وحدت نیوز(جیکب آباد)مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی نے کہا ہے کہ امام علی علیہ السلام کی ذات گرامی میں تمام اعلیٰ انسانی صفات جمع ہوئیں۔ مولا علی علیہ السلام کے خطبات خطوط اور کلمات قصار کا مجموعہ نہج البلاغہ علم و عرفان کا سمندر ہے۔ ہر دور کے اہل فکر کو چاہئے کہ ان کے علم و معرفت سے رہنمائی حاصل کرے۔ ان خیالات کا اظہار انہوں نے ایام شہادت حضرت امیر المومنین امام علی علیہ السلام کی مناسبت سے مدرسہ المصطفی خاتم النبیین صلی اللہ علیہ وآلہ وسلم جیکب آباد میں منعقدہ مجلس عزا سے خطاب کرتے ہوئے کیا۔ انہوں نے کہا کہ حضرت امیر المومنین امام علی علیہ السلام کی ذات گرامی عالم انسانیت کے لئے مشعل راہ ہے۔ آپ کی پوری زندگی جہاد فی سبیل اللہ سے عبارت ہے۔ آپ نے آغوش رسالت میں تربیت پائی اسی لئے سید الانبیاء صلی اللہ علیہ وآلہ وسلم کے پاکیزہ و بے عیب کردار کا عکس ذات علیؑ میں نمایاں تھا۔ آپ کا گفتار و کردار قرآن کریم کی عملی تفسیر و تصویر تھا، اسی لئے آپ کو قرآن ناطق کہا گیا۔

ایم ڈبلیو ایم رہنماء نے کہا کہ امام علی علیہ السلام رات کو خوف و عشق خدا سے گریہ کرنے والے عابد شب زندہ دار اور دن کو میدان جہاد میں بہادر شیر کی طرح خدا کے دشمنوں پر حملہ آور ہونے والے تھے۔ آپ کو نماز سے اس قدر عشق تھا کہ لیلہ الحریر میں جب ایک لحظے کے لئے بھی جنگ بند نہیں ہوئی تو مولا علی علیہ السلام کی اس شب بھی نماز تہجد قضا نہ ہوئی۔ تاریخ انسانی نے ایسا عابد و زاہد اور شیر بہادر نہیں دیکھا۔ امام علی علیہ السلام کی ذات گرامی میں تمام اعلیٰ انسانی صفات جمع ہوئیں۔ آپ کے زہد اور دنیا سے بے رغبتی کا یہ عالم تھا کہ دنیا کو تین طلاقیں دے دیں اور فرمایا کہ خدا کی قسم اگر سات آسمانوں اور روئے زمین کی حکومت مجھے ایک چیونٹی پر ظلم کے بدلے میں دے دی جائے تو میں کائنات کی حکومت کو ٹھوکر مار دوں گا مگر ایک چیونٹی پر معمولی سا ظلم نہیں کروں گا۔ آپ مجسم عدل تھے۔ علامہ مقصود ڈومکی نے کہا کہ مولا علی علیہ السلام کے خطبات خطوط اور کلمات قصار کا مجموعہ نہج البلاغہ علم و عرفان کا سمندر ہے۔ نہج البلاغہ ذات علی علیہ السلام کی طرح بے مثال ہے۔ ہر دور کے اہل فکر و نظر کو چاہئے کہ وہ نہج البلاغہ سے کسب فیض کرتے ہوئے مولا علی علیہ السلام کے علم و معرفت سے رہنمائی حاصل کریں۔

وحدت نیوز(اسلام آباد) چیئرمین مجلس وحدت مسلمین علامہ راجہ ناصر عباس جعفری نے فاتح خیبر امیرالمؤمنین حضرت امام علی ع کی شہادت کے پر غم موقع پر تمام عالم اسلام سوگواران و عزاداروں کی خدمت میں تعزیت و تسلیت پیش کرتے ہوئے کہا ہے کہ انیس، بیس، اکیس رمضان کے ایام شہادت امام علی ع سے منسوب ہیں، حضرت امام علی ع کی سیرت طیبہ ہمارے لیے نمونہ حیات ہے، آپ ع جان رسول ہیں، علم کو کمال اور شجاعت کو کمال کے ساتھ دیکھنا ہے تو حضرت امام علی ع کو دیکھیں جنہوں نے اپنی بابرکت وباعظمت زندگی کو دو مقدس عبادت گاہوں کعبہ اور محراب کوفہ کے درمیان بسر کیا، آپ زاہد، حاکم، حلیم و بردباد، بہادر، عابد، جری، سخی اور جواد ایثار کرنے والے تھے۔ انبیاء وآئمہ عدل کے نفاذ کے لیے آئے تھے، آپ ع محراب کوفہ میں شدت عدل کی وجہ قتل کر دیے گئے، معاشرے میں عدل نا ہو تو عوام کو حقوق اور انصاف نہیں ملتا، حکومت ان ایام میں جلوس عزاء کی سیکیورٹی کو یقینی بناتے ہوئے بہتر انتظامات کرے تاکہ یہ ایام پر امن طور پر گزریں۔

وحدت نیوز(شیخوپورہ )شیخوپورہ کی تحصیل مرید کے محلہ گرین ٹاؤن میں 21 رمضان المبارک کے روایتی جلوس میں انتظامیہ کی جانب سے رکاوٹ پر صوبائی صدر مجلس وحدت مسلمین پنجاب علامہ علی اکبر کاظمی کی اپنے وفد کے ہمراہ مریدکے جاکر بانیان جلوس سے اہم ملاقات ۔ بانیان جلوس کا صوبائی صدر مجلس وحدت کا مریدکے آمد پر اور حوصلہ افزائی کرنے اور ساتھ دینے پر شکریہ ادا کیا ۔

شیخوپورہ کی تحصیل مریدکے کے محلہ گرین ٹاؤن میں ہرسال 21 رمضان المبارک کو روایتی جلوس عزاء برآمد ہوتا ہے جو اپنے مقررہ راستوں سے ہوتا ہوا اپنی مقرر منزل پر اختتام پذیر ہوتا ہے ۔

 صوبائی صدر ایم ڈبلیو ایم پنجاب نے کہا روایتی جلوس کے راستے میں کسی قسم کی رکاوٹ ہرگز قبول نہیں ۔ اور بانیان جلوس کو یقین دہانی کرائی کہ آپ جلوس کے متعلق جو بھی فیصلہ کریں مجلس وحدت کے مسئولین آپ کے ساتھ کھڑے ہیں ۔

وحدت نیوز(لاہور)ہرسال 21 رمضان المبارک یوم شہادت امیر المومنین حضرت امام علی علیہ السلام کے مرکزی جلوس کا مبارک حویلی اندرون شہر لاہور سے برآمد ہوکر کربلا گامے شاہ اختتام پذیر ہوتا ہے ۔ صوبائی صدر مجلس وحدت مسلمین پنجاب جناب حجت الاسلام علامہ سید علی اکبر کاظمی صاحب نے صوبائی سیکرٹری سیاسیات مجلس وحدت مسلمین پنجاب جناب سید حسین زیدی ،صوبائی سیکرٹری فلاح و بہبود مجلس وحدت مسلمین پنجاب جناب عمران علی شیخ اور صوبائی آفس سیکرٹری مجلس وحدت مسلمین پنجاب ظہیر کربلائی کے ہمراہ شب 21 رمضان المبارک اندرون شہر لاہور مبارک حویلی اور مرکزی جلوس کے روٹ کا وزٹ کیا ۔ انہوں نے اپنے وفد کے ہمراہ 21 رمضان المبارک کے مرکزی جلوس کے لائسنس ہولڈر جناب احمد منیر قزلباش سے مبارک حویلی میں ملاقات کی جہان ہزاروں عزادار اپنی فیملیز کے ہمراہ ، رکھی گئی ضریح اور تبرکات کی زیارت کی خاطر موجود تھے ۔

 احمد منیرقزلباش نے مجلس وحدت مسلمین کے مسئولین کا شکریہ ادا کیا اور کہا کہ علامہ سید علی اکبر کاظمی صاحب اور ان کے ہمراہ معزز اراکین صوبائی کابینہ مجلس وحدت مسلمین کے یہاں پر آنے سے ہمیں بہت حوصلہ ملا ہے اور شکر گزار ہیں جناب احمد منیر قزلباش نے کہا کہ ہمیشہ مجلس وحدت مسلمین کے مسئولین نے ہمارا ساتھ دیا ہے ۔ کرونا کے ایام جو کہ اس جلوس کے لئے اور ہمارے لئے ایک آزمائش کی گھڑی سے کم نہیں تھے مجلس وحدت مسلمین کے مخلص دوستوں نے ہمارا مکمل ساتھ دیا اور اس مشکلات سے نکلنے میں ہماری مدد کی ۔ ہم ہمیشہ مجلس وحدت مسلمین کے بزرگان کے لئے دعا گو بھی ہیں اور شکریہ بھی ادا کرتے ہیں ۔

 اس موقعہ پر صوبائی صدر مجلس وحدت مسلمین نے کہا کہ ہم انتظامیہ پنجاب اور خصوصا لاہور کے شکر گزار ہیں کہ انہوں نے عزاداروں کے لئے سیکیورٹی کے فل پروف انتظامات کیے ہیں ۔ ہم مومنین کرام اور عزاداروں سے بھی گزارش کرتے ہیں کہ وہ جلوس کی انتظامیہ سے مکمل تعاون فرمائیں ۔ صوبائی صدر مجلس وحدت مسلمین پنجاب نے اپنے وفد کے ہمراہ احمد منیر کو یقین دلایا کہ ہم آپ کے ساتھ ہیں آپ نے جہاں بھی ہماری ضرورت محسوس کی ہماری پوری صوبائی اور ضلعی ٹیم آپ کے شانہ بشانہ کھڑی نظر آئے گی ۔ ہمارے مجلس وحدت مسلمین کے بے لوث خدمت گزار ابھی سے اس راستے میں عزاداروں کی خدمت میں مصروف ہیں اور ان شاءاللہ جلوس عزاء کے اختتام تک ساتھ رہیں گے ان شاءاللہ ۔جناب احمد منیر قزلباش بانی و لائسنس ہولڈر مرکزی جلوس 21 رمضان المبارک نے صوبائی صدر مجلس وحدت مسلمین پنجاب اور ان کے ہمراہ وفد کو مبارک حویلی میں رکھے گئے تبرکات اور ضریح پاک زیارات کرائیں ۔ زائرین اور عزاداروں کے اتنے رش کے باوجود وہ کافی دیر تک مجلس وحدت کے وفد کے ہمراہ رہے ۔