وحدت نیوز(اسلام آبا د) مجلس وحدت مسلمین پنجاب کے صوبائی ترجمان علامہ اصغر عسکری نے کہا کہ ریاستی اداروں کی سر پرستی میں کالعدم جماعتوں کی شیعہ دشمنی پر مبنی فعالیت اپنے عروج پر ہے،ملک پاکستان نا اہل حکمرانوں کے ہاتھوں یر غمال بن چکا ہے اور آئے دن مشکلات میں اضافہ ہوتا چلا جا رہا ہے اگر آج قوم بیدار نہ ہوئی اور ان غدار و مفاد پرست حکمرانوں کے خلاف آواز بلند نہ کی تو مستقبل میں مشکلات مزید بڑھ جائیں گی ان خیالات کا اظہار انہوں نے ڈی آئی خان کے نواحی علاقے حاجی مورہ میں ایک جلسہ سے خطاب کرتے ہوئے کیا

علامہ اصغر عسکری نے اپنے خطاب میں پنجاب حکومت کے متعصبانہ اور جانبدارانہ رویے کی بھر پور مذمت کرتے ہوئے کہا کہ پنجاب حکومت نے اپنے تعصب کی بنیاد پر ضلع بھکر میں ہمارے ایک سو تیس (130) عہدیداران اور کارکنان کو شیڈول فور میں ڈال دیا ہے جبکہ کالعدم تنظیموں کو ہر قسم کی آزادی ہے انہوں نے کہا کہ کالعدم جماعتوں کو باقاعدہ ریاستی اداروں کی سر پرستی حاصل ہے کراچی سے لیکر کشمیر اور خیبر سے لیکر کوئٹہ تک کالعدم جماعتیں اپنے مذموم مقاصد و ملک دشمنی پالیسی پر فعالیت کر رہی ہیں جبکہ کسی کے خلاف کوئی قانونی کاروائی نہیں کی جا رہی اور ہمارے بے گناہ اور شریف شہریوں کو راولپنڈی پولیس نے گزشتہ 3 ماہ سے گرفتار کیا ہوا ہے اور بے بنیاد مقدمات میں ڈالنے کی کوشش کی جا رہی ہے جس کی ہم بھر پور مذمت کرتے ہیں ۔ علامہ اصغر عسکری نے کہا کہ اس ظلم و نا انصافی کے خلاف پوری ملت تشیع کو اٹھنا ہو گا اور مجلس وحدت مسلمین کی قیادت کے ساتھ ہم آواز بن کر اپنا کردار ادا کرنا ہو گا ۔

وحدت نیوز(کوئٹہ ) مجلس وحدت مسلمین کوئٹہ ڈویژن سے جاری کردہ ایک بیان میں کونسلر کربلائی رجب علی نے کہا ہے کہ ہزارہ ٹاون بروری اور اس سے ملحقہ آبادیوں میں پانی کی شدید قلت اور بجلی کی غیر اعلانیہ لوڈ شیڈنگ نے عوام کا جینا اجیرن کر رکھا ہیں شدید گرمی میں گھنٹوں بجلی غائب رہتی ہے اور جب بجلی آتی بھی ہے تو بہت کمزور ہونے کی وجہ سے برقی آلات فریج، پنکھا، واٹر پمپ وغیرہ نہیں چل سکتے اور بڑے پیمانے پر لوگوں کے برقی آلات خراب ہونے کی شکایات آرہی ہے جسکی وجہ سے عوام کو معاشی طور پر بہت نقصان اُٹھانا پڑ رہا ہیں دوسری جانب قلت آب نے عوام کی مشکلات میں اضافہ کر دیا ہے اور گرمی کے اس شدید موسم میں لوگ بوند بوند پانی کو ترس رہے ہیں اور ان کا کوئی پرسان حال نہیں اور عوام کو ٹینکر مافیا کے رحم و کرم پر چھوڑ دیا گیا ہے جو عوام سے من مانی قیمت وصول کرتے ہیں اور اب کئی دنوں سے ٹینکرز مالکان بھی عوام کو پانی پہنچانے سے معذرت کرتے نظر آتے ہیں اور ہڑتال اور مختلف قسم کے بہانوں سے اپنی قیمتیں بڑھانے کے چکروں میں رہتے ہیں جبکہ عوامی نمائندے کسی قسم کا کردار ادا کرنے سے مکمل قاصر نظر آتے ہیں اور صرف زبانی جمع خرچ سے کام چلا رہے ہیں ۔ انہوں نے میں حکومت سے پر زور مطالبہ کیا گیا کہ محکمہ واسا اور واپڈا کی اس خراب کارکردگی کا فوری نوٹس لیتے ہوئے عوام کی اس کرب کی صورت حال سے نجات دلایا جائے اور عوام کو انکے بنیادی حقوق کے سلسلے میں کردار ادا کیا جائے۔

وحدت نیوز(راولپنڈی) مجلس وحدت مسلمین پنجاب کے سیکرٹری جنرل علامہ عبدالخالق اسدی نے راولپنڈی میں بےگناہ شیعہ افراد کی گرفتاری کو پنجاب حکومت کی جانب سے انتقامی کارروائی قرار دیتے ہوئے کہا کہ دہشت گردوں کے زیراثر حکومت صوبے میں پرُامن شہریوں کو ہراساں کرنے سے باز رہے۔ ان خیالات کا اظہار انہوں نے لاہور میں جنوبی پنجاب کے ممبران سے خطاب کرتے ہوئے کیا۔ اُن کا کہنا تھا کہ آپریشن ضرب عضب سے انشاءاللہ وطن عزیز سے شدت پسندوں کا خاتمہ ہو گا، پاکستانی عوام یکجا ہو کر اپنی بہادر فوج کا ساتھ دیں تاکہ مملکت خداداد پاکستان کو پھر سے امن و محبت کا گہوارا بنایا جا سکے۔ علامہ اسدی نے رمضان المبارک کے آمد سے قبل ذخیرہ اندوزوں کی جانب سے اشیاء خورونوش کی قیمتوں میں ہوشربا اضافے کو حکومت کی ناکامی قرار دیتے ہوئے کہا کہ یہ اقدام اللہ کے مہینے کے تقدس کو پامال کرنے کے مترادف ہے، حکومت کا فرض ہے کہ وہ ان مافیاز کیخلاف فوری کارروائی کرے تاکہ عوام سکھ کا سانس لے سکیں۔ علامہ اسدی نے عوام سے اپیل کی کہ آپریشن ضرب عضب کے متاثرین کی بھرپور مدد کریں یہ ہمارے وہ بھائی ہیں جنہوں نے اپنا آج ہمارے کل کے لئے قربان کیا ہے۔

وحدت نیوز(اوکزئی ایجنسی) سانحہ تفتان کے خلاف مجلس وحدت مسلمین کے زیر اہتمام اورکزئی ایجنسی میں احتجاجی ریلی نکالی گئی، قبل ازیں مدرسہ انوارال اہلبیت (ع) کے زیر اہتمام احتجاجی جلسہ منعقد ہوا، جس میں ایجنسی بھر سے لوگ شریک ہوئے۔ ایم ڈبلیوایم مانی خیل یونٹ کے زیر اہتمام مانی خیل امام بارگاہ سے کلایہ بازار تک احتجاجی ریلی نکالی گئی، جس میں حکومت کے خلاف شدید نعرہ بازی کی گئی۔ اس موقع پر مجلس وحدت مسلمین اورکزئی ایجنسی کے سیکرٹری جنرل اور پرنسپل مدرسہ انوار ال اہلبیت (ع) علامہ مصطفیٰ بہشتی نے کہا کہ افسوس کے ساتھ کہنا پڑتا ہے کہ حکومت کی طرف سے سانحہ تفتان میں ملوث عناصر کے خلاف کوئی کارروائی عمل میں نہیں لائی گئی اور نہ ہی شہداء کے لواحقین کیلئے مالی معاوضے کا اعلان ہوا۔ ان کا کہنا تھا کہ اس سے معلوم ہوتا ہے کہ ہمارے حکمران کس قدر نااہل اور بے کار ہیں، انہیں حکومت چلانے کا طریقہ ہی نہیں آتا، ہم اس عظیم اجتماع کے ذریعے مطالبہ کرتے ہیں کہ حکومت شہداء کے لئے مالی معاوضے کا اعلان کرے اور زائرین کے لئے راستے کو محفوظ بنانے کے لئے اقدامات کرے۔ ان کا کہنا تھا کہ ہم یہ بھی مطالبہ کرتے ہیں کہ زائرین کی مشکلات کو ختم کیا جائے، ان کے ساتھ ناروا سلوک برداشت نہیں کیا جائے گا۔ اس موقع پر علامہ سید اعوان علی شاہ، علامہ باقر حسین منتظری، علامہ جواد حسین اور دیگر نے بھی خطاب کیا اور سانحہ تفتان کی شدید مذمت کرتے ہوئے شہدا کے لواحقین سے اظہار ہمدردی کیا۔