The Latest
وحدت نیوز(اسلام آباد) سربراہ مجلس وحدت مسلمین پاکستان سینیٹرعلامہ راجہ ناصرعباس جعفری حفظہ اللہ نے اپنے تعزیتی پیغام میں کہا ہے کہ صہیونی ریاست کے ہاتھوں فلسطینی مزاحمت کے ایک دلیر رہنما اور مقاومت کی علامت یحییٰ سنوار کی شہادت پر آزادی سے محبت کرنے والے مسلمانوں کی خدمت میں تعزیت پیش کرتا ہوں۔ اسرائیل کی جانب سے اس کی شبیہ کو داغدار کرنے کی کوشش کا رد عمل سامنے آیا ہے اور اس نے اسے ایک بہادر لیجنڈ میں تبدیل کردیا ہے، جو عالم اسلام اور عالمی جدوجہد آزادی کو متاثر کرے گا۔
سنوار کے آخری لمحات کی پُرجوش فوٹیج، اپنی آخری سانس تک بہادری سے لڑتے ہوئے، اس کی بہادری کو تاریخ میں نقش کر چکے ہیں۔ یہ طاقتور تصویر مزاحمت کو ہوا دے گی، چی گویرا جیسی مشہور شخصیت کے ساتھ اس کی حیثیت کو مستحکم کرے گی۔
سنور کی شہادت کوئی شکست نہیں بلکہ اس کی غیر متزلزل لگن کا منہ بولتا ثبوت ہے۔ ان کی وراثت کو شاعری، گیت اور دنیا بھر میں فلسطینیوں، عربوں اور مسلم آزادی پسندوں کے دلوں میں منایا جائے گا۔
اگرچہ اس کے نقصان کو گہرائی سے محسوس کیا گیا ہے، لیکن مزاحمت اٹوٹ ہے۔ اسرائیل کے ساتھ جنگ کا سلسلہ جاری رہے گا، لیکن سنوار کا جذبہ جہاد واندازِشہادت مستقبل کی فتوحات کو آگے بڑھائے گا۔ ہم ان کی یاد کا احترام کرتے ہیں اور اس دن کے منتظر ہیں جب فلسطینی، عرب اور دنیا بھر کے مسلمان آزادی اور انصاف کی خوشی منائیں گے۔خدا یحییٰ سنوار پر رحم کرے۔ ان کی قربانی کو کبھی فراموش نہیں کیا جائے گا۔
وحدت نیوز(اسلام آباد) مجلس علماء مکتب اہلبیت پاکستان کی مرکزی مجلس عاملہ کا اجلاس اسلام آباد میں مرکزی صدر علامہ سید حسنین عباس گردیزی کی صدارت میں منعقد ہوا، جس میں پاکستان کے تمام صوبوں اور ریاست کشمیر اور گلگت بلتستان سے صوبائی صدور اور جنرل سیکرٹریز سمیت مرکزی کابینہ کے اراکین نے شرکت کی۔
اجلاس عاملہ کی دونوں نشستوں میں ایجنڈے پر بھرپور گفتگو کی گئی اور آئندہ ہونے والے پروگرامز کی منظوری اور انہیں حتمی شکل دی گئی،اجلاس کے اختتام پر غزہ ولبنان کی موجودہ صورت حال پر انتہائی تشویش کا اظہار کیا گیا اور حماس کے سربراہ یحییٰ سنوار کی المناک شہادت کو عالم اسلام کا عظیم نقصان قرار دیا گیا، آپ مرد میدان اور عظیم مجاہد تھے جن کی ساری زندگی صہیونی ریاست کے ناجائز تسلط سے فلسطین کو آزاد کروانے میں گزری، اسرائیل وامریکی جارحیت اور مظالم کی بھر پور مذمت کی گئی، پاکستانی عوام آگے بڑھ کر مظلومین غزہ و لبنان کی امداد کرے، پاکستان سمیت تمام اسلامی ممالک سے مطالبہ کیا گیا کہ وہ فلسطین ولبنان پر ایک سال سے ڈھائے جانے والے انسانیت سوز مظالم رکوانے میں اپنی ذمہ داری اور موثر کردار ادا کریں۔
وحدت نیوز(جیکب آباد) موسم سرما کے آغاز کے سلسلے میں ضرورت مند افراد میں 200 سوئیٹر اور گرم کپڑے تقسیم کئے گئے۔ اس موقع پر تقریب سے خطاب کرتے ہوئے مجلس وحدت مسلمین پاکستان کے مرکزی رہنما علامہ مقصود علی ڈومکی نے کہا کہ روز افزوں مہنگائی غربت اور افلاس کے سبب لوگوں کی اکثریت دو وقت کی روٹی کے لئے پریشان ہے۔ عالمی اداروں کی رپورٹ کے مطابق پاکستان میں دس کروڑ سے زائد شہری خط غربت سے نیچے زندگی گذار رہے ہیں۔ ایسے میں موسم سرما کے سوئیٹر اور گرم ملبوسات کا خریدنا غریبوں کے لئے تقریبا ناممکن ہے۔ اہل خیر کو آگے بڑھ کر معاشرے کے غریب اور محروم طبقات کی مدد کرنی چاہیے۔
انہوں نے کہا کہ حکومت اور منتخب نمائندے عوام کے مسائل اور مشکلات سے مکمل طور پر لا تعلق ہو کر اپنے ذاتی مفادات اور بینک بیلنس بنانے میں مصروف عمل ہیں۔ جبکہ غربت اور مہنگائی نے عوام کا جینا مشکل بنا دیا ہے۔ پاکستان ایک عوامی انقلاب کی طرف بڑھ رہا ہے عوام کے غم اور غصہ کو اگر بروقت نہیں سمجھا گیا تو یہ لاوا ایک دن ضرور پھٹے گا اور عیش و عشرت میں غرق حکمران اس کا نشانہ بنیں گے۔
انہوں نے کہا کہ ہم میں سے ہر شخص کو اپنے پڑوس میں موجود غریب اور مفلس لوگوں کا سہارا بننا چاہئے۔ اس موقع پر تقریب سے مدرسہ خاتم النبیین جیکب آباد کے مولانا منور حسین سولنگی اور مجلس علمائے مکتب اہل بیت کے ضلعی رہنما مولانا ارشاد علی سولنگی نے خطاب کیا۔
وحدت نیوز(اسلام آباد)چیئرمین مجلس وحدت مسلمین پاکستان سینیٹر علامہ راجہ ناصر عباس جعفری نے میڈیا سیل سے جاری اپنے بیان میں کہا ہے کہ آرٹیکل 63اے کے بارے میں سپریم کورٹ کے چیف جسٹس فائز عیسی کا فیصلہ ملکی و قومی مفادات کے برعکس ہے، فیصلے کے اثرات قوم اور سیاسی استحکام کے لیے خطرناک ثابت ہوں گے، حالیہ آئینی ترمیم کے حوالے سے حکومت شدید اضطراب اور عجلت میں ہے، آئینی ترامیم کے حوالے سے پارلیمنٹ پر شدید دباؤ ڈالا جا رہا ہے، شنید ہے کہ چادر و چار دیواری کے تقدس کو پامال کیا جا رہا ہے، عوام شدید خوف و ہراس کا شکار ہیں اور ملک چھوڑ کر جا رہے ہیں، حالیہ فیصلے سے لوٹا کریسی کی راہ ہموار ہو گئی ہے اور پارٹی ڈسپلن کی خلاف ورزی کو قانونی ڈھال فراہم کر دی گئی ہے، لالچ اور دھونس دھاندلی کے زور پر اراکین پارلیمنٹ سے ان کی رائے خریدنے کا راستہ آپ نے کھول دیا ہے، جمہوریت یا آئین کی روح کیا اسی کا نام ہے۔؟ اس سے صاف ظاہر ہوتا ہے کہ یہ فیصلہ موجودہ حکومت کے حق میں جائے گا، جو پارلیمنٹ سے متنازع آئینی ترمیم منظور کروانے کی بھر پور کوشش میں لگی ہوئی ہے، سب دیکھیں گے کہ فیصلے کا مستقبل میں کس قدر غلط استعمال ہو گا۔
انہوں نے کہا کہ ڈاکٹر زرقا سمیت جس جس پر بھی دباؤ ڈالا جا رہا ہے ہم ان کے ساتھ ہیں، ہم کسی کو تنہاء نہیں چھوڑیں گے، ظلم کر کے کوئی جیت نہیں سکتا، یزید، نمرود، فرعون کی مثالیں آپ کے سامنے ہیں، کیا نیتن یاہو جیت گیا ہے، مجلس وحدت مسلمین اپنی بہن زرقا کے ساتھ کھڑی ہے، اس ملک میں طاقت کا قانون رائج کر کے جو اسے جنگل بنانا چاہتے ہیں انہیں بالآخر اس قوم کے سامنے جوابدہ ہونا پڑے گا، یہ امر انتہائی افسوس ناک ہے کہ جس فلور کراسنگ کا دروازہ انیس ستانوے میں میاں نواز شریف نے اپنے دوسرے دور حکومت میں خود بند کیا تھا اس شق کے خلاف آج پوری ن لیگ خود صف آراء بنی ہوئی ہے، جس میں بعدازاں پرویز مشرف نے ترمیم کی تھی، اس وقت سنہ انیس سو ستانوے میں جو شق شامل کی گئی تھی اس کا مقصد لوٹا کریسی کا راستہ روکنا تھا، جس کے تحت کسی بھی رکن اسمبلی کو پارٹی پالیسی کے خلاف ووٹ دینے یا اپنے لیڈر اور پارٹی کی پالیسی کے خلاف تقریر کرنے پر بھی نا اہل کیا جا سکتا تھا۔
وحدت نیوز(شکارپور) مجلس وحدت مسلمین پاکستان کے مرکزی سیکرٹری تنظیم سازی علامہ مقصود علی ڈومکی نے گوٹھ ماکوڑو کھوہارو اور چک کا دورہ کیا۔ اس موقع پر ضلعی رہنما عبدالعلی کھوہارو مجلس علماء مکتب اہل بیت کے صوبائی رہنما مولانا غلام رضا کھوہارو ایم ڈبلیو ایم تحصیل صدر فہیم حیدر جعفری تحصیل جنرل سیکرٹری علی رضا مہر ٹاؤن چک کے صدر گلشیر علی سیٹھار و دیگر ان کے ہمراہ تھے۔
اس موقع پر گفتگو کرتے ہوئے علامہ مقصود علی ڈومکی نے کہا کہ شہدائے راہ حق کے مشن اور مقصد کو زندہ رکھنا ہماری ذمہ داری ہے۔ جن شہداء نے حق و صداقت کی راہ پر چلتے ہوئے اپنی قیمتی جانوں کا نذرانہ پیش کیا اور راہ خدا میں قربان ہو گئے ان کی راہ کو زندہ رہنا چاہئے۔انہوں نے کہا کہ ہم بحیثیت مسلمان امت مسلمہ کے درد کو محسوس کرتے ہیں چاہے وہ مظلوم مسلمان فلسطین کے ہوں یا لبنان کے۔ امت مسلمہ کی مثال جسد واحد کی طرح ہے کہ جس کے اگر ایک عضو میں درد ہو تو پورا جسم تکلیف کو محسوس کرے۔
انہوں نے کہا کہ قائد وحدت کے حکم پر فلسطین اور لبنان کے مظلوم عوام کی مدد کے لئے ملک گیر مہم شروع کی گئی تنظیمی کارکن اور عوام اس مہم میں بھرپور حصہ لیں۔ انہوں نے کہا کہ شہدائے سانحہ شب عاشور جیکب آباد کی نویں برسی کے موقع پر جیکب آباد میں عظمت شہداء کانفرنس منعقد ہوگی۔ کانفرنس سے ممتاز عالم دین علامہ سید شہنشاہ حسین نقوی اور مجلسِ وحدت مسلمین پاکستان کے رہنما علامہ سید ظفر عباس شمسی و دیگر خطاب کریں گے۔
وحدت نیوز(کراچی)گزشتہ شب مجلس وحدت مسلمین پاکستان کراچی ڈویژن وضلعی کابینہ کورنگی کے بھرپور وفد نے کورنگی عوامی کالونی تھانہ کا دورہ کیا۔گزشتہ دنوں عوامی کالونی میں پیش آنے والے واقع میں گرفتار بے گناہ عزاداروں سے ملاقات کی۔
جن عزاداروں کے نام درج ایف آئی آر میں شامل نہیں تھے تفتیشی آفیسر سے ملاقات کے بعد ان عزاداروں کوکل رات ۳ بجے باعزت بری کروادیا گیااورباحفاظت طریقے سے اہل خانہ کے حوالے کردیا۔دیگر عزاداروں کوعدالت میں پیش کرنے کے بعد انشااللہ ضمانت پر رہا کردیا جائے گا۔
قبل ازیں گزشتہ شب مجلس وحدت مسلمین پاکستان کراچی ڈویژن وضلعی کابینہ کے بھرپور وفد نے کورنگی عوامی کالونی اور پاور ہاوس کا بھی دورہ کیا۔
گزشتہ دنوں عوامی کالونی میں پیش آنے والے سانحہ میں متاثر ہ عزاداروں کے اہل خانہ و علامہ جعفر سبحانی سے ملاقات کی اور درج ایف آئی ار میں نامزد عزاداروں کی ضمانت کے حوالے سے کی جانے والی پیش رفت سے آگاہ کیا۔
وہاں موجود نوجوانوں نے مجلس وحدت مسلمین پاکستان کی ڈویژنل و ضلعی قیادت پر اطمینان کا اظہار کیا۔ عوامی کالونی کی عوام نے قیادت کا شکریہ ادا کیا کہ اس مشکل وقت میں مجلس وحدت مسلمین پاکستان کی کاوشیں قابل تحسین ہیں۔
اس موقع پر مجلس وحدت مسلمین پاکستان کراچی کے وفد میں علامہ شیخ صادق جعفری، علامہ مختار امامی، علامہ حیات عباس، علامہ مبشر حسن، سید رضی حیدر رضوی، معمبر رضا، عمران نقوی، دانش زیدی، یاسر عباس،بابر علی، نواز کھوکھر، غلام عباس، آفتاب علی،شاہزیب اور دیگر افراد شامل تھے۔
وحدت نیوز(کراچی)مجلس وحدت مسلمین پاکستان کراچی ڈویژن کے صدر علامہ صادق جعفری علامہ مبشر حسن ۔علامہ حیات عباس نے اے ٹی سی کورٹ کے باہر میڈیا کے نمائندگان سے گفتگو کرتے ہوے کہا کہ ملک کو نااہل حکمرانوں اور دہشتگردی سے نجات دینے کیلئے شیعہ و سنی مل کر سیاسی جدوجہد جاری رکھیں گے، حکمران چاہتے ہیں کہ عوام کو اپنے جبر سے ڈرا دیں تاکہ ان کے ناپاک عزائم کامیاب ہو جائیں پاکستان کی سر زمین پر پاکستان کی قوم کو مختلف طریقوں سے دہشتگردی ،مذہبی منافرت ،انتہا پسندی ،لسانیت کے ذریعہ خوف پھیلاکردہشتگردوں پالا جا رہا ہے ملک میں گرہوں اورلشکر بنائے گئے تاکہ ہمارے اس معاشرے کو کمزور کیا جائے ، 25کڑور عوام کا ملک کمزور کر دیا جائے، مظلوموں کی حمایت اور شیعہ سنی وحدت کا اسکرپٹ ہمارا ہے،جس کے رائٹر قائد شہید عارف حسینی ہیں، ملک کو دہشت گردی سے نجات دینے کیلئے شیعہ و سنی مل کر سیاسی جدوجہد جاری رکھیں گے۔
رہنماؤں نے کہا کہ ملک کی سیاست بدل رہی ہے،عوام نے استحصال کرنے والی جماعتوں کو یکسر مسترد کردیا ہےپاکستان میں مکتب تشیع کو یہ اعزاز حاصل ہے کہ سب سے پہلے فرعونی صہیونی دہشتگردی کے اس نظام کو قائدشہید علامہ شہید عارف الحسینی نے توڑ ا اور عالمی استعماری قوتوں کو پاکستان میں شکست دی، آج ملک میں دہشتگردی کی اس فضا کو ناکام بنانے کیلئے افکار شہید عارف حسین الحسینی کی ضرورت ہے، آج بھی اس ملک میں تکفیری قوتیں اس ملک کی جڑوں کو کمزور کر رہی ہیں، ملک کے بیش تر صوبے ان دہشتگرد تکفیریوں قوتوں کے اثر میں ہیں خیبرپختوخواہ، پنجاب، سندھ اور گلگت و بلستان میں کئی علاقے ان دہشتگردوں کے زیر اثر ہیں اور مسلسل شیعہ و سنی مسلمانوں کو نقصان پہچا رہے ہیں اور کفر کے فتوی ٰدیئے جا رہے ہیں اور ان کا ساتھ وہ لوگ دے رہے ہیں جوقیام پاکستان کے خلاف تھے اور اب اس ملک کی جڑوں کو کھو کھلا کر رہے ہیں۔
وحدت نیوز(کراچی) عمار یاسرسوسائٹی سروے نمبر595 کے مکینوں کی گیس بندش کی دیرینہ شکایت پرمجلس وحدت مسلمین کی خصوصی درخواست کے بعد سوئی سدرن گیس کمپنی ملیر زون کے جنرل مینیجر محمد اسلم قریشی صاحب کی خصوصی ہدایات پر 63mm کی نئی polyethylene pipeline ڈال دی گئی ہے۔
مجلس وحدت مسلمین ضلع ملیر کے صدر سید احسن عباس رضوی، ڈپٹی جنرل سیکریٹری سید ممتاز مہدی، معروف سماجی رہنما سید اختیار امام رضوی اور سید اظہر عباس رضوی نے ترقیاتی کام کا معائنہ کیا اور اہل علاقہ سے ملاقات بھی کی ۔
اہل محلہ نے اس دیرینہ مسئلے کے حل پر سوئی سدرن گیس کمپنی ملیر زون کی انتظامیہ اور مجلس وحدت مسلمین کا بے حد شکریہ ادا کیا جن کی خصوصی توجہ کے سبب اس سنگین مسئلے سے نجات حاصل ہوئی۔انشاءاللّٰہ بہت جلد پورے ملیر زون میں SSGC کی جانب سے یہی جدید اور پائیدار polyethylene پائپ ڈالے جائیں گے۔
وحدت نیوز(کراچی) دعا کمیٹی صوبائی سکریٹریٹ مجلس وحدت مسلمین سندھ کے تحت ہفتہ وار مرکزی اجتماعی دعائے توسل و جشن ولادت باسعادت حضرت امام حسن عسکری علیہ السّلام کا انعقاد محفل شاہ خراسان روڈ پر کیا گیا ۔
دعا کی تلاوت مولانا نعیم الحسن نے کی جبکہ ثاقب رضا ثاقب ، نایاب زیدی ، محمد علی جلالوی، اسد لاکھانی، راشد جلالوی، علی کوثر، عباس نقوی، شعیب حسن نے بارگاہ امامت میں نذرانہ عقیدت پیش کی، مولانا نعیم الحسن ، ناصر الحسینی نے خطاب کیا اور امام حسن عسکری علیہ السّلام کے زندگی پر روشنی ڈالی جس میں مومنین و خواتین نے شرکت کی۔
اس موقع پر شاہ کفیل، شاہنواز، مولانا مختار علی، قمر عباس نے شرکت کی ۔آخر میں مریضوں بلالخصوص مولانا اظہر حسین نقوی کی جلد صحت یابی کیلئے دعا کی اور شہدائے ملت جعفریہ پاکستان، شہدائے فلسطین، لبنان و کل مرحومین کے ایصال ثواب کیلئے فاتحہ خوانی کی گئی۔
وحدت نیوز(کراچی)مجلس وحدت مسلمین اورشیعہ علماء کونسل کےوفد کی ڈی آئی جی پولیس ایسٹ زون غلام اظفر مہیسر سے ملاقات۔ عوامی کالونی کورنگی میں کا لعدم جماعت کے دہشتگردوں کے حملے میں زخمی ہونے ہونے اور بلا جرم گرفتار ہونے والے عزاداران کے مسائل پر گفتگوکی گئی۔
ڈی آئی جی صاحب نے میرٹ پر انوسٹی گیشن کرنے کے لئے ایس ایس پی کورنگی کو خود میرٹ پر انکوائری صادر کرنے کا حکم دیا اور شر پسند عناصر کے خلاف کاروائی کرنے کا حکم دیا۔
اس موقعے پر ایس ایس پی آپریشن کورنگی کامران صاحب اور دیگر افسران بھی موجود تھے۔وفد میں مولانا صادق جعفری، مولانا جعفر سبحانی، مولانا حیات عباس نجفی کربلائی ،سید رضی حیدر رضوی اور عوامی کالونی اور پاور ہاوس کے تنظیمی اور علاقائی ذمہ داران شامل تھے۔
