آیت اللہ العظمیٰ امام سید علی خامنہ ای دامت برکاتہ نے یہ گفتگو۲۵۔۵۔۱۳۶۳ (۱۹۸۳ء) میں حزب جمہوری اسلامی کے جنرل سیکرٹری کی حیثیت سے تہران سے اس حزب کے ممبران اور عہدیداروں کے اجلاس میں پیش کی تھی، جو حزب موتلفہ اسلامی(Islamic Confedration Party) ۔
کی طرف سے ان کے مجلہ ماہانہ ’’ذکر‘‘ کے۶۳ویں شمارے ، ماہ ’’دی ۱۳۹۰‘‘ میں چھپی ہے۔
اہداف:
تنظیمی فعالیت کا ہدف اورضرورت کیا ہے؟
اسلامی تنظیم کی رکنیت ہم پر کیا اضافی ذمہ داری ڈالتی ہے؟
کیا غیر آگاہانہ تنظیمی فعالیت کا کوئی فائدہ ہے؟
کس قسم کے لوگ تنظیم کے مخالف ہوتے ہیں؟
تنظیمی افراد کے باہمی تعلقات کیسے ہونے چاہیءں؟
میں یہاں تشریف لانیوالے عزیز برادران اور خواہران کو خوش آمدید کہتا ہوں، یہ بڑی خوشی کی بات ہے کہ ہم اکٹھے ہوئے ہیں تاکہ کچھ مسائل پر آپس میں تبادلہ خیال کر سکیں۔اسی طرح آپ برادران اور خواہران کا شکریہ ادا کرتا ہوں کہ آپ لوگوں نے ان نشستوں میں منظم انداز سے شرکت کی،یہ بہت ہی خوش آئند بات ہے ۔
تنظیم کی اقسام اور ذمہ داریاں:
حزب جمہوری اسلامی جیسی ایک سیاسی اور فکری تنظیم کی آج ہمارے دور میں دواہم ذمہ داریاں ہیں، ایک لائق افرادکو فکری اور عملی طور پر منظم کرنا دوسرے اس تنظیم کو آئیڈیل کے طور پر پیش کرنا ۔ان میں سے پہلی ذمہ داری وہ ہے جس کی دنیا کی تمام فکری اور سیاسی جماعتیں قائل ہیں ،یعنی لائق افراد کو ذہنی (فکری) اور عملی طور پر منظم کرنا۔ اب اس لیاقت سے کیا مراد ہے؟ گو کہ تنظیموں کے درمیان طرز تفکر میں اختلاف پایا جاتاہے، لیکن اس کے باوجو دہر جماعت ، حزب اور تنظیم ایسے افراد کو جو اس کے اہداف و مقاصد کے لحاظ سے لا ئق اور مناسب ہوں تلاش کرکے ایک خاص نظم و ترتیب سے انہیں منظم کرتی ہے ،پھر ان کے درمیان وہ کام انجام دیئے جاتے ہیں جو آپس کی فکری ہم آہنگی اور اتحاد کا مقدمہ بنتے ہیں، اور یہ بات بھی اپنی جگہ ایک حقیقت ہے کہ جب تک کچھ لوگ فکری لحاظ سے آپس میں ہم آہنگ نہ ہوں وہ عملی لحاظ سے بھی ہم آہنگ نہیں ہو سکتے ۔
یہ دنیا کی تمام جماعتوں اور تنظیموں کی فعالیت کا محور ہے، گو کہ تنظیموں کے اہداف و مقاصد مختلف ہوتے ہیں ، بعض تنظیمیں اپنے سیاسی افکار کی ترویج و اشاعت کیلیئے یہ کام انجا م دیتی ہیں اور اسے اپنی ایک ذمہ داری سمجھتی ہیں، بعض تنظیمیں اپنے فکری مقاصد کی خاطرتو کچھ ایسی تنظیمیں بھی ہیں جو طاقت کے بل بوتے پر حکومت کے حصول کیلئے تنظیم سازی کرتی ہیں۔ جبکہ بعض تنظیموں کی ،مختلف افکار اور گوناگوں قسم کی سیاسی جدو جہد کے لحاظ سے، تقسیم بندیاں کی جاتی ہیں،غرض یہ کہ اہداف مختلف ہیں۔ لیکن دنیا بھر کی یہ تنظیمیں اپنے موردنظر اور مطلوبہ افراد کے درمیان ایک فکری ہم آہنگی اور اس کے سائے میں ایک عملی ہم آہنگی کو وجو د میں لانا اپنی ذمہ د اری سمجھتی ہیں۔ یہی ہدف آپ کا بھی ہے اور حزب جمہوری اسلامی کا بھی۔
ایک اسلامی تنظیم کی پہلی ذمہ داری:
لہٰذا حزب جمہوری اسلامی کی یہ ذمہ د اری ہے کہ افراد کے درمیان اسلام کے فکری نظا م پر عمل درآمد کرانے کیلئے ایک فکری ہم آہنگی پیدا کرے تا کہ اس ہم آہنگی و اتحاد سے معاشرے اور اسلامی انقلاب کو ارتقاء بخشنے کی رفتا رکو تیز کرنے نیز انقلابی مقاصد کے حصو ل کیلئے استعمال کیا جاسکے۔ تنظیم ہمیں اس مقصد کے لیئے چاہیے ۔
اگردوسرے افراد دنیاکے گو شہ و کنا ر میں اور خود ہمارے ملک میں بھی مختلف سیا سی مقاصد رکھنے والی سیاسی جماعتوں اور تنظیموں میں اس لیئے شامل ہوتے ہیں کہ وہ انتخابات میں کامیابی حاصل کرلیں، اقتدار میں آجائیں اور نظام حکومت اپنے ہاتھو ں میں لے لیں، تو ہم یہ واضح کرنا چاہتے کہ ہماری ایسی سوچ نہیں ہے۔
ہم یہ چاہتے ہیں کہ اپنے معاشرے کے افراد کی فکر کو اسلامی تعلیمات و افکار کی گہرائی نیز سیاسی حالات کے ادراک اور تجزیہ و تحلیل کے شعور کو مناسب اور اس گہرائی تک لے جائیں کہ معاشرے کے افراد سیاسی اور فکری حالات و واقعات کی شنا خت کے لحاظ سے ہم فکر ہو جائیں ، اور ایک طولانی مدت کیلئے ہم آہنگ اجتماعی حرکت کو جاری رکھ سکیں۔ پس اس کا مطلب یہ ہے کہ ہمیں پہلے اپنے آپ میں ایک فکری اور عملی ہم آہنگی پیداکرنی چاہیے ، یہی ہماری تنظیم سازی کی دو ذمہ داریوں میں سے ایک ہے، اس پرذرا اچھی طرح غور کریں۔
تنظیمی رکن سازی:
برادران اور خواہران ، جب ہم کہتے ہیں کہ معاشرے کے افراد کو منظم کیا جانا چاہیے تو اس کا معنی یہ نہیں ہے کہ معاشرے کے تمام افراد ہماری تنظیم یا جماعت میں شامل ہو جائیں۔ ہم نہ توایسی کسی چیز پر اصرار کرتے ہیں اور نہ ہی ہمارا ایسا کوئی دعویٰ ہے اور نہ ہی ہماری نظر میں اس کی کوئی ضرورت ہے۔ بنا براین سب سے پہلی چیز جس کی ہم نفی کرتے ہیں وہ یہی کہ حزب جمہوری اسلامی اپنی تنظیم سازی اور تشکیل کیلئے معاشرے کے تمام لوگوں کو اپناعضو بنا نا چاہتی ہے، ہم اسکی نفی کرتے ہیں،نہ ابتداء میں ہم اس فکر میں تھے نہ ہی اب ہیں۔بلکہ سرے سے ایسی تنظیم سازی عملی طور پر ممکن ہی نہیں ہے اور نہ ہی اس کے مطلوبہ نتائج برآمد ہو نگے ۔
تنظیم کا معاشر ے سے رابطہ:
دوسری چیز جس کی ہم نفی کرتے ہیں وہ یہ کہ لوگوں میں سے کچھ افراد کوتنظیم سازی کے نام پران کے گرد ایک حصار کھینچ کرانہیں معاشرے کے دوسرے لوگوں سے علیحدہ کردیں ۔ اس کی ہم سختی سے تردید کرتے ہیں۔جو لوگ ابتداء سے اس حزب کے مخالف تھے ،بلکہ تنظیموں کے ہی مخالف تھے وہ یہی پراپیگنڈا کرتے ہیں کہ تنظیم یعنی معاشرے کو ٹکڑے ٹکڑے کردینا ،لیکن اس بارے میں پہلے تفصیلی گفتگو کی تھی، اور ثابت کیا تھا کہ ’’تحزّب اورو حدت‘‘ ( تنظیم اور اتحاد) آپس میں سازگار ہیں، جو کتابچہ کی صورت میں شائع بھی ہوا تھا اور اس پر کافی بحث و مباحثہ بھی کیا گیاتھا۔ تنظیم کبھی بھی تنظیمی افراد اور دو سروں کے درمیان دیوار نہیں کھینچتی اور نہ ہی دوری پیدا کرتی ہے۔ جیسے ایک کلاس کے شاگر د ایک کلاس میں جمع ہونے ایک سبق پڑھنے ایک استا د سے کسب علم کرنے اور ایک کتاب کا مطالعہ کرنے کی وجہ سے کلاس سے باہر یا دوسری کلاسوں میں موجو د شاگردوں کے درمیان جدائی اور دوری کاسبب نہیں بنتے ۔ صحیح ہے کہ ایک کلاس کے شاگردوں کا آپس میں اتحاد ہو جاتا ہے لیکن یہ اتحاد دوسری کلاسوں میں یا باہر موجود لوگوں کے درمیان تعارض یا مخالفت کا باعث نہیں بنتا ۔ یہ توممکن ہے کہ ایک بچہ کسی دوسرے بچے سے آشنا نہ ہو ،لیکن ایک کلاس میں جانے ،ایک چار دیواری کے اندر ایک چھت کے نیچے تیس یا چالیس طالب علموں کے ایک ساتھ بیٹھنے کا مطلب ہر گز یہ نہیں ہے کہ وہ دوسروں سے جدا ہیں، تنظیم بھی بالکل ایسی ہی ہے ۔
تنظیم ایک عظیم درسگاہ:
تنظیم ایک بہت بڑی کلاس اور وسیع و عریض درسگاہ ہے۔ تنظیم یعنی اپنے معاشرے کو صحیح اسلامی نظریات اور اس میں وقوع پذیر ہو نے والے واقعات کے مختلف پہلوؤں سے روشناس کرانا ہے ۔جولوگ تنظیم کا حصہ بنتے ہیں وہ اسی لیئے شمولیت اختیار کرتے ہیں کہ اس سے مکمل فائدہ حاصل کر سکیں، فکری اور عملی طور پر منظم ہوں۔ایک تنظیمی نظام اسی لیئے ہوتا ہے تاکہ اس کے اراکین جہاں کہیں بھی ہوں حقیقی اسلامی اور سیاسی فکر سے آگاہ ہو سکیں۔
یہ ڈویژن، مختلف شعبہ جات، ملک بھر میں پھیلے یونٹ اور دیگر مراکز اسی لیئے ہیں تاکہ صحیح عقائد اور سیاسی فکر پر مبنی جو کتابچے وغیرہ بنائے جاتے ہیں انہیں ملک کے کونے کونے تک آٹھ، دس یا پندرہ ،پندرہ افراد کے گروہوں (یونٹس) میں صحیح و سالم پہنچایا جائے اور وہ مل بیٹھ کر اس کا مطالعہ کریں، آپس میں بحث کریں اور سیکھیں۔
ایک تنظیم اپنے اراکین کے درمیان دوسری دلچسپیوں سے بڑھ کر آپس میں باہمی ہم فکری اوروابستگی کوجنم دیتی ہے ، لیکن ان کے اور دوسرے تمام افراد کے درمیان ہر گز جدائی اور دوری نہیں ڈالتی ۔
تنظیم کب ضرورت اختیار کر جاتی ہے؟:
اس کے ساتھ ہی ہم ایک اور بات کا بھی شدت سے انکار کرتے ہیں وہ یہ کہ تنظیم کے بغیر معاشرے میں ایک مضبو ط اور پائیدار اتحاد کو دراز مدت کے لیئے قائم کیا جاسکتا ہے۔ہمارا عقیدہ ہے کہ معاشرے میں تنظیم سازی کے بغیر لمبے عرصے تک ایک پائیدار اور دیرپا وحدت وجود میں نہیں لائی جاسکتی۔یہ بات ذہن نشین کرلیں کہ یا قو میں شعارات کے سائے میں جمع اور متحد ہوتی ہیں یا مضبوط اور طاقتورقیادتوں کے گرد جمع ہوتی ہیں جیساکہ ہم نے اپنے اسلامی انقلاب میں خود مشاہدہ کیا ہے ۔ لیکن وہ چیز جو طولانی مدت کیلئے معاشرے کے افراد کو مختلف اجتماعی گرو ہوں اورطبقات کو ایک دوسرے سے منسلک و متحد کرتی ہے ،وہ ایک فکری وعملی ہم آہنگی اورایک تنظیم ہے ۔یہاں تنظیم کاوجو د ناگز یر ہو جاتا ہے ۔انسانیت کو آج تک حاصل ہونے والے تجربات اسی حقیقت کو بیان کرتے ہیں ۔
کب تنظیم کی افادیت ختم ہو جاتی ہے؟
جی ہاں ،جس دن دینی افکار و نظریات اور اسلا می سوچ معاشرے کے تمام افراد تک سنجیدگی اور احتیاط کے ساتھ پہنچا دی گئی تو اس وقت ہمیں تنظیم کی کو ئی ضرورت نہیں ہو گی ۔کیو نکہ اس وقت پورامعاشرہ خود ایک تنظیم بن جائے گا جس کی باگ ڈوراس کے اپنے سیاسی اور اسلامی رہبروں کے ہاتھ میں ہو گی۔اس مرحلے تک پہنچنے میں ابھی کافی وقت درکار ہے۔
تنظیم کی اہمیت:
بنا برین تنظیم اورسیاسی تنظیم سازی معاشرے کے اتحاد و اتفاق کی ضامن ہے۔اسی وجہ سے ہم تنظیم کے وجو دپر اصرار کرتے ہیں اور اس بات کے معتقد ہیں کہ وہ لوگ جو تنٓظیم کی مخالفت کرتے ہیں وہ دو حالتوں سے باہر نہیں ہیں، یا وہ غافل اور بے تو جہ ہیں، یا مغرض ہیں۔
ممکن ہے کہ فلاں گروہ فلاں ادارہ یا جماعت و تنظیم مثالی اور آئیڈیل نہ ہو تو یہ ایک فطری سی بات ہے اوراس میں بحث کی ضرورت بھی نہیں ہے ممکن ہے کہ کوئی کسی شخصیت کا مخالف ہو اور کوئی اس کا حامی اس میں بھی کوئی برائی نہیں ہے ،اسی طرح اس بات میں بھی کوئی برائی نہیں کہ کو ئی کسی تنظیم کا حمائتی ہے تو ممکن ہے کوئی دوسرا اس کا مخالف ہو کیو نکہ معاشرے میں اختلاف نظر کا ہونا کوئی بری بات نہیں ہے۔ لیکن اگر کوئی تنظیم کے و جود کا سرے سے ہی انکار کرے تو یا اسے اس بات کی جانب تو جہ نہیں ہے کہ معاشرے اور لوگوں کیلئے تنظیمی وجود اور اس کے ذریعہ ہونے والی تربیت کے کیا فوائد ہیں یا پھر،خدا نہ کرے، وہ مغرض ہے اور کسی خاص ہدف کے تحت یہ باتیں کرتا ہے۔
پہلی ذمہ داری کی ادائیگی کا طریقہ کار:
یہاں ایک بار پھراس نکتے کی جانب اشارہ ضروری ہے کہ حزب جمہوری اسلامی کی دو ذمہ داریوں میں سے ایک یہی ہے کہ اپنے اندر حقیقی معنوں میں نظم اور ہم آہنگی پیدا کرے۔البتہ تنظیم کے مسؤل کو بھی چاہیے کہ وہ اعتقادی، سیاسی اور اقتصادی شعبوں کو فعال کرے جو نہ صرف معاشرے کے افراد کے اذہان کو فکری غذا فراہم کرتے ہیں بلکہ تنظیم کے تمام اراکین کے اذہان کوبھی ۔
ہمیں ان شعبوں کو اس طرح فعال کرنا چاہیے جیسا ان کا حق ہے یعنی پوری تنظیم میں مرکزی عہد ے سے لے کر یو نٹ تک سب کی یہ ذمہ داری ہے۔تمام مختلف شعبوں سے وابستہ اراکین پر بھی پابندی اور حفاظت کی ذمہ داری بنتی ہے، میٹنگوں میں بر وقت حاضری کواہمیت دینا، تنظیم کی طرف سے مہیا کیے گئے مواد کا مطالعہ کرنا، اراکین کا آپس میں صحیح اور ہدف مند بحث کی انجام دہی کو رواج دینا اور پھر ان تصورات اور افکار کو معاشرے کے دوسرے افراد میں ان کی ملازمت ،زندگی اورخاندان میں منتقل کرنا، یہی امور نظام اور تنظیم کو استحکام کا باعث بنتے ہیں۔اہم ترین کام یہی ہیں۔
ایک اسلامی تنظیم کی دوسری ذمہ داری:
اس کے علاوہ حزب جمہوری اسلامی کی ایک اور ذمہ داری بھی ہے جو دو سری جماعتوں میں نہیں ہے۔پوری دنیا میں تو نہیں ہے خود ہمارے ملک میں بھی شاید کہہ سکتے ہیں کہ واقعاً دوسری تنظیموں ، جماعتوں اور گروہوں میں بھی اس ذمہ داری کا احساس موجود نہیں ہے، اور وہ ہے ایک اسلامی اور الٰہی تنظیم کا آئیڈیل پیش کرنا ۔
ہمیں معلوم ہے کہ ہمارے لوگوں کو اسلامی جماعتوں کا ماضی میں ایک لمبے عرصہء مشروطیت (Constitutionalism)سے پہلے سے لے کر آج تک نہ تو کوئی تجربہ ہے اور نہ ہی کبھی سابقہ پڑا ہے۔پہلے تو سرے سے تنظیم بندی کی اس رائج ثقافت کا تصور ہی نہ تھا، اور جب سے سیاسی جماعتیں اور سیاسی تنظیمیں ایران میں روشناس ہوئی ہیں اور جماعتی ثقافت نے آجکل جو شکل اختیار کر لی ہے ، ہمارے لوگوں نے کبھی بھی ایک اسلامی سیاسی جماعت نہیں دیکھی تھی۔ البتہ اسلامی معاشروں میں جماعت بندی موجود تھی، ایسا نہیں ہے کہ اسکا وجود ہی نہ تھا۔ ہمارا اپنا اعتقاد یہ ہے کہ تشیع آغاز اسلام سے ہی ایک جماعت اور تنظیم تھی ،اس بارے میں ہم نے طاغوت کے گھٹن آلود دور میں آئمہ طاہرین علیھم السلام کی زندگی پر گفتگو کے دوران تفصیل سے روشنی ڈالی ہے۔ میرا عقیدہ یہ ہے کہ ولایت جو کہ اسلام کے بنیادی اصولوں میں سے ہے اور اس لفظ کا ذکر قرآن میں بھی انہی معنوں میں استعمال ہوا ہے، ’’مالکم من ولایتھم من شییء حتی یھاجروا‘‘، یہ وہی سماجی تعلق ہے جس کی آج ایک بڑی شکل اور معاشرے میں مدغم صورت ایک سیاسی جماعت اور تنظیم ہے۔
اتفاق سے یہ بھی میں تفصیل سے گذشتہ مباحث میں واضح کر چکا ہوں کہ و لایت درحقیقت اسلامی تنظیم ہی ہے اور پوری تاریخ اسلام میں جہاں جہاں ظالم حکمران اور طاغوت کا راج رہا ہے وہا ں مخفی اور زیر زمین (انڈر گراؤنڈ) ادارے اور تنظیمیں فعال رہتیں جو چھپ چھپا کران ظالم حکمرانوں کے خلاف مزاحمتی جد و جہد کرتی تھیں، جبکہ دور حاضر کی تنظیمیں اور جماعتیں ایسی نہیں ہیں ۔سابقہ ادوار کی جماعتیں موجودہ دنیا میں رائج جماعت یا تنظیم کے مقابلے میں صرف ایک نا قص وجو د شمار کی جاتی ہیں۔ماضی میں جب سے جماعت بندی ایران میں شروع ہوئی ہے اکثر جماعتیں اور تنظیمیں دینی نہیں تھیں یعنی اسلام مخالفت تھیں، یا اگر ان میں کوئی دینی تھیں بھی توان کی بنیا د صحیح فقہی اور اسلامی نہیں تھی ،یاان میں سے کچھ اسلامی تو تھیں مگر لوگوں میں اچھی طرح قدم نہیں جماپائیں اور معاشرے میں انہیں کوئی بھی دینی جماعت یاتنظیم کی حیثیت سے نہیں جانتا تھا یا پھر ان کی قیادت غیر معروف تھی، جسکا نتیجہ یہ ہوا کہ گذشتہ کئی دہائیوں میں لوگوں کے سامنے جو جماعتیں مشہور ہوئیں وہ غیر اسلامی عقاید کی حامل تھیں۔ایسی کوئی تنظیم جو قرآنی تعلیمات کی بنیاد پر صحیح اسلامی نظریات کیساتھ، قرآنی اور دینی تعلیمات کے جاننے والے اور ماہر افراد کے ذریعے سے بنائی گئی ہو اور معاشرے میں روشناس کرائی گئی ہو یا لوگوں کو اس کے بارے میں بتایا گیا ہو،کا کوئی معقول انتظام نہیں کیا گیا۔
حزب جمہوری اسلامی کی تشکیل کا تاریخچہ:
اس تجربے کا آغازانقلاب اسلامی کے بعد حزب جمہوری اسلامی کی تشکیل اور پھیلنے سے ہو ا ،خود ہمارے ذہن میں بھی نہیں تھااس قسم کی جماعت بندیوں اور تنظیموں کے ہو تے ہوئے لوگ حزب جمہوری کا اتنا شاندار استقبال کریں گے ۔
اس میں حرج نہیں آپ بھی سن لیں، جب ہم اس حز ب کا منشور لکھ رہے تھے تو ہم نے طے یہ کیا تھا کہ اس کاپہلا عمومی اجلاس تب بلائیں گے جب اس کے اعضا ء کی تعداد 313تک ہو جائے گی۔ یعنی اصحاب بدر و اصحاب طالوت جتنی۔
یہ ہم اس وقت سوچ رہے تھے جب دوتین دن بعد ہم نے اس حز ب کی تاسیس کا اعلان کرنا تھا، اور ہمارے خیال میں اعلان کے بعد ایک آدھ بندہ آئے گارکنیت کیلئے ،پھر دو،تین اور آئیں گے، پھرکچھ اور اضافہ ہو ں گے ۔ یوں دوتین ماہ تک 313ارکان پورے ہو ہی جائیں گے ۔اسی تعداد کو ہم نے حزب کے آئین میں بھی لکھا تھا یعنی 300اراکین ،313اس لئے نہیں لکھا کہ لو گ یوں نہ کہیں کہ یہ اپنے آپ کو اصحاب بدر کے درجے کا سمجھ رہے ہیں ۔ لہٰذا 300لکھا گیا، لیکن ہمارے دل میں وہی 313کاعدد ہی تھا ۔
اب جس دن اس حزب کا اعلان کیا گیاتو ظہرتک تقریباً کئی ہزار افراد عضو بن گئے ،اور اگلے چند دنوں میں اسی ہزار لوگوں نے اپنا نا م لکھوا دیا تھا اور عملاً عمومی اجلاس بلانا ہی ہمارے لیئے محال ہو گیا۔ اور دو تین سال تک ہم عمومی اجلاس ہی نہ بلوا سکے ۔البتہ الحمداللہ پچھلے سال تو فیق حاصل ہوئی اور یہ اجلاس برگزار کیا گیا ۔جس طرح کے خیالات جماعتوں اور تنظیموں کے بارے میں اس ملک کے لوگو ں کے افکار پر حاکم تھے، ہمیں امید نہیں تھی کہ ہماری جماعت یہاں پاؤں جماپائے گی ۔اس وجہ سے کچھ متدین لوگ جو عرصے سے اسلام ، قرآن اور اسلامی افکار پر کام کر رہے تھے اس حزب کی عضویت سے پہلے امام ؒ کے پاس گئے اور ان سے باقاعدہ اجاز ت لی تاکہ اس حزب کے رکن بنیں ۔باوجود اس کے کہ انہیں ہم پر اعتماد تھا ،ہمیں جانتے تھے، پھر بھی کیونکہ جماعت بندی اور تنظیم سازی سیاسی کام تھا جب تک امام ؒ سے پوچھ نہ لیا اور جب امام نے انہیں کہا کہ اس میں کو ئی حرج نہیں اور بے شک اس کے رکن بنیں، تب تک انہوں نے عضویت اختیار نہ کی۔
ایسے حالات تھے اور ہماری جماعت پہلی بار جماعت بندی سے متعلق ایک لمبے عرصے کی بد اعتمادی بد بینی اور بے اعتناعی کی فضا ء کے ہوتے ہوئے وجود میں آئی۔
اس کی قیادت میں بھی وہ افراد تھے جنہیں لوگ تقریباً جانتے تھے ۔ہر علاقے میں کچھ افراد انہیں پہچانتے تھے اوراگر زیادہ مشہور نہ بھی تھے تو کم از کم ایسے تھے کہ لو گ ذرا سی کو شش سے ان کی زند گی کے بارے میں آگاہی حاصل کر لیتے اور کوئی بھی ایسا نہ تھا جس کا ماضی خراب ہوتا، لہٰذا لوگو ں نے قیادت پر اطمینان کا اظہار کیا اور جب امام ؒ نے بھی حمایت کی تو حزب نے پوری قوت سے اپنے آئین اور منشور کے تحت اپنے اسلامی اور منطقی اہداف کیلئے کام کرنا شروع کر دیا اور کچھ ہی مدت میں اس کا اتنا استقبال ہو ا کہ شاید دو میلین (20لاکھ ) سے زیادہ عضویت کی درخواستیں آگئیں ۔اب ہمیں سمجھ نہیں آرہی تھی کہ کس طرح ان کی تنظیم سازی کی جائے ،کیونکہ اس قسم کا ہمیں تجربہ ہی نہ تھا کبھی سوچا بھی نہ تھا کہ 20،30 لا کھ افراد کو کس طرح منظم کریں گے ۔یہ تجربہ بالکل نیا تجربہ تھا ۔یہ تجربہ آج تمام لوگو ں کیلئے اور ان کے لئے جو آئندہ آئیں گے اور تمام اسلامی دنیا کے ان افراد کیلئے جو اس ملک اور انقلاب کا مطالعہ کر رہے ہیں اور بڑی توجہ سے مشاہدہ کر رہے ہیں سب کیلئے ایک نمونے کی حیثیت رکھتا ہے، ایک اسلامی تنظیم سازی ۔
اسلامی اخلاق اور اسلامی اصول و قوا نین کی مکمل اور بے چوں و چراپابندی واطاعت ایک اسلامی تنظیم کی اضافی ذمہ داری ہے جو شاید دوسری تنظیموں میں نہیں پائی جاتی یااگر اپنی ذمہ داری سمجھتی بھی ہیں تو اس شدت سے عمل نہیں کرتیں۔
ہمارا شروع سے یہ دعوی ہے کہ تنظیم شہرت کی ہوس مٹانے کے لیئے نہیں، طاقت کے حصول کا ذریعہ نہیں، مقام و منصب کے حصول کی سیڑھی نہیں ہے۔ سماجی حیثیت اور مرتبے کو حاصل کرنے کا وسیلہ نہیں ہے، اس کی دلیل بھی یہی ہے کہ اس کے اہم ترین شخص یعنی شہید آیت اللہ بہشتی رضوان اللہ علیہ نے حزب جمہوری کی بنیاد پر نہ فقط سماجی حیثیت پیدا نہیں کی بلکہ اسکی وجہ سے دشمنوں کے بد ترین حملوں کا نشانہ بنے اور آپ سب کو معلوم ہی ہے کہ مرحوم ڈاکٹر بہشتی کے ساتھ کیا کچھ ہوا تھااور بے پناہ خصوصیات کے علاوہ کہ جن کی بدولت بد خواہوں کے حملوں کا ٹارگٹ بنے ایک وجہ ان حملوں کی یہی حزب تھی جس کے وہ رکن تھے اگر اس میں نہ ہوتے تو شاید ان پر اس قدر حملے نہ کیئے جاتے۔
تنظیم ایک وسیلہ:
پہلے سے ہم یہ اعلان کر چکے ہیں کہ تنظیم انقلاب کے اہداف کی خدمت کے لیئے ایک وسیلہ اور آلہ ہے۔ ایک وسیلہ انقلاب کے وعدوں تک پہنچنے میں آسانی کی خاطر،کئی بار کہہ چکے ہیں کہ اگر ہماری تنظیم نے ایک دن خدانخواستہ انقلاب اسلامی کے راستے سے معمولی سابھی انحراف کیا تو ہم خود سب سے پہلے اس کا مواخذہ کریں گے۔ایک ایسی تنظیم کے وجود کا انقلاب کی خدمت اور انقلاب کے اہداف کے سوا کوئی فلسفہ ہی نہیں اور نہ ہی اس کے وجود کی کوئی دلیل ہے۔
اسلامی تنظیم کے اندرونی روابط:
ایک تنظیم جو ان خصوصیات کی حامل ہو ، اس کے اندر ونی تعلقات اور رابطوں کو سو فیصد سیاسی اخلاقیات پر مبنی ہو نا چاہیے۔اگرایسا نہ ہو تو ہم نے اپنی تنظیم کا حق ادا نہیں کیا اور اس سے وفا نہیں کی،مثلا تنظیمی برادران اور خواہران کو ایک دوسرے کی غیبت سے پرہیز کرنا چاہیے،ایک دوسرے کے بدخواہ نہ بنیں ،خواہ وہ انسان برا ہی کیوں نہ ہو، کسی اچھے انسان کے لیئے تو ویسے ہی کوئی برائی کا نہیں سوچتا ۔ جس کے بارے میں جب کوئی یہ فرض کر لیتا ہے کہ وہ اچھا آدمی نہیں ہے تو اس سے بد دل ہو کر اسکی بد خواہی پر اتر آتا ہے، آپ یوں بھی نہ کریں۔
(توجہ رہے کہ تنظیم کے ا ن افراد کے بارے میں کہ جن کے برے ہونے سے اجتماعی برائی اور تنظیم کے برے ہونے کا خطرہ لاحق ہو تو یہاں اصول تبدیل ہو جائے گا)
اسلامی طرز فکر یہ نہیں ہے کہ انسان تمام بندگان خدا کے لیئے بلااستثناء خوش دلی،محبت اس کی ہدایت پر مصّراور مہربانی کا سلوک روا رکھے۔ بلکہ کچھ افراد کی مخالفت بھی ضروری ہے ۔انبیاء(ع) روئے زمین پر بسنے والے تمام افراد پر مہربان اور ان سے محبت کرنے والے تھے، البتہ وہ ’’اشداء علی الکفار‘‘بھی تھے، لیکن پہلے وہ کافروں کو پیار محبت سے خدا پرستی اور توحید کی طرف دعوت دیتے تھے اور ان کی خواہش یہی ہوتی تھی کہ گمراہوں کی ہدایت کریں ، لیکن جب اس میں کامیاب نہ ہوتے اور کافر انبیاء (ع)کی ہدایت میں رکاوٹ نہیں بنتے تو انبیاء ؑ بھی ان سے کو ئی سروکار نہ رکھتے۔ لیکن جب کافر اس بات میں رکاوٹ اور مانع بنتے تھے کہ انبیاء(ع) اپنی ہدایت اور نور کو لوگوں تک پہنچائیں تو پھر وہ ایسی رکاوٹ کو اپنی راہ سے ہٹادیتے تھے ۔انبیاء (ع)کا یہ عمل بھی در حقیقت ایک قسم کی محبت تھی، دوسرے مسلمانوں کی خاطر۔
ایک تنظیم سے تعلق رکھنے والے تما م برادران اور خواہران کو جاننا چاہیے کہ ان کی بنیادی ترین ذمہ داری میں سے آپس میں ایک دوسرے سے پیارو محبت اور مہربانی کا سلوک اور اسکے ساتھ ساتھ دوسرے افرادسے بھی پیار ومحبت کا سلوک رکھنا ہے ۔تو جہ رہے کہ اگرآپ ایک دوسرے پر تعمیری تنقید بھی کریں تو یہ بغض اور دشمنی کا موجب نہ بنے ،ایک دوسرے کی نسبت کینہ کو اپنی دل میں آنے نہ دیں ،دیکھنے میں آیا ہے کہ کچھ افراد ان اخلاقی اصولوں کی پابندی نہیں کرتے اور جان لیجئے کہ یہ ایک اسلامی تنظیم کے اخلاق میں سے نہیں ہیں ۔
اسلامی تنظیم کودرپیش اندرونی خطرات:
ایک بار پھر میں ان امور کی تکرار کروں گا کہ جس پر آپ لوگوں کو توجہ کرنی چاہیے کہ اگر تنظیم اسلامی اخلاق اورباہمی محبت اور ایک دوسرے کیلئے اچھے خیالات اور صاف دل رکھنے سے عاری ہو تو جان لیجئے کہ تنظیم کے افکار و پیغام کو پہنچانے کیلئے جس اتحاد اور وابستگی کی ضرورت ہے وہ بھی ختم ہوجائے گا،یا وجود میں ہی نہیں آئے گا ۔اس بنا پر ہم سب کافرض ہے کہ ہم اسلامی اخلاق کواپنائیں تا کہ دوسروں کیلئے مثالی نمونہ بن سکیں اور اپنی تنظیم کے اتحاد اور وحدت کی حفاظت کر سکیں ۔
اگر آپ دیکھیں کہ کسی یونٹ میں آپ کا کوئی بھائی یا بہن اس طرح کام نہیں کرتا جس طرح آپ پسند کرتے ہیں تو ایسا نہ ہو کہ آپ اسے ادھر ادھر اس کی برائی کرنے کا ہتھیار بنا لیں۔میں یہاں موجود برادران اور خواہران کے لیئے یہ بات نہیں کر رہا ، آپ کے درمیان شاید ایک بھی ایسا نہ ہو کہ اس میں ایسی کوئی منفی صفت پائی جاتی ہو۔ بلکہ یہ تنظیمی طرز فکر ہے کہ جسے آپ کے سامنے بیان کر رہا ہوں ، حتی آپ اگر اس کے مخاطب شمار نہ بھی ہوں۔بعض افراد کسی تنظیم میں ایسے بھی ہوتے ہیں کہ وہ ایک معمولی سی غلطی اور بہانے سے کسی کے خلاف محاذبنالیتے ہیں ۔جان لیجئے کہ یہ کام تنظیم میں گروپنگ اور دھڑے بندی کا باعث بنتاہے اور یہ ایک بہت بڑاخطرہ ہے
بعض اوقات ایسا بھی ہوتا ہے کہ جب کسی عہدے کے لیئے کسی فرد کا یا کسی تنظیمی عہدے دار کا نام لیا جائے تو فوراً اس کا کوئی عیب بیان کر کے اسے نظرانداز کر دیتے ہیں ۔اگر طے یہ ہو کہ آپ کسی ایسے انسان کو قبو ل کریں کہ جس میں کوئی بھی عیب موجود نہ ہو تو ایسا انسان آپ کو کہاں سے ملے گا۔یوں اگر آپ میرے عیوب کو تلاش کرنے لگ جائیں تو ایک بہت ضخیم کتاب مرتب کر لیں گے، لیکن آپ لوگوں نے مجھے قبول کر رکھا ہے۔(اس تنظیم میں)ہم نے ایک دوسرے کو ان عیوب اور نقائص کے ساتھ قبول کررکھا ہے ۔ایک ٹیم ورک اور گروہی صورت میں کرنے والے غیرمعصوم افراد اسی نظر یے کے تحت آپس میں تعاون کرتے ہیں کہ وہ ایک دوسرے میں موجود نقائص اور عیوب قبول کر یں گے۔مثلًا اگر آپ کے مشاہدے میں یہ بات آئے کہ جسے آپ پسند کرتے ہیں ایک دوسرا اسے پسند نہیں کرتا تو یہ آپ کی نظر میں اس کا ایک عیب شمارہونے لگے گا ۔ لیکن کیا یہ اس بات کا موجب بننا چاہیے کہ آپ اسے بالکل جھٹلا دیں۔افسوس کے ساتھ یہ کہنا پڑتا ہے کہ بعض اوقات تنظیموں میں دونوں طرف کچھ افراد ایسے موجود ہو تے ہیں جو دھڑے بندیوں اور جماعت میں ایک اور جماعت بندی جیسے مسائل پھیلانے کا باعث بنتے ہیں ۔جان لیجئے کہ یہ تمام باتیں کسی بھی صورت میں تنظیم کی مصلحت میں نہیں ہیں اور یہ کسی بھی صورت میں قابل قبول نہیں ہیں۔اسلامی تنظیم کے اصول سب کے لیئے روشن اور واضح ہیں۔
ہمیںیہ بات ذہن نشین کر لینی چاہیے کہ ایک مذہبی تنظیم و جماعت کی فعالیت و سیاست کا بنیادی اور اصلی محور اسلامی اصول و قوانین ہیں جن کی بنیاد پر اسے اتحاد و اتفاق اور ہم آہنگی کیلئے کام کرنا چاہیے ۔اگر کوئی یہ کہے کہ میں فلاں شخص کو فلاں سے زیادہ پسند کرتاہوں اور دوسرا اس کے جواب میں یہ کہے میں بھی فلاں شخص کو فلاں سے زیادہ پسند کرتا ہوں اور وہ ا س بات پر ایک دوسرے سے اختلاف کریں تو یہ تنظیمی اصولوں کی خلاف ورزی کے ساتھ ساتھ اتحاد کو پارہ کرنے والا ہے اور کسی بھی صورت میں قابل قبول نہیں !
تنظیم سے تعلق رکھنے والے تمام بھائیوں اور بہنوں کو چاہیے کہ وہ اپنی تنظیم کی بھاری ذمہ داری کو پیش نظر رکھتے ہوئے تنظیم میں دوسروں سے متعلق اپنے حسن ظن اور محبت کو زیادہ کریں ۔کہیں ایسا نہ ہو کہ آپ کے یونٹ میں سیاسی مسائل اور حالات پر بحث اور تجزیہ وتحلیل نیز اسلامی قوانین کے اوامر و نواہی پر گفتگو کے بجائے کسی خاص سیاسی تفکر اور سیاسی دھڑے بندیوں پرگفتگو شروع کر دیں !
مثلاً ایک مدرسے کا ایک خاص تفکر ہے اور دوسرے میں ایک اور فکر رائج ہے،اب شروع کر دیں ایک دوسرے کی بد گوئی ، ہمارے مشاہدے میں ہے بعض افراد ایک جگہ بیٹھتے ہیں اورفلاں علمی شخصیت یا فلاں علمی فکر کی برائیاں شروع کر دیں گے، ادھر سے اٹھ کر جائیں گے تو ایک اور شخص اور سیاسی جماعت کی بدگوئی میں لگ جائیں گے ، حتی ایک مخصوص دھڑا بنا لیتے ہیں، البتہ ان میں اتنی پائیداری نہیں ہوتی لیکن ہرچیز کا مسئلہ بنا کر اس کی برائی شروع کر دی جائے تو اسکا کیا نتیجہ نکلے گا؟
کچھ افراد تنظیم سے باہر کسی موثق اور معتبر آگاہی کے بغیر حالات و واقعات کی اپنی بیماراور مریض ذہنیت سے تحلیل شروع کردیتے ہیں کہ جناب فلاں تنظیم تو دو دھڑوں میں تقسیم ہو گئی ہے ،ایک اور کہے گا تین جبکہ تیسرا کہے گا چار حصوں میں تقسیم ہو گئی ہے ،ان میں سے ہر ایک ہر دھڑے کیلئے ایک سربراہ کا بھی تقررکر دے گا ،فلاں کی فلاں سے نہیں بنتی ، فلاں اسکا مخالف ہے، اور فلاں اسکا ایک نمبر مخالف ہے ، فلاں دو نمبراور یوں اس کام سے ایک اہم ترین ، بڑی اور بہترین سیاسی جماعت کو معاشرے میں داغداربنانے کی کوشش میں لگے رہتے ہیں۔
حقیقت تو یہ ہے کہ جو لوگ تنظیم سے باہر رہ کر تنظیم کے داخلی معاملات کو زیر بحث لاتے ہیں ،انہیں منہ کی کھانی پڑتی ہے ۔ ممکن ہے کہ ایک ہی تنظیم میں آپ کو دو افراد ایسے ملیں کہ جن کے عقائد سو فیصد ایک جیسے نہ ہوں ۔کیا آپ دنیا میں دو انسان ایسے تلاش کرسکتے ہیں جن کے عقائد سو فیصد ایک جیسے ہوں !کیا ہم پانچ آدمی جو شروع سے اکٹھے ہیں اور حزب کی بنیاد ہم نے ڈالی ہے ہر چیز کے بارے میں ایک ہی طرح سے سوچتے ہیں؟ کیا ہماری آپس میں کبھی بحث نہیں ہوئی؟شوری مرکزی میں شہید بہشتی ، شہید باہنر اور دوسروں میں اختلاف رائے کبھی پیش نہ آیا تھا؟ بے شمار ایسے مواقع پیش آئے ہیں ۔
اسلامی تنظیم کا بنیادی اصول:
انسان کا باہمی اشتراک، تعاون ،اخوت اورآپس کی گفتگو کا مطلب یہ نہیں کہ سب کے سوچنے سمجھنے اور عمل کا انداز ایک جیسا ہو اور مسائل کے بارے میں سب کی تشخیص ایک جیسی ہو، انسانوں کا نقطہ نگاہ بعض اوقات ایک دوسرے سے مختلف اور مخالف ہوتا ہے لیکن عقلمند اور با شعور ترین انسان وہی ہوتے ہیں کہ جب وہ کسی دوسرے انسان کے ساتھ بیٹھتے ہیں تو اختلافی اور معارض نقاط تلاش کرنے کے بجائے مشترک نقاط کو تلاش کرتے ہیں اور مشترک نقطہ کو مضبوط بناتے ہیں ۔
دیکھیے کہ قرآن رسول اکرم صلی اللہ علیہ وآلہ وسلم کو حکم دیتاہے ۔"قل یا اھل الکتاب تعالو ا الی کلمۃ سواء بیننا وبینکم "اے اہل کتاب، اے یہود ، اے نصاری ، اے ہمارے قسم خوردہ دشمنوں!تم سب آؤ ،نہ کہ ہم سے دور چلے جاؤ ،آؤ قریب آؤ ،یہ ہے اسلام کا لہجہ "تعالو" ،کہاں آؤ "الی کلمۃ سواء بیننا وبینکم "آؤ اس محور پر جمع ہو جائیں جو ہمارے اورتمہارے درمیان مشترک ہے ،آؤ مل کر اس پر جمع ہو جاتے ہیں ،وہ محور کیاہے ؟وہ توحید ہے :"ان لا نعبد الا اللہ ولا نشرک بہ شیئاً ولا یتخذ بعضناً بعضاً اربا باً من دون اللہ "
جب اسلام یہود ،نصاری سے کہہ سکتا ہے کہ آؤ ایک محورپر جمع ہو جاؤ تو کیوں ہم اپنے ایک مسلمان بھائی سے ،امام کے پیروکار ، تنظیمی سے یہ کہیں کہ چلے جاؤ ! کیوں؟یہ کون سی فکرہے ؟ آپ کی کو شش ہو نی چاہیے کہ افراد کو جذب کریں ۔
میں محسوس کرتا ہوں کہ بعض افراد تنظیم میں رہتے ہوئے اپنی تنگ نظری سے تنظیمی اتحاد و وحدت کو مخدوش اور داغدار بناتے ہیں اور چپقلش اور باہمی کشمکش پیداکرتے ہیں لیکن تنظیمی بہن بھائیوں کی اکثریت اس قسم کے اختلافی مسائل اور باہمی کشمکش سے دور ہیں،اگر سو فیصد نہ بھی ہوں تو اکثریت ان حرکتوں سے مبرّا ہیں۔ کچھ لوگ ہیں جو یہ اختلافی صورتحال پیدا کرتے ہیں، لیکن ان اختلافات اور کشمکش کے دونوں طرف موجود افراد کی اکثریت اچھی اور سالم فکر کی مالک ہے ۔یہ کچھ لوگ ہیں جو پہلے ایک طرف کے کچھ لوگوں کے پاس جا کر کسی دوسرے کے خلاف باتیں کرنا شروع کر دیتے ہیں، پھر انکے پاس جا کرانہیں پہلے والوں کے خلاف اکساتے ہیں ۔ جبکہ خود تنظیمی برادران اور خواہران میں شاید اس قسم کے حقیقی اختلاف سرے سے موجودہی نہ ہوں!
جبکہ کچھ لوگ موقع کی تلاش میں ہوتے ہیں ،کسی تنظیمی معاملے پر ،کسی اخبار کے مقالے پر، ایک چھوٹے سے مسئلے پر ،ایک تصویر پر،کسی اخبار کی سرخی پر ،کسی وزیر کے منتخب ہونے پر کسی تقریر پر اور کسی کی زبان سے ادا ہونے والے ایک لفظ پربے دلیل اختلافات کا ایک پہاڑ کھڑا کر دیتے ہیں !
انشاء اللہ ہم اپنے تربیتی ، سیاسی اور اقتصادی شعبوں کو اور مضبوط کرنے اور فعال کرنے کی کوشش کریں گے، تاکہ فکری مواد تیار ہو اور تنظیم کو مہیا کریں اوریہ شعبے تنظیم میں مرکزی حیثیت کے حامل ہوں تاکہ ان کے بل بوتے پر برادران اور خواہران تنظیمی سیٹ اپ اوراپنے اتحاد کو مزیدقوی کر سکیں۔
میری آپ سب کو یہ نصیحت ہے کہ آپ سب تنظیمی برادران اور خواہران کو چاہیے کہ وہ حتی الا مکان اختلا فات کو ختم کریں ۔یہ با ت جان لیں کہ اگر ایک دوسرے کی خطاؤں سے چشم پو شی اور در گذر نہ کریں گے تو تنظیم سے باہر دشمن آپ کی تاک میں بیٹھا ہے، اور ایک موقع کی تلاش میں ہے کہ تنظیم پر کاری ضرب لگائے اور اسے منہدم کردے ۔
اب یہ دشمن جانتا ہے کہ وہ کیا کر رہا ہے یا دوسروں کے ہاتھوں فریب میں مبتلا ہے ؟میں یہاں فی الحال کو ئی یقینی فیصلہ نہیں کرنا چاہتا۔ لیکن اگر تلاش کیا جائے تو ایسے افراد کا جو دوسروں کے ہاتھوں میں کھیل رہے ہیں اورجو خود مغرض ہیں کا پتا چلایا جا سکتا ہے ،جو ہمیشہ تنظیم کو خراب کرنے کے موقعے کی تلاش میں رہتے ہیں، افواہیں پھیلا کر ، غلط باتیں تنظیم سے منسوب کرکے،تنظیم کے عہدیداروں کو متہم کرکے یا تنظیم کے فیصلوں پر اعتراض کر کے اسے داغدار اور خراب کرنے کے درپے رہتے ہیں ۔ البتہ تنظیم کو مضبوط بنانا ہمارا فرض ہے ، تنظیمی فعالیت کو بنیادی نوعیت کا کام سمجھتے ہیں ۔ہم خدا سے توفیق کی درخواست کرتے ہیں اور چاہتے ہیں کہ اس بنیادی کام کو انشاء اللہ انجام دے سکیں ۔
انشاء اللہ یہ توفیق پروردگار ہم سب کو عطا فرمائے کہ انقلاب کے اہداف اور اس کی آخری منازل تک زیادہ تیزی سے قدم بڑھا سکیں۔