وحدت نیوز(اسلام آباد)چیئرمین مجلس وحدت مسلمین پاکستان علامہ راجہ ناصر عباس جعفری نے 24 ذی الحجہ عید مباہلہ کے پر مسرت موقع پر ولی العصر حضرت امام زمانہ عجل اللہ تعالیٰ فرجہ الشریف، مقام معظم رہبری اور پنجتن پاک علیہم السلام کے تمام چاہنے والوں کی خدمت میں ہدیہ تبریک و تہنیت پیش کرتے ہوئے کہا ہے کہ مباہلہ یعنی ان پاکیزہ اور برگزیدہ ہستیوں کی حق و صداقت کی نصرت و کامرانی کا دن جو مقصود کائنات ہیں، جن کا وجود اقدس اس کائنات کے ہونے کا سبب بنا، آیت مباہلہ رہتی دنیا تک جیت کی نشانی ہے جو کہ ہر مسلمان کی کامیابی اور فتح ہے۔

انہوں نے کہا کہ عید مباہلہ کا خوشیوں بھرا دن تمام مسلمانوں کے لیے سرور و شادمانی کا موقع ہے، یہ یوم کافروں پر رہتی دنیا تک غلبے کی مبارک نوید سناتا ہے، مباہلہ پنجتن پاک علیہم السلام کی باطل پر بالادستی اور غلبے کا دن ہے، یہ دن کائنات کی سب سے سچی اور عظیم ترین ہستیوں سے منسوب ہے، جنہوں نے اپنے پاکیزہ کردار سے باطل قوتوں پر غلبہ حاصل کیا، مباہلہ نہ صرف حضور سرور کائنات صلی اللہ علیہ وآلہ وسلم کی تاریخی فتح قرار پایا بلکہ آیت مباہلہ نے یہ بھی واضح کر دیا کہ اہلبیت اطہار علیہم السلام سے مراد کونسی مقدس ترین ہستیاں ہیں۔

وحدت نیوز(اسلام آباد)چیئرمین مجلس وحدت مسلمین پاکستان علامہ راجہ ناصر عباس جعفری نے میڈیا سیل سے جاری اپنے بیان میں کہا ہے کہ محرم الحرام کے قریب پارہ چنار پر لشکر کشی ملک دشمن عناصر کی سوچی سمجھی سازش ہے، یہ کسی بڑے طوفان کا پیش خیمہ بھی ثابت ہو سکتی ہے، ریاست اور سیکورٹی ادارے اس جنگ کو بروقت روکنے میں اپنا عملی کردار ادا کریں، پارہ چنار کے پرامن اور وطن کے وفادار عوام پر جنگ مسلط کرنے والے شر پسند عناصر اپنے ناپاک عزائم میں ناکام ہونگے، یہ کوئی فرقہ وارانہ مسئلہ نہیں ہے بلکہ مذموم مقاصد پر مبنی ملک دشمن دہشت گردوں کی بہیمانہ سازش ہے۔

انہوں نے کہا کہ چار روز سے جنگ کی آگ میں سلگتے ہوئے پارہ چنار کے محب وطن شہریوں کی جان و مال کے تحفظ کو یقینی بنایا جائے، ملک کی تمام امن پسند قوتوں کو اس جنگ کے روکنے میں اپنا بھرپور کردار ادا کرنا چاہیے، پارہ چنار ایک حساس اور دفاعی حوالے سے انتہائی اہم علاقہ ہے، جس کا بدامنی کی لپیٹ میں آنا تشویشناک ہے، حکومت کو چاہیے کہ وہ فی الفور ان تمام مسائل اور کرداروں کا خاتمہ کرے جن کی وجہ سے جنگ تک نوبت پہنچ گئی ہے، ملت جعفریہ پاکستان پورے ملک میں ان حملوں کے خلاف سراپا احتجاج ہے اور سخت تشویش میں مبتلا ہے۔

وحدت نیوز(اسلام آباد)مجلس وحدت مسلمین کے وائس چیئرمین علامہ احمد اقبال رضوی کی قیادت میں اعلیٰ سطح وفد نے صدر مملکت ڈاکٹر عارف علوی سے ایوان صدر میں ملاقات کی۔

ملاقات میں پاراچنار جنگ۔متنازعہ نصاب۔ متنازعہ فوجداری بل سمیت محرم الحرام کے مسائل کے موضوعات پربات چیت ہوئی۔

 وفد میں سیکرٹری تنظیم سازی مقصود ڈمکی، عزادری ونگ کے مرکزی صدر ملک اقرار حسین،رکن شوری عالی سید امتیاز حسین رضوی شامل تھے۔

صدر مملکت ڈاکٹر عارف علوی نے ایم ڈبلیوایم کے وفد کو تمام مسائل کے حل کیلئے متعلقہ حکام کو فوری ہدایات جاری کرنے کی یقین دہانی کروائی۔

وحدت نیوز(اسلام آباد)مجلس وحدت مسلمین پاکستان ضلع اسلام آباد کی جانب سے پارہ چنار میں چار روز سے جاری جنگ کے خلاف نیشنل پریس کلب کے سامنے احتجاجی مظاہرہ کیا گیا، مظاہرین کی طرف سے پارہ چنار میں جنگ شروع کرنے والی طاقتوں کے خلاف شدید نعرہ بازی کی گئی۔احتجاجی مظاہرے سے خطاب کرتے ہوئے مجلس وحدت مسلمین پاکستان صوبہ پنجاب کے صوبائی صدر علامہ سید علی اکبر کاظمی نے کہا کہ ہم اس جنگ کی شدید الفاظ میں مذمت کرتے ہیں اور حکومت وقت سے مطالبہ کرتے ہیں کہ وہ اس فتنے کو مزید پھیلنے سے روکے، ان مظلوم بچوں اور خواتین کا ریاست سے سوال ہے کہ آخر کس جرم کی پاداش میں ان پر وحشیانہ انداز میں لشکر کشی کی گئی ہے، کیا ہم پاکستان کے شہری نہیں ہیں، چاروں اطراف سے ہیوی اسلحے سے بمباری ہو رہی ہے اور افغانستان سے درجنوں دہشت گرد داخل ہو کر میزائلوں کا کھلم کھلا استعمال کر رہے ہیں، انہیں روکنا اور جواب دینا کس کے فرائض منصبی میں شامل ہے۔

احتجاجی مظاہرے سے خطاب کرتے ہوئے مجلس وحدت مسلمین صوبہ خیبر پختونخواہ کے صوبائی جنرل سیکرٹری شبیر حسین ساجدی نے کہا کہ ریاست کو اپنی ذمہ داری ادا کرنی چاہیے اور ضلع کرم پارہ چنار کے عوام کی حفاظت کو یقینی بنانا چاہیئے، زمینی تنازعات ہر جگہ پر موجود ہیں لیکن ان مسائل پر مسلکی لبادہ اوڑھ کر فرقہ واریت کو ہوا دینا سراسر شر پسندی ہے، جب وہاں کے دونوں اطراف کے عمائدین مسائل کو باہمی اتفاق و اتحاد سے حل کرنا چاہتے ہیں تو پھر یہ کونسی قوتیں ہیں جو جنگ کے شعلے بھڑکا رہے ہیں، ریاست کو ان عناصر کا سختی سے قلع قمع کرنا ہوگا۔

احتجاج سے خطاب کرتے ہوئے پارہ چنار کمیونٹی کی سوشل کارکن نائلہ الطاف نے کہا کہ یہ کوئی شیعہ سنی مسئلہ نہیں ہے جو شر پسند عناصر بھی اسے فرقہ وارانہ رنگ دینے کی کوشش میں مصروف ہیں دراصل وہ ضلع کرم کے امن کے اصل دشمن ہیں، یہ جنگیں اور لشکر کشیاں پہلے بھی کئی مرتبہ ہو چکی، جن کا نتیجہ سوائے علاقے کے معصوم عوام کے نقصان کے سوا کچھ نہیں نکلا، لہذا حکومت کو چاہیے کہ وہ ان تمام زمینی تنازعات کو متعلقہ اداروں، مقامی انتظامیہ اور عمائدین کے ذریعے حل کروانے میں اپنا عملی کردار ادا کرے، تاکہ وہاں کی عوام امن سے زندگی گزار سکیں۔