وحدت نیوز(لاہور) فلسطینی مظلومین پر ہونے والی وحشیانہ بربریت پر عرب دنیا کی خاموشی مسلم امہ کے لئے لمحہ فکریہ ہے شام، عراق میں مسلمانوں کے خلاف دہشت گردوں کی حمایت اور امداد جبکہ عالم کفر اور یہود و نصاریٰ کی صہیونی ظالم حکمرانوں کی انسانیت سوز ظلم و بربریت پر خاموشی دراصل اس بات کی تصدیق ہے کہ ان عرب بادشاہوں کو مسلمانوں سے زیادہ اسرائیل اور امریکہ کے مفادات عزیز ہیں۔ ان خیالات کا اظہار مجلس وحدت مسلمین پنجاب کے سیکرٹری جنرل علامہ عبدالخالق اسدی نے صوبائی سیکرٹریٹ میں کارکنان کے اعزاز میں دیے گئے افطار ڈنر سے خطاب کرتے ہوئے کیا۔

علامہ اسدی کا کہنا تھا کہ یوم القدس کو پہلے سے زیادہ موثر انداز میں منانا ہر کلمہ گو پر واجب ہے ہم تمام سیاسی مذہبی جماعتوں اور انسانی حقوق کی تنظیموں، سول سوسائٹی کو دعوت دیتے ہیں آئیں اس یوم القدس کو اپنے نہتے مظلوم فلسطینی بھائی بہنوں سے اظہار یکجہتی کریں اور دنیا کا سب سے بڑا دہشت گرد اسرائیل اور اس کا باپ امریکہ کے سیاہ کارناموں کے خلاف آواز بلند کر کے اپنا اخلاقی ودینی فریضہ ادا کریں۔ اُن کا مزید کہنا تھا کہ حکومت پاکستان یوم القدس کو سرکاری سطح پر منانے کا اعلان کرئے اور فلسطین کے مظلومین کو یقین دلائے کہ دنیائے اسلام کی واحد ایٹمی طاقت پاکستان اپنے مظلوم فلسطینی بھائیوں کیساتھ ہیں۔

وحدت نیوز(کراچی) مجلس و حدت مسلمین پاکستان کراچی ڈویثرن کی جانب سے کیتھولک کلب میں دعوت افطار کا اہتمام کیا گیا جس میں ایم ڈبلیو ایم کے سر براہ علامہ راجہ ناصرعباس جعفری نے شرکاء سے خطا ب کرتے ہوئے کہا کہ اگر دشمن کو نہ پہنچانا توناکامی کا سامنا کرنا پڑے گا،ڈاکٹر طاہرالقاری سے روش کار پر اختلاف ہو سکتا ہے، لیکن ظالموں کے مقابلے میں مظلوموں کا اتحاد ناگزیر ہے، اہل سنت نے عزاداری کے دفاع میں ہمیں سپورٹ کیا ہم بھی حقِ وفا نبھائیں گے،شیعہ سنی پاکستان کی اکثریت ہیں جن پرضیائی دور سے امریکی و سعودی ایماء سے اقلیت کو مسلط کرنے کی کوششیں کی گئیں ،امت مسلمہ غزہ کے مظلوموں کے لئے یک زبان ہو، اس موقع پرمرکزی ڈپٹی
سیکر ٹری جنرل علامہ امین شہیدی،علامہ حسن صلاح الدین،علامہ نثا ر قلندری علامہ جعفررضا، علامہ نعیم الحسن،علامہ حسن ہاشمی ،علامہ علی انور اور علی حسین نقوی،انجینئر رضا نقوی ،علی احمر,آصف صفوی سمیت دیگر نے شرکت کی، جس میں پرنٹ اور الیکڑانکس میڈیا سے تعلق رکھنے والے افراد بھی شامل تھے۔ نماز مغربین مولانا حسن صلاح الدین کی اقتدا میں ادا کی گئی۔

علامہ ناصر عباس  نے مزید کہا کہ سوشلز م اور کیپلٹزم کے نظام ناکام ہوچکے ہیں۔ آج کنزیومر ازم کا دور ہے بچے کے بھوک اور رونا بھی کمرشل پراڈکٹ بن چکی ہیں۔ عالمی استکباری قوتیں دنیا میں شراور فساد پھیلار ہی اور تکفیری ٹولہ اسکتباری قوتوں کے پے رول پر کام کررہا ہے۔ اس کا ایک مرکز مصر، ایک مرکز سعودی عرب اور ایک مرکز پاکستان میں ہے یہ دوسرے مسلمانوں کو کافر کہتے ہیں ،القاعدہ، داعش، النصرۃ، لشکر جھنگوی اور جنداللہ ہیں ان عنوانات کے تحت پاکستان اور عالم اسلام میں مختلف مقامات سے جنگجوؤں کولاکر جمع کیا گیا ۔ افغانستان کے مقدس جہاد کو بھی یرغمال بنایا گیا اور اس کو تکفیریوں کے ہاتھوں میں ڈال دیا گیا ۔ شام میں بشار الاسد کی حکومت کو گرانے کے لیے سعودی عرب کے پیٹ میں سب سے زیادہ درد ہوا اور شام میں تیراسی ملکوں کے دہشت گرد کو  لاکر جمع کیا گیا۔ عراق میں نوے فیصد اہلسنت کو تکفیریوں نے شہید کیا، لیکن سعودیہ کو اسرائیل کے خلاف حزب اللہ کی قیادت میں مقاومت اور شام کی حمایت پسند نہیں تھی اوردوہزار چھ میں حزب اللہ نے اسرائیل کو جب مار مار کر اس کے شانے سوجھادیے تھے تو وہ خوف کے مارے اپنی حدود میں دیوار اٹھانے لگا اور نیل اور فرات تک قبضے کی باتیں بھول گیا یہ سب سعودی حکومت کی بنا پر ہوا،ہمارے ملک میں بھی دہشت گردوں کے خلاف جنگ دیر سے شروع کرائی ، نواز شریف کی حکومت نے اس سلسلے میں تاخیر کرکے قاتل کا کردار ادا کیا ، آج جو آپریشن شروع ہوا ہے وہ پورے ملک میں ہوناچاہیے صرف شمالی وزیرستان تک محدود رکھنا ملک کے ساتھ دشمنی ہوگی۔ ہم اس تکفیری گروہ کو اچھی طرح جانتے ہیں۔  سوات میں اپریشن کر کےوزیرستان کو  چھوڑنا ایسا ہی تھا جیسے ثانپ کو زخمی کر کے چھوڑ دینا ۔

ان کا مذید کہنا تھا کہ شہباز شریف کی حکومت بلکل کوفے کے  ابن زیاد کی حکومت کی مثل ہے ۔ اس سال پنڈی میں ہمارے ساتھ  جو ہوا اس میں دعوے سے کہہ سکتا ہوں کہ کسی ایک شیعہ نے بھی کسی دکان کو آگ نہیں  لگائی نہ ہی کوئی شخص کسی شیعہ نے قتل کیا، اس واقعے میں دہشت گرد نہیں بلکہ گولڈ میڈلسٹ  طالب علم  اور گریڈ  14 سے19کے  سرکار ی افسر ان کو بلاجواز گرفتار کیا گیا، اسٹیٹ ورسز شیعہ مقدمہ لڑا گیا ،حکومت نے سردار اسحاق کو شیعہ مکتب کے خلاف کیس لڑنے کے لئے ایک کروڑ روپے دیئے،  پنجاب حکومت کا جانبدارانہ کردار ہے، یہی کچھ ماڈل ٹاؤن سانحے میں ہوئے۔ وہاں پولیس نے قادری صاحب کے دروازے پر جو خواتین تھیں ان کے منہ میں گولیاں ماریں، یہ تکفیری ٹولے کی ہی سوچ ہے جو ماضی کی طرح سے دہشت گردی کررہے ہیں ، یہ پہلے بھی اسی طرح کرتے رہے، پنڈی کے سانحے میں سنی بھائیوں نے ہمارا ساتھ دیا، ہم نے ان سے وعدہ کیا ہم بھی آپ کا ساتھ دیں گے کیونکہ ہم نے وفا حضرت ابولفضل العباس سے سیکھی ہے ، ہم نے  طاہرالقادری صاحب کے دس نکاتی ایجنڈے میں دو اضافی نکات درج کروانے کے لئے دیئے ہیں ، ہم تمام قاتلوں کے خلاف ہیں۔ جب چلاس کا واقعہ ہوا تھا تو ہم نے نو دن تک دھرنا دیا تھا اور کیانی صاحب کو کہا تھا کہ ہم ان قاتلوں کو نہیں چھوڑیں گے۔ان کی ڈوریں اپ کے گھروں تک جاتی ہیں ،  ہم پاکستان میں مارے جانے والے ہر مظلوم کے ساتھ ہیں، جب کوئی  مسجد میں ہے تو مسلمان شیعہ یا سنی ہے، مندر میں ہندو، چرچ میں عیسائی ہیں، لیکن جب باہر ہیں تو ہم پاکستانی ہیں۔ فلسطین میں ہر ساڑھے چار منٹ کے بعد حملہ ہورہا ہے،عرب حکمرانوں کی خیانتوں نے شام ، عراق اور فلسطین کو لہو لہان کر دیا ہے،  انشا اللہ اس سال یوم القدس مثالی ہوگا اور اس میں تمام مکاتب فکر کے لوگوں کو شرکت کرنا چاہیے تاکہ فلسطین کے مظلوموں سے بھرپور اظہار یکجہتی کی جاسکے۔

وحدت نیوز (گلگت) مجلس وحدت مسلمین پاکستان گلگت ڈویژن کے وفد نے سیکرٹری داخلہ گلگت بلتستان ڈاکٹرعطاءالرّحمٰن سے ملاقات کی۔ وفد نے ملاقات کے دوران کہا کہ ضلع دیامرمیں دہشت گردوں کے خلاف آپریشن کی مکمل حمایت اور سکیورٹی فورسز کے ساتھ مکمل تعاون کا اعلان کرتے ہیں۔ دہشت گردوں نے دیامر کو اپنے لیے محفوظ مقام بنا لیا ہے اور ماضی میں ضلع دیامر کی حدود میں سکیورٹی فورسز، مسافروں اور سیاحوں پر حملے کرتے رہے ہیں۔ یہ دہشت گرد کسی قسم کے رحم کے قابل نہیں، ان کے ساتھ آہنی ہاتھوں سے نمٹنا پڑے گا۔ وفد نے سیکرٹری داخلہ کو اس آپریشن کے سلسلے میں اپنی مکمل حمایت کا یقین دلاتے ہوئے کہا کہ آپریشن صرف اور صرف دہشت گردوں کے خلاف ہونا چاہیے، اس آپریشن سے دیامر کے بے گناہ عوام متاثر نہ ہوں اور اس بات کا پورا پورا خیال رکھنا چاہیے کہ اس مبارک مہینے میں کسی بے گناہ کو گرفتار نہ کیا جائے۔

مجلس وحدت مسلمین دیامر میں جہاں دہشت گردوں کے خلاف آپریشن کی مکمل حمایت کرتی ہے، وہاں دیامر کے مظلوم عوام کے ساتھ بھی کھڑی ہے۔ مجلس وحدت مسلمین کے وفد نے سیکرٹری داخلہ کو اسکردو میں ایک نااہل ڈی سی کی جانب سے پیدا کردہ مسائل پر اپنے تحفظات سے آگاہ کرتے ہوئے مطالبہ کیا کہ صوبائی انتظامیہ واقعے کا نوٹس لیکر علاقے میں بدامنی پھیلانے میں ملوث کرداروں کو بے نقاب کرے اور ان کے خلاف کاروائی عمل میں لائی جائے۔ وفد نے گرفتار بے گناہ ضعیف العمر اور کم سن بچوں پر انسداد دہشت گردی ایکٹ کے تحت مقدمات درج کرنے پر سخت احتجاج کرتے ہوئے کہا کہ دہشت گردی ایکٹ کے تحت قائم مقدمات کو ختم کیا جائے۔ سیکرٹری داخلہ نے وفد کو یقین دلایا کہ وہ ان کے تحفظات کو دور کرنے کیلئے اسکردو واقعے کی غیر جانبدارانہ تحقیقات کروائیں گے اور واقعے میں ملوث افراد کے خلاف سخت ایکشن لیا جائیگا۔ ایم ڈبلیو ایم کے وفد میں شیخ شہادت حسین، سیکرٹری سیاسیات غلام عباس، صوبائی ترجمان محمد الیاس صدیقی، شہزاد آغا، اکبر حسین اور شبیر حسین شامل تھے۔