وحدت نیوز(اسلام آباد) مجلس وحدت مسلمین، امامیہ اسٹوڈنٹس آرگنائزیشن پاکستان سمیت دیگر شیعہ تنظیموں کے زیراہتمام امام خمینی (رہ) کے فرمان پر مظلوم فلسطینیوں کی حمایت میں عالمی یوم القدس منایا گیا، پنجاب، سندھ، بلوچستان، کے پی کے، آزاد کشمیر اور گلگت بلتستان سمیت ملک کے 2300 سے زائد مقامات پر القدس ریلیاں نکالی گئیں اور غزہ میں جاری اسرائیل مظالم کی شدید مذمت کی گئی۔ اسلام آباد میں مجلس وحدت مسلمین اور آئی ایس او کے زیراہتمام مرکزی ریلی امام بارگاہ جی سکس ٹو اثناء عشری سے ڈی چوک پارلیمنٹ ہاوس تک نکالی گئی، جس کی قیادت ایم ڈبلیو ایم کے سربراہ علامہ ناصر عباس جعفری نے کی، اس موقع سنی اتحاد کونسل کے سربراہ صاحبزادہ حامد رضا اور اقلیتی رہنماء جے سالک بھی موجود تھے۔ ریلی میں خواتین اور بچوں کی بڑی تعداد موجود تھی جنہوں نے ہاتھوں میں پلے کارڈز، بینرز اور فلسطین کے جھنڈے اٹھا رکھے تھے۔

 
ریلی سے خطاب کرتے ہوئے مجلس وحدت مسلمین کے سیکرٹری جنرل علامہ ناصر عباس جعفری نے کہا کہ غزہ میں جاری مظالم کی تاریخ انسانیت میں کوئی مثال نہیں ملتی، ایک طرف اسرائیل، زمین، سمندر اور فضا سے آگ برسا رہا ہے تو دوسری جانب مصر اور اردن نے اپنی سرحدیں بند کی ہوئی ہیں، جس کی جتنی مذمت کی جائے کم ہے۔ علامہ ناصر عباس جعفری نے کہا کہ یہ امت مسلمہ کیلئے ننگ و عار ہے کہ ڈیڑھ ارب مسلمان ہونے کے باوجود بھی صہیونی حکومت غزہ پر بمباری کر رہی ہے۔ انہوں نے کہا کہ میڈیا رپورٹس سے واضح ہوگیا ہے کہ غزہ پر حملوں میں نام نہاد سعودی حکمران اور مصری فوجی آمر جنرل سیسی ملوث ہیں اور ان کی شہ پر حماس کو ختم کرانے کیلئے یہ جنگ کرائی جا رہی ہے۔ عالم اسلام کے ان خائن حکمرانوں نے امت مسلمہ کے دل زخمی کر دیئے ہیں۔ اب وقت آگیا ہے کہ امت کو بیدار ہونا چاہیے اور ان نام نہاد مسلمان حکمرانوں کو اقتدار سے باہر کر دینا چاہیے۔ انہوں نے کہا کہ نواز شریف نے یوم سوگ کا اعلان کیا ہے لیکن قوم کا تقاضا ہے کہ وہ او آئی سی کا اجلاس بلائیں اور اس معاملے کو عالمی سطح پر اٹھائیں، یوم القدس کو سرکاری سطح پر منانے کا اعلان کیا جائے۔

ریلی سے خطاب کرتے ہوئے سنی اتحاد کونسل کے سربراہ صاحبزادہ حامد رضا نے کہا کہ اسرائیلی مظالم سے انسانیت بھی شرما گئی ہے، اسلامی ممالک کی خاموشی نے ثابت کر دیا ہے کہ یہ حکمران صہیونیوں کے ایجنٹ ہیں۔ عرب ممالک کے سربراہ کا منافقانہ رویہ پوری قوم نے دیکھ لیا ہے۔ ہم او آئی سی سے مطالبہ کرتے ہیں کہ وہ غزہ میں جاری مظالم بند کرائے۔ ریلی سے خطاب کرتے ہوئے امامیہ اسٹوڈنٹس آرگنائزیشن کے مرکزی سیکرٹری اطلاعات تجمل حسین نقوی نے کہا کہ امام خمینی رہ کے فرمان کے مطابق ہم میدان عمل میں ہیں۔ اگر عالم اسلام متحد ہوجائے تو صہیونیوں کو دنوں میں شکست دی جاسکتی ہے، سید حسن نصراللہ نے کہا تھا کہ اسرائیل کا وجود مکڑی کے جالے سے بھی کمزور ہے۔

وحدت نیوز(مظفر آباد) غزہ میں جاری صہیونی جارحیت کے خلاف مجلس وحدت مسلمین آزاد جموں و کشمیر کی ریاستی دارالحکومت میں مشعل بردارریلی، سینکڑوں کارکنوں نے ریلی میں شریک ہو کر اسرائیل کے خلاف غم و غصہ اور نہتے فلسطینیوں سے اظہار یکجہتی کیا، ریلی کا آغاز علمدار چوک مظفرآباد سے جس کی قیادت مجلس وحدت مسلمین آزاد کشمیر کے سیکرٹری جنرل علامہ سید تصور حسین نقوی الجوادی ،ناظم آئی آزاد کشمیر ریجن سید اشتیاق حسین سبزواری، صدر انجمن جعفریہ مظفرآباد میجر (ر)سید بشیر حسین کاظمی اور دیگر تنظیمات کے سربراہان نے کی، سینٹرل پریس کلب پہنچ کر ریلی نے جلسہ کی صورت اختیار کر لی، جہاں پر مرکزی سیکرٹری جنرل مجلس وحدت مسلمین پاکستان علامہ راجہ ناصر عباس جعفری نے خصوصی طور پر ٹیلیفونک خطاب کیا۔

مقررین نے خطاب کرتے ہوئے کہا کہ فلسطین کا مسئلہ امت مسلمہ کی اجتماعی غیرت و حمیت کا مسئلہ ہے لیکن کس قدر تشویشناک بات ہے کہ ملت اسلامیہ کے بے حس حکمران اقتدار کے نشے میں چور اپنے اپنے اقتدار کو دوام دینے کی جدوجہد میں مصروف اپنے ممالک میں حقوق بشر کی آواز کو دبانے میں مشغول ہیں ۔ مظلوم فلسطینیوں کے حق میں کوئی آواز نہیں اُٹھائی جا رہی ۔ مجلس وحدت مسلمین آزاد کشمیر کے سیکرٹری جنرل علامہ راجہ ناصر عباس جعفری نے اپنے خطاب میں کہا کہ اس وقت ہمیں متحد و منظم ہونا گا، آج جو اسرائیل فلسطین پر ظلم و بربریت کر رہا ہے دراصل مقاومت کے بلاک کو کمزور کر رہا ہے، انشاء اللہ وہ وقت دور نہیں کہ جب اسرائیل تباہ و برباد ہو گا، ایک آزاد و خود مختار فلسطینی ریاست کا قیام عمل میں آئے گا، علامہ راجہ ناصر عباس نے کہا کہ ہم ہر ظالم کے خلاف ہیں اور ہر مظلوم کے حامی بن کر میدان میں اترے ہیں ، فلسطین کو تین طرف سے گھیر لیا گیا ہے، فلسطین کی سرحدوں کو بند کر دیا گیا ہے، فلسطین میں بچوں کے لیئے دوائیں نا پید ہو گئی ہیں ، زندگی بچانے کے لیئے بھی کچھ بھی دستیاب نہ ہے

علامہ ناصر عباس جعفری نے کہا کہ میں سوال کرتا ہوں کہ یہ ظلم و بربریت نہیں تو کیا ہے، کہاں ہے مسلم دنیا جو خاموش تماشائی کا کردار ادا کر رہی ہے،ہم نے فلسطین کے مسلمانوں کے حق میں نکل کر بتا دیا کہ ہمارے ہاں کوئی شیعہ سنی مسئلہ نہیں ہے، ہم ایک ہیں ، ہم کسی بھی سنی کے خلاف نہیں ، نہ کوئی سنی ہمارے خلاف ہے ، ہم ایک دوسرے کے دکھ درد بانٹتے ہیں، ہم نے ملکر یہ ملک بنا یا ہے ،ہم تکفیریت کیے مخالف ہیں۔

انہوں نے اپنے خطاب میں اہلیان کشمیر کو مخاطب کرتے ہوئے کہا کہ غزہ کے لیئے آواز اُٹھانے پر میں آپ کو سلام پیش کرتا ہوں ۔مجلس وحدت مسلمین آزاد جموں و کشمیر کے سیکرٹری جنرل علامہ سید تصور حسین نقوی الجوادی نے اپنے خطاب میں کہا کہ کفر اس وقت ملت اسلامیہ کے خلاف متحد ہو چکا ہے لیکن مسلمان اپنے فروعی و جزوی نوعیت کے مسائل کو لیکر الجھ رہے ہیں۔ عرب حکمران جنہیں پوری امت مسلمہ کے لیئے مثالی کردار پیش کرنا چاہیے تھا۔ وہ امریکہ اور اسرائیل کے ہم پیالہ و ہم نوالہ بن چکے ہیں ۔کل وہ شام میں جنگ کے لیئے امریکہ کو اسلحہ اور اخراجات جنگ کی آفر کر رہے تھے، آج غزہ کی حمایت کے لیئے ایک گولی تو دور بات ہمدردی کے دو بو ل نہیں بول سکے ہیں۔ اسرائیلی منصوبہ کے مطابق پورے علاقوں کو یہودی سٹیٹ میں تبدیل کرنا ہے۔ لیکن مسلم دنیا کے حکمران مکمل طور پر خاموش بیٹھے ہوئے ہیں۔ جب غزہ میں زندگی دشوار ہو کر رہ چکی ہے۔

علامہ سید تصور حسین نقوی الجوادی نے کہا کہ گزشتہ روز خان یونس میں ایک ہی خاندان کے 28افراد لقمہ اجل بنے لیکن انسانی حقوق کے ادارے، اقوام متحدہ، او آئی سی اور عرب لیگ صرف تماشہ دیکھ رہے ہیں۔ 8جولائی سے اس و قت تک کئی خاندان مکمل طور پر تباہ چکے ہیں، لیکن خان یونس خان کے علاقے بنی سہلا کا واقعہ صہیونی سفاکیت اور عالمی برادری کی بے حسی کا بدترین نمونہ ہے ۔ غزہ میں جاری حملوں میں اسوقت تک 650سے زائد شہری شہید ہو چکے ہیں جن میں زیادہ تعداد بچوں اور خواتین کی ہے، ہم پوچھتے ہیں کہ اقوام متحدہ کا عالمی ادارہ اطفال کہاں ہے ؟ ریاستی سیکرٹری جنرل علامہ سید تصور جوادی نے اپنے خطاب میں کہا کہ عالمی برادری کے سوئے ہوئے ضمیر میں غزہ میں سسکتی ہوئی زندگی کی بقا کے لیئے بیدار ہونا ہو گا ایک اسرائیلی فوجی کی گرفتاری پر اقوام متحدہ اور عالمی برادری تڑپ اٹھی تھی، لیکن گزشتہ 16روز سے قتل ہونے والے بے گناہ فلسطینیوں کے حق میں کوئی آواز نہیں اٹھائی گئی ۔ اسرائیلی مارے جائیں یا گرفتار ہوں تو ادارے بیدار ہونے والے بے گناہ فلسطینیوں کے حق میں کوئی آواز نہیں اٹھائی گئی، اسرائیلی مارے جائیں تو ادارے بیدار ہوتے ہیں۔ لیکن کیا فلسطینی انسان نہیں ہیں؟

علامہ سید تصور جوادی نے کہاکہ حکومت پاکستان کو چاہیے کہ فوری طور پر اقوام متحدہ میں غزہ کے مظلومین کے حق میں آواز بلند کرے اور جمۃ الوداع کو سرکاری طور پر یوم القدس کے طور پر منانے کا اعلان کرے، انہوں نے کہا کہ بیت المقدس جو مسلمانوں کا قبلہ اول ہے ، یہ بھی مسلمانوں کی اجتماعی بے حسی کی وجہ سے صہیونیوں کے قبضہ میں ہے اور اگر خیانت کار حکمرانوں کی خیانت کاریاں نہ ہوتیں تو ایسے کبھی نہ ہوتا کہ مٹھی بھر یہودی ہمارے قبلہ اول کو اپنے قبضہ میں لے رکھتے۔ انہوں نے مذید کہا کہ حالیہ حملوں کی ایک بڑی وجہ غزہ میں تیل کے کنوؤں کا دریافت ہونا ہے اور اسرائیل اس مکمل قبضہ کرنا چاہتا ہے جبکہ مسلمان علماء غزہ کے مظلوموں کوزکوۃ فطرہ دینے کی بات کررہے ہیں عالمی دنیا سمجھ چکی ہے کہ اسرائیل کو شکست فاش کا سامنا کرنا پڑے گا اور انشاء اللہ وہ دن دور نہیں اسلامی مقاومت کے نتیجے میں تل ابیب تباہ و برباد ہو گا جلسہ سے لعل مہدی خان چئرمین آئی او پاکستان، خطیب جامع مسجد سہیلی سرکار مولانا فضل دین چشتی، رہنماء مسلم لیگ ن ڈاکٹر مصطفےٰ بشیر ، مسلم کانفرنس کے رہنماء یاسر نقوی، آئی او آزاد کشمیر ریجن کے ناظم سید اشتیاق سبزواری، انجمن جعفریہ مظفرآباد کے صدر سید بشیر کاظمی ڈی پی آئی ایس او وقار کاظمی، چئیرمین مرکزی انجمن تاجران شوکت نواز میر، مہاجر نمائندہ سید محمد حسین نقوی ، نیشنل پارٹی کے وائس چئیرمین سید وقار کاظمی ایڈووکیٹ،پیرا میڈیکل ایسوی ایشن آزاد کشمیر کے ترجمان ڈاکٹرذاکر کاظمی،سیکرٹری سیاسیات ایم ڈبلیو ایم آزاد کشمیر سید تصور عباس موسوی، ایم ڈبلیو ایم ضلع مظفرآباد کے سیکرٹری جنرل مولانا سید طالب ہمدانی و دیگر نے کرتے ہوئے اسرائیلی حملوں اورامت مسلمہ کی غفلت کی بھرپور مذمت کی ۔ جلسہ کے اختتام پر ریاستی سیکرٹری ویلفیئر مجلس وحدت مسلمین آزاد کشمیر سید محسن رضا ایڈووکیٹ نے قراردادیں پیش کیں جن کی تفصیل حسب ذیل ہے۔

1۔آج کا یہ اجتماع غزہ میں جاری اسرائیلی جارحیت کی بھر پور مذمت کرتے ہوئے اسے فلسطین پر قبضہ کی منحوس سازش قرار دیتا ہے۔
2۔یہ اجتماع غزہ میں مظلوم مسلمانوں کے قتل عام پر عرب حکمرانوں کی مجرمانہ خاموشی کی بھرپور مذمت کرتے ہوئے اسے مغربی آقاؤں کی خوشنودی سے تعبیر کرتا ہے۔
3۔یہ اجتماع مطالبہ کرتا ہے کہ غزہ کے محاصرہ کو فی الفور ختم کیا جائے اْور رفاہ کراسنگ کو کھولا جائے تا کہ ادویات و اشیاءِ خوردونوش غزہ میں پہنچائی جا سکیں ۔
4۔یہ اجتماع اقوام متحدہ،او۔آئی۔سی اور عرب لیگ سے مطالبہ کرتا ہے کہ فی ا لفورغزہ میں جاری اسرائیلی جارحیت کا نوٹس لے اْور اسرئیل کے خلاف راست اقدام اٹھائے۔
5۔یہ اجتماع عراق اور شام میں امریکہ و اسرائیل نواز دہشت گرد تنظیم داعش(ISIS)کے ہاتھوں اہلبیت اطہارؑ اْور اصحاب کرامؓ کے مزارات کی بے حرمتی نیز عراق و شام جاری دہشتگردانہ کاروائیوں کی بھرپور مذمت کرتا ہے۔
6۔یہ اجتماع حکومت پنجاب کی طرف سے ایم۔ڈبلیو۔ایم(MWM)کے کارکنان کی گرفتاری اور خوف وحراس دلانے کی مذمت اور علامہ طاہر القادری کے ایجنڈے کی حمایت کرتے ہوئے اسے ملکی بقاء و سلامتی نیز شیعہ سنی وحدت کے لیے ناگزیر قراردیتا ہے۔
7۔یہ اجتماع کراچی اور ملک بھر میں جاری مسلسل شیعہ ٹارگٹ کلنگ کی بھر پوْر مذمت کرتا ہے اْور آپریشن ضرب عضب کی حمایت کرتے ہوئے مطالبہ کرتا ہے کہ اس کا دائر ہ کار پورے ملک تک پھیلایا جائے تاکہ دہشت گرد عناصر کو ملک میں کسی بھی جگہ سر چھپانے کی جگہ نہ مل سکے۔
8۔یہ اجتماع مطالبہ کرتا ہے کہ کل ہونے والے عالمی یوم القدس کو حکومت سرکاری سطح پر منانے کا اعلان کرے۔

وحدت نیوز(کراچی) جمعتہ الوداع کو تاریخی یوم القدس منائیں گے،پاکستان کے غیور عوام ملک بھر میں نکالی جانے والی القدس ریلیوں میں بھرپور شرکت کرکے غزہ پر اسرائیلی جارحیت کے خلاف بھرپور اپنی آواز بلند کریں گے اور فلسطینیوں سے اظہار یکجہتی کریں گے، حکومت غزہ پر جاری صیہونی بربریت پر بیان پر اکتفا نہ کرے بلکہ عملی اقدامات کرتے ہوئے جمعتہ الوداع یوم القدس کو سرکاری سطح پر منانے کا اعلان کرے،ملک بھر میں 2345 مقامات پر آزادی القدس ریلیاں نکالی جائیں گی۔ ان خیالات کا اظہار مجلس وحدت مسلمین پاکستان کے مرکزی ڈپٹی سیکریٹری جنرل علامہ امین شہیدی نے امام بارگاہ علی رضا (ع) میں یوم القدس کی مناسبت سے منعقدہ پریس کانفرنس کرتے ہوئے کیا، اس موقع پر علامہ باقر زیدی، علامہ مبشر حسن،علامہ علی انور جعفری، انجینئر رضا نقوی، علی حسین نقوی سمیت دیگر رہنما بھی موجود تھے۔

علامہ امین شہیدی کا کہنا تھا کہ غاصب اسرائیل غزہ میں فلسطینیوں کی نسل کشی کر رہا ہے اور کوئی مسلمان ملک بولنے کیلئے تیار نہیں، خاموشی اختیار کیے ہوئے ممالک میں اسرائیل نے اپنے ایجنٹوں کو بٹھایا ہوا ہے، جہان اسلام کے حکمران ڈرے ہوئے ہیں، ان کے منہ سے آواز تک نہیں نکلتی، فلسطین مسلمانوں کا دل ہے، مسلم حکمرانوں کی غفلت ہے کہ مٹھی بھر صہیونیوں نے فلسطین پر قبضہ کیا ہوا ہے، ورنہ ان کی کیا مجال تھی۔ان کاکہنا تھا کہ ہم غزہ پر اسرائیلی حملوں کی بھرپور مذمت اور فلسطینیوں کی حمایت کرتے ہیں۔ جمعتہ الوداع کو پورے پاکستان میں یوم القدس کے طور پر منائیں گے، تمام مکاتب فکر کی ذمہ داری بنتی ہے کہ ہے کہ وہ اس دن گھروں سے باہر نکلیں اور اپنے مظلوم فلسطینی بھائیوں کے ساتھ اظہار یکجہتی کرکے ثابت کریں کہ فلسطینی تنہا نہیں ہیں۔ انہوں نے کہا کہ فلسطین کے مظلوم عوام کو سلام پیش کرتے ہیں جنہوں نے نہتے ہونے کے باوجود اسرائیل کے ا?گے سر نہیں جھکایا بلکہ ہمت اور مقاومت کا مظاہرہ کرتے ہوئے ڈٹ کر مقابلہ کیا۔ ہم ان قوتوں کو بھی سلام کرتے ہیں جو غزہ کے مسلمانوں کی اخلاقی، مالی سمیت ہر لحاظ سے مدد کر رہے ہیں۔

علامہ امین شہیدی کاکہنا تھا کہ ملک بھر میں2345مقامات پر آزادی القدس ریلیاں نکالی جائیں گی،جمعتہ الوداع کو یوم القدس کی مناسبت سے نکالے جانے والے جلوسوں میں مجلس وحدت مسلمین کے کارکنوں کی بڑی تعداد شریک ہو گی جبکہ عوام سے اپیل کرتے ہیں کہ وہ فلسطینیوں سے اظہار یکجہتی کرتے ہوئے یوم القدس کے جلوسوں میں شریک ہوں۔اس موقع پر مقررین نے کہا کہ یوم القدس کی مرکزی ریلی کراچی میں نکالی جائے گی جس میں مجلس وحدت مسلمین کی مرکزی قیادت سمیت سندھ بھرسے کارکنوں کی بڑی تعداد شریک ہو گی۔
 
مجلس وحدت مسلمین پاکستان کے رہنماؤں نے کہا کہ ایک طر ف غاصب اسرائیل ہے جو غزہ کے مظلوم عوام پر گذشتہ سولہ روز سے دہشت گردی اور بربریت کا سلسلہ جاری رکھے ہوئے تو دوسری طرف اقوام متحدہ نے یہ ثابت کر دیا ہے کہ وہ عالمی سامراجی دہشتگرد قوتوں اور شیطان بزرگ امریکہ کی لونڈی بنی ہوئی ہے، انہوں نے گذشتہ دنوں اقوام متحدہ کے سیکرٹری جنرل بان کی مون کی جانب سے آنے والے اس بیان کی شدید مذمت کی کہ جس میں بان کی مون نے کہا تھا کہ غزہ میں ہونے والے قتل عام کی ذمہ داری اسلامی مزاحمتی تحریک حماس پر عائد ہوتی ہے جبکہ شاید بان کی مون یہ بات بھول گئے تھے کہ غزہ پر حملہ غاصب صیہونی اسرائیلی ریاست اور اس کی درندہ صفت افواج نے کیا ہے نہ حماس نے، اسلامی مزاحمتی تحریک حماس تو غزہ کا دفاع کرنے کے لئے اپنے بنیادی دفاعی حق کا استعمال کر رہی ہے۔پوری امت مسلمہ حماس و حزب اللہ کی مقاومت پر اعتماد رکھتی ہے۔

رہنماؤں کا کہنا تھا کہ غاصب اسرائیل کی سرپرستی امریکہ کر رہاہے جو امریکی عوام کے لئے بھی شرمناک ہے، انہوں نے امریکہ سمیت یورپی ممالک کو تنبیہ کی کہ وہ مسئلہ فلسطین کے حل میں رکاوٹ نہ بنیں اور فلسطینیوں سے متعلق اپنا دوہرا معیار ترک کر دیں، اس موقع پر رہنماؤں نے اعلان کیا کہ غزہ کے مظلوم عوام کی نجات اور غاصب اسرائیل کے شکنجے سے فلسطین کی مکمل ا?زادی تک صدائے احتجاج بلند کرتے رہیں گے۔رہنماؤں نے تین سال قبل سر زمین بلوچستان پر کوئٹہ شہر میں یوم القدس کی ریلی میں شہید ہونے شہدائے یوم القدس کو خراج عقیدت پیش کرتے ہوئے حکومت پر کڑی تنقید کی اور مطالبہ کیا کہ شہدائے یوم القدس کے قتل میں ملوث اسرائیلی ایجنٹ دہشت گردوں کو بے نقاب کیا جائے اور قرار واقعی سزا دی جائے، انکاکہنا تھا کہ شیطان بزرگ امریکہ اور اس کی ناجائز اولاد اسرائیل جان لیں کہ شہادتوں سے ہمیں فلسطینیوں کی حمایت اور قابلہ اول بیت المقدس کی ا?زادی کی جد وجہد سے نہیں روکا جا سکتا ہے۔انہوں نے ایک مرتبہ پھر حکومت پاکستان سے اپیل کی کہ جمع? الوداع یوم القدس کو سرکاری سطح پر منانے کا اعلان کیا جائے اور سرکاری اداروں میں القدس کی مناسبت سے خصوصی تقریبات کا انعقاد کیا جائے۔

علامہ امین شہیدی نے کہا کہ کراچی میں شیعہ و سنی عوام کےقتل عام بالخصوص مکتب کی بنیاد پر شیعہ افراد کو نشانہ بنانے کی مذمت کرتے ہیں، دہشت گرد اپنی بربریت پر اتر آئے ہیں ، خواتین کو بھی اب ٹارگٹ کیا جانے لگا ہے، کراچی میں آپریشن کو مزید تیز کیا جائے اور اسرائیلی ایجنٹوں دہشت گردوں  کے خلاف آ پریشن ضرب عضب کا آغاز کیا جائے۔ انہو ں نے مزید کہا کہ یوم القدس کی ریلیو ں کو سیکورٹی فراہم کی جائے، ملک بھر میں آزادی القدس کی ریلیوں میں شریک ہونے والے قافلوں سمیت ریلیوں کو فول پروف سیکورٹی فراہم کی جائے تاکہ ملک دشمن اسرائیلی ایجنٹوں کے دہشت گردی سے ملک کی عوام کو محفوظ رکھا جائے۔

وحدت نیوز(مانٹرنگ ڈیسک) رمضان المبارک کے آخری عشرے کے آخری جمعہ ، جمعۃ الوداع کو پوری مسلم امہ امام خمینیؒ کے فرمان کے مطابق یوم القدس کے طور پر مناتی ہے۔ اس دن کو منانے کا مقصد مسلمانوں کے قبلہ اول بیت المقدس کو پنجہ یہود سے آزاد کروانا ہے تا کہ شعائر اللہ کا تحفظ ہو سکے ۔ اس دن کی مناسبت سے پوری دنیا کے غیور مسلمان نماز جمعہ کی ادائیگی کے بعد مظلوم فلسطینی عوام کی حمایت اور قبلہ اول کی اازادی کے لیے آواز حق بلند کرتے ہیں، اس دن کو منانے کا مقصد بھی یہ ہے کہ ناجائز اسرائیل کے وجود کو صفحہ ہستی سے ختم کیا جائے تا کہ مسلمان سکھ و چین سے زندگیاں گزار سکیں۔

صہیونی حکومت نے گزشتہ سالوں میں مظلوم فلسطینی بالخصوص غزہ کی عوام کے خلاف اپنی ظالمانہ کاروائیوں کا سلسلہ جاری رکھے ہوئے ہے ، قدس شہر کو اسرائیل کا دارالحکومت بھی قرار دے دیا ہے ، جس کے بعد فلسطینیوں سمیت دنیا بھر کے غیرت مند اور حریت پسند اسکے خلاف ردعمل ظاہر کرنے پر مجبور ہو گئے ہیں، کیوں کہ وہ اس بات پر ذور دیتے ہیں کہ بیت المقدس فلسطین کا ابدی دارالحکومت ہے۔

فلسطین کے سابق نتحب وزیراعظم اسماعیل حنیہ نے گزشتہ سالوں میں عرب ممالک کے دورے کیے اور انہوں نے عرب ممالک کے سربراہوں کے ساتھ ہونیوالی ملاقاتوں میں بیت المقدس اور مسجد الاقصیٰ کے خلاف صہیونی حکومت کے اقدامات کی معرفت کی ہے اور مسلمانوں کو قدس کی نصرت کی دعوت بھی دی ، بیت المقدس اس وقت حقیقی خطرے میں ہے ، اور قابض صہیونی حکومت مسجد الاقصیٰ کا تشخص بدلنے اور ہزاروں فلسطینیوں کے گھروں کو منہدم کرنے کے درپے ہے، فلسطین کے صدر محمود عباس کا کہنا ہے کہ قابض صہیونی حکومت قدس شہر کے اسلامی تشخص کو تبدیل کرنے کے لیئے اپنے تمام وسائل بروئے کار لا رہی ہے، اس لیے اسلامی و عرب ممالک کاان غلیظ اقدامات کا مقابلہ کرنے کے لیے میدان عمل میں اتر پڑیں۔

صہیونی حکومت نے 1948 ؁ء میں اپنے قیام کے بعد ہی اس مقدس سر زمین خاص کر قدس شہر کے اسلامی تشخص کو مٹانے کے درپے ہے ، صہیونی حکومت بیت المقدس کو یہودی رنگ دینے کے لیے اس شہر میں یہودیوں کے لیے ہزاروں مکانات تمیر کرنے کا منصوبہ رکھتی ہے۔اور کافی حد تک عمل درآمد کروایا جا چکا ہے۔ جبکہ دوسری طرف قدس شہر میں موجود مساجد اور فلسطینیوں کے گھروں کو مسمار کرنے کا سلسلہ ہنوز جاری ہے۔ ضرورت اس امر کی ہے کہ مسلم امہ بالخصوص عرب کے سوئے ہوئے حکمران میدان عمل میں اتریں اور اس مقدس سرزمین کو پنجہ یہود سے آزاد کروا لیں۔ تا کہ بیت المقدس کی آزادی کا راستہ ہموار ہوسکے۔

فلسطین کی نہتی عوام سال ہا سال سے صہیونی حکومت کی بربریت کا نشانہ بن رہی ہے، اور آج غزہ کی موجودہ صورتحال اسی طرف اشارہ کر رہی ہے کہ صہیونی حکومت فلسطینی عوام سے زندہ رہنے کا حق بھی چھین رہی ہے ، غزہ میں حالیہ اسرائیلی بربریت نے کہ ثابت کر دیا ہے کہ یہود صرف اپنے آپ کو اللہ کی مقدس مخلوق تصور کرتے ہیں ، ان کے نزدیک دیگر مذاہب کے افراد کو زندہ رہنے کا کوئی حق حاصل نہیں ہے۔

غزہ پر ہونے والی حالیہ اسرائیلی جارحیت میں جس طرح فلسطینی عوام پر آگ برسائی گئی ہے ، اس کی مثال نہیں ملتی ، معصوم بچوں ، سکولوں اور ہسپتالوں کو بموں کا نشانہ بنا کر انسانی حقوق کی دھجیاں اڑائی جا رہی ہیں۔ دوسری طرف یورپی ممالک اسرائیل کے ہم نوالہ بن کر اس بربریت کو اسرائیلی دفاع قرار دے کر جائز کہہ رہے ہیں۔

غزہ کی نہتی عوام پر پہلے فضائی حملے کر کے اب صہیونی حکومت نے باقاعدہ زمینی جنگ کا آغاز کر دیا ہے۔ اسرائیل بظاہر یہ حملے فلسطینی مزحمتی تنظیم حماس کو ختم کرنے کے لیے کر رہا ہے ۔ لیکن اس کے پس پردہ مقاصد میں گریٹر اسرائیل کے منصوبے کو فروغ دینا شامل ہے۔ دوسری طرف غزہ کا محاصرہ کئی سالوں سے جاری ہے ۔ ایک حالیہ رپورٹ کے مطابق غزہ میں جان بچانے والی ادویات اور غزائی اجناس کی شدید قلت ہو چکی ہے، جسکی وجہ سے وہاں کی مظلوم عوام انتہائی کسم پرسی کی زندگی گزارنے پر مجبور ہیں۔ مصر کے سابق صدر حسنی مبارک کی آمریت ختم ہونے کے بعد اخوان المسلمین کی حکومت کے قیام سے اس بات کے قوی امکانات تھے کہ مصر مطلوم غزہ کے عوام کے لیئے رفاہ کراسنگ کھول دے گا لیکن تھوڑے عرصہ بعد ہی اسرائیل نے مصری عوام کے مینڈیٹ کو وہاں کی آرمی کے ذریعے دبا دیا اور یوں غزہ کے عوام کی یہ امید بھی دم توڑ گئی۔

مسئلہ فلسطین اور بالخصوص قبلہ اول پر قابض صہیونی حکومت کو دوام دینے میں عرب حکمرانوں کا بڑا کردار شامل ہے۔ صہیونی حکومت نے بھی عرب حکمرانوں کو نشے کی دوا دیکر اتنا مست کیا ہے کہ ان کو اپنے حالات کی بھی خبر نہیں چہ جائیکہ وہ مسلم امہ کے مسائل کے حل کرنیکی بات کریں۔ صورتحال اس حد تک چلی گئی ہے کہ جہاں بھی مسلمانوں کے خلاف یہود و نصاریٰ اعلان جنگ کرتے ہیں تو عرب حکمران ان کے ہم پیالہ و ہم نوالہ بن جاتے ہیں ۔ اور بعض اوقات تابعداری اس حد تک پہنچ جاتی ہے کہ عرب حکمران کھل کر یہ اعلان کرتے ہیں کہ آپ شام پر حملہ کریں جنگ کے تمام اخراجات ہم برداشت کریں گے ، عرب حکمرانوں کا جو اتحاد و اتفاق امریکہ و اسرائیل کے ساتھ ہے اگر وہ مسلم امہ کے ساتھ ہوتا تو فلسطین ، شام اور عراق کی نہتی عوام آج اس مسئلہ سے دوچار نہ ہوتی ۔ ایران کے سپریم لیڈر آیت اللہ سید علی خامنہ ای فرماتے ہیں کہ ’’جسطرح عرب حکمرانوں نے شام کے خلاف اتحاد کا مظاہرہ کیا اگر وہ یہ اتحاد اسرائیل کے خلاف کرتے تو آج اسرائل کا وجود صفحہ ہستی سے مٹ چکا ہوتا۔

اس بات میں کسی قسم کا کوئی شک نہیں کہ مسلمانوں کی تمام تر مشکلات کا ذمہ دار امریکہ و اسرائیل اور ان کے دیگر اتحادی ہیں ، جن میں عرب حکمرانوں نے مخلص ہونے کے تمام ریکارڈ توڑ دیئے ہیں۔

ہمارا قبلہ اول اس وقت پنجہ یہود میں ہے، اور ہم مسلمان ایک دوسرے کو کافر قرار دینے کے درپے ہیں اور مسلم ممالک کے حکمران اپنی حکومتوں کو دوام دینے کے لیئے یہود و نصاریٰ کی خدمتگاری میں مصروف عمل ہیں ، اسلام دشمن قوتیں مسلمانوں کے اندر انتشار اور تفرقہ پھیلا کر اپنے گھناؤنے منصوبوں کو عملی جامہ پہنا رہے ہیں ۔وقت کا تقاضہ ہے کہ تمام مسلمان یہود و نصاریٰ کی سازشوں کو بھانپیں اور اتحاد و یگانگت کے ساتھ ان کی سازشوں کا مقابلہ کریں۔ اگر ایسانہ ہوا تو شاید قبلہ اول کیطرح خانہ کعبہ بھی مسلمانوں کے ساتھ نکل جائے۔ حکیم الامت علامہ ڈاکٹر محمد اقبال نے مسلم امہ کے جو نسخہ تجویز کیا تھا آج بھی وہ کار آمد ہے۔

اک ہوں مسلم حرم کی پاسبانی کے لیے
نیل کے ساحل سے لیکر تابخاک کاشغر

)تحریر : سید سجاد حسین)