وحدت نیوز(جیکب آباد)مجلس وحدت مسلمین پاکستان کے مرکزی سیکرٹری تنظیم سازی علامہ مقصود علی ڈومکی نے کہا ہے کہ امامیہ اسٹوڈنٹس آرگنائزیشن پاکستان کے جوان قائد شہید اور ڈاکٹر شہید کے نقش قدم پر چلتے ہوئے ہوئے وطن عزیز پاکستان میں اسلام ناب محمدی کی تبلیغ و ترویج کے لئے مصروف عمل ہیں۔ ان خیالات کا اظہار انہوں نے جیکب آباد میں امامیہ اسٹوڈنٹس آرگنائزیشن پاکستان کے زیر اہتمام سفیر انقلاب ڈاکٹر محمد علی نقوی شہید کی 29ویں برسی کی تقریب سے خطاب کرتے ہوئے کیا۔

 انہوں نے کہا کہ انقلاب اسلامی نور حق کی تجلی تھی۔ جس سے تاریکیوں اور ظلمتوں کی سوداگر استکباری قوتیں خائف تھیں۔ انقلاب اسلامی نے عالمی استکباری نظام کی باطل بنیادوں کو ہلا کر رکھ دیا۔ قائد شہید علامہ سید عارف حسین الحسینی رحمۃ اللہ علیہ عاشق امام خمینی تھے۔ قائد شہید عظیم مفکر سید باقرالصدر کے فرمان کی عملی تصویر تھے۔ آپ امام خمینی رحمۃ اللہ علیہ کی ذات میں ذوب ہوگئے۔ قائد شہید کے گفتار اور کردار سے عشق امام چھلکتا تھا۔

 علامہ مقصود ڈومکی نے کہا کہ شہید ڈاکٹر محمد علی نقوی پاکستان کے نوجوانوں کے لئے نمونہ عمل ہیں۔ آپ قائد شہید کے پیرو اور دست و بازو بنیں۔ سفیر انقلاب نے انقلاب اسلامی اور رہبر کبیر خمینی بت شکن کے افکار و پیغام کو سر زمین پاکستان میں پھیلایا۔ ایم ڈبلیو ایم رہنماء نے کہا کہ فلسطین کے مظلوم مسلمانوں کی مدد کرنا ہم سب پر واجب ہے۔ قبلہ اول مسجد اقصیٰ اور سرزمین فلسطین پر اسرائیل کے غاصبانہ قبضے کے خلاف فلسطینیوں کی جدوجہد ضرور کامیاب ہوگی۔ انہوں نے مزید کہا کہ امامیہ اسٹوڈنٹس آرگنائزیشن پاکستان کے جوان قائد شہید اور ڈاکٹر شہید کے نقش قدم پر چلتے ہوئے ہوئے وطن عزیز پاکستان میں اسلام ناب محمدی کی تبلیغ و ترویج کے لئے مصروف عمل ہیں۔

وحدت نیوز(ملتان)مجلس وحدت مسلمین عزاداری ونگ جنوبی پنجاب کی صوبائی کابینہ کا اجلاس و شب بیداری ملتان میں منعقد ہوئی، اجلاس میں صوبائی صدر عزاداری ونگ انجینئر سخاوت علی سیال، صوبائی جنرل سیکرٹری عون رضا انجم ایڈووکیٹ، صوبائی سیکرٹری میڈیا سیل ثقلین نقوی، صوبائی رابطہ سیکرٹری سید غدیر عباس شیرازی نے شرکت کی، صوبائی نائب صدور صفدر عباس خان اور عامر عباس بھٹہ نے ویڈیو لنک کے ذریعے شرکت کی۔

 اجلاس میں فیصلہ کیا گیا کہ 15رمضان المبارک یوم ولادت امام حسن مجتبی علیہ السلام، 21ماہ رمضان المبارک یوم شہادت مولا علی علیہ السلام، مظلوم فلسطینی مسلمانوں کے ساتھ اظہار یکجہتی کے لیے یوم القدس کے موقع پر احتجاجی مظاہروں اور ریلیوں میں شرکت اور 8 شوال یوم انہدام جنت البقیع کے موقع پر جمعة المبارک کو احتجاجی مظاہرے اور ریلیاں نکالی جائیں گی۔

وحدت نیوز(جھنگ) مجلس وحدت مسلمین جھنگ کے وفد نے ضلعی صدر مولانا سید روح اللّٰہ کاظمی کی قیادت میں دو سال سے جبری طور پر لاپتہ تعلیم یافتہ محب وطن نوجوان بلال حیدر کے خانوادے سے ملاقات کی، اس موقع پر مولانا روح اللہ کاظمی کا کہنا تھا کہ محبت وطن نوجوان کی بازیابی کیلئے ہر ممکنہ کوشش جاری رکھیں گے، اس انداز سے نوجوانوں کا لاپتہ ہونا تشویش ناک عمل ہے، ہم قانون پسند اور وطن کے محب ہیں، ہمارے لئے ملک کی سالمیت ریڈ لائن ہے۔

 ان کا مزید کہنا تھا کہ ہمارا ہمیشہ سے مطالبہ رہا ہے کہ اگر کسی کا کوئی جرم یا گناہ ہے تو اسے معزز عدالتوں کے روبرو پیش کرکے قانونی طریقہ کار سے شامل تفتیش کرنا چاہیے، اہل خانہ کیلئے مدت سے نوجوان کا آنکھوں سے دور رہنا انتہائی اذیت ناک اور بہت زیادہ پریشانی کا باعث ہے، جس کا اندازہ لگانا محال ہے۔ انہوں نے یقین دہانی کرائی کہ ہم ہرپلیٹ فارم پر ان کی بازیابی کیلئے کوشش جاری رکھیں گے، اس موقع پر ایم ڈبلیو ایم ضلع جھنگ کے ضلعی و تحصیل کابینہ کےاراکین موجود تھے۔

وحدت نیوز(اسلام آباد)چیئرمین مجلس وحدت مسلمین پاکستان علامہ راجہ ناصر عباس جعفری نے میڈیا سیل سے جاری اپنے بیان میں کہا ہے کہ دہشت گرد ملک و قوم کے دشمن ہیں، ملک دشمن عناصر اور ان کے سہولت کاروں کی سیاسی عمل میں شمولیت کے بیانیہ نے شر پسندوں کے حوصلے بلند کر رکھے ہیں، ملک میں امن و امان کے حقیقی قیام کے لیے ملک دشمن قوتوں کو انصاف کے کٹہرے میں لایا جانا ضروری ہے، دہشت گرد اپنی بزدلانہ کارروائیوں سے قوم کے حوصلوں کو پسپا نہیں کر سکتے۔

انہوں نے مزید کہا کہ قومی سلامتی کے لیے شہداء کی قربانیوں کو خراج عقیدت و سلام پیش کرتے ہیں اور شہداء کے خاندانوں کے ساتھ کھڑے ہیں، قومی سلامتی کے ذمہ داران اور قوم کے ان گنت جوانوں نے پاک دھرتی کے لیے اپنی جانوں کا نذرانہ پیش کر کے ہمیشہ یہ ثابت کیا ہے کہ وطن عزیز کی محبت انہیں ہر شئے  پر مقدم ہے، دہشت گردوں کے ساتھ آہنی ہاتھوں سے نمٹا جائے ان بہیمانہ کاروائیوں میں ملوث عناصر انکے سرپرستوں کی بیخ کنی انتہائی ضروری ہے۔