وحدت نیوز (کراچی) نومنتخب حکومت سندھ شہر میں قیام امن میں سنجیدہ نظر نہیں آ رہی، روزانہ کی بنیادوں پر ٹارگٹ کلنگ نے شہر کو روشنی کے بجائے موت کا گہوارہ بنا دیا ہے، وزیراعلیٰ سندھ قائم علی شاہ سے شہید احمد حسین، شہید محسن رضا اور شہید شفیع احمد کے قاتلوں کی گرفتاری کا مطالبہ کرتے ہیں۔ ان خیالات کا اظہار مجلس وحدت مسلمین پاکستان کے مرکزی ترجمان علامہ سید حسن ظفر نقوی نے وحدت ہاؤس کراچی میں جاری تعزیتی اجلاس سے خطاب کرتے ہوئے کیا۔ اس موقع پر ایم ڈبلیو ایم کراچی ڈویژن کے نو منتخب سیکرٹری جنرل حسن ہاشمی، علامہ صادق رضا تقوی، علامہ محمد حسین کریمی، علامہ علی انور جعفری اور علامہ دیدار علی جلبانی بھی موجود تھے۔ علامہ حسن ظفر نقوی کا کہنا تھا کہ سمجھ نہیں آتا کہ ہماری حکومت اور سکیورٹی ادارے کس خواب غفلت کا شکار ہیں، انہیں روزانہ کی نبیادوں پر اس شہر میں قتل ہونے والے بیگناہ جوانوں، بزرگوں اور بچوں کی لاشیں کیوں اذیت نہیں پہنچا رہیں، کیا ہمارے حکمرانوں کے ضمیر مردہ ہو چکے ہیں، کیا خوف خدا ان کے دلوں سے مٹ چکا ہے۔ ایک ہی دن میں اس شہر میں تین شیعہ عمائدین کو دہشت گردوں نے سفاکی کے ساتھ قتل کیا، جب کہ شہید احمد حسین، شہید محسن رضا نماز کی ادائیگی کے لئے مسجد نور ایمان جا رہے تھے۔ ان کا کہنا تھا کہ جب تک حکومت اور سکیورٹی ادارے اپنی ذمہ داریوں سے وفا نہیں کریں گے دہشت گردی اور لاقانونیت کے بھوت پر قابو نہیں پا سکتے، سنگین جرائم، ٹارگٹ کلنگ اور بم دھماکوں میں ملوث درندوں کو کس کام کے لئے جیلوں میں پالا جا رہا ہے، وہ کون سے عناصر ہیں جو ان خطرناک دہشت گردوں کو نشان عبرت بنانے میں رکاوٹ بنے ہوئے ہیں۔ عدلیہ بھی دہشت گردوں کی سزاؤں میں رکاوٹ کا سبب بنتی ہے، سپریم کورٹ کو اس شہر میں روزانہ شہید ہونے والے سینکڑوں شاہ زیب کیوں نظر نہیں آتے، اس لئے کہ ان کے قاتلوں کو سزا دینے سے ججوں کو شہرت نہیں ملے گی۔ علامہ حسن ظفر نقوی نے نومنتخب وزیراعلیٰ سندھ قائم علی شاہ اور سکیورٹی اداروں کے ذمہ داران سے مطالبہ کیا ہے کہ جلد از جلد شہید احمد حسین، شہید محسن رضا اور شہید شفیع احمد کے قاتلوں کو گرفتار کرکے کیفر کردار تک پہنچایا جائے۔

وحدت نیوز (کراچی) مجلس وحدت مسلمین پاکستان صوبہ سندھ کراچی ڈویژن کا تنظیمی کنونشن بعنوان ’’ افکار امام خمینی (رہ) کنونشن ‘‘ المحسن ہال، فیڈرل بی ایریا میں منعقد کیا گیا۔ کنونشن میں ایم ڈبلیو ایم کے مرکزی ڈپٹی سیکریٹری جنرل علامہ امین شہیدی، مرکزی سیکریٹری فرہنگ علامہ اعجاز حسین بہشتی، مرکزی سیکریٹری برائے بین الصوبائی روابط علامہ اقبال حسین بہشتی، مرکزی سیکریٹری میڈیا سیل مہدی عابدی، صوبائی سیکریٹری جنرل علامہ مختار امامی اور صوبائی سیکریٹری تنظیم سازی یعقوب حسینی نے شرکت کی۔ کنونشن میں یونٹس اور اضلاع کے نمائندگان نے بڑی تعداد میں شرکت کی۔ کنونشن کی نظامت کے فرائض سیکریٹری تنظیم سازی کراچی میثم عابدی نے انجام دیئے۔

افکار امام خمینی (رہ) کنونشن میں ڈویژنل شوریٰ کے اجلاس میں نئے سیکریٹری جنرل کے لئے استصواب رائے کا مرحلہ شروع ہوا تو ڈویژن کابینہ اور اضلاع کی جانب سے انتخابی کمیٹی کو مختلف نام جن میں علامہ صادق رضا تقوی، ظہیر حیدر زیدی اور حسن ہاشمی کے نام شامل تھے ڈویژن شوریٰ کو پیش کئے گئے۔ بعدازاں ڈویژن شوریٰ نے کثرت رائے سے حسن ہاشمی کو ایم ڈبلیو ایم کراچی ڈویژن کا نیا سیکریٹری جنرل برائے سال ۲۰۱۳ تا ۲۰۱۶ منتخب کرلیا۔ حسن ہاشمی نے ڈویژنل شوریٰ کے ۷۰ فیصد سے زائد اراکین کے ووٹ حاصل کئے۔نومنتخب سیکریٹری جنرل ایم ڈبلیو ایم کراچی ڈویژن حسن ہاشمی سے علامہ امین شہیدی نے حلف لیا۔

 افکار امام خمینی (رہ) کنونشن سے الوداعی خطاب میں علامہ صادق رضا تقوی کا کہنا تھا کہ الٰہی تنظیم میں عہدہ ایک بہت بڑی ذمہ داری ہوتی ہے، علامہ راجہ ناصر عباس جعفری نے قوم کو ایک تشخص دیا، قوم کو وقار دیا، اور قوم کو بحیثیت قوم اپنی انفرادی اور اجتماعی صلاحیتوں کا موازنہ کرکے میدان عمل میں حاضر رہنے کا جو درس ہمیں دیا ہے، وہ پوری ملت جعفریہ کے لئے کسی نعمت سے کم نہیں ہے۔

وحدت نیوز (کوئٹہ) بلوچستان اسمبلی کے اجلاس سے خطاب کرتے ہو ئے ایم ڈبلیو ایم کےممبر صوبائی اسمبلی آغا سید محمدرضا رضوی نےڈاکٹرعبدالمالک کو بلا مقابلہ وزیر اعلی منتخب ہونے پر اپنی اور مجلس وحدت مسلمین کی جانب سے مبارک باد پیش کی اور امید ظاہر کی کہ وہ بلوچستان میں مختلف اقوام کو ساتھ لے کر چلیں گے۔

انہوں نے کہا کہ گذشتہ پانچ سال میں گورینس نام کی کوئی چیز نہیں تھی ،اور امن امان کی جو صورتحال تھی وہ آپ سب کے سامنے ہے لاشیں گرتیں رہی لیکن کسی کو اس خون کو روکنے کی توفیق نہیں ہوئی یہاں تک کہ کوئی فاتحہ کے لئے بھی نہیں آیا ،انہوں نے کہا کہ جناب اسپیکر ہم سے ہمدردی کے بجائے ہمیں طعنے سنے کوملے ۔

انہوں نے کہا کہ امید کرتے ہیں کہ اس حکومت میں کہ جس کے لیڈر آف دی ہاوس ڈاکٹر مالک صاحب ہیں گوڈ گورینس کی ایک اچھی مثال قائم کرینگے لاءاینڈ آرڈر اور رٹ آف دی گورنمنٹ کے حوالے سے اچھی کوشش کرینگے ہمارا تعاون ہر حال میں ان کے ساتھ ہوگا۔

انہوں نے کہا کہ ابھی ہاوس میں کسی بھائی نے کہا کہ بلوچستان کا ایک مسئلہ فرقہ واریت کا ہے ،یہ مسئلہ فرقہ واریت کا نہیں ہے جناب سپیکر اگر یہ فرقہ واریت کا مسئلہ ہوتا تو دوطرفہ ہوتا ،یہ ایک کھلم کھلا دہشتگردی کا مسئلہ ہے ایک خاص گروہ اپنا ورژن اور اسٹائل آف لیوینگ کہ جس کا مذہب سے کوئی تعلق نہیں ہے سب پر نافذ کرنا چاہتا ہے جو بھی ان کی بات نہ مانے وہ اگلے دن مارا جاتا ہے۔

جناب سپیکر ہم سب حلف اٹھاچکے ہیں لیکن ہمیں اس بات کا بھی یہاں حلف اٹھانا ہوگا کہ ہم اس صوبے میں امن بھائی چارگی دوستی اور انسانیت کو فروغ دینگے کیونکہ باقی تمام مسائل اپنی جگہ لیکن امن و امان کا مسئلہ یہاں ہر ایک کی زبان پر ہے۔

جناب اسپیکر میں صراحت کا ساتھ یہاں یہ عرض کرنا چاہتا ہوں کہ بعض کالعدم تنظیموں کی جانب سے دھمکی آمیز بیانات نامعلوم جگہ سے نشر ہوتے ہیں سٹلائیٹ کے اس دور میں کیا کسی ریاست کے لئے نامعلوم کا یہ لفظ کیا عجیب اور مضحکہ خیز نہیں لگتا ؟آخر کیوں انہیں اتنی کھلی چھوٹ دے دی گئی ہے کہ وہ جسے چاہیں مار دیں گویا کہ ان کے پاس اس کا لائنس ہے۔

جناب اسپیکر ایک اور بات یہ ہے جب کسی خاص شخص یا ادارے کی کوتاہی کی بات کی جائے تو اس کا مطلب یہ نہیں کہ بات کرنے والا غدار ہے ماضی میں ایسا ہوتا رہا ہے کہ جب کوئی کوتاہی کی نشان دہی کرتا ہے تو اسے غدار کہا جاتا ہے ایسی کوئی بات نہیں ۔ہمیں اب یہ رویے چھوڑنا ہوگا کہ ہم غداری کا لیبل کسی جماعت یا شخص پر لگانا چھوڑدیں الحمد اللہ سب پاکستانی ہیں سب نے حلف بعنوان پاکستانی اٹھایا ہے ہوسکتا ہے کہ کوئی کسی پالیسی سے ناراض ہو اس کا مطلب یہ نہیں کہ وہ غدار ہے ۔

وحدت نیوز (حیدرآباد)  علامہ امداد علی نسیمی کو آئندہ تین سال کیلئے مجلس وحدت مسلمین ضلع حیدر آباد کا سیکرٹری جنرل منتخب کرلیا گیا ہے۔ صوبائی سیکرٹری جنرل علامہ مختار امامی، صوبائی ڈپٹی سیکرٹری جنرل اور سیکرٹری تنظیمی سازی یعقوب حسینی نے اجلاس میں خصوصی شرکت کی۔ ضلعی کابینہ میں مولانا امداد علی نسیمی، عالم کربلائی، عاصم مرزا، اجمل مھدی، ندیم جعفری، قیصر زیدی، شکیل بھی شریک تھے۔

ضلعی شوریٰ نے متفقہ طور پر نئے سیکرٹری جنرل کیلئے دو نام مولانا امداد علی نسیمی اور مولانا گل حسن مرتضوی جبکہ ضلعی کابینہ نے بھی یہ دو نام پیش کئے۔ ضلعی الیکشن میں مولانا امداد نسیمی اکثریت سے اگلے تین سال کے لئے ضلعی میر کارواں منتخب ہوگئے۔

ضلع حیدر آباد کے جن یونٹس نے شرکت کی اس میں قاسم آباد، سحرش نگر، ٹنڈو میر غلام حسین لطیف آباد نمبر 9، سعادات کالونی، لطیف آباد نمبر 9، لطیف آباد نمبر 10، لطیف آباد نمبر 12، ٹنڈو میر نور محمد لطیف آباد نمبر 4، الھداد چند گوٹھ، کریم داد چھلگری گوٹھ، ٹنڈو آغا، ٹنڈو میر محمود، ٹنڈو یوسف، حر کیمپ، ٹنڈو سعید خان، شیخ موری، بلوچ خان لغاری، مسو خان، رحیم خان، مرید خان لغاری، بھینس پڑی، وانکی وسی، میوہ خان چھلگری، گل محمد چھلگری، جام خان لغاری، الھ بچایو چھلگری، ظھیر خان بارچ شامل ہیں۔

علامہ امداد علی نسیمی سے حلف صوبائی سیکرٹری جنرل مجلس وحدت مسلمین علامہ مختاراحمد امامی نے لیا۔