آج 5 اگست کا دن ہے۔ آج اس شہید قائد کی شہادت کا دن ہے۔ اس شخص کی شہادت کا دن ہے جس نے اپنی قوم و ملت اور اپنے خدا کے ساتھ جو عہد کیا اسے نبھایا۔ اپنے راستے کے سچائی کی گواہی اپنے لہو سے دی۔ پاکستان کے تمام مومنین کو، پاکستان سے محبت کرنے والوں کو اور دنیا بھر میں اسلامی ممالک کی ان شخصیات کو جو شہید قائد کو تسلیم کرتی ہیں سے تعزیت و تسلیت پیش کرتا ہوں۔ شہید کی شہادت پر امام خمینیؒ نے شہید کے چہلم پر پاکستانی قوم کے نام اپنا پیغام دیا تھا۔ اس پیغام میں شہید قائد کی عظمت اور ان کے مقام کو بیان کیا تھا کہ وہ امام حسین ؑ کے سچے بیٹے تھے۔ وہ فرزند صادق تھا، وہ واقعاً عارف حسین تھا۔ جنہوں نے محراب عبادت کو عروج اعلیٰ کی طرف سفر کیا۔ عروج ملوکیت کی طرف سفر کیا۔ امام خمینیؒ نے ان کے بارے میں کہا تھا کہ پاکستان کی ملت شہید قائد کے تفکر کو زندہ رکھے۔ امام خمینیؒ جانتے تھے کہ شہید قائد کا تفکر، شہید کی فکر، شہید کا نظریہ، شہید کا ویژن اسلام کے لیے، مسلمانوں کے لیے، پاکستان کے لیے نجات دہندہ ہے، صراط مستقیم ہے لہٰذا شہید قائد کا ہم سے بچھڑنا اور ہماری قوم و ملت کا شہید قائد کی قیادت سے محروم ہونا یہ بہت بڑا المیہ تھا اور بہت بڑا نقصان تھا۔ جو شاید مدتوں بعد بھی اس خلاء کو پر نہیں کیا جا سکتا۔ شہید قائد پاکستان کو ایک مستقل پاکستان دیکھنا چاہتے تھے۔ ایک ایسا پاکستان کہ جس میں پاکستان میں بسنے والے تمام طبقات کے درمیان بہترین عادلانہ تعلقات اور روابط ہوں۔ جہاں پر بھائی چارہ، اخوت ہو۔ مسلمانوں اور پاکستان میں بسنے والی تمام اقوام کے درمیان بھائی چارے کی بہترین مثال قائم ہو۔ شہید قائد چاہتے تھے کہ ہمارا وطن مستقل ہو، آزاد ہو، اس کی خارجہ و داخلہ پالیسی آزاد ہو۔ شہید قائد چاہتے تھے کہ پاکستان کو عالمی قوتوں کے سایہ سے نکالا جائے اور اسے خودمختار بنایا جائے۔ شہید قائد امریکہ کو شیطان بزرگ سمجھتے تھے۔ شہید قائد پاکستان کے امریکہ کے ساتھ روابط و تعلقات کو پاکستان کے حق میں نقصان دہ سمجھتے تھے بلکہ اس کو پورے خطے کے لیے نقصان دہ قرار دیتے تھے۔ شہید قائد شیعہ سنی کے تفرقے کے مقابلے میں شیعہ سنی وحدت پر یقین رکھتے تھے۔ آپ چاہتے تھے کہ پاکستان میں بسنے والے تمام مسلمان مل کر رہیں۔ شہید قائد یہ کہتے تھے کہ ہمارا نظام حکومت اسلامی ہو، یہاں اللہ کا دین غالب ہو۔ شہید قائد یہ کہتے تھے کہ علاقائی، قومی، لسانیت ہمارے وطن عزیز کے لیے نقصان دہ چیزیں ہیں۔ ہمیں وطن دوستی کی ترویج کرنی چاہیے۔ شہید بہت بڑی طاقتور شخصیت تھی۔ اگر پاکستان میں شخصیات کی فہرست دیکھیں تو شہید قائد جیسی شخصیت آپ کو نہیں ملے گی۔ شہید قائد کی روحانیت، معنویت، اخلاق، پاکیزگی، بصیرت، شجاعت، ہمت، صبر یہ سب ان میں کوٹ کوٹ کر بھرا ہوا تھا۔ ایسی جامعیت کی مالک شخصیت پاکستان کی تاریخ میں نہیں ملتی۔ 

س: شہید علامہ عارف حسین الحسینیؒ امام خمینیؒ اور ولایت فقیہ پر کتنا اعتقاد رکھتے تھے؟ 
شہید قائد امام خمینیؒ کی مرجیعت اور ان کی رہبریت پر ایمان رکھتے تھے۔ مرجیعت علمی رہبری کو کہتے ہیں جبکہ لیڈرشپ ایک اجتماعی روابط کو کہتے ہیں۔ شہید قائد امام خمینیؒ کو اپنا مرجع بھی مانتے تھے اور اپنا رہبر بھی مانتے تھے۔ یعنی شہید قائد ولایت فقیہ پر بھی ایمان رکھتے تھے۔ شہید قائد کا اس بات پر یقین تھا کہ غیبت کبریٰ میں یہ امام زمانہ ؑ کی ولایت کا تسلسل ہے۔ پس شہید قائد اس بات کے قائل تھے کہ غیبت کبریٰ میں جو ہمیں صراط مستقیم کے ساتھ متصل رکھتا ہے وہ صرف اور صرف ولایت فقیہ ہے۔ جیسا کہ ان کا یہ مشہور قول کہ ’’میں حاضر ہوں کہ اپنا سب کچھ قربان کر دوں لیکن میں ولایت فقیہ کی حمایت سے ایک انچ بھی پیچھے نہیں ہٹوں گا۔ اس زمانے میں پاکستان میں بہت سے علمائے کرام تھے لیکن اس زمانے میں شاید علمائے کرام یا تو ولایت فقیہ کو سمجھتے نہیں تھے یا پھر ہم آہنگ نہیں تھے۔ شہید قائد پر عالمی قوتوں کا دباؤ تھا کہ وہ ولایت فقیہ کے راستے کو امام خمینیؒ کے راستے کو ترک کر دیں، اس کے علاوہ اپنے لوگوں میں سے بھی بعض کا یہی اصرار تھا۔ امام خمینیؒ کا ساتھ دینا یعنی امریکہ کے مدمقابل محاذ میں شامل ہونا ہے۔ پس شہید قائد نظام ولایت فقیہ کو بہترین نظام قرار دیتے تھے۔ جب شہید قائد کے بارے میں نعرے لگائے جاتے تھے تو آپ فرماتے تھے کہ میرے حق میں نعرہ نہ لگاؤ بلکہ امام خمینیؒ کے بارے میں نعرہ لگاؤ۔ جس نے ہمیں بصیرت دی، حیات دی، جس نے ہمیں بیداری دی۔ شہید قائد نجف میں امام خمینیؒ کے ساتھ تھے۔ پس شہید قائد امام خمینیؒ کے ہر لحاظ سے پیروکار تھے۔ شہید قائد امام خمینیؒ کی شجاعت، بصیرت، جذبہ کے وارث تھے۔ اسی لیے امام خمینیؒ نے شہید قائد کے بارے میں فرمایا تھا کہ میں اپنے ایک حقیقی فرزند سے محروم ہو گیا ہوں۔ 

س: کیا ہم نے شہید قائد کے افکار کو زندہ رکھا ہے؟ 
ج: امام خمینیؒ نے کہا تھا کہ شہید قائد اپنے تفکر کی وجہ سے شہید ہوئے ہیں اور شہید قائد کا تفکر یہ تھا کہ امریکہ شیطان بزرگ ہے اور اسرائیل کو عالم اسلام کا دشمن سمجھتے تھے۔ یہ شیطانی نظام تھا جو عالم اسلام پر مسلط تھا۔ شہید قائد کا نظریہ ولایت فقیہ پر بھی ایمان تھا۔ شہید کا خدا کے ساتھ رابطہ تھا۔ شہید قائد معنوی لحاظ سے بھی بہت بلند تھے۔ خدا پر توکل، خدا پر قوی ایمان یہ ایسی چیزیں ہیں کہ جو بہت اہمیت کی حامل ہیں۔ دعا، طہارت، پاکیزگی نفس یہ ساری چیزیں شہید قائد کے اندر بہت زیادہ پائی جاتی تھیں۔ ان چیزوں کو نظرانداز کبھی نہیں کرنا چاہیے۔ پس ہم دیکھتے ہیں کہ گزشتہ 25 سالوں میں جس طرح شہید کی یاد، شہید کا ذکر، شہید کی فکر کی ترویج ہونی چاہیے تھی اس طرح سے نہیں ہوئی۔ اس میں کوتاہی کی گئی ہے۔ 2008ء میں جب شہید قائد کی برسی منانا شروع ہوئی، یہ مجلس وحدت مسلمین کے دوستوں نے شروع کی، اس سے پہلے آپ دیکھ لیں کہ کتنا کم شہید کا نام زندہ رکھا گیا۔ صرف اور صرف تنظیمی حوالے سے آئی ایس او نے بہت کام کیا جو کہ سراہا جانے کے قابل ہے لیکن اس کے علاوہ آپ دیکھ لیں کہیں بھی شہید کے حوالے سے آپ کو کوئی کام نظر نہیں آئے گا۔ جس طرح امام خمینیؒ کی نصیحت تھی اور جس طرح ان کا حکم تھا اس طرح سے شہید قائد کی فکر کی ترویج کے لیے کام نہیں کیا گیا۔ جس شخص نے عارف حسین الحسینیؒ کو قتل کیا، وہ شخص کو نہیں مارنا چاہتا تھا بلکہ وہ شخصیت کو مارنا چاہتے تھے، اس کے افکار کو مارنا چاہتے تھے، اس کے راستے کو مارنا چاہتے تھے، اس کے نظریے کو مارنا چاہتے تھے۔ ہمیں چاہیے تھا کہ جس کے لیے شہید اپنا خون دے گیا، ان نظریات پر ہم کام کرتے اور ان کو پورے معاشرے میں پھیلاتے لیکن ہم کہہ سکتے ہیں کہ گزشتہ تین چار سالوں میں مجلس وحدت مسلمین پاکستان نے شہید کی برسی، شہید کے افکار پر کام کیا ہے۔ ہم مزید کوشش کریں گے کہ جتنا ہم سے ہو سکے گا انشاء اللہ ہم شہید قائد کی فکر کی ترویج کے لیے رات دن کام کریں گے تاکہ شہید قائد کی روح بھی ہم سے راضی ہو اور ہم بھی دنیا و آخرت میں سرخرو ہو سکیں۔ 

س: شہید قائد نے ایک روحانیات و معنویات کا ایک کلچر پورے ملک میں متعارف کرایا تھا، اب اس حوالے سے شہید کے معنوی فرزند جو کہ میدان میں اتر چکے ہیں،وہ اس حوالے سے کیا اقدامات کریں گے؟ 
ج: آپ نے درست کہا کہ شہید جہاں جاتے تھے شہید کے ساتھ دعا، مناجات، تہجد اور خدا سے رازو نیاز کرتے تھے۔ شہید کی وجہ سے جوانوں کے اندر بہت بڑی تبدیلی آئی۔ شہید قائد جہاں جاتے، دعائے کمیل پڑھتے تھے، دعا توسل، دعائے ندبہ، اس کے علاوہ رمضان میں خصوصی دعائے و مناجات کرتے تھے۔ شہید قائد شب زندہ دار تھے۔ مجلس وحدت مسلمین پاکستان کے بنیادی کاموں میں سے ایک کام یہ ہے کہ شہید قائد کی روحانیت اور معنویت پر کام کرے۔ ہمارے دفاتر میں دعا، مناجات ہوں۔ اس کے علاوہ سب جگہوں پر دعا و مناجات کا اہتمام کیا گیا ہے۔ بعض جگہوں پر ہفت وار اور بعض جگہوں پر ماہانہ دعاؤں کا پروگرام ہوتا ہے لیکن ہم مزید کوشش کر رہے ہیں کہ ان پروگرامات کو مزید بہتر سے بہتر بنایا جا سکے۔ بہرحال ہم یہ نہیں کہہ سکتے کہ روحانیت اور معنویت کے لحاظ سے شہید قائد جیسا ماحول بنا سکتے ہیں کیونکہ وہ شہید محراب اور شہید مدنی و شہید مطہری کے شاگرد تھے۔ شہید قائد نے امام خمینیؒ سے براہ راست تربیت پائی تھی۔ اس کے باوجود ہم بھی کوشش کریں گے کہ ان کے افکار و نظریات پر چل کر روحانیت اور معنویت لحاظ سے بھی اپنے کاموں کو بہتر انداز میں کر سکیں(شکریہ اسلام ٹائمز)

شہید کے فرزند علامہ سید علی الحسینی سمیت مختلف علمائے کرام اور معززین علاقہ نے بڑی تعداد میں شرکت کی
علامہ عابد الحسینی ، علامہ علی صفدر شاہ، ڈاکٹر سید حسین جان،مولانا باقر زیدی، مسرت حسین اورمنیر حسین نے خطاب کیا

پارا چنار ( وحدت نیوز) ملک کے دیگر علاقوں کی طرح کرم ایجنسی کے صدر مقام پارا چنار میں بھی قائد ملت جعفریہ پاکستان علامہ عارف حسین حسینی شہید کی چوبیسویں برسی انتہائی عقیدت و احتران کے ساتھ منائی گئی برسی میں شہید کے فرزند علامہ سید علی الحسینی سمیت جید علمائے کرام نے بڑی تعداد میں شرکت کی ، برسی کے اجتماع سے خطاب کرتے ہوئے علامہ سید عابد حسین الحسینی ، علامہ سید علی الحسینی، علامہ صفدر علی شاہ ۔ ڈاکٹر سید حسین جان ۔مولانا باقر زیدی ، مسرت حسین ، مولانا منیر حسین اور دیگر مقررین نے شہید کی زندگی کے مختلف پہلوووں اور ان کے افکارو نظریات پر تفصیلی روشنی ڈالی عصر حاضر کا تقاضہ ہے کہ مسدلمان اپنی گرتی ہوئی ساکھ کی بحالی کے لیے متحد ہوجائیں ، انہوں نے کہا کہ ہم جس ہستی کی یاد منا رہے ہیں، اگر وہ آج اس دنیا میں ہوتی تو تو وطن عزیز میں فرقہ واریت کا نام و نشان تک نہ ہوتا ، علامی عار ھسین حسینی کی شخصیت اور اہمیت کا اندازہ اس بات سے لگایا جا سکتا ہے کہ کہ ان کی شہادت کی منصوبہ بندی خود جنرل ضیا الحق اور گورنر فضل حق نے امریکہ کے ایما پر کی ، استعمار نے بھانپ لیا تھا کہ اگرعارف حسین حسینی زندہ رہا تو اس کی راہ میں سب سے بڑی رکاوٹ بنے گا ، مقررین نے کہا کہ شہید حسینی نے اپنے مختصر دور میں اتھاد بین المسلمین کے لیے گرانقدر خدمات سر انجام دیں اور ان کی جدوجہد کے بہترین تنائج سامنے آ رہے ہیں ، شہید حسینی نہ صرف اپنی قوم بلکہ دنیا بھر کے مظلوموں کی آوازبن کر ابھرے اور ان کی کاوشوں کو عالم اسلام میں پذیرائی ملی ،مقررین نے کرم ایجنسی کی گذشتہ پانچ سال کی گھمبیر صورتحا ل کا ذکر کرتے ہوئے کہا کہ کہ ہم جرگہ کی کارکردگی سے قطعی مطمئن نہیں ، کرم ایجنسی کی انتظامیہ کا رویہ غیر جانب دارانہ نہیں جب تک انتظامیہ کے رویے میں تبدیلی نہیں آتی ، یہاں حقیقی امن کا قیام ممکن نہیں ۔