وحدت نیوز(لاہور) مجلس وحدت مسلمین پنجاب کے سیکرٹری جنرل علامہ عبدا لخالق اسدی نے دہشت گردوں کے ہاتھوں 23 سیکیورٹی فورسز کے نو جوانوں کی شہادت پر شدید غم و غصے کا اظہار کرتے ہوئے اس قومی سانحے کی  پر زورمذمت کی ہے۔ ان کا کہنا تھا کہ مذاکرات کے نام پر پاکستان کی سلا متی کے ساتھ گھناونے کھیل کا آغاز کرکے قومی سلامتی کو مجروح کیا جا رہا ہے۔شہداء سکیورٹی فورسز اور دیگر شہداء جو نام نہاد مذاکرات کے دوران شہید ہوئے اس کی ایف آئی آر طالبان حامی و مذاکرات حامی قوتوں کے خلاف درج کی جائے۔علامہ عبدالخالق اسدی  کا کہنا تھا کہ ہم شروع دن سے اس بات کا اعلان کر رہے تھے کہ ان وحشی درندوں سے مذاکرات پاکستانی آئین  اور اسلامی قوانین کی خلاف ورزی اور شیطان سے مذاکرات کے مترادف ہے۔طالبان پاکستان کے خلاف قوتوں اور ملک دشمن عناصر کی کٹھ پتلی گروہ ہیں ۔وہ کبھی بھی پاکستان کے حامی و ہمدرد نہیں ہو سکتے۔ملک بھر میںان دہشت گردوں کا ٹھکانہ اور  نرسریاں نام نہاد اسلامی وہ مدارس ہیں جو ملک کے طول و عرض میں پھیلا ہوا ہے۔ان کے خلاف کریک ڈاون کرنا اور قانون کے گرفت میں لینا ناگزیر ہو چکا ہے علامہ اسدی کا مزید کہنا تھا کہ ریاست کے باغیوں کی سر کوبی کے لئے فی الفور ان درندوں کے خلاف کاروائی شروع کی جائے۔مذاکرات کے نام پر ان دہشت گردوں کو دوبارہ منظم کرنے کی کوشش کی جا رہی ہے۔ہم کسی صورت بھی اپنے مادر وطن کو ان درندوں کے ہاتھوں یرغمال نہیں ہونے دیں گے۔

وحدت نیوز(سکھر) مجلس و حدت مسلمین صوبہ سندھ کی جانب سے دو روزہ تنظیمی و تربیتی ورکشاب پرانہ سکھر حیدری مسجد مین منعقد ہوئی جس سے مجلس وحدت مسلمین پاکستان کے مرکزی سیکریٹری امور تربیت علامہ احمد اقبال رضوی، مرکزی سیکریٹری تبلیغات علامہ اعجاز حسین بہشتی،مرکزی سیکریٹری اطلاعات سید مہدی ،مرکزی سیکریٹری روابط ملک اقرار حسین ،صوبائی سیکریٹری تربیت مولانا نشان حیدر ساجدی اور صوبائی ڈپٹی سیکریٹری جنرل عالم کربلائی نے تربیتی ورکشاپ کے مختلف سیشنز سے خطاب کیا۔اس تربیتی ورکشاپ میں سندھ کے 27اضلاع سے 120عہدیداران نے شرکت کی ۔

مقررین نے خطاب کر تے ہوئے کہا کہ پاکستان اس وقت نہایت نازک موڑ پہ ہے جہا ں ہر طرف دہشت گردی اور قتل و غارت کا بازار گرم ہے،جس سے پاکستان کی سالمیت کو نقصان پہنچ رہا ہے اور ایک منظم سازش کے تحت پاکستان کو غیر مستحکم کر نے کی کو شش کی جاری ہے جس میں اندورونی اور بیرونی ہا تھ ملوث ہے۔عالمی استعماری قوتوں امریکہ ، اسرائیل ، بھارت سمیت چندعرب ممالک بھی پاکستان میں اپنے مضموم مقاصد کے حصول کے لئے دہشت گردی کو فروغ دینے میں تعاون کر رہے ہیں ،

مقررین کا مزید کہنا تھا کی اس وقت تمام پاکستانیوں کو متحد اور منظم ہو نے کی ضرورت ہے تاکہ اہم پاکستان کے دشمنوں کا مل کر مقابلہ کر سکے۔مقررین کا کہنا تھا کی طالبان اور طالبانی سوچ کے حامل افراد اور گروہ اسلام اور پاکستان دونوں کے دشمن ہے جن کا مقصد پاکستان اور اسلام کو دنیا کے سامنے بدنام کرنا اور ملک کو کمزور کرنا ہے۔ مگر افسوس کی حکومت وقت نے ان مٹھی بھر دہشت گردوں سے مذاکرات کر کے پاکستان کی سالمیت کو مزید نقصان پہنچایا۔دہشت گردطالبان سے مذاکرات پاکستان کے شہداء کے لہو سے غداری اور دہشت گردوں کے حوصلہ افضائی کے مترادف ہے۔ان حالات میں ہمیں اپنے صفوں کو منظم کر نے کی ضرورت یے تاکہ ہم کسی بھی حالات سے نمٹنے کے لئے تیار ہو،نفاز شریعت کے نام پر دہشت گردی و قتل غارت گری اسلامی نہیں بلکہ کفریہ نعرہ ہے، پاکستان میں سنی شیعہ مسلمانوں کے قتل میں ملوث تکفیری نظریات کے حامل ایک مخصوص گروہ کو مسلط کر نے کی کوشش کی جارہی ہے ۔ انشااللہ ہم وحدت اور اتحاد کے زریعے پاکستان کو دشمنوں کی ہر سازش سے بچائینگے۔

وحدت نیوز(کراچی) حکومت سندھ نااہل اور کرپٹ ترین حکومت ہے وزیراعلٰی سندھ سید قائم علی شاہ سمیت سندھ کے تمام وزراء اور کابینہ کی برطرفی کا مطالبہ کرتے ہیں، دہشت گرد آزادی سے گھوم رہے ہیں، بارہ گھنٹوں میں تین شیعہ عمائدین کو ٹارگٹ کلنگ کا نشانہ بنایا گیا ہے، گذشتہ ماہ سے اب تک 52 شیعہ افراد کو ٹارگٹ کلنگ کا نشانہ بنایا گیا، ایف سی اہلکاروں سمیت میڈیا کے دفاتر پر ہونے والے حملوں کی مذمت کرتے ہیں، ملک دشمن اور اسلام دشمن طالبان کی نابودی تک چین سے نہیں بیٹھیں گے۔ ان خیالات کا اظہار مجلس وحدت مسلمین کے صوبائی سیکرٹری سیاسیات عبداللہ مطہری نے شیعہ افراد کی ٹارگٹ کلنگ اور حکومتی نااہلی کے خلاف پاک محرم ہال میں علامہ علی انور جعفری، علامہ مبشر حسن، علی حسین نقوی سمیت دیگر کے ہمراہ پریس کانفرنس سے خطاب کے دوران کیا۔ ان کا کہنا تھا کہ شہر قائد ریاستی اداروں کی سرپرستی میں ملت جعفریہ کے عمائدین کی مسلسل ٹارگٹ کلنگ کی جا رہی ہے۔

ایم ڈبلیو ایم کے رہنما نے کہا کہ بارہ گھنٹوں میں تین شیعہ عمائدین کو ٹارگٹ کلنگ کا نشانہ بنایا گیا ہے گذشتہ ماہ میں ٹارگٹ کلنگ کا نشانہ بننے والے شیعہ عمائدین کی تعداد 52 ہوگئی ہے جبکہ گذشتہ روز سے اب تک شہاب حیدر نقوی، عظیم حسین اور فیروز حسین کو دہشت گردی کا نشانہ بنا دیا گیا ہے اور قاتل دندناتے پھر رہے ہیں، حکومت سندھ سمیت ریاستی ادارے کالعدم دہشت گرد گروہوں کے خلاف سخت اقدامات کرنے سے گریزاں ہیں اور دہشت گرد گروہ شہر میں معصوم انسانی جانوں کے خون سے ہولی کھیلنے میں مصروف عمل ہیں، شہر کراچی میں شیعہ مسلمانوں کی نسل کشی اور دن دیہاڑے شیعہ نوجوانوں کی ٹارگٹ کلنگ سندھ حکومت کی نااہلی ہے، سندھ حکومت کے وزیراعلیٰ اور کابینہ کے وزراء سب کے سب کرپشن میں مصروف عمل ہیں یا پھر سیاسی انتقام لینے کی تگ و دو میں مصروف عمل ہیں جبکہ عوام کی جان و مال اور عزت و آبرو کی کوئی پرواہ نہیں ہے۔

عبداللہ مطہری کا کہنا تھا کہ سندھ حکومت ایک طرف جہاں کالعدم دہشت گرد گروہوں کے خلاف کسی قسم کی کاروائی کرنے سے قاصر ہے تو دوسری طرف سندھ حکومت نے خطرناک کالعدم دہشت گرد گروہوں کے سرغنہ دہشت گردوں کو سکیورٹی کے لئے سرکاری پروٹوکول فراہم کر رکھا ہے جو اس بات کی واضح دلیل ہے کہ سندھ حکومت براہ راست ملت جعفریہ کی نسل کشی میں ملوث ہے۔ ایک طرف پاکستان پیپلز پارٹی کی اعلٰی قیادت بلاول بھٹو دہشت گردوں اور طالبان دہشت گردوں کے خلاف پرعزم نظر آ رہے ہیں دوسری جانب سندھ حکومت کے وزراء بالکل برعکس کام کرتے ہوئے نظر آتے ہیں، ہم وزیراعلٰی قائم علی شاہ کو متنبہ کرتے ہیں کہ اگر ملت جعفریہ کے عمائدین کی ٹارگٹ کلنگ میں ملوث کالعدم دہشت گرد گروہوں اور طالبان دہشت گردوں کے خلاف کاروائی عمل میں نہ لائی گئی تو ملت جعفریہ وزیراعلٰی ہاؤس کا گھیراؤ کرنے سے دریغ نہیں کرے گی۔ آج شہر کراچی سندھ حکومت کے بزدل حکمرانوں کی وجہ سے ملت جعفریہ کے عمائدین کی مقتل گاہ بن چکا ہے اور حکمران ہیں کہ اپنی کرپشن اور دغا بازیوں میں مصروف عمل ہیں۔

انہوں نے کہا کہ ہم ایم ڈبلیو ایم سندھ کی جانب سے گذشتہ دنوں میڈیا کے دفاتر پر ہونے والے دہشت گردانہ حملوں سمیت ماضی میں ہونے والے تمام دہشت گردانہ حملوں کی مذمت کرتے ہیں میڈیا مالکان اور صحافی برادری سے دلی ہمدردی اور یکجہتی کا اعلان کرتے ہیں اور اسی طرح خیبر پختونخواہ میں ایف سی اہلکاروں کی بہیمانہ شہادت اور شہر کراچی میں پولیس بس پر ہونے والے حملے کے نتیجے میں شہادتوں پر دلی تعزیت کا اظہار کرتے ہوئے شہداء کے اہل خانہ سے اور زخمیوں سے اظہار ہمدردی اور یکجہتی کا اعلان کرتے ہیں۔ ملک دشمن اور اسلام دشمن طالبان دہشت گردوں کے خلاف جاری جنگ میں ملت جعفریہ صف اول کے مجاہدوں کی طرح قوم کے ساتھ ہے اور اس فتنے کی نابودی تک چین سے نہیں بیٹھیں گے۔

وحدت نیوز(گلگت) مجلس وحدت مسلمین گلگت ڈویژن کے زیراہتمام گلگت بلتستان میں گندم کی سبسڈی کے خاتمے کے متنازعہ فیصلے کیخلاف بینظیر چوک سے اتحاد چوک تک پرامن احتجاجی مظاہرہ کیا گیا۔ مظاہرے کی قیادت ایم ڈبلیو ایم گلگت ڈویژن کے سیکرٹری جنرل شیخ بلال سمائری نے کی جبکہ مظاہرے میں بڑی تعداد میں مختلف سیاسی و مذہبی اور قوم پرست جماعتوں کے راہنماوں اور تمام مکاتب فکر سے تعلق رکھنے والے افراد نے بھرپور شرکت کی۔ اتحاد چوک پہنچ کر مظاہرین سے خطاب کرتے ہوئے ایم ڈبلیو ایم گلگت ڈویژن کے سیکرٹری جنرل علامہ شیخ بلال سمائری نے کہا کہ آج کا یہ احتجاجی مظاہرہ علامتی احتجاج ہے اگر حکومت نے گندم پر سبسڈی کے خاتمے کا اعلان واپس نہ لیا تو پھر پورے گلگت بلتستان میں تمام سیاسی و مذہبی جماعتوں کو ساتھ لیکر بھرپور احتجاجی تحریک چلائیں گے اور مطالبات کی منظوری تک احتجاج جاری رکھا جائیگا۔