وحدت نیوز(سکھر) جمعتہ لوداع کے موقع پر مجلس وحدت مسلمین پاکستان ضلع سکھر، وحدت یوتھ ونگ، مجلس علمائے مکتب اہل بیتؑ ، وحدت لیڈیز ونگ، دیگر ملی تنظیموں سمیت علماء کی قیادت مین بزرگان، خواتین و بچوں نے کثیر تعداد نے جامع حیدری مسجد پرانہ سکھر سے پریس کلب سکھر تک یوم القدس کی ریلی زیر قیادت چیئرمین القدس کمیٹی سکھر علامہ سید مٹھل شاھ نقوی نکالی۔

ریلی قبلہ اول بیت المقدس پر قابض صیہونی اسرائیل کے خلاف اور مظلومین فلسطین کے حمایت میں نکالی گئی.ریلی پریس کلب سکھر پہنچ کر احتجاجی مظاہرے میں تبدیل ہو گئی۔

احتجاجی مظاہرے سے مجلس وحدت مسلمین پاکستان صوبہ سندھ کے جنرل سیکرٹری چوہدری اظھر حسن، مجلس وحدت مسلمین پاکستان ضلع سکھر کے صدر محسن سجاد اتراء ایڈووکیٹ، ڈویژنل جنرل سیکریٹری وحدت یوتھ سید کاشف شاہ نقوی و دیگر تنظیموں کے عہدیدار و علماء کرام نے خطاب کرتے ہوئے کہا کہ اسرائیل اب تک غزہ میں لاکھون نہتے فلسطینیوں کو بے دردی سے شہید کر چکا، ہسپتالوں، مساجد، اسکولوں اور رہائشی یونٹس پر جنگ عظیم دوئم سے زیادہ بارود برسایا ہے لیکن ان خدا کے شیروں کے خلاف کوئی خاطر خواہ کامیابی حاصل نہیں کر سکا اور نہ ہی انکے حوصلے پست ہوئے ہیں۔

مقررین کا کہنا تھا کہ غزہ کی مظلوم عوام کی استقامت نے دنیا کو حیران کر دیا ہے، اسرائیل کا بیانیہ دنیا نے مسترد کر دیا، آج دنیا میں غزہ اور مظلومین فلسطین کے حق میں باتیں ہو رہی ہیں، امریکہ کو شکست ہوئی ہے اسرائیل کو شکست ہوئی ہے، غزہ کے دو پہلو ہیں ایک اسرائیل کا سیاہ ظالمانہ اور مکروہ چہرہ ہے، دوسرا خوبصورت پہلو غزہ کے مظلومین کی استقامت اور بہادری کی صورت میں ہے۔

ان کا مزید کہنا تھا کہ امریکہ اور اس کے حواریوں کی اسرائیل فرنٹ لائن ہے، غزہ میں اسرائیلی شکست تمام استکباری قوتوں کی شکست ہو گی، اس لیے امریکہ تمام تر وسائل اور امکانات کیساتھ اسرائیل کی پشت پناہی کر رہا ہے لیکن شکست فاش ان جنایت گروں کا مقدر ٹھہرے گی۔

انہوں نے کہا کہ فلسطینی مظلومین اپنی جنگ نہیں لڑ رہے، پوری انسانیت اور اسلام کی جنگ لڑ رہے ہیں، ہم سب کی زندگیوں اور اقدار کا دفاع فلسطین میں ہو رہا ہے، سلام ہو فلسطینی مظلومین پر جنہوں نے ماہ رمضان میں صبر واستقامت کی لازوال مثال قائم کر دی، یہ غزہ کے معصوم و مظلوم ہیں جن پر خدا کی ذات قرآن کریم میں دُرود بھیج رہی ہے، غزہ کی پوری نسل قرآنی نسل ہے۔غزہ کے مظلوموں نے اسرائیل کی طاقت کو توڑ دیا ہے، فلسطینی عوام کے صبر و استقلال نے اسرائیلی گھمنڈ اور غرور خاک میں ملا دیا، مستقبل میں فلسطینی عوام کی استقامت کو تعلیمی اداروں کے نصاب میں پڑھایا جائے گا، غاصب صہیونی ریاست اپنے تمام تر سفاکانہ اور وحشیانہ ہتھکنڈوں کے باوجود نابودی کی طرف تیزی سے بڑھ رہی ہے.مظاہرین نے اسرائیل کے خلاف شدید نعرے بازی کی اور اسرائیلی پرچم کو نذر آتش کیا.

وحدت نیوز(گنداواہ)یوم القدس کے موقع پر مظلوم فلسطینی عوام کے ساتھ اظہار یکجہتی کے لئے بلوچستان کے ضلع جھل مگسی کی تحصیل گنداواہ میں مجلس وحدت مسلمین، شیعہ علماء کونسل، مجلس علماء اہلبیت اور معرفت فاؤنڈیشن کی جانب سے مشترکہ ریلی و احتجاجی مظاہرہ کیا گیا۔ اس موقع پر مظاہرین نے اسرائیل اور امریکہ کے خلاف نعرے بازی کی اور مظلوم فسلطینی عوام پر جاری ظلم و ستم کو ختم کرنے کا مطالبہ کیا۔ مظاہرے میں مجلس وحدت مسلمین کے صوبائی جنرل سیکرٹری مولانا سہیل اکبر شیرازی، شیعہ علماء کونسل کے ضلعی صدر مولانا غلام مصطفٰی عابدی، معرفت فاؤنڈیشن کے جنرل سیکرٹری مولانا سعید احمد سعیدی، مجلس مکتب علماء اہلبیت کے ضلعی صدر مولانا علی نواز، مجلس وحدت مسلمین بلوچستان کے سیکرٹری روابط سید گلزار شاہ، سید زاہد شاہ حسینی و دیگر نے خصوصی شرکت کی۔

مظاہرہ سے مجلس وحدت مسلمین پاکستان صوبہ بلوچستان کے جنرل سیکرٹری علامہ سہیل اکبر شیرازی نے خطاب کرتے ہوئے کہا کہ رہبر کبیر آیت العظمیٰ امام خمینی رح نے رمضان المبارک کے آخری جمعہ کو یوم القدس کے نام سے موسوم کیا۔ اس دن کو فلسطینی عوام کی حمایت اور ان کے حقوق کی یاد دہانی کے لئے منایا جاتا ہے۔ تاکہ دنیا کو یہ یاد دلایا جا سکے کہ القدس نہ صرف مسلمانوں کے لئے، بلکہ تمام انسانیت کے لئے ایک مقدس مقام ہے۔ انہوں نے کہا کہ القدس وہ سرزمین ہے جہاں انبیاء علیہ السلام نے انسانیت کو امن، انصاف اور محبت کا درس دیا۔ یوم القدس صرف ایک دن نہیں، بلکہ یہ ظالم کے خلاف مظلوم کی حمایت کا اعلان ہے۔ یہ دن ہمیں یاد دلاتا ہے کہ ہم فلسطینی عوام کے حق میں اپنی آواز بلند کریں اور ان کے حقوق کی بحالی کے لئے عملی اقدامات کریں۔

انہوں نے کہا کہ ہم فلسطین کے مظلوم عوام کو یقین دلاتے ہیں کہ ان کے درد، دکھ اور قربانیاں صرف ان کی نہیں ہیں، بلکہ یہ ہم سب کے دلوں کو جھنجھوڑ رہی ہیں۔ ہم ان معصوم بچوں کی آہیں سن رہے ہیں۔ ان ماؤں کے آنسو دیکھ رہے ہیں اور ان جوانوں کی قربانیوں کو سلام پیش کر رہے ہیں جو اپنے وطن کی آزادی کے لئے صف اول میں ہیں۔ انہوں نے کہا کہ ہم القدس کی آزادی کے لئے اس عزم کا اظہار کرتے ہیں کہ اس مقدس سرزمین پر ہونے والے مظالم کو دنیا کے سامنے بے نقاب کرتے رہیں گے۔ انہوں نے تمام عالم اسلام سے اپیل کرتے ہوئے کہا کہ وہ اپنے اختلافات کو بھلا کر اتحاد کا مظاہرہ کریں اور القدس کی آزادی کے لئے ایک صف میں کھڑے ہوں۔ القدس کا دفاع ہم سب کی مشترکہ ذمہ داری ہے اور ہم سب کو یہ یاد رکھنی چاہئے کہ جب تک القدس آزاد نہیں ہوگا، ہماری روحیں بے چین رہیں گی۔

وحدت نیوز(جیکب آباد)عالمی یوم القدس پر رہبر کبیر آیت اللہ خمینی رح کے فرمان پر پوری دنیا کی طرح جیکب آباد میں بھی القدس ریلی نکالی گئی۔ اس موقع پر فلسطین کے مظلوم مسلمانوں سے یکجہتی کرتے ہوئے شہدائے بیت المقدس سے تجدید عہد کیا گیا۔ بچوں اور بزرگوں سمیت عوام کی بڑی تعداد یوم القدس کی ریلی میں شریک ہوئی اور فلسطینی عوام سے مشکل کی اس گھڑی میں یکجہتی کا اظہار کیا۔ مظاہرین نے فلسطین کے پرچم، شہید حسن نصراللہ، یحییٰ سنوار اور دیگر شہداء کی تصادیر اور مختلف پلے کارڈز اٹھائے تھے۔ جبکہ اسرائیل اور امریکہ کیخلاف نعرے بازی کرتے ہوئے مظاہرین نے فلسطین پر جاری بربریت کی مذمت کی۔ اس موقع پر مجلس وحدت مسلمین پاکستان کے مرکزی رہنماء علامہ مقصود علی ڈومکی، ضلعی صدر نذیر حسین جعفری، ڈویژنل صدر وحدت یوتھ سید کامران علی شاہ، اصغریہ آرگنائزیشن پاکستان کے ضلعی صدر عاشق حسین پٹھان، جعفریہ الائنس کے ڈویژنل صدر وزیر علی مشہدی، آئی ایس او کے ضلعی جنرل سیکرٹری بلاول علی ڈومکی اور انصاف اسٹوڈنٹس کے ضلعی صدر سمیر علی نے خطاب مظاہرین سے کیا۔

القدس ریلی سے خطاب کرتے ہوئے علامہ مقصود علی ڈومکی نے کہا کہ ہم شہدائے فلسطین اور تحریک آزادی بیت المقدس کے عظیم شہداء سے عہد کرتے ہیں کہ ہم ان کی راہ کو ان کے مشن کو اور تحریک آزادی بیت المقدس کو آگے بڑھائیں گے۔ انہوں نے کہا کہ آج حماس حزب اللہ انصار اللہ یمن فلسطین کے لئے میدان میں لڑ رہی ہے، مگر امارت اسلامیہ افغانستان اور طالبان کے امیر کیوں اسرائیل اور امریکہ کے خلاف ایک لفظ تک بولنے کے لئے تیار نہیں ہیں۔ جبکہ فلسطین میں 50 ہزار سنی مسلمان ذبح ہو چکے ہیں۔ سعودی عرب، مصر اور اردن آج کیوں امریکہ اور اسرائیل کے ساتھ شریک جرم ہیں۔

اس موقع پر خطاب کرتے ہوئے سید کامران علی شاہ نے کہا کہ پوری دنیا کے مسلمان رہبر معظم حضرت آیت اللہ سید علی خامنائی اور رہبر کبیر حضرت امام خمینی رحمۃ اللہ علیہ کے حکم پر لبیک کہتے ہوئے مظلوم فلسطینیوں کے حق میں نکلے ہیں۔ عاشق حسین پٹھان نے کہا کہ پوری دنیا کے مسلمان اسرائیلی ظلم و بربریت کے خلاف سراپا احتجاج ہیں۔ زوار وزیر علی مشہدی نے کہا کہ فلسطین اور بیت المقدس کی آزادی تک ہماری جدوجہد جاری رہے گی۔ اس موقع پر خطاب کرتے ہوئے نذیر حسین جعفری نے کہا کہ مجلس وحدت مسلمین اپنے فلسطینی بھائیوں کے ساتھ ہے۔ پاکستان کے عوام دو ریاستی حل کو کبھی تسلیم نہیں کریں گے۔ فلسطین پورے کا پورا فلسطینیوں کا ہے۔

وحدت نیوز(لاہور) ایم ڈبلیو ایم پنجاب اورآئی ایس او لاہور ڈویژن کے زیراہتمام اسلامپورہ سے پنجاب اسمبلی تک مرکزی القدس ریلی ریلی نکالی گئی۔ ریلی میں شرکاء نے پلے کارڈ اور بینر اٹھا رکھے تھے۔ جن پر اسرائیل کے ظلم ستم کیخلاف اور غزہ کے مسلمانوں کی حمایت میں نعرے درج تھے۔ ریلی کی قیادتایم ڈبلیو ایم پنجاب کے صدر علامہ سید علی اکبر کاظمی، آئی ایس او پاکستان کے مرکزی نائب صدر ثاقب علی، ممتاز عالم دین علامہ سید جواد موسوی، سابق مرکزی صدر حسن عارف، مولانا اسد نقوی، ، مولانا ظہیر کربلائی، ڈی جی خانہ فرہنگ ایران ڈاکٹر اصغر مسعودی سمیت دیگر رہنماوں نے کی۔ ریلی کے شرکاء نے شہید مقاومت سید حسن نصراللہ، شہید ہاشم صفی الدین، شہید سردار قاسم سلیمانی، شہید اسماعیل ہنیہ اور شہید یحیٰ سنوار سمیت شہدائے مقاومت کی تصویریں اور فلسطین کے پرچم، بینرز اور پلے کارڈ اُٹھا رکھے تھے۔

ریلی کے روٹ پر جگہ جگہ اسرائیلی اور امریکی پرچم سٹرک پر بچھائے گئے تھے، جن کو شرکاء ریلی اپنے پیروں تلے روند کر امریکہ و اسرائیل سے اظہار برائت کرتے رہے۔ ریلی کے شرکاء حماس، حزب اللہ، یمنی مجاہدین انصاراللہ اور فلسطینیوں کے حق میں نعرے بازی کرتے رہے۔ فضا ساڑھے 5 گھنٹے تک مسلسل مردہ باد امریکہ، مردہ باد اسرائیل کے فلک شگاف نعروں سے گونجتی رہی۔ قدس ریلی سے خطاب کرتے ہوئے رہنماؤں نے کہاکہ یوم القدس فلسطین، کشمیر، عراق، شام، یمن اور پارہ چنار کے مظلومین کی داد رسی کا دن ہے۔ حضرت امام خمینی ؒنے دنیا کو متوجہ کیا تھا کہ اسرائیل کا ناپاک وجود اس سرزمین پر ایک ناسور کی مانند ہے۔ عالم اسلام کو چاہئے کہ اس ناسور کو جڑ سے اکھاڑ دے۔ انہوں ںے کہا کہ اسرائیلی ناسور کا واحد علاج اس کا خاتمہ ہے، ان شاءاللہ یہ سال اس سرطانی پھوڑے کے خاتمے کا سال ہوگا۔

مقررین نے مزید کہا کہ پاکستان کا فلسطین کاز کیساتھ ایک تاریخی رشتہ ہے، جسے کسی کو ختم کرنے نہیں دیا جائے گا، قائداعظم محمد علی جناح ہم پاکستانیوں کے قائد ہیں، جنہوں نے یہ بتایا کہ اسرائیل ایک جعلی ریاست ہے اور پاکستان اسے تسلیم نہیں کرے گا، پاکستان میں اسرائیل کیلئے کام کرنیوالے ملک دشمن عناصر ہیں، اُن کا ہر سطح پر مقابلہ کریں گے۔ حکومت پاکستان نظریہ قائداعظم کے مطابق مسئلہ فلسطین پہ اپنا اصولی موقف واضح کرے، پاکستان اسلام کا قلعہ ہے، ارضِ پاکستان میں سے نعرہ مسلسل گونج رہا ہے کہ اسرائیل ایک غاصب اور ناجائز ریاست ہے اور پاکستان اسے ہرگز تسلیم نہیں کرے گا۔ فلسطین فلسطینیوں کا ہے پاکستان کے عوام فلسطینی اور کشمیری عوام کے پشتیبان ہیں۔ یوم القدس کی ریلیوں میں ہزاروں روزہ دار افراد نے شرکت کرکے ثابت کر دیا کہ پاکستان میں اسرائیل کے ہمدردوں کی سرگرمیاں ہمیں کسی صورت قبول نہیں۔ مقررین کا مزید کہنا تھا کہ عرب دنیا کی حکومتوں نے اسرائیل کے سامنے اپنی عزت گروی رکھ دی ہے، یوم القدس کا احیاء ان عرب حکمرانوں کو اس تباہی اور بدبختی سے نکالنے کا دن ہے۔

انہوں نے کہا کہ دنیائے اسلام کے عرب و غیر عرب حکمران غاصب صیہونی ریاست اسرائیل کیساتھ اپنے تعلقات منقطع کر دیں، مسلم ممالک غاصب صیہونی حکومت کی غاصبانہ پالیسیوں کے مقابلے میں ڈٹ جائیں اور اس کی کوئی بھی سازش کامیاب نہ ہونے دیں۔ فلسطینی مجاہدین کا طوفان الاقصیٰ آپریشن جاری ہے۔ سید حسن نصراللہ ہمارے درمیان نہیں لیکن شہدائے مقاومت کی یاد، فکر اور مزاحمت کا راستہ زندہ ہے، حماس اور حزب اللہ کی فکر نے آج بھی دنیا بھر کے حریت پسندوں کو متحد کر رکھا ہے، ضرورت اس امر کی ہے کہ عوام اسرائیلی مصنوعات کا بائیکاٹ جنگ کے آغاز جیسا جاری رکھیں۔ مقررین کا مزید کہنا تھا کہ پارہ چنار کے لاکھوں عوام سات ماہ سے محصور ہیں۔ ملک دشمن عناصر کیخلاف فیصلہ کن آپریشن کرکے محاصرین پارا چنار کو امن کی فراہمی یقینی بنائی جائے۔ ٹل پارا چنار راستے کو فی الفور کھولا جائے اور بے گناہ اسیران کو رہا کیا جائے۔ ریلی کے آخر میں شرکاء کی طرف سے مظلوم فلسطینی مسلمانوں پر اسرائیلی و صیہونی جارحیت کی بھرپور مذمت اور مظلوم فلسطینیوں سے اظہار یکجہتی کرتے ہوئے اعلامیہ میں مطالبہ کیا گیا کہ او آئی سی میں شامل تمام اسلامی ممالک مسئلہ قدس کو حل کرانے میں اپنا ذمہ دارانہ کردار ادا کریں، اقوام متحدہ اور اکثر عرب ممالک کی مسئلہ قدس پر مجرمانہ خاموشی کی بھی مذمت کی گئی۔ ہم شہدائے مقاومت سے عہد اور عزم کا عہد کرتے ہیں کہ مظلوم فلسطینیوں کی حمایت جاری رکھیں گے۔ فلسطینیوں کو تنہا نہیں چھوڑیں گے۔ مسئلہ فلسطین کیخلاف ہونیوالی صیہونی سازشوں کو ناکام بنائیں گے۔