The Latest
وحدت نیوز(کراچی) مجلس وحدت مسلمین پاکستان کے مرکزی ڈپٹی سیکریٹری جنرل علامہ سید حسن ظفر نقوی نے انچولی دھماکوں کی مذمت کرتے ہوئے کہا ہے کہ ہم دہشت گردوں کے سامنے کبھی سر نہیں جھکائیں گے، اپنے اہل سنت بھائیوں کے ساتھ مل کر وطن سے دہشت گردوں کا خاتمہ کریں گے۔ ان خیالات کا اظہار انہوں انچولی دھماکوں کے بعد مقامی ہسپتال میں رضاکاروں سے گفتگو کرتے ہوئے کیا۔ اس موقع پر ان کے ہمراہ علامہ مبشر حسن، علامہ دیدار جلبانی، علی حسین نقوی سمیت دیگر رہنما بھی موجود تھے۔ علامہ حسن ظفر نقوی کا کہنا تھا کہ انچولی دھماکوں میں شہید ہونے والے اہل سنت علماء شہداء ہمارے شہداء ہیں، شیعہ و سنی اتحاد برقرار رکھیں، انشاء اللہ یہ اتحاد دہشت گردوں کی شکست کا اہم سبب بنے گا۔ علامہ حسن ظفر نقوی کا کہنا تھا کہ انچولی دھماکہ اس بات کا ثبوت ہے دشمن ہمارے اتحاد سے خوفزدہ ہے، وطن کے شیعہ و سنی عوام نے استعماری ایجنٹوں کی جانب سے ملک میں تفرقہ پھیلانے کی سازش کو اپنے اتحاد سے ناکام بنایا ہے اور انشاء اللہ وطن کے دوستوں کا یہ اتحاد دہشت گردوں کے خاتمے میں لئے ایک اہم سنگ میل ثابت ہوگا۔
وحدت نیوز(کراچی) انچولی بم دھماکے میں شہید ہونے والے سالک جعفری اور دو اہل سنت شہداء کی نماز جنازہ ادا کردی گئی۔ تفصیلات کے مطابق جیو نیوز کے ایسوسی ایٹ پروڈیوسر سالک جعفری کی نماز جنازہ رضویہ امام بارگاہ میں علامہ مرزا یوسف حسین کی اقتداء میں ادا گئی، اس موقع پر مجلس وحدت مسلمین کے رہنما علامہ علی انور جعفری، شیعہ علماء کونسل کے رہنما علامہ جعفر سبحانی سمیت صحافی برادری نے بھی بڑی تعداد میں شرکت کی۔ نماز جنازہ میں انتہائی رقت آمیز مناظر دیکھنے میں آئے اور شہید کے اہل خانہ سمیت صحافی برادری سے تعلق رکھنے والے افراد بھی زار و قطار روتے رہے۔بعد ازاں شہید کے جسد خاکی کو سخی حسن قبرسان لے جایا گیا جہاں آہوں اور سسکیوں کے ساتھ شہید کی تدفین کی گئی۔ دوسری جانب دھماکے میں اہل سنت برادری سے تعلق رکھنے والے شہیدوں کی نماز مسجد محمدی فیڈرل بی ایریا بلاک 17 جبکہ دوسرے کی نماز جنازہ بلال مسجد موسیٰ کالونی میں ادا کی گئی۔
وحدت نیوز(ہری پور) مجلس وحدت مسلمین خیبر پختونخوا کے سیکرٹری تنظیم سازی علامہ سید وحید عباس کاظمی نے کہا ہے کہ راولپنڈی میں تکفیری مولوی کی تقریر نے ملکی سلامتی کو داو پر لگاتے ہوئے امن و امان تہہ و بالا کیا، تکفیری ٹولہ دین کا لبادہ اوڑھ کر مذہب کو نقصان پہنچانے میں پیش پیش ہے۔ جنہیں حکومت کو سزاء دینا ہوگی۔ عزاداری سید الشہداء (ع) تاقیامت جاری رہے گی۔ ان خیالات کا اظہار انہوں نے ہری پور میں پریس کانفرنس سے خطاب کرتے ہوئے کیا۔ اس موقع پر ایم ڈبلیو ایم کے ضلعی مسئولین سمیت عوامی نشینل پارٹی کے صوبائی رہنماء فیاض حسین، معروف مذہبی شخصیت ریاضت علی شاہ، ریحان باقر، احسن علی اور نزاکت علی بھی موجود تھے۔ علامہ وحید کاظمی کا کہنا تھا کہ راولپنڈی میں عزاداری کے جلوس کے موقع پر تکفیری گروہ کا یزیدیت زندہ باد اور نواسہ رسول (ص) کے خلاف نازیبا الفاظ کا استعمال عالمی استعماری سازش ہے، طاغوت کے ایجنٹ ڈالروں اور ریالوں کے عوض ہمیشہ سے پرامن ریلی و عزاداری کے جلوسوں کو نشانہ بناتے آ رہے ہیں۔ راولپنڈی میں معاویہ مسجد کے خطیب اشرف علی نے ملکی سلامتی کو داو پر لگاتے ہوئے امن کو تہہ و بالا کرنے میں مرکزی کردار ادا کیا۔ جو دینی لبادہ میں مذہب کو نقصان پہنچانے میں پیش پیش ہیں۔ جنہیں قرار واقعی سزا دینا حکومت کی اولین ذمہ داری ہونی چاہیئے۔
انہوں نے کہا کہ عزاداری سید الشہداء (ع) کے جلوس صدیوں سے جاری ہیں اور تاقیامت جاری رہیں گے۔ تاریخ گواہ ہے کہ شیعان علی (ع) نے ہمیشہ تعلیمات امام حسین (ع) پر عمل پیرا رہتے ہوئے پرامن عزاداری کو اپنا شعار بنا رکھا ہے جبکہ تکفیری گروہ اور یزیدیت کے حامیوں نے شیعت کے خلاف نازیبا الفاظ اور مسلمانوں میں اشتعال انگیز گفتگو کو اپنے وطیرہ بنا رکھا ہے، جو کہ تفرقہ بازی کو کھلے عام ہوا دینے کے مترادف ہے۔ انہوں نے کہا کہ ہری پور میں گذشتہ جمعہ کے روز ہونے والی پرامن ریلی کو امن کی فضاء کو برقرار رکھنے کی خاطر ہم نے منسوخ کردیا تاکہ ہری پور کی فضاء کو ہمیشہ کی طرح پرامن بنانے میں ہم اپنی قربانی پیش کر سکیں۔ علامہ وحید عباس نے کہا کہ رانا ثناءاللہ کو مرکزی تفتیشی کمیٹی میں شامل کرنا تکفیریوں کی کھلے عام حمایت اور حسینیوں کی عزاداری پر حملہ و دل آزاری کا باعث ہے۔ انہوں نے کہا کہ ’’یوم عظمت نواسہ رسول (ص)‘‘ کے عنوان سے آج پورے ملک میں ریلیاں نکالی جا رہی ہیں اور کربلا میں اہلبیت اطہار (ع) پر ڈھائے جانے والے مظالم کے خلاف اپنا احتجاج جاری رکھیں گے جو کہ ہمارا مذہبی فریضہ ہے۔ انہوں نے کہا کہ تکفیریوں نے امام بارگاہوں کو جلایا اور قرآن کریم کو شہید کیا، جس سے ثابت ہو چکا ہے کہ ان کا دین اسلام سے کوئی تعلق نہیں بلکہ یہ اسلام کی آڑ میں اپنے مذموم مقاصد کو پورا کر رہے ہیں۔
وحدت نیوز(کراچی) کراچی کے علاقے انچولی میں ہونیوالے یکے بعد دیگرے دو بم دھماکوں پر مجلس وحدت مسلمین کی جانب سے تین روزہ سوگ جب کہ سنی اتحاد کونسل کی جانب سے آج یومِ سوگ منانے کا اعلان کیا گیا ہے۔ ایم ڈبلیو ایم کے سربراہ علامہ راجہ ناصرعباس جعفری نے اپنے مذمتی بیان میں کہا ہے کہ سانحہ انچولی کی جتنی مذمت کی جائے کم ہے، اس سانحے میں جانبحق ہو نے والے شیعہ سنی بھائی ہمارے شہید ہیں ، حکومت سفاک دہشتگردوں کو فوری گرفتار کرکے کیفر کردار تک پہنچائے۔ علامہ راجہ ناصر عباس نے ایک نجی ٹی وی کے ایسوسی ایٹ پروڈیوسر سالک جعفری کی شہادت پر ان کے لواحقین سے تعزیت بھی کی جبکہ تین روزہ یوم سوگ کی اپیل کی ہے، تاہم ٹرانسپورٹ، کاروباری سرگرمیاں جاری رہیں گی اور تعلیمی ادارے کھلے رہیں گے۔آج شام ۵ بجے مجلس وحدت مسلمین پاکستان کے مرکزی ترجمان علامہ حسن ظفر نقوی دیگر رہنمائوں کے ہمراہ جائے حادثہ پر ہنگامی پریس کانفرنس کریں گے ۔
وحدت نیوز(کوئٹہ) مجلس وحدت مسلمین کوئٹہ ڈویژن کے زیر اہتما م یوم عظمت نواسہ رسو ل اللہ ﷺاور دہشتگردی کیخلاف امام بارگاہ کلاں میکانگی روڈ میں بعد نماز جمعہ احتجاجی مظاہرہ کیا گیا ۔جس میں مجلس وحدت مسلمین کے مرکزی رہنما، امام جمعہ علامہ سید ہاشم موسوی ،MWMکے رکن بلوچستان اسمبلی آغا رضا نے شرکت کی۔MPAآغا رضا نے سانحہ راولپنڈی میں قیمتی جانوں کی ضیاع، مسجد، مدرسہ تعلیم قرآن، متعدد امام بارگاہوں کو نذر آتش اور جلوس عزاء پر حملہ کی پُر زور مذمت کرتے ہوئے کہا کہ ایک منظم اور سوچی سمجھی سازش کے تحت عاشورا کے تقدس کو پامال اور ملک بھر میں فسادات پھیلانے کی کوشش کی گئی۔ اس سے پہلے بھی دشمنان اسلام نے مختلف حیلوں اور طریقوں سے مسلمانوں کو آپس میں لڑانے کی کوشش کی ہیں لیکن تمام مکاتب کے علماء اور ملت کی دانشمندی اور سمجھداری نے دشمن کی تمام ترسازشوں کو ناکام بنا دیا۔ علامہ سید ہاشم موسوی نے کہا کہ روز عاشورہ راولپنڈی میں دہشت گردوں نے تقریباً ایک ہی وقت میں نمازیوں اور عزاداروں پرحملہ کر کے مسجد و متعدد امام بارگاہ کو نذر آتش کر کے فساد پھیلانے کی کوشش کی ۔ جس سے معلوم ہوتا ہے کہ مسجد اور جلوس عاشورہ پر بیک وقت حملہ کرنے والے شر پسند ایک ہی نیٹ ورک سے تعلق رکھتے ہیں۔ سانحہ سے ایک دن پہلے ہی راولپنڈی کے مذکورہ مقام پر جلوس کو نقصان پہنچانے کی اطلاع کے باوجود پنجاب حکومت اور انتظامیہ کامناسب اقدامات نہ کرنا، رات کو بارہ ایک بجے کرفیو لگانا اور ابتداء ہی سے سانحہ کو کنڑول نہ کرنا جبکہ اس وقت مقدس مقامات قیمتی جانوں اور املاک کا نقصان ہو چکا تھا حکومت پنجاب کی نیت اور کارکردگی پر سوالیہ نشان ہے۔ ان کا کہنا تھا کہ سانحہ حکومت پنجاب کی مجرمانہ غفلت کا نتیجہ ہے مگر اب حکومت پنجاب سنجیدگی کا مظاہرہ کرتے ہوئے واقعہ کی صاف و شفاف تحقیقات کرکے مجرموں اور شرپسندوں کو گرفتار کرکے قرار واقعی سزا دے اور سازش کے درپردہ عناصر کو بے نقاب کریں۔ اگر تمام حکومتی ادارے سیاسی اور مذہبی جماعتیں گزشتہ دہشت گردوں کے واقعات میں سنجیدگی کا اظہار کرتے اور خاموشی اختیار نہ کرتے تو یہ افسوسناک واقعہ رونما نہ ہوتا۔ انہوں نے کہا کہ وطن عزیز کے گوشہ گوشے میں اہل تشیع کو شہید کیا گیا ،کوئٹہ سے لیکر گلگت بلتستان تک ،کراچی سے لیکر پاراچنار تک اہل تشیع پر حملے ہوتے رہے مگر ہم نے پر امن طریقے سے اپنا احتجاج رکارڈ کروایا۔ سانحے راولپنڈی میں ایک مخصوص ٹولہ مساجد اور امام بارگاہوں کو جلاکر بے گناہ لوگوں کو شہید کیا پھر بھی ہم لوگ پر امن رہے ۔مگر اب حکومت ہوش کا ناخون لے اگر ان دہشتگردوں کے خلاف ایکشن نہیں لیا تو ہم گھروں سے نکلنے پر مجبور ہو جائینگے۔انہوں نے کہا کہ اس صورتحال میں ہم عوام سے بھی اپیل کرتے ہے کہ وہ شر پسند گروہ کے ناپاک عزائم کو اپنے مضبوط اتحاد، اخوت اور برادری کے ذریعے ناکام بنا دیں۔ بیان کے آخر میں سانحہ کے مرحومین کے ایصال ثواب کے لیے فاتحہ خوانی کی گئی اور لواحقین سے دلی ہمدردی کا اظہار کرتے ہوئے ان کے لیے دُعائے خیر بھی کی گئی۔
وحدت نیوز(سکھر) سانحہ راولپنڈی کی آڑ میں سید الشہداء امام حسین (ع) کی شان میں گستاخی، پاکستان بھر میں مساجد ، امام بارگاہوں ، قرآن پاک اورعلم حضرت عباس علیہ السلام کو جلائے جانے اور جلوس عزا اور جلوس میلاد البنی (ص) پر ممکنہ پابندی کے خلاف سکھر میں بھی ہزاروں کی تعدا د میں عاشقان امام حسین (ع)نےعظیم الشان احتجاجی مظاہرہ کیا، مجلس وحدت مسلمین پاکستا ن کے سربراہ علامہ راجہ ناصرعباس جعفری کی اپیل پر منعقدہ یومِ عظمتِ نواسہ رسول (ص) کے موقع پرمجلس وحدت مسلمین پاکستان ضلع سکھر ،شیعہ ایکشن کمیٹی سکھر ،آئی ایس اوسکھر ڈویژن اوراے ایس او سکھر ڈویژن کی طرف سے بعد نماز جمعہ حیدری مسجد پرانا سکھر تا سنٹر جیل IIسکھر تک ایک احتجاجی ریلی نکالی گئی ۔شرکائے ریلی نے اپنے ہاتھوں میں دہشتگردوں کے خلاف بینرز اور پوسٹر ز اٹھائے ہوئے اپنے شدید غم و غصے کا اظہار کررہے تھے،شرکائے ریلی سے حجتہ الاسلام علامہ علی بخش سجادی ،ڈاکٹرسید فدا حسین موسوی،چوہدری اظہرحسن ،نوید حسین الحسینی،اور اشرف علی اسدی نے خطاب کیا ۔
مقررین نے حکومت سے مطالبہ کیا گیا دہشتگردی کے جتنے واقعات ہوئے ہیں ان سب کی عدالتی تحقیقات کرائی جائے،ان سانحات میں سانحہ کوہستان وچلاس گلگلت ،پارہ چنار،ہنگو ،کوئٹہ ، کراچی ، ڈیرہ اسماعیل خان،داتا دربار، نشترپارک وغیر ہ کی تحقیقات کی ضرورت ہمیں سانحہ راولپنڈی کی جانبدارانہ عدالتی تحقیقات پر کافی تحفظات ہیں۔کئی اداروں کی تحقیقاتی کمیٹیوں کی سربراہی اس حکومت کے منظور ترین اور کالعدم تنظیموں کے سرپرست رانا ثناء اللہ کررہے ہیں جس کی سیاہ کاریاں کسی سے پوشیدہ نہیں ہیں۔مقررین نے مزید کہا کہ اگر ملک میں سلامتی اور امن کی فضا کو بحال و برقرار رکھنا ہے تو کالعدم تنظیموں کی سرعام سرگرمیوں کو ختم کرکے ان کے سربراہان کے خلاف دہشتگردی کی خصوصی عدالتوں میں کیس چلا کر انہیں قرار واقعی سزادی جائے ۔
مقررین نے مزید کہا کہ عزادری کے جلوس کسی بھی قیمت پر محدود نہیں کیے جاسکتے بلکہ یہ جلوس ملکی سلامتی کی ضمانت ہیں۔ان میں امنیت کا پیغام ہے حُسینیت کاپیغام ہے۔اگر دہشتگردی کے پیش نظر عزاداری امام حسین ؑ کے جلوسوں کے خلاف کوئی سازش کی گئی ؤ پھر دہشتگردی کے دھماکے GHQمیں بھی ہوتے ہیں، مساجد میں بھی ہوتے ہیں،بازاروں ، مارکیٹوں وغیرہ میں بھی ہوتے ہیں،تو کیا ان سب کو بند کرنا چاہیے،،،،؟کیا کیا بند کروگے ، اس طرح تو پور ے ملک کو بند کرنا پڑیگااور یہ حرکت کوئی بھی محب وطن قبول نہیں کریگا۔لٰہذاملک میں جہاں دہشتگردوں کے تربیتی مراکز ہیں ۔جن کا تمام سیکورٹی اداروں کو علم بھی ہے، ان تمام کو جڑسے ختم کرو اوران عناصر کو سرعام پھانسی پر لٹکا دو ،آخر میں شرکائے ریلی نے وطن عزیز میں امن وامان وسلامتی کی دعاؤں کے ساتھ اپنی ریلی کا اختتام کیا۔
وحدت نیوز(بلتستان) سانحہ راولپنڈی کی آڑ میں سید الشہداء امام حسین (ع) کی شان میں گستاخی ، پاکستان بھر میں مساجد ، امام بارگاہوں ، قرآن پاک اورعلم حضرت عباس علیہ السلام کو جلائے جانے اور جلوس عزا اور جلوس میلاد البنی (ص) پر ممکنہ پابندی کے خلاف بلتستان میں بھی ہزاروں کی تعدا د میں عاشقان امام حسین (ع)نےعظیم الشان احتجاجی مظاہرہ کیا، مجلس وحدت مسلمین پاکستا ن کے سربراہ علامہ راجہ ناصرعباس جعفری کی اپیل پر منعقدہ یومِ عظمتِ نواسہ رسول (ص) کے موقع پر ایم ڈبلیو ایم بلتستان کے سیکریٹری جنرل علامہ سید علی رضوی، علامہ مظاہر موسوی، فدا حسین و دیگر نے خطاب کیا،جبکہ ہزاروں مظاہرین نے شرکت کی۔ شرکائےاحتجاج نے پنجاب حکومت اور تکفیری دہشت گردو ں کے خلاف شدید نعرے بازی کی جب کے مقررین نے سانحہ راولپنڈی کے تحقیقاتی کمیشن پر تحفظات کااظہار کر تے ہو ئے اسے مسترد کر دیا ، رہنمائوں کا کہنا تھا کہ رانا ثناءاللہ جب تک تحقیقاتی کمیشن کا سربراہ ہے حق و سچ قوم کے سامنے نہیں آسکے گا، وفاقی حکومت جلد ازجلد اصل حقائق عوام کے سامنے لائے اور جلوس عزا اور جلوس میلاد البنی (ص)کے خلاف کسی بھی سازش سے باز رہے ۔
وحدت نیوز(حیدرآباد) مجلس وحدت مسلمین پاکستان کے سربراہ علامہ راجہ ناصرعباس جعفری کی اپیل پر ملک گیر یومِ عظمتِ نواسہ رسول (ص) کے سلسلے میں حیدرآباد میں مولا علی (ع) قدم گاہ پر احتجاجی مظاہرہ منعقد کیا گیا ، جس میں ایم ڈبلیو ایم حیدر آباد کے سیکریٹری جنرل علامہ امداد علی نسیمی، اور علا مہ گل حسن مرتضوی نے خطاب کیا۔ رہنماؤں کا کہنا تھا کہ سانحہ راولپنڈی ایک بہت بڑی سازش تھی اس سازش میں حکومت پنجاب دہشت گردوں کے ساتھ ملوث تھی ۔اس کے علاوہ ملک کہ دوسرے علاقوں میں دہشت گردی کے واقعات بھی ہوئے جس کی ہم پر زور مذمت کرتے ہیں ملت جعفریہ نے ہر دور میں ظالم سے اظہارے نفرت اور مظلوم کہ ساتھ اظہارے ہمدردی کیا ہے اس ہی جرم کی پاداش میں ہمیں دہشت گردی کا نشانہ بنایا گیا ۔ہم نے ہمیشہ دہشت گردوں کے خلاف ثابت قدمی کا مظاہر ہ کیا اور انشااللہ ہم اس جنگ میں ثابت قدم رہینگے۔ عزا داروں پر حملے جاری رہے توپاکستان کی ہر گلی ہر سڑک عزا خانے میں تبدیل ہوجائے گی ۔
وحدت نیوز(گلگت) سانحہ راولپنڈی کی آڑ میں سید الشہداء امام حسین (ع) کی شان میں گستاخی ، پاکستان بھر میں مساجد ، امام بارگاہوں ، قرآن پاک اورعلم حضرت عباس علیہ السلام کو جلائے جانے اور جلوس عزا اور جلوس میلاد البنی (ص) پر ممکنہ پابندی کے خلاف گلگت میں بھی ہزاروں کی تعدا د میں عاشقان امام حسین (ع)نے یومِ عظمتِ نواسہ رسول (ص) کے موقع پر عظیم الشان احتجاجی مظاہرہ کیا، مجلس وحدت مسلمین پاکستا ن کے سربراہ علامہ راجہ ناصرعباس جعفری کی اپیل پر منعقدہ یومِ عظمتِ نواسہ رسول (ص) کے موقع پر صوبائی رہنما علامہ شیخ نیئر مصطفوی، علامہ موسیٰ کریمی، سعید الحسنین، عارف قنبری و دیگر نے خطاب کیا۔ احتجاجی مظاہرےمیں قائد ملت جعفریہ گلگت بلتستان علامہ سید راحت حسین الحسینی نے بھی خصوصی شرکت کی شرکائےاجتجاج نے اس موقع پر پنجاب حکومت اور تکفیری دہشت گردو ں کے خلاف شدید نعرے بازی کی جب کے مقررین نے سانحہ راولپنڈی کے تحقیقاتی کمیشن پر تحفظات کااظہار کر تے ہو ئے اسے مسترد کر دیا ، رہنمائوں کا کہنا تھا کہ رانا ثناءاللہ جب تک تحقیقاتی کمیشن کا سربراہ ہے حق و سچ قوم کے سامنے نہیں آسکے گا، وفاقی حکومت جلد ازجلد اصل حقائق عوام کے سامنے لائے اور جلوس عزا اور جلوس میلاد البنی (ص)کے خلاف کسی بھی سازش سے باز رہے ۔
وحدت نیوز( کراچی) ملک بھر کی طرح کراچی میں بھی شیعہ تنظیموں اور اداروں نے مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری کی اپیل پر سانحہ راولپنڈی کی مناسبت سے ’’یوم عظمت نواسہ رسول (ص)‘‘ منایا جس کے تحت شہر بھر کی جامع مساجدبشمول خوجہ شیعہ اثنا عشری مسجد کھارادر، جامع مسجد نور ایمان ناظم آباد، جامع مسجد حسینی برف خانہ ملیر،جامع مسجد مصطفی عباس ٹاؤن، جامع مسجد جعفریہ نارتھ کراچی، جامع مسجد اسٹیل ٹاؤن، جامع مسجد عزاخانہ صغریٰ کورنگی ،جامع مسجد سچل گوٹھ کے باہر بعد نماز جمعہ احتجاجی مطاہرے کئے گئے، احتجاجی مظاہروں میں ہزاروں افراد نے شرکت کی اور سانحہ راولپنڈی کے بعد ملک میں پھیلائی جانے والے فرقہ واریت کی آگ کے خلاف زبردست احتجاج کرتے ہوئے مطالبہ کیا کہ راولپنڈی میں یوم عاشورا کو نواسہ ختمی مرتبت حضرت محمد مصطفی (ص) کی توہین کے مرتکب افراد کے خلاف حکومت کاروائی عمل میں لائے ، مظاہرین نے ہاتھوں میں بینرز اور پلے کارڈز اٹھا رکھے تھے جن پر پاکستان بنایا تھا ، پاکستان بچائیں گے ، لبیک یا رسول اللہ(ص)، لبیک یا حسین (ع)،مردہ باد امریکہ، اسرائیل نامنظور، دہشت گردی مردہ باد، فرقہ واریت زہر قاتل، فرقہ واریت نا منظور سمیت وفاقی حکومت او ر پنجاب حکومت کے خلاف نعرے آویزاں تھے۔احتجاجی مظاہروں سے مجلس وحدت مسلمین پاکستان سندھ کے ڈپٹی سیکرٹری جنرل مولانا صادق رضا تقوی،مولانا دیدار علی جلبانی، مولانا علی انور جعفری، جعفریہ الائنس پاکستان کے رہنما علامہ جعفر رضا، شیعہ ایکشن کمیٹی کے مرکزی صدر علامہ مرزا یوسف حسین، ھئیت آئمہ مساجد و علمائے امامیہ کے صدر مولانا شیخ حسن صلاح الدین سمیت مرکزی تنظیم عزاء کے سیکرٹری جنرل سلمان مجتبیٰ او ر دیگر نے خطاب کیا۔
خوجہ مسجد کھارادر کے باہر منعقدہ مرکزی احتجاجی مظاہرے سے خطاب کرتے ہوئے مجلس وحدت مسلمین پاکستان سندھ کے ڈپٹی سیکرٹری جنرل علامہ صادق رضا تقوی کا کہنا تھا کہ سانحہ راولپنڈی میں وفاقی اور پنجاب حکومت براہ راست ملوث ہے جس نے کالعدم دہشت گرد گروہوں کے ساتھ مل کر عزاداری کے اجتماعات کے خلاف گھناؤنی سازش کی ہے جبکہ پنجاب حکومت کے وزیر رانا ثناء اللہ پہلے ہی کالعدم دہشت گرد گروہوں کے سرغنہ دہشت گردوں کو اپنے ساتھ لے کر گھومتے رہے ہیں، انہوں نے سپریم کورٹ آف پاکستان سے مطالبہ کیا کہ یوم عاشورا کے دن نواسہ ختمی مرتبت حضرت محمد مصطفی(ص) کی شان میں گستاخی کرنے والے عناصر کے خلاف 295/Cکے تحت مقدمہ قائم کر ے قرار واقعی سزا دی جائے۔انہوں نے مزید کہا کہ عید میلاد النبی (ص) اور عزاداری کے جلوسوں پر پابندی اور محدود کرنے کی باتیں کرنے والے اصل میں دماغی توازن کھو بیٹھے ہیں ، ان کاکہنا تھا کہ مملکت پاکستان میں ملک دشمن دہشت گردوں سے نہ تو اسکول کے معصوم بچے محفوظ ہیں، نہ ہی ملک کے ہونہار انجیئنرز، ڈاکٹرز، تاجر، پولیس ، افواج پاکستان ، اور غرض یہ ہے کہ کوئی بھی محفوظ نہیں تاہم جلوسوں کی پابندی اور محدودیت کے بجائے ان ملک دشمن اور اسلام دشمن دہشت گردوں کے خلاف کریک ڈاؤن واحد ایسا عمل ہے جس کے ذریعے پاکستان میں امن وامان قائم کیا جا سکتا ہے۔
جامع مسجد جعفریہ نارتھ کراچی میں خطاب کرتے ہوئے جعفریہ الائنس پاکستان کے مرکزی رہنما علامہ جعفر رضا نے کہا کہ غیر ملکی ایماء پر پاکستان میں فرقہ وارانہ فسادات کو ہوا دینے کی کوشش کی جا رہی ہے جس کا مقصد پاکستان کو غیر مستحکم کرنا اور ملک دشمن و اسلام دشمن قوتوں کو مضبوط کرنا ہے اور اس گھناؤنے فعل میں نواز شریف اور شہباز شریف حکومت براہ راست ملوث ہے۔انہوں نے مطالبہ کیا کہ سپریم کورٹ کی نگرانی میں غیر جانبدارانہ کمیشن کا قیام عمل میں لایا جائے اور ملت جعفریہ کو اعتماد میں لیا جائے جبکہ ملک کے دیگر علاقوں اور شہروں میں مساجد اور امام بارگاہوں کو نذرآتش کئے جانے کے واقعات کی تحقیقات بھی کمیشن کی ذمہ داریوں میں شامل کی جائیں۔
جامع مسجد نور ایمان پر منعقدہ احتجاجی مظاہرے سے خطاب کرتے ہوئے شیعہ ایکشن کمیٹی کے مرکزی صدر علامہ مرزا یوسف حسین نے کہا کہ نواز اور شہباز حکومت کالعدم دہشت گرد گروہوں کے ساتھ مل کر ملت جعفریہ پاکستا ن کے خلاف سازشوں میں ملوث ہے تاہم ملت جعفریہ پاکستان اپنے دفاع کا حق محفوظ رکھتی ہے، ان کاکہنا تھا کہ ملک میں شیعہ اور سنی مسلمان باہم متحد ہیں جبکہ ایک مخصوص ٹولہ ہے جو سنی مسلمانوں کا نام استعمال کر کے پاکستان مین فرقہ واریت کی آگ کو پھیلانا چاہتا ہے تاہم حکومت کو چاہئیے کہ وہ دہشت گرد گروہوں کی سرپرستی چھوڑ کر ملک میں بڑھتی ہوئی بد امنی کے خلاف ایکشن لے۔
شہر کے دیگر مقامات پر خطاب کرتے ہوئےمولانا شیخ حسن صلاح الدین، مولانا علی انور جعفری، مولانا محمد علی حسینی، ، سلمان مجتبیٰ ، مولانا دیدار علی جلبانی، مولانا رضا ثمائری اور دیگر نے حکومت کو متنبہ کیا کہ اگر وفاقی اور پنجاب حکومت نے دہشت گردوں کی سرپرستی بند نہ کی اور ان کے خلاف کریک ڈاؤن شروع نہ کیا تو ملت جعفریہ راست اقدام سے دریغ نہیں کرے گی ،رانا ثناء اللہ فوری مستعفٰی ہو کر صرف کالعدم جماعتوں کی نوکری انجام دیں ، انہوں نے کہا کہ شہر کراچی میں دن دیہاڑے مذہبی منافرت پر مبنی بینرز آویزاں کئے جا رہے ہیں لیکن پولیس انتظامیہ، رینجرز او ر سندھ حکومت خاموش تماشائی بنی ہوئے ہم انتظامیہ کی سر مہری کے رویے کی شدید مذمت کرتے ہیں اور مطالبہ کرتے ہیں کہ شہر کراچی میں فرقہ واریت پر مبنی آویزاں ہونے والے بینرز لگانے والی کالعدم دہشت گرد جماعت کے خلاف ایکشن لیا جائے اور مدارس میں موجود لاکھوں کی تعداد میں خود کش حملہ آوروں کا صفایا کیا جائے۔اس موقع پر مظاہرین نے امریکہ مردہ باد، اسرائیل نا منظور اور فرقہ واریت نا منظور کے نعرے لگائے اور امریکی و اسرائیلی پرچم بھی نذر آتش کئے۔
