وحدت نیوز (گلگت)  مجلس وحدت مسلیمن پاکستان گلگت بلتستان نے شام میں حضرت بی بی زینب (س) کے روضہ اقدس پر تکفیریوں کے حملے اور متولی کی شہادت اور روضے کو پہنچنے والے جزوی نقصان پر ملک بھر کی طرح گلگت بلتستان میں بھی ایم ڈبلیو ایم کے قائدین کی اپیل پر بھرپور احتجاج اور ایام سوگ منانے کا اعلان کیا ہے۔ صوبائی سیکرٹریٹ ایم ڈبلیو ایم گلگت سے جاری ہونے والے ایک بیان میں ایم ڈبلیو ایم کے سیکرٹری اطلاعات قاسم علی نے کہا ہے کہ شام میں عالمی استعماری طاقتیں مقامی تکفریوں کی بھرپور مدد کرکے خانہ جنگی کو فروغ دے رہی ہیں اور اس میں بعض عرب ملکوں کی بھی براہ راست مداخلت ہے، جو لمحہ فکریہ اور شرمناک اقدامات ہیں۔

وحدت نیوز (سرگودھا)  شام میں روضہ مبارک حضرت زینب (س) پر حملہ کے خلاف مجلس وحدت مسلمین کی جانب سے سرگودھا میں بھی احتجاجی ریلی نکالی گئی۔ ریلی کا آغاز مرکزی امام بارگاہ بلاک نمبر 7 سے ہوا اور حسین چوک میں پہنچ کر ریلی اختتام پزیر ہوئی۔ ریلی کے شرکاء نے بینرز اور پلے کارڈز اٹا رکھے تھے، جن پر دہشتگردوں اور تکفیری سوچ کی حامل قوتوں کے خلاف نعرے درج تھے۔ شرکائے ریلی لبیک یا زینب (س) کے فلک شگاف نعرے بلند کر رہے تھے۔ ریلی کی قیادت مجلس وحدت مسلمین ضلع سرگودھا کے ڈپٹی سیکرٹری جنرل فیصل عمران چوہدری، سیکرٹری سیاسیات سید ظفر عباس بخاری ایڈووکیٹ، شیعہ علماء کونسل کے رہنماء عمران علی رانجھا اور مولانا ظہور حسین خان نے کی۔ ریلی کے شرکاء سے خطاب کرتے ہوئے ایم ڈبلیو ایم کے ضلعی ڈپٹی سیکرٹری جنرل فیصل عمران چوہدری نے کہا کہ حکومت ہوش کے ناخن لیتے ہوئے ملک کے خارجی راستوں کو بند کرے، جہاں سے جاکر دہشتگرد شام میں دہشتگرادنہ کارروائیاں کر رہے ہیں۔ انہوں نے کہا کہ آل سعود اور آل یہود کا گٹھ جوڑ ہوچکا ہے، جوکہ اسلام کو مٹانے کیلئے ہوا ہے۔ لہذا باشعور طبقات کو اس بات کا نوٹس لینا چاہئے۔

ان کا کہنا تھا کہ اگر کسی نے بی بی زینب (س) کے روضہ کی طرف میلی آنکھ سے دیکھا تو ہم اپنے نوجوانوں کو شام لیجائیں گے بی بی (س) کے روضہ کی حفاظت کریں گے۔ شرکائے ریلی سے خطاب کرتے ہوئے انہوں نے کہا کہ آپ اپنے آپ کو آمادہ و تیار رکھیں، اگر ہمارے قائدین کی جانب سے حکم آیا تو ہم شام جائیں گے۔ انہوں نے قائد مقاوومت سید حسن نصر اللہ کو خراج تحسین پیش کرتے ہوئے کہا کہ ہمیں امید ہے کہ حسن نصر اللہ کی موجودگی میں کوئی دہشتگرد اس قسم کی ناپاک جسارت نہیں کر سکتا۔ ریلی سے خطاب کرتے ہوئے مولانا ظہور خان نے کہا کہ تکفیری سوچ کے حامل طبقہ نے اس بزدلانہ حملہ سے اپنی سوچ کو ظاہر کردیا ہے۔ لہذا حکومت پاکستان کو اپنا دوہرا کردار ختم کرتے ہوئے واضح طور پر یہ فیصلہ کرنا ہوگا کہ اس نے سپاہ یزید کا ساتھ دینا ہے یا حسینیت کا۔ انہوں نے کہا کہ فلاح اسی میں ہے کہ حسینیت کا ساتھ دیا جائے تاکہ ان کی دنیا و آخرت بہتر ہوسکے۔

وحدت نیوز (ملتان)  مجلس وحدت مسلمین پاکستان کے مرکزی سیکرٹری جنرل علامہ ناصر عباس جعفری کی اپیل پر ملک کے دیگر شہروں کی طرح جنوبی پنجاب میں بھی گزشتہ روز نواسی رسول (ع) حضرت زینب سلام اللہ علیھا کے روضے مبارک پر حملے کے خلاف احتجاجی مظاہرے اور ریلیاں نکالی گئیں۔ جنوبی پنجاب میں سب سے بڑا احتجاجی مظاہرہ ملتان میں کیا گیا جو کہ علمدار روڈ سے شروع ہوا اور فوارہ چوک پر اختتام پذیر ہوا۔ مظاہرے کی قیادت مجلس وحدت مسلمین پاکستان ملتان کے سیکرٹری جنرل علامہ سید اقتدار حسین نقوی اور علامہ قاضی نادر حسین علوی نے کی۔ مظاہرین نے ہاتھوں میں بینرز اور پلے کارڈز اُٹھائے ہوئے تھے۔

 مظاہرین نے اس موقع پر بھرپور نعرے بازی کی۔ مظاہرین سے خطاب کرتے ہوئے مجلس وحدت مسلمین ملتان کے سیکرٹری جنرل علامہ سید اقتدار حسین نقوی کا کہنا تھا کہ شام میں باغیوں کی جانب سے نواسی رسول حضرت زینب سلام اللہ علیھا کے روضے پر حملے پورے عالم اسلام کے قلب کو مجروح کیا ہے۔ علامہ قاضی نادر حسین علوی کا کہنا تھا کہ شام میں ایک ناصبی ٹولہ آل محمد (ص)کی دشمنی میں شعائراللہ کی حرمت پامال کر رہا ہے۔ ملتان کے علاوہ بہاولپور، رحیم یارخان، کبیروالا، شورکوٹ، جھنگ، فیصل آباد، جہلم، سرگودھا، ڈیرہ غازیخان اور دیگر شہروں میں بھی احتجاجی مظاہرے کیے گئے۔

وحدت نیوز (کراچی) پاکستان سنی تحریک کے سربراہ محمد ثروت اعجاز قادری نے کہا ہے کہ مزارات صحابہ اور مزارات اولیاء کے تحفظ کیلئے آخری سانس تک جدوجہد کریں گے۔ حضرت بی بی سیدہ زینب ﴿س﴾ کا روضہ مبارک ہماری عقیدتوں کا محور ہے ہم اس کے تحفظ کیلئے خون کا آخری قطرہ تک نچھاور کر دینگے۔ حضرت بی بی سیدہ زینب ﴿س﴾ کے مزار کو نشانہ بنانے والے جان لیں کہ یہ 13ویں صدی نہیں پندرویں صدی ہے وہ وقت گذر گیا جب جنت البقیع میں اہل بیت اطہار ﴿ع﴾ و صحابہ کرام ﴿رض﴾ کے مزارات کو بلڈوزر چلا کر شہید کر دیا تھا۔ عوام اہلسنت اہل بیت اطہار ﴿ع﴾ و صحابہ کرام ﴿رض﴾ کے مزارات کا تحفظ کرنا جانتے ہیں۔ ان مزارت کی طرف اٹھنے والی ہر ناپاک انگلی کاٹ دی جائے گی۔ ان خیالات کا اظہار انہوں نے شام کے شہر دمشق میں حضرت بی بی سیدہ زینب ﴿س﴾ کے روضہ اقدس پر شامی باغی دہشت گردوں کے ہاتھوں راکٹ حملے کی شدید مذمت کرتے ہوئے کیا۔
 
ثروت اعجاز قادری نے کہا کہ ملک بھر کی سنی عوام دشمنان اہل بیت ﴿ع﴾ کی ناپاک جسارت کے خلاف اپنے بھرپور جذبات کا اظہار کرکے یزیدی ٹولے کو یہ باور کرا دیں کہ میدان کربلا سے امام عالی مقام امام حسین (ع) کی اٹھنے والی آواز کے جواب میں کروڑوں مسلمان لبیک یاحسین ﴿ع﴾ کی صدائیں آج بھی بلند کر رہے ہیں۔ ثروت اعجاز قادری نے کہا کہ یہود و ہنود کے ایجنٹ باطل قوتیں سن لیں غلامان مصطفٰے ﴿ص﴾ اہل بیت اطہار ﴿ع﴾ و صحابہ کرام ﴿رض﴾ کے مزارات کے تحفظ، اسلام کی سلامتی کیلئے اپنا تن من دھن سب کچھ قربان کر دینگے۔ انہوں نے کہا کہ حضرت بی بی سیدہ زینب ﴿س﴾ کے روضہ اقدس پر راکٹ حملے سے مسلمانوں کے جذبات مجروح ہوئے ہیں۔ وزارت خارجہ اس افسوسناک واقعے پر احتجاج کرے۔ پاکستان سنی تحریک کے تحت حضرت بی بی سیدہ زینب ﴿س﴾ کے مزار پر حملے کے خلاف ملک بھر میں احتجاجی مظاہرے کئے جائیں گے۔