وحدت نیوز(لاہور) مجلس وحدت مسلمین پنجاب کے صوبائی سیکرٹریٹ میں کراچی میں ٹارگٹ کلنگ میں آئے دن شہید ہونے والے ملت جعفریہ کے شہداء اور شہید علامہ علی اکبر کمیلی کی شہادت پر تعزیتی اجلاس ،اجلاس سے خطاب کرتے ہوئے مجلس وحدت مسلمین پنجاب کے ڈپٹی سیکرٹری جنرل علامہ محمد اقبال کامرانی نے کہا کہ کراچی میں ایک منظم سازش کے تحت ہماری نسل کشی جاری ہے ملت جعفریہ کے علماء نے ہمیشہ اپنے عوام کو امن محبت بھائی چارے کا درس دیا اور ملک میں کسی بھی قسم کے خلاف قانون و آئین اقدام کو ہمیشہ حرام قرار دیتے رہے لیکن پاکستان پر مسلط دہشت گردوں کے سرپرست حکمرانوں نے ہمیشہ ہمیں لاشوں کے تحفے دیے آخر یہ سلسلہ کب تک چلے گا انہوں نے کہا کہ کالعدم جماعتوں کو یہ حکمران اپنے اقتدار کو طول دینے کے لئے اُن سے کام لیا جارہا ہے آج قاتل سرعام دندناتے پھر رہے ہیں کراچی میں سیاسی مفاد کو بالائے طاق رکھتے ہوئے شمالی وزیررستان کے طرز کا بے رحمانہ آپریشن کیا جائے تاکہ ان درندوں سے مملکت پاکستان سے پاک کیا جائے بصورت دیگر عوامی غیض و غضب سے نہ حکمران بچ سکیں گے نہ اُن کے کارندے دہشت گردبچ پائے گا ظلم کا نظام کوئی بھی برداشت نہیں کریگا انہوں  نے کہا کہ اگر حکومت ہمارا تحفظ نہیں کر سکتی تو ہم اپنا تحفظ خود کرنا جا نتے ہیں مگر ہم اپنے وطن کی بقاء کی خاطر خاموش ہیں ۔

وحدت نیوز (کراچی) مجلس وحدت مسلمین کی مرکزی ڈپٹی سیکرٹری جنرل علامہ امین شہیدی نے پاک محرم ہال میں ہنگامی پریس کانفرنس سے خطاب کرتے ہوئے کہاکہ آج شہر کراچی کی فضاء سوگوار ہے کیونکہ دو روز قبل اسی شہر کراچی میں معروف شیعہ رہنما اور سیاستدان علامہ عباس کمیلی صاحب کے فرزند علامہ علی ااکبر کمیلی کو بے رحمانہ طور پر شہید کیا گیا ، صرف یہ نہیں بلکہ یہ سلسلہ گزشتہ کئی برس سے جاری و ساری ہے اور کراچی میں بسنے والے ملت جعفریہ کے عمائدین کی مسلسل ٹارگٹ کلنگ کے ذریعے نسل کشی کی جا رہی ہے، ملت جعفریہ کے عمائدن کو باقاعدہ نشاندہی کرنے کے بعد دہشت گردانہ کاروائیوں کا نشانہ بنایا جا رہاہے، بے گناہ انسانوں کا قتل عام جاری ہے اور معصوم بچوں کو یتیمی کا تحفہ دیا جا رہاہے جو کہ قابل افسوس اور قابل مذمت ہے، ہم علامہ علی اکبر کمیلی کی ٹارگٹ کلنگ سمیت اسی دن ڈیفنس کے علاقے میں ایک شیعہ خاتون کو ٹارگٹ کلنگ کا نشانہ بنائے جانے سمیت شہر میں ٹارگٹ کلنگ کا نشانہ بننے والے شیعہ عمائدین کی ٹارگٹ کلنگ میں تکفیری دہشت گرد ٹولے کو ملوث سمجھتے ہیں اور حکومت سے پر زور مطالبہ کرتے ہیں کہ علامہ علی اکبر کمیلی شہید سمیت دیگر شہید ہونے والے تمام ملت جعفریہ کے عمائدین کے قتل میں ملوث ان خطر ناک تکفیری دہشت گرد ٹولے کے خلاف سخت سے سخت کاروائی کی جائے اور دہشت گردوں کا قلع قمع کیا جائے۔اس موقع پر ان کے ہمراہ مرکزی سیکرٹری تنظیم سازی یقوب حسینی ،مولانا علی انور ،علامہ مبشر حسن ،علی حسین نقوی بھی موجود تھے ۔

علامہ امین شہیدی کا کہنا تھاہم یہ سمجھتے ہیں کہ شہر میں جاری دہشتگردی اور ٹارگٹ کلنگ میں حکومت اور اپوزیشن میں موجود سیاسی جماعتیں بھی برابر کی شریک کار ہیں ،ہم شہر میں موجود سیاسی تنظیموں بشمول پاکستان پیپلز پارٹی، متحدہ قومی موومنٹ، عوامی نیشنل پارٹی، جماعت اسلامی، جمعیت علمائے اسلام (ف)، جمعیت علمائے پاکستان اور دیگر سب مل کر شہر کراچی سے دہشت گردوں کے خاتمے کے لئے اپنا کردار ادا کریں ، کیونکہ اب تک دیکھا یہی گیا ہے کہ سیاسی جماعتیں صرف دہشت گردانہ کاروائیوں پر زبانی جمع خرچ کرتی ہیں اور سمجھتی ہیں کہ انہوں نے اپنی ذمہ داری پوری کر لی ہے لیکن اب زبانی جمع خرچ سے آگے بڑھ کر عملی اقدامات کی ضرورت ہے ،اگر شہر کراچی میں امن وامان قائم نہ ہوسکا تو پورا ملک نا امنی کی آگ میں جھونک دیا جائے گا اور ملک دشمن عناصر یہی چاہتے ہیں، لہذٰا ہم سیاسی جماعتوں سے اپیل کرتے ہیں کہ وہ شہر کراچی کے امن کی خاطر اور یہاں پر بسنے والے شہریوں کے جان ومال کے تحفظ کو یقینی بنانے کے لئے تکفیری دہشت گرد گروہوں کے خلاف عملی اقدامات کریں ۔
آج پوری دنیا میں اسلام دشمن دہشت گرد تکفیری ٹولے نے اسلام کے خوبصورت اور حقیقی چہرے کو مسخ کر کے رکھا ہوا ہے اور پاکستان میں بھی یہ کانگریسی ایجنٹ بانی پاکستان کی اولادوں کی نسل کشی کر کے پاکستان کی جڑوں کو کھوکھلا کرنے کی کوشش میں مصروف عمل ہیں ، آج پاکستان کے بانی رہنماؤں کی اولادوں کی نسل کشی کر کے انہیں پاکستان بنانے اور اس کا دفاع کرنے کی سزا دی جا رہی ہے، ملت جعفریہ کے عمائدین کی مسلسل ٹارگٹ کلنگ اور نسل کشی بھی عالمی سازشوں کا ہی ایک شاخسانہ ہے اور ملک دشمن و اسلام دشمن قوتوں کی اولین ترجیح ہے جسے ہمارے ملک میں پنپنے والے تکفیری دہشت گرد گروہ پایہ تکمیل تک پہنچانے کی ناکام کوششوں میں مصروف عمل ہیں۔

ہم سول سوسائٹی سے بھی اپیل کرتے ہیں کہ وہ سیاسی جماعتوں کے ساتھ ساتھ دہشت گردی کے خلاف جاری عملی اقدامات میں میدان میں آ کر ان ملک دشمن اور اسلام دشمن اور انسانیت دشمن دہشت گردوں کا قلع قمع کرنے میں مدد گار بنیں، اگر کراچی میں امن قائم رہے گا تو پورا پاکستان امن کا گہواراہ بنے گا اور اگر کراچی ترقی کی را ہ پر گامزن ہو گا تو پاکستان ترقی کرے گا ، کراچی کی ترقی کے بغیر پاکستان کی ترقی ممکن نہیں، لہذٰا پاکستان کو دہشتگردوں کے ہاتھوں سے بچانے کے لئے تمام حلقوں کو ان دہشتگردوں کے خلاف عملی اقدامات کرنا ہوں گے۔

ہم یہ سمجھتے ہیں کہ کراچی میں گذشتہ ایک برس سے جاری پولیس اور رینجرز کا مشترکہ آپریشن ناکام ہو چکا ہے کیونکہ ایک طرف آپریشن بھی جاری ہے تو دوسری جانب دہشت گردوں کی آماجگاہوں میں نہ صرف اضافہ ہو رہاہے ، بلکہ شہر کراچی میں ٹارگٹ کلنگ کا نشانہ بننے والے افراد کی تعداد میں بھی اضافہ ہو گیا ہے، اور شہر کراچی میں تاجروں ، دکانداروں، ڈاکٹروں، انجیئنرز سمیت مختلف شعبہ ہائے زندگی سے تعلق رکھنے والے افراد کو چن چن کر ٹارگٹ کلنگ کا نشانہ بنایا جا رہاہے ۔
پولیس او ر رینجرز کے جاری مشترکہ آپریشن کے نتائج میں جہاں دہشت گردوں کے وجود میں کمی نہیں آئی وہاں معصوم اور بے گناہ شیعہ عمائدین کی ٹارگٹ کلنگ میں بھی کمی واقع نہیں ہوئی بلکہ گذشتہ ایک برس میں ایک سو ساٹھ(160)شیعہ عمائدین کو ٹارگٹ کلنگ کا نشانہ بنایا گیا جن میں 3معروف علماء ذاکرین ،5داکٹرز، 3پروفیسرز ، 5وکلاء ،34دکاندار، 21تاجر (بزنس مین)،5انجیئنرز، اور 90نوجوان طلباء اور دیگر شعبہ ہائے زندگی سے تعلق رکھنے والے افراد شامل ہیں۔

ہم یہ سمجھتے ہیں کہ شہر کراچی میں اور پورے ملک میں کسی بھی مقام پر مذہبی جھگڑا نہیں ہے بلکہ یہ ملک دشمن اور اسلام دشمن قوتوں کے آلہ کار دہشت گرد ہیں جو پاکستان کے عوام کو بے رحمانہ انداز میں قتل و غارت کا نشانہ بنا رہے ہیں، ہم مطالبہ کرتے ہیں کہ کراچی میں فی الفور بھرپور فوجی آپریشن کیا جائے اور کراچی کے دو کروڑ عوام کو دہشت گردوں کیت چنگل سے نجات دلوائی جائے، جب اسلام آباد کو انہی دہشت گردوں سے تحفظ فراہم کرنے کے لئے فوجی آپریشن اور 245کا نفاذ کیا جا سکتا ہے تو پھر سندھ کو دہشت گردوں کے رحم وکرم پر کیوں چھوڑا جا رہاہے،جبکہ شہر کراچی پاکستان کی معاشی شہ رگ ہے اور پاکستان کی معاشی شہ رگ کو دہشت گردوں کے چنگل سے نجات اور خاتمے کے لئے ا سندھ حکومت فی الفور کراچی میں بھی آرٹیکل 245کا نفاذ عمل میں لائے او ر ہر قسم کی دہشت گردی کی خلاف بھرپور اور بے رحمانہ فوجی آپریشن کا آغاز کیا جائے۔

ملک بھر میں بشمول خیبر پختونخواہ، بلوچستان سمیت پنجاب اور کراچی میں کالعدم دہشت گرد گروہوں طالبان ، القاعدہ اور لشکر جھنگوی سمیت دیگر کے ذیلی گروہ جو مذہب کے نام پر بے گناہ انسانوں کا قتل عام کرتے رہے ہیں اب ایک مرتبہ پھر ’’جماعۃ التحریر‘‘ کے نام سے سرگرم عمل ہو چکے ہیں اور یہ عراق اور شام میں معصوم انسانوں کا قتل عام کرنے والی دہشت گرد تکفیری گروہ ’’داعش‘‘ کی ایک شاخ ہیں۔لہذٰا ملک بھر میں اس دہشت گرد سفاک گروہ کے خلاف بھرپور اقدامات اٹھائے جا نے کے ساتھ ساتھ ان کا جلد از جلد قلع قمع کرنے کی فوری ضرورت ہے بصورت دیگر یہ دہشت گرد گروہ پاکستان کو بھی شام اور عراق کی طرح ایک مقتل گاہ بنانے میں کسر نہیں رکھیں گے۔ہم حکومت سے مطالبہ کرتے ہیں کہ اس دہشت گر گروہ کے پمفلٹ کی تقسیم، وال چاکنگ سمیت نشریاتی کاموں پر کریک ڈاؤن کیا جائے بصورت دیگر انتہائی سنگین نتائج برآمد ہو ں گے اور پھر حکومت ان دہشت گردوں کو روکنے کے قابل نہ رہے گی۔

وحدت نیوز(اسلام آباد) سیلاب سے متاثرہ علاقوں میں امدادی سر گرمیوں کو مزید تیز کرنے کے لیے خیرالعمل فاﺅنڈیشن کی کور کمیٹی کا ہنگامی اجلاس چیئرمین نثار علی فیضی کی زیر صدارت ہوا جس میں صوبائی سیکرٹری فلاح و بہبود صوبہ پنجاب نے سیلاب سے متاثرہ علاقوں کی تباہ کاریوں اور تمام تر صورتحال سے شرکاءاجلاس کو آگاہ کیا اور بتایا کہ ہمارے رضاکاروں نے فوری طور پر ریلیف کی سرگرمیوں کا آغازکر دیااور پہلے مرحلے میں لوگوں کو محفوظ مقامات پر پہنچانا اورانکی زندگی بچانا ہے کور کمیٹی کے اجلاس میں تمام تر صورتحال کا جائزہ لینے کے بعد یہ فیصلہ کیا گیا کہ فوری طور پر متاثرہ علاقوں کا دورہ کیا جائے اور نقصانات کا جائزہ لیا جائے سیلاب سے متاثرین کے لیے میڈیکل کیمپ لگائے جائیں جہاں پر متاثرین کامفت علاج کیا جائےگا اور ادویات تقسیم کی جائیں گی متاثرہ علاقوں میں راشن پیکٹ تقسیم کیے جائیں گے اس موقع پر چیئرمین خیرالعمل فاﺅنڈیشن نثار علی فیضی نے مخیر حضرات سے اپیل کی کہ وہ اس کار خیر میں بڑھ چڑھ کر حصہ لیں اور اپنے بھائیوں کو اس مشکل صورتحال سے جلد از جلد نکالنے کے لیے خیرالعمل فاﺅنڈیشن کا ساتھ دیں۔ انہوں نے کہا کہ سیلاب سے بڑے پیمانے کی تباہی ہوئی ہے جس سے نمٹنے کے لیے ہنگامی بنیادوں پر کام کرنے کی ضرورت ہے۔خیرالعمل فاﺅنڈیشن مختلف علاقوں میں امدادی کیمپ بھی لگائے گی مصیبت کی اس گھڑی میں متاثرین سیلاب کو اکیلا نہیں چھوڑیں گے۔

وحدت نیوز (کراچی) مجلس وحدت مسلمین کے مرکزی ڈپٹی سیکریٹری جنرل علامہ محمد امین شہیدی نے کہا ہے کہ کراچی میں فی الفور وزیرستان طرز کا فوجی آپریشن شروع کیا جائے، علامہ علی اکبر کمیلی کی شہادت نے سندھ حکومت کے قیام امن کے دعوں کی قلعی کھول دی، سندھ حکومت اور قانون نافذ کرنے والے ادارے شہر قائد میں دہشت گردی کی روک تھام میں مکمل طور پر ناکام ہوچکے ہیں، مدارس کے نام پر قائم دہشتگردی کے مراکز شہریوں کے لئے ناسور بن چکے ہیں جبکہ کراچی کا ضلع وسطی مذہبی و سیاسی طالبان کا مضبوط گڑھ بن چکا ہے، ریاست عوام کو حقوق و تحفظ دینے میں ناکام ہو چکی ہے، تمام محب وطن سیاسی و مذہبی جماعتیں کراچی سمیت ملک بھر میں جاری دہشتگردی کے خاتمے اور قیام امن کیلئے اپنا بھرپور کردار ادا کریں، ان خیالات کا اظہار علامہ امین شہیدی نے جعفریہ الائنس پاکستان کے سربراہ علامہ عباس کمیلی کے فرزند معروف ذاکر اہل بیت (ع) علامہ علی اکبر کمیلی کی نماز جنازہ کے بعد نمائش چورنگی پر میڈیا سے گفتگو کرتے ہوئے کیا۔

اس موقع پر علامہ امین شہیدی نے مطالبہ کیا کہ حکومت کے پاس ابھی بھی وقت ہے، وہ ہوش کے ناخن لے اور عوام کو تحفظ فراہم کرے ورنہ دہشتگردی اور ٹارگٹ کلنگ پر قابوپانے میں ناکام سندھ حکومت نام نہاد ٹارگٹڈ آپریشن کے خاتمے کا اعلان کرکے اپنی ناکامی کا اعتراف کرتے ہوئے مستعفی ہوجائے اور کراچی کو پاک فوج کے حوالے کرے جس کے بعد کراچی میں بھی دہشت گردوں کے ٹھکانوں پر فی الفور وزیرستان طرز کا فوجی آپریشن کیا جائے۔ مرکزی رہنما ایم ڈبلیو ایم نے کہا کہ قانون نافذ کرنے والے اداروں کو معلوم ہے کہ قاتل کون ہیں اور انکی پناہ گاہیں کہاں ہیں اس کے باوجود دہشتگردوں کیخلاف کارروائی سے گریز کیا جا رہا ہے جبکہ دوسری جانب شہر بھر کالعدم دہشتگرد جماعتیں نام بدل کر کھلے عام دہشتگرادنہ کارروائیوں میں مصروف ہیں شہر بھر میں کالعدم دہشتگرد تنظیموں کی فرقہ وارانہ و مذہبی منافرت پر مبنی وال چاکنگ کے ساتھ ساتھ بینرز اور جھنڈے آویزاں ہیں۔ علامہ امین شہیدی نے کہا کہ مجلس وحدت مسلمین کراچی میں جاری ٹارگٹ کلنگ کے واقعات کی بھرپور مذمت کرتی ہے اور تمام محب وطن سیاسی و مذہبی جماعتوں سے اپیل کرتی ہے وہ کراچی سمیت ملک بھر میں بڑھتی ہوئی ٹارگٹ کلنگ اور دہشتگردی کیخلاف اپنا بھرپور کردار ادا کرتے ہوئے میدان عمل میں وارد ہوں۔ انہوں نے کہا کہ شہر قائد میں جاری دہشت گرد کارروائیاں عوام میں خوف و ہراس پھیلانے اور فرقہ واریت کو ہوا دینے کی مذموم سازش ہے، شہر میں روزانہ کی بنیاد پر درجن بھر شہریوں کو گولیوں کا نشانہ بنایا جا رہا ہے۔

علامہ امین شہیدی کا مزید کہنا تھا کہ سندھ حکومت اور قانون نافذ کرنے والے ادارے شہر میں قیام امن کے جھوٹے دعوے کر رہے ہیں، جبکہ ایک منظم منصوبہ بندی کے تحت شہر قائد میں اہل تشیع تاجروں اور کاروباری شخصیات کو چن چن کر نشانہ بنایا جا رہا ہے، علامہ علی اکبر کمیلی کا قتل بھی اسی منظم سازش کا حصہ ہے۔انہوں نے کہا کہ علی اکبر کمیلی پر حملہ حکومت کی نااہلی اور دہشتگردوں کو فری ہینڈ دینے کا نتیجہ ہے، کراچی جیسے میٹروپولیٹن شہر میں جسکی غیر معمولی معاشی اہمیت ہو وہاں ٹارگٹ کلرز کا کھلے عام دندناتے پھرنا اور دن کے اجالے میں لوگوں کی جانیں لے کر فرار ہو جانا سندھ حکومت کی کارکردگی اور سکیورٹی اداروں کی سکیورٹی پر سوالیہ نشان ہے۔ ایم ڈبلیو ایم کے مرکزی رہنما نے کہا کہ ٹارگٹ کلنگ کا نہ تھم والا سلسلہ کراچی سمیت ملک بھر میں جاری ہے جبکہ حکومت کو نہ تو کوئی فکر ہے اور نہ ہی کبھی ٹارگٹ کلنگ کو روکنے کا ارادہ معلوم ہوتا ہے۔ علامہ امین شہیدی نے علامہ علی اکبر کمیلی شہید کے قاتلوں کی گرفتاری کا مطالبہ کرتے ہوئے کہا کہ اگر ٹارگٹ کلرز کو گرفتار کر کے قرار واقعی سزا نہ دی گئی تو کراچی میں بدامنی اور دہشتگردی کے جن کو قابو کرنا محال ہوگا۔ انہوں نے کہا کہ پاکستان کی ریڑھ کی ہڈی کراچی کو پرامن بنانے کے لیے حکومت اور سکیورٹی ادارے ٹھوس بنیادوں پر عملی اقدامات اٹھائیں۔

 آخر میں علامہ امین شہیدی نے علامہ علی اکبر کمیلی کی شہادت پر علامہ عباس کمیلی کو تعزیت و تسلیت پیش کی اور کہا کہ ہم دعا گو ہیں کہ خدا انکے درجات میں بلندی عطا فرمائے اور لواحقین و وارثین کو صبر جمیل عطا فرمائے۔ دراثنا شہید علامہ علی اکبر علی کمیلی کی نماز جنازہ بعد نماز ظہرین نمائش چورنگی مولانا رضی جعفرنقوی کی زیر اقتدا ادا کی گئی جب کے اس موقع پر علامہ امین شہید ی،علی حسین نقوی،حسن ہاشمی، انجینئر رضا نقوی ، علامہ علی انور ، مشبر حسن  ،مرکزی تنظیم عزا کے رہنما سلمان مجتبیٰ ،شبر رضا ،مولانا مرزا یوسف حسین ،آغا شیخ حسن صلاح الدین ۔رابطہ کمیٹی کے ارکین سمیت ہزاروں مومنین نے شرکت کی۔