وحدت نیوز(لاہور)وائس چیئرمین مجلس وحدت مسلمین پاکستان جناب  علامہ سید احمد اقبال رضوی کی اپنے وفد کے ہمراہ 26 نومبر آزادی  فلسطین مارچ کی دعوتی مہم کے سلسلے میں مرکزی آفس امامیہ اسٹوڈنٹس آرگنائزیشن پاکستان آمد ۔مرکزی صدر آئی ایس او پاکستان حسن عارف سے ملاقات ، 26 نومبر آزادی فلسطین مارچ کا دعوتنامہ پیش کیا ۔

اس ملاقات میں مرکزی سیکرٹری سیاسیات جناب سید اسد عباس نقوی، مرکزی سیکرٹری تعلیم جناب عارف علیجانی ، ضلعی صدر ضلع لاہور جناب نجم عباس خان ، ضلعی رابطہ سیکرٹری جناب علمدار زیدی ، صوبائی آفس سیکرٹری مولانا ظہیر کربلائی کے علاوہ سابقہ ڈویژنل صدور امامیہ اسٹوڈنٹس آرگنائزیشن پاکستان لاہور ڈویژن بھی موجود تھے ۔

وحدت نیوز(لاہور)اسلام پورہ 26 نومبر آزادی فلسطین مارچ کی دعوتی مہم کے سلسلے میں صوبائی صدر مجلس وحدت مسلمین پنجاب جناب علامہ سید علی اکبر کاظمی اپنے وفد کے ہمراہ اسلام پورہ لاہور پہنچے ۔ صوبائی سیکریٹری سیاسیات جناب سید آغا حسین شاہ زیدی صوبائی سیکرٹری تعلیم جناب سید نجیب الحسن نقوی، ضلعی صدر ضلع لاہور جناب نجم عباس خان، ضلعی سنیئر نائب صدر جناب آفتاب علی ہاشمی ، فرقان زیدی ، خرم زیدی صوبائی صدر کے ہمراہ تھے ۔انہوں نے کہا کہ امید ہے اسلام پورہ کرشن نگر سے ایک اچھی خاصی تعداد ریلی میں شریک ہوگی۔ ان شاءاللہ

وحدت نیوز(اسلام آباد)چیئرمین مجلس وحدت مسلمین پاکستان علامہ راجہ ناصر عباس جعفری نے اپنے بیان میں کہا ہے کہ آنے والے الیکشنز میں عوام امریکہ نواز سیاسی پارٹیوں کو مسترد کریں گے، الیکشنز کی تاریخ کا اعلان ہوتے ہی امریکی و برطانوی سفارت کاروں کا متحرک ہونا اور ملکی جماعتوں کے رہنماؤں سے ملاقاتیں کرنا پاکستان کے اندرونی معاملات میں کھلم کھلا مداخلت ہے جسے ہرگز برداشت نہیں کیا جاسکتا، ملکی وسائل کو دونوں ہاتھوں سے لوٹنے والے لٹیرے عوام میں جانے کی بجائے چور دروازوں سے ایوانِ اقتدار میں گھسنے کی کوشش کر رہے ہیں، موجودہ سیاسی پنڈت اپنے کالے کرتوتوں کی وجہ سے عوام کا سامنا کرنے کی سکت نہیں رکھتے، پاکستانی عوام کی اکثریت ایسا لیڈر چاہتے ہیں جس کا ماضی بے داغ ہو، آزاد خارجہ و داخلہ پالیسی پر گامزن ہو، آئین وقانون کی بالادستی اور ملکی مفادات اس کی اولین ترجیح ہوں، ملک کی اصل معاشی تباہی ان افراد کے دور حکومت میں ہوئی جنہوں نے دوسرے ممالک سے تیل درآمد کر کے بجلی بنانے والے مہنگے ترین نجی بجلی گھر آئی پی پیز لگوائے۔

انہوں نے کہا کہ ناعاقبت اندیشوں نے بے تحاشا بیرونی قرض لے کر مہنگے ترین منصوبے بنوائے جن کے اخراجات برداشت کرنا ہمارے جیسے کمزور معاشی حالت والے ملک کے لیے بہت مشکل تھا، اس طرح کے منصوبوں سے آمدن نہیں بلکہ الٹا ان کی وجہ سے ملک قرضوں کی دلدل میں دھنس گیا، آئی ایم ایف کے مطابق آئندہ سال 30 جون 2024ء تک پاکستان کو 25 ارب ڈالرز کے بیرونی قرضوں کی ضرورت ہے، تاکہ پرانے قرضے واپس کر سکے اور تجارتی خسارہ پورا ہو سکے, اب ان قرضوں کی ادائیگی کیسے ہو گی، افسوسناک پہلو یہ ہے کہ ملک پر قرضوں کا بے تحاشا بوجھ ڈالنے والے نااہل حکمران اب نئی باری لینے کی کوشش کر رہے ہیں، اس بےحس ٹولے کو اس بات کی کوئی پرواہ نہیں کہ جتنا قرض بڑھے گا اتنی مہنگائی بڑھے گی اور غریب عوام اس بوجھ کو کیسے برداشت کریں گے انہیں اپنے حصول اقتدار سے غرض ہے بس۔

وحدت نیوز(کوئٹہ)فلسطین میں جاری اسرائیلی مظالم اور سر زمین فلسطین کی مظلومیت کی عکاسی کے لئے کوئٹہ پریس کلب کے سامنے تصویری نمائش لگائی گئی۔ اس موقع پر غزہ پر جاری بمباری اور معصوم بچوں کے قتل عام کے خلاف دستخط مہم کا بھی آغاز کیا گیا۔

 تقریب سے مجلس وحدت مسلمین پاکستان کے مرکزی رہنما علامہ مقصود علی ڈومکی، سابق اسپیکر صوبائی اسمبلی محترمہ راحیلہ درانی ،جمعیت علمائے اسلام کے رہنما مفتی سنزر سعید ،ڈائریکٹر جنرل خانہ فرھنگ آقائے سید ابوالحسن میری، جمعیت غربائے اھل حدیث کے صوبائی صدر مولانا فضل ربی، ممتاز دانشور اور کالم نگار امان اللہ شادیزئی ،رہنما جماعت اسلامی بلوچستان وزیر اعلیٰ کے سابق مشیر اور چیئرمین گرین پاکستان پارٹی عبدالھادی ایڈووکیٹ، ایم ڈبلیو ایم بلوچستان کے صوبائی رہنما علامہ شیخ ولایت حسین جعفری ،علامہ سہیل اکبر شیرازی، آئی ایس او کے ڈویژنل صدر محمد ظاہر ہزارہ، بلوچستان یونیورسٹی کے پروفیسر ڈاکٹر مصطفیٰ، سید ابراہیم شاہ، آغا محمد رضا ،مولانا نور حسین اندرزگو و دیگر شریک ہوئے۔

اس موقع پر خطاب کرتے ہوئے علامہ مقصود علی ڈومکی نے کہا کہ اسرائیل دھشت گرد ریاست ہے جس نے غزہ کے اسپتالوں اسکولوں اور عوامی مقامات پر بمباری کرکے معصوم شہریوں اور بچوں کا قتل عام کیا ہے۔ بے گناہ انسانوں کے قتل عام پر اسرائیلی اور امریکی حکمرانوں کے خلاف عالمی عدالت انصاف میں مقدمہ چلایا جائے۔ 2 دسمبر کو یونیسیف آفیس کے سامنے بچوں کا مظاہرہ ہوگا۔

سابق اسپیکر محترمہ راحیلہ درانی نے اپیل کی کہ فلسطین میں جاری اسرائیلی مظالم کے خلاف علمائے کرام کو جہاد کا فتویٰ جاری کرنا چاہیے۔ امت مسلمہ کو اپنے اختلافات چھوڑ کر اتحاد کا مظاہرہ کرتے ہوئے فلسطینیوں کی مدد کرنی چاہیے۔آقائے ابوالحسن میری نے کہا کہ اسلامی جمہوریہ ایران اور پاکستان کے عوام اپنے مظلوم فلسطینیوں بھائیوں کے ساتھ ہیں۔ ان شاءاللہ جلد فلسطین آزاد ہوگا۔تقریب میں اسرائیلی پرچم بھی نذر آتش کیا گیا۔