وحدت نیوز (بھلوال) معروف ذاکر اہل بیت (ع) اور مجلس وحدت مسلمین کے مرکزی رہنما علامہ اعجاز حسین بہشتی نے پنجاب کے شہر بھلوال میں مجلس امام حسین ؑ سے خطاب کرتے ہوئے کہا ہے کہ دشمن بم دھماکوں اور ٹارگٹ کلنگ کے ذریعے عزاداری کو محدود نہیں کرسکتا، اگر آج ہم پر حملے ہوتے ہیں اور ہمیں شہید کیا جاتا ہے تو اس کا مطلب ہے کہ ہم حق پر ہیں، ہم سنت حسین پر عمل پیرا ہیں، ہم مظلوموں کی حمایت میں کھڑے ہیں، ہم ظالم کے خلاف کھڑے ہیں اور ہم وقت کے ظالموں اور فرعونوں سے نبر آزما ہیں۔ علامہ اعجاز بہشتی کا کہنا تھا کہ عزاداری سید الشہداء کو جاری رکھنے کے لئے ہم کسی بھی قربانی سے دریغ نہیں کرینگے، حکومت کی ذمہ داری ہے کی وہ ملک کے ہر کونے میں عزاداروں کو تحفظ فراہم کرے، کراچی میں عزاداروں پر ہونے والے حملے کی پُر زور الفاظ میں مذمت کرتے ہیں اور اُس ننھی شہیدہ سیدہ بتول کو سلام پیش کرتے ہیں جس نے سیرت علی اصغر پر چلتے ہوئے راہ شہادت اختیار کی اور کمسن شہیدہ کا لقب پایا۔

علامہ اعجاز حسین بہشتی کا مزید کہنا تھا کہ ہم ایسے مکتب سے تعلق رکھتے ہیں جس کا رہنما حسین ؑ ہے، ہماری سوچ اور فکر کا مالک حسین ؑ ہے، جس نے کبھی ظالم و جابر کے آگے سر نہیں جھکایا اور وقت کے فرعون کے خلاف قیام کیا اور اپنے ناناؐ کی دین کی حفاظت کرتے ہوئے راہ شہادت کو اختیار کیا اور اپنے جان و مال گھر بار سب کو راہ خداہ میں قربان کر دیا اور رہتی دنیا کے لئے یہ پیغام دیا کہ کبھی کسی ظالم و جابر کے سامنے سر نہیں جھکانا اور ہمیشہ مظلوموں کی حمایت کرنا اور ظالموں کے خلاف قیام کرنا اور راہ خدا میں مرجانا سنت حسین ؑ ہے۔

وحدت نیوز (لاہور) مجلس وحدت مسلمین پاکستان اور امامیہ سٹوڈنٹس آرگنائزیشن کے زیر اہتمام راولپنڈی میں کارکنوں کی بلاجواز گرفتاریوں اور عزاداری میں حکومتی رکاوٹوں کے خلاف ملک بھر سمیت پنجاب کے مختلف اضلاع شیخوپورہ،گجرانوالہ،چینوٹ، فیصل آباد،راولپنڈی ،ننکانہ صاحب،بہاولپور،بہاولنگر،سیالکوٹ،اٹک،گجرات، جہلم،ملتان،جھنگ، میانوالی،راجن پور،حافظ آباد،خانیوال کے علاوہ دوسرے شہروں میں بھی احتجاجی مظاہرے کیے گئے لاہور میں شباب چوک سمن آباد پر احتجاجی مظاہرے کو اقبال ٹاوُن کی انتظامیہ نے سبوتاژ کرنے کی کوشش کی جس پر کارکنان نے وحدت روڈ کو بلاک کر کے مظاہر ہ کیا ۔

مظاہرین سے خطاب کرتے ہوئے علامہ ناصر حسین حسینی نے کہا کہ مسلم لیگ ن کی ملت جعفریہ کے خلاف انتقامی کاروائیوں کا جواب ہم انتخابات میں ووٹ کی طاقت سے دینگے حکمران سن لیں جب اس قوم کو دیواروں میں چن لیا جاتا تھا تب بھی ذکر امام مظلوم کو کوئی روک نہیں سکا یہ ان کی بھول ہے کہ وہ عزاداری کو محدود کرینگے ہم عزاداری سید شہداء پر کسی بھی قدغن کو برداشت نہیں کریں گے انہوں نے کہا کہ ملت جعفریہ نے ہمیشہ استحکام وطن اور وطن عزیز کی سرحدوں کادفاع کیاہے تاریخ گواہ ہے کہ اس مکتب کے ماننے والوں پر دہشت گردی ،انتہا پسندی حرام ہے آج اسلام دشمن پاکستان دشمن دہشت گردوں کی خوشنودی کے لئے محب وطن قوتوں کو دیوار سے لگانے کی سازش کی جا رہی ہے اور یہ استعماری قوتوں کا مرتب کردہ سکرپٹ ہے جسے ہم کامیاب نہیں ہونے دینگے ۔

مظاہرے سے امامیہ سٹوڈنٹس آگنائزیشن پاکستان کے رہنما شرجیل حسین نے بھی خطاب کیا انہوں نے کہا ہمارا جرم یہ ہے کہ ہم انتہا پسندی اور دہشت گردی کے خلاف ہے آج پاکستان میں مخصوص سوچ رکھنے والے حکمران اپنے بیرونی آقاوُں کی شہ پر ملت تشیع کیخلاف سازشوں میں مصروف ہیں راوالپنڈی میں ہمارے بے گناہ کارکنوں کو گرفتار کر کے بد ترین تشدد کا نشانہ بنایا جا رہا ہے ہمارا یہ علامتی احتجاج ان ظالم حکمرانوں کے لئے وارننگ ہے اگر یہ سلسلہ جاری رہا تو ہم دس محرم عاشور کو ملک بھر کے جلوس ہائے عزا میں اس ظلم و بربریت کیخلاف منظم احتجاج کریں گے مظاہرے میں مجلس وحدت مسلمین کے دیگر رہنما سید حسین زیدی،شیخ عمران علی،نقی مہدی،رانا ماجد علی، رائے ناصر علی سمت دیگر عہدیداران شریک ہوئے۔

وحدت نیوز (پشاور) مجلس وحدت مسلمین ضلع پشاوراورامامیہ اسٹوڈنٹس آرگنائزیشن پشاورڈویژن کی جانب سے راولپنڈی میں شیعہ نوجوانوں کی بلاجواز گرفتاریوں، ملک کے مختلف شہروں میں جاری دہشتگردی اور عزاداری امام حسین ؑ کو محدود کرنے کی کوششوں کیخلاف پشاور پریس کلب کے سامنے احتجاجی مظاہرہ کیا گیا، اس موقع پر مظاہرین نے بینرز اور پلے کارڈذ اٹھا رکھے تھے، جن پر حکومت مخالف نعرے درج تھے۔ مظاہرین سے خطاب کرتے ہوئے امامیہ اسٹوڈنٹس آرگنائزیشن پشاور ڈویژن کے صدر توحید علوی اور مجلس وحدت مسلمین کے رہنماء ارشاد حسین بنگش نے کہا کہ راولپنڈی میں معتصب پنجاب حکومت نے آئی ایس او کے ڈویژنل صدر وفا عباس سمیت دیگر نوجوانوں کو گرفتار کرکے اپنی عوام دشمنی کا ثبوت دیا ہے، ہم پنجاب حکومت کی غنڈہ و پولیس گری نہیں چلنے دیں گے، ان کا کہنا تھا کہ کراچی میں عزاداری پر پورے والے بم حملے سندھ حکومت کی کارکردگی پر سوالیہ نشان ہے، کوئٹہ میں بھی بے گناہ سبزی فروشوں کو بربریت کا نشانہ بنایا گیا، ملک بھر میں دہشتگردوں کیخلاف شمالی وزیرستان طرز پر آپریشن کرنے کی ضرورت ہے۔ ان کا مزید کہنا تھا کہ پشاور کے ڈپٹی کمشنر ظہیر السلام ہم آہنگی کی فضاء کو سبوتاژ کرنے کی کوششوں سے باز رہیں، پولیس ، انتظامیہ اور سیکورٹی اداروں کے تعاون کیساتھ عوام عشرہ محرم پرامن انداز میں گزارنا چاہتے ہیں، ڈی سی پشاور کی حرکتوں سے تعاون کی یہ فضاء متاثر ہوسکتی ہے، ان کا مزید کہنا تھا کہ ملک کے کسی بھی حصہ میں عزاداری امام حسین ؑ کو محدود کرنے کی کوشش ہرگز برداشت نہیں کی جائے گی، ہم اپنی جانیں تو دے سکتے ہیں مگر عزاداری پر آنچ بھی نہیں آنے دیں گے۔

قراردادیں:
1۔ پنجاب حکومت فوری طور پر راولپنڈی سے گرفتار کئے گئے شیعہ نوجوانوں کو رہا کرے۔
2۔ کراچی، کوئٹہ اور پشاور سمیت ملک بھر میں جاری مجالس و جلوس ہائے عزاداری کے تحفظ کیلئے فول پروف انتظامات کئے جائیں۔
3 ۔ ملک کے کسی بھی حصہ میں عزاداری امام مظلوم ؑ کو محدود کرنے کی کوشش ہرگز برداشت نہیں کی جائے گی۔
4۔ صوبائی حکومت ڈی سی پشاور کو لگام دے، ملت تشیع انتظامیہ کیساتھ بھرپور تعاون کر نے کیلئے آمادہ ہے۔

وحدت نیوز (چناری) مجلس عزاء بسلسلہ شہادت حضرت امام حسین علیہ السلام پانچ محرم الحرام چناری میں منعقد ہوئی مجلس سے علامہ مفتی کفایت حسین نقوی ممبر اسلامی نظریاتی کونسل اورعلامہ سید تصور حسین نقوی الجوادی سیکرٹری جنرل مجلس وحدت مسلمین آزادکشمیر نے خصوصی خطاب کرتے ہوئے کہاحضرت امام حسین علیہ السلا م کسی ایک مسلک یا مکتب فکرکی میراث نہیں بلکہ آپ علیہ السلام پوری عالم انسانیت کے محسن ہیں۔ محرم الحرام میں کربلا والوں کی یاد میں محافل منعقدکرنا حضرت اما م حسین علیہ السلام اور ان کے اہلبیت اور جانثار اصحاب کی عظیم قربانیوں کو خراج عقیدت پیش کرنا ہے آج امت مسلمہ مختلف اقسام کی پریشانیوں میں مبتلا ہو کر پستی کی جانب گامزن ہیں دشمنان اسلام اسلامی بھائی چارے کا خاتمہ اور اتحاد بین المسلمین کو پارہ پارہ کرنے کیلئے مسلسل گھناؤنی سازشوں میں مصرووف عمل ہیں امت مسلمہ کی بقاء اور کامرانی اتحاد و اتفاق میں مضمر ہے آج دنیا بھر میں کربلا والوں کی یاد میں اپنے اپنے انداز سے محافل منعقد کی جارہی ہیں الغرض دنیا بھر کے مسلمان بارگاہ حضرت امام حسین علیہ السلام میں عقیدت کے پھول نچھاور کر رہے ہیں چونکہ حب ااہلبیت پر تمام عالم اسلام متحد و متفق ہے اور یہ بات اسلام دشمنوں کو ہضم نہیں ہو رہی اس لیئے حضرت امام حسینؓ کی یاد میں منعقد ہونے والی محافل و مجالس پر حملے کیئے جا رہے ہیں تاہم دشمنان اسلام ہر دور میں محسن انسانیت حضرت امام حسینؓ کی یاد عوام کے دلوں سے مٹانے کی ہر ممکن کوشش کرتے رہے مگر اس ذکر حسینؓ کو نہ اس دور کا یزید مٹا سکا اور نہ عصر حاضر کی یزیدی قوتیں اسے مٹا سکتی ہیں جب تک دنیا قائم ہے اور اذانوں کی صداء آتی رہے گی ذکر حسینؓ ہوتا رہے گا لوگ سلام یا حسینؓ کی صدائیں بلند کرتے رہیں گے ۔

مفتی سید کفایت نقوی اور علامہ سید تصور جوادی نے اپنے خطاب کے دوران کہا کہ محرم الحرام ماہِ امن و محبت ہے، رواداری ، بھائی چارے، قربانی و ایثار کا درس دیتا ہے، سیدالشہداء حضرت امام حسین علیہ السلام اور ان کے عظیم رفقاء شہداء کی یاد دلوں کو منور کرنے اور ایمان کی تازگی کا باعث ہے، سیدالشہداء کی ذات اقدس مبارکہ کی یاد سے رسول گرامی قدرؐ کے فرمان کے عین مطابق ہے کہ جہاں رسول ؐ فرمایا کرتے تھے کہ حسین ؑ مجھ سے ہیں اور میں حسین ؑ سے ہوں اور اللہ اس محبت کرتا ہے کہ جو حسین سے محبت کرتا ہے، یوں امام کی یادمنانا اللہ سے محبت کی عین دلیل ہے۔ملت اسلامیہ بلا تفریق مکتب و مسلک کے امام حسینؑ و عظیم شہداء کرام کی یاد منا کر بارگاہ رسالتمآب ؐ سرخرو ہوں گے،امام حسین ؑ کسی بھی ایک مسلک کے نہیں بلکہ آدمیت و انسانیت کی میراث ہیں، ہر وہ کہ جو ظالم کے مقابلے میں میدان میں ہے وہ حسینیؑ ہے، اور ہر وہ جو استعمار کی مظبوطی کے راستے پر گامزن ہے اس کا تعلق یزید سے ہے، کلمہ لا الہ الا اللہ پڑھنے والے امتی غم حسین ؑ کو کبھی بھی اپنے دل سے جدا نہیں کر سکتے ، بقول اقبال کلمہ لا الہ کی بنیاد حسین ؑ ابن علیؑ ہیں ، انہوں نے کہا کہ انؑ کی عظیم قربانی اسلام کی آفاقیت کا باعث ہے، اسلام کو کربلا نے بچا کر دیا ، اسلام کے حسینؑ و اصحاب حسین ؑ نے جان ، مال و گھرانے تک کی قربانی سے بھی دریغ نہ کیا ، سیدالشہداء نے اپنی جان مال ، اعزاء ، اصحاب و رفقاء کی قربانی دین اسلام کی بقا اور اقدار اسلامی کے تحفظ کی خاطر دی، آج ضرورت اس امر کی کہ حسینی بن کر ظلم ، جبر و استبداد کے خلاف سیسہ پلائی دیوار بن جائیں ، ایک و نیک ہو کر ظالم کے مقابلے میں ڈٹ جائیں ، ہم اپنی قلت کو نہ دیکھیں بلکہ مقصد زندگی پانے کے لیئے طرز حسینی اپنا لیں یہی ہماری کامیابی کا راز ہے۔ اس موقع پر ضلعی انتطامیہ ،پولیس اور قانون نافذ کرنے والے اداروں کی جانب سے سکیورٹی کے فول پروف انتظامات کیئے گئے تھے نائب تحصیلدارہٹیاں بالا حماد بشیر اور ایس ایچ او تھانہ پولیس چناری فیض الرحمان عباسی دوران مجلس سیکیورٹی انتظامات کا جائزہ لیتے رہے ۔سکیورٹی ہائی الرٹ رہی مجلس گاہ کے داخلی و خارجی راستوں پر سکیورٹی حصار قائم کئے گئے تھے۔ انٹری پوائنٹس پر پولیس اہلکاروں کے علاوہ، سکاؤٹس اور رضاکار جامع تلاشی کے بعد شرکاء کو مجلس گاہ میں جانے کی اجازت دی گئی۔