وحدت نیوز (اسلام آباد) خیرالعمل فاﺅنڈیشن گلگت بلتستان ،کشمیر،اورکزئی ایجنسی پارا چنار، کوئٹہ ،ڈیرہ اسما عیل خان کے بعد اب جلد ہی پنجاب میں بھی تقریبا 200 یتیم بچوں کی کفالت کے کام کا آغازکررہی ہے اس سلسلے میں ابتدائی سروے و کیسزکے انتخاب اور تحقیقات کے لیے مرکزی ایتام کمیٹی کے اراکین نے چیئر مین خیرالعمل فاﺅنڈیشن کی ہدایات پر میانوالی کے مختلف علاقوں میں یتیم بچوں کے گھر گھر جا کر تصدیق و تحقیق کا کام شروع کر دیا ان یتیم بچوں کو بالغ ہونے تک ماہانہ تعلیمی کفالت کے لیے منتخب کیا جائے گا کمیٹی کے اراکین نے واپسی پر چیئر مین خیرالعمل فاﺅنڈیشن نثارعلی فیضی کو بریفنگ دیتے ہوئے بتایا کہ اس دورہ میں میانوالی کے مختلف علاقوں میں ضلعی افراد کی معاونت کے ساتھ کیسز کی تحقیقات کی گئیں اور ڈیٹا مرتب کیا گیا چیئر مین خیرالعمل فاﺅنڈیشن نثار علی فیضی نے ایتام کمیٹی کے اراکین کی کاوشوں کو سراہا اور اس بات کی طرف متوجہ کیا کہ یتیموں کی کفالت رفاھی کاموں میں سب سے زیادہ پر معنوی اور اہم ترین کام ہے جسے خود رسول اکرم ﷺ اور حضرت امام علی ؑ نے اپنے لیے پسند کیا اور اس کام کے اجرو ثواب کو بیان کیا انہوں نے کہا کہ خیرالعمل فاﺅنڈیشن گزشتہ دو سالوں سے ملک بھر میں 800 کے قریب یتیم بچوں کی کفالت کا کام سر انجام دے رہی ہے جس پر ماہانہ لاکھوں روپے دیئے جارہے ہیں اس کام کو نہایت شفاف انداز میں انتہائی مخلص اور ذمہ دار ٹیم کے ذریعے سے ملک بھر میں منظم کیا جا رہا ہے ۔

وحدت نیوز (مانٹرنگ ڈیسک) سعودی عرب میں ہزاروں افراد نے شہداء کے جلوس جنازہ میں شرکت کی۔ پریس ٹی وی کی رپورٹ کے مطابق جمعے کے دن ہزاروں لوگوں نے سعودی عرب کے مشرقی علاقے الدلوہ میں شہداء کے تشییع جنازہ میں شرکت کی۔ تشییع جنازہ میں شرکت کرنے والے ملک کے مختلف علاقوں اور بحرین کے بعض علاقوں سے آئے ہوئے تھے۔ ان افراد نے اپنے ہاتھوں میں شہداء کی تصاویر اٹھا رکھی تھیں اور وہ اتحاد بین المسلمین پر تاکید کر رہےتھے۔ واضح رہے کہ پیر کے دن نقاب پوش مسلح حملہ آوروں نے حضرت امام حسین ع کے عزاداروں پر حملہ کر کے سات عزاداروں کو شہید کر دیا تھا۔ شہید ہونے والوں میں متعدد بچے بھی شامل تھے۔ سعودی عرب میں عزاداران امام حسین ع پر یہ حملہ ایسی حالت میں کیا گيا کہ جب اس ملک کے حکام حکومت کے خلاف کۓ جانے والے کسی بھی اعتراض کو برداشت نہیں کرتے ہیں اور وہ ہر طرح کے احتجاج کو سختی سے کچل دیتے ہیں۔ کہا جاتا ہےکہ اس وقت سعودی عرب کی جیلوں میں تیس ہزار سے زیادہ سیاسی قیدی موجود ہیں۔

وحدت نیوز (کراچی ) معروف بزرگ عالم دین حجتہ السلام علامہ شیخ غلام عباس رئیسی نے مجلس وحدت مسلمین ضلع ملیر کی جانب سے منعقدہ فکری نشست بسلسلہ دوسری برسی شہید علامہ آفتاب حیدر جعفری سے خطاب کرتے ہوئے کہا کہ معاشرتی اصلاح کا کام ذاتی اصلاح سے قبل ممکن نہیں ، تنظیم کو ہدف تک پہنچنے کا وسیلہ ہونا چاہئے، تنظیم بت بن جائے تو بجائے فائدے کے تقصان کا سبب ہوتی ہے،معاشرے پر حاکم بد بخت افراد قوم کے اعمال کا نتیجہ ہوتے ہیں ، قوم با شعور ہو تو خود قیادت کا انتخاب کرتی ہے، انہوں نے شہید آغا آفتاب اور انکے رفیق خاص شہید شاہد مرزا کو خراج تحسین پیش کرتے ہوئے کہا کہ شہید ایک بے لوث شخصیت کےمالک تھے،اپنے فن خطابت کو کبھی معاشی مقاصد کے حصول کا زریعہ نہیں بنایا ، شہید نہ فقط ایک ذاکر اہل بیت تھےبلکہ ایک انقلابی ذاکر اہل بیت تھے، شہید آغاآفتاب نے اپنے فن خطابت کو انقلابی انداز میں پیش کیا، شہید کی یاد کو زندہ رکھنا شہادت سے بڑا وضیفہ ہے،جنہوں نے ہمیشہ اپنے انقلابی انداز بیا ن سے قو م کے جذبے کو گرمائے رکھا۔نشست کے اختتام پر تمام حاضرین نے شہید علامہ آغا آفتاب حیدرجعفری اور شہید شاہد علی مرزا کے لئے فاتحہ خوانی کی۔

وحدت نیوز (گلگت) خود کش حملوں کی تربیت دینے والے اور تحریک طالبان کے مرکزی ترجمان کا تعلق گلگت بلتستان سے ہونے سے ثابت ہوا کہ گلگت بلتستان میں طالبان کا اثر و رسوخ بڑھ رہا ہے۔ ہم نے کئی بار حکام بالا کو علاقے میں طالبان کے بڑھتے ہوئے اثر رسوخ کے بارے میں آگاہ کیا لیکن انتظامیہ ٹس سے مس نہ ہوئی۔ حکومت اور انتظامیہ کبوتر کی طرح آنکھیں بند کرنے کی بجانے طالبان کے خلاف بروقت کاروائی کرے تاکہ علاقے میں امن و امان برقرار رہے۔

ان خیالات کا اظہار مجلس وحدت مسلمین کے صوبائی سیکریٹری جنرل علامہ شیخ نیئرعباس مصطفوی نے اپنے ایک بیان میں کیا ہے۔ انہوں نے کہا کہ نہ صرف تحریک طالبان کے نئے ترجمان کا تعلق گلگت بلتستان سے ہے بلکہ خود کش حملہ بمباروں کی تربیت کرنے والے کا تعلق بھی گلگت بلتستان کے ضلع استور سے ہے۔ ماضی میں گلگت بلتستان سے تعلق رکھنے والے نتہا پسندوں کی ایک کثیر تعداد تحریک طالبان میں شامل ہوگئے ہیں جنہیں وزیرستان کے تربیتی کیمپوں میں تربیت دی جاچکی ہے اور گلگت میں دہشت گردی کے کئی واقعات میں انہی دہشت گردوں کا ہاتھ ہے۔جب سے وزیرستان میں آپریشن شروع ہوا ہے دہشت گردوں کی ایک بڑی تعداد نے گلگت بلتستان کے مختلف علاقوں میں پناہ لے رکھی جن کے خلاف کاروائی کرنے سے حکومت گبھرارہی ہے۔ سانحہ کوہستان، سانحہ لالوسر، سانحہ چلاس اور ننگا پربت میں غیر ملکیوں کے قتل میں ملوث دہشت گردوں کے خلاف کوئی تسلی بخش کاروائی نہ ہونے کی وجہ سے ان دلخراش واقعات کے ماسٹر مائنڈزتاحال علاقے میں آزادی سے گھوم رہے ہیں۔ حکومت دباؤ میںآکر دہشت گردی کے خلاف ہونے والی آپریشن کو روکنے پر مجبور ہوئی ہے اور حکومت کی اس ناقاقص کارکردگی اور بزدلی کا فائدہ اٹھاکر گلگت بلتستان میں طالبان منظم ہورہے ہیں جو اس حساس خطے کیلئے بالخصوص اور پاکستان کے لئے بالعموم شدید خطرے کا باعث ہیں۔انہوں نے حکومت سے مطالبہ کیا کہ فوری طور پر دہشت گردوں کے خلاف پورے گلگت بلتستان میں آپریشن کیا جائے۔