وحدت نیوز(ٹوبہ ٹیک سنگھ) مجلس وحدت مسلمین پاکستان کے مرکزی سیکرٹری تنظیم سازی علامہ مقصود علی ڈومکی نے صوبہ پنجاب کے دورے کے موقع پر ٹوبہ ٹیک سنگھ امام بارگاہ میں تنظیمی ذمہ داران سے میٹنگ کی۔ اس موقع پر انہوں نے علمائے کرام اور تنظیمی ذمہ داران کے ہمراہ پریس کانفرنس سے بھی خطاب کیا۔

پریس کانفرنس سے خطاب کرتے ہوئے علامہ مقصود علی ڈومکی نے کہا کہ قرآن کریم کتاب ھدایت اور عالمین کے پروردگار کا کلام ہے بدکردار انسان اللہ کی آیتوں کا انکار کرتے ہوئے اللہ کی آیتوں کا مذاق اڑاتے ہیں ذلت ورسوائی ظالموں کا مقدر ہے۔

اس موقع پر خطاب کرتے ہوئے علامہ مقصود علی ڈومکی نے کہا کہ فرزند رسول حضرت امام حسین علیہ السلام نے دین اسلام کی بقاء کے لئے جو لازوال قربانی دی وہ ہر دور کے انسانوں کے لئے رہنما ہے کیونکہ حسین ابن علی علیہ السلام چراغ ھدایت اور سفینہ نجات ہیں۔

انہوں نے کہا کہ امام حسین علیہ السلام کسی ایک مسلک کے نہیں بلکہ انسانیت کے رہبر ہیں اپنی بے مثال قربانی کے سبب کربلا والے ہر دور کے انسانوں کے دلوں میں بستے ہیں۔

انہوں نے کہا کہ پاکستان حسینیوں کی دھرتی ہے یہاں یزیدی افکار کے لئے کوئی جگہ نہیں یہاں بسنے والے ھندو مسیحی سکھ سبھی نواب کربلا سے عشق و محبت رکھتے ہیں۔

انہوں نے کہا کہ عزاداری تحریک کربلا کا تسلسل ہے ہر دور کے حسینیوں نے قربانیاں دے کر ذکر حسین کی حفاظت کی ہے۔ جس ذکر حسین کو بنو امیہ بنو عباس نا روک سکے اسے عصر حاضر کا کوئی یزیدی نہیں روک سکتا۔ عزاداری کی راہ میں کوئی رکاوٹ قبول نہیں۔

وحدت نیوز(پشاور)مجلس وحدت مسلمین خیبر پختونخواہ کے صوبائی صدر علامہ جہانزیب جعفری نے اپنے بیان میں کہا ہے کہ محرم الحرام کی آمد پر پشاور سمیت خیبرپختونخواہ میں پے در پے دہشتگردی کے واقعات کا ہونا، انتہائی تشویشناک امر ہے، ضلع خیبر اور حیات آباد دہشت گردی کے حالیہ واقعات کی شدید مذمّت کرتے ہوئے انہوں نے کہا کہ ہم حکومت اور سیکورٹی اداروں سے مطالبہ کرتے ہیں کہ دہشت گردوں کے خلاف گھیرا تنگ کرتے ہوئے سخت کارروائی عمل میں لائی جائے، جس سے محرم الحرام سمیت ملک بھر میں امن وامان کی صورتحال کو یقینی بنایا جا سکے۔

صوبائی صدر کا مزید کہنا تھا کہ افغانستان سے دراندازی کو کسی صورت میں بھی روکا جائے کیونکہ وہاں دہشتگردوں کی محفوظ پناگاہیں ہیں، جن کی وجہ سے ملکی سیکورٹی کو لاحق خطرات میں اضافے کا باعث بن رہی ہیں، کئی جوان شہید اور زخمی ہو چکے ہیں، محرم الحرام میں مجالس اور جلوسوں کی فول پروف سیکورٹی کے لئے سخت اقدامات ضروری ہیں۔تاکہ شہدائے کربلا و امام حسین علیہ السلام کی یاد میں جاری مجالس و محافل عزاء میں کوئی رکاوٹ پیدا نہ ہو۔ ہم دن رات ڈیوٹیاں دینے والے جوانوں کو خراج تحسین پیش کرتے ہیں۔تمام پاکستانیوں سے سیکورٹی کے معاملات پر پولیس اور دیگر اداروں سےتعاون کی اپیل کی۔

علامہ جہانزیب جعفری نے مطالبہ کیا مجالس و جلوسوں میں انتظامیہ تعاون کرے کسی طرح مجلس اور جلوس سے عزاداروں کو نہ روکا جائے۔ اور بلا جواز ایف آئی آرز سے اجتناب کیا جائے۔

وحدت نیوز(گلگت)گلگت بلتستان اسمبلی میں مجلس وحدت مسلمین پاکستان کے پارلیمانی لیڈر محمد کاظم کاظم میثم متحدہ اپوزیشن کی جانب سے قائد حزب اختلاف (اپوزیشن لیڈر) منتخب کرلیئے گئے، سابق وزیر اعلیٰ خالد خورشید کی کابینہ میں کاظم میثم بحیثیت صوبائی وزیر ذراعت فرائض انجام دے رہے تھے۔

علاوہ ازیں سابق پارلیمانی سیکرٹری برائے ویمن ڈویلپمنٹ و مرکزی پولیٹیکل سیکریٹری مجلس وحدت مسلمین شعبہ خواتین کنیز فاطمہ علی چیئرپرسن اسٹینڈنگ کمیٹی برائے پلاننگ ، ڈویلپمنٹ اور انفارمیشن ٹیکنالوجی ڈپارٹمنٹ تعینات کردی گئیں ہیں، جبکہ ایم ڈبلیوایم کے ممبر جی بی اسمبلی ، سابق پارلیمانی سیکریٹری برائے لوکل گورنمنٹ اور صدر ایم ڈبلیوایم کھرمنگ علامہ شیخ اکبر علی رجائی کو قائمہ کمیٹی برائے بلدیات کا چیئرمین مقررکردیا گیا ہے، تینوں رہنماؤں کی تقرری کا نوٹیفکیشن جاری کردیا گیا ہے۔

ایم ڈبلیوایم رہنما اور اپوزیشن لیڈرکاظم میثم نے اپنے بیان میں کہا کہ تمام اپوزیشن ممبران بلخصوص محترم راجہ اعظم خان، محترم نواز خان ناجی، محترمہ کلثوم فرمان، محترم راجہ زکریا خان، محترم وزیر محمد سلیم، اسلامی تحریک کے رہنما محترم ایوب وزیری، محترم راجہ ناصر علی خان، محترم شیخ اکبر رجائی، محترم جاوید منوا،محترمہ ڈاکٹرکنیز فاطمہ، کا تہہ دل سے شکریہ ادا کرتا ہوں کہ انہوں نے مجھ پہ اعتماد کیا اور قائد حزب اختلاف منتخب کیا۔

انہوں نے مزید کہا کہ صوبائی اور مرکزی قائدین، وٹرز، سپورٹرز سب کا شکریہ جنہوں نے ہر مرحلہ پر میری پشت پناہی کی اور حوصلہ افزائی کی۔ انشاءاللہ عوامی ایشیوز پر، گلگت بلتستان کے حقوق پر اپنی سیاسی جدوجہد جاری رکھیں گے۔ آج سے ماہ محرم الحرام ہے۔ اس مقدس اور غم کے مہینے کے احترام میں کسی قسم کی تبریک کا مسیج نہ چلایا جائے۔

وحدت نیوز(اسلام آباد) چیئرمین مجلس وحدت مسلمین پاکستان علامہ راجہ ناصرعباس جعفری حفظہ اللہ نے محرم الحرام سال 1445 ہجری قمری کے آغاز کے موقع پر سماجی رابطے کی ویب سائٹ ٹوئٹر پر جاری اپنے پیغام میں کہا ہے کہ محرم الحرام کا مقدس مہینہ ‎#كربلاء میں برپا ہونے والے معرکہ حق و باطل کی یاد تازہ کرتا ہے۔یہ مہینہ ہر محب اہلبیت علیہم السلام سے تقاضا کرتا ہے کہ وہ اپنے امام سے تجدید عہد کریں۔امام برحق علیہ السلام کے ماننے والے کبھی ظالم کی حمایت اور مظلوم کی مخالفت نہیں کر سکتے۔

انہوں نے کہا کہ ہم حسینی ہیں ہمارا کردار بھی حسینی ع ہونا چاہیے۔ہماری بہنوں بیٹیوں کا زینبی کردار ہونا چاہئیے۔امام عالی مقام حسین علیہ السلام پوری انسانیت کے امام ہیں کسی مخصوص مسلک کا ان پر اجارہ نہیں۔ کربلا میں جا کر دیکھیں ۔مسلمانوں کے مختلف مکاتب فکر کے علاوہ عیسائی، ہندو، سکھ اور دیگر مذاہب کے لوگ بھی امام حسین علیہ السلام کو سلام پیش کرنے جوق در جوق آتے ہیں۔یہ اس بلند اورعظیم کردار کو سلام ہے جس نے ظلم کے خلاف ڈٹ جانے کا ہر باضمیر کو حوصلہ عطا کیا۔

انہوں نے مزید کہا کہ میرا ریاستی اداروں سے بھی مطالبہ ہے کہ محرم الحرام کے دوران امن و امان کے قیام کو یقینی بنانے کے لیے ذمہ دارانہ کردار ادا کریں۔عزاداری کے پروگراموں کو فول پروف سکیورٹی مہیا کی جائے۔افغانستان کے راستے شر پسند عناصر کی آمد و رفت مختلف خدشات کو جنم دے رہی ہے۔ ایسی صورتحال جب دشمن تاک میں ہو  قانون نافذ کرنے والے ادارے کی ذمہ داریاں مزید بڑھ جاتی ہیں۔ادارے عزاداروں پر بے بنیاد مقدمات کے اندراج کی مشق دہرانے سے باز رہیں۔عزاداری ہمارا آئینی و قانونی حق ہے جس پر کسی قسم کی پابندی قابل قبول نہیں۔