وحدت نیوز(اسلام آباد) مجلس وحدت مسلمین بلوچستان کے سیکریٹری جنرل  علامہ مقصود علی ڈومکی نے داعش کے خلاف امریکن الائنس کو ایک نیا ڈرامہ قرار دیتے ہوئے کہا ہے کہ جو شیطان بزرگ امریکہ اقوام عالم کی مشکلات اور مصائب کا براہ راست ذمہ دار ہے۔ عالم اسلام میں جاری دہشت گردی اور قتل و غارت کے پیچھے سامراجی ہاتھوں کو چھپانا اب ناممکن ہے۔ان خیالات کا اظہار انہوں نے اسلام آباد میں ایک نجی ٹی وی چینل کو انٹر ویو دیتے ہوئے کیا،ان کاکہنا تھا کہ  امریکہ اپنی انسان دشمن ظالمانہ سامراجی پالیسیوں کے باعث اقوام عالم کی نظر میں نفرت کی علامت بن چکا ہے۔ پاکستان کے معاملات میں امریکہ سمیت دیگر ممالک کی مداخلت ناقابل قبول ہے ۔ نیا پاکستان امریکی غلامی سے آزاد ہونا چاہیئے۔ انہوں نے کہا کہ 17 ستمبر کے دن شہید ناموس رسالت (ص) سید رضا تقوی امریکن کونصلیٹ کے سامنے کراچی میں گولیوں کا نشانہ بنے۔ کراچی سمیت ملک بھر کے عاشقان رسول نے گستاخانہ خاکوں کے خلاف احتجاج کرکے یہ ثابت کیا کہ ناموس مصطفی (ص) کیلئے ہم اپنا سب کچھ قربان کر دیں گے۔ علامہ مقصود علی ڈومکی نے کہا کہ پاکستان میں اب بہت بڑی تبدیلی آ چکی ہے۔ یہ عوامی شعور اور بیداری وی آئی پی کلچر اور استحصالی نظام کے خلاف ہے۔ کراچی میں وی آئی پی کلچر کے خلاف عوامی آواز کو مقتدر طبقہ سن لے اگر ملک کے بھوکے اور ننگے عوام نے غربت مہنگائی دہشت گردی اور بے روزگاری سے تنگ آکر محلات کا رخ کیا تو محلات نشینوں کا انجام عبرت ناک ہوگا۔ انہوں نے کہا کہ عمران کے خونی انقلاب کا مطلب خانہ جنگی نہیں بلکہ مجرموں کا احتساب ہے۔

وحدت نیوز(چنیوٹ) مجلس وحدت مسلمین کے فلاحی شعبہ خیرالعمل فا ئونڈیشن کی طرف سے ضلع چنیوٹ کے سیلاب سے متاثرہ علاقوں مہدی آباد، ٹھٹھہ محمد شاہ، سانگرہ، بورج پودا،ڈھیر سیداں اور بورج سرگانہ میں 300 سے زائد خاندانوں میں راشن تقسیم کر دیا گیا جس میں آٹا،چاول،گھی، چائے اور دالیں شامل ہیں اس موقع پر خیرالعمل فا ئونڈیشن پنجاب کے سیکر ٹری فلاح وبہبود مسرت کاظمی، خیرالعمل فائوندیشن پنجاب کے ایگزیکٹو ممبر محمد سرور کھوسہ،ایم ڈبلیو ایم ضلع اٹک کے سیکر ٹری جنرل مولانا نیاز حسین ،خیرالعمل فائونڈیشن کی مرکزی ایتام کمیٹی کے ممبر اخترعباس اور ایم ڈبلیو ایم کے مرکزی سیاسی سیل کے ممبران عاشق بخاری اور اخلاق بخاری موجود تھے اس موقع پر گفتگو کرتے ہوئے خیرالعمل فائونڈیشن پنجاب کے سیکرٹری فلاح و بہبود مسرت کاظمی نے کہا کہ پورے پنجاب میں مجلس وحدت مسلمین  کے رضا کار دن رات امدادی سر گر میاں جاری رکھے ہوئے ہیں متاثرین کی مشکلات بے حد زیادہ ہیں اور اب تک حکومتی سطح پر کی جانیوالی  کوششیں صفر ہیں جس کی وجہ سے قومی جماعتوں ،فلاحی اداروں اور مخیر حضرات کی ذمہ داریاں مزیدبڑھ گئی ہیں ۔مجلس وحدت مسلمین کے فلاحی شعبہ خیرالعمل فائونڈیشن کے مسئو لین نے امدادی سر گر میوں کے ساتھ ساتھ نقصانات کا سروے بھی شروع کر دیا ہے ا نشاء اللہ ریلیف و ریسکیو کے ختم ہو تے ہی بحا لی و تعمیر نو کے مرحلے میں بھی بڑھ چڑھ کر حصہ لیں گے اور اس وقت تک پیچھے نہیں ہٹیں گے جب تک متاثرین  اپنی سابقہ حالت میں واپس نہیں لوٹ جاتے ۔ انہوں نے کہا کہ 2010 کے سیلاب متاثرین کی اب تک بحالی کے منصوبہ جات پر خیرالعمل  فائونڈیشن کے کاموں کا جاری رہنا اس بات کا ثبوت ہے کہ ہم مستقل مزاجی کے ساتھ عوام کے دکھ درد میں شریک ہیں ۔

وحدت نیوز(اسلام آباد) مجلس وحدت مسلمین پاکستان کے رہنما اور ممبر مذاکراتی کمیٹی سید اسد عباس نقوی نے ہنگامی پریس کانفرنس سے خطاب کرتے ہوئے کہا کہ ہم حکومت کی جانب سے کئے جانے والے کریک ڈائون کی شدید مذمت کرتے ہیں ، 12ستمبر کو جو چھاپہ مارا گیا اور اس میں ایسے کارکنان کو گرفتار کیا گیا جن کا اس دھرنے سے کوئی تعلق نہیں تھا ایسے کارکنان جو فلڈریلیف کے حوالے سے امدادی سرگرمیوں میں مصروف تھے اُن کو گرفتار کیا گیا اور دہشت گردی کے مقدمات کے تحت جیلوں میں دہشت گردوں اور کالعدم تنظیموں کے مجرموں کے ساتھ رکھا گیا ہے ، جہاںکسی بڑے حادثے کا بھی خطرہ لاحق ہے اور ان کو کسی تک پہنچے کی رسائی حاصل نہیں۔ حکومت نے ظلم و ستم کا بازار گرم کر رکھا ہے ملک بھر میں کارکنان کو ہراساں کیا جارہا ہے اس ملک میں جمہوریت نہیں بادشاہت ہے یاد رکھیں حکومتیں کفر سے تو قائم رہ سکتی ہے مگر ظلم سے نہیں ۔

اُن کا کہنا تھا کہ حکمران مذاکرات میں سنجیدہ نہیں طاقت کے ذریعے ہمیں راستے سے ہٹانے کی کوشش ان کی بھول ہے ہمارے مطالبات آئینی اور قانونی ہے اور اس سے ہم ایک قدم بھی پیچھے ہٹنے کو تیار نہیںاپوزیشن جرگے کے اقدامات قابل تحسین ہیں لیکن حکمرانوں کی ہٹ دھرمی اور بادشاہانہ طرز حکمرانی نے ان سیاسی رہنماوُں کی محنت پر بھی پانی پھیر دیا ہے ۔

کشمیر اور ملک کے دیگر علاقوں سے آئے ہوئے اسکائوٹس اور میڈیکل ریلیف کے ارکان کو بھی گرفتار کیا گیا ہے ۔ حکومت کو خبردار کرتے ہیں کہ اگر بے گناہ افراد کو نہ چھوڑا گیا تو سخت احتجاج کریں گے اور کارکنان کی رہائی تک احتجاج جاری رکھا جائے گا ،پریس کانفرنس میں صوبائی سیکرٹری جنرل بلوچستان علامہ مقصود علی ڈومکی، علامہ علی شیر انصاری اور علامہ ضیغم عباس صاحب بھی موجود تھے اور میڈیا کے نمائندگان نے بھی کوریج کے لئے کثیر تعدادمیں شرکت کی۔

وحدت نیوز(اسلام آباد) مجلس وحدت مسلمین پاکستان کے مرکزی ڈپٹی سیکریٹری جنرل علامہ امین شہیدی نے جامعہ کراچی کے استاد، اسلامک اسٹڈیز فیکلٹی کے ڈین پروفیسر ڈاکٹر شکیل اوج کی شہادت کے واقعہ کی مذمت کرتے ہوئے کہا ہے کہ ڈاکٹر شکیل اوج کا قتل علم دوست معاشرے کا قتل ہے، دہشت گرد ملک و قوم کو جہالت کے اندھیروں میں دھکیلنا چاہتے ہیں، کراچی میں آرٹیکل 245 کا نفاذ کرتے ہوئے وزیرستان طرز کا فوجی آپریشن کیا جائے۔ ان خیالات کا اظہار انہوں نے وحدت میڈیا سیل سے جاری ایک مذمتی بیان میں کیا۔ علامہ امین شہیدی کا کہنا تھا کہ یہ کیسا آپریشن ہے کہ جس میں دہشت گرد آزادانہ طور پر اپنی کارروائیاں کررہے ہیں، سندھ حکومت محض زبانی جمع خرچ کرنے کے بجائے عمل اقدامات پر توجہ کرتے ہوئے ڈاکٹر شکیل اوج کے قاتلوں کو گرفتار کرکے سرعام پھانسی دے۔

علامہ امین شہیدی کا مزید کہنا تھا کہ اساتذہ کا قتل کرنے والے کسی بھی صورت وطن دوست نہیں ہوسکتے، ڈاکٹر شکیل اوج جیسی علم دوست شخصیت کا قتل معاشرے کو جہالت کے اندھیروں میں دھکیلنے کی سازش ہیں، اس سازش کے ذریعے دہشت گرد چاہتے ہیں لوگ دہشت گردی کیخلاف آواز بلند کرنا چھوڑ دیں لیکن دہشت گردوں کا خواب چکنا چور ہوچکا ہے، ڈاکٹر شکیل اوج کی شہادت معاشرے کو مزید علم دوستی کی جانب راغب کرنے کا باعث بنے گی۔