وحدت نیوز(کوئٹہ) مجلس وحدت مسلمین کے مرکزی رہنما اور امام جمعہ علامہ سید ہاشم موسوی نے کہا ہے کہ مکتب اہل تشیع سے تعلق رکھنے والے افراد ہمیشہ اپنے مراجع کو قدر کی نگاہ سے دیکھتے ہیں۔ ولایت بمعنی حکومت و سرپرستی بالذات ذات باری تعالٰی کا حق ہے، اس کے بعد رسول اللہ (ص) کو یہ حق اللہ تعالٰی نے عطا کیا ہے، ان کے بعد آئمہ ہدیٰ (ع) اس کی کامل اہلیت رکھتے ہیں۔ نبی اکرم (ص) کے بعد امت کی رہبری اور قیادت اور حکومت کے اختیارات ان کے سپرد ہیں۔ ان کے بعد وہ امور جو فقہ اسلامی کے دائرے میں آتے ہیں، ان کی سرپرستی و ذمہ داری اور امت کی قیادت و راہنمائی کا نام ولایت فقیہ ہے۔ لہذا آیت اللہ العظمی سید علی خامنہ ای نہ صرف ایران بلکہ پاکستان سمیت تمام عالم اسلام کو مضبوط اور مستحکم دیکھنا چاہتے ہیں۔ وہ اپنا ہر اقدام تمام اسلامی ممالک کے مفادات کو پیش نظر رکھ کر اُٹھاتے ہیں۔

امام جمعہ کوئٹہ کا نوجوانوں کی فکری و ثقافتی تربیت پر زور دیتے ہوئے مزید کہنا تھا کہ جس طرح لوگوں کو جسمانی لحاظ سے سالم اور پاک رکھنے کيلئے کئی ايک پيشگی اقدامات کی ضرورت ہوتی ہے۔ اسی طرح ان کو فکری اور اعتقادی آلودگيوں سے پاکسازی اور محفوظ رکھنے کيلئے بھی پيشگی اقدامات کے طور پر معاشرے ميں علمی اور ثقافتی تدابير کو اسطرح مرتب کرنے کی ضرورت ہے کہ جوانوں اور نوجوانوں کيلئے ايک پاک، سالم اور فکری آلودگيوں سے دور ماحول ميسر ہو۔ اس مقصد کے پيش نظر علمی اور ثقافتی امور کے ذمہ دار افراد اور والدين پر يہ ذمہ داری عائد ہوتی ہے، کہ وہ اپنے تعليمی اور تربيتی پروگراموں کو اس انداز ميں چلائيں کہ معاشرے سے فکری اور اعتقادی کج رويوں ميں مبتلا يا اسکی زد ميں موجود افراد کی نشاندہی کرکے انہيں ثقافتی يلغار کے حملوں سے محفوظ کرنے کيلئے اقدامات کریں تاکہ ہماری نوجوان نسل آئندہ ادوار میں ملکی ترقی کیلئے بہتر خدمات سرانجام دے سکے۔

وحدت نیوز(گلگت) مجلس وحدت مسلمین پاکستان، گلگت بلتستان کے صوبائی سیکرٹری جنرل علامہ شیخ نیئرعباس مصطفوی نےاحتجاجی دھرنے کے شرکاءسے پانچویں روزخطاب کرتے ہوئے  کہا ہے کہ گلگت بلتستان کے طول و عرض میں گذشتہ چار دن سے جاری فقید المثال اور منظم احتجاجی دھرنوں نے کرپٹ اور نااہل صوبائی حکومت اور مہدی شاہ سرکار کی نیندیں حرام کر دی ہیں۔ انکا کہنا ہے کہ طویل عرصے بعد عوامی ایکشن کمیٹی کے مشترکہ و نمائندہ پلیٹ فارم پر گلگت بلتستان کی 16 اہم سیاسی، مذہبی اور قوم پرست جماعتوں کا 9 نکاتی ایجنڈہ پر اتفاق اور اسکے حصول کیلئے عملی جدوجہد نے ثابت کر دیا ہے کہ اب عوام اپنے حقوق کیلئے بیدار ہو چکے ہیں اور کسی قسم کا حربہ ہمیں تقسیم نہیں کرسکتا۔ انہوں نے اس عزم کا اظہار کیا ہے کہ تمام مطالبات کی حتمی منظوری تک دھرنے جاری رکھے جائینگے اور ہر فیصلہ مشاورت سے کیا جائیگا۔

وحدت نیوز(لاڑکانہ) گلگت بلتستان میں وفاقی وصوبائی حکومت کی نااہلی اور مہنگائی ، لوڈشیڈنگ میں ہو شربہ اضافے اور گندم پر دی جانے والی سبسڈی کے خاتمے کے خلاف علامہ راجہ ناصر عباس جعفری کی اپیل پر لاڑکانہ میں بعد نماز جمعہ ایم ڈبلیو ایم کے زیر اہتمام مرکزی جامع مسجد و امام بارگاہ جعفریہ کے سامنے احتجاجی مظاہرہ کیا گیا، احتجاجی مظاہرین سے خطاب کرتے ہوئے ضلعی سیکریٹری جنرل طارق حسین بدوی نے کہاکہ گلگت بلتستان کے عوام کو بنیادی حقوق سے محروم رکھنا حکمرانوں کی فرعونیت کی عکاسی کرتا ہے، مہنگائی ، لوڈشیڈنگ،کرپشن اور گندم کی آسمان سے باتیں کر تی قیمتوں نے عوام کا جینا محال کر دیا ہے، مہدی شاہ گلگت بلتستان کے نااہل ترین وزیر اعلیٰ ثابت ہوئے ہیں ، جو کہ آج تک اپنے صوبے کے عوام کے مسائل سے حل کے لئے ایک قدم بھی نہ اٹھا سکے۔ طارق بدوی نے حکومت کو متنبہ کیا کہ اگر عوامی ایکشن کمیٹی کے چارٹر آف ڈیمانڈ کو جلد از جلد تسلیم نہ کیا تو مجلس وحدت مسلمین ملک بھر میں احتجاج کا دائرہ کار بڑھا دے گی۔واضح رہے کہ لاڑکانہ کی تحصیل رتوڈیرو اور ڈوکری میں بھی اہلیان گلگت بلتستان سے اظہار یکجہتی کے لئے احتجاج کیا گیا۔

وحدت نیوز(ٹنڈو محمد خان) مجلس وحدت مسلمین پاکستان ضلع ٹنڈومحمد خان کے زیر اہتمام علامہ راجہ ناصر عباس جعفری کی اپیل پر گلگت بلتستان میں گندم پر سبسڈی کے خاتمے کے خلاف احتجاجی ریلی نکالی گئی، جس کی قیادت ضلعی سیکریٹری جنرل محب علی بھٹو نے کی ، جب کہ صوبائی ڈپٹی سیکریٹری جنرل عالم کربلائی اور صوبائی سیکریٹری تنظیم سازی یعقوب حسینی نے خصوصی شرکت کی،ریلی میں  شریک بڑی تعداد میں مظاہرین نے ہاتھوں میں بینر اور پلے کارڈ اٹھا رکھے تھے جن پر گلگت بلتستان کے محروم عوام سے اظہار یکجہتی اور وفاقی اور صوبائی کے استحصالی رویئے کے خلاف نعرے درج تھے،ریلی شہر کے گشت کر تے ہوئے پریس کلب پہنچی تو مظاہرین تین روزہ علامتی بھوک ہڑتال پر بیٹھ گئے ، اس موقع پر خطاب کر تے ہوئے مقررین نے کہا کہ گلگت بلتستان کے عوام کے ساتھ وفاقی اور صوبائی حکومت کا سوتیلی ماں جیسا سلوک انتہائی افسوس ناک ہے، عوام کو بنیادی حقوق سے محروم رکھنازیادتی ہے، عوامی ایکشن  کمیٹی گلگت بلتستان کی جانب سے پیش کردہ چارٹرڈ آف ڈیمانڈ کی بھر پور تائید کرتے ہیں۔