وحدت نیوز(گلگت)شغرتھنگ روڈ کے ساتھ دشمنی کرنے والی حکومت شغرتھنگ پاور پروجیکٹ کا افتتاح کرکے عوام کی آنکھوں میں دھول نہ جھونکیں میڈیا کے سوال کا جواب دیتے ہوئے اپوزیشن لیڈر گلگت بلتستان اسمبلی و پارلیمانی لیڈر مجلس وحدت مسلمین گلگت بلتستان کاظم میثم نے کہا کہ سکردو میں کابینہ اجلاس کا انعقاد مستحسن ہے تاہم اجلاس سکردو اور گلگت میں جبکہ کام کہیں نہ ہو یہ غلط ہے۔ ترقیاتی پروسز میں ناانصافیوں کا ایک سلسلہ شروع ہوگیا ہے۔ موجودہ حکومت ایک طرف شغرتھنگ روڈ کو آگے بڑھنے نہیں دے رہی اور دوسری جانب سابق حکومت کا بلتستان کے لیے دیا گیا بڑا تحفہ 26 میگاواٹ شغرتھنگ پروجیکٹ کا افتتاح کرکے کریڈیٹ سمیٹنے کی کوشش کریں گی۔ اس پروجیکٹ میں شغرتھنگ ستقچن کے عوام کے تحفظات کو دور نہیں کیا گیا ہے۔ ان کے تحفظات دور کیے بغیر کام نہیں کرنے دیں گے۔ نئے انتظامی سربراہ کو سکردو خیرمقدم کرتے ہیں لیکن چیزوں کو کاسمیٹیکل انداز میں دیکھنے کی بجائے ایشیوز کی صحیح تشخیص اور حل کی ضرورت ہے۔ یہاں کے عوام نے 75 سالہ رویہ، انداز اور طور طریقہ دیکھا ہے اور یہاں سے عوام بہت تجربہ کار ہوچکے ہیں۔

 کاظم میثم نے کہا کہ پی ایس ڈی پی سکیموں پر موجودہ حکومت نے کریڈٹ لینا ہے تو ہم کھلے دل سے کریڈیٹ بھی دیں گے عوام بھی سراہیں گے۔ ان میں پیجو روڈ شگر جسے پی ڈی ایم نے اڑیا تھا کواردو پل جسکی نیسپاک سے سروے کے باوجود سی ڈی ڈبلیو پی میں شامل نہیں ہونے دیا تھا، سکردو سے شگر، کھرمنگ اور گانچھے تک جی ایس آر کی توسیع، سکردو کے لیے رکھے گئے سیورج سسٹم جن میں اکثر کی فزیبلٹی بھی جمع ہیں ان کو منظور کراکر اور ماسٹر پلان کو پی ایس ڈی پی سے منظور کراکر عوام سے داد تحسین لیں۔ 250 بیڈ ہسپتال شغرتھنگ روڈ ، شغرتھنگ پاور پروجیکٹ، غواڑی پاور پروجیکٹ ان پہ کریڈیٹ درست نہیں ہے۔

اپوزیشن لیڈر نے مزید کہا کہ ہمیں کوئی یہ بہانا نہ کرے کہ وفاق پیسے نہیں دے رہا یا بحران ہے دعوی یہ کیا گیا تھا کہ 18 ارب کا بجٹ خسارہ ختم کریں گے، مالیاتی بحران سے نکالیں گے، پی ایس ڈی پی اور اے ڈی پی کے مسائل حل کرائیں گے، گندم کی شارٹیج حل کرائیں گے۔ لوڈشیڈنگ کا مسئلہ حل کرائیں گے، وفاق سے اچھا رشتہ جوڑ کر دودھ اور شہد کی نہریں بہانے کے نام پر اقلیت کی حکومت قائم ہوئی تھی۔ آج کسی قسم کی معذرت ہم قبول نہیں کریں گے۔ کاظم میثم نے مزید کہا کہ شغرتھنگ روڈ پر تاخیری حربہ قابل مذمت ہے۔ اس سکیم کے تاخیر ہونے پر جلد احتجاج کی کال دیں گے۔

 انہوں نے مزید کہا کہ محروم خطہ بشو کے لیے رکھی گئی برج کے خلاف بھی سازش ہو رہی ہے۔ اس سکیم کے خلاف کوئی سازش کرکے یہ سمجھتا ہے کہ انکی حکومت قائم رہے گی وہ انکی بھول ہے۔ بشو کے عوام کو لے کر گلگت سکردو روڈ غیرمعینہ مدت کے لیے بند کرکے انکو انکی حقیقت دکھادیں گے۔ بشو برج پر جلد کام شروع نہ کرایا تو خدانخواستہ کوئی بڑا سانحہ پیش آسکتا ہے اسکی ذمہ داری حکومت پر عائد ہوگی۔ تمام مراحل سے نکال کر ہم نے آخری مرحلے تک پہنچایا ہی لیکن بعض اس پہ سازش کر رہے ہیں۔لہذا مقتدر حلقوں سے گزارش کرتے ہیں کہ ان حساس ایشیو پر نظر رکھیں اور گلگت بلتستان کی ترقیات میں مزید عدم توازن پیدا نہ ہونے دیں۔ بلخصوص وفاق سے گلگت بلتستان کی طرف یا آرڈر نافذ کرنے کی کوشش ہوتی ہے یا یہاں کے اختیارات کو واپس لینے کی۔ لہذا خطے کی معروضی صورتحال کو سامنے رکھتے ہوئے ایسے اقدام نہ اٹھایا جائے جسکے اچھے نتائج نہ نکلیں۔ جس اسمبلی میں عوامی ایشیوز کو ڈسکس کیا جانا تھا اس پہ اب گرد پڑ گیا ہے اور سیشنز کرنے کو تیار نہیں جبکہ خطے میں گوناگوں مسائل اور چیلنجز ہیں۔ حکومتی خزانہ خالی ہے۔ ایمرجنسی کے لیے دس روپے نہیں۔ کتپناہ میں دریائی کٹاو کے لیے ایمرجنسی قائم کرکے کام کرانے کے لیے تیار نہیں۔ گورنر کی ہدایات کے باوجود اس اہم ایشو پر حکومت نظریں چرا رہے ہیں۔ گورنر کی بھی موجودہ حکومت ماننے کو تیار نہیں ہے۔ علاقے کی روایات اور مہمان داری کے آداب کا خیال نہ ہوتا تو کتپناہ زمین کے متاثرین کو لے کر ڈویژنل کمپلیکس کا گھیراو کرتا۔ چار پانچ مہینے سے عوام کے گھر بار دریائی کٹاو کے زد میں ہے اور حکومت کو ٹس سے مس نہیں۔ اس دورے پر ہر صورت میں کتپناہ کا ایشو حل ہوجانا چاہیے۔

وحدت نیوز(کراچی)مجلس وحدت مسلمین پاکستان کراچی ڈویژن کی جانب سے جمعہ 10 نومبر کو بھوجانی ہال میں منعقد ہونے والی مسئلہ فلسطین آل پارٹیز کانفرنس کی دعوتی مہم کا آغاز کردیا گیا، اے پی سی میں تمام سیاسی و مذہبی جماعتوں کو مدعو کیا جائے گا۔ ان خیالات کا اظہارعلامہ مبشر حسن نے وحدت ہاوس میں ڈویژن کابینہ کے اجلاس سے گفتگوکرتے ہوے کہا کہ کہ آل پارٹیز کانفرنس کے انعقاد کا مقصد عالم اسلام کے مشترکہ مسئلہ یعنی مسئلہ فلسطین کے حق میں اور غاصب صہیونی ریاست اسرائیل کے خلاف، اور پاکستان سمیت عالم اسلام میں امریکی و صہیونی سازشوں کو بے نقاب کرنے کے لئے تمام سیاسی و مذہبی قیادت کو ایک چھتری تلے لانا ہے تاکہ فلسطین کے حق میں اور صہیونی و امریکی جنایت کاریوں کے خلاف پاکستان سے بھی ایک موثر آواز اٹھ سکے۔

 انہوں نے مزید کہا کہ اے پی سی کے حوالے سے دعوتی مہم کے پہلے مرحلہ میں مجلس وحدت مسلمین کراچی کے وفد نے ڈویژنل صدر کی سربراہی میں جماعت اسلامی کے رہنما جناب مسلم پرویز سے ادارہ نور حق میں ملاقات کی ،قومی عوامی تحریک کے سربراہ ایاز لطیف پلیجو سے ان کی رہائش گاہ پر ملاقات کی  اور ان کو کانفرنس میں شرکت کی دعوت دی۔ دعوت قبول کرتے ہوئے دونوں حضرات نےمجلس وحدت مسلمین کی جانب سے کی جانے والی اس کاوش کو سراہتے ہوئے اپنی شرکت کی یقین دہانی بھی کروائی۔مزید سیاسی جماعتوں سے ملاقاتیں اور رابطے بھی جاری ہیں۔

وحدت نیوز(اسلام آباد)چیئرمین مجلس وحدت مسلمین پاکستان علامہ راجہ ناصر عباس جعفری نے علامہ محمد اقبال کے یوم پیدائش کے موقع پر اپنے پیغام میں کہا ہے کہ مفکر پاکستان کے فلسفہ خودی میں ہی ملکی ترقی کا راز پنہاں ہے، ہمیں فکر اقبال پر عمل پیرا ہونے کی اشد ضرورت ہے، بحیثیت قوم سوچنا چاہیئے کہ اقبال نے جو ہمیں کامیابی کی راہ دکھائی اس پر ہم نے کتنا عمل کیا۔۔علامہ اقبالؒ کو برصغیر کے مسلمانوں کیلئے الگ وطن کا تصور پیش کرنے پر ہمیشہ یاد رکھا جائے گا، علامہ اقبال نے مسلمانوں کی حقیقی شناخت کیلئے انہیں خواب غفلت سے بیدار کرنے کی عملی کوشش کی، اجتماعی ترقی اور خوشحالی کے حصول کیلئے ایک فرد میں خودی کو بیدار کیا، آج ہمیں جن کثیر الجہتی چیلنجز کا سامنا ہے، انکا حل اقبال کی آفاقی تعلیمات میں پوشیدہ ہے۔

انہوں نے کہا کہ اس موقع پر ہم مفکر پاکستان، عظیم فلسفی اور شاعر کو بھرپور خراج عقیدت پیش کرتے ہوئے اس عزم کا اعادہ کرتے ہیں کہ علامہ اقبال کی تعلیمات اور فکری اساس کی حفاظت اور حقیقی ہیروی کریں گے، علامہ کے افکار اور سوچ نے امید کا ایسا چراغ روشن کیا جس نے نہ صرف منزل بلکہ راستے کی بھی نشاندہی کی،  شاعر مشرق نے ہمیشہ مسلمانوں کو اتحاد و یگانگت اور عمل کی تلقین کی، اس دانا اور مدبر نے برسوں پہلے ان مسائل کی پیشگوئی کی تھی جن کا سامنا آج بھی ہمارے ملک کو ہے۔ اقلیتوں کا تحفظ، آزادی اظہار، آئین وقانون کی بالادستی اور فلاحی ریاست کا قیام ہماری اولین ترجیح ہونی چاہیے۔

وحدت نیوز(کوئٹہ)بلوچستان کے سیاسی و مذہبی جماعتوں کے قائدین نے کہا کہ غزہ پر جارحیت کا اصل ذمہ دار امریکہ ہے اور اسرائیل امریکہ کا آلہ کار ہے۔ امریکہ کو چاہئے کہ غزہ پر فی الفور جارحیت کو بند کرے۔ یہ بات انہوں نے فلسطین فاونڈیشن پاکستان کوئٹہ چیپٹر کے زیر اہتمام کوئٹہ پریس کلب میں منعقدہ آل پارٹیز پریس کانفرنس سے خطاب کرتے ہوئے کہی۔

آل پارٹیز پریس کانفرنس کے شرکاء میں مجلس وحدت مسلمین پاکستان اور فلسطین فاؤنڈیشن بلوچستان کے رہنماء علامہ مقصود علی ڈومکی، بزرگ عالم دین و جامعہ امام صادق علیہ السلام کوئٹہ کے پرنسپل علامہ محمد جمعہ اسدی، امیر جماعت اسلامی کوئٹہ مولانا نور علی، پاکستان تحریک انصاف بلوچستان کے صوبائی رہنماء محمد عالم، چیئرمین گرین پاکستان پارٹی ایڈووکیٹ عبدالہادی کاکڑ، صوبائی نائب صدر مجلس وحدت مسلمین بلوچستان علامہ ولایت حسین جعفری، رہنماء جمعیت علمائے اسلام کوئٹہ مفتی سنزر سعید اور مجلس وحدت مسلمین کوئٹہ کے سید عادل شاہ شامل تھے۔

سیاسی و مذہبی جماعتوں کے قائدین نے عرب اور اسلامی دنیا کی حکومتوں کے اسرائیل کے ساتھ تعلقات پر تشویش کا اظہار کرتے ہوئے مطالبہ کیا کہ عرب و اسلامی ممالک کی حکومتیں غاصب اسرائیل کے ساتھ تعلقات منقطع کریں اور جو مسلمان ممالک اسرائیل کو تیل اور گیس فراہم کر رہے ہیں وہ فی الفور تیل اور گیس کی سپلائی بند کر دیں۔ مقررین کا کہنا تھا کہ غزہ کے لوگ بہت بڑی قربانی ایک بہت بڑے ہدف اور مقصد کے لئے دے رہے ہیں اور ان قربانیوں کا نتیجہ بھی ایک بڑے مقصد کے ساتھ حاصل ہوگا۔ آزادی فلسطین اور القدس ان قربانیوں کا ہدف ہے۔

ان کا کہنا تھا کہ پاکستان کے عوام غزہ کے مظلوم عوام کے ساتھ ہیں۔ پاکستانی عوام نے ہمیشہ فلسطینیوں کی حمایت کی ہے اور کرتے رہیں گے۔ انہوں نے عوام سے اپیل کی کہ گھروں کی عمارتوں سمیت محلوں، گاڑیوں اور موٹر سائیکلوں پر فلسطینی پرچم لہرائیں اور یکجہتی فلسطین مہم کو کامیاب بنانے میں کردار ادا کریں۔ انہوں نے غزہ میں امریکی سرپرستی میں جاری اسرائیلی جارحیت کی شدید مذمت کی اور عالمی برادری سے مطالبہ کیا کہ غزہ پر امریکی سرپرستی میں جاری اسرائیلی جارحیت کو رکوانے میں اپنا کردار ادا کرے۔