وحدت نیوز(پشاور) پشاور ورسک روڈ پر دہشت گردوں نے سکول میں گھس کر حملہ کر دیا، ایک دہشت گرد نے خود کو دھماکے سے اڑا لیا، حملے میں ایک سکیورٹی اہلکار، ایک خاتون اور ایک مرد ٹیچر جبکہ 150 طلباء شہید ہوگئے، درجنوں زخمی بچوں کو ہسپتال منتقل کر دیا گیا۔ مساجد، گلیوں، بازاروں، گرجا گھر اور سکولوں کو نشانہ بنانے والے سفاک دہشت گردوں نے ورسک روڈ پر واقع ایک سکول پر اس وقت حملہ کیا جب نویں اور دسویں جماعت کے طلباء کے اعزاز میں ایک تقریب ہو رہی تھی۔ سکول میں اچانک دھماکہ ہوا اور پھر فائرنگ شروع ہوگئی۔ دہشت گردوں کی فائرنگ سے متعدد طلباء اور ٹیچر زخمی ہوگئے۔ ذرائع کا کہنا ہے کہ دہشت گردوں نے پہلے اپنی گاڑی کو آگ لگائی، پھر سکول میں داخل ہوئے۔ واقعے کی اطلاع ملتے ہی سکیورٹی فورسز نے موقع پر پہنچ کر سکول کو گھیرے میں لے لیا۔ اس دوران سکیورٹی فورسز کا ہیلی کاپٹر بھی سکول کے اوپر نچلی پرواز کرتا رہا۔

سکیورٹی فورسز ذرائع کے مطابق طالبعلموں اور اساتذہ کی بڑی تعداد کو سکول سے نکال لیا گیا ہے، تاہم ابھی بہت سے بچے اور اساتذہ سکول کے اندر موجود ہیں۔ حواس باختہ مائیں اور والدین اپنے بچوں کی تلاش میں سکول کے باہر منتظر ہیں۔ وزیراعلٰی پرویز خٹک نے واقعے کی مذمت کرتے ہوئے کہا اب تک دو ہسپتالوں میں 123 بچوں کی شہادت ہوچکی ہے۔ انہوں نے کہا خیبر پختونخوا حکومت اس دل خراش واقعے پر تین دن سوگ منائے گی۔ آئی ایس پی آر کے مطابق سکول میں محصور بڑی تعداد میں بچوں اور اساتذہ کو بحفاظت نکال لیا گیا ہے جبکہ مزید بچوں کو نکالنے کے لئے ریسکیو آپریشن بھی جاری ہے۔ آئی ایس پی آر کے مطابق جوانوں اور دہشت گردوں کے درمیان فائرنگ کا بتادلہ وقفے وقفے سے ہو رہا ہے۔ دوسری طرف لیڈی ریڈنگ ہسپتال میں ایمرجنسی نافذ کر دی گئی ہے۔ ہسپتال ذرائع کے مطابق ہسپتال لائے گئے زخمیوں میں سے کئی بچوں کی حالت تشویشناک ہے۔

وحدت نیوز(کراچی) مجلس وحدت مسلمین پاکستان صوبہ سندھ کے سیکریٹری جنرل علامہ مختار احمد امامی نے کہا ہے کہ سقوط ڈھاکہ کے دن پشاور میں طالبان کی جانب سے اسکول پر حملہ پاکستان بنانے کی مخالفت کرنے والے کانگریسی ملاؤں کی سازش ہے، سانحہ پشاور طالبان سے مذاکرات کی حمایت کرنے والی سیاسی و مذہبی جماعتوں کے منہ پر طمانچہ ہے۔ ان خیالات کا اظہار انہوں نے وحدت میڈیا سیل سے جاری ایک بیان میں کیا۔ علامہ مختار امامی کا کہنا تھا کہ ملک میں ہر طرف دہشت گردوں کا راج ہے، دہشت گرد جن چاہیں جہاں چاہیں وطن عزیز کی گلیوں کو خون سے رنگین کردیتے ہیں، پاکستان کو دہشت گردی کی آگ میں دھکیلنے کی ذمہ دار ضیاء الحق کی باقیات ہے، جن کی دہشت گرد نواز پالیسی نے پاکستان کی سرزمین کو خون سے رنگین سرخ کردیا ہے۔ انہوں نے کہا کہ ملک کی بدترین صورتحال اب یہ تقاضا کررہی ہے کہ آپریشن ضرب عضب کا دائرہ کار بڑھا کر پورے ملک میں پھیلایا جائے اور پاکستان کے کونے کونے میں دہشت گردوں اور ان کے سرپرستوں کے خلاف بھرپور فوجی آپریشن کیا جائے۔

علامہ مختار امامی نے سانحہ پشاور میں شہید ہونے والے بچوں اور دیگر افراد نے لواحقین سے تعزیت کا اظہار کرتے ہوئے کہا کہ کسی اپنے کی لاش اٹھانے کا غم ہم اچھی طرح جانتے ہیں، کئی عرصے سے ہم بھی ان ہی طالبان کی دہشت گردی کا شکار ہیں، ہم نے بھی اپنے شہداء کے لاشے اٹھائے ہیں، پورے ملک کے مظلوم افراد دکھ کی اس گھڑی میں سانحہ پشاور کے شہداء کے لواحقین کے ساتھ کھڑے ہیں اور طالبان کے خلاف آپریشن ضرب عضب کی حمایت کرتے ہیں۔

وحدت نیوز (پشاور) مجلس وحدت مسلمین خیبرپختونخوا کے سیکرٹری جنرل علامہ سبطین حسینی نے پشاور واقعہ کی سخت الفاظ میں مذمت کرتے ہوئے کہا کہ معصوم بچوں کو مارنا کھلی سفاکیت اور بربریت ہے، یہ درندہ صفت دہشت گرد امن اور روشنی کے چراغوں کو بجھا دینا چاہتے ہیں، یہ بربریت پسند اور سفاک لوگ نہیں چاہتے کہ علم کی روشنی پھیلے اور یہ دیس ترقی کرے، دین کے نام پر اس طرح کی گھناونی کارروائی اسلام کا چہرہ مسخ کرنے کی قبیح سازش ہے، جہاں یہ واقعہ قابل مذمت ہے وہاں ان دہشت گردوں کو پروان چڑھانے والے بھی قابل مذمت ہیں، پوری دنیا میں علمی مراکز کو آباد کیا جاتا ہے لیکن اسلام کے دشمن یہ جاہل لوگ علمی مراکز کو بھی ویران کرنا چاہیے ہیں، ہم دکھ کی اس گھڑی میں ان والدین کے غم میں برابر کے شریک ہیں جن کے لخت جگر آج ان سے جدا کر دیئے گئے، خدا تعالی انہیں صبر جمیل عطا فرمائے۔

وحدت نیوز (کراچی) مجلس وحدت مسلمین پاکستان کے مرکزی سیکریٹری سیاسیات سید ناصر شیرازی نے بزرگ عالم دین ، چیئرمین شوریٰ عالی ایم ڈبلیوایم حجتہ السلام علامہ شیخ حسن صلاح الدین سے ان کی رہائش گاہ پر ملاقات کی،  اس موقع پر صوبائی سیکریٹری اطلاعات آصف صفوی، ضلع سیکریٹری جنرل ملیر سید احسن عباس ، ضلعی پولیٹیکل سیکریٹری حسن عباس، ضلعی رابطہ سیکریٹری سعید رضااور ضلعی سیکریٹری تبلیغات رضا حیدربھی موجود تھے، ناصرشیرازی نے علامہ صلاح الدین کو سیاسی شعبے کی فعالیت اور قومی سیاسی صورتحال اور مجلس کے کردار سے تفصیلی طور پر آگاہ کیا، جبکہ قومی اور بین الاقوامی حالات و واقعات بھی بات چیت ہوئی، علامہ شیخ حسن صلاح الدین نے ناصر شیرازی کی سیاسی شعبے سے وابستہ اہم ایشوز پر توجہ مرکوز کروائی، بعد ازاں ناصر شیرازی نے وحدت ہاوس ملیر کا بھی دورہ کیا جہاں ضلعی سیکریٹری جنرل احسن عباس رضوی ان کی آمد پر شکریہ ادا کیا۔