وحدت نیوز(گلگت) گذشتہ روز پاکستان کے سب سے بڑے شہر کراچی میں تکفیری دہشت گردوں کی فائرنگ سے شیعہ جوان واجد حسین جنکا تعلق گلگت سے ہے شہید ہوگئے تھے۔ ذرائع کے مطابق کراچی کے علاقے گلشن اقبال ممتاز منزل کے قریب تکفیری دہشتگردوں کی فائرنگ سے واجد حسین شہید جبکہ علی عمران زخمی ہوگئے تھے۔ دہشتگردوں نے دونوں جوانوں کو اس وقت اپنی درندگی کا نشانہ بنایا جب وہ امام بارگاہ شریکۃ الحسین (ع) سے علامہ ذکی باقری کا خطاب سننے کے بعد اسلامک ریسرچ سینٹر میں علامہ حسن ظفر نقوی کا خطاب سننے جا رہے تھے کہ موٹر سائیکل سوار دہشتگردوں نے ان پر فائرنگ کر دی، جس سے واجد حسین اور علی عمران شدید زخمی ہوگئے، دونوں جوانوں کو ہسپتال منتقل کیا جا رہا تھا کہ واجد حسین راستے میں ہی جام شہادت نوش کرگئے۔ شہید واجد حسین کا جسد خاکی بذریعہ ہوائی جہاز آج  گلگت پہنچایا گیا، جہاں سیکرٹری جنرل مجلس وحدت مسلمین پاکستان گلگت بلتستان علامہ شیخ نیئر عباس مصطفوی کی اقتداء میں شہید نماز جنازہ پڑھی گئی۔ اسکے بعد شہید کو انکے آبائی قبرستان جوتل میں آہوں اور سسکیوں کے ساتھ سپرد خاک کر دیا گیا۔ اس موقع پر ٹارگٹ کلنگ کے خلاف احتجاج بھی کیا گیا۔

وحدت نیوز (اسلام آباد) مجلس وحدت مسلمین پاکستان کے سربراہ علامہ ناصر عباس جعفری نے عاشورا 1436ھجری کے موقع پر امت مسلمہ کے نام مرکزی سیکریٹریٹ سے جاری اپنے پیغام میں کہا ہے کہ عاشورا وہ عظیم واقعہ جس نے اسلام کو نئی زندگی دی،سید الشہداء امام حسین علیہ السلام نے اپنے جد رسول خدا (ص)اور پدر امیر المومنین (ع) کی سیرت پر عمل کرتے ہوئے خدا کا دین بچایا، اسلام رسول پاکؐ لائے تھے اور لوگوں تک پہنچایا جبکہ اسلام کو امام حسینؑ نے بچایا تھا۔ جب امام حسینؑ سے کہا گیا کہ آپ یزید کی بیعت کر لیں تو آپؑ نے فرمایا اناللہ وانا الیہ راجعون۔ جب یزیدجیسے حکمران ہو جائیں تو اسلام کو الوداع کہنا چاہیے۔ یعنی اسلام ختم ہو جائے گا۔ عبادات، معاملات، اسلام کا نظام سیاست، اسلام کا نظام حقوق، نظام عدل، نظام معیشت، نظام اخلاق، اسلام کا نظام تعلیم وتربیت عرضیکہ اسلام کی ثقافت و تہذیب مر جائے گی،اس لئے ہم کہتے ہیں کی امام حسینؑ نے اسلام کو بچایا۔ اسلام کی تعلیمات کو بچایا، اصول دین بچائے فروع دین بچائے، اسلام کے اقدار کو بچایا ۔ لہذٰا واقعہ کربلا ہمیں اس بات کی طرف دعوت دیتا ھے کہ ہم اسلام کی حفاظت اور اسلام کو بچائیں اور اس راستے میں اگر جان بھی دینا پڑے تو جان دیں، یعنی تمام اسلام کو اور اسکی تعلیمات کو اپنا اوڑھنا بچھونا بنائیں۔ امام حسینؑ نے زمین کربلا پر تمام دینی تعلیمات کو نئی زندگی دی۔ امام حسینؑ نے نماز کو حیات بخشی ، وہ نماز کہ جو انسان کو خدا کے قریب کرتی ھے، بلندیو ں کی طرف لے جاتی ھے۔ اگرچہ یزیدی لشکر بھی نماز پرھتا تھا لیکن انکی نماز بے روح تھی مردہ تھی۔ اگر انکی نماز درست ہوتی تو وہ باطل کیساتھ نہ ہوتے بلکہ حق کیساتھ ہوتے ۔ امام حسینؑ نے ہمیں کربلا کے میدان میں سبق دیا کی انسانوں کی خاطر ، مظلوموں کی خاطر، دین کی خاطر گھر سے باہر نکلنا پڑے تو نکل آؤ ، ہجرت کرنا پڑے تو ہجرت کرو، قربانی دینا پڑے تو قربانی دو۔ ایثار اور وفا کے اعلیٰ ترین نمونے ہمیں کربلا میں ملتے ہیں ۔ تما م انسانی ارزشیں، اخلاص، برادری اخوت اور ہمدردی کے بہترین نمونے بھی ہمیں کربلا سے ملتے ہیں۔ انسانوں کے حق حیات کی پاسداری ہمیں کربلا میں ملتی ہے۔ لہٰذا ہم نے کربلا سے سیکھنا ھے۔ وفا کو ، حیا کو ، پاکدامنی کو ، غیرت کو ، انسانی شرف و شرافت کو سیکھنا ھے۔ اللہ کی بندگی اور عبادت کے طریقوں کو سیکھنا ھے۔ کربلا مکتب اور عظیم درسگاہ ہے۔ کربلا عظیم مرکز و محورہے تمام آزادی پسندوں کا ۔ کربلا دعوت دیتی ہے کہ ہمیں حریت پسند رہنا ہے۔ آزادی کا پرچم اٹھائے رکھنا ھے۔ عدل و انصاف کا پرچم اٹھا ئے رکھنا ھے۔ انسانوں کے حقوق کی جنگ لرتے رہنا ہے۔ کربلا ہمیں حوصلہ دیتی ہے، ہمیں ہمت دیتی ہے۔ کربلا ہماری ہدایت و رہنمائی کرتی ہے۔

انہوں نے مذید کہا کہ  پاکستان اس وقت جن حالات کا شکار ہے، بد امنی ہے، دہشتگردی ہے، تفرقہ ہے، نفرتیں ہیں، ہمارے وطن کا استقلال ختم ہو چکا ہے۔ حکو مت کمزور ہے، استعماری طاقتیں پاکستان میں بے جا مداخلت کرتی ہیں۔ ہمارے وطن کو انھوں نے کھلونا بنایا ہوا ہے ۔ ہم کربلا سے عزم وحوصلہ لیتے ہوئے ، آزادی اور حریت کا درس لیتے ہوئے اپنے وطن کو ان سازشوں سے بچا سکتے ہیں۔ اپنے وطن کو محبتوں کی جنت میں تبدیل کر سکتے ہیں۔ نفرتوں کی جہنم سے نکال سکتے ہیں۔ ہم اپنے وطن میں بسنے والوں کو وحدت کی بہشت میں لا سکتے ہیں۔ اس ملک کو اسکا استقلال لو ٹا سکتے ہیں۔ کربلا میں سب کچھ ہے ہمارے لئے۔ اگر ہم کربلا سے سبق لیں گے تو اس ملک کو باوقار ملک بنا سکتے ہیں۔ اہل وطن عظیم قوم بن جائیں گے۔ کربلا وحدت کی لڑی میں پروتی ہے۔ کربلا آزادی کے متوالوں کا قبلہ ہے۔ کربلا عدل کی جدوجہد کرنے والوں کا مرکز ومحور ہے۔ لہٰذا ہمیں چاہیے کہ ان ایام میں اس عظیم درسگاہ سے سبق سیکھیں۔ خودسازی کریں، اپنے آپ کو سنواریں۔ اپنے عقائد کو کربلا سے لیں،اپنی سیرت و کردار کو کربلا کے آئینے میں تشکیل دیں۔ تا کہ ہم دنیا و آخرت کی سعادت کو پا سکیں اور ہم عزت سے جئیں اور عزت سے مریں۔ کربلا میں مولا حسینؑ نے بتلایا ہے کہ عزت کی موت ذلت کی زندگی سے بہتر ہے۔ ظالموں کے آ گے جھکنا نہیں بلکہ خون کے آخری قطرے تک قیام کرنا ہے۔ کربلا حوصلوں کا رزق بانٹتی ہے۔ کربلا شجاعت کی خیرات دیتی ھے۔ اور ہم کربلا کے محتاج ہیں، ہمیں کربلا کی ضرورت ہے۔ کربلا کی جنگ جو ظلم کے خلاف تھی 61ہجری سے لیکر پوری زندگی کیلئے ہے اور پوری کائنات کی ہر زمین کربلا ہے۔ سارے زمانے کربلا کے محاصرے میں ہیں۔ کربلا سے کوئی آگے نہیں نکل سکتا۔ کربلا پیشوا ہے، کربلا امامت کرتی ہے۔ ہم نے مولا حسینؑ کی پیروی کرنی ہے اور دنیا وآ خرت کی سعادت کو پانا ہے۔ امید ہے کہ ہم کربلا سے سیکھیں گے اور پاکستان میں رہتے ہوئے دنیا کے تمام مظلوموں کیساتھ اظہار یکجہتی کریں گے اور انکی مدد کریں گے۔ پاکستان کی سرزمیں پر ظلم کے نظام کی بساط کو لپیٹ کر عدل کے پرچم کو بلند کرتے ہوئے عدل کو نا فذ کریں گے۔

وحدت نیوز (اسلام آباد) اسلام آباد میں نویں محرم الحرام کا مرکزی جلوس پرامن طور پر اختتام پذیر ہوگیا۔ امام بارگاہ اثناء عشری سے شروع ہونے والا جلوس اپنے مقررہ راستوں سے ہوتا ہوا واپس امام بارگاہ اثناء عشری میں ہی اختتام پذیر ہوا، اسلام آباد میں نکلنے والے مرکزی جلوس میں مجلس وحدت مسلمین پاکستان کے سربراہ علا مہ ناصر عباس جعفری نے بھی شرکت اور ماتم داری کی، ان کے ہمراہ ایم ڈبلیوایم کے مرکزی رہنما علامہ اقبال بہشتی، اقرار ملک، اختر عمران، علامہ ضیغم عباس بھی موجود تھے۔ اس موقع پر عزاداران امام حسین علیہ اسلام نے نوحہ خوانی اور ماتم داری  کرکے کربلا والوں کو خراج عقیدت پیش کیا۔ جلوس میں ہزاروں کی تعداد میں عزاداران امام مظلوم شریک ہوئے۔ اس موقع پر پولیس انتظامیہ کی جانب سے سکیورٹی کے سخت انتظامات کئے گئے اور جلوس کی فضائی نگرانی بھی کی گئی۔مجلس وحدت مسلمین پاکستان اور دیگر ملی تنظیموں کی جانب سے اسٹالز اور سبیلیں بھی لگائی گئیں تھی۔

وحدت نیوز (کراچی) اسلامک کلچر اینڈ ریسرچ سینٹر ٹرسٹ کے تحت عشرہ محرم کی مجلس سے خطاب کے دوران مجلس وحدت مسلمین کے مرکزی ڈپٹی سیکریٹری جنرل و ترجمان علامہ حسن ظفر نقوی نے کہا کہ امام حسین ؑ دین کے وارث، رسول اکرم ﷺ کے نواسے اور عظیم مجاہد ہیں، آپ ؑ نے تاریخ اسلام میں جرأت و بہادری کی اعلیٰ روایات قائم کیں اور سخت اور کٹھن وقت میں بہادری سے جنگ کی جسے دنیا والے کبھی فراموش نہیں کرسکتے، آپ ؑ جری ہونے کے ساتھ ساتھ رسول ﷺ اکرم کی سیرت کے آئینہ دار تھے اور کربلا کے میدان میں اپنے وعدے کی تکمیل کیلئے آکر جوانمردی کے جوہر دکھائے اور فتح و کامرانی نے اسلام کے قدم چومے۔ انہوں نے مزید کہا کہ بم دھماکوں اور خودکش حملوں سے امام حسین ؑ کے عزاداروں کے حوصلے پست نہیں ہو سکتے، دہشت گرد مجالس اور مساجد و امام بارگاہوں پر حملے کرکے عذاب الہٰی کو دعوت دے رہے ہیں۔ انہوں نے تمام مکاتب فکر سے کہا کہ وہ مجالس اور جلوسوں میں بھرپور شرکت کو یقینی بنا کر اتحاد اور وحدت کا مظاہرہ کریں۔