وحدت نیوز(اسلام آباد) علامہ راجہ ناصرعباس جعفری کی خصوصی ہدایت پر مجلس وحدت مسلمین پاکستان اور وحدت لائرز فورم پاکستان کے مشترکہ وفد نے گزشتہ روز اسلام آباد بار ایسوسی ایشن کا دورہ کیا اور اسلام آباد کچہری میں دہشت گردوں کی جانب سے شہید کئے جانے والے وکلاء اور ADJملک رفاقت اعوان کے اقرباء ، ساتھیوں اور لواحقین سے انکے چیمبرز میں جا کر تعزیت کی ۔وفد کی نمائندگی علامہ چوہدری ضیغم عباس ، علامہ علی اکبر کاظمی ، علامہ نعیم رضا جعفری، علامہ سید ساجد شیرازی ، سید سعید الحسن رضوی ، علامہ علی شیرانصاری ، جناب سیدین مرکزی سیکرٹری قانون MWM، سینئر قانون دان سید وسعت الحسن شاہ ایڈووکیٹ سپریم کورٹ آف پاکستان، سید اجمل حسین زیدی اور وحدت لائرز فورم کے اصغر علی مبارک ، مس طاہرہ بانو مبارک ، راجہ شیراز احمد جنجوعہ ایڈووکیٹ نے کی ،  اس مو قع پر اسلام آباد بار ایسوسی ایشن کے نائب صدر شوکت خان نے مجلس وحدت مسلمین کے وفد کو خوش آمدید کہا اور F-8کچہری کے تمام متاثرہ مقامات کا دورہ کروایا۔ شہید جج رفاقت اعوان صاحب کی عدالت کے دورہ پر وفد نے خصوصی تعزیتی دعا بھی کی ۔ MWMکے وفد کو بتایا گیاکہ F-8کچہری میں دہشت گردی کے نتیجے میں 11شہادتیں جبکہ 30زخمی ہو ئے ہیں۔ وفد نے مختلف چیمبرز اور گیلانی ھال کے دورے کے دوران ہینڈ گرینیڈ اور فائرنگ سے ہونے والے نقصانات کا معائنہ کیا اور افسوس کا اظہار کیا کہ مٹھی بھر پاکستان اور اسلام دشمن عناصر پاکستان میں قانون کی بالا دستی کے حامی شخصیات کو نشانہ بنا رہی ہیں۔

MWMکے وفد نے شہید خاتون وکیل فضہ ملک کے علاوہ سینٹ کے چیئر مین اور معروف وکیل سید نیر حسین بخاری ، معروف قانون دان وسعت الحسن شاہ ایڈووکیٹ ، راؤ رشید اقبال، رفاقت اعوان، شہادت حسین شاہ اور دیگر شہید اور مجروح وکلاء کے دفاتر کا مشاہدہ کیا اس موقع پر اسلام آباد با ر ایسوسی ایشن نے میاں اشتیاق ھال میں خصوصی تعزیتی جلسہ کا انعقاد کیا گیا جس سے خطاب کرتے ہو ئے MWMکے رہنماؤں نے حکومت وقت سے مطالبہ کیا کہ وکلاء کو ٹھوس سکیورٹی مہیا کی جائے اور گورنمنٹ کی رٹ چیلنج کرنے والوں کے خلاف آہنی ہاتھوں سے نپٹا جائے۔

MWMکے سر براہ علامہ ناصر عباس جعفری کی نمائندگی کرتے ہو ئے علامہ ضیغم عباس نے کہا کہ مجلس وحدت مسلمین دکھ کی اس گھڑی میں وکلاء کے ساتھ شانہ بشانہ کھڑی ہے اور وکلاء کے ساتھ آئندہ بھی ہر فورم پر اپنا کردر ادا کرتی رہے گی MWMکے رہنما علامہ امین شہیدی کے نمائندے علامہ سید علی اکبر کاظمی نے کہا دہشت گرد اس بزدلانہ کاروائی سے حق و انصاف کے راستے میں رکاوٹ کھڑی نہیں کر سکتے۔ شہدا نے اپنی جانیں دے کر اس مشن کوجاری رکھنے کا حوصلہ دیا ہے MWMشعبہ قانون کے سیدین زیدی نے کہا کہ حکومت وکلاء برادری کو مکمل تحفظ فراہم کرے۔ MWMاس واقع کی پرزور مذمت کرتی ہے اور دہشت گرد  عناصر سے سختی سے نمٹا جائے۔

تعزیتی جلسہ سے اسلام آباد بار کے وسعت الحسن شاہ نے کہا کہ اسلام آباد کے وکلاء کے عزم و استقامت میں کو ئی کمی نہیں آئی۔ اس موقع پر آغانعیم رضا جعفری نے کہا کہ شہدا کے خون سے پاکستان میں امن کو دوام ملے گا انہوں نے کہا کہ حکومت پاکستان میں وکلاء برادری کو تحفظ فراہم کرنے کی پالیسی یقینی بائے ۔

تعزیتی جلسے سے علامہ سید ساجد شیرازی نے خطاب کرتے ہو ئے کہا کہ اسلام نے بے گناہ انسانوں کی ہلاکت کو ہمیشہ سے قابل مذمت قرار دیا ہے انہوں نے کہا کہ شہدا ء کے خون سے ہاتھ رنگنے والے کسی بھی مذہب میں انسان کہلانے کے لائق نہیں ہیں اس موقع پر علامی علی شیرازانصاری نے اپنے پر اثر خطاب میں کہا کہ پاکستان میں دہشت گردانہ کاروائیوں کے نتیجے میں ہزاروں افراد کی ہلاکت ہو چکی ہے جس سے ہماری مساجد، امام بارگاہیں ، گرجا گھر کچھ بھی محفوظ نہیں لہذا مذاکرات کی بجائے دہشت گردوں کے خلاف ٹھوس کاروائی کی جائے ۔

اسلام آباد ہائی کورٹ بار کی نمائندگی کرتے ہو ئے راجہ شیراز احمد جنجوعہ ایڈووکیٹ نے کہاکہ F-8میں دہشت گردی کی بزدلانہ کاروائی ہمارے حوصلے کو کم نہیں کر سکتی۔ MWMکے وفد کو بار کے دورہ پر خراج تحسین پیش کر تے ہو ئے انہوں نے کہا کہ علماء کی سر پرستی میں ہم دہشت گردی کے ناسور کو جڑ سے اکھاڑ پھینکیں گے۔شوکت خان نائب صدر نے حکومت وقت سے مطالبہ کیا کہ اسلام آباد بار کو سخت سے سخت سکیورٹی فراہم کی جائے آخر میں MWMلائرز فورم کے صدر اصغر علی مبارک نے شکریہ ادا کیا اورشہدا ء کی بلندی درجات اور زخمیوں کی صحت یابی اور ملک و قوم کی دہشت گردی کے ناسور سے نجات کے لئے دعا کروائی۔ راولپنڈی بار کی نمائندگی کرتے ہوئے اجمل زیدی ایڈووکیٹ نے کہا کہ راولپنڈی اور اسلام آباد بار جڑواں بارز ہیں اور اسلام آباد بار پر حملہ راولپنڈی بار پر حملہ اس دکھ کی گھڑی میں ہم ان کے ساتھ ہیں۔

وحدت نیوز(کراچی) کراچی آپریشن کے باوجود کالعدم طالبان اوراس کے ذیلی دہشت گرد گروہوں کی کارروائیوں اور دہشت گردوں سے مذاکرات اور شام پر امریکاو سعودی نواز پالیسی اپنانے پر حکومت کے خلاف جمعہ کو یوم احتجاج منانے کا اعلان کردیا۔ جمعیت علماء پاکستان کراچی کے صدر اور اہل سنت ایکشن کمیٹی کے سرپرست اعلیٰ علامہ قاضی احمد نورانی نے کراچی پریس کلب میں اہم پریس کانفرنس سے خطاب کرتے ہوئے کہا کہ دہشت گردی کے پے درپے واقعات حکومت کی ناکامی کا ثبوت ہیں۔ کراچی آپریشن کی کامیابی کا دعویٰ بھی مضحکہ خیزہے،عوام اہل سنت ریاست کے اہم ستونوں کوکمزورکرکے ملک کوتباہ کرنے کی سازش ناکام بنادیں گے، ایک طرف مذاکرات مذاکرات اور دوسری طرف مساجد،مدارس،خانقاہوں ،مزارات اور علماء ومشائخ پر حملے اور دھمکیاں ناقابل برداشت ہیں، ملک شام کے حوالے سے حکومت اپنی سابقہ پالیسی برقراررکھے،یہ وقت بیرونی معاملات میں الجھنے کے بجائے ملک سنبھالنے کاہے،رابطہ عالم اسلامی کے مردہ گھوڑے کوامریکا کے انجکشن لگاکرزندہ کرنے کی کوشش کی جارہی ہے،اس موقع پر اہل سنت ایکشن کمیٹی کے چیئرمین نسیم احمدسحر،جماعت اہل سنت پاکستان کراچی کے نائب ناظم اعلیٰ علامہ محمدناصرخان قادری ترابی، اہل سنت ایکشن کمیٹی کے سینئروائس چیئرمین بابافخرالدین نورانی،جماعت اہل سنت بلدیہ ٹاؤن کے ناظم اعلیٰ علامہ غلام شبیرقادری، اہل سنت ایکشن کمیٹی کے وائس چیئرمین صاحبزادہ عارف رشیدفاروقی،شیخ عبدالوحیدیونس اور دیگر علماء ومشائخ اور عہدیداران موجودتھے۔

علامہ قاضی احمدنورانی نے حکومت کی جانب سے مذاکرات میں فوج کوشامل کرنے پرواشگاف الفاظ میں کہاکہ جنگجوؤں سے حکومت اورفوج نے دسیوں بارمذاکرات کئے لیکن دس سال کے عرصے میں انسانی شکل میں ان بھیڑیوں نے ریاست کے اندرریاست قائم کرکے حکومتی رٹ کوہمیشہ چیلنج کیا۔جاہلانہ نظریات کواسلام قراردیااور اختلاف کرنے والوں کو بے دریغ درندگی کانشانہ بنایامزارات پر دھماکے کئے،مساجداورمدارس بھی ان کے ظلم کانشانہ بنے ،علماء اور مشائخ کوقتل کیااور کراچی میں جاری آپریشن کے باوجودان ظالمان کی دھمکیاں اور بھتہ خوری جاری ہے۔ اب محترم وزیراعظم نوازشریف کو فیصلہ کرناہوگاکہ وطن عزیز کوبچاناہے یااپنی جلاوطنی کے دوران میزبانی کرنے والوں کے اشارے پرملکی امن وسلامتی کو داؤ پرلگاناہے ۔

انہوں نے شام کے حوالے سے کہاکہ مناسب یہ ہوگاکہ شام کے حوالے سے حکومت اپنی سابقہ پالیسی برقراررکھے ،رابطہ عالم اسلامی ایک مخصوص نظریہ رکھنے والوں کاگروپ بن گئی ہے،حالیہ مکہ کانفرنس میں ملک کے سواداعظم اہل سنت کی کوئی نمائندگی نہ تھی۔امریکاخطرناک چال چل کر شام میں موجودحماس کے دفاتر ودیگر مراکزتباہ کرکے اسرائیل کے لئے خطرات کوکم سے کم کرناچاہتاہے،اگرامریکہ کوشام میں بقول اس کے آمرانہ حکومت سے اختلاف ہے تواس نے آخر مصر میں جمہوریت کوکیوں پنپنے کاموقع نہ دیا،امریکاکی ہر کارروائی کامقصد صحیح العقیدہ مسلمانوں اور مسلمانوں کی جان ومال کاتحفظ کرنے والوں کونقصان پہنچاناہوتاہے ۔

علامہ قاضی احمدنورانی اور ان کے ساتھیوں نے مزیدکہاکہ شہرکراچی باالخصوص بلدیہ ٹاؤن ،اورنگی ٹاؤن اور منگھوپیر مسلسل مذہبی دہشتگردی کی زد میں ہیں، جامع مسجد خضرأ بلدیہ ٹاؤن پاورہاؤس کے امام قاری لیاقت کو شہید کرنے کے بعد انتظامیہ کی نگاہوں سے اوجھل دہشتگردوں نے علماء ومشائخ کو دھمکی آمیزخطوط لکھے ہیں،سانحۂ بلدیہ ٹاؤن جہاں ذکرالٰہی کرنے والوں کوشہید کیاگیاان کے قاتل ابھی تک گرفتارنہیں ہوئے ۔انہوں نے مطالبہ کیاکہ کراچی پولیس کا سربراہ کسی اہل اور نڈرافسر کو بنایا جائے جودہشتگردوں سے مرعوب ہونے کے بجائے آہنی ہاتھوں سے نمٹے۔انہوں نے کہاکہ ہم جمعیت علماء پاکستان کے پلیٹ فارم سے 29مارچ کونشترپارک میں عوام اہلسنت کومجتمع کرکے ایک بارپھر ثابت کردیں گے کہ شہر کراچی درودوسلام پڑھنے والے عاشقان رسولﷺ کاشہر ہے ،یہ اولیاء کاملین کے ماننے والوں کاشہر ہے یہاں خودساختہ اسلام اور دہشتگردی ہرگزنہیں چلے گی۔

وحدت نیوز(کراچی) تنظیم المساجد اہلسنت پاکستان کے سربراہ مفتی عابد مبارک قادری کو جان سے مارنے کی دھمکی آمیز خط موصول ہوا۔ اطلاعات کے مطابق گذشتہ رات کے کسی پہر شہید ڈاکٹر قاری لیاقت علی خان کی مسجد کے وضو خانے میں دھمکی آمیز خط چسپاں کیا گیا، جس میں مفتی عابد مبارک قادری کو مسجد سمیت شہید کرنے اور مرحوم قاری لیاقت علی کے رشتہ دار اور قاری صاحب کی مسجد کے امام مولانا سید قاسم شاہ بخاری کی بہن کو اغواء کرنے کی دھمکی دی گئی۔ واقعہ کی اطلاع متعلقہ تھانہ اور ایس پی بلدیہ سمیت رینجرز کے افسران کو دے دی گئی ہے۔ علماء اہلسنت کا ایک اہم اجلاس تنظیم المساجد اہلسنت پاکستان کے مرکز میں ہوا، جس میں کالعدم تنظیم کی جانب سے مفتی عابد مبارک المدنی کو دی جانے والی اس دھمکی کا سخت نوٹس لیا گیا اور اس واقعہ کی شدید الفاظ میں مذمت کی گئی۔

علماء اہلسنت نے حکومت اور انتظامیہ کو خبردار کیا کہ اگر قاری لیاقت علی کے قاتلوں کو گرفتار کر لیا جاتا تو شاید ان شرپسندوں کو روکا جا سکتا تھا۔ علماء اہلسنت نے ملک بھر کی عوام اہلسنت کا واضح اور درست مؤقف دنیا بھر میں پیش کرنے اور پاکستان و آئین پاکستان اور اپنے فوجی جوانوں اور پولیس اہلکاروں کی مکمل حمایت کا اعلان کرنے پر مفتی عابد مبارک المدنی کی حمایت کا اعلان کیا۔ علماء اہلسنت نے حکومت اور انتظامیہ سے مساجد و مدارس اور مزارات اولیاء کرام سمیت علماء اہلسنت کو مکمل سکیورٹی دینے کا مطالبہ کیا ہے۔ اجلاس میں مفتی رفیع عثمانی، مولانا حسین لاکھانی، مفتی وسیم اختر المدنی، مفتی محمد احسن نوید، مفتی ایاز سعیدی، علامہ عمران قادری سمیت دیگر علماء اہلسنت نے شرکت کی۔

وحدت نیوز(مظفرآباد) مجلس وحدتِ مسلمین آزادکشمیر کے وفد کی سابق وزیر اعظم ، قائد حزب اختلاف ومسلم لیگ ن آزادکشمیر کے صدرراجہ فارو ق حیدر سے ملاقات کی، اتحاد بین المسلمین کے سلسلہ میں کئے گئے اقدامات سے آگاہ کیا گیا۔وفد کی سربراہی مجلس وحدتِ مسلمین آزادکشمیر کے سیکرٹری سیاسیات سید تصوعباس موسوی نے کی، مجلس وحدت مسلمین نے فاروق حیدر کو حالیہ ضمنی انتخابات میں مسلم لیگ ن کے امیدوار کی کامیابی پر مبارکباد پیش کی۔دریں اثنا ء مجلس وحدتِ مسلمین آزادکشمیرکے رہنماؤں نے ممبر اسمبلی برسٹرافتخار گیلانی اور نو منتخب ممبر اسمبلی فاروق طاہر سے بھی ملاقات کی اور انہیں بھی مبارکباد پیش کی۔مسلم لیگ ن آزادکشمیر کے صدرراجہ فارو ق حیدرنے پاکستان اور آزادکشمیر میں بین المذاہب ہم آہنگی اور بین المسالک وحدت کیلئے مجلس وحدتِ مسلمین کے کردار کو سراہا،مجلس وحدتِ مسلمین کے وفد میں محسن رضا سبزواری ایڈووکیٹ،مولانا حمید حسین نقوی، ڈاکٹرسخاوت حسین کاظمی،سید عارف شاہ بخاری، ذیشان کاظمی اور دیگر شامل تھے۔

 مجلس وحدت مسلمین کے رہنماؤں نے کہا کہ 21ربیع الاول 23جنوری کودربار عالیہ سائیں سہیلی سرکار مظفرآبادمیں میلادِ حضرت محمدمصطفی صلی اللہ علیہ وآلہ وسلم کے عنوان سے عظیم الشان میلاد کانفرنس کا انعقاد کیا گیا، جس میں مجلس وحدتِ مسلمین پاکستان کے ڈپٹی سیکرٹری جنرل علامہ محمد امین شہیدی ، سنی اتحاد کونسل پاکستان کے سربراہ صاحبزادہ حامد رضا، مفتی کفایت نقوی، صاحبزادہ سلیم چشتیسمیت پاکستان بھر کے معروف نعت خواں، شیعہ سنی عاشکان رسول اقدس بھرپور انداز میں شرکت کرکے کے اتحاد ووحدت کا عملی مظاہرہ کیا۔

قائد حذب اختلاف راجہ فارو ق حیدر نے مجلس وحدتِ مسلمین کے وفد سے گفتگو کرتے ہوئے کہا کہ مجلس وحدتِ مسلمین پاکستان کے قائد جناب علامہ راجہ ناصر عباس کے اقدامات و کاوشیں قابل تحسین ہیں،مسلم لیگ ن آزادکشمیر ،مجلس وحدت مسلمین کے کردار و کارکردگی کو قدر و احترام کی نگاہ سے دیکھتی ہے۔ مجلس وحدتِ مسلمین کی بین المسلمین وحدت امن و بھائی چارے کے ایجنڈے پر مسلم لیگ ن آزادکشمیر مجلس وحدت مسلمین کے ساتھ ہے۔ آزادکشمیر لسانی اورمذہبی فسادات سے پاک پرامن خطہ ہے۔تمام مسالک کے درمیان رواداری اور اتحاد قابل تعریف ہے ۔علماء کرام وحدت برقرار رکھنے کیلئے اپنا کردار ادا کررہے ہیں۔ ماہ محرم الحرام آزادخطہ کے علماء و عوام نے بھرپور ملی وحدت، احترامِ اہل بیت کیساتھ پرامن طریقے سے منایا گیا۔ماہ ربیع الاول بھی تما م مسالک کے علماء و عوام رسول خداؐ سے عشق و محبت کا اظہار کرتے ہوئے مکمل اتحاد و یگانگت کیساتھ منایا گیا۔

مجلس وحدتِ مسلمین آزادکشمیر کے سیکرٹری سیاسیات سید تصوعباس موسوی نے قائد حذب اختلاف ومسلم لیگ ن آزادکشمیر کے صدرراجہ فارو ق حیدرسے گفتگو کرتے ہوئے کہاکہ مجلس وحدتِ مسلمین نے پاکستان اور آزادکشمیر میں اتحاد بین المسلمین کیلئے بھرپورجدوجہد کررہی ہے اس جدودجہد کے دوران قیمتی جانوں کا نذرانہ پیش کیا۔ ملکی سلامتی اور امن کیلئے ہر قربانی کیلئے تیارہیں انہوں نے کہا کہ مجلس وحدت مسلمین ملک میں امن کا قیام انسانی بنیادوں پر کے فارمولے پر یقین رکھتی ہے اس سلسلہ میں 5 جنوری کو اسلام آباد میں قومی امن کنونشن منعقد کیا گیاجس میں شیعہ سنی ، ہندو ،سکھ،عیسائی اور دیگر مسالک ومذاہب کے عوام ملکی سلامتی کیلئے جانیں قربان کرنے والے شہداء کے لواحقین نے بھرپورشرکت کی اور باہمی اتحاد و اخوت کے عہد کی تجدیدکی۔