وحدت نیوز(آرٹیکل)خلقت آدم سے ابتک بشریت نے کئی ایسی نابغہ روزگار شخصیات دیکھیں کہ جو پروردگار عالم کے اس اعلان کا منہ بولتا ثبوت تھیں کہ
  ’’لقد خلقنا الانسان فی احسن تقویم‘‘ کہ ہم نے انسان کو اپنی بہترین شکل میں پیدا کیا۔ احسن تقویم سے مراد یہی ہے کہ ذات احدیت نے انسان کو جبلت وفطرت کے اعتبار سے بھی اور شکل و صورت کے اعتبار سے دیگر مخلوقات سے احسن بنایا ہے۔قرآن مجید نے جن لوگوں کو کامیاب اور حیات ابدی کا مصداق قرار دیا وہ شہدا ہیں ۔ قرآن کریم نے شہید کی حیات ابدی کا اعلان انتہائی تصریح سے اس انداز میں کیا  ’’ولا تقولو لمن یقتل فی سبیل اللہ اموات بل احیا ء ولکن لا تشعرون ‘‘

جب بات شہدا وطن کی ہو تووطن  عزیز پاکستان کے باوفا فرزندوں میں ایک عالی ترین نام  شہید بزرگوار شہید ڈاکٹر محمد علی نقوی کا نام ہے۔ وہ کہ جس کی زندگی کا ہر لمحہ ان کے نام نامی کیطرح سیرت محمد و علی علیھم السلام سے مزین تھا۔  اس عظیم شہید کو ہم جدا ہوئے آج انتیس برس بیت گئے لیکن اس کی یاد آج بھی لاکھوںحریت پسندوں کے دلوں میں زندہ ہے ۔آج بھی ان  کاخوبصورت چہرہ  اور دلنشیں آواز جوانوں کے قلوب کو گرما رہی ہے۔ آج بھی نہ صرف خیبر سے کراچی تک بلکہ دنیا بھر پھیلے ہوئے فکری ونظریاتی جوان ان کی انقلابی فکر سے استفادہ کررہے ہیں۔ وہ ہستی کہ جس نے پاکستان میں جوانوں کے لئے شجرہ طیبہ کی بنیا دیں فراہم کیں ۔

فکر و عمل کیساتھ زندگی بسر کرنے والے افراد ہمیشہ کم ہوتے ہیں لیکن یہی وہ لوگ ہیں اللہ کے وعدے پہ عمل پیرا ہوتے ہیں اور اس آیہ مجیدہ ’’کم من فئتہ قلیلۃغلبت فئتہ کثیرۃ  باذن اللہ‘‘ کے مصداق بن جاتے ہیں۔۔ انسان کا اپنی ذات تک بیدار ہونا آسان ہے امر ہے لیکن قوموں کے اندر فکری بیداری پیدا کرنا مشکل ہے۔ سلام اس شہید پہ جو نہ صرف خود انقلابی تھا بلکہ اپنی ذات میں ایک انجمن تھا وہ سفیر انقلاب بن کے سرزمین پاکستان کے لاکھوں فرزندوں کو انقلاب کا راہی بنا گیا ۔وہ ایسا مفکر تھا جس نے لاکھوں اذہان کو فکر انگیز بنایا۔

شہید بزرگوار کی شخصیت کامل ترین اوصاف کا مجموعہ تھی۔ وہ نہ صرف شجاع  تھے بلکہ وطن عزیز کے غیور فرزندوں کے لئے شجاعت کا استعارہ تھے۔ وہ  ایک مجاہد بھی اور ایک بابصیرت سیاسی مدبر بھی تھے۔ وہ مشکل ترین حالات میں Lead from front کے زریں اصول پہ عمل پیرا تھے ۔ وقت کی ظالم ترین ملکی و بین الاقوامی قوتوں کے خلاف بیک وقت نہ صرف خود نبرد آزما تھے بلکہ ہزاروں پاکیزہ جوانوں کی راہنمائی و قیادت کا کا پرچم بھی تھامے ہوئے تھے۔پاکستان کے طول و عرض میں کوئی شہر ایسا نہین تھا جس کی فضا میں آپ کی  ’’تکبیر‘‘ کی صدا نہ گونجی ہو۔

اس سرزمین کا وہ بطل جلیل تھا جو فکر امام راحل اور روش و سیرت امام خمینی رضوان اللہ تعالیٰ علیہ عملی پیرو تھا۔ وہ باتمام معنیٰ فرزند انقلاب تھا۔ شہد ا کی یاد ہمیں آگاہی و بیداری دیتی ہے جب بھی اس شہید کا ذکر ہوا اس شہید کی مقدس روح نے معاشرے کو اور بالخصوص معاشرے کے توانا ترین جزو یعنی جوانوں کو اور انکے قلوب کو انقلابی فکر کیساتھ منور کیا۔ بقول شہید مطہری  رحمتہ اللہ علیہ  ’’ شہید کا خون زمین پہ نہیں گرتا ہے بلکہ قوموں کی رگوں میں دوڑتا ہے ‘ ‘ ۔  شہید کے پاکیزہ خون سے لاکھوں انسان نئی زندگی پاتے ہیں ۔

بندگان الٰہی و پاکیزہ ہستیوں کی سیرت کا ایک خاصہ عجز و انکساری ہے۔ شہید کی زندگی عجز و انکساری  اور تقویٰ الٰہی کا منہ بولتا ثبوت تھی۔ وہ ایک ایسا طلمساتی کردار تھا جس نے بیک وقت ایک عام مزدور سے لیکر ملک کی اس وقت کی اعلیٰ ترین قیادت تک ہر شعبہ زندگی سے تعلق رکھنے والے افراد کو نہ صرف جذب کیا بلکہ تمام طبقات کو اپنا گرویدہ بنایا۔ ان کیساتھ چلنے والا ایک ملاز م ، ایک ڈرائیور یا دیگر ایسا ہی عملہ اپنے لئے اعزاز سمجھتا تھا کیونکہ شہید ڈاکٹر محمد علی نقوی  ہر فرد کی عزت نفس کا محافظ تھا۔ وہ دوستوں اور کارکنوں میں اس طرح زندگی بسر کرتا تھا کہ کبھی بھی کسی فرد کو ان سے خود پسندی و جاہ طلبی کا گمان تک پیدا نہ ہوتا تھا۔ وہ شاعر مشرق کے اس کا کامل ترین نمونہ تھے کہ ’’ ہو حلقہ یاراں تو بریشم کی طرح نرم‘‘ ۔ وہ جوانوں کی آماجگاہ بنے ۔

اس عظیم ہستی نے اپنے قول و فعل سے بصیرت کے چراغ روشن کئے۔ کم کھانا اور کم سونا اور اپنے اوقات کو منظم و مرتب رکھنا ان کی زندگی کا خاصہ تھا۔ وسائل کی دستیابی اور ایک پروفیشنل ڈاکٹر ہونے کے باوجود شہید کی زندگانی سادگی و قناعت پسندی سے مزین تھی۔ امانت و دیانت اور قومی و ملی وسائل کا کما حقہ استعمال آپکی اجتماعی جدوجہد اور روش کار کا وہ روشن ترین پہلو ہے جس کے بغیر کوئی بھی قیادت یا گروہ ناکام تصور ہوتا ہے۔ اجتماعی جدوجہد میں احتساب کا عمل نہ ہو تو شخصیات ، ادارہ جات اور جماعتوں میں فسطائیت ، اقرباپروری  اور بدعنوانیت کا عنصر شامل ہونے کا اندیشہ رہتا ہے۔ شہید بزرگوار نہ صرف خود احتسابی
 کے قائل تھے بلکہ اجتماعی جدو جہد میں احتساب عمل کے داعی تھے۔

وہ سیرت آئمہ طاہرین پہ گامزن تھے  اور عزاداری سید الشہدا کے دفاع، ترویج اور اصلاح کے تمام پہلووں پہ ہمہ وقت خدمات سر انجام دیتے رہے۔ وہ ہمیشہ افراد کی استعدا د کے قائل رہے اور امام صادق ؑ  کے اس قول پہ گامزن تھے کہ  ’’ کبھی بھی لوگوں کے کم ہونے کیوجہ سے پریشان نہیں ہونا چاہیے‘‘  ۔

وہ کربلا کے راستے کے راہی تھے۔ وہ ناموس اسلام وقرآن کے علمبردار تھے۔ ہر پرچم بردار علمبردار نہیں ہوسکتا  لیکن شہید بزرگوار حقیقتا فنا فی اللہ تھے ۔ وہ انقلاب اسلامی و انقلاب امام مہدی عجل اللہ تعالیٰ فرجہ الشریف کے حقیقی علمبردار تھے۔ وہ ناموس انقلاب کے محافظ تھے۔

 وہ ہر وقت آمادہ و بیدار تھے اور اپنی آخری سانس تک ظلم و ظالم سے بر سرپیکار تھے۔وہ جس نے مشکل ترین اور سیاہ ترین دور میں بھی خوف کے بتوں کو توڑا اور وطن عزیز کے ہر فرزند کی زبان پہ یہ شعار جاری کرایا   ’’ یہ درس کربلا کا ہے کہ خوف بس خدا کا ہے ‘‘ ۔ وہ جس نے خدا سے کئے ہوئے اپنے وعدے کو سچا کردکھایا اور آیہ کریمہ کا مصداق ٹھہرا  کہ ’’ من المومنین رجال  صدقوا ما عاھددواللہ علیہ‘‘  

وہ بظاہر ایک طبیب تھا لیکن در حقیقت وہ لاکھوں دلوں کے لئے  ’’ طبیب القلوب‘‘ بن گیا ۔
 ان کے رفیق کار اور مفکر ادیب مرحوم و مغفور جناب ثاقب اکبر نقوی نے انہیں یوں خراج عقیدت پیش کیا

لہو کی وادی میں کون اترا
یہ کون خوں میں نہا گیا ہے
یہ کس کا پرچم ہے خوں میں لت پت
یہ کس کا چہرہ لہو لہو ہے
وہی جو ملت کی آبرو ہے
جو حوصلوں کی نوید بھی تھا
جو دل کے جذبوں کا ترجماں تھا
جو ہمتوں کا امین بھی تھا
جو نیکیوں کا قسیم بھی تھا
کریم ِعہد کریم بھی تھا
جو ہر گھڑی خوئے جستجو تھا
وہی جو ملت کی آبرو تھا

از قلم: ملک اقرار حسین علوی    
مرکزی صدر عزاداری ونگ مجلس وحدت مسلمین پاکستان

وحدت نیوز(لاہور) مجلس وحدت مسلمین پنجاب کے صوبائی صدر علامہ سید علی اکبر کاظمی نے میڈیا سیل سے جاری بیان میں کہا ہے کہ امریکی کانگریس مین اینڈی آگلس کا تمام فلسطینیوں کو قتل کر دو کہنا در حقیقت حقیقی امریکی ظالمانہ سوچ کی ترجمانی ہے ۔ انہوں نے کہا کہ قرآن مجید میں ان دونوں ظالم ریاستوں کیلئے کھلے دشمن کا لفظ استعمال ہوا ہے ۔ کانگرسمین اینڈی آگلس کے اس بیان کے بعد یہ بات مزید واضح ہو جاتی ہے اور قرآن مجید پر ہمارے ایمان میں مزید اضافہ ہو جاتا ہے۔

 انہوں نے کہا کہ فلسطینی مسلمانوں پر جاری بدترین مظالم پر نومنتخب مینڈیٹ چور حکومت تا حال مجرمانہ خاموشی اختیار کیے بیٹھی ہے۔ انہوں نے کہا کہ کچھ روز قبل اعوان بالا میں ہندو سینیٹر دنیش کمار نے اسلام کے نام پر بنے اس ملک پاکستان میں موجود حکومت کو قرآن کریم کی آیت پڑھ کر جھنجھوڑا اور سوال کیا کہ کیوں فلسطینی مظلوموں کی انسانیت کی بنیاد پر مدد نہیں کرتے ۔ سینیٹر مشتاق احمد خان نے سینیٹ میں خطاب کرتے ہوئے توجہ دلوائی کہ ہم اپنے خرچ پر فلسطینی مظلوم، بھوکے اور پیاسوں کیلئے ایک بوندھ پانی پہنچا سکیں انہیں خوراک مہیا کر سکیں اگر حکومتی سطح پر ہمارے لیے راستے کھول دیے جائیں لیکن توجہ دلاؤ نوٹس کے باوجود حکومت کے کانوں تک جوں نہیں رینگتی۔

 انہوں نے کہا کہ مینڈیٹ چور حکومت عہدوں کی بندر بانٹ میں مصروف ہیں جبکہ فلسطینی مظلوم پہلے سے زیادہ مشکلات کا شکار ہیں ۔ علامہ سید علی اکبر کاظمی نے ایبسولیوٹلی ناٹ کی پالیسی کو پاکستان اور مسلمانان عالم کیلئے راہ حل قرار دے دیا۔ انہوں نے کہا جب تک ہم امریکہ اسرائیل اور ان کے حواریوں کے ساتھ ایبسولیوٹلی ناٹ کی پالیسی نہیں اپنا لیتے اس وقت تک پاکستان میں آئین و قانون کی حکمرانی ممکن نہیں ہو سکتی۔

وحدت نیوز(اسلام آباد) اسلام آباد ہائیکورٹ کے چیف جسٹس عامر فاروق نے مجلسِ وحدت مسلمین پاکستان کے سربراہ علامہ ناصر عباس جعفری کی فارم 45، 47 اور 49 الیکشن کمیشن کی ویب سائٹ پر اپلوڈ کرنے کی درخواست پر الیکشن کمیشن کو نوٹس جاری کر کے آئندہ ہفتے جواب طلب کر لیا ہے۔ وکیل ایمان مزاری نے عدالت کو بتایا کہ الیکشن کمیشن نے گزشتہ روز کسی حد تک فارم 45 اپلوڈ کیے لیکن بعد میں دوبارہ ہٹا دیے۔

تفصیلات کے مطابق انتخابات کے بعد 14 دنوں میں فارم 45 اور 47 ویب سائٹ پر اپلوڈ نہ کرنے پر الیکشن کمیشن کے خلاف ایم ڈبلیو ایم کی درخواست پرآج دوسری سماعت ہوئی۔ اسلام آباد ہائی کورٹ کے چیف جسٹس عامر فاروق نے کیس کی سماعت کی ۔

مجلس وحدت مسلمین پاکستان کی جانب سے ایمان زینب مزاری ایڈوکیٹ عدالت کے روبروپیش ہوئیں۔ درخواست گزار و سربراہ ایم ڈبلیو ایم راجہ علامہ ناصر عباس جعفری کو بیٹھنے کی ہدایت کی گئی۔

ایمان مزاری ایڈوکیٹ نے کہا کہ الیکشن ایکٹ کے مطابق 14 دنوں میں انتخابی نتائج کے فارمز ویب سائٹ پر اپلوڈ کرنے ہوتے ہیں، الیکشن ایکٹ 2017 کے مطابق صرف فارمز نہیں بلکہ تمام متعلقہ دستاویزات کو اپلوڈ کرنا ہوتا ہے۔

ایم ڈبلیوایم کی وکیل ایمان زینب مزاری ایڈوکیٹ نے کہا کہ 8 فروری کو انتخابات ہوئےمگر ابھی تک متعلقہ دستاویزات اپلوڈ نہیں کئیے گئے، الیکشن کمیشن نے گزشتہ روز کسی حد تک فارم 45 اپلوڈ کئیے اور پھر ہٹا دئیے۔

دلائل سننے کے بعداسلام آباد ہائی کورٹ نے الیکشن کمیشن کو نوٹسسز جاری کرکے جواب طلب کرلیاہے،عدالت نے کیس کی سماعت آئندہ ہفتے تک کے لئے ملتوی کردی ہے۔

وحدت نیوز (کوئٹہ) مجلس و حدت مسلمین بلوچستان نے بلوچستان شیعہ کانفرنس کے نائب صدر حاجی رمضان علی ہزارہ کے قاتلوں کی جلد از جلد گرفتاری کا مطالبہ کیا ہے۔

ایم ڈبلیو ایم کے صوبائی میڈیا سیکرٹری کی جانب سے جاری بیان میں بلوچستان شیعہ کانفرنس کے نائب صدر حاجی رمضان علی ہزارہ کی شہادت پر افسوس کا اظہار کرتے ہوئے کہا گیا ہے کہ رمضان ہزارہ کے قاتلوں کو گرفتار کرکے قرار واقعی سزا دی جائے۔

 انہوں نے حاجی رمضان علی ہزارہ کو اتحاد بین المسلمین اور شہر میں امن و امان کے قیام کیلئے خدمات پر خراج تحسین پیش کرتے ہوئے کہا ہے کہ شہید حاجی رمضان علی جیسے محب وطن اور دیانتدار شخص کے تحفظ کے لئے سیکیورٹی انتظامات نہ ہونا سمجھ سے بالاتر ہے۔