The Latest
وحدت نیوز(لاہور ) سینئر صحافی اور معروف اینکر پرسن مبشر لقمان نے کہا ہے کہ کوئٹہ کے سانحے کے شہداء کی مائوں، بہنوں اور شیعہ قوم کے پرامن احتجاج نے مجھے سوچنے پر مجبور کر دیا کہ اصل ماجرا کیا ہے، میں نے ہمیشہ کہا کہ اسلام کے اصل دشمن اندر ہیں، اسلام کے اصل دشمن یہ نام نہاد مسلمان ہیں۔ ان خیالات کا اظہار اُنہوں نے لاہور میں مجلس وحدت مسلمین کے زیراہتمام سیمینار بعنوان ''مصر اور شام میں امریکی جارحیت کے پس پردہ حقائق'' سے خطاب کرتے ہوئے کیا۔ اُنہوں نے مزید کہا کہ مجھے افسوس ہے کہ ہم امریکہ کو برا کہتے ہیں مگر اصل برائی کی جڑ سعودی عرب ہے۔ مسلمانوں کی معاشی، سیاسی اور اقتصادی بدحالی کا ذمہ دار سعودی عرب ہے۔ عرب لیگ مسلمانوں کی نہیں عربیوں کی نمائندہ جماعت ہے۔ پوری دنیا مسلمان ممالک کے تیل پر پلتی ہے۔ سعودی عرب اور مسلم ممالک اگر اسلام سے مخلص ہیں تو ذرا ایک بار تیل کی فروخت ڈالر کے بجائے یورو یا کسی اور کرنسی میں کریں، امریکہ کو لگ پتہ جائے گا۔ اُنہوں نے مزید کہا کہ ہم صرف بڑی بڑی باتیں کرسکتے ہیں۔ سعودی عرب خود مسلمانوں کے حقوق کا غاصب ہے۔ شام میں جو حالات ہیں، اس پر میں نے پروگرام بھی کیا ہے کہ یہ ثابت ہے کہ کیمیکل ہتھیار کس نے چلائے اور کس سعودی شہزادے نے خریدے اور کس نے فراہم کئے، مگر ابھی بھی ہماری آنکھیں نہ کھلیں تو پھر ہمارا اللہ ہی حافظ ہے۔
وحدت نیوز ( پاکپتن ) مجلس وحدت مسلمین پاکستان صوبہ پنجاب ضلع پاکپتن کا تنظیمی کنونشن امام بارگاہ حسینیہ ساہیوال روڑ پاکپتن میں منعقد ہوا ، جس کی صدارت سید مروت حسین زیدی سرپرست اعلیٰ انجمن حسینیہ پاکپتن نے کی،ضلعی شوریٰ کے اراکین نے کثرت رائے سے مخدوم طالب حسین اسدی کو ضلعی سیکریٹری جنرل پاکپتن برائے سال2013-16منتخب کر لیا ہے ، مہمان خصوصی اور صوبائی سیکریٹری جنرل علامہ عبد الخالق اسدی نے نو منتخب سیکریٹری جنرل مخدوم طالب حسین اسدی سے ان کے عہدے کا حلف لیا ۔
تقریب حلف برداری میں معروف سیاسی و سماجی شخصیات پیر عبدالظاہر چشتی اور علی عمران ہو تیانہ نے خصوصی شرکت کی اس سے قبل ضلعی شوریٰ کی جانب سے تین نام الیکشن کمیشن کو فراہم کیئے گئے جن میں سید شعیب حیدر نقوی ، مختار احمد بلوچ اور مخدوم طالب حسین اسدی شامل تھے ، اراکین شوریٰ نے استصوابِ رائے کے بعد مخدوم طالب حسین اسدی کو نیا میر کاروان منتخب کر لیا۔
وحدت نیوز ( گلگت ) سابق امام جمعہ والجماعت سید عباس علی شاہ (مرحوم ) کی ناگہانی وفات کی مناسبت سے ایک تعزیتی ریفرنس صوبائی سیکریٹریٹ گلگت بلتستان میں منعقد کیا گیا،جس کی صدارت مجلس وحدت مسلمین گلگت ڈویژن کے سیکریٹری جنرل علامہ شیخ محمد بلال سمائری نے کی ، ریفرنس سے خطاب کرتے ہو ئے علامہ بلال سمائری نے کہا کہ عباس علی شاہ کا انتقال ہمارا قومی سانحہ ہے ، شاہ صاحب موصوف کی دین اسلام کے لئے خدمات ناقابل فراموش ہیں ، موحوم نہایت مجذوب و ملنسار شخصیت تھے ، سرزمین گلگت بلتستان میں ملت جعفریہ کی بکھری ہو ئی طاقت کو یکجا کر نے کی ان کی خدمت تاریخ کا حصہ بن چکی ہے ، وحدت مسلمین کے لیئے شاہ صاحب کی کاوشیں ان گنت ہیں ، علاقہ میں فرقہ وارانہ ہم آہنگی کا قیام ان کی اولین کو شش رہی، سید عباس علی شاہ (مرحوم )تمام مکاتب کے درمیان قابل احترام سمجھے جاتے تھے ، اجلاس کے اختتام پر مرحوم کے خانوادے سے اظہارہمدردی کیا اور ان کے درجات کی بلندی کے لئے دعا کی ۔
وحدت نیوز ( پنجاب )08 ستمبر 2013 کو دفاع وطن کنونشن کے موقع پرقائدوحدت، ناصرملت علامہ راجہ ناصر عباس جعفری کے اپیل پر پورے پاکستان میں 13ستمبر کو امریکہ و اسرائیل کے شام پرممکنہ حملے کے خلاف یوم احتجاج کے طور پر منایا گیا۔ملک کے کونے کونے میں حسینی جوان جوق درجوق گھرون سے نکلے اور لبیک یا حسین ؑ کے نعروں سے فضاؤں کو معطر کیا اور امریکہ، اسرائیل اور عربی غداروں کے خلاف بھرپور آواز اٹھائی۔ ملک کے دیگر صوبوں کی طرح صوبہ پنجاب کے20سے زائد اضلاع میں احتجاج کیا گیا، جس کی تفصیل درج ذیل ہے
صوبائی دارلحکومت میں امامیہ مسجد سمن ٓباد سے شباب چوک تک احتجاجی مظاہرہ کیا گیا، جس کی قیادت مرکزی سیکرٹری تربئیت علامہ احمد اقبال رضوی، سیکرٹری جنرل لاہور علامہ سید امتیاز کاظمی اور ڈپٹی سیکرٹری جنرل لاہور علامہ سید جعفر موسوی نے کی جبکہ شباب چوک پر مقررین نے ممکنہ امریکی حملے کی شدید الفاظ میں مذمت کی۔
راولپنڈی میں مجلس وحدت مسلمین راولپنڈی اور اسلام آباد کی جانب سے مشترکہ احتجاج کیا گیا۔ جس کی قیادت سید ظہیر عباس، سید مسرور نقوی،عون عباس اور زین شاہ نے کی اور مقررین نے اپنے خطابات میں امریکہ و اسرائیل کے بھرپور مذمت کی۔
ملتان میں احتجاجی ریلی مسجد الحسینؑ سے مدنی چوک تک نکالی گئی، جس کی قیادت ضلعی سیکرٹری جنرل علامہ اقتدار نقوی، ضلعی سیکرٹری روابط شبر حسین، صوبائی سیکرٹری روابط علی رضا طوری،آئی ایس او کے مرکزی جنرل سیکرٹری جواد الحسن، ڈویژنل صدر تہور عباس حیدری نے کی۔مدنی چوک پر علامہ اقتدار نقوی نے ممکنہ امریکی حملے کی بھر پور مذمت کی اور کہا کہ وہ جو کہ غیر اللہ سے مدد مانگنے کو شرک کہتے کہتے تحکتے نہیں آج ایک اسلامی ملک پر حملے کے لئے امریکہ و ارائیل سے مدد مانگ رہا ہے۔
لیہ میں احتجای ریلی ضلعی دفتر سے نکالی گئی جو کہ صدر بازار چوک پر احتجاجی جلسہ کی شکل اختیار کر گئی مومنین کی بڑی تعداد نے شرکت کی۔ جبکہ ریلی کی قیادت ضلعی سیکرٹری جنرل جمیل حسین، ڈپٹی سیکرٹری جنرل سید عنصر عباس، سیکرٹری سیاسیات صفدر حسین، مولانا ہادی حسین اور آئی ایس او کے رضوان جعفری نے کی۔مقررین نے اپنے خطابات میں شام کے ساتھ بھر پور یکجہتی کا مظاہرہ کیا جبکہ امریکہ، اسرائیل اور عرب ممالک میں نام نہاد اسلامی ممالک کی بھر پور مذمت کی۔
سرگودھا میں مرکزی امامبارگاہ سے امام حسینؑ چوک تک احتجاجی ریلی نکالی گئی، جس کی قیادت مولانا ملک نصیر حسین اور ظفربخاری نے کی، جبکہ بھلوال میں مرکزی امام بارگاہ سے ریلوے چوک تک احتجاجی مظاہرہ کیا گیا جس کی قیادت مولانا غلام جعفر اور سید مقصود شاہ نے کی۔ اس موقع پر کثیر تعداد میں مومنین نے ظالم کے خلاف آواز بلند کی۔مقررین نے امریکی و اسرائیلی ممکنہ حملی کی شدید الفاظ میں مزمت کی۔
ساہیوال میں نورشاہ کے مقام پر مرکزی امام بارگاہ سے احتجاجی ریلی نکالی گئی جو کہ مختلف بازاروں سے ہوتی ہوئی واپس امام بارگاہ میں اختتام پذر ہوئی۔ریلی کی قیادت ڈپٹی سیکرٹری جنرل غلام اصغر عابدی نے کی اور امریکہ و اسرائیل کے ممکنہ حملے کے خلاف شدید نعرے بازی کی گئی۔
پاکپتن میں احتجاجی ریلی ضلعی سیکرٹری جنرل طالب حسین اسدی اور سرپرست انجن حسینیہ سید مروت زیدی کی زیر قیادت نکالی گئی ۔احتجاجی ریلی امام حسینؑ چوک پر جلسہ کی شکل اختیار کر گیا۔مومنین سے طالب حسین اسدی، سید مروت زیدی، مولانا امداد حسین اور مولانا شاہد حسین شمسی نے خطاب کیا جس میں امریکہ و اسرائیل کی شدید الفاظ میں مذمت کی گئی۔
وہاڑی میں مسجد قائم آل محمدؑ میں احتجاجی جلسہ کا انعقاد کیا گیا جس سے مولانا اختر عباس صادقی، ضلعی سیکرٹری جنرل اعجاز رضا غدیری اور مرید عباس صاحب نے خطاب کیا۔اس موقع پر مقررین نے امریکہ اسرائیل کی مذمت کے ساتھ ساتھ نام نہاد اسلامی ممالک جو کہ امریکی ممکنہ حملے پر خامش ہیں یا پھر امریکہ کا ساتھ دے رہے ہیں کی بھی شدید الفاظ میں مذمت کی۔
شیخوپورہ میں احتجاجی ریلی مسجد ابوذر غفاری سے نکل کر جی ٹی روڈ پر اختتام پذیر ہوئی۔ ریلی کی قیادت صوبائی سیکرٹری امور جوانان آغا حسن رضا ہمدای نے کی اور امریکہ و اسرائیل کی شدید الفاظ میں مذمت کی۔
اوکاڑہ میں دیبالپور کے مقام پر امام بارگاہ سجادیہ تا مدینہ چوک احتجاجی ریلی نکالی گئی، جس کی قیادت ضلعی سیکرٹری جنرل سید انوار الحسن زیدی اور دیگر کابینہ کے ارکان نے کی، مومنین نے کثیر تعداد میں شام سے اظہار یکجہتی اور اور امریکہ و اسرائیل کی مذمت کی۔
ضلع ننکانہ میں تحصیل واربرٹن میں دربار حسینؑ سے مین چوک تک احتجاجی ریلی نکالی گئی جبکہ شاہ کوٹ میں مرکزی امامبارگاہ سے ریلی نکالی گئی۔ ریلیوں کی قیادت ضلعی سیکرٹری جنرل ڈاکٹر تفہیم اور کابینہ کے دیگر ارکان نے کی۔
جھنگ میں امامیہ مسجد سے ریلی نکالی گئی جو کہ تھانہ صدر چوک پر احتجاجی جلسہ کی شکل اختیار کر گیا۔ ریلی کی قیادت ضلعی ڈپٹی سیکرٹری جنرل ناصر عباس اور کابینہ کے دیگر ارکان نے کی۔ اخر میں مقررین نے اپنے خطابات میں امریکہ واسرائیل کی شدید مذمت کی۔
ڈیرہ غازی خان میں پاکستان چوک سے ٹریفک چوک تک احتجاجی مظاہرہ کیا گیا جس کی قیادت ضلعی سیکرٹری جنرل مولانا سعید ناصر اور کابینہ کے دیگر افراد نے کی۔ جبکہ آخر میں مولانا سعید ناصر نے خطاب کیا۔
اس کے علاوہ سیالکوٹ، چنیوٹ، قصور، جہلم، خانیوال سمیت مختلف علاقوم میں احتجاجی ریلی نکالی گئی اور امریک و اسرائیل کے خلاف شدید مذمت کی گئی۔
وحدت نیوز ( پاکپتن ) سربراہ مجلس وحدت مسلمین علامہ راجہ ناصر عباس جعفری کی اپیل پر ملک گیر یوم احتجاج برائے مظلومین شام و مصر کے موقع پر پاکپتن میں بھی احتجاجی ریلی نکالی گئی ، جس کی قیادت ضلعی سیکرٹری جنرل طالب حسین اسدی اور سرپرست انجن حسینیہ سید مروت زیدی نے کی ۔احتجاجی ریلی امام حسینؑ چوک پر جلسہ کی شکل اختیار کر گئی۔ریلی میں شریک مومنین سے طالب حسین اسدی، سید مروت زیدی، مولانا امداد حسین اور مولانا شاہد حسین شمسی نے خطاب کیا جس میں امریکہ و اسرائیل کی شدید الفاظ میں مذمت کی گئی۔
وحدت نیوز (لاہور )شام میں امریکی حملے کی کوشش دراصل اسرائیل کی مدد ہے، شام واحد ملک ہے جو اسرائیل کے خلاف مقاومت میں مدد کر رہا ہے، فلسطینیوں کے حقوق کی بات کر رہا ہے، سعودی حکمرانوں کا طرز عمل اسلام مخالف ہے، امریکہ کو اربوں ڈالر دے کر شام کے خلاف لڑنے پر آمادہ کرکے کون سے اسلام کی خدمت ہو رہی ہے، مصر میں جو ظلم ان سعودی حکمرانوں نے امریکہ سے مل کر کروائے اس کی مثال نہیں ملتی، مگر خدا کا نام لے کر اٹھنے والے ہزاروں جنازے اٹھا کر بھی نہیں ہارے۔
ان خیالات کا اظہار مجلس وحدت مسلمین پاکستان کے نائب سربراہ علامہ امین شہیدی نے مجلس وحدت مسلمین لاہور کے زیراہتمام مقامی ہوٹل میں منعقدہ سیمینار بعنوان ''مصر اور شام میں امریکی جارحیت کے پس پردہ حقائق'' سے خطاب کر تے ہوئے کیا ،انہوں نے کہا کہ پاکستان میں دہشت گردوں سے مزاکرات کی بات کرنا ہزاروں شہدا کے خون سے غداری ہے، ایک ملالہ پر واویلا کرنے والے ہزاروں ملالائوں پر ظلم پر خاموش کیوں ہیں، شاہ زیب قتل کیس میں والدین کے معافی دینے پر میڈیا بڑا واویلا کر رہا ہے مگر وہی میڈیا ہزاروں شاہ زیبوں کے قاتلوں سے ہونے والے مزاکرات پر خاموش کیوں ہے۔
سیمینار کے دیگر مقررین میں مجلس وحدت مسلمین پاکستان کے مرکزی ڈپٹی سیکرٹری جنرل وسیکرٹری امور خارجہ علامہ شفقت شیرازی، رکن بلوچستان اسمبلی سید محمد رضا رضوی ، ادارہ منہاج القرآن کے ڈاکٹر علی اکبر الازہری، سینئر صحافی مبشر لقمان، علامہ جاوید اکبر ساقی، سابق مشیر وزیراعلی پنجاب الحاج حیدر علی مرزا بھی شامل تھے۔
وحدت نیوز(جھنگ) مجلس وحدت مسلمین پاکستان کے سیکرٹری جنرل علامہ ناصر عباس جعفری کی اپیل پر شام پر ممکنہ امریکی حملے کے خلاف ملک کے دیگر شہروں کی طرح جھنگ میں بھی ایم ڈبلیو ایم پاکستان اور امامیہ اسٹوڈنٹس رگنائزیشن پاکستان کے زیراہتمام شام کے حق میں اور امریکہ کے خلاف احتجاجی ریلی نکالی گئی۔ ریلی کی قیادت آئی ایس او پاکستان فیصل آباد کے ڈویژنل صدر سید شکیل اصغر نے کی۔ مظاہرین سے خطاب کرتے ہوئے علمائے کرام کا کہنا تھا کہ امریکہ اور صیہونی قوتیں شام پر حملے سے باز رہیں ورنہ شام امریکیوں کا قبرستان ثابت ہوگا۔
وحدت نیوز (چنیوٹ )شام پر ممکنہ امریکی حملے ، مصر میں بیگناہ مسلمانوں کے قتل عام اور طالبان دہشت گردوں سے مذاکرات کے خلاف مجلس وحدت مسلمین اور امامیہ اسٹوڈینٹس آرگنائزیشن کی جانب سے بعد از نماز جمعہ جامع مسجد صاحب الزمان ع سے تحصیل چوک تک ریلی نکا لی گئی،جس میں ضلع بھر کے مومنین نے بڑی تعداد میں شرکت کی، ریلی سے ضلعی جنرل سیکرٹری MWM چنیو ٹ برادر سید انیس عباس زیدی، سید اخلاق حسین بخاری،اور مولانا کاظم حسین شہید ی(جامعہ بعثت ) نے خطاب کیا۔
پشاور) مجلس وحدت مسلمین نے ضلع نوشہرہ کے علاقہ رسالپور میں مسجد کی تعمیر میں رکاوٹیں کھڑی کرنے کی مذمت کرتے ہوئے کہا ہے کہ محکمہ اوقاف کے حکام اس سلسلے میں اپنا مثبت کردار ادا کرے۔ وحدت ہاوس پشاور سے جاری ایک بیان میں مجلس وحدت مسلمین کے ترجمان کا کہنا تھا کہ ضلع نوشہرہ کے علاقہ رسالپور میں مسجد محمد بن ابوبکر کی تعمیر میں بعض کرپٹ عناصر روڑے اٹکارہے ہیں اور انتظامیہ بھی اس سلسلے میں کوئی مثبت کردار ادا نہیں کر رہی۔ اہلیان علاقہ کا بھی پرزور مطالبہ ہے کہ مسجد محمد بن ابوبکر کی تعمیر بلارکاوٹ یقینی بنائی جائے، لہذا محکمہ اوقاف حکام اہلیان علاقہ کے مطالبہ پر عملدآمد کرتے ہوئے مسجد کی فوری تعمیر کو یقینی بنائیں۔
وحدت نیوز (مانٹرنگ ڈیسک ) عراق کے مختلف شہروں میں بم دھماکوں اور فائرنگ کے واقعات میں 39 افراد ہلاک اور 100 سے زائد زخمی ہوگئے۔ غیر ملکی خبر رساں ایجنسی کے مطابق عراق کے مختلف شہروں میں 14 کار بم دھماکے ہوئے جن میں 39 افراد ہلاک اور 100 سے زائد زخمی ہوگئے، پولیس کے مطابق بغداد کے جنوب میں واقع شہر الحلتة میں 4 بم دھماکے ہوئے جن کے نتیجے میں 19 افراد ہلاک ہوگئے۔ عراق کے دارالحکومت بغداد میں صوبائی کونسل کے سربراہ کو بم دھماکے میں نشانہ بنایا گیا لیکن خوش قسمتی سے ان کی جان کو کوئی نقصان نہیں ہوا جب کہ ان کا ایک محافظ ہلاک اور 4 دیگر افراد زخمی ہو گئے۔ دھماکے کے نتیجے میں نزدیک واقع عمارتوں اور دکانوں کے شیشے ٹوٹ گئے اور سیکیورٹی فورسز نے جائے حادثہ کو گھیرے میں لے کر تفتیش کا آغاز کر دیا۔
عراق کے شہر بصرہ کی مارکیٹ میں گاڑی میں بم دھماکا ہوا جس میں 3 افراد ہلاک اور 15 زخمی ہو گئے۔ کربلا، نصریہ، کوت سمیت دیگر شہروں میں بھی بم دھماکوں میں 5 افراد ہلاک ہوئے جب کہ ابو غریب، بعقوبہ، شرقات اور موصل میں فائرنگ کے واقعات میں 10 افراد دم توڑ گئے۔ واضح رہے کہ عراق میں فرقہ ورانہ فسادات اور پُر تشدد واقعات میں گزشتہ ہفتے 150 سے زائد افراد ہلاک ہو گئے جب کہ رواں سال اب تک 4 ہزار سے زائد افراد مارے جا چکے ہیں۔
