وحدت نیوز(کراچی) تحریک تحفظ آئین پاکستان میں شامل قومی سیاسی جماعتوں کی صوبائی کونسل کامشترکہ اجلاس ، مجلس وحدت مسلمین صوبہ سندھ سیکریٹریٹ میں منعقدہ اجلاس میں پاکستان تحریک انصاف، مجلس وحدت مسلمین، پختونخواہ ملی عوامی پارٹی، بلوچستان نیشنل پارٹی کے صوبائی قائدین کی شرکت،آئین کی بحالی، پارلیمان کی بالادستی، قانون کی سربلندی کیلئے اور ملک میں بڑھتی مہنگائی، غربت، بے روزگاری، بجلی لوڈشیڈنگ،سابق وزیر اعظم عمران خان ، ان کی اہلیہ سمیت ہزاروں سیاسی قیدیوں کی بلاجواز گرفتاری کے خلاف 26 جولائی بروز جمعہ مرکز کی ہدایت پر سندھ بھرمیں بھی پر امن یوم احتجاج بھرپور انداز میں منانے کا اعلان۔

 اجلاس میں میں پاکستان تحریک انصاف کے صوبائی جنرل سیکریٹری علی احمد پلھ ایڈوکیٹ ، نائب صدر جعفرالحسن، کراچی ڈویژن کے جنرل سیکریٹری ارسلان خالد، رضوان نیازی، محمد علی بلوچ،مجلس وحدت مسلمین صوبہ سندھ کے صدر علامہ باقرعباس زیدی، ڈویژنل صدر علامہ صادق جعفری، علامہ مبشر حسن، علامہ حیات عباس نجفی، علامہ اصغر حسین شہیدی، احسن عباس رضوی، ناصر الحسینی، ضیغم نقوی ،پختونخواہ ملی عوامی پارٹی کے صوبائی جنرل سیکریٹری صابرین خان، غفور جان، بسیر خان، عبدالرب درانی ،بلوچستان نیشنل پارٹی کے صوبائی رہنماحمید سجنا و دیگر شریک ہوئے۔

اس موقع پر میڈیا سے گفتگو کرتے ہوئے پاکستان تحریک انصاف کے صوبائی جنرل سیکریٹری علی احمد پلھ ایڈوکیٹ نے کہا کہ قدرتی وسائل سے مالا مال مملکت میں 25 کروڑ عوام بنیادی انسانی حقوق سے محروم ہیں۔عمران خان صاحب کو جھوٹے اور جعلی مقدمات درج کیے گئے ہیں۔عمران خان کا جرم صرف آئین و قانون کی بالادستی کے نفاذ کی کوشش ہے۔لاتعدادخواتین اور بزرگوں کو بھی9 مئی کے بعد سے جبری لاپتہ کیا ہوا ہے۔جوانوں کو صرف اظہار رائے کے جرم میں گرفتار کیا گیا ہے۔15 سوشل میڈیا ایکٹیوسٹ تاحال لاپتہ ہیں۔چیف الیکشن کمشنر سمیت تمام صوبائی الیکشن کمشنرز کو فوری برطرف کیا جائے۔ پورے الیکشن کمیشن پر آرٹیکل 6 لگا کر کارروائی عمل میں لائی جائے۔

صدر مجلس وحدت مسلمین صوبہ سندھ علامہ سید باقرعباس زیدی نے کہا کہ ملک میں آئینی بحران درپیش ہے۔لوٹ کھسوٹ کا بازار گرم ہے۔عمران خان صاحب ملک کی 90 فیصد عوام کے محبوب رہنما ہے۔قانون اور آئین کی پامالی کا یہ سلسلہ کب تک جاری رہے گا۔یہ ظالم حکمران مکافات عمل سے نہیں بچ سکتے۔ایم ڈبلیوایم اپنے قائد سینیٹر علامہ راجہ ناصر عباس جعفری صاحب کے حکم پر اس احتجاجی تحریک میں دام درہم سخن شامل ہے۔

صوبائی رہنماء بی این پی مینگل حمید سجنانے کہا کہ یہ ظلم و جبر کی داستانیں 70 سال سے جاری ہیں۔بلوچستان میں انسانیت سوز مظالم جاری ہیں۔عمران خان کو بھاری اکثریت سے کامیاب ہونے کے باوجود قید رکھنا زیادتی ہے۔

صوبائی رہنماء پشتونخوا میپ  صابرین خان نے کہا کہ پاکستان اس وقت ہمہ جہتی بحرانوں کا شکار ہے۔عمران خان سمیت تمام سیاسی اسیران کو رہا  جائے۔فارم 47 کی مسلط حکومت کا فوری خاتمہ کیا جائے،نئے الیکشن کا انعقاد  جائے۔26 جولائی بروز جمعہ سندھ بھر میں تحریک تحفظ آئین پاکستان کے تحت احتجاجی اجتماعات منعقد ہوں گے۔سندھ بھر کی طرح کراچی کے تمام اضلاع میں عوام اپنے جائز بنیادی حقوق کی بحالی کے لئے اپنے گھروں سے نکلیں گے۔اپوزیشن کی تمام اتحادی جماعتیں آئین کی بحالی ، پارلیمان کی بالادستی، مہنگائی کے خاتمے کیلئے  متحد ہیں۔

وحدت نیوز (اسلام آباد) وائس چیئرمین مجلس وحدت مسلمین پاکستان علامہ سید احمد اقبال رضوی نے اپنے بیان میں کہا ہے کہ پاکستانی عوام اور کارکنان تحریک تحفظ آئین پاکستان کے 26 جولائی کے احتجاج میں بھرپور شرکت کریں، ملک بھر میں امن وامان کی بگڑتی صورتحال، آئین وقانون کی بالادستی اور تمام بے گناہ قیدیوں کی رہائی کے لیے صدائے احتجاج بلند کریں، مہنگائی کے طوفان نے عوام کا جینا دوبھر کر دیا ہے، بجلی کے بھاری بھرکم بل غریب عوام کے لیے درد سر بن چکے ہیں، عمران خان، بشری بی بی و دیگر تمام سیاسی قیدیوں کو ناحق جیل میں قید کیا گیا ہے، نااہل حکومت حق حکمرانی کھو چکی ہے، یہ ٹولہ جتنی دیر مزید اقتدار میں رہے گا ملکی سیاسی و اقتصادی صورتحال گھمبیر ہوتی جائے گی۔

انہوں نے کہا کہ سیاسی رہنماؤں اور سوشل میڈیا سے وابسطہ افراد کا اغوا شرمناک ہے، پی ٹی آئی مرکزی سیکرٹری اطلاعات رؤف حسن کی گرفتاری خلاف قانون اور بلا جواز ہے، جس کی شدید مذمت کرتے ہیں، پاکستان تحریک انصاف کے مرکزی آفس کی بندش انتہائی بھونڈی حرکت ہے اور ہائی کورٹ اسلام آباد کے احکامات کی بھی توہین ہے، سنی اتحاد کونسل کے ارکان قومی اسمبلی کی خریداری کے لیے بڑی بڑی آفرز کی جا رہی ہیں، ارکان اسمبلی کو دباؤ میں لانے اور وفاداریاں تبدیل کرنے کی کوشش کون سی جمہوری روش ہے، جمعہ کے روز پاکستان کے ہر طبقے کو احتجاج میں شریک ہو کر ذمہ دار اور باشعور شہری ہونے کا ثبوت دینا چاہیے۔

وحدت نیوز(اسلام آباد)چیئرمین مجلس وحدت مسلمین پاکستان سینیٹر علامہ راجہ ناصر عباس جعفری نے اپنے بیان میں کہا ہے کہ آج سے ملک بھر میں علامتی بھوک ہڑتال کا آغاز کیا گیا ہے، یہ بھوک ہڑتال ایک تحریک کی شکل میں پوری دنیا تک پھیلے گی، یہ مہذب اور پرامن احتجاج ان قوتوں کے خلاف ہے جو وطن عزیز کے سیاسی استقلال کو کمزور کرنا چاہتی ہیں اور ملکی وقار و عوامی رائے کو بلڈوز کرنا انکا وطیرہ بن چکا ہے، جو مادر وطن کے سیاسی و اقتصادی بحران کی ذمہ دار ہیں، ملک وقوم کو بچانے کے لیے اس ملک کے نوجوانوں کو گھروں سے نکلنا ہو گا، دوسروں کی لڑائی میں جو پاکستان کو میدان جنگ بنانا چاہتے ہیں، ان کی خواہش ہم کبھی پوری نہیں ہونے دیں گے۔

انہوں نے کہا کہ جمعہ کے روز ہم سب نے گھروں سے نکلنا ہے اور ملک کو بچانے کی اس تحریک میں اپنا حصہ ڈالنا ہے، عمران خان پاکستان کی امید ہے، وہ اس قوم کو متحد کر سکتا ہے، نوے فیصد عوام بھی عمران خان کی طرف دیکھ رہے ہیں، ہم عمران خان کے ساتھ کھڑے ہیں، ملک میں ہونے والی ناانصافی، بےروزگاری، ظلم اور غیر قانونی گرفتاریوں کے خلاف ہم جنگ لڑیں گے، اس بھوک ہڑتال کو تحریک میں بدلنے کے لیے تمام طبقات جمعہ کے روز گھروں سے ضرور نکلیں اور محب وطن ہونے کا ثبوت دیں۔