وحدت نیوز (چناری) یمن کے مسئلے کو حرمین شریفین سے نہ جوڑا جائے، حرمین شریفین دنیا بھر کے مسلمانوں کی طرح یمن کے حوثی شیعہ اور شافعی المذہب سنیوں کے لیئے بھی یکساں مقدس ہے، آلِ سعود یمنی عوام کے حق خود ارادیت کو لوگوں کے جذبات برانگیختہ کر کے کچلنا چاہتے ہیں، پاکستان کے عوام اور مقتدر مذہبی و سیاسی حلقے یمن کی جنگ کو حرمین شریفین سے علیحدہ کر کے دیکھ رہے ہیں اور یہی حق بھی ہے ، حرمین شریفین حجاز مقدس ہر مسلمان کے لیئے لائق احترام ہے اور ان مقدسات کا دفاع واجب ہے ،ان مقامات کی حرمت اور جنت المعلیٰ و جنت البقیع کے قبرستانی کی ویرانی پوری دنیا کو آل سعود کی عقیدت اور احترام کی جھلک دکھلارہی ہے ، خدا نہ کرے حرمین شریفین پر ایسا وقت آئے ، اگر ایسا وقت آیا تو ہر فرد دفاع کے لیئے حاضر ہو گا، ریاض کی طرف سے اگر کسی پر جارحیت ہو تو اسے حرمین شریفین سے جوڑنا قرین انصاف نہیں ہے، ان خیالات کا اظہار ریاستی سیکرٹری جنرل مجلس وحدت مسلمین پاکستان آزاد جموں و کشمیر علامہ سید تصور حسین نقوی الجوادی نے ضلع ہٹیاں بالا کے دورے کے دوران مختلف زعماء و شخصیات سے ملاقات کے دوران کیا ، انہوں نے کہا کہ آج عرب لیگ اپنے پاؤں پر امریکہ اور اسرائیل کے اشاروں پر کلہاڑا مارنے کی کوشش کر رہی ہے ۔ ہمارا سوال ہے عرب لیگ کے رکن ممالک سے ، اس وقت کہ جب غزہ پر ظلم کی المناک داستان رقم کی جارہیں تھیں اور بچے اور بوڑھے بلک بلک کر مر رہے تھے تم نے اس وقت کیوں نہ مشترکہ فوج بنائی ؟ اس وقت تو تم نے چپ کا روزہ رکھا تھا۔مقام افسوس ہے کہ پاکستان کے حکمران ملکی حالات پر توجہ دینے کے بجائے دوسرے کی جنگ میں کودنے کی باتیں کر رہے ہیں،حالانکہ افغانستان جنگ میں جن حالات سے گزرنا پڑا وہ کسی سے پوشیدہ نہیں ہیں ،پاکستان بحمداللہ ایٹمی طاقت ہے، پوری دنیا میں مسلم امہ کے مسائل کے حل میں اسے قائدانہ اور ثالث کا کردارادا کرنا چاہیے ، ہماری افواج دہشتگردی کے خلاف ملک کے اندر بھی مشغول ہے اور سرحدوں پر بھی خطرات ہمہ وقت منڈلاتے رہتے ہیں ، ایسے حالات میں بہادر و جری جوانوں کو نئے امتحان میں ڈالنا خلاف عقل ہے، علامہ تصور جوادی نے کہا کہ جس طرح پاکستان محصورین کی واپسی ہوئی ہے اور راستے میں حوثی قبائل نے ان کی خاطر تواضع کی ہے ، اگر یہ لوگ تکفیری گروہ کے ہتھے چڑتے ایک بھی واپس نہ آتا، لوگ اپنے حقوق کی جدوجہد کر رہے ہیں اور انہیں کوئی طاقت ان کے حقوق کے حصول سے نہیں روک سکتی ، انہوں نے مطالبہ کیا کہ عرب ممالک یمن کے بجائے اسرائیل پر دباؤ بڑھائیں تا کہ وہ غزہ کی پٹی پر مسلط ناکہ بندی ، یہودی بستیوں کی توسیع اور شہروں میں بستیوں کی تعمیر بند کرے۔ تفصیلات کے مطابق ریاستی سیکرٹری جنرل علامہ سید تصور حسین نقوی الجوادی ،ریاستی سیکرٹری اطلاعات مولانا سید حمید حسین نقوی اور ضلعی سیکرٹری جنرل سید منور حسین کاظمی نے ہٹیاں بالا کا دورہ کیا ، دورے کے دوران مختلف زعماء و شخصیات نے ان سے ملاقاتیں کیں ، جبکہ علامہ تصور جوادی نے شہید سید رضوان اختر کاظمی کی مجلس چہلم سے بھی خطاب کیا۔

وحدت نیوز (اسلا آباد) مجلس وحدت مسلمین اور جے یو پی نورانی گروپ نے اس بات پر اتفاق کیا ہے کہ پاکستان کو یمن کی صورتحال میں ثالثی کا کردار ادا کرنا چاہئے، پاکستانی فوج کو کسی صورت یمن کے خلاف ہونے والی جنگ کا حصہ نہیں بننا چاہیئے۔ ان خیالات کا اظہار مجلس وحدت مسلمین کے سیکرٹری جنرل علامہ ناصر عباس جعفری اور جمعیت علمائے پاکستان نورانی گروپ کے مرکزی سیکرٹری جنرل پیر محفوظ مشہدی نے اسلام آباد میں ملاقات کے دوران کیا۔ ایم ڈبلیو ایم کے مرکزی سیکرٹریٹ اسلام آباد میں ہونے والی ملاقات میں علامہ ناصر عباس جعفری کا کہنا تھا کہ حجاز مقدس کے دفاع اور آل سعود خاندان کی بادشاہت کے دفاع کو الگ الگ دیکھنا چاہیے، مکہ مکرمہ اور مدینہ منورہ مسلمانوں کا محور و مرکز ہے، جس پر آل سعود نے آج سے سو سال قبل برطانیہ کی مدد سے قبضہ کیا تھا اور سلطنت عثمانیہ کے خلاف سازش کی تھی، آج آل سعود کی اسرائیل و امریکہ نواز بادشاہت کو بچانے کے لئے امت مسلمہ کو لقمہ اجل بننے نہیں دینگے۔

علامہ ناصر عباس جعفری کا کہنا تھا کہ دہشت گردوں کے سرپرست آج آل سعود کے دفاع میں امت مسلمہ کو تقسیم کرنے کے درپے ہیں، قومی سلامتی کے ادارے دشمن کی سازشوں کا ادراک کریں اور اس پراکسی وار میں ملک کو دھکیلنے کی ہر سازش کو ناکام بنائیں، ہم ابھی تک جہاد افغان کی قیمت چکا رہے ہیں، پاکستان کسی اور پراکسی وار کا متحمل نہیں ہوسکتا۔ علامہ ناصر عباس جعفری کا کہنا تھا کہ عرب کی سرزمین پر سب سے مظلوم قوم فلسطینی مسلمان ہے، جن کی صہیونیوں کے ہاتھوں نسل کشی جاری ہے، آج تک آل سعود نے ان مظلوموں کی کوئی مدد نہیں کی، حتیٰ اخلاقی تعاون تو درکنار ایک بیان تک نہ دیا۔ یمن کی عوامی انقلابی تحریک سے آل سعود کی بادشاہت اور عرب ڈکٹیٹروں کو خطرہ ہے، علامہ ناصر کا کہنا تھا کہ پانچ روز سے آسمان سے یمنیوں پر آگ برسائی جا رہی ہے جبکہ ان کی طرف سے ایک بھی حملہ نہیں کیا گیا، جو اس بات کا ثبوت ہے کہ یمن پر یکطرفہ جنگ کی جا رہی ہے۔

مرکزی سیکرٹری جنرل کا کہنا تھا کہ یمن کے مسلمانوں نے سعودی عرب پر حملہ نہیں کیا بلکہ آل سعود نے یمن کے مسلمانوں کو خاک و خون میں نہلا دیا ہے، نواز شریف نے ذاتی تعلقات پر ملکی سلامتی کو داوُ پر لگانے کی ٹھان لی ہے، جسے کوئی بھی پاکستانی قبول کرنے کو تیار نہیں، انہوں نے کہا کہ پاکستان مسلم امہ میں واحد ایٹمی طاقت ملک ہے، ہمیں امت مسلمہ کے اتحاد کے لئے رول ادا کرنا چاہئے، آل سعود کے نمک خوار اور دہشت گردوں کے سہولت کار آج پھر سے مسلمانوں میں نفرتیں پھیلانے کے لئے یکسو ہوچکے ہیں، ہمیں دشمنوں کی اس سازش کو ناکام بنانا ہوگا۔

اس موقع پر جمعیت علمائے پاکستان نورانی گروپ کے مرکزی سیکرٹری جنرل پیر محفوظ مشہدی نے کہا کہ پاکستان کو یمن اور سعودی عرب کے درمیان ثالثی کا کردار کرنا چاہیئے اور کسی بھی صورت پاکستانی فوج کو اس آگ میں نہیں جھونکنا چاہئیے، ہمیں پاکستان میں فرقہ واریت اور پراکسی وار کے خلاف متحد ہوکر کام کرنا چاہیئے، پاکستان کو شیعہ سنی نے مل کر بنایا تھا، اس کی سلامتی اور دفاع بھی مل کر کرینگے۔ اس موقع پر دونوں قائدین نے اتفاق کیا کہ پاکستان میں امن قائم کرنا پہلی ترجیح ہونی چاہئے، جو شیعہ سنی کے درمیان مضبوط اتحاد کے ذریعے ممکن ہے، سیاسی طور پر ہمیں طاقتور بننے کی ضرورت ہے، تاکہ تکفیریت کا راستہ روکا جاسکے، دونوں طرف سے کمیٹیاں بنانے پر اتفاق کیا گیا اور طے ہوا کہ اگلی نشست میں یہ کمیٹیاں بیٹھ کر اس مشترکہ سیاسی جدوجہد کیلئے حکمت عملی اور اصول وضح کریں گی۔ اس بات پر بھی اتفاق کیا گیا کہ یمن میں سعودی جارحیت کیخلاف مشترکہ موقف اختیار کیا جائے۔ دونوں رہنماوں نے اتفاق کیا کہ پاکستان کو یمن کے معاملے میں ثالثتی کا کردار ادا کرنا چاہئے۔

وحدت نیوز (اسلام آباد)  مجلس وحدت مسلمین پاکستان کا سالانہ تنظیمی کنونشن 4,5 اپریل کو اسلام آباد میں ہو گا جس میں مجلس وحدت مسلمین کے مرکزی،صوبائی اور ضلعی مسؤلین شرکت کریں گے اور اپنے اپنے شعبوں کی روپورٹس پیش کریں گے کنونشن میں تنظیمی سٹرکچر کو مزید وسعت دینے،تنظیم کو درپیش چیلنجز کا مقابلہ کرنے کی حکمت عملی، دور حاضر کے تقاضوں کو پورا کرنے کے لیے اپنی استعداد میں اضافہ، آئندہ پروگراموں پر مشاورت اور دیگر اہم امور پر بھی تفصیل سے بات چیت ہو گی اسکے ساتھ ساتھ اب تک کیے گئے کاموں کا تنقیدی جائزہ اور ہر سطح پر احتساب بھی کیا جائے گا جس سے اجتماعی ذمہ داریوں کی ادائیگیوں میں مزید نکھار پیدا ہو گا اور اس کلچر کے احیاء سے تنظیمی زندگی میں نئی تازگی اور آئندہ آنے والے وقتوں کی تیاری ممکن ہو پائے گی۔

ان خیالات کا اظہار مجلس وحدت مسلمین کے مرکزی سیکر ٹری فلاح و بہبود و چیئرمین کنونشن نثار علی فیضی نے مرکزی سیکر ٹریٹ میں کنونشن کی تیاریوں کے حوالے سے منعقدہ اجلاس کی صدارت کرتے ہوئے کیا اجلاس میں مرکزی سیکر ٹری روابط ملک اقرار،مرکزی مسؤل آفس علامہ اصغر عسکری ،اسلام آباد،راولپنڈی کے ضلعی مسؤلین سمیت دیگر کمیٹیوں کے افراد شریک تھے ۔ انہوں نے مزیدکہا کہ وطن عزیز کے استحکام اور سالمیت کے خلاف جاری سازشیں عروج پر ہیں اور ان سے نبرد آزما ہونے کے لیے تمام مثبت قوتیں اپنا بھر پور کردار ادا کر رہی ہیں پاکستان کے گوش و کنار میں جاری دہشتگردی کی آگ کے پس پردہ ان مذموم عزائم کی راہ میں اگر کوئی ملت صف اول پہ ہے تو وہ ملت جعفریہ ہے جس کے پاکباز جوان،بزرگ اور بچے ان درندوں کی وحشت کا مقابلہ اپنی مظلومیت کی طاقت سے کر رہے ہیں نثار علی فیضی نے کہا کہ سالانہ تنظیمی کنونشن ایم ڈبلیو ایم کے لیے ایک سنگ میل ثابت ہو گا او ر مسؤلین سے لیکر ہر کارکن میں کام کرنے کا ایک نیا ولولہ اور جوش پیدا ہو گا شہداء کے خون کے امین اور وارث حسینی ؑ جذبوں سے سرشار زینبی ؑ کردار ادا کرنے والے ایم ڈبلیو ایم کے سر بکف مسؤلین اپنی ذمہ داریوں کی بخوبی احسن ادائیگی کے لیے ہر سال کی طرح اس سال بھی تنظیمی کنونشن میں بھر پور انداز میں شریک ہو کر شہداء ملت سے تجدید عہد کریں گے کنونشن کی تیاریاں مکمل ہو چکی ہیں ۔

وحدت نیوز (اسکردو) مجلس وحدت مسلمین پاکستان بلتستان ڈویڑن کے سیکریٹری جنرل آغا سید علی رضوی نے ڈویژنل سیکرٹریٹ میں یمن کی تشویشناک صورتحال پر ہنگامی پریس کانفرنس سے خطاب کرتے ہوئے کہا کہ ہم سعودی عرب کی جانب سے یمن پر فضائی حملوں کی شدید مذمت کرتے ہیں اور چونکہ سعودی عرب امریکہ کے ساتھ مل کر خطے میں اسرائیل کے مفادات کا تحفظ کررہا اس لیے پاکستان کو ہرگز یمن کے داخلی معاملات میں مداخلت نہیں کرنی چاہیے۔ سعودی عرب نے ماضی میں بھی اس روش پر عمل کی ہے اور مصری حکومت کے خاتمہ میں امریکہ کا ساتھ دیا تھا، سعودی عرب ہی وہ ملک ہے جس نے امریکہ کے ساتھ مل کر شام کو تقسیم کرنے کی کوشش کی، پاکستان، عراق، افغانستان، یمن سمیت دیگراسلامی ممالک کے نامساعد حالات کے ذمہ دار سعودی عرب ہے انہوں نے وطن عزیز پاکستان کو فرقہ واریت اور دہشتگردی میں دھکیل کے رکھ دیا ہے۔اس موقع پر ایم ڈبلیوایم گلگت بلتستان کے ڈپٹی سیکریٹری جنرل علامہ مظاہر علی موسوی، سیکریٹری فلاح وبہبود علامہ احمد علی نوری ، فدا حسین اور دیگر بھی موجود تھے۔

آغا علی رضوی نے مزید کہا کہ دفتر خارجہ کی ترجمان کے مطابق سعودی عرب نے یمن میں تحریک انصاراللہ کے خلاف لڑائی میں اتحاد کا حصہ بننے کے لئے پاکستان سے رابطہ کیا ہے، اس سلسلے میں ہم پاکستانی حکمرانوں کو باور کرنا چاہتے ہیں کہ پاکستان کو فرقہ واریت کی جنگوں میں ملوث نہیں ہونی چاہئے، اس سے نہ فقط پاکستان کا امیج خراب ہوگا، بلکہ داخلی طور پر دہشتگردی کا شکار ملک کو مزید مشکلات آئے گی۔پاکستان مقروض اور مجبور ملک ہے ،ہماری خارجہ پالیسی ہماری مرضی کے مطابق نہیں ہوتی، پاکستانی فوج صرف پاکستان کے دفاع کے لئے ہے، اگر پاکستانی فوج یمن میں گراؤنڈ آپریشنز میں حصہ لیتا ہے تو پاکستان کے اندر فرقہ وارانہ تناو میں اضافہ ہوسکتا ہے۔

انہوں نے کہا کہ پاک فوج پاکستان کا ایک مضبوط ادارہ ہے ، یہ اسلام کا لشکر ہے اور اس وقت پا کستانی فوج دہشتگردی کے خلاف جنگ میں مصروف ہے۔ جو کی ملکی سا لمیت اوراستحکام کی حفاظت کی جنگ ہے۔ لہٰذا نواز شریف اپنے ذاتی احسانا ت کا بدلہ چکانے کی خاطر ملکی سلامتی کو داو پر نہ لگائے۔انہوں نے حکمرانوں کو تنبیہ کرتے ہوئے کہا کہ وہ اپنا رویہ بدلیں ورنہ ہم اپنی قیاد ت کے حکم کے منتظر ہیں اور اگر ہماری قیادت اجازت دے تو ہم ملک گیر احتجاج کریں گے اور ان حکمرانوں کی نیندیں حرام کریں گے۔ان کا کہنا تھا کہ یمن کے اندر سعودی عرب کی جارحیت انسانی حقوق ،عالمی قوانین اور پڑوسی ملک کی سرحدوں کی خلاف ورزی ہے،سعودی عرب اسرائیل کے ایماء پر پاکستان کو اس جنگ میں گھسیٹنا چاہتا ہے جو انتہائی خطرناک ہے،پاکستان کے غیرت مند اور شجاع افواج رینٹ این آرمی نہیں جو کوئی بھی پیسوں کے بل بوتے پر خرید سکے۔

آغاعلی رضوی نے مشرق وسطیٰ کے ممالک خصوصاً خلیجی تعاون کونسل کو خبردار کیا کہ عمان کی پیروی کرتے ہوئے سعودی عرب کے اس ظالمانہ کاروائی میں شریک نہ رہے اورانکے ساتھ عسکری و سیاسی تعاون بند کرے۔کیونکہ سعودی عرب امریکہ کے ساتھ مل کر خطے میں اسرائیل کے مفادات کا تحفظ کررہا ہے۔انہوں نے کہا کہ امریکہ یمن کے بدلتے ہوئے سیاسی حالات سے شدید خوفزدہ ہے۔ یمن میں امریکی سفارتخانے کا بند کیا جانا اور اس سے اہم یہ کہ وہاں موجود تمام اسناد و مدارک کو جلا دیا جانا اور حتی امریکیوں کے زیر استعمال اسلحہ کو بھی نابود کر دیا جانا، امریکہ کے شدید خوف کی نشاندہی کرتا ہے۔ صنعا میں امریکہ کے اہم انٹیلی جنس مراکز کی بندش ایک طرح سے یمن کے سیاسی حالات پر امریکی گرفت کے کمزور ہونے اور اپنے مذموم مقاصد کی تکمیل کے سلسلے میں امریکہ کی مایوسی کو ثابت کرتی ہے۔لہذا امریکہ یمن میں بلاواسطہ فوجی مداخلت سے اظہار عجز کرنے کے بعد یمنی عوام کے خلاف بالواسطہ سکیورٹی اور فوجی مداخلت پر مبنی اقدامات انجام دے رہاہے۔سعودی سلفی افواج کا یمن پر حملہ دراصل یمنی عوام کے ارادے اور آزادی پر حملہ ہے ،جب کہ یمنی عوام کو حق حاصل ہے کہ وہ اپنے مستقبل کا فیصلہ خود کریں اور خالصتا عوامی تحریک انصاراللہ اور یمنی افواج کا سعودی و اسرائیلی پٹھو ہادی عبد الرب منصور کے خلاف حریت پسند تحریک چلانا عوامی حق خود ارادیت ہے اور اس کو دبانے کے لئے سعودی عرب نے یمنی عوام کو ٹارگٹ کیا ہے اور کل رات یمنی علاقوں میں جو شب خون مارا گیا اس سے سعودی سفاکیت کا واضح چہرہ دیکھا جا سکتا ہے۔

انہوں نے عالمی اداروں کو خبردار کرتے ہوئے کہا کہ ان کو چاہیے کہ وہ سعودی اور عرب ممالک کی اس بے جا مداخلت اور شب خون مارنے کے خلاف کاروائی کریں کیونکہ یہ یمن کے تشخص پر حملہ ہے، ہم اقوام متحدہ سے مطالبہ کرتے ہیں کہ سعودی عرب کی اس بڑھتی ہوئی جارحیت کو لگام دے اور یمنی عوام کو اپنے مستقبل کا فیصلہ کرنے کا پورا حق دیا جائے تاکہ وہ اپنے مستقبل کا بہتر فیصلہ کر سکیں۔انہوں کا مزید کہا کہ حکومت پاکستان ملک کو درپیش خطرات سے نمٹنے کے لئے اپنی فوجی اور حکومتی صلاحیتوں کو برولے کار لائیں اور دوسروں کی جنگ میں شرکت ہو کر ملکی سلامتی اور داخلی وحدت کو درو پر نہ لگائیں۔