The Latest
وحدت نیوز ( لاہور) صوبائی وزارت داخلہ پنجاب نے مجلس وحدت مسلمین پاکستان کے سربراہ علامہ راجہ ناصر عباس جعفری ، مرکزی ڈپٹی سیکریٹری جنرل علامہ امین شہیدی ،صوبائی سیکریٹری جنرل پنجاب علامہ عبد الخالق اسدی اور بھکر کے رہائشی صوبائی ڈپٹی سیکریٹری جنرل علامہ اصغر عسکری پر اپنے ہی شہربھکر میں داخلے پر 30یوم تک کے لئے مضحکہ خیز پابندی عائد کر دی گئی ہے ۔تفصیلات کے مطابق گذشتہ دنوں بھکر میں اہل تشیع آبادی پر ہو نے والے تکفیری دہشت گردوں کے حملے اور مجلس وحدت مسلمین کے مرکزی و صوبائی قیادت کے فعال کردار سے بوکھلاہٹ کا شکار ہو کر صوبائی وزارت داخلہ نے ایم ڈبلیو ایم کی چار مرکزی شخصیات پر بھکر میں داخلے پر پابندی کے احکامات جاری کر دیئے ہیں ،وزارت داخلہ نے متعلقہ افسران کو ہدایات جاری کیئے ہیں کہ مجلس وحدت مسلمین کے مندرجہ بالا رہنماؤں کے بھکر میں داخلے پر پابندی کے احکامات پر سختی سے عملدرآمد کیا جائے ۔
واضح رہے کہ بھکر کے علاقے کوٹلہ جام ، پنجگرائیں اور دریا خان میں مسلم لیگ ن کے صوبائی وزیر قانون کالعدم جماعت سپاہ صحابہ کے پشت پناہ رانا ثناء اللہ کی ایماء پر تکفیریوں کے حملے اور چار مومنین کی شہادت کے بعد مجلس وحدت مسلمین کے مرکزی رہنما علامہ امین شہیدی اور علامہ عبدالخالق اسدی فوراً بھکر پہنچ گئے تھے اور شہداء کی نماز جنازہ میں شرکت کے ساتھ ساتھ عوامی اجتماع سے خطاب کیا تھا ، جس کے نتیجے میں مقامی مومنین کے جذبہ استقامت میں اضافہ ممکن ہوا تھا ، جب کہ شہداء کے سوئم کے موقع پر صوبائی ڈپٹی سیکریٹری جنرل اور بھکر کے رہائشی علامہ اصغر عسکری نے اسلا م آباد سے خصوصی شرکت کی تھی جس کے بعد انہیں بھکر میں دیگر مومنین کے ہمراہ گرفتار کر لیا گیا تھا ، بیگناہ گرفتار اسیروں کی رہائی کے لئے مجلس وحدت مسلمین نے صوبائی حکومت کو 24گھنٹے کی ڈیڈلائن دی تھی اور تمام بڑے شہروں میں علامتی دھرنے دیئے تھے جس کے نتیجے میں اسیروں کی رہائی ممکن ہو ئی تھی ۔
وحدت نیوز (اسلام آباد) مجلس وحدت مسلمین کے سربراہ علامہ ناصر عباس جعفری نے کہا ہے کہ امریکہ اور اس کے اتحادی عراق، لیبیا اور افغانستان کے بعد اب شام میں نیا محاذ کھولنے جارہے ہیں جس کے انتہائی تباہ کن نتائج برآمد ہونگے، اور یہ جنگ پورے خطے کو اپنی لپیٹ میں لے لے گی، اگر شام پر حملہ ہوا تو یہ جنگ اسرائیل کے ساتھ ساتھ دیگر ممالک کو بھی اپنی لپیٹ میں لے گی اور اس کے بعد جنگ کو روکنا امریکہ کے بس میں نہیں رہے گا۔ ان خیالات کا اظہار انہوں نے جی نائن سیکٹر کراچی کمپنی میں دفاع پاکستان کنونشن کے حوالے سے آرگنائزنگ کمیٹی کے اجلاس سے گفتگو کرتے ہوئے کہی۔
علامہ ناصر عباس جعفری کا کہنا تھا کہ سعودی عرب ، کویت، اور اردن مصر میں ایک جمہوری حکومت کے خاتمے اور ہزاروں مسلمانوں کو قتل کرانے کے بعد اب شام میں یہ عمل دہرانا چاہتے ہیں جو قابل مذمت ہے۔افسوس کی بات یہ ہے کہ ایک مسلمان ملک پر حملے کیلئے اپنی سرزمین دینے میں ترکی، اردن اور قطر پیش پیش ہیں۔ گذشتہ آٹھائیس ماہ سے سعودی عرب سمیت دیگر عرب ممالک نے شام میں باغیوں کو اسلحہ اور مالی تعاون فراہم کیا لیکن وہ بشارالاسد کی حکومت گرانے میں کامیاب نہیں ہوسکے اب یہ ممالک عالمی بدمعاش امریکہ کے ساتھ ملکر شام میں جنگ لانا چاہتے ہیں۔
انہوں نے استفسار کیا کہ کیا یہ ممالک اپنے ملکوں میں اس طرح کی مداخلت برداشت کریں گے۔ اس حوالے سے بندبن سلطان کے امریکہ ، برطانیہ اور فرانس میں مسلسل رابطے اس بات کا ثبوت ہیں کہ خطے میں امن کو تہہ بالا کرنے میں ان عرب ممالک کا ہاتھ ملوث ہے۔انہوں نے حکومت پاکستان مطالبہ کیا کہ وہ فی الفور اس حوالے سے اپنے موقف کا اعلان کرے اور اس جنگ کو روکوانے میں عالمی سطح پر کردار ادا کرے۔ انہوں نے کہا کہ امریکہ ایک ایک کرکے تمام مسلمانوں ملکوں میں جنگ میں دھکیل رہا ہے۔ انہوں نے کہا کہ آٹھ ستمبر کو اسلام آباد میں منعقد ہونے والا دفاع پاکستان کنونشن پاکستان کی تاریخ میں اہم سنگ میل ثابت ہوگا۔ اس دن بھارت سمیت امریکہ کو بتادیں گے کہ پاکستان کے عوام اپنے ملک کے دفاع میں اپنی افواج کے ساتھ ہیں اور اس مادروطن پر ہلکی آنچ بھی نہیں آنے دیں گے۔ علامہ ناصر عباس جعفری نے ایل او سی پر حالیہ واقعات اور بھارتی آرمی چیف کے بیانات کی سخت مذمت کی۔
وحدت نیوز (ملتان ) مجلس وحدت مسلمین پاکستان ملتان کی ضلعی کابینہ کی تقریب حلف برداری جامعہ شہید مطہری ملتان میں ضلعی سیکرٹری جنرل علامہ سید اقتدارحسین نقوی کی صدارت میں منعقد ہوئی۔ تقریب کے مہمان خصوصی مجلس وحدت مسلمین پاکستان کے ترجمان اور ڈپٹی سیکرٹری جنرل علامہ سید حسن ظفرنقوی تھے۔ جبکہ ان کے علاوہ سابقہ مرکزی سیکرٹری تعلیم مجلس وحدت مسلمین یافث نوید ہاشمی، سید قمرعباس زیدی، سید ابو عبداللہ شوکت زیدی، سید نجم الحسن کاظمی بھی موجود تھے۔
مجلس وحدت مسلمین ملتان کی ضلعی کابینہ میں حلف اُٹھانے والوں میں محمدعباس صدیقی، محمد اصغر سومرو، شبر رضا زیدی، ثقلین نقوی، وسیم عباس زیدی، غلام حسنین انصاری، غلام قاسم علی، سخاوت علی، سید دلاورعباس زیدی، مرزا وجاہت حسین، زاہد عباس سوری، سید علی رضا بخاری شامل ہیں۔ اس موقع پر علامہ سید حسن ظفرنقوی نے خطاب کرتے ہوئے کہا کہ ملتان میں مجلس وحدت مسلمین نے بہت جلد اپنا ایک مقام بنالیا ہے۔ ملتان کی عوام کے لیے علامہ سید اقتدارحسین نقوی کی کاوشیں قابل قد رہیں۔ مجلس وحدت مسلمین پاکستان کے تشیع میں ایک مقام رکھتی ہے۔
وحدت نیوز (لاہور) لاہور کے علاقے مصری شاہ میں دو نامعلوم موٹر سائیکل سواروں نے فائرنگ کرکے مجلس وحدت مسلمین فیروز والا کے لیگل ایڈوائز اور ضلع شیخوپورہ کی کابینہ کے نامزد رکن ایڈووکیٹ سید ارشد علی شاہ کو شہید کر دیا۔ سید ارشد علی شاہ ایڈووکیٹ فیروز والا کچہری میں پریکٹس کرتے تھے۔ سید ارشد علی فیروز والا میں ہی رہائش پذیر تھے اور اپنی گاڑی نمبر STP 2003 پر مصری شاہ میں اپنے سسرال آرہے تھے کہ دو موریہ پل کے قریب دو موٹر سائیکل سواروں نے ان پر اندھا دھند فائرنگ کر دی، جس کے نتیجے میں وہ شدید زخمی ہوگئے، سید ارشد علی شاہ کو زخمی حالت میں ہسپتال منتقل کیا جا رہا تھا کہ وہ راستے میں ہی چل بسے۔
ورثاء کا کہنا ہے کہ انکی کسی سے دشمنی نہیں تھی۔ دوسری جانب پولیس نے مقدمہ درج کرکے ٹارگٹ کلنگ سمیت تمام پہلوؤں پر تفتیش شروع کر دی ہے۔ پولیس ذرائع کا کہنا ہے کہ سید ارشد علی شاہ کو ممکن ہے شیعہ ہونے کی وجہ سے ٹارگٹ کیا گیا ہو، تاہم تفتیشی فورس دیگر پہلووں پر بھی تفتیش کر رہی ہے۔ سید ارشد علی کی شہادت کے بعد مصری شاہ کے علاقے میں شہریوں کی کثیر تعداد ان کی رہائش گاہ پر جمع ہوگئی، علاقے میں خوف و ہراس پایا جاتا ہے جبکہ پولیس نے واقعہ کے بعد سکیورٹی انتظامات سخت کر دیئے ہیں۔
سید ارشد علی شاہ کا پوسٹمارٹم جاری ہے جبکہ نماز جنازہ کل ادا کی جائے گی۔ اس سانحہ کے حوالے سے مجلس وحدت مسلمین کے علامہ حسن ہمدانی نے "اسلام ٹائمز" سے خصوصی گفتگو کرتے ہوئے کہا کہ واقعہ شیعہ ٹارگٹ کلنگ ہی لگتا ہے، تاہم شواہد اور تفتیش کے بعد ہی فیصلہ کن پالیسی جاری کی جائے گی۔ ایک سوال کے جواب میں ان کا کہنا تھا کہ کالعدم سپاہ صحابہ کے سربراہ احمد لدھیانوی نے اپنی پریس کانفرنس میں دھمکی دی تھی کہ وہ اب اپنے کارکنوں کی ہلاکتوں کا بدلہ اپنے زور بازو سے لیں گے، یہ واقعہ بھی ممکن ہے سپاہ صحابہ کی کارستانی ہو۔
انہوں نے کہا کہ لاہور میں شیعہ افراد کی ٹارگٹ کلنگ کا سلسلہ شروع ہوچکا ہے، ایک روز قبل لوہے کے معروف تاجر مبشر بٹ کو بھی گڑھی شاہو کے علاقے میں شہید کر دیا گیا۔ انہوں نے کہا کہ پنجاب حکومت اہل تشیع کی سکیورٹی یقینی بنائے، بصورت دیگر مجلس وحدت راست اقدام پر مجبور ہوگی، جس کی تمام تر ذمہ داری پنجاب حکومت پر عائد ہوگی۔
وحدت نیوز (ملتان) مجلس وحدت مسلمین پاکستان کے مرکزی سیکرٹی جنرل علامہ راجہ ناصر عباس جعفری کے حکم پر گزشتہ روز ہونیوالے سانحہ بھکر اور بعد ازاں بے گناہ کارکنان کی بلاجواز گرفتاری کے خلاف چوک نواں شہر ملتان میں مجلس وحدت مسلمین اور امامیہ اسٹوڈنٹس آرگنائزیشن کے زیراہتمام احتجاجی مظاہرہ اور علامتی دھرنا دیا گیا۔ دھرنے کی قیادت مجلس وحدت مسلمین ملتان کے ضلعی سیکرٹری جنرل وممبر امن کمیٹی علامہ سید اقتدارحسین نقوی، علامہ قاضی نادرحسین علوی، ڈپٹی سیکرٹری جنرل محمد عباس صدیقی، ڈویژنل صدر آئی ایس او رتہورحیدری نے کی۔ دھرنے کے شرکاء نے بینرز، پلے کارڈز اور بینرز اُٹھا رکھے تھے۔ جن پر سانحہ بھکر کے مومنین کی حوصلہ افزائی کی گئی ۔
مظاہرین سے خطاب کرتے ہوئے علامہ سید اقتدارنقوی نے کہا کہ سانحہ بھکر میں ڈی پی او ملوث ہے جب تک اُسے وہاں سے معطل نہیں کیا جائے حالات قابو میں نہیں آ سکتے۔ پنجاب حکومت کی آشیر باد سے جنوبی پنجاب میں تکفیری ٹولے کو مراعات ملی ہوئی ہیں۔ پوری دنیا جانتی ہے کہ یہ ٹولہ کالعدم ہے لیکن پھر بھی اُن کو پولیس کی حفاظت حاصل ہے۔ دھرنے کے شرکاء نے ڈی پی او، پنجاب حکومت اور دہشتگردوں کے خلاف شدید نعرے بازی کی۔ اس موقع پر علامہ قاضی نادر حسین علوی نے خطاب کرتے ہوئے کہا کہ جنوبی پنجاب کے علاقے بھکر میں جان بوجھ حالات خراب کیے جارہے ہیں تا کہ شیعوں پر دبائوڈال کر وہاں دہشت گردوں کی پناہ گاہوں محفوظ کیا جائے۔
وحدت نیوز (لاہور) مجلس وحدت مسلمین پاکستان (شعبہ تربیت) کی جانب سے برسی قائد مرحوم حضرت مفتی جعفر حسین (رہ) کے موقع پر دعائے کمیل و مجلس عزا کا انعقاد کیا جائے گا۔ ان خیالات کا اظہار مرکزی سیکریٹری امور تربیت علامہ احمد اقبال رضوی نے وحدت میڈیا سیل کو دیئے گئے بیان میں کیا۔ انہوں نے کہا کہ مفتی جعفر حسین پاکستان کی ملت جعفریہ کے ان افراد میں سے ہیں کہ جن کہ خدمات کو قوم کبھی فراموش نہیں کرے گی، ہمیں ان کے کردار و افکار کو ہمیشہ زندہ رکھنے کی ضرورت ہے تاکہ شیعہ قوم قائد مرحوم کی یاد کو اپنی آئندہ نسلوں تک منتقل کرسکے اور ان کا ہم پر جو حق بنتا ہے وہ ادا ہوسکے۔ انہوں نے مزید کہا کہ قائد مرحوم حضرت مفتی جعفر حسین (رہ) کی یاد کو زندہ رکھنے کیلئے مجلس وحدت مسلمین پاکستان کی جانب سے ان کی مرقد مبارک کربلا گامے شاہ لاہور پر دعائے کمیل و مجلس عزا کا انعقاد 29 اگست ، جمعرات کو 7 بجے کیا جارہا ہے، جس سے خصوصی خطاب ناصر ملت حجتہ السلام و المسلمین علامہ راجہ ناصر عباس جعفری فرمائیں گے، تمام مومنین و مومنات سے بڑی تعداد میں شرکت کی گزارش ہے۔
وحدت نیوز (اسلام آباد) مجلس وحدت مسلمین کے مرکزی ڈپٹی سیکریٹری جنرل و ترجمان علامہ حسن ظفر نقوی نے کراچی اورکوئٹہ سمیت ملک بھر میں دہشت گردوں کے خلاف فوری طور پر فوجی آپریشن کیا جائے۔وفاقی حکومت کی انسداد دہشت گردی پالیسی پر رد عمل میں مجلس وحدت مسلمین کے مرکزی رہنما علامہ حسن ظفر نقوی نے کہا کہ نواز لیگ کی حکومت نے ماضی میں ایک سیکولر جماعت کے خلاف تو فوجی آپریشن کیا لیکن کالعدم طالبان اور کالعدم سپاہ صحابہ و لشکر جھنگوی کے دہشت گردوں کے خلاف فوجی آپریشن سے آج تک گریزاں ہے جو کہ کھلی منافقت ہے۔انہوں نے کہا کہا دہشت گردی ملکی سطح کا مسئلہ ہے اوران دہشت گردوں نے قومی سلامتی کے اداروں، افسران و اہلکاروں، سیاستدانوں اور دینی شخصیات سمیت ہزاروں بے گناہ افرادکا قتل ناحق کیا ہے۔ بری، فضائی اور بحری افواج کی تنصیبات اور مراکز پر بھی ان دہشت گردوں نے حملے کئے ہیں۔ لہٰذا ان دہشت گردوں کے خلاف فوجی آپریشن نہ کرنا سمجھ سے بالاتر ہے۔انہوں نے کہا کہ فوج کے سربراہ کہہ چکے ہیں کہ اگر سویلین حکومت فوجی معاونت کی درخواست کرے گی تو فوج اس پرعمل کرے گی۔
ان کا کہنا تھا کہ پاکستانی عوام کا اجماع ہے کہ دہشت گردوں کے خلاف فوجی آپریشن کے سوا دوسرا کوئی آپشن نہیں ہے۔ دہشت گردوں سے مذاکرات کی بات کرنا شہدائے پاکستان کے مقدس خون سے غداری کے مترادف ہے۔ انہوں نے کہا کہ نواز لیگ کی حکومت وفاقی اور پنجاب کی سطح پر دہشت گردی ختم کرانے کے لئے سنجیدہ کردار اداکرے۔ان کا اب تک کا ریکارڈ اس حوالے سے انتہائی ناقابل اعتبار ہے کیونکہ پنجاب سمیت پورا ملک دہشت گردی کی لپیٹ میں ہے اور زیادہ تر دہشت گردی میں پنجابی طالبان ملوث ہیں۔صوبہ پنجاب دہشت گردوں کی محفوظ پناہ گاہ میں تبدیل ہوچکا ہے۔کراچی اور کوئٹہ میں بھی جو دہشت گرد کارروائیاں ہوتی ہیں،ان میں بھی ماسٹر مائنڈ ز پنجاب میں پائے جاتے ہیں۔دہشت گردوں کے خلاف ملک بھر میں بیک وقت آپریشن کی ضرورت ہے تاکہ انہیں فرار کا موقع نہ مل سکے۔
وحدت نیوز ( اسلام آباد) پاکستان کی نامور علمی شخصیت اور عالم اہل حدیث مولانا محمد اسحاق مدنی کی المناک وفات پاکستان کے تمام مسالک کا مشترکہ نقصان ہے ، اتحاد بین المسلمین کے لئے مرحوم کی کاوشوں کو ہمیشہ یاد رکھا جائے گا، خدا مرحوم کی مغفرت فرمائے اور انہیں جنت الفردوس میں جگہ عنایت فرمائے ،ان خیالات کا اظہار مجلس وحدت مسلمین پاکستان کے مرکزی ڈپٹی سیکریٹری جنرل علامہ محمد امین شہیدی نے مرکزی سیکریٹریٹ وحدت ہاؤس سے میڈیا سیل کو جاری اپنے تعزیتی بیان میں کیا ۔
ان کاکہنا تھا کہ مولانا محمداسحاق اہل حدیث مکتب فکر کی طرح اہل تشیع علماء و عوام میں بھی بے حد مقبول اور پسند کی جانے والی شخصیت تھے ، مرحوم نے شیعہ سنی اتحاد کے لئے عملی کوششیں انجام دیں ، اہل تشیع کی دعوت پر بارہا سیمینارز اور تقاریب میں شرکت کر تے رہے ، اور ہمیشہ وحدت امت ان کا موضوع سخن رہا ۔ منفرد انداز بیان ان کا خاصہ تھا ۔ ان کی وفات سے پیدا ہو نے والا خلہ مشکل سے پر ہو گا ، جب بھی کبھی اتحاد امت کی بات کی جائے گی مولانا اسحاق کا نام ضرور یا دآئے گا۔
علامہ امین شہیدی نے مولانا محمد اسحاق کے اہل خانہ سے ان کی اچانک وفات پر دلی تعزیت کا اظہار کیا ہے اور پروردگار عالم کی بارگاہ میں دعا کی کے خدا انہیں اپنے جوار رحمت میں جگہ عنایت فرمائے اور پسماندگان کو صبر جمیل عطا فرمائے ۔
وحدت نیوز (سندھ)کالعدم دہشت گردگروہ کی جانب سے برپا کئے گئے سانحہ بھکر اورجانبدار و متعصب انتظامیہ کی جانب سے کی گئی بے گناہ کارکنوں کی گرفتاریوں کے خلاف کراچی سمیت سندھ بھر میں مجلس وحدت مسلمین کے تحت احتجاجاً علامتی دھرنے دیئے گئے۔ کراچی میں نمائش چورنگی پر مرکزی علامتی دھرنا دیا گیا جس میں نوجوانوں کے علاوہ خواتین اور بچوں کی بڑی تعداد نے بھی شرکت کی۔احتجاج کرنے والوں نے پلے کارڈز اوربینرز اٹھاکراپنے مطالبات کے حق میں نعرے بازی بھی کی۔ انہوں نے وفاقی حکومت اور پنجاب حکومت سے مطالبہ کیا کہ کالعدم دہشت گرد یزیدی تکفیری گروہ سے مذاکرات ہر گز نہ کئے جائیں بلکہ ان دہشت گردوں کو کچل کر رکھ دیا جائے۔ علامتی دھرنے سے خطاب کرتے ہوئے مجلس وحدت مسلمین کے رہنما علامہ صادق رضا تقوی ، علامہ دیدار علی جلبانی، مولانا علی انور ، علامہ مبشرحسن، علی حسین،اور ناصر حسینی نے خطاب کر تے ہو ئے بھکر دریا آباد اور کوٹلہ جام میں پرامن اور نہتی شیعہ مسلمان آبادی پر کالعدم یزیدی دہشت گرد گروہ کے دہشت گردوں کے مسلح حملوں کے نتیجے میں انسانی جانوں کے ضیاع اور مالی نقصانات کی سخت الفاظ میں مذمت کی۔
علامہ راجہ ناصر عباس جعفری کی اپیل پر کراچی سمیت حیدرآباد ، نواب شاہ ، ٹھٹھہ، ماتلی ، بدین ، دادو، سکھراور دیگر اضلاع میں پر امن احتجاجی دھرنے دیئے گئے ۔ جن میں علامہ مختار امامی ، علامہ امداد نسیمی ، علامہ نشان حیدرساجدی، عالم کربلائی ، علامہ گل حسن مرتضوی، علامہ بہادر میمن ، مختار دایو ، علامہ نقی کھوسونے خطاب کیا
علامہ صادق رضا تقوی نے کہا کہ سانحہ بھکر کے شہداء کے سوئم میں شریک ہونے والے مجلس وحدت مسلمین کے رہنماؤں ، کارکنوں اور ہمدردوں پر پولیس کے تشدد اور گرفتاریوں سے ثابت ہوا کہ صوبہ پنجاب کی حکومت اور انتظامیہ میں متعصب اورجانبدار افراد شامل ہیں۔انہوں نے کہا کہ پنجاب کے وزیر قانون رانا ثناء اللہ اور کالعدم دہشت گرد تنظیم سے ڈیل کے قائل افراد سانحہ بھکر کے ذمے دار ہیں۔ ان کا کہنا تھا کہ صدر آصف زرداری اور وزیر اعظم نواز شریف کالعدم دہشت گرد تنظیم کے دہشت گردوں کو دی گئی سزائے موت پر عمل کروائیں ۔ امریکا میں بھی سزائے موت دی جاتی ہے۔
انہوں نے مطالبہ کیا کہ سانحہ بھکر کے ذریعے بے گناہ انسانوں کو شہید کرنے والے کالعد م دہشت گرد گروہ سے وابستہ قاتلوں کو فی الفور گرفتار کرکے سزائے موت دی جائے اور اس سزا پر فوری عمل بھی کیا جائے۔ انہوں نے متنبہ کیا کہ اگر گرفتار شدگان کو فوری طور پر آزاد نہ کیا گیا تو اگلا قدم علامتی احتجاج نہیں ہوگا بلکہ ملک گیر دھرنے شروع کئے جائیں گے جو مطالبات کی منظوری تک جاری رہیں گے۔ دریں اثنا ء ٹھٹھہ، بدین، ماتلی، تلہار، ٹنڈوباگو، حیدرآباد، سانگھڑ، نوابشاہ، دادو، خیرپور، لاڑکانہ، سکھر، شکارپور، کندھ کوٹ، جیکب آباد، دولت پورسمیت دیگر علاقوں میں علامتی دھرنے دیئے گئے۔احٹجاج کرنے والوں نے پنجاب حکومت سے کہا کہ پنجاب کے حکمران صوبے کے پرامن شہریوں کو دہشت گردی سے نجات دلانے کے لئے کالعدم یزیدی دہشت گرد گروہ کو کچل کر رکھ دیں۔انہوں نے مطالبہ کیا کہ پنجاب حکومت، انتظامیہ اور پولیس کو کالی بھیڑوں سے پاک کیا جائے۔
وحدت نیوز (مانٹرنگ ڈیسک ) روسی صدر ولادی میر پیوٹن نے فوج کو حکم دیا ہے کہ شام پر مغربی ملکوں کے حملے کی صورت میں سعودی عرب پر حملہ کر دیا جائے۔ دوسری جانب امریکی صدر براک اوباما نے ایک بار پھر برطانوی وزیراعظم ڈیوڈ کیمرون سے شام کے حوالے سے ٹیلی فون پر بات چیت کی ہے۔ دنیا نیوز کے مطابق ماسکو میں کریملن ذرائع نے تصدیق کی ہے کہ روسی صدر نے فوج کو ''ارجنٹ ایکشن میمورنڈم''جاری کیا ہے، جس کے تحت شام پر حملے کی صورت میں سعودی عرب پر حملے کا حکم دیا گیا ہے۔ امریکی صدر دنیا بھر میں اپنے اتحادیوں سے فون پر رابطے کر رہے ہیں، تاکہ شام کے خلاف ممکنہ کارروائی کے لئے عالمی رائے ہموار کی جائے۔ وائٹ ہاؤس سے جاری ایک بیان میں کہا گیا ہے کہ یہ صدر اوباما کی وزیراعظم کیمرون کو دوسری کال تھی۔ اکیس اگست کے کیمیائی ہتھیاروں کے استعمال کے بعد صدر اوباما اور وائٹ ہاؤس کے اعلٰی عہدیدار اٹھاسی کالز کرچکے ہیں۔ خبریں ہیں کہ شام کیخلاف امریکا، برطانیہ اور فرانس اگلے چند روز میں فوجی کارروائی کر سکتے ہیں۔
واضع رہے کہ کیمیائی حملوں کا الزام لگا کر مغربی ممالک کی جانب سے شام کو سنگین نتائج کی دھمکی دی گئی تھی۔ مغربی ممالک کی جانب سے کہا گیا ہے کہ اگلے چند روز کے اندر اندر بشار الاسد حکومت کے خلاف فوجی کارروائی ہوسکتی ہے۔ دوسری جانب امریکی وزیر دفاع چک ہیگل نے کہا ہے کہ امریکی افواج خطے میں موجود ہیں اور صدر باراک اوباما کا حکم ملتے ہی فوری کارروائی کے لیے تیار ہیں۔ چک ہیگل نے بتایا کہ خفیہ ایجنسیاں ان شواہد کو بھی مرتب کر رہی ہیں، جن سے واضح ہوتا ہے کہ دمشق کے نواح میں ہونے والا کیمیائی حملہ بشار الاسد کی حامی فورسز نے کیا اور یہ معلومات اگلے چند روز میں جاری کر دی جائیں گی۔
