ملی یکجہتی کونسل کا مشاورتی اجلاس قاضی حسین احمد کی زیرصدارت منصورہ میں منعقد ہوا، جس میں مجلس وحدت مسلمین، جماعت اسلامی، جی یو آئی، جماعت الدعوہ، جے یو پی، ا اسلامی تحریک، جمعیت اتحاد العلماء، اسلامی جمعیت طلبہ، انجمن تاجران، بزنس فورم، وفاق المدارس، جماعت اہل حدیث، تحریک فیضان اولیاء، جمعیت اہلحدیث، تحریک حرمت رسول، نیشنل لیبر فیڈریشن سمیت دیگر شامل تھیں۔ اجلاس نے متفقہ طور پر اعلامیہ جاری کیا، جس کے مطابق جب تک تمام اسلامی ممالک مل کر ناموس رسالت (ص) کو محفوظ کرنے کے لیے اقوام متحدہ اور اسلامی ممالک کی تنظیم OIC کی سطح پر مطلوب اقدامات نہیں کریں گی، اس وقت تک ناموس رسالت (ص) کی تحریک کو قومی سطح پر جاری رکھا جائے گا۔
 
کراچی، لاہور، اسلام آباد، راولپنڈی، کوئٹہ، فیصل آباد، پشاور اور ملک کے دوسرے بڑے شہروں میں عوامی جلسے منعقد کئے جائیں گے۔ یہ اجلاس مطالبہ کرتا ہے کہ نیٹو سپلائی فوری طور پر بند کر دی جائے، ورنہ عوام خود سڑکوں پر نکل کر انہیں بند کرنے پر مجبور ہونگے۔ یہ اجلاس حکومت پاکستان سے OIC اور اقوام متحدہ کے پلیٹ فارم پر تحفظ ناموس رسالت (ص) کے لیے عالمی سطح پر قانون سازی کرنے کا مطالبہ کرتا ہے۔ تمام اسلامی ممالک ڈالر، پاؤنڈ اور یورو سے اپنی کرنسی کا تعلق توڑ کر مسلمان ممالک اپنی مشترکہ کرنسی کو قائم کرکے عوامی جذبات کی ترجمانی کریں۔ اسلامی ممالک اپنے قدرتی وسائل پٹرول وغیرہ کو مرحوم شاہ فیصل کی طرح اقتصادی ہتھیار کے طور پر استعمال کریں۔

جاری اعلامیہ میں کہا گیا ہے کہ ملی یکجہتی کونسل کا اجلاس عوام سے بھی اپیل کرتا ہے کہ اپنے جذبات کا اظہار کرتے ہوئے اسلامی آداب اور حضور نبی کریم (ص) کی سیرت کی پیروی کرتے ہوئے پبلک اور پرائیویٹ پراپرٹی اور لوگوں کی جان و مال کا پورا پورا لحاظ کریں۔ یہ اجتماع مسلمان ممالک کی حکومتوں سے مطالبہ کرتا ہے کہ وہ سکیورٹی کے نام پر امریکی کمانڈوز کی تعیناتی کی اجازت نہ دیں۔ اجلاس یوم عشق رسول (ص) کے موقع پر مظاہرین کے خلاف پولیس تشدد اور عاشقان رسول (ص) کے قتل کی مذمت کرتا ہے اور بے گناہ لوگوں کے درج مقدمات کو واپس لینے کا مطالبہ کرتا ہے، حکومت شہداء کے لواحقین کی داد رسی کرے۔

اجلاس سے خطاب کرتے ہوئے قاضی حسین احمد نے کہا کہ اسلام کا نظام عدل قائم کرنا حضور (ص) کا مشن تھا، عشق رسول (ص) کی صورت میں ہمارے پاس بہت بڑی قوت موجود ہے، اس قوت کو مثبت سمت دینے کی ضرورت ہے۔ انہوں نے کہا کہ کل کے احتجاج کے حوالے سے میڈیا نے چند شرپسند عناصر کے واقعات کو زیادہ ہائی لائیٹ کیا، جو کہ مثبت چیز نہیں ہے۔ میڈیا فساد جلاؤ گھیراؤ کے بجائے خبر کا دوسرا رخ بھی دکھائے اور اپنی ترجیحات کو بدلے۔ انہوں نے کہا کہ حضور نبی کریم (ص) کی حرمت پر ہم اپنے تن من اور دھن کی بازی لگا دیں گے، ملی یکجہتی کونسل کے پلیٹ فارم سے ملک بھر میں نئے سرے سے احتجاجی مظاہرے کریں گے اور پوری عالمی دنیا کو بیدار کریں گے۔

اجلاس سے حافظ حسین احمد نے خطاب کرتے ہوئے کہا کہ وزیر داخلہ رحمن ملک عدالتی فیصلے کے بعد کالعدم ہوچکے ہیں، وزیراعظم یوم عشق رسول (ص) کے لیے وزیراعظم ہاؤس کے ایک چھوٹے سے کمرہ تک محدود ہو کر رہ گئے، کنونشن سینٹر تک ان کو جانے کی توفیق نہیں ہوئی۔ انہوں نے کہا کہ حکومت کا کام سڑکوں پر احتجاج کرنا نہیں، بلکہ سفارتی سطح پر او آئی سی اور یو این او کے پلیٹ فارم پر احتجاج کریں۔

انہوں نے کہا کہ امریکہ اگر ڈاکٹر شکیل آفریدی کی حوالگی کا مطالبہ کرسکتا ہے تو ہماری حکومت گستاخ رسول (ص) کو مسلمانوں کے حوالے کرنے کا مطالبہ کیوں نہیں کرتی۔ انہوں نے کہا کہ اگر نیٹو سپلائی لائن سلالہ چیک پوسٹ پر حملے کے فوری بعد بند کی جاسکتی ہے تو پھر ناموس رسالت (ص) پر نیٹو کا بائیکاٹ کیوں نہیں کیا جاسکتا۔ انہوں نے میڈیا سے گزارش کرتے ہوئے کہا کہ وہ صیہونی لابی کی سازشوں کو سمجھے اور احتجاج کا ایک رخ نہ دکھائے۔

مملکت خداداد پاکستان میں تحریک تحفظ ناموس رسالت (ص) کے پہلے شہید سید علی رضا تقوی 13 اپریل 1968ء کو شہر کراچی میں پیدا ہوئے۔ شہید علی رضا تقوی (رہ) بہن بھائیوں میں پانچویں نمبر پر تھے اور بھائیوں میں پہلے نمبر پر تھے، آپ کے 3 بھائی اور 4 بہنیں ہیں۔ چار بہنوں کے بعد پروردگار نے اس خاندان کو بہت دعاؤں اور مرادوں کے بعد شہید علی رضا تقوی (رہ) جیسا فرزند عطا کیا۔ آپ نے آٹھویں کلاس تک ملیر انگلش اسکول کالا بورڈ ملیر میں تعلیم حاصل کی۔ والد کے انتقال کے بعد آپ فیملی کے ساتھ انچولی سوسائٹی منتقل ہوگئے، جہاں آپ نے علی علی اسکول سے میٹرک پاس کیا، اس کے بعد انٹر میڈیٹ (کامرس) PECHS کالج سے پاس کیا۔

انٹر کلاس میں ہی آپ نے شہید قائد علامہ سید عارف حسین الحسینی (رہ) کے دور میں تنظیمی فعالیت کا آغاز کیا۔ انٹر کلاس کے بعد آپ نے گھریلو ذمہ داریوں کے باعث ملازمت شروع کر دی اور دوران ملازمت ہی آپ نے گریجویشن (کامرس) پرائیوٹ کی تعلیم مکمل کی۔ کچھ عرصے بعد آپ نے ایک نجی بینک میں ملازمت اختیار کرلی۔ 1999ء میں آپ رشتہ ازدواج میں منسلک ہوگئے، شہید کے 3 بیٹے اور 2 بیٹیاں ہیں۔

آپ اپنی شہادت تک ایک روزنامہ اخبار کے شعبہ اشتہارات میں ملازمت کر رہے تھے۔ شہید علی رضا تقوی (رہ) پچھلے 2 سالوں سے مجلس وحدت مسلمین پاکستان کے پلیٹ فارم سے قومی معاملات میں فعال تھے اور شہادت کے وقت آپ ایم ڈبلیو ایم کراچی ضلع شرقی میں بحیثیت سیکریٹری اطلاعات فرائض سرانجام دے رہے تھے۔ اس سے قبل بھی آپ امامیہ اسٹوڈنٹس آرگنائزیشن اور تحریک جعفریہ کے پلیٹ فارم پر اپنی خدمات سرانجام دے چکے تھے۔ آپ نے اپنی زندگی میں کبھی بھی معاشی تنگی یا پریشانی کے باوجود اجتماعی فعالیت ترک نہیں کی اور ان حالات میں بھی ملی و قومی ذمہ داریوں و سرگرمیوں سے پیچھے نہیں ہٹے۔
شہید کی اولاد
شہید ناموس رسالت (ص) سید علی رضا تقوی (رہ) کے 3 بیٹے اور 2 بیٹیاں ہیں۔ شہید کے سب سے بڑے فرزند سید علی قاسم تقوی جو چھٹی کلاس میں زیر تعلیم ہیں، نے اسلام ٹائمز سے گفتگو کرتے ہوئے کہا ہے کہ جیسے میرے بابا شہید ہوئے ہیں، میں بھی شہید ہونگا، مجھے فخر ہے کہ میں ان کا بیٹا ہوں۔ فرزند علی قاسم نے اس کمسنی میں اس عزم کا اظہار کیا کہ جس طرح بابا کا نام ساری دنیا میں روشن ہوا ہے، میں بھی شہید ہو کر نام روشن کروں گا۔ علی قاسم نے کہا کہ وہ مجھے بہت یاد آتے ہیں، وہ میری ہر بات مانتے تھے، ہمارے ساتھ کھیلتے تھے۔ انہوں نے اپنے شہید بابا کو مخاطب کرتے ہوئے کہا کہ بابا آپ فکر نہ کریں، جس طرح آپ سب کا خیال رکھتے تھے، میں بھی سب کا بہت اچھی طرح خیال رکھوں گا۔

شہید علی رضا تقوی (رہ) کی بڑی دختر سیدہ خدیجہ بتول تقوی جو کہ چوتھی کلاس کی طالبہ ہیں نے اپنے شہید والد کے حوالے سے اپنے تاثرات کا اظہار کرتے ہوئے کہا کہ مجھے فخر ہے کہ ہمارے بابا ایک عظیم شہید ہیں اور میں ایک شہید کی بیٹی ہوں۔ انہوں بتایا کہ وہ ہم سب بہن بھائیوں سے بہت پیار کرتے تھے اور ہم بھی اپنے بابا سے بہت پیار کرتے تھے، ہماری ساری باتیں مانتے تھے، ہماری ہر خواہش پوری کرتے تھے۔ دختر سیدہ خدیجہ نے بتایا کہ ان کے والد دوسرے لوگوں کی بھی فکر کرتے تھے، دوسروں کے بھی بہت کام آیا کرتے تھے۔

شہید کے کمسن فرزند سید محمد حسن تقوی جو KG-2 میں زیر تعلیم ہیں، نے کہا کہ ہمارے بابا کو حضرت محمد صلی اللہ علیہ والہ وسلم نے اپنے پاس بلایا ہے، وہ ان کی ریلی میں گئے تھے اور وہ اللہ کے پاس ہیں۔ انہوں نے کہا کہ وہ بھی اپنے بابا سے بہت پیار کرتے ہیں اور بابا بھی ان سے پیار کرتے تھے۔ کمسن محمد حسین نے کہا کہ ہمیں بابا بہت یاد آتے ہیں۔ شہید علی رضا تقوی (رہ) کی کمسن دختر سیدہ زینب تقوی جو کہ نرسری کلاس میں پڑھتی ہیں، انہوں نے کہا کہ ان کے بابا بہت اچھے ہیں، وہ مجھ سے بہت پیار کرتے ہیں اور میں ان سے بہت پیار کرتی ہوں۔

مجلس وحدت مسلمین پنجاب سیکرٹری جنرل علامہ عبدالخالق اسدی نے گزشتہ روز ملک بھر اور لاہور میں ہونے والے پرتشدد مظاہروں کی مذمت کرتے ہوئے کہا کہ وطن عزیز پاکستان میں یوم عشق رسول اللہ (ص) کے موقع پر کالعدم تنظیموں کے چند مٹھی بھر کارکنوں نے اپنے استعماری آقاؤں کو خوش کرنے کے لئے بدامنی پھیلانے کی مذموم کوشش کی، ان کا ہدف اور مقصد صرف اور صرف انتشار پھیلانا، عوامی اور سرکاری املاک کو نقصان پہنچانا تھا۔

علامہ اسدی نے کہا یہ شرپسند عناصر اسلام کا لبادہ اوڑھ کر مغربی مفادات کیلئے کام کرتے ہیں اور وہ اسلام کو بدنام کرنے کا کوئی موقع ہاتھ سے نہیں جانے دیتے۔ انہوں نے کہا کہ پاکستان کے ریاستی اداروں کو چاہئے کہ ان شرپسند گروہوں کی سرکوبی کریں۔ علامہ عبدالخالق اسدی نے کہا کہ قانون نافذ کرنے والے اداروں کے پاس میڈیا کی فوٹیج موجود ہیں، وہ فوری طور پر ان شرپسندوں کو گرفتار کرکے ان کے مکروہ عزائم کو بےنقاب کرے۔

علامہ اسدی کا کہنا تھا کہ اس دن کی حرمت کو پامال کرکے کالعدم تکفیری گروہ نے ایک بار پھر ثابت کر دیا کہ وہ اسلام کے زریں اصولوں سے کوسوں دور ہے، ان کا مقصد صرف فساد فی الارض ہے، سرور انبیاء (ص) کی تعلیمات سے ان کو کوئی سروکار نہیں۔ انہوں نے کہا کہ مجلس وحدت مسلمین اور سنی اتحاد کونسل کی پرامن ریلی نے یہ ثابت کر دیا کہ شدت پسندی ہم سے دور ہے اور محب وطن جماعتوں کی ریلیوں کو متاثر کرنے کیلئے کالعدم تکفیری گروہ کو امریکن قونصلیٹ کی طرف سے ٹاسک دیا گیا تھا، تاکہ لوگوں میں انتشار پیدا کریں اور اس دن کے اصل مقصد سے لوگوں کو دور رکھا جائے۔

مجلس وحدت مسلمین پاکستان کے مرکزی ترجمان علامہ حسن ظفر نقوی نے گزشتہ روز ملک بھر اور کراچی میں ہونے والے پرتشدد مظاہروں کی مذمت کرتے ہوئے کہا ہے کہ وطن عزیز پاکستان میں یوم عشق رسول (ص) کے موقع پر کالعدم تنظیموں نے اپنے استعماری آقاؤں امریکہ و اسرائیل کو خوش کرنے کے لئے مذموم کوشش کی۔ انہوں نے کہا کہ دو روز قبل امریکی سفارت خانہ کی ہدایت پر کالعدم تنظیموں کے شرپسندوں نے یوم عشق رسول (ص) پر سرکاری اور نجی املاک کو نہ صرف نقصان پہنچایا، بلکہ لوٹ مار کرکے یوم عشق رسول (ص) کو سبوتاژ کرنے کی کوشش کی۔

ان کا کہنا تھا کہ شرپسند عناصر کا ہدف اور مقصد صرف اور صرف انتشار پھیلانا، عوامی اور سرکاری املاک کو نقصان پہنچانا تھا۔ علامہ حسن ظفر نقوی نے کہا کہ یہ شرپسند عناصر اسلام کا لبادہ اوڑھ کر مغربی مفادات کے لئے کام کرتے ہیں اور اسلام کو بدنام کرنے کا کوئی موقع ہاتھ سے نہیں جانے دیتے۔ پاکستان کے ریاستی اداروں کو چاہئے کہ اس شرپسند گروہ کی سرکوبی کریں۔ ایم ڈبلیو ایم کے مرکزی ترجمان نے کہا کہ قانون نافذ کرنے والے اداروں کے پاس میڈیا کی فوٹیج موجود ہیں، لہٰذا انہیں چاہیئے کہ فوری طور پر ان شرپسندوں کو گرفتار کرکے ان کے مکروہ عزائم کو بے نقاب کرے۔

ایم ڈبلیو ایم کراچی ڈویژن کے ڈپٹی سیکریٹری جنرل اور شہید ناموس رسالت علی رضا تقوی (ص) کے بھائی مولانا صادق رضا تقوی کا کہنا تھا کہ اس دن کی حرمت کو پامال کرکے کالعدم تکفیری گروہ نے ایک بار پھر ثابت کر دیا کہ یہ لوگ اسلام کے زریں اصولوں سے کوسوں دور ہیں، ان کا مقصد صرف فسادالارض پھیلانا ہے۔ سرور انبیاء (ص) کی تعلیمات سے ان کو کوئی سروکار نہیں۔ انہوں نے کہا کہ مجلس وحدت مسلمین اور سنی اتحاد کونسل کی پرامن ریلی نے یہ ثابت کر دیا کہ شدت پسندی ہم سے دور ہے اور محب وطن جماعتوں کی ریلیوں کو متاثر کرنے کے لئے کالعدم تکفیری گروہ کو امریکن قونصلیٹ کی طرف سے ٹاسک دیا گیا تھا، تاکہ لوگوں میں انتشار پیدا کریں اور اس دن کے اصل مقصد سے لوگوں کو دور رکھا جائے۔