وحدت نیوز(اسلام آباد) مجلس وحدت مسلمین کے سربراہ علامہ ناصرعباس جعفری نے کہا ہے کہ دھاندلی کے نتیجے میں قائم ہونے والی مسلم لیگ نواز کی حکومت ہر محاذ پر ناکام ہوچکی ہے، کہیں پر بھی حکومت کی رٹ نظر نہیں آتی، ٹارگٹ کلنگ اور فرقہ وارانہ قتل و غارت کے نتیجے میں بے گناہ مسلمانوں کا خون بہہ رہا ہے، توہین اہلبیت ؑ کے ذمہ داروں کے خلاف کارروائی میں جان بوجھ کر تاخیر ی حربے استعمال کئے جا رہے ہیں، وہ عدلیہ جس نے توہین عدالت کے نتیجے میں دو وزراء اعظم کو ہٹا دیا، توہین اہلبیت ؑ پر مکمل خاموش ہے۔ ان خیالات کا اظہار انھوں نے اسلام آباد میں سنی اتحاد کونسل کے سربراہ صاحبزادہ حامد رضا کے ساتھ مشترکہ پریس کانفرنس سے خطاب کرتے ہوئے کیا۔ انھوں نے کہا کہ وفاقی اور پنجاب حکومت سمیت اعلٰی عدلیہ عوام کو انصاف فراہم کرنے کی بجائے دہشتگردوں کی پشت پناہی کر رہی ہیں۔ ان کا کہنا تھا کہ ہم طالبان کے ساتھ مذاکرات کے مخالف ہیں، جب تک دہشتگردوں کا خاتمہ نہیں ہوجاتا ملک میں امن قائم نہیں ہوسکتا، ہم عمران خان کے اس موقف کو رد کرتے ہیں کہ طالبان کے خلاف کارروائی سے بلوچستان ہم سے الگ ہوجائیگا۔ علامہ ناصر عباس نے کہا کہ ٹارگٹ کلنگ اور فرقہ وارانہ تشدد کے خلاف یکم جون کو کراچی میں احتجاج کیا جائے گا۔ انھوں نے پنجاب حکومت کی جانب سے بے گناہ لوگوں کو بےجا تنگ کرنے اور جھوٹے مقدمات میں پھنسا کر ظلم اور بربریت کرنے پر پنجاب حکومت اور رانا ثناءاللہ کو تنبیہ کی کہ وہ منفی ہتھکنڈوں سے باز رہیں۔

پریس کانفرنس سے خطاب کرتے ہوئے صاحبزادہ حامد رضا نے کہا کہ اعلٰی عدالتوں میں جب تک پی سی او ججز بیٹھے ہیں، انصاف کی فراہمی ناممکن ہے۔ ان کا کہنا تھا کہ موجودہ حکومت عوام کو انصاف فراہم کرنے میں مکمل ناکام ہوچکی ہے، ان کی تمام پالیساں عوام اور ریاست کے خلاف ہیں، انہوں نے کہا کہ وزیراعظم کا دورہ بھارت ان کی ناکامی کا منہ بولتا ثبوت ہے، وزیراعظم نے اپنے دورہ کے موقع پر مسئلہ کشمیر کا ذکر تک نہیں کیا اور نہ ہی بلوچستان میں انڈیا کی مداخلت پر بات کی۔ حمزہ شہباز کو طالبان کی جانب سے دھمکیوں کے حوالے سے ان کا کہنا تھا کہ یہ میاں برادران اور مسلم لیگ نواز کا کا ڈرامہ ہے، وہ خود طالبان کی سرپرستی کرتے ہیں، ان کو طالبان کیسے دھمکی دے سکتے ہیں۔ چوہدری نثار ہر مشکل وقت میں منظر سے غائب ہوجاتے ہیں، اس وقت بھی جب طالبان کے ساتھ مذاکرات ناکام ہوچکے تو چوہدری نثار منظر سے غائب ہوگئے ہیں، انہیں چاہیے کہ وہ منظر پر آکر عوام کو حقیقت سے آگاہ کریں۔ انھوں نے بری امام کی قبر مبارک کو مسمار کرنے کی مزموم کوشش کی مذمت کرتے ہوئے کہا کہ قبر مبارک مسمار کرنے سے باز رہا جائے۔

وحدت نیوز(کراچی) یکم جون کو وزیر اعلیٰ ہاؤس کی جانب لبیک یاحسین ؑ مارچ کرکے خانوادہ شہداء سے عہد وفا نبھائیں گے، شیعہ ٹارگٹ کلنگ کے خلاف حکومت سندھ کی خاموشی کو توڑنے کے لئے وزیراعلی ہاؤس کا گھیراؤ کیا جائیگا، وزیراعلیٰ سندھ قائم علی شاہ کراچی میں امن و امان کے قیام میں مکمل ناکام ہوچکے ہیں۔ ان خیالات کا اظہار مجلس وحدت مسلمین کراچی کے مرکزی رہنما علامہ اعجاز بہشتی اور علامہ مبشر حسن نے ایم ڈبلیو ایم کراچی کی ڈویژنل شوریٰ کے اجلاس سے خطاب میں کیا۔ اجلاس میں حسن ہاشمی، میثم عابدی، علامہ علی انور جعفری، علی حسین نقوی، انجینئر رضا نقوی، مدثر حسین، ذیشان حیدر، آصف صفوی، ناصر حسینی سمیت مجلس وحدت مسلمین کراچی کے اضلاع کے عہدیداران نے شرکت کی۔ اس موقع پر علامہ اعجاز حسین بہشتی کا کہنا تھا کہ یکم جون کو وزیراعلیٰ ہاؤس کی جانب لبیک یاحسین ؑ مارچ کرکے خانوادہ شہداء سے عہد وفا نبھائیں گے، یکم جون کالعدم جماعتوں کے تکفیری دہشت گردوں اور سیاسی طالبان کے ہاتھوں شہید ہونے والوں کے ساتھ تجدید عہد کا دن ہے، ملت جعفریہ اپنے شہداء کے پاک لہو سے اپنی وفا کے اظہار کرنے کیلئے وزیراعلیٰ ہاؤس کے گھیراؤ میں بھرپور شرکت کرے گی۔

علامہ مبشر حسن نے کہا کہ شیعہ نسل کشی کے خلاف حکومت سندھ کی خاموشی کو توڑنے کے لئے وزیراعلی ہاوس کا گھیراو کیا جائیگا۔ ان کا کہنا تھا کہ گذشتہ چھ سالوں سے سندھ میں پیپلز پارٹی حکومت کر رہی ہے اور ان چھ سالوں میں ہزاروں شیعہ ٹارگٹ کلنگ اور دہشت گردی کا نشانہ بنے، ہر بار باور کروانے کے باوجود حکومت سندھ نے کوئی اقدامات نہیں کئے لہذا اس بار فیصلہ کن احتجاج کیا جائیگا، گذشتہ کئی سالوں کی طرح رواں سال بھی کراچی میں منظم سازش کے تحت شیعہ مسلمانوں کی ٹارگٹ کلنگ کی جارہی ہے، ٹارگٹ کلنگ میں ملوث دہشت گرد اور ان کی آماجگاہیں محفوظ جبکہ شہری عدم تحفظ کا شکار ہیں، ہمارے حکمران جو عوام کے نمائندئے کہلاتے ہیں عوام کو تحفظ فراہم کرنے میں ناکام ہوچکے ہیں، اگر یہ حکمران عوام کی جان مال و عزت کی حفاظت نہیں کرسکتے تو وہ عوام کو روٹی کپڑا اور مکان کیسے دیں گے، ان حکمرانوں کو اب عوامی اسمبلیوں میں نہیں بلکہ اپنے گھروں میں جانا ہوگا۔

وحدت نیوز(اسلام آباد) پاکستان پر خدا کی خاص نعمتوں کا نزول ہے، ایٹمی قوت کا حصول بھی کسی نعمت خدا وندی سے کم نہیں ، حکمرانوں نے ہمیشہ کفران نعمت کیا ،اسلامی دنیا کی واحد ایٹمی طاقت پاکستان کو عالمی استعماری قوتوں کی سازشوں کا ڈٹ کر مقابلہ کرنا چاہیئے ،فوج اپنے محب وطن عوام پر بھروسہ کرے، دشمن کے دانت کھٹے کرنے کا ہنر پاکستانی عوام اور پاک فوج بخوبی جانتے ہیں ، ایٹمی اساسے پاک فوج کے محفوظ ہاتھوں میں ہیں ، حکمران سیاسی جماعتیں اپنی ایٹمی حیثیت کو پہچانیں ان خیالات کا اظہار مجلس وحدت مسلمین پاکستان کے مرکزی سیکریٹری جنرل علامہ راجہ ناصرعباس جعفری نے یوم تکبیر پر مرکزی سیکریٹریٹ سے جاری اپنے بیان میں کیا۔

ان کا کہنا تھا کہ 28مئی 1998کا دن تاریخ میں روز روشن کی طرح عیاں ہے، بھارتی جارحیت کے منہ توڑ جواب میں پاکستان کی جانب سے ایٹمی دھماکوں نے عالم اسلام کا سر فخر سے بلند کر دیا، ذوالفقارعلی بھٹو کا ایٹمی پروگرام پاکستان کی ترقی وخوشحالی کے لئے تھا لیکن موجودہ حکمرانوں نے اس نعمت کا کفران کیا، مسلم لیگ نون ہو یا پیپلز پارٹی کسی نے بھی پاکستان کو ایک طاقتور ،خودمختار اور با صلاحیت مملکت کی حیثیت سے دنیا کے سامنے متعارف کروانے کی کبھی کوشش نہیں کی ، ہمارے حکمران ہمیشہ عالمی قوتوں کے دروازوں پر خالی کشکول لیئے نظر آتے رہے، ذرمبادلہ کے ذخائرمیں اضافے کے لئے ہمیں بیرونی خیرات کی ضرورت رہی،اسلامی دنیا کی واحد ایٹمی طاقت استعماری طاقتوں کے سامنے کشکول تھامے کھڑی رہے یہ باعث شرم ہے، ایٹمی طاقت کے حصول کا مطلب فقط ایٹم بم کا مالک ہونا نہیں ہوتااس ایٹمی قوت سے ہمارے حکمران پاکستان کو درپیش توانائی کے مسائل کا حل تلاش کر سکتے تھے، یہی ایٹمی قوت ہمارے ملک کی عوام کی خوشحالی اور ترقی میں معاون ثابت ہو سکتی تھی لیکن بد نیت حکمرانوں نے اس عظیم ایٹمی قوت کو ریاست، اداروں اور عوام پر بوجھ بنا کر چھوڑ دیا، آج ہمیں اپنی ایٹمی اساسوں کے صحیح سمت میں استعمال کی ضرورت ہے، گو کہ ہمارے ایٹمی اساسے پاک فوج کے محفوظ ہاتھوں میں ہیں لیکن عوام کو درپیش چیلنجز سے نپٹنے کے لئے ہماری ایٹمی طاقت مددگار ثابت ہوسکتی ہے ۔

وحدت نیوز(کوئٹہ) مجلس وحدت مسلمین بلوچستان کی صوبائی کابینہ کا اہم اجلاس علامہ مقصود علی ڈومکی کی زیر صدارت کوئٹہ میں منعقد ہوا۔ اجلاس میں ضلعی ڈپٹی سیکرٹری جنرل مولانا سید ظفر عباس شمسی، صوبائی سیکرٹری مولانا برکت علی مطہری، صوبائی سیکرٹری فلاح و بہبود مولانا سہیل اکبر شیرازی، صوبائی سیکرٹری مولانا محمد علی جمالی، صوبائی سیکرٹری نشر و اشاعت مولانا ذوالفقار علی سعیدی شریک تھے۔ اس موقع پر صوبے کی تنظیمی صورتحال اور آئندہ کے لائحہ عمل پر غور کیا گیا۔ اجلاس میں فیصلہ کیا گیا کہ آئندہ ماہ صوبائی کابینہ بلوچستان کا تفصیلی دورہ کرے گی۔ اجلاس میں شعبہ مالیات اور شعبہ فلاح بہبود سے متعلق امور پر تبادلہ خیال کے بعد ترجیحی مقامات پر مساجد کی تعمیر کا فیصلہ کیا گیا۔ اس موقع پر سبی، ڈیرہ بگٹی، لسبیلہ، جعفر آباد، نصیر آباد، جھل مگسی، صحبت پور اور ضلع کچھی بولان کے وفود نے صوبائی کابینہ کو اپنے مسائل سے آگاہ کیا، صوبائی کابینہ نے ان مسائل کے حل کے حوالہ سے اہم فیصلے بھی کئے۔