The Latest
وحدت نیوز(حیدرآباد) بلوچستان کے شہر مستونگ میں طالبان دہشت گردوں کی جانب سے ایران سے آنے والے زائرین کی بس پر حملے کے خلاف حیدرآباد میں مجلس وحدت مسلمین کی جانب سے پریس کلب حیدآبادکے سامنے احتجاجی مظاہرہ اور حیدرآباد ہائی وے پر دھرنا دیا گیا جو تاحال جاری ہے۔ احتجاجی مظاہرے اور دھرنے سے خطاب کرتے ہوئے مجلس وحدت مسلمین حیدرآباد کے سیکریٹری جنرل علامہ امدادنسیمی نے کہا کہ ملک بھر میں جو حالات چل رہے ہیں وہ کسی سے چھپے ہوئے نہیں ہیں، نااہل حکومت ان اسلام و پاکستان دشمن طالبان دہشت گردوں کو لگام دینے میں ناکام ہو چکی ہے۔ انہوں نے کہا کہ حکومت دہشت گردوں کی سرپرستی کر رہی ہے یہی وجہ ہے کہ گزشتہ دنوں بلوچستان، کراچی سمیت ملک بھر میں دہشت گردی کے واقعات میں اضافہ ہوا ہے۔
علامہ امداد نسیمی نے کہا کہ امریکا سمیت بیرونی قوتیں پاکستان کو غیر مستحکم کر رہی ہیں لیکن پاکستان سے محبت کرنے والے لوگ دہشت گردوں کو اانکے ناپاک عزائم میں کامیاب ہونے نہیں دیں گے۔ انہوں نے کہا کہ ملک نازک موڑ پر ہے ہمیں، اتحاد کے دامن کو ہاتھ سے نہیں چھوڑنا چاہئے، انشاء اللہ سنی شیعہ مسلمان اپنے اتحاد کے ذریعے ماضی کی طرح اس بار بھی تکفیری دہشتگردوں کی اسلام و پاکستان دشمن سازشوں کو ناکام بنا دیں گے۔ انہوں نے مزید کہا کہ پاکستان میں فرقہ واریت پھیلانے میں عالمی استعمار امریکا اور اسکے حواری سر گرم ہیں۔ علامہ امداد نسیمی کا کہنا تھا کہ کراچی میں آپریش ہو رہا ہے تو دوسری جانب ٹارگٹ کلنگ بھی ہو رہی ہے، آخر اس میں کون لوگ ملوث ہیں جنہیں گرفت میں نہیں لایا جا سکا۔ انہوں نے کراچی و سانحہ مستونگ میں ملوث دہشت گردوں کی گرفتاری اور پاکستان بھر میں دہشتگردوں کے خلاف فی الفور فوجی آپریشن کا مطالبہ کیا۔
وحدت نیوز(اسلام آباد) سانحہ مستونگ کے خلاف اور خانوادہ شہداء سے اظہار یکجہتی کے لیے فیض آباد انٹر چینج پر احتجاجی دھرنے سے مجلس وحدت مسلمین کے مرکزی ڈپٹی سیکرٹری جنرل علامہ امین شہیدی نے حکومت سے مطالبہ کیا کہ حکومت دہشتگردوں کے خلاف آپریشن شروع کرے، آپریشن کے اعلان کے بعد ہی دھرنا ختم ہوگا۔ نواز شریف کو خود کوئٹہ جانا چاہیے تھا۔سانحہ مستونگ بربریت کی ہو لناک داستان ہے، حکمرانوں نے دہشت گردوں کے سامنے ہتھیار ڈال دیئے ہیں ، چیف آف آرمی اسٹاف جنرل راحیل شریف دہشت گردوں کے خلاف گرینڈ آپریشن کے لئے کمر کس لیں اٹھارہ کروڑ عوام اپنی جانوں کی پر وا کیئے بغیر ان کے شانہ بشانہ کھڑی ہے۔
علامہ امین شہیدی نے کہا کہ ریاست کے پاس آپریشن کے علاوہ کوئی آپشن نہیں ہے۔ انھوں نے حکومت کو کڑی تنقید کا نشانہ بناتے ہوئے کہا کہ آپریشن نہیں کرنا تو حکومت پلیٹ میِں رکھ کر دہشتگردوں کے حوالے کردی جائے۔ ان کا کہنا تھا کہ دہشتگرد صرف طاقت کی زبان سمجھتے ہیں جبکہ سیاسی جماعتوں نے مذاکرات کے نام پر دہشتگردوں کے آگے گھٹنے ٹیک دیئے ہیں۔ علامہ امین شہیدی نے کہا کہ آپریشن کا اعلان نہ ہوا تو دھرنا مہینوں جاری رہے گا۔ آپریشن کے اعلان کے بعد ہی دھرنا ختم ہوگا۔ انہوں نے حکومت سے مطالبہ کیا کہ حکومت دہشتگردوں کے خلاف آپریشن شروع کرے۔ علامہ امین شہیدی نے کہا کہ چوہدری نثار اور پرویز رشید کا کوئٹہ جانا کافی نہیں ہے۔ نواز شریف کو خود کوئٹہ جانا چاہیے تھا۔ اس سے پہلے سنی اتحاد کونسل کے وفد نے چیئرمین حامد رضا کی قیادت میں دھرنے میں شرکت کی اور مظاہرین سے اظہار یکجہتی کیا۔
وحدت نیوز(اسلام آباد) چوہدری نثارعلی خان ملکی تاریخ کے نااہل ترین وزیر داخلہ ہیں ،نواز لیگ نے پاکستان کو دہشت گردوں کے رحم و کرم ہر چھوڑ دیا ہے ، سانحہ مستونگ میں بے گناہ خواتین ، بچوں ، جوانوں اور بزرگوں کی شہادتوں پر دل خون کے آنسو رورہا ہے، مٹھی بھر تکفیری ٹولے کو پاکستان کے مظلوم عوا م کو یرغمال بنانے نہیں دیں گے، ان خیالات کا اظہار سنی اتحاد کو نسل کے چیئر میں صاحبزادہ حامد رضا نے سانحہ مستونگ کے خلاف اور خانوادہ شہداء سے اظہار یکجہتی کے لئے مجلس وحدت مسلمین کی جانب سے فیض آباد انٹر چینج پر احتجاجی دھرنے سے شرکائے سے خطاب اور علامہ امین شہیدی کے ہمراہ مشترکہ پریس کانفرنس سے خطاب کر تے ہوئے کیا ، اس موقع پر سنی اتحاد کونسل کے رہنما صاحبزادہ عمار سعید کاظمی، ایم ڈبلیو ایم کے رہنما علامہ اصغر عسکری، علامہ اسرار گیلانی اور دیگر بھی موجود تھے
،
علامہ امین شہیدی کے ہمراہ پریس کانفرنس میں میڈیا کے نمائندگان سے خطاب کر تے ہو ئے صاحبزادہ حامد رضا نے کہا کہ چوہدری نثار کو وزیر داخلہ نہیں مانتے۔ مستونگ میں بے گناہ زائرین پر ظلم کی انتہا کر دی گئی، ان کا کہنا تھا کہ آپریشن شروع نہ ہوا تو گھروں کو واپس نہیں جائینگے، سنی اتحاد کونسل مشکل کی اس گھڑی میں لواحقین شہداء اور مجلس وحدت مسلمین کے شانہ بشانہ کھڑی ہے، جب تک مطالبات منظور نہیں ہو تے ہم بھی گھروں کو نہیں جائیں گے ، وفاقی حکومت کی ناقص حکمت عملی کے بعد پاک فوج دہشت گردوں کے خلاف اپنا کردار ادا کرے۔
وحدت نیوز(ملتان) مجلس وحدت مسلمین پاکستان کے مرکزی سیکرٹری سیاسیات سید ناصر عباس شیرازی نے کہا ہے کہ سانحہ مستونگ کے حوالے سے مجلس وحدت مسلمین نے ملک بھر میں دھرنے اور مظاہرے کر کے اپنا پُرامن احتجاج ریکارڈ کرایا ہے لیکن سندھ حکومت کی جانب سے کھارادار کے دھرنے میں پولیس نے جس طرح لاٹھی چارج اور شیلنگ کی ہے اُس سے سندھ حکومت کی بدنیتی واضح ہوتی ہے۔ ان خیالات کا اظہار اُنہوں نے چوک نواں شہر ملتان میں مجلس وحدت مسلمین اور آئی ایس او کے زیراہتمام احتجاجی دھرنے سے خطاب کرتے ہوئے کیا۔ ناصر عباس شیرازی کا مزید کہنا تھا کہ یہ شہدا کے لہو کی حرارت ہے جس نے اتنی سردی کو بھی شکست دیدی ہے، پاکستان میں ایک مخصوص مائنڈ سیٹ ہے جو اس طرح کی کاروائیاں کر رہا ہے جسے پوری قوم نے بے نقاب کر دیا ہے۔ اس موقع پر ناصر عباس شیرازی نے کراچی میں کھارادار کے مقام پر دھرنے پر فائرنگ اور شیلنگ کے بعد گرفتار نوجوانوں کی فی الفور گرفتاری کا مطالبہ کیا اور حکومت کو متنبہ کیا کہ حکومت ہمارے پُرامن دھرنوں اور مظاہروں کو سیکیورٹی فراہم کرے اگر کہیں نقصان ہوا تو حکومت کی ذمہ داری ہو گی۔
وحدت نیوز(بلتستان) ملک بھر کیطرح بلتستان میں بھی سانحہ مستونگ کیخلاف اور کوئٹہ میں شہداء کے لواحقین کے مطالبات کی منظوری کے لیے بلتستان میں احتجاجی دھرنا جاری ہے۔ تفصیلات کے مطابق مجلس وحدت مسلمین پاکستان بلتستان ڈویژن کے سیکرٹری جنرل علامہ آغا علی رضوی نے تمام شیعیان حیدر کرار (ع) کو احتجاجی دھرنے میں شرکت کی دعوت دی ہے۔ واضح رہے کہ اسوقت اسکردو میں سردی اپنی جوبن پر ہے اور پاکستان میں سب سے زیادہ سردی اسکردو میں ہے، اس کے علاوہ شدید برفباری کا سلسلہ بھی جاری ہے۔ اسکردو کے نشیبی علاقوں میں اب تک دس انچ سے زیادہ برف پڑ چکی ہے۔ جذبہ ایمانی سے سرشار مومنین برف کے فرش پر بیٹھ کر دھرنا دےرہے ہیں ، اور مظلوموں کی حمایت اور ظالموں کے خللاف شعار بلند کر رہے ہیں ۔
وحدت نیوز(فیصل آباد) سنی اتحاد کونسل نے مستونگ میں زائرین کی بس پر ہونے والے حملے اور بیگناہ زائرین کی شہادت کے خلاف مجلس وحدت مسلمین کے دھرنوں کی حمایت کا اعلان کردیا اور کہا ہے کہ حکومت فی الفور دہشتگردوں کے خلاف کارروائی کا باقاعدہ آغاز کرے اور مستونگ میں جاں بحق ہونے والوں کے لواحقین کے مطالبات فوری طور پر تسلیم کئے جائیں، اگر ایسا نہ کیا گیا تو سنی اتحاد کونسل بھی مجلس وحدت مسلمین کے دھرنون میں شامل ہوجائے گی۔
وحدت نیوز(لاہور) گورنر ہاؤس لاہور کے باہر مجلس وحدت مسلمین اورامامیہ اسٹوڈنٹس آرگنائزیشن کے زیراہتمام سانحہ مستونگ اور ملک بھر میں جاری ٹارگٹ کلنگ کے خلاف دھرنا جاری ہے۔ احتجاجی دھرنے میں مظاہرین کی کثیر تعداد شریک ہے، جس میں خواتین اور بچے بھی شامل ہیں۔ مظاہرین پنجاب حکومت اور دہشت گردی کے خلاف نعرے بازی کر رہے ہیں جبکہ رہنماؤں کا کہنا ہے کہ مطالبات کی منظوری تک احتجاجی دھرنا جاری رہے گا۔ مظاہرین سے خطاب کرتے ہوئے رہنماؤں کا کہنا تھا کہ حکومت ملک میں قیام امن میں بری طرح ناکام ہوچکی ہے، ملت جعفریہ کو مسلسل نشانہ بنایا جا رہا ہے جبکہ حکمران سوائے مذمتی بیانات جاری کرنے کے عملی طور پر کچھ بھی نہیں کر رہے۔
دھرنے کے شرکاء سے خطاب میں رہنماؤں کا کہنا تھا کہ ملت تشیع پاکستان کو تحفظ فراہم کیا جائے، کوئٹہ تفتان روڈ پر واقع دہشت گردوں کے تربیتی کیمپوں کو ختم کیا جائے، سانحہ مستونگ کے ملزموں کو گرفتار کرکے کیفر کردار تک پہنچایا جائے۔ رہنماؤں نے کہا ہم مطالبات کی منظوری تک گورنر ہاؤس کے سامنے دھرنا جاری رکھیں گے۔ اس موقع پر دھرنے کے شرکاء لبیک یاحسین (ع)، لبیک یاحسین (ع) کے شعار بلند کرتے رہے۔ مظاہرین نے مال روڈ کو چاروں طرف سے بند کر دیا ہے، اس موقع پر پولیس کی بھاری نفری بھی تعینات ہے اور جامہ تلاشی کے بعد ہی دھرنے کی شرکاء کو آنے کی اجازت دی جا رہی ہے جبکہ پولیس ٹریفک کے لئے مال روڈ کو الحمراء ہال اور دوسری جانب کلب چوک سے بند کر دیا ہے۔
وحدت نیوز(ملتان) سانحہ مستونگ کے خلاف مجلس وحدت مسلمین کے سیکرٹری جنرل علامہ ناصر عباس جعفری کی اپیل پر ملک بھر کی طرح ملتان میں بھی احتجاجی دھرنا جاری ہے۔ ملتان میں سانحہ مستونگ کے خلاف امام بارگاہ زینبیہ سوتری وٹ سے احتجاجی ریلی نکالی گئی، جو چوک نواں شہر پہنچ کر احتجاجی دھرنے میں تبدیل ہوگئی۔ احتجاجی ریلی اور دھرنے کی قیادت مجلس وحدت مسلمین ملتان کے سیکرٹری جنرل علامہ سید اقتدار حسین نقوی، علامہ قاضی نادر حسین علوی، امامیہ اسٹوڈنٹس آرگنائزیشن پاکستان کے مرکزی جنرل سیکرٹری تہور حیدری، محمد عباس صدیقی اور دیگر نے کی۔ دھرنے سے خطاب کرتے ہوئے ایم ڈبلیو ایم کے رہنما علامہ اقتدار نقوی کا کہنا تھا کہ جب تک شہداء کے ورثاء کے مطالبات تسلیم نہیں کیے جاتے ہمارا دھرنا جاری رہے گا، اُنہوں نے مزید کہا کہ جب تک کوئٹہ کے شہداء کی تدفین نہیں ہوجاتی ہمارا دھرنا اور احتجاج جاری رہے گا۔ اس موقع پر مرد، خواتین، بچے، بوڑھے اور جوانوں کی بڑی تعداد موجود ہے۔ دھرنے کے شرکاء کے لیے لنگر، نیاز، چائے اور سوپ کا اہتمام کیا گیا ہے۔
وحدت نیوز(کوئٹہ)ّ سانحہ مستونگ کے خلاف کوئٹہ کے علمدار روڈ پر ہزارہ برادری کی جانب سے شہید ہونے والے افراد کی میتوں کے ہمراہ دھرنے کو چوبیس گھنٹے سے زیادہ ٹائم ہوگیا ہے۔ ہزارہ برادری کے ہزاروں افراد دھرنا دیئے انصاف کی دہائی دے رہے ہیں۔ دھرنے کے شرکاء کا مطالبہ ہے کہ وفاقی نمائندے کے آنے اور ملزموں کے خلاف ٹارگٹڈ آپریشن نہ ہونے تک احتجاج جاری رہے گا۔ سانحہ مستونگ کے خلاف جاں بحق افراد کے اہل خانہ اور ہزارہ برادری کے افراد میتوں کے ہمراہ بدھ کی صبح دس بجے علمدار روڈ کے شہداء چوک پر جمع ہوئے تھے اور وہاں دھرنا دے دیا تھا جو کہ چوبیس گھنٹے گزرنے کے باوجود بھی جاری ہے۔ سانحہ مستونگ میں جاں بحق ہونے والے 28 افراد کی میتیں رکھ کر ان لواحقین اور ہزارہ برادری کے افراد سخت سردی میں کھلے آسمان تلے بیٹھے ہیں۔ دوسری جانب بلوچستان شیعہ کانفرنس کے قائم مقام صدر سید مسرت حسین نے کہا ہے کہ سانحہ مستونگ پر وفاقی حکومت کے ردعمل کا انتظار ہے، ان کا کہنا تھا کہ واقعہ میں ملوث افراد کے خلاف نتیجہ خیز آپریشن ہوگا تو ہی ہم دھرنا ختم ہوگا۔
دیگر ذرائع کے مطابق وزیراعلٰی بلوچستان ڈاکٹر عبدالمالک سانحہ مستونگ کے متاثرین سے اظہار ہمدردی کیلئے شہداء چوک پہنچے۔ انہوں نے دھرنے کے شرکاء سے قیمتی جانوں کے ضیاع پر افسوس کا اظہار بھی کیا۔ بعد ازاں وزیراعلٰی بلوچستان اور ہزارہ کمیونٹی کے درمیان مذاکرات بھی ہوئے۔ مذاکرات کے دوران وزیراعلٰی بلوچستان نے ہزارہ کمیونٹی سے دھرنا ختم کرنے کی اپیل کی۔ ان کا کہنا تھا کہ کوئٹہ کو چاروں طرف سے دہشتگردوں نے گھیر رکھا ہے۔ حکومت کے بس میں جو کچھ ہوا وہ کرے گی۔ ہزارہ کمیونٹی کی جانب سے عبدالخالق ہزارہ نے ڈاکٹر عبدالمالک بلوچ کو تحفظات سے آگاہ کیا اور دہشتگردوں کے خلاف کریک ڈاؤن کا مطالبہ کر دیا۔ دھرنا ختم کرنے کے حوالے سے کوئی فیصلہ نہ ہوسکا۔ ہزارہ کمیونٹی کے نمائندوں کا کہنا تھا کہ مشاورت کے بعد ہی کوئی فیصلہ ہوگا جبکہ مجلس وحدت مسلمین کے مرکزی رہنما اور رکن بلوچستان اسمبلی آغا رضا رضوی نے کہا کہ جب تک وفاقی حکومت کا نمائندہ مذاکرات کیلئے نہیں آئے گا دھرنا جاری رہے گا۔
وحدت نیوز(کراچی) سانحہ مستونگ کے خلاف مجلس وحدت مسلمین اور امامیہ اسٹوڈنٹس آرگنائزیشن کے زیراہتمام کراچی بھر میں پُرامن احتجاجی دھرنوں کا سلسلہ جاری ہے۔ کراچی میں نیشنل ہائی وے ملیر 15، شاہراہ پاکستان انچولی، عباس ٹاؤن، نمائش چورنگی سمیت مختلف علاقوں میں دھرنے دیئے گئے ہیں۔ ایم ڈبلیو ایم ضلع ملیر اور آئی ایس او ملیر و جعفر طیار یونٹ کے زیراہتمام جعفر طیار سوسائٹی ملیر سے ایک احتجاجی ریلی نکالی گئی، جس نے نیشنل ہائی وے ملیر 15 پہنچ کر پُرامن احتجاجی دھرنے کی صورت اختیار کر لی ہے۔ احتجاجی دھرنے میں خواتین اور بچوں سمیت شہریوں کی بڑی تعداد شریک ہے جبکہ دھرنے کے شرکاء مسلسل ماتم داری و سینہ زنی کر رہے ہیں۔ دھرنے میں شریک شہریوں کی بڑی تعداد پاکستان بھر میں جاری سنی شیعہ مسلمانوں کی نسل کشی اور حکومت کے خلاف شدید نعرے بازی کر رہے ہیں۔
احتجاجی ریلی و دھرنے سے ایم ڈبلیو ایم پاکستان کی مرکزی شوریٰ کے سربراہ مولانا شیخ حسن صلاح الدین نے خطاب کرتے ہوئے کہا کہ حکومت فوری طور پر بلوچستان بالخصوص مستونگ، دشت اور اختر آباد کے علاقوں میں دہشتگردوں کے خلاف ٹارگٹڈ آپریشن کرے جبکہ اسلام و پاکستان دشمن طالبان دہشتگردوں کے خلاف ملک بھر میں فوجی آپریشن شروع کیا جائے۔ انہوں نے کہا کہ ملک بھر میں عوام کا قتل عام کیا جا رہا ہے مگر حکومت ان دہشتگردوں کا قلع قمع کرنے کی بجائے ہزاروں پاکستانیوں کے قاتل طالبان دہشتگردوں سے مزاکرات کی بات کر رہی ہے۔ انہوں نے کہا کہ موجودہ حکومت نااہل اور بزدل ہے اگر طالبان دہشتگردوں کے خلاف فوجی آپریشن شروع نہیں کیا جاتا تو عوامی احتجاجی دھرنے اس نااہل حکومت کے اقتدار کو بہا لے جائیں گے۔ شرکاء کا کہنا تھا کہ جب تک شہدائے سانحہ مستونگ کے لواحقین کے مطالبات پورے نہیں کئے جاتے احتجاجی دھرنوں کا سلسلہ جاری رہے گا۔
