وحدت نیوز(پاراچنار)مجلس وحدت مسلمین پاکستان کے سربراہ علامہ راجہ ناصر عباس جعفری کی زیر قیادت ایک اعلیٰ سطح پارلیمانی وفد نے ضلع کرم کا دورہ کیا، وفد میں سنی اتحاد کونسل پاکستان کے سربراہ صاحبزادہ محمد حامد رضا، پی ٹی آئی کے سینئر رہنما و رکن قومی اسمبلی شہریار خان آفریدی، مولانا نسیم شاہ، یوسف خان، ایم این اے کرم حمید حسین، مرکزی جنرل سیکرٹری ایم ڈبلیو ایم سید ناصر عباس شیرازی موجود تھے،۔

اس موقع پر وفد نے مرکزی مسجد وامام بارگاہ پاراچنار کے خطیب جمعہ و پیش امام علامہ فدا حسین مظاہری، سمیت علماء کرام، سیکرٹری انجمن حسینیہ و اراکین، صدر تحریک حسینی و اراکین اور مختلف شعبوں سے وابستہ افراد کے ساتھ ملاقات کی، شہداء کیلئے اجتماعی دعا و فاتحہ خوانی کی اور غم زدہ متاثرہ خاندانوں کی خدمت میں تعزیت و تسلیت پیش کی، وفد کے ساتھ کمشنر کوہاٹ، ڈپٹی کمشنر کرم، ڈی پی او کرم، سمیت دیگر ضلعی انتظامیہ کے آفیسرز بھی موجود تھے، مقررین نے مرکزی امام بارگاہ پارا چنار میں عوامی اجتماع سے خطاب بھی کیا اور علاقے میں پائیدار امن و امان اور علاقائی صورتحال کو بہتر بنانے پر زور دیا۔

سینیٹر علامہ راجہ ناصر عباس جعفری نے اپنے خطاب میں کہا کہ کاش کرم پارہ چنار میں ہونے والی جنگ نہ ہوتی، اس کا راستہ روکا جاتا تاکہ بے گناہ لوگوں کی زندگیوں کا ضیاع نہ ہوتا، ہم سب اپنے ازلی دشمن کو پہچانیں جو کہ امریکہ و اسرائیل ہے، قائد شہید علامہ سید عارف حسین الحسینی کی شہادت کے ایام ہیں، اس بابصیرت اور صاحب کردار رہبر و رہنما نے ہمیں وحدت و یگانگت کا قرآنی درس دیا، انہیں بھی ان قوتوں نے شہید کیا جو وحدت کے تصور سے خوفزدہ تھیں، فلسطین و لبنان میں بھی مسلمانوں کا قاتل اسرائیل ہے یہ غاصب و ظالم صہیونی اسرائیل و امریکہ ہمارے مشترکہ دشمن ہیں، ہمیں اپنی صفوں میں اتحاد قائم کر کے دشمن کے ناپاک و مکروہ عزائم کو خاک میں ملانا ہو گا، یہ وفد پارا چنار سے بوشہرہ بھی پہنچا اور وہاں کے علماء کرام، عمائدین عظام اور عوام سے بھی خطاب کیا۔

پی ٹی آئی کے رہنما شہریار خان نے اپنے خطاب میں کہا کہ فلسطین و غزہ میں ایک فیصد بھی اہل تشیع نہیں ہیں سب سنی ہیں لیکن اپنے ان سنی بھائیوں کے لیے لبنان کے چار سو سے زیادہ شیعہ جوان جانوں کا نذرانہ پیش کر چکے ہیں، اسرائیل مسلم ممالک میں مسلکی فسادات کروا کر انہیں توڑنا اور کمزور کرنا چاہتا ہے جیسے عراق میں، شام، لبنان اور افغانستان میں پہلے ہو چکا ہے، آپ سب کو اپنے علاقے کی بہتری اور امن و امان کے مستقل قیام کے لیے عہد کرنا ہو گا۔ اہل علاقہ نے امن وامان کے قیام کے لیے وفد کی آمد کو نہ صرف سراہا ہے بلکہ علاقے بہتر مستقبل کے حوالے سے اسے اہم پیش رفت بھی قرار دیا۔

وحدت نیوز (اسلام آباد) چیئرمین مجلس وحدت مسلمین پاکستان سینیٹر علامہ راجہ ناصرعباس جعفری نے اپنے ایکس xاکاؤنٹ سے جاری تہنیتی پیغام میں کہا ہے کہ ارشد ندیم کو پیرس اولمپکس میں تاریخی طلائی تمغہ جیتنے پر مبارکباد پیش کرتا ہوں، یہ اہم کامیابی ان کے غیر متزلزل جذبے، لگن اور استقامت کا منہ بولتا ثبوت ہے۔

انہوں نے مزید کہا کہ ارشد ندیم کا اولمپک اعزاز حاصل کرنے کا شاندار سفر اس بات کی روشن مثال ہے کہ ایک ایسے نظام میں جو اکثر ٹیلنٹ کو پروان چڑھانے میں ناکام رہتا ہے اسکے باوجود پاکستانی جوان کیا شاندار کارنامے انجام دے سکتے ہیں، ان کی کامیابی ہمارے نوجوانوں کے لئے امید کی کرن ہے۔

وحدت نیوز(کوئٹہ)مجلس وحدت مسلمین پاکستان کے مرکزی سیکرٹری تنظیم سازی علامہ مقصود علی ڈومکی اور ایم ڈبلیو ایم بلوچستان کے صوبائی جنرل سیکرٹری علامہ سہیل اکبر شیرازی نے ایک وفد کے ہمراہ سردارزادہ حیدر عباس ہزارہ سے ملاقات کی۔ ملاقات میں صوبائی رابطہ سیکرٹری سید گلزار علی شاہ اور حسنین علی بھی انکے ہمراہ تھے۔ اس موقع پر گفتگو کرتے ہوئے علامہ مقصود علی ڈومکی نے کہا کہ بلوچ تاریخی طور پر اہل بیت رسول علیہم السلام کے طرفدار اور پیروکار تھے۔ جس کا ذکر بلوچی دفتر شعر کے ساتھ ساتھ بلوچ تاریخ کے تمام مورخین اور مصنفین کی کتب میں موجود ہے۔ واقعہ کربلا کے بعد بلوچوں نے من حیث القوم یزیدی سلطنت کے خلاف قیام کیا۔ جسے وہ فخر کے ساتھ اپنے اشعار میں گنگناتے ہیں کہ ہم حلب سے آئے ہیں کیونکہ ہماری یزیدیوں سے جنگ ہے۔

اس موقع پر علامہ مقصود علی ڈومکی نے سردارزادہ حیدر عباس ہزارہ کو بلوچ تاریخ پر مشتمل کتاب اور کلینڈر کا تحفہ پیش کیا۔ اس موقع پر سردارزادہ حیدر عباس ہزارہ نے کہا کہ مجلس وحدت مسلمین پاکستان کے چیئرمین علامہ راجہ ناصر عباس جعفری ایوان بالا میں پاکستان کے عوام کی موثر آواز ہیں۔ اللہ تعالیٰ نے انہیں علم جرات و شجاعت کے ساتھ فصاحت و بلاغت سے نوازا ہے۔ جس کے سبب وہ ہر سطح پر قوم کی بہتر نمائندگی کر رہے ہیں۔ انہوں نے کہا کہ تاریخ اور مذہب کا مطالعہ میرا پسندیدہ موضوع ہے۔ بہترین کتابوں کا سیٹ دینے پر انہوں نے علامہ مقصود علی ڈومکی کا شکریہ ادا کیا۔

وحدت نیوز(کوئٹہ)مجلس وحدت مسلمین بلوچستان کے صوبائی نائب صدر و امام جمعہ علامہ علی حسنین حسینی نے کہا ہے کہ مہنگائی کی شرح میں مسلسل اضافہ سے غریب عوام کی زندگی اجیرن ہو گئی ہے۔ اشیائے خوردونوش عوام کی دسترس سے باہر نکل رہی ہے۔ حکومت عوام دوستی کا مظاہرہ کرتے ہوئے عوام کو ریلیف فراہم کرے۔ اپنے جاری کردہ بیان میں علامہ علی حسنین حسینی نے کہا کہ گزشتہ چند سال سے مہنگائی کی شرح میں شدید اضافہ ہوا ہے۔ جس سے عام آدمی کا گزارہ مشکل ہو گیا ہے۔ ایک طرف روزگار کے مواقع کم ہیں تو دوسری طرف عوام نان شبینہ کے محتاج ہو گئے ہیں۔ مہنگائی پر قابو نہ پایا گیا تو عنقریب لوگ فاقہ کشی پر مجبور ہو جائیں گے۔ انہوں نے کہا کہ حکومت آئی ایم ایف کے ہاتھوں یرغمال ہو گئی ہے۔ جس کی وجہ سے عام آدمی کو ریلیف فراہم نہیں کیا جا رہا ہے۔ سابقہ حکمرانوں نے ملک کی معیشت کی بہتری کے بجائے آئی ایم ایف کے سامنے ہاتھ پھیلانے کو ترجیح دی۔ اب سب پریشان ہیں کہ ملک کو آئی ایم ایف کے چنگل سے کیسے نکالیں۔

انہوں نے مطالبہ کیا کہ حکومت عوام کے لئے آسانیاں پیدا کرتے ہوئے فوری ریلیف کا اعلان کرے۔ علامہ علی حسنین نے کہا کہ عوام ہی جمہوریت میں طاقت کا مرکز ہوتے ہیں، تاہم ہمارے بے چارے عوام کو ایک وقت کی روٹی کے لئے بھی ترسایا جا رہا ہے۔ مہنگائی کا جن بوتل سے نکل کر عام آدمی کی مشکلات میں مسلسل اضافہ کر رہا ہے۔ جس پر قابو پانے کے لئے لوگ حکومت کی طرف دیکھتے ہیں، جبکہ حکومت کی اپنی نظریں آئی ایم ایف کی طرف ہے۔ انہوں نے مزید کہا کہ مہنگائی پاکستانی عوام سے تعلیم، صحت اور دیگر اہم سہولیات تک رسائی کا حق بھی چھین رہی ہے۔ حکومت عوام کی بلائی کے لئے جلد از جلد اقدامات اٹھائے۔ عوام کو اس کٹھن وقت میں ریلیف کی ضرورت ہے۔