وحدت نیوز (آرٹیکل) اسلام ایک انسان کے قتل کو انسانیت کا قتل قرار دیتا ہے۔ مسلمان کی جان کی حرمت کو کعبہ سے زیادہ محترم قرار دیتا ہے۔ اے خبیث شیطان نما انسانو! تم نے ثابت کیا کہ تم انسانیت کے قاتل ہو اور تم نے کعبہ سے زیادہ محترم انسانوں کی بے حرمتی کی ہے۔ کیا شیطان بزرگ امریکہ اور اس کے لے پالک اسرائیل نے تمہیں اس قبیح فعل کی تربیت دی یا تم وہ ہو کہ شیطان بھی تم سے پناہ مانگے؟ ہمیں یاد ہے کہ تم نے افغانستان کے علاقے بامیان میں بھی ایک حشر اٹھایا۔ 12 سال سے بڑی عمر کے لوگوں کا قتل عام کیا اور خواتین اور بچوں کو قیدی بنا ڈالا۔ بامیان کے شیعہ مسلمانوں کو غلامی اور کنیزی میں لینے والے ان جانوروں کو ہم سے زیادہ کون جانتا ہوگا؟ اگر اس وقت انسانیت کے نام نہاد علمبردار بے غیرتی نہ کرتے تو اسی وقت طالبان کا کریا کرم اور انتم سسکار ہو جاتا لیکن طالبان کے خلاف کارروائی کا ڈرامہ کرنے والوں کو بامیان میں گوتم بدھ کے بتوں کی بے حرمتی اس کام کے لئے معقول سبب نظر آیا۔

 
16 دسمبر ویسے ہی پاکستانیوں کے لئے ایک سیاہ دن کی یاد کے ساتھ طلوع ہوتا تھا۔ اس کا سبب سقوط مشرقی پاکستان تھا۔ اس میں بھارتی ریاست کی نیابتی جنگ لڑنے والی مکتی باہنی کے دہشت گردوں نے اپنے کندھے فراہم کئے تھے۔ لیکن آج سال 2014ء میں یہ دن پاکستان کی مکتی باہنی یعنی طالبان کے دہشت گردوں کے ہاتھوں پاکستان کے ننھے و معصوم فرشتوں کے سفاکانہ قتل عام کی وجہ سے پاکستانیوں کو سوگوار کر گیا ہے۔ آج پشاور کے پبلک اسکول میں معصوم و نہتے بچوں کے خون کی ہولی کھیلی کر تکفیری طالبان دہشت گردوں نے آج کا دن بھی قومی سانحہ میں تبدیل کر دیا۔ اسکول میں گھس کر ان بد بخت دہشت گردوں نے جو قتل عام کیا، اس پر انسانیت شرما کر رہ گئی اور اسلام پر سوگواری طاری ہوگئی۔ 132 بچوں سمیت 141 انسان، مسلمان شہید کئے گئے ہیں۔

جی ہاں! دین اسلام کا نوحہ یہی ہے کہ دنیا کے خبیث افراد اپنی اسلام دشمن سرگرمیوں کو اسلام کا لبادہ اڑھانے کی مذموم کوشش کرنے میں مصروف ہیں۔ زمانہ امن کی تو بات ہی اور ہے، اسلام نے تو جنگ کے دوران بھی خواتین، بچوں، بوڑھوں، مریضوں اور معذوروں کو جنگ سے مستثنٰی قرار دیا ہے۔ کوئی مسلمان ہو اور وہ اسلام پر عمل نہ کرے تو اس کے ضد اسلام فعل سے اسلام کو کیا نسبت؟ فرض کر لیں کہ یہ دہشت گرد افواج پاکستان سے جنگ ہی لڑ رہے ہیں تو کیا بچے، بوڑھے، خواتین، مریض و معذور انسان اس جنگ سے مستثنٰی نہیں؟ اسلامی قوانین کے مطابق تو وہ مستثنٰی ہیں لیکن طالبان اور ان کے ہم فکرافراد کی نظر میں نہیں ہیں، کیونکہ ان لوگوں کا اسلام سے دور کا بھی واسطہ نہیں ہے۔

 
یہ بچے جو پشاور آرمی پبلک اسکول میں تحصیل علم کے لئے آئے تھے۔ یہ تو خاتم الانبیاء حضرت محمد مصطفٰی (ص) کی حدیث مبارکہ پر عمل کرنے آئے تھے کہ علم حاصل کرو گہوارہ سے قبر تک۔ انہیں تو یاد تھا کہ علم حاصل کرنے کے لئے چین ہی کیوں نہ جانا پڑے یعنی دور دراز کا سفر بھی کیوں نہ کرنا پڑے، تب بھی علم کا حاصل کرنا ان پر فرض ہے۔ علم و حکمت مومن کی گمشدہ میراث ہے۔ یہ بچے پاکستان کا حال ہی نہیں بلکہ اس مستقبل کے معمار بھی تھے، جو حال میں تبدیل ہوکر ملت شریف پاکستان کی زندگی میں ضرور آنا تھا۔ لیکن طالبان نے پاکستان کو بھی کربلا کا میدان بنانے کی سازش کر رکھی ہے۔ ہم سے زیادہ کسے اس درد کا ادراک ہوگا؟ حضرت علی اصغر علیہ السلام و بی بی سکینہ سلام اللہ علیہا سمیت کتنے بچے تھے جو اموی ملوکیت کی دہشت گردی کی بھینٹ چڑھا دیئے گئے۔ ہم آج تک انہیں نہیں بھولے، ان بچوں کے والدین کا غم ہم ہی بانٹ سکتے ہیں۔

 
اسلام ایک انسان کے قتل کو انسانیت کا قتل قرار دیتا ہے۔ مسلمان کی جان کی حرمت کو کعبہ سے زیادہ محترم قرار دیتا ہے۔ اے خبیث شیطان نما انسانو! تم نے ثابت کیا کہ تم انسانیت کے قاتل ہو اور تم نے کعبہ سے زیادہ محترم انسانوں کی بے حرمتی کی ہے۔ کیا شیطان بزرگ امریکہ اور اس کے لے پالک اسرائیل نے تمہیں اس قبیح فعل کی تربیت دی یا تم وہ ہو کہ شیطان بھی تم سے پناہ مانگے؟ ہمیں یاد ہے کہ تم نے افغانستان کے علاقے بامیان میں بھی ایک حشر اٹھایا۔ 12 سال سے بڑی عمر کے لوگوں کا قتل عام کیا اور خواتین اور بچوں کو قیدی بنا ڈالا۔ بامیان کے شیعہ مسلمانوں کو غلامی اور کنیزی میں لینے والے ان جانوروں کو ہم سے زیادہ کون جانتا ہوگا؟ اگر اس وقت انسانیت کے نام نہاد علمبردار بے غیرتی نہ کرتے تو اسی وقت طالبان کا کریا کرم اور انتم سسکار ہو جاتا لیکن طالبان کے خلاف کارروائی کا ڈرامہ کرنے والوں کو بامیان میں گوتم بدھ کے بتوں کی بے حرمتی اس کام کے لئے معقول سبب نظر آیا۔

وزیراعظم صاحب! اچھا ہے کہ آپ نے پشاور جانے کا فیصلہ کیا۔ اے وزیراعلٰی پختونخواہ، خدا کا شکر ہے کہ آپ کو بھی پشاور یاد آیا۔ لیکن آپ کا وہاں ہونا نہ ہونا برابر ہے۔ پاکستان کو ایسی سیاسی قیادت کی ضرورت ہے کہ جو دہشت گردوں کو صفحہ ہستی سے مٹا کر رکھ دے۔ آپ کو تو مذاکرات کرنے سے ہی فرصت نہیں مل رہی تھی۔ اب جب آپریشن ضرب عضب جاری ہے تو وزیراعلٰی پرویز خٹک اسلام آباد میں خٹک ڈانس کرتے دکھائی دیتے تھے۔ کیا ملک کی حکمران سیاسی قیادت نے آپریشن ضرب عضب کی عوامی و سیاسی حمایت کا ماحول بنایا؟ عمران خان کو الیکشن کی دھاندلی کے خلاف دھرنوں اور نواز شریف حکومت کو ان کے جوابات دینے سے فرصت ملے تو قوم کو بتائیں کہ کیا جنگ زدہ ملک کی سیاسی قیادت کی ترجیحات یہ ہوا کرتی ہیں!
 

کیا واہگہ سرحد پر خودکش دہشت گرد حملے کے بعد حکومت نے کوئی سنجیدہ اقدامات کئے تھے۔ یہ حقیقت سب پر آشکار ہے کہ پاکستان میں امن دہشت گردوں کی مرضی پر منحصر ہے۔ وہی طے کرتے ہیں کہ اگلا حملہ کب کرنا ہے۔ اور دو حملوں کے درمیانی وقفے کو امن کی بحالی سمجھا جاتا ہے۔ کتنے ہی کالعدم دہشت گرد گروہ سرگرم عمل ہیں۔ بعض جگہوں پر انہیں حفاظت کے نام پر سرکاری پروٹوکول فراہم کیا گیا ہے۔ بعض مقامات پر حکمران جماعتوں نے ان سے مقامی سطح کا اتحاد قائم کر رکھا ہے۔ کیا اس طرح کے سمجھوتوں سے امن قائم ہوسکتا ہے؟ یہ سبھی انتہا پسند و دہشت گرد ایک دوسرے کے اعلانیہ اتحادی تھے اور ہیں۔ پرویز مشرف کے شب خون مارنے سے پہلے اکتوبر 1999ء تک نواز لیگی مرکزی حکومت اور پنجاب حکومت تسلیم کیا کرتی تھی کہ فلاں دہشت گرد گروہوں کو طالبان دور کے افغانستان سے دہشت گردی کی تربیت دے کر پاکستان میں کاروائیوں کے لئے بھیجا گیا تھا۔

 
شاید حکمرانوں سے سمجھوتے کا نتیجہ ہے کہ طالبان کے اتحادی و حامی دہشت گرد بھی اشک دروغ بہانے میں مصروف ہیں، یعنی مگر مچھ کے آنسو! لیکن کیا قوم بے وقوف بنتی رہے گی۔ آج کیا فاٹا اور صوبہ خیبر پختونخواہ کے لوگوں کو معلوم نہیں کہ یہ کون لوگ ہیں جو دہشت گردی کر رہے ہیں؟ جب معلوم ہے کہ یہ طالبان اور ان کے اتحادی ہیں اور انہوں نے ماضی میں بھی بے گناہ مسلمانوں کا قتل عام کیا اور اب بھی کر رہے ہیں تو پھر جو کوئی ان کے لئے نرم گوشہ رکھے، اس کا بھی بائیکاٹ شروع کر دیں۔ آج یہ پشاور کے معصوم فرشتہ صفت بچے ہیں، کل کو یہ ہمارے اور آپ کے بچوں کے ساتھ بھی پیش آسکتا ہے۔

 
پشاور خون سے رنگین ہے اور پوری ملت سوگوار۔ غمزدہ خاندانو! ہم سبھی غمزدہ ہیں اور آپ سے شرمندہ بھی کہ مادر وطن پاکستان وہ فلاحی اسلامی مملکت نہیں بن سکا کہ جہاں انسانوں کی جان و مال و عزت محفوظ ہو، جہاں بچوں کی زندگی طالبان ذہنیت کے فروغ کا چارہ بنا دیا جائے۔ 16 دسمبر 2014ء کے سانحہ پشاور سے ثابت ہوا کہ طالبان آج کی مکتی باہنی ہے۔ فرق صرف یہ ہے کہ آج کی اس مکتی باہنی کو الشمس اور البدر کے بعض بزرگان بھی مکتی باہنی ماننے سے کترا رہے ہیں۔ نہیں معلوم کہ ایسا خوف کی وجہ سے ہے یا شوق کی وجہ سے! توجہ فرمائیں یہ بزرگان جن سے بندہ مخاطب ہے۔ طالبان کو اس غلط فہمی میں مبتلا کرنے والوں میں وہ بھی شامل ہیں جو ان کی دہشت گردی کو قتال فی سبیل اللہ کی چادر ڈال رہے تھے۔ جی ہاں! آپ بھی طالبان کے ان گناہوں میں برابر کے شریک ہیں کیونکہ اللہ کی راہ میں لڑنے والوں کی نظر میں بچے جنگ سے مستثنٰی ہیں اور طالبان کی راہ میں پہلی سے دسویں جماعت تک کے طالبعلم بچے بھی واجب القتل ہیں۔ فاعتبرو یا اولی الابصار!
 

تحریر: عرفان علی
(بشکریہ اسلام ٹائمز)

وحدت نیوز (آرٹیکل) پشاورکے اسکول میں معصوم بچوں پرجس طرح بہیمانہ ظلم اور ان کو ظالمانہ انداز میں قتل کیاگیااوراسکول میں بے گناہ بچوں پر فائرنگ اور بموں سے حملہ کیا گیا اور ان کے معصوم گلوں کو کاٹا گیاہے اس مذموم اور غیر انسانی عمل نے نہ صرف ہر دردمند انسان کو خون کے آنسوں رلادیئے بلکہ ایک احساس یہ بھی دلایا کہ یہ فعل شقی القلب ، ابتر اور دعی ابن دعی ہی کر سکتے ہیں ان بے نسلوں نے حرملہ ، ابن زیاد ، اور شمر جیسے ملعونوں کے ناپاک کردارپر عمل کرکے دنیا کو وہ ذلیل اور گھٹیا کردار دکھا دیئے کہ جو تاریخ انسانیت میں ہمیشہ انسان کی شرمندگی کا باعث رہے ہیں ان ناپاک نسل کے افراد نے اس عمل سے یہ بھی ثابت کردیا کہ ان کا تعلق انسان نما تاریخ کے کن غلیظ کرداروں سے ہے ۔یقیناًالفاظ ناکافی ہیں اور دل کے جذبات مکمل طور پر پیش نہیں کرپارہے ہیں ۔

وہ معصوم جو اس سردیوں میں صبح صبح اپنے ننھے سے فکر کے ساتھ اپنی کتابوں کے بستے لے کر اسکول گئے اور اپنی اپنی کلاسوں میں تعلیم حاصل کرنے اورچھٹی کے بعد اپنے گھرجانے اور اپنے بابا اور امی کی دل کی ٹھنڈک اور سکون میں اضافے کا باعث بننے کے انتظار میں تھے ، اور کچھ بچے تو اسکول کے بعد کا م پر بھی جاتے تھے ، تو دوسری طرف ماں باپ اپنے لخت جگر کے اسکول سے لوٹنے کے انتظار میں حسب عادت اپنے ہزاروں کاموں کے باوجود ہر وقت اسی طرف متوجہ رہے کہ کب انکے لخت جگر اسکول سے واپس آئیں اور ان کو سکون ملے۔

ایسے میں جب اچانک وحشی درندے کلاس روم میں خطرناک اسلحہ کے ساتھ داخل ہوئے ہونگے اور بربریت کے ساتھ ان معصومون پر فائرنگ کردی ہوگی تو نہ جانے ان معصوم بچوں پر کیا گذری ہوگی اکثر معصوم بچوں کو تو فائرنگ کی آواز کا پتہ بھی نہیں ہو گا کہ یہ کس چیز کی آواز ہے اورجب اسکول میں ہرطرف چیخ و پکار کا سمان ہوگا تو یہ ننھے فرشتے کیا سوچ رہے ہونگے کہ یہ انکل ہمیں کیوں مار رہے ہیں جبکہ ہم نے تو انھیں کچھ بھی نہیں کہا اور پھر جب بھاری اسلحہ کے زوردار دھماکے اور بڑی بڑی گولیاں ان معصوم اور ننھے ننھے جسموں میں لگی ہو نگی جسم سے روح کی پرواز کی اذیت کو کیونکر دل محسوس کر سکی ہوگی بارود اور دھوئیں کے درمیاں اس قوم کے نازک پھولوں کو کیونکر آنکھ دیکھ سکی ہوگی کیونکر انسان نے یہ سب سہن کیا ہوگا ۔

اور جب یہ خبر ماں باپ کوملی ہوگی توان کی پریشانی کا اندازہ ہمیں ان آنسوں بہاتی ماؤں اور روتے ہوئے باپوں کا اسکو ل اور ہسپتال کی جانب دوڑتے ہوئے اس آس میں جانا کہ خدایا سارے جہان کے بچوں کی خیر ہو اور اس کے صدقے میں میرا بچہ بھی خیریت سے ہو کی دعاؤں اور امید وں کے ساتھ جانا بتا رہا تھا کہ یہ کس قرب و اذیت سے گذر رہے ہیں۔ اور جب اسکول سے ایمبولینس کی ہولناک آوازوں میں بچوں کے زخمی جسم اور لاشوں پر نظر پڑی ہوگی تو ان کے دلوں کی کیا حالت ہوئی ہوگی یہ سب بیان سے باہر ہے۔

جانور بھی ایک دوسرے کے سامنے ذبح نہیں کئے جاتے خاص کر کسی جانور کے بچے کو اس کے ماں یا باپ کے سامنے ذبح نہیں کیا جاتا واقعات بتاتے ہیں کہ اونٹ کے بچے کو اونٹ کے سامنے ذبح کیا گیا تو اس کے جگر میں زخم تا حیات رہا۔پھر یہ تو انسانوں کے بچوں کو ان کے ماں باپ کے سامنے بے دردی سے مارا گیا نہ جانے ماں باپ کے جگر میں کس قدر گہرا زخم آیا ہوگا ۔

سلام ہو ان شہید بچوں کی عظمت پر جنھوں نے پھر پاکستان کی سرزمین پر کربلاکی یاد تازہ کرکے اس دور کے حرملہ اور شمر جیسے ملعونوں کو شکست فاش دیکر ان غلیظ کرداروں کو دنیا کے سامنے بے نقاب کردیا ۔اور سلام ہو زخمی ہونے والے بچوں پر جنھوں نے شجاعت کا مظاہرہ کرتے ہوئے اپنے آپ کو ضرب عضب کا سپاہی کہا ۔سلام ہو ان ماں باپ پر جنھوں نے اپنے بچوں کی شہادت پر فخر کیا۔یہاں ان کرداروں کا ذکر اصلاح کی خاطر کررہا ہوں کہ جو اتنا بڑا انسانیت سوز واقع ہونے کے باوجود اپنے جاہلانہ خیالات کا اظہار کرتے ہوئے کہتے ہیں کہ یہ سب ایجنسیوں کا کام ہے جو مجاہدوں کو بدنام کرنے کی کوشش کررہی ہیں۔

ایسا جملہ کہنا بتا رہا ہے کہ کچھ جاہلوں نے تعصب کے ہاتھوں اپنی انسانیت بیچ دی ہے اور آنکھیں ہوتے ہوئے بھی اندھے ہوگئے ہیں اور عقل ہوتے ہوئے بھی فکر سے بے بہرہ ہیں اور دین نے ان کے دلوں اور عقل پر کوئی مثبت اثر نہیں کیا۔جبکہ ان کے ظالم جن کو یہ جاہل مجاہد کہتے ہیں خود اس گھناؤنے جرم کا اعتراف بھی کرلیاہے اور اس میں ملکی اور غیر ملکی دہشت گرد مارے بھی گئے ہیں جن کا تعلق انہی ظالموں سے ہے جس کو جاہل مجاہد کہتے ہیں خدا کے لئے اب تو ہوش کرو اور ان کی حمایت کرنا بند کردو ورنہ یہ ظالم آپ کے بچوں کو بھی نہیں بخشیں گے اور ان کی حمایت کے لئے راہ ہموار کرنے والوں کو بھی پہچا ن لیں کہ وہ آپ کے اور ٓپکے مذہب و ملک کے دشمن ہیں۔

سب سیاستدانوں نے اس واقع پر بڑے بڑے مذمتی بیان دیئے لیکن ان بیانات کے بعد یہ لوگ پھر اپنی انہی پالیسیوں پر لوٹ جائیں گے جہاں دہشتگردوں کو سیاسی پناہ بھی دیتے ہیں اور ان کو اپنا بگڑاہو بھائی بھی کہتے ہیں اور ان کے لئے اپنے دل میں نرم گوشہ بھی رکھتے ہیں یا پھر ان کے لئے سخت کاروائی کی مخالفت بھی کرتے ہیں یا پھر مذہبی لیڈر ان کو مذہب کی آڑ میں چھپاتے ہیں یا پھر سیاستدان دہشتگردوں کو اپنے سیاسی مفادات کے لئے استعمال بھی کرتے ہیں ، یا پھر کرپٹ بیورو کریسی اپنے مالی مفاد اور بڑی بڑی پوسٹس پر برا جمان ہونے یا کسی عصبیت کی بنیاد پر ان کو ناجائز سپورٹ کرتے ہیں اور اپنے فرائض سے غفلت برتے ہیں اور ایسے واقعات کے موجد بنتے ہیں۔
وزیر اعظم پاکستان نے اعلان کیا ہے کہ سب پارٹیاں مل بیٹھ کر اس دھشتگردی کا حل سوچنے کے لئے کل کل جماعتی کانفرنس میں شرکت کریں۔ کاش یہ پارٹیوں اور حکومت کو بچوں کی جانیں جانے سے پہلے ہوش آتا مگر کیا ہوگا کل سب بیٹھ کر صرف قرار داد ہی تو پاس کریں گے ۔

کیا جیلوں میں بند تمام دہشتگردوں کو سرعام پھانسی دی جائے گی،کیا اس مکروہ اور گھناؤنے جرم کے ارتکاب کرنے والوں اور ان کے حمایتی نظریات رکھنے والوں کو گرفتار کیا جائے گا کیا ان ظالمان کو مجاہد کہنے والوں کو پاکستانی قوم کا غدار قرار دے کر سزائے موت دی جائے گی۔ کیا ایسے یا ایسے ہی بڑے بڑے فیصلے یہ چھوٹے لوگ کرپائیں گے۔کیا ضرب عضب کی طرح نظریاتی آپریشن بھی کیا جائے گا تاکہ پھرکوئی ایسی فکر فروغ نہ پاسکے اور پاکستان میں ایسے مولویوں پر پابندی لگائی جائے گی جو ہر جمعہ اور ہر نماز کے بعد کھلے عام ایسے ظالموں کی حمایت میں خطبے دیتے ہیں اور ان کے لئے چندا اکٹھا کرتے ہیں کیا ایسی مساجد و مدارس پر پابندی لگائی جائے گی جو مسلمانوں کے خون بہانے کے عذر تلاش کرکے ظالموں کی حمایت کرتے ہیں اوران کی کامیابیوں کی دعائیں مانگتے ہیں اوران سے اظہار یکجہتی کرتے ہیں اور دین کے نام پر ایسے بیہمانہ قتل و غارت کے بازار گرم کئے ہوئے ہیں اور لوگوں کو ان کا حمایتی بنانے کے لئے تگ و دو کرتے رہتے ہیں ۔

کیا یہ کل جماعتی کانفرنس کوئی ایسی پالیسی بناپائے گی جو کہ ملک عزیز میں بجائے نفرت اور دہشت کے امن اور محبت کی طرف لوگوں کو مائل کرے کیا اس کانفرنس کے بعد حکمران ، بیوروکریٹ اور سیاستدان اپنے ذاتی مفادات سے دستبردار ہوجائیں گے اور فقط عوام الناس اور ملک کے بارے میں سوچیں گے کیا اسمبلیوں میں بیٹھنے والے اپنے مال و مفاد سے زیادہ عوام کی جان و مال کی خاطر قانون سازی کریں گے۔یا پھر وہی رسمی طور پر کمیٹیاں بنائی جائیں گی اور مذمتی قرارداد پاس ہوگی ۔اور پھر ویسا ہی سب چلتا رہے گا اور لوگ بھی آہستہ آہستہ سب بھول جائیں گے ۔

لیکن یاد رکھیں نہیں بھولیں گے تو صرف ان بچوں کے ماں باپ اپنے جگر کے زخموں کو نہیں بھولیں گے اور تاریخ نہیں بھولے گی حکمرانوں بیورو کریٹس اور سیاستدانوں کے کردار وں کو کہ ان اہل اختیار نے انہی ظالموں کے خلاف رسمی سی کاروائی کرکے اپنی حکومت کے لئے جواز ایجاد کیا اور خاموش رہ کرظالموں کی حمایت کی یا مظلوموں کی مدد کی خاطر عملی اقدامات اور قوانین بناکر اس ملک اور قوم کو اس ناسور سے نجات دلائی ۔

ایک اہم ذمہ داری ہم عوام پر بھی ہے کہ ہم ان حکمرانوں بیورو کریٹس اور سیاستدانوں کی کارکردگی کا جواب کیا دیتے ہیں کیا وہی روایتی انداز میں انہی کو یا ان جیسوں کو حکمران بناتے ہیں یا پھر غیور اور اہل افراد کو اسمبلیوں میں بھیج کر اور کرپٹ بیورو کریٹس نا اہل حکمرانوں کو انکو ان کے عہدوں سے ہٹا کر اپنے ملک اور اپنے بچوں کا مستقبل تاریک ہونے سے بچاتے ہیں ۔یاد رکھیں جب تک ہم روایتی انداز میں سوچتے رہیں گے تب تک ہمارے ساتھ روایتی واقعات پیش آتے رہیں گے۔

ٓتحریر:عبد اللہ مطہری

وحدت نیوز (مظفرآباد) پشاور سانحہ ، معصو م پھولوں کی شہادت ، مجلس وحدت مسلمین آزاد جموں و کشمیر تین روزہ سوگ کا اعلان کرتی ہے، ہم حکومت آزاد کشمیر کے توسط سے حکومت پاکستان سے یہ مطالبہ کرتے ہیں کہ ضرب عضب طرز کا آپریشن پورے ملک میں کیا جائے، جیلوں میں قید دہشتگردوں کو جلد از جلد پھانسی دی جائے، پشاور میں ہونے والی دہشتگردی کی بھرپور مذمت کرتے ہیں اور پسماندگان سے اظہار یکجہتی کرتے ہیں ، انہوں نے کہا کہ پوری قوم سانحے کے متاثرین کے ساتھ کھڑی ہے، ان خیالات کا اظہارعلامہ سید تصورحسین نقوی الجوادی سیکرٹری جنرل مجلس وحدت مسلمین آزاد جموں و کشمیر نے علمدار چوک مظفرآباد میں رائزنگ سٹار سکول اینڈ کالج کے زیر اہتمام احتجاجی ریلی سے خطاب کیا۔

اس موقع پر میڈیا ایڈوائز پاکستان پیپلز پارٹی آزاد کشمیر شوکت جاوید میر، صدارتی مشیر راجہ ساجد خان و مشیر وزیراعظم آزاد کشمیر سید قلب عباس و دیگر زعماء بھی بڑی تعداد میں موجود تھے انہوں نے کہا کہ دہشت گردی و دہشت گردوں کے مقابلے میں ہم ایک ہیں ، دہشت گرد نہ شیعہ ہے نہ سنی، نہ دیوبندی ہے نہ اہلحدیث دہشت گرد کا کسی مسلک و مذہب سے کوئی تعلق نہیں بلکہ اسکا انسانیت سے بھی دور دور تک کوئی واسطہ نہیں ، یہ سفاک وحشی درندے ہیں کل جب بروز حشر یہی بچے سوال کریں گے کہ بای ذنب قتلت کہ ہمیں کسی جرم و خطا کی وجہ سے مارا گیا تو کیا جواب دیں گے ۔

انہوں نے کہا کہ ہم مطالبہ کرتے ہیں کہ ایک ایک دہشتگرد کو ڈھونڈ ڈھونڈ کے عبرت کا نشان بنایا جائے، بہت ہو چکا اب برداشت نہ ہو گا، پورے ملک سے ناسوروں کا خاتمہ کیا جائے، اپنے آنے والے مستقبل کو محفوظ بنایا جائے ، پوری قوم ایک پیج پر اکھٹی ہو کر آواز بلند کر رہی ہے کہ ان کا خاتمہ کیا جائے ، قوم کے وفادار بیٹے پاک آرمی کو سلام پیش کرتے ہیں ، اور پاک آرمی کے ساتھ شانہ بشانہ ہیں ۔جبکہ دوسری طرف انچارج ریاستی دفتر مجلس وحدت مسلمین آزاد جموں وکشمیر مولانا سید حمید حسین نقوی نے صحافیوں کو جاری پریس ریلیز میں بتایا کہ مجلس وحدت مسلمین تین روزہ سوگ کا اعلان کر چکی ہے،تین روزہ سوگ کے تسلسل میں احتجاجی ریلیز میں ایم ڈبلیو ایم کے کارکنان و عہدیداران آزاد کشمیر بھر میں شریک ہوئے، جبکہ تمام اضلاع میں قران خوانی، دعایا تقریبات ، مجالس ترحیم و پریس کانفرنسز کا انعقاد کیاگیا ، اس سلسلے میں اضلاع کو ہدایات جاری کر دیں گئیں ہیں تھیں ، تمام ضلعی ہیڈکواٹرز میں مجلس وحدت مسلمین آزاد جموں و کشمیر کے ضلعی سیٹ اپ کے زیر اہتمام تقریبات کا انعقاد کر کے شہداء کو خراج عقیدت ، و پسماندگان و افواج پاکستان سے اظہار یکجہتی کیا گیا۔