرز سے نواسہ رسول امام حسین ؑ کی شان میں گستاخی کی گئی۔ملک بھر کے علمائے اہلسنت وشیعہ علماء نے نواسہ رسول امام حسین ؑ کی شان میں گستاخی کی مذمت کی ہے ،رانا ثناء اللہ خاموش کیوں ہیں۔ سنی و شیعہ علماء کرام و عوام جمعہ کو ملک گیر یوم عظمت نواسہ رسول امام حسین ؑ منائیں گے۔ان خیالات کا اظہار مجلس وحدت مسلمین پاکستان صوبہ سندھ کے ڈپٹی سیکریٹری جنرل علامہ صادق رضا تقوی نے صوبائی سیکریٹریٹ میں منعقدہ اجلاس سے خطاب کر تے ہو ئے کیا۔
ان کا کہنا تھا کہ شہباز شریف اور رانا ثناء اللہ کی پریس کانفرنس نے پنجاب حکومت کے متعصبانہ موقف کی عکاسی کر دی ہے۔ جوڈیشل کمیشن کا قیام کی بعد کالعدم تنظیموں کے سر پرست رانا ثناء اللہ کے الزامات انکوائری پر اثر انداز ہونے کی کوشش ہے۔سانحہ راولپنڈی میں تین مساجد کو نظر آتش کیا گیا اُس کی تعمیرات کا اعلان کیوں نہیں کیا گیا۔چشتیاں اور ملتان میں بھی امام بارگاہ اور علم مبارک شہید کیئے گئے لیکن پنجاب حکومت فقط ایک مسجد ضرار کے ماتم میں مصروف ہے ۔پنجاب حکومت راولپنڈی سانحہ عاشورہ میں جلوس عزاء پر حملہ کرنے والے اور امام بارگاہوں پر دہشت گردی کرنے والے ملک دشمن ،اسلام دشمن عناصر کے خلاف ایف آئی آر درج کرے ،فلفور گرفتار کیا جائے۔ رانا ثنا اللہ جانبداری کا مظاہرہ نہ کریں، حقائق چھپانے کی کوشش کر کے پنجاب حکومت کا ایجنڈا واضح ہو گیا ہے ۔
انہوں نے اعلیٰ عدلیہ کے جسٹس صاحبان سے اپیل کر تے ہوئے کہا کہ سانحہ راولپنڈی کے ساتھ ساتھ سانحہ ڈھوک سیداں ، سانحہ یوم علی لاہور، سانحہ ، ڈیرہ اسماعیل خان سانحہ اربعین کراچی، سانحہ عاشورہ اور سانحہ بھکر کے لئے بھی جوڈیشنل کمیشن تشکیل دیں ، ایک مخصو ص کالعد م گروہ ملک میں فرقہ وارانہ فسادات پھیلانے کی سازش کر رہا ہے ۔شیعہ و سنی مل کر ون سائڈ گیم کھیلنے کی سازش کو ناکام بنائیں گے ۔
وحدت نیوز(راولپنڈی) مجلس وحدت مسلمین کے سربراہ علامہ ناصرعباس جعفری نے مرکزی کابینہ کے ارکان کے ہمراہ راولپنڈی میں کرفیو کے نفاذ کے باوجود ان امام بارگاہوں کا دورہ کیا، جنہیں تکفیری دہشتگردوں نے جمعہ اور ہفتے کی درمیانی شب جلا دیا تھا، وفد نے حالات کا قریب سے مشاہدہ کیا اور متولیان اور لوگوں سے معلوم حاصل کیں۔ اس موقع پر مرکزی ڈپٹی سیکرٹری جنرل علامہ شفقت شیرازی، مرکزی رہنما علامہ احمد اقبال رضوی، سیکرٹری سیاسیات ناصرعباس شیرازی، مولانا اسرار اور ضلع اسلام آباد راولپنڈی کے رہنماء بھی ہمراہ تھے۔ ایم ڈبلیو ایم کے رہنماوں نے قدیمی امام بارگاہ، ہٹیاں والی امام بارگاہ اور کرنل مقبول امام بارگاہ کا دورہ کیا۔ امام بارگاہوں کے متولیان نے رہنماوں کو بتایا کہ سانحہ والی رات 200 سے زائد مسلح دہشتگرد تکفیریوں کی جانب سے امام بارگاہوں کو پیٹرول اور خصوصی کیمیکل کے ذریعے آگ لگائی گئی، جس کے باعث مقدسات کی توہین کے علاوہ قرآن مجید کے درجنوں نسخے جل گئے۔ انہوں نے بتایا کہ کیمیکل ایسا استعمال کیا گیا کہ لوہا بھی پگھل گیا، ہم تھانے اور ریسکیو ڈبل ون ڈبل ٹو کو ٹیلی فون کرتے رہے لیکن ہماری مدد کو کوئی نہ آیا۔
ایم ڈبلیو ایم کے رہنماء رات گئےتک اُن امام بارگاہوں میں بھی گئے جہاں پر تکفیریوں کی جانب سے مسلسل دھمکیاں دی جا رہی تھیں۔ اس موقع پر علامہ ناصر عباس جعفری نے کہا کہ مشکل کی اس گھڑی میں ہم سب آپ لوگوں کے ساتھ ہیں اور انشاءاللہ ہم سب ملکر تکفیریوں کو شکست دیں گے۔ ملک میں ایک سازش کے تحت تفرقہ پھیلانے کی سازش کی جارہی ہے تاکہ پاکستان کے حالات بھی شام اور عراق جیسے کر دیئے جائیں لیکن شیعہ سنی وحدت سے اس سازش کو ناکام بنائیں گے۔ انہوں نے کہا کہ گذشتہ روز ایم ڈبلیو ایم کے زیر اہتمام لاہور میں بھی اسی سلسلہ میں شیعہ سنی وحدت کا مظاہرہ کیا گیا اور قوم کو پیغام دیا گیا کہ ہم ایک ہیں۔ جلاو گھیراؤ میں ملک دشمن عناصر ملوث ہیں۔ ان کا کہنا تھا کہ اب حکومت کی ذمہ داری بنتی ہے کہ وہ تمام ثبوتوں کا مدنظر رکھتے ہوئے شرپسند عناصر کو سامنے لائے۔
