وحدت نیوز(کوئٹہ)مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی نے کہا ہے کہ شہداء کی یاد اور ان کے مشن کو زندہ رکھنا باعث سعادت ہے۔ شہداء ہمارے محسن ہیں۔ یہ بات انہوں نے کوئٹہ میں شہداء کے گھروں میں پہنچ کر انکے ورثاء سے ملاقات کے موقع پر کہیں۔ اپنی گفتگو میں علامہ مقصود ڈومکی نے کہا کہ شہداء ہمارے محسن ہیں۔ زندہ قومیں ہمیشہ اپنے محسنوں کو یاد رکھتی ہیں۔ شہداء کی یاد اور ان کے مشن کو زندہ رکھنا باعث سعادت ہے۔ در ایں اثناء مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی نے ملک بھر میں سیاسی کارکنوں اور پی ٹی آئی قیادت کی بلاجواز گرفتاریوں کی شدید الفاظ میں مذمت کرتے ہوئے کہا کہ جمہوریت کی نام نہاد دعویدار امپورٹڈ حکومت نے جس طرح ملکی آئین، قانون اور جمہوری اصولوں کو پامال کیا ہے وہ افسوسناک ہے۔

انہوں نے کہا کہ پاکستانی قوم میں اب بیداری کی لہر ہے یہ اغیار کی غلامی سے آزادی اور آئین و قانون کی بالادستی چاہتی ہے۔ کئی دھائیوں سے بر سراقتدار کرپٹ ٹولہ سیاسی مافیا عوام کے نفرت کے نشانے پر ہے اور عوامی بیداری کو کچلنے کے حوالے سے مافیا کے تمام تر حربے ناکام ہو رہے ہیں۔ سیاسی مافیا ووٹ کو عزت دو کے اپنے بیانیے سے مکمل طور پر منحرف ہو چکی ہے۔ حکمران اتحاد بند گلی میں پھنس چکا ہے۔ عوام پچہتر سال سے بر سراقتدار کرپٹ نظام سے چھٹکارا چاہتے ہیں اور عمران خان ان کی آواز بن چکا ہے۔ انہوں نے کہا کہ چیف جسٹس آئین اور قانون کے محافظ ہیں۔ پوری قوم آئین کی بالادستی کے لئے عدلیہ اور چیف جسٹس کے ساتھ کھڑی ہے۔ مافیا کی طرف سے چیف جسٹس کے خلاف زبان درازی قبول نہیں۔

وحدت نیوز(اسلام آباد)چیئرمین مجلس وحدت مسلمین پاکستان علامہ راجہ ناصر عباس جعفری نے اپنے ٹوئٹر پیغام میں ملک کے مقبول ترین عوامی لیڈر کی گرفتاری کی شدید مذمت کرتے ہوئے کہا ہے کہ پاکستان سمیت پوری دنیا میں بسنے والے غیور پاکستانیوں سے اپیل ہے کہ وہ گھروں سے باہر نکلیں اور اس فاشسٹ رجیم اور ان کے سہولت کاروں سے ملک کو حقیقی آزادی دلانے کے لئے اپنی بھرپور عوامی طاقت کا مظاہرہ کریں، اس اہم اور فیصلہ کن مرحلے میں جب حکمران اور ان کے سہولت کاروں نے تمام آئینی و قانونی راستے بند کر دیئے ہیں، ایسے میں عوام کو یہ باور کر لینا چاہیے کہ عوامی طاقت سے ہی ملک میں آئین کی پاسداری اور قانون کی عملداری کو یقینی بنانے کے لیے ان وطن دشمنوں کا پیچھا کرنا ہے۔

انہوں نے کہا ہے کہ ملک وقوم ایک مرتبہ پھر سے مشرقی پاکستان جیسے سانحہ کے متحمل نہیں ہو سکتے، سابق وزیراعظم عمران خان کو گرفتارکر کے عوام کو حقیقی آزادی کی جدوجہد سے روکا نہیں جا سکتا، آئین و قانون شکن امپورٹڈ حکومت کے سہولت کاروں کے ہاتھوں عوامی مقبول سیاسی رہنما کی احاطہ عدالت سے گرفتاری انتہائی شرمناک ہے، جس سے واضح ہوتا ہے کہ بعض نامرئی قوتیں اپنے آپ کو آئین وقانون سے ماوراء سمجھتی ہیں، ان قوتوں کی ایماء پر آج ہائی کورٹ کی کھلم کھلا توہین کی گئی ہے۔ اس ملک میں عوام کے بنیادی حقوق کی کسی کو پرواہ نہیں۔

انہوں نے کہا ہے کہ عدالتوں کو مذاق بنانے والے عوام کے غیظ وغضب سے نہیں بچ سکیں گے، ایک طرف ملک لوٹنے والوں کی سرپرستی کی جا رہی ہے، دوسری طرف عوام اور پاکستان کے حقوق کے لئے جدو جہد کرنے والوں پر ظلم و بربریت کی انتہاء ، یہ کسی بھی محب وطن پاکستانی کو قبول نہیں، اعلیٰ عدالتوں کو اس بدمعاشی کا فوری نوٹس لینا چاہیئے، یہ غیر منصفانہ رویہ کسی بھی جمہوری معاشرے میں ناقابل قبول ہے، اس اقدام سے صاف ظاہر ہے کہ ملک کو موجودہ بحرانی کیفیت سے نکالنے کے لیے کوئی بھی سنجیدہ اور مخلص نہیں ہے۔

وحدت نیوز(اسلام آباد)مجلس وحدت مسلمین پاکستان کے مرکزی سیکرٹری تعلیم عارف حسین علیجانی نے اپنے بیان میں کہا ہے کہ تری مینگل پارہ چنار واقعے کی جس قدر مذمّت کی جائے کم ہے، جس طرح ان اساتذہ کو فرائض منصبی کی انجام دہی کے دوران بے دردی سے شہید کیا گیا ہے اس پر پورے ملک کے اساتذہ کو خاموش نہیں بیٹھنا چاہیے تھا، اس غیر انسانی اور بزدلانہ کارروائی پر اساتذہ تنظیموں کی جانب سے شدید ردعمل اور احتجاج نہ کرنا افسوس ناک امر ہے، آج اگر اس سفاکانہ اور ظالمانہ سلوک کے خلاف ملکی سطح پر سرکاری و نجی تعلیمی اداروں کے سربراہوں اور اساتذہ نے بھرپور آواز بلند نہ کی تو یہ اس پیغمبرانہ پیشے کے ساتھ بھی خیانت ہو گی، یہی صورتحال رہی تو اس طرح دیگر شعبوں کی طرح اساتذہ کے حقوق بھی سلب ہوتے رہیں گے۔

انہوں نے کہا کہ دیگر فورمز کی طرح اساتذہ کی جانب سے بھی فورمز کا انعقاد ناگزیر ہے، ان پروگراموں میں علم کی روشنی پھیلانے والے مظلوم معلمین کے ساتھ اظہار یکجہتی و ہمدردی کی جائے، اور ان پلیٹ فارمز سے اس طرح کے بہیمانہ قتل کی مذمت ہونی چاہیے، تاکہ دوبارہ اس طرح کے واقعات رونما نہ ہوں، اگر آج ان بے گناہ مظلومین اساتذہ کے حق میں آواز بلند نہ کی گئی تو یہ سلسلہ چل نکلے گا۔

وحدت نیوز(پشاور)ضلع کرم کے امن وامان کو سوچے سمجھے منصوبے کے تحت بدامنی اور نفرت کا شکار کیا جا رہا ہے، جسے علاقے کی باشعور عوام کسی بھی صورت میں کامیاب نہیں ہونے دیں گے ان خیالات کا اظہار مجلس وحدت مسلمین صوبہ خیبر پختون خواہ کے جنرل سیکرٹری شبیر حسین ساجدی نے عمائدین اور کارکنوں کے وفد سے گفتگو کے دوران کیا۔

انہوں نے اپنی گفتگو میں عوام کو یاد دلایا کہ اہل کرم کو تسلسل کے ساتھ آٹھ دس سال بعد جنگ میں جھونک دیا جاتا ہے ۔ 1960ء سے لیکر 2012ء کے فسادات اور خون خرابے کو ذہن میں رکھتے ہوئے اس پر متوجہ رہنا چاہیے، اس صورتحال سے ہم سب کو بخوبی اندازہ ہو جائے گا کہ اس وقت یہ کوئی فرقہ وارانہ یا قبائلی زمینی یا مذہبی تنازعہ نہیں ہے بلکہ اس کے پس پردہ گزشتہ فسادات جیسے مقاصد اور مفادات کارفرما ہیں۔

 انہوں نے کہا کہ ریاست کی طرف سے دفاع پاکستان کے نام سے کالعدم جماعتوں کے سربراہوں کو سرکاری مرکزی اجلاسوں میں شریک کرنا ملک میں انتشار کو ہوا دینے کے مترادف اور انتہائی افسوس ناک ہے۔ ہم مقامی انتظامیہ کو مخاطب کرتے ہیں کہ دہشت گرد قاتل تو دندناتے پھرتے ہیں اور تم سکولوں کو بند کر رہے ہو۔ اس وقت حالات کی حساسیت اور سنگینی کا تقاضا ہے کہ قاتلوں کو جلد از جلد گرفتار کر کے کیفرِ کردار تک پہچایا جائے،پولیس ہیڈ، اسسٹنٹ کمشنر، صوبائی وزراء اور مختلف اداروں کے ملازمین کا تری مینگل اساتذہ کی شہادت کو زمینی تنازعات سے جوڑنا ریاستی جھوٹ اور بدنیتی ہے۔ انسانی حقوق کی تنظیموں، سیاسی و سماجی پارٹیوں سمیت عوام الناس سے اپیل ہے کہ وہ ضلع کرم کے شیعہ سنی مسلمانوں کو تباہی و بربادی سے بچانے میں اپنا بھرپور کردار ادا کریں، ان بہیمانہ و ظالمانہ کاروائیوں کو روکنے کیلیے اج میدان عمل میں آئیں اور صدائے احتجاج بلند کریں، نہیں تو انے والی نسلیں ہم سب کو معاف نہیں کریں گے۔

انہوں نے کرم کے شیعہ سنی عمائدین اور علماء کرام و جوانوں کو پیغام دیتے ہوئےکہا ہےکہ اپنی دھرتی کی تعمیر و ترقی اور نئی نسل کو ذہنی دباؤ اور اذیت سے محفوظ رکھنے کے لیے متحد ہوکر اواز اٹھائیں، سیاسی اور معاشی خلفشار پر پردہ ڈالنے کیلئے ہم اپنے خون کو ایک مرتبہ پھر سے پانی کی طرح بہانے کی ہرگز اجازت نہیں دیں گے، مظلوم شہید اساتذہ کے خون کا حساب مانگیں، علاقے کی فلاح وبہبود کی طرف بڑھنے والے اتفاق و اتحاد کی حمایت کریں اور امن و ترقی کے سفر میں آنے والی ہر سازش کو ناکام بنانے میں ہر ذمہ دار انسان اور مسلمان اپنا مثبت کردار ادا کرے۔