The Latest
وحدت نیوز(ملتان) مجلس وحدت مسلمین پاکستان صوبہ پنجاب کے رہنماؤں کی تین روزہ تریتی و تنظیمی معرفت ولایت ورکشاپ جامعہ شہید مطہری ملتان میں منعقد ہوئی، ورکشاپ میں ملتان، لاہور،خانیوال،فیصل آباد،جھنگ،چنیوٹ،مظفرگڑھ،لیہ،بھکر،راجن پور،سرگودھا، خوشاب، لاہور،ساہیوال سمیت صوبے بھر کے کارکنوں نے شرکت کی۔ تربیتی ورکشاپ کا مقصد کارکنوں کی تنظیمی اور فکری تربیت کرنا تھا، ورکشاپ سے مجلس وحدت مسلمین پاکستان کے سربراہ علامہ ناصر عباس جعفری، مرکزی سیکریٹری تربیت علامہ احمد اقبال ،مرکزی سیکریٹری سیاسیات ناصر شیرازی، مرکزی صدر آئی ایس او پاکستان تہور حیدری ،ایم ڈبلیوایم پنجاب کے ڈپٹی سیکرٹری جنرل علامہ سید اقتدار حسین نقوی، پنجاب کے ترجمان علامہ محمد اصغر عسکری، علامہ عسکری الہدایت، زاہد حسین مہدوی، علامہ حسن رضا ہمدانی،قاضی شبیر علوی ،قاضی نادر علوی، علامہ اظہر کاظمی سمیت دیگر رہنماؤں کے خطاب کیا۔ رہنماؤں نے ورکشاپ سے خطاب کرتے ہوئے کہا کہ مجلس وحدت مسلمین پاکستان کی نظریاتی سرحدوں کی محافظ ہے ، پاکستان میں موجود مجلس وحدت مسلمین کے کارکنان ملک کی ترقی اور خوشحالی کے لیے اپنا بھرپور کردار ادا کریں گے۔
وحدت نیوز(میلسی) مجلس وحدت مسلمین پاکستان کے سربراہ علامہ ناصرعباس جعفری نے امام پیر شاہ بخاری میں مرکزی مجلس عزاسے خطاب کرتے ہوئے کہا کہ پاکستان اس وقت تکفیریت کی لپیٹ میں ہیں جن کو یہاں پر خود ہمارے اداروں نے پالے ان سفاک دہشتگردوں نے پاکستان کے ساٹھ ہزار سے زائد لوگوں کو شہید کیا، پشاور میں دہشتگردی کا جو مجرمانہ واقعہ ہوا، جس میں سینکڑوں بے گناہ معصوم بچے لقمہ اجل بنے، جن کو یہ نہیں پتہ تھا کہ ہمارا جرم کیا ہے، بے گناہوں کے خون سے ہولی کھیل کر دہشت گردوں نے ریاستی رٹ کو چیلنج کیا ہے ہم ان عظیم شہداء کے دکھ کو محسوس کرتے ہیں کیونکہ ہمیں بسوں سے اتار کر شناختی کارڈ دیکھ دیکھ کر مارا گیا، ہمارے بچے، خواتین، نوجوان، ڈاکٹرز، انجینیئرز، وکلا، ادیب، پروفیسرز، بزنس مین، مارے گئے لیکن ستم ظریفی یہ ہے کہ ہم سوا سو لاشیں لے کر ٹھٹھرتی سردی میں سڑکوں پر ان ریاستی اداروں اور حکمرانوں کے ضمیر کو جھنجھوڑنے کے لئے بیٹھے رہے اور پاکستان کو محفوظ کرنے کی صدا و فریاد بلند کرتے رہے مگر حکمرانوں اور ریاستی اداروں کی کانوں پر جوں تک نہیں رینگی۔
انہوں نے کہا ہم بارہا یہ کہتے رہے یہ تکفیری سوچ ایک ناسور ہے، آگ ہے، اس کو بروقت ریاستی طاقت کے ساتھ روکا جائے، اگر یہ آگ پھیل گئی تو سب کو جلا کر راکھ دے گی، یہ جہادی تکفیری ہیں جو اپنے سوا سب کو کافر اور مشرک سمجھتے ہیں، ان کا نشانہ ہر مکتب فکر بنا، شیعہ، سنی، اقلیتی برادری، افواج پاکستان، پولیس حساس اداروں کے ملازمین، صحافی، خواتین، بچے سب ان کے ظلم و بربریت کا نشانہ بنے، پشاور میں مولانا حسن جان نے خودکش حملوں کیخلاف جمعہ کے خطبے میں فتویٰ دیا اتوار کو اُن کو شہید کر دیا گیا، لاہور میں علامہ ڈاکٹر سرفراز نعیمی کو ان تکفیریوں نے دہشت گردی کے خلاف فتویٰ دینے پر شہید کر دیا لیکن ہمارے ادارے اور حکمران خاموش تماشائی بنے رہے۔
علامہ راجہ ناصر عباس جعفری نے کہا کہ تکفیریت ایک آئیڈیالوجی ہے اس سے مسلم امہ کو مقابلہ کرنا ہے اور اسلام کو ان خارجی گروہ سے محفوظ کرنا ہے ہم مطالبہ کرتے ہیں کہ وطن عزیز میں ان دہشت گردوں کیخلاف ملک گیر آپریشن کیا جائے، ملک کے چپہ چپہ میں چھوٹے چھوٹے وزیرستان موجود ہیں، ایک جامع انٹیلیجنس کے بنیاد پر ان دہشتگردوں کیخلاف آپریشن کیا جائے اور ان کے فنانسرز، سہولت کاروں کو بنا کسی سیاسی مفادات کے قانوں کے گرفت میں لایا جائے اور فوجی عدالتوں کو فوری فنکشنل کرکے ان درندوں کو کیفر کردار تک پہنچایا جائے۔ انہوں نے کہا کہ موجودہ عدالتی نظام میں جج کے سامنے کوئی انسان قتل ہو اور اگر کورٹ میں کوئی گواہ پیش نہ ہوا تو وہ قاتل بری ہو جائے گا، یہ ہمارا نظام انصاف ہے، کیا ایسے معاشرے میں امن کا قیام ممکن ہے؟ ہرگز نہیں جب تک ہم ایسے فرسودہ نظام کو جڑ سے نہیں اکھاڑ پھینکیں گے، معاشرتی برائیوں کا خاتمہ ممکن نہیں۔
انہوں نے اقوام متحدہ اور یورپی یونین کی جانب سے پھانسی کیخلاف اپیل کو پاکستان کے سلامتی اور دہشتگردوں کیخلاف جنگ میں مداخلت قرار دیتے ہوئے کہا یہ نام نہاد ہیومن رائٹس چمپینئز کو ڈرون حملے نظر نہیں آتے؟ لیبیا اور عراق میں محض جھوٹ کے بنیاد پر جنگ مسلط کر کے لاکھوں مسلمانوں کا قتل عام کیا گیا اس وقت یہ کہاں تھے؟ مصر اور بحرین میں جمہوریت کا نعرہ بلند کرنے والوں کا قتل عام کیا گیا اور اس وقت بھی جاری ہے وہ ان کو نظر نہیں آتے؟ سعودی عرب میں ہر ہفتے کسی نہ کسی پاکستانی کا سر قلم ہوتا ہے کبھی ان کے بارے میں کچھ کہا؟ انہی تکفیری دہشت گردوں کو قطر سمیت مختلف عرب ملکوں میں ٹریکنگ سینٹر قائم کر کے مسلمان ممالک میں خونریزی کے لئے بھیجے جاتے ہیں اور اس کے پیچھے یہی طاقتیں ہوتی ہیں، اب پاکستانی قوم کی دہشت گردوں کیخلاف بیداری اور اتحاد نے ان بیرونی دشمنوں کی نیندیں حرام کر دی ہیں، ان کو اپنا مستقبل تاریک نظر آ رہا ہے، اگر ان مغربی ممالک کو اتنا دکھ ہے تو ان تکفیریوں کو اوپن ویزے کا اعلان کر کے وہاں بسایا جائے، پاکستان میں اب کسی شرپسند اور دہشت گرد کے لئے جگہ موجود نہیں انشااللہ اب پاکستان کی سلامتی سے کھیلنے والوں کو مزید برداشت نہیں کرینگے۔ انہوں نے کہا کہ اس پاک دھرتی کے لئے جس طرح ہمارے آباوُاجداد نے جانی مالی قربانیاں دی ہے، اس وقت بھی ہم اپنے وطن کی سلامتی اور بقاء کے لئے سر بکف تیار ہے اور کسی قربانی سے دریغ نہیں کریں گے۔
وحدت نیوز (کراچی) مرکزی ترجمان مجلس وحدت مسلمین پاکستان علامہ سید حسن ظفر نقوی کےجواں سال بھائی سید وسیم ظفر نقوی رضائے الہیٰ سے انتقال کرگئے، مرحوم کافی عرصے سے عارضہ قلب میں مبتلا تھے، مجلس وحدت مسلمین پاکستان کے سربراہ علامہ ناصر عباس جعفری ، ڈپٹی سیکریٹری جنرل علامہ امین شہیدی ، علامہ شفقت شیرازی ،ناصر شیرازی، حسن ہاشمی ، علی حسین نقوی ، مبشر حسن ، انجنیئر رضا نقوی سمیت ملک بھر سے مجلس وحدت مسلمین کے قائدین اور رہنماوں نے سید وسیم ظفر نقوی کی اچانک رحلت پر علامہ سید حسن ظفر نقوی اور پسماندگان سے افسوس اور تعزیت کا اظہار کیا ہے۔
وحدت نیوز(کراچی) مجلس وحدت مسلمین کے مرکزی ڈپٹی سیکریٹری جنرل علامہ امین شہدی نےعزاخانہ ابوطالبؑ سولجر بازار کراچی میں شہید علامہ آغا ضیاءالدین رضوی کی 10 ویں برسی و دیگر شہدائے ملت جعفریہ کی یاد میں تعزیتی جلسہ سے خطاب میں کہا کہ جن قاتلوں نے عزاداری اور تشیع سے دشمنی رکھی اور قتلِ عام کیا انہی قاتلوں نے فوج اور ملک کو بھی نقصان پہنچایا، آج ملت تشیع کا موقف پورے پاکستان اور بلخصوص سیاست دانوں اور پاک فوج کا موقف بن گیا ہے،مکتب تشیع حقانیت اور سچائی کی بنیاد پر پوری دنیا میں پھیل چکا ہے،انہوں نے مزید کہا کہ ملت تشیع کیخلاف آج صہونیت و استعماری طاقتیں پوری دنیا میں سازشیں کررہے ہیں،آج ملت کو اتحاد و اتفاق اور وحدت کی اشد ضرورت ہے۔
علامہ امین شہیدی نے شہید قائد علامہ عارف حسینی شہید علامہ آغا ضیاءالدین رضوی علامہ حسن ترابی ودیگر شہدائے ملت جعفریہ کو خراج تحسین ہیش کرتے ہوئے کہا کہ شہداء سے ہمارا رشتہ فقط شعاری نہیں بلکہ معنوی ہے،شہداء سے رابطہ قوی رکھنے اور انکے پیغام و مشن کو سمجھنے کی ضروت ہے،انہوں نے کہا کہ اللہ کے دین احکام اور اہلیبیت ؑ کے مشن کی حفاظت سے بڑھ کر کوئی کام نہیں، جب دنیا کہ مظلوم عوام امام حسینؑ کے نام پر اکھٹے ہوجائیں تو انقلاب اسلامی جیسا کارنامہ انجام دیتے ہیں،اس موقع پر ایم ڈبلیو ایم سندھ کے رہنما برادر ناصر حسینی کراچی ڈویژن کے رہنما سید علی حسین نقوی حسن ہاشمی مولانا مبشر حسن ،شبیر حسین و دیگر بھی موجود تھے۔
وحدت نیوز (ملتان) مجلس وحدت مسلمین پاکستان کے مرکزی سیکریٹری سیاسیات ناصرشیرازی نےملتان میں منعقدہ تین روزہ تربیتی و تنظیمی معرفت ولایت ورکشاپ کے شرکائےسے خطاب کرتے ہوئے کہا کہ سیاسیات کے دوعناوین ہیں ، ایک علوی طرز سیاسیات اور ایک اموی طرز سیاسیات ، پوری دنیا میں تشیع نے علوی انداز و طرز سیاسیات سے اپنا لوہا منوایا ہے، شام ، ایران ، عراق اور لبنان میں پیروان علیؑ نے عملی سیاست میں حصہ لے کر تشیع کو قومی دہارے میں شامل کیا، پاکستان میں مجلس وحدت علوی طرز سیاست کے اجراء میں مصروف عمل ہے،تشیع ِ پاکستان کا منظم سیاسی قوت بننا حالات کا تقاضہ بھی ہے اور وصیت امیر المومنین ؑ بھی ، مظلوموں کے حقوق کی جنگ لڑنا سنت معصومین ؑ ہے اور ہم بافضل خدا یہ جنگ لڑ رہے ہیں ۔
وحدت نیوز (کراچی) مجلس وحدت مسلمین پاکستان کے مرکزی ڈپٹی سیکریٹری جنرل علامہ امین شہیدی نےانجمن سجادیہ کے زیر اہتمام جعفر طیارملیر میں قدیمی جلوس اٹھارہ بنی ہاشم کی مجلس سے خطاب کرتے ہوئے کہا کہ تشیع کو بیرونی سے زیادہ اندرونی دشمنوں سے خطرات لاحق ہیں ،شیعوں کے روپ میں علیؑ کو اہل تشیع سے چھیننے کی کوشش کی جا رہی ہے، مرجیعت اور عزاداری تشیع کی سربلندی اورکامیابی کی ضمانت ہیں ، عالمی استعمار اور داخلی دشمن مرجیعت اور عزادری کے امتیاز کا معترف ہے، ایک مخصوص طبقے کو برطانوی اور امریکی سفارت خانہ عزاداری اور تشیع میں بگاڑ کیلئے بھاری رقوم فراہم کر رہا ہے، شہادت ثلاثہ اور عزاداری کی رسومات میں بدعتوں کا رواج عالمی استعماری ایجنڈہ ہے،انہوں نے مذید کہا کہ خود کو شیعہ ظاہر کر کے زیب ممبر ہونے والو ں کا ایک عالمی ایجنڈہ ہے، شیعہ دشمن قوتیں ایسے نام نہاد ذاکروں اور علاماوں کو خرید کرشیعت کو کمزور کرنے اور عقائد کو بگاڑنے کی مذموم کوششوں کیلئے استعمال کر رہی ہیں ،یہ عناصر ممبر رسول ﷺ کو شیعہ مقدسات کی توہین کیلئے استعمال کر رہے ہیں ،عزاداری سید الشہداء کا انعقاد کرنے والوں پر لازم ہے کہ وہ ممبر رسول ﷺ کواہل افراد کے سپرد کریں ،اس موقع پر ہزاروں کی تعداد میں عزاداروں سمیت مولانا حامد مشہدی، مولاناجعفر آرزو، ایم ڈبلیوایم کے رہنما احسن عباس ، ثمر زیدی ، آصف نقوی ، حسن عباس، رضا حسین ، جعفر طیار کوآپریٹوہاوسنگ سوسائٹی کے صدر اعجاز زیدی، بانی جلوس اشرف زیدی بھی موجود تھے۔
وحدت نیوز (کوئٹہ) مجلس وحدت مسلمین بلوچستان کے سیکرٹری جنرل علامہ مقصود علی ڈومکی نے ممتازبزرگ عالم دین علامہ یعقوب علی توسلی کے انتقال پر گہرے رنج و غم کا اظہار کرتے ہوئے کہا کہ ملک وملت کیلئے انکی گرانقدر خدمات پرانہیں خراج عقیدت پیش کرتے ہیں۔انہوں نے کہا کہ علامہ یعقوب علی توسلی کی زندگی انقلابی جدوجھد سے عبارت ہے۔آپ قائد شھید علامہ عارف حسین الحسینی ؒ کے با اعتماد ساتھی اور دین اسلام کے مبلغ تھے۔آپ نے طویل عرصہ منبر ومحراب کے ذریعے دین اسلام کی تبلیغ کی۔ان کی وفات پرملت جعفریہ پاکستان اور مجلس وحدت مسلمین انکے اہل خانہ کے غم میں برابر کے شریک ہیں۔
در این اثناء علامہ مقصود علی ڈومکی نے کہا ہے کہ سیاسی بیانات سے کچھ نہیں ہو گا۔دھشت گردی کے خلاف عملی اقدامات کی ضرورت ہے۔بلوچستان میں دھشت گردوں کے ہاتھوں اب تک ہزاروں معصوم انسان قتل ہو چکے ہیں۔ جن کے ٹریننگ کیمپس مختلف علاقوں میں قائم ہیں۔عوام کو یہ بھی بتایا جائے کہ انکے خلاف کب آپریشن ہوگا؟۔
محترمہ بے نظیر بھٹو کی ساتویں برسی کے موقع پر علامہ مقصود علی ڈومکی نے کہا ہے کہ سابق وزیر اعظم کے قتل سے متعلق عوام اب تک انصاف کی تلاش میں ہیں ، یہ اس ملک کا المیہ ہے کہ عام آدمی سے لے کر وزیر اعظم تک کسی کو انصاف نہیں ملتا۔ ملک میں عدل و انصاف کا ایسا نظام رائج کرنے کی ضرورت ہے کہ ہر شہری کو انصاف ملے۔ کوئٹہ میں ہزاروں معصوم شہری قتل ہوگئے میں کسی قاتل دہشت گرد کو پھانسی نہیں ہوئی۔ اب بھی عملی اقدامات کم اور بیانات زیادہ نظر آرہے ہیں۔
وحدت نیوز (گلگت) دہشت گردوں کو پھانسی کے پھندے سے بچانے کی بان کی مون کی سفارش قابل مذمت ہے۔اقوام متحدہ کے سیکرٹری جنرل کے طرزعمل نے ثابت کردیا کہ انہیں معصوم پاکستانیوں سے زیادہ دہشت گردوں سے ہمدردی ہے۔پاکستان ایک خود مختار ریاست ہے کسی کے ڈکٹیشن کی کوئی ضرورت نہیں،انسانی حقوق کی آڑ میں دہرا معیار قابل قبول نہیں۔
ان خیالات کا اظہارمجلس وحدت مسلمین گلگت بلتستان کے ترجمان محمد الیاس صدیقی، سیکریٹری سیاسیات غلام عباس اور سیکریٹری اطلاعات سعید الحسنین نے اپنے ایک مشترکہ بیان میں کیا ہے۔ انہوں نے کہا کہ ایک ایسے موقع پر جب پوری پاکستانی قوم، حکومت اور پاک فوج ملک عزیز سے دہشت گردوں کا صفایا کرنے پر متحد ہوچکی ہے اقوام متحدہ کے سیکرٹری جنرل کا دہشت گردوں کو پھانسی دینے کے عمل کو رکوانے کی سفارش کرنا پوری پاکستانی قوم سے اعلان جنگ اور دہشت گردوں کی پشت پناہی کو ثابت کرتا ہے۔انہوں نے کہا کہ اقوام متحدہ گنتی کے چند ممالک کی نمائندگی کی بجائے عالم انسانیت کی نمائندگی کرنی چاہئے۔امریکہ اور اس کے اتحادی عالم انسانیت کے دشمن ہیں جو پوری دنیا میں انسانی حقوق کے نام پر دہشت گردی کو فروغ دے رہے ہیں۔فلسطین،افغانستان، عراق ، مصر، لیبیا اور شام میں انسانی حقوق کی پائمالی پر تو اقوام متحدہ مکمل خاموش ہے اور اسرائیلی درندوں جو ہزاروں فلسطینی بچوں کے قاتل ہیں کو تحفظ فراہم کرنے کے ایجنڈے پر گامزن ہیں۔پاکستان قوم دہشت گردی کے خلاف متحد ہوچکی ہے اور اقوام متحدہ کے بے جان ادارے کی ڈکٹیشن کی محتاج نہیں،دہشت گردوں کو مہلت دینا انصاف کو قتل کرنے کے مترادف ہوگا۔ انہوں نے کہا کہ ہمیں پاکستان کا تحفظ زیادہ عزیز ہے اور دفاع وطن کیلئے کسی قربانی سے دریغ نہیں کریں گے۔ انہوں نے حکومت کو متنبہ کیا کہ دہشت گردوں کو پھانسی کے پھندے تک پہنچانے میں لیت و لعل سے کام لیا گیا تو اس کے بھیانک نتائج برآمد ہونگے ۔
وحدت نیوز (ملتان) مجلس وحدت مسلمین پاکستان کے مرکزی سربراہ علامہ ناصرعباس جعفری نے کہا ہے کہ دہشت گردوں کے خلاف مربوط فوجی اور انٹیلی جنس آپریشن کی ضرورت ہے، حکومت سمیت بعض سیاسی جماعتیں نان ایشوزکو اُٹھاکرقوم کی یکسوئی کہ سبوتاژ کررہی ہیں ، مذہبی جماعتیں اپنے اندر موجود تکفیری عناصر سے چھٹکارا حاصل کریں ۔ سانحہ پشاور دہشت گردوں کے ساتھ مذاکرات کا طویل ڈرامہ رچانے کا نتیجہ ہے۔ ان خیالات کا اظہار اُنہوں نے ملتان میں صوبے بھر کے عہدیداران کی تین روزہ تربیتی ورکشاپ اور بعدازاں پریس کانفرنس سے خطاب کرتے ہوئے کیا۔ اس موقع پر مجلس وحدت مسلمین شعبہ تربیت کے مرکزی سیکریٹری علامہ احمد اقبال رضوی،مرکزی سیکریٹری سیاسیات ناصرشیرازی، علامہ اقتدار نقوی، علامہ حسن رضا ہمدانی، علامہ غلام مصطفی انصاری، علامہ اصغر عسکری، علامہ عسکری الہدایت، علامہ قاضی نادر حسین علوی، اسد عباس نقوی، محمد عباس صدیقی، سید دلاور عباس زیدی، زاہد حسین مہدوی سمیت دیگر رہنما بھی موجودتھے۔ علامہ ناصر عباس جعفری کا مزید کہنا تھا کہ سانحہ پشاور سفاکیت ، بربریت اور ظلم کی انتہا ہے، جس معاشرے میں پانچ سالہ بچے کو بیدردی سے گولیاں ماری جائیں، مستقبل کے معماروں کو ذبح کیا جائے اور معلمہ کو پٹرول چھڑ ک کر آگ لگائی جائے یہ اُس ریاست کے حکمرانوں کے لیے ڈوب مرنے کا مقام ہے۔
اُنہوں نے مزید کہا کہ پاکستان اس وقت حالت جنگ میں ہے اور ان غیر معمولی حالات میں حکمرانوں اور عسکری قیادت کو غیرمعمولی فیصلے کرنا ہوں گے۔ ہمیں پاکستان کی عدالتوں سے انصاف کی توقع نہیں لہذافوجی عدالتوں کے قیام کا خیر مقدم کرتے ہیں اور اُمید کرتے ہیں کہ فوجی عدالتیں دہشت گردوں کو کیفرکردار تک پہنچائیں گی۔ اُنہوں نے پنجاب حکومت کی کارکردگی کو تنقید کا نشانہ بناتے ہوئے کہا کہ جنوبی پنجاب بھی دہشت گردی کا گڑھ بن چکا ہے اور ملک کے مختلف حصوں میں دہشت گردانہ کاروائیاں بھی یہیں سے ہوتی ہیں ، ہمیں شہباز حکومت سے کسی طور پر خیر کی توقع نہیں ہے کیونکہ پنجاب حکومت کے دہشت گردوں کے ساتھ سیاسی روابط تھے ۔ ایک سوال کے جواب میں علامہ ناصر عباس کا کہنا تھا کہ پاکستان میں موجودتمام مدارس ہر گز دہشت گردی میں ملوث نہیں ، قلیل تعداد میں موجود ایسے مدارس جو دہشت گردی اورفرقہ واریت کو سپورٹ کرتے ہیں ان کے خلاف بھرپور کاروائی ہونی چاہیے اور اُمت کو نقصان پہنچانے والی مساجد کا بھی سختی سے نوٹس لیا جانا چاہیے۔ اُنہوں نے میڈیا، عوام، دانشوروں اور اہل علم ودانش سے بھی گزارش کی کہ وہ دہشت گردی ، تکفیریت اور فرقہ پرستی کے خلاف اپنا کلیدی کردار ادا کریں۔
وحدت نیوز (کراچی) مجلس وحدت مسلمین کراچی ڈیژن کے ڈپٹی سیکرٹری جنرل علامہ مبشر حسن نے وحدت سیکرٹریٹ سولجر بازار میں میں علاقائی زمہ داروں اور کارکنان سے خطاب کرتے ہوئے کہا کہ کل تک اہل تشیع کے دشمن اہل تشیع کو تنہا کرنے اور نفرت کا نمونہ بنانے کے درپے تھے آج وہ خود نفرت کا نمونہ بن چکے ہیں اور تنہائی کا شکار ہو گئے ہیں۔ انہوں نے کہا کہ آج طالبان کے حامی ہر طرف منہ چھپاتے پھر رہے ہیں اور اہل بیت کے حامی اور پیروکار سرخرو اور سر بلند ہیں۔ انہوں نے سانحہ پشاور کے مظلوم شہداء کی عظمت پر روشنی ڈالتے ہوئے کہا کہ اس واقعہ نے ایک بار پھر یزیدیت کی تصویر پیش کر دی ہے، آج ہر محب وطن اور اسلام کا حقیقی پیروان دہشت گردوں طالبان، داعش ،لشکر جھنگوی سے نفرت کرتا ہے۔ انہوں نے کہا کہ پوری قوم پاک فوج کے ساتھ ہے لہذا پاک فوج ملک بھر سے دہشت گردوں کا صفایا کر دے تاکہ ملک میں امن و امان قائم ہو سکے اور ملک دوبارہ خوشحالی کے راستے پر گامزن ہو سکے۔
اس موقع پر ان کے ہمراہ حیدر زیدی،ناصر حسینی ،سمیت دیگر رہنما بھی موجود تھے۔ان کا مزید کہنا تھا کہ اب وقت آچکا ہے کہ لیت ولعل سے کام لینے کی بجائے مجرموں کو بے نقاب کیا جائے۔ طالبان اور داعش اسلام اور عوام کے دشمن ہیں۔جن کے خلاف فوج کو ملک بھرمیں آپریشن کرنے کی ضرورت ہے۔انہوں نے کہا کہ جو دہشت گردوں کے حامی ہیں انہیں شامل تفتیش کیا جائے،اور بے گناہ انسانوں کے قتل کا فتویٰ جاری کرنے والوں کو بھی تختہ دار پر لٹکایا جائے۔
