وحدت نیوز(اسلام آباد) پاکستان میں عراق کے سفیر حامد عباس لفطہ نے مجلس وحدت مسلمین پاکستان کے چیئرمین سینیٹر علامہ راجہ ناصر عباس جعفری سے ان کی رہائش گاہ پر ملاقات کی اور انہیں سینٹر بننے پر مبارکباد پیش کی۔
عراقی سفیر نے نیک خواہشات کا اظہار کرتے ہوئے کہا کہ علامہ راجہ ناصر عباس جعفری کی بابصیرت شخصیت،معاملہ فہمی اور دور اندیشی ملک و قوم کی ترقی اور خوشحالی کے لیے معاون ثابت ہو گی۔ سینیٹرعلامہ راجہ ناصر عباس جعفری نے پاکستانی زائرین کو ویزہ کے حصول میں درپیش مشکلات سے عراقی سفیر کو آگاہ کیا۔
عراقی سفیر نے تمام مسائل کو ترجیحی بنیادوں پر حل کرنے کی یقین دہائی کرائی۔ علامہ راجہ ناصر عباس نے معزز مہمان کی آمد پر ان کا شکریہ ادا کیا،اس موقع پر وائس چیئرمین مجلس وحدت مسلمین پاکستان علامہ احمد اقبال رضوی،مرکزی سیکرٹری سیاسیات سید اسد عباس نقوی بھی موجود تھے۔
