وحدت نیوز (اسلام آباد) اتحاد بین المسلمین کے عظیم داعی، فرزند امام خمینی، معروف مذہبی رہنماء اور شہید قائد ملت جعفریہ پاکستان علامہ سید عارف حسین الحسینی کی 25 ویں برسی کے موقع پر مجلس وحدت مسلمین پاکستان کے مرکزی سیکریٹری جنرل علامہ راجہ ناصر عباس جعفری کی ہدایت پر ایم ڈبلیو ایم کے تحت ملک کے مختلف اضلاع و یونٹس میں تعزیتی اور دعائیہ تقریبات کے انعقاد کا سلسلہ جاری ہے۔ اس سلسلے میں ایم ڈبلیو ایم کے تحت علامہ سید عارف حسین الحسینی کی برسی کی مناسبت سے مرکزی ملک گیر اجتماع 8 ستمبر کو اسلام آباد میں منعقد ہوگا۔ جس میں پاکستان و بیرون ملک سے شہید علامہ عارف حسین الحسینی کے عقیدت مندان لاکھوں کی تعداد میں شرکت کرینگے۔ اس حوالے سے مرکزی سیکریٹری امور فرہنگ علامہ اعجاز حسین بہشتی کی سربراہی میں کمیٹیاں بھی قائم کر دی گئیں، جو برسی کے امور کو دیکھیں گی۔ واضح رہے کہ اس سے قبل یہ پروگرام 25 اگست کو منعقد کیا جانا تھا تاہم مرکزی کابینہ کے اجلاس میں اس پروگرام کی تاریخ میں تبدیلی کی گئی ہے اور اب یہ پروگرام مقررہ تاریخ پر پوری شان و شوکت کے ساتھ منعقد ہوگا۔

وحدت نیوز (اسلام آباد ) بلوچستان کے ضلع بولان میں عیدمنانے جانے والے مزدوروں کا بہیمانہ قتل شرمناک فعل ہے ، اس کی جتنی مزمت کی جائے کم ہے ، ہماری سول اور ملٹری لیڈر شپ شتر مرغ کی مانند منہ زمین میں دے کہ یہ نہ سمجھیں کہ پاکستان کا استحکام ، پاکستان کی اسا س ، پاکستان کا وجود ، یایہ لوگ خود ان سفاک دہشت گردوں سے محفوظ ہیں ۔اتنے خون خرابے کے بعد پاکستان کے تمام بااختیار اداروں کے ذمہ داروں کو ہوش میں آجانا چاہیئے ۔ پروکسی وار پروکسی وار کا راگ الاپنے والے بتائیں بلوچستان کے سہرا میں شہید ہو نے والے یہ بیگناہ مزدورکن ممالک کی پروکسی وار کے نتیجے میں مارے گئے ؟ ان خیالات کا اظہار مجلس وحدت مسلمین پاکستان کے سربراہ علامہ راجہ ناصر عباس جعفری نے وحدت ہاؤس جاری اپنے مذمتی بیان میں کیا ۔

ان کا کہنا تھا کہ بلوچستان سمیت پو رے پاکستان میں کہیں بھی فرقہ واریت نہیں ہے ، بلکہ یہ ایک منظم دہشت گردی ہے ، جس کا مقصد پاکستان کو بین الاقوامی سطح پر ایک سکیورٹی اسٹیٹ قرار دلوانا ہے ، کبھی یہ درندہ صفت دہشت گرد مذہب کے نام پر بیگناہوں کا قتل عام کر تے ہیں تو کبھی زبان کو بنیاد بنا کر سر تن سے جدا کیئے جاتے ہیں ، پاکستان میں درندگی کی وہ مثالیں قائم کی گئیں ہیں جن کی نظیر تاریخ بشریت میں کم ہی ملتی ہیں ، جس قدر بربر یت کا مظاہرہ یہ دہشت گرد کر رہے ہیں ہمارے ، فوجی اور سول ادارے انہیں اس قدر ہی چھوٹ فراہم کر ہے ہیں ۔ غریب عوام کے ٹیکس پر پلنے والی فوجی اور سول لیڈر شپ کا کام صرف ملک کی تباہی اوربربادی کا تماشہ دیکھنا ہے ۔

ان کا کہنا تھا کہ ٹی وی ٹاک شوز میں آکر پاکستان میں جاری دہشت گردی کو دو پڑوسی ممالک کی پروکسی وار کا ٹائٹل دینے والے اینکر پرسنزاور نام نہاد سیاسی رہنماء پاکستانی قوم کو بتائیں کہ بلوچستان کے سہرا میں شہید ہو نے والے یہ بیگناہ 15مزدورکن پڑوسی ممالک کی پروکسی وار کے نتیجے میں مارے گئے ؟دہشت گردوں کی شناخت کے باوجود ان کے خلاف کوئی کاروائی نہ کر نا انتہائی افسوسناک پہلو ہے ، ایسا محصوص ہو تا ہے کہ اس ملک کو دہشت گردوں کے ہاتھوں ٹھیکے پہ دے دیا گیا ہے ۔ان کا مزید کہنا تھا کہ ہم نے ہمیشہ دہشت گردی کی مذمت اور دہشت گردوں کو بے نقاب کیا ہے ہم یہ کام دینی وظیفہ سمجھ کر انجام دیتے رہیں گے ، کیوں کے ہم ہر مظلوم کے حامی اور ہر ظالم کے دشمن ہیں ۔

وحدت نیوز (بلتستان)  مجلس وحدت مسلمین پاکستان بلتستان ڈویژن کے سیکرٹری جنرل علامہ آغا علی رضوی نے چلاس میں دہشت گردوں کے ہاتھوں سکیورٹی اداروں کے اعلٰی افسران پر حملے، جس میں ایس پی دیامر سمیت پاکستان آرمی کے ایک کرنل اور کیپٹن کے علاوہ دیگر دو سپاہیوں کی شہادتوں پر شدید الفاظ میں مذمت کرتے ہوئے کہا کہ چلاس میں وطن عزیز پاکستان کے سکیورٹی اداروں کے اعلٰی افسران پر بہیمانہ حملہ اور شہادتیں دراصل پاکستان کی سالمیت پر حملہ ہے اور وطن عزیز کے حساس اداروں کے افسران کا قتل ناقابل برداشت جرم ہے، یہ قتل بھی گذشتہ سانحات پر سرد مہری اور دہشت گردوں کو کھلی چھوٹ دینے کا نتیجہ ہے۔ انہوں نے کہا کہ گذشتہ افسوسناک سانحات میں ہم چیخ چیخ کر پاکستان آرمی سے بھی مطالبہ کرتے رہے کہ ان دہشت گردوں اور قاتلوں کا گھیرا تنگ کیا جائے لیکن افسوس ایسا نہیں ہوا۔ سکیورٹی ادارے سانحہ چلاس، سانحہ کوہستان، سانحہ بابوسر اور سانحہ نانگا پربت کے مجرمین پر ہاتھ ڈالنے میں خوف محسوس کرتے رہے بلکہ دہشت گردوں کی پشت پناہی حکومت کی طرف سے ہوتی رہی، نتیجہ میں آج یہ دہشت گرد اتنے جری ہوگئے ہیں کہ پاکستان آرمی کے افسران کو بھی خون میں نہلایا جا رہا ہے۔

ایم ڈبلیو ایم کے رہنما کا کہنا تھا کہ یہ دہشت گردو ٹولہ امریکہ اور اسرائیل کا زرخرید غلام ہے اور ان کا یہ اقدام وطن عزیز کے سکیورٹی اداروں کو تباہ کرنے کی امریکی سازش ہے۔ ان کا کہنا تھا کہ اب بھی میں سکیورٹی اداروں سے مطالبہ کرتا ہوں کہ وطن عزیز کے حساس علاقوں بالخصوص گلگت بلتستان سے امریکی تنظیموں کو نکال باہر کریں تو آدھا مسئلہ حل ہوجائے گا۔ علامہ آغا علی رضوی کا مزید کہنا تھا کہ جب تک دہشت گردوں کے خلاف کمر توڑ آپریشن کرکے امریکی ڈالروں پر پلنے والے دہشت گردوں اور تکفیری ٹولوں، اسلام و پاکستان کے دشمنوں کا قلع قمع نہیں کیا جاتا نہ پاکستان آرمی محفوظ رہے گی اور نہ پاکستان۔ ضرورت اس امر کی ہے کہ سکیورٹی اداروں میں موجود کالی بھیڑیوں کو الگ کریں اور تمام ادارے اور عوام مل کر دہشت گردوں کے خلاف اٹھ کھڑے ہوں۔

وحدت نیوز (اسلام آباد)  مجلس وحدت مسلمین کے مرکزی سیکرٹری جنرل علامہ ناصر عباس جعفری (حفظ اللہ ) نے علامہ مظہر حسین کاظمی اور علامہ احمد اقبال رضوی کو اپنی کابینہ میں شامل کرلیا ہے۔ ایم ڈبلیو ایم کی مرکزی کابینہ کا اجلاس رات گئے اسلام آباد میں جاری رہا، جس میں علامہ احمد اقبال رضوی شعبہ تربیت جبکہ علامہ مظہر حسین کاظمی شعبہ تعلیم کے مسئول بنا دیئے گئے۔

 اجلاس میں علامہ ناصر عباس جعفری، علامہ اعجاز حسین بہشتی، علامہ ابوذر مہدوی، ناصر عباس شیرازی، علی مہدی، علامہ مبارک موسوی، علامہ مظہر حسین کاظمی اور علامہ احمد اقبال رضوی ۔ ملک اقرار حسین سمیت دیگر کابینہ کے ممبران شریک تھے۔

مرکزی کابینہ کے اجلاس میں فیصلہ کیا گیا کہ برسی قائد شہید علامہ عارف حسین الحسینی کا اسلام آباد میں منعقد ہونے والا ملک گیر اجتماع 25 اگست کے بجائے آٹھ ستمبر کو منعقد کیا جائے گا۔ اس حوالے سے کمیٹیاں بھی قائم کر دی گئیں، جو برسی کے امور کو دیکھیں گی۔ اجلاس میں گذشتہ ماہ کی کارکردگی کا جائزہ لیا گیا اور آئندہ کا لائحہ عمل ترتیب دیا گیا۔