وحدت نیوز( اصفہان )مجلس وحدت مسلمین شعبہ اصفہان کی جانب سے "دہہ کرامت" کے عنوان سے ایک عظیم الشان جشن منعقد ہوا۔ پروگرام کا باقاعدہ آغاز تلاوت کلام پاک سے ہوا جس کے بعد برادر فرقان علی اور برادر غلام علی بلبل بلتستان نے اہل بیت علیہم السلام کی شان میں پرجوش منقبتی کلام پیش کیا۔ عالمی شہرت یافتہ مذہبی اسکالر مولانا سید نصرت بخاری نے مہمان خصوصی کی حیثیت سے اپنے خطاب میں اہل بیت علیہم السلام کی سیرت اور کرامات پر روشنی ڈالی۔ ان کے علمی اور پراثر بیان نے حاضرین کو بہت متاثر کیا۔ خطاب کے بعد جامعۃ المصطفیٰ اصفہان کے ثقافتی تشکلات "جو کہ مختلف ملیتی پر مبنی" کی جانب سے مہمان خصوصی کے ہاتھوں علمی و ثقافتی سرگرمیوں میں نمایاں کارکردگی دکھانے والے افراد کو انعامات سے نوازا گیا۔

پروگرام کے آخری حصے میں برادر شہزاد علی جعفری نے اپنی دلکش آواز میں مدح سرائی کی جس کے بعد دعائے فرج امام زمانہ علیہ السلام سے تقریب کا اختتام ہوا۔ نظامت کے فرائض برادر فرمان علی نے بخوبی انجام دیے۔ اختتام پر تمام شرکاء کے لیے لنگر کا اہتمام کیا گیا۔ یہ پروگرام نہ صرف اہل بیت علیہم السلام سے والہانہ محبت کا اظہار تھا بلکہ اس نے شرکاء کے درمیان اتحاد اور روحانی بیداری کا پیغام بھی پہنچایا۔ مجلس وحدت مسلمین شعبہ اصفہان کی جانب سے ایسے پروگراموں کا انعقاد قابل ستائش ہے جو معاشرے میں دینی اقدار کو فروغ دیتے ہیں۔

آخر میں ماہِ رمضان المبارک  کی تبلیغی خدمات انجام دینے والے مبلغین کی واپسی کے اعزاز میں ایک خصوصی تقریب منعقد ہوئی۔ اس موقع پر مہمانِ خصوصی کی حیثیت سے معروف مذہبی اسکالر اور ممتاز خطیب مولانا سید نصرت بخاری صاحب تشریف لائے۔

تقریب کے اختتام پر مجلس وحدت مسلمین شعبہ اصفہان کی طرف سے تمام مبلغین کو خصوصی نقدی ہدیہ پیش کئے گئے، جو مولانا نصرت بخاری صاحب کے ہاتھوں تقسیم ہوئے۔ شعبہ اصفہان کے نگران نے شرکاء کا شکریہ ادا کرتے ہوئے آئندہ بھی دینی و تبلیغی سرگرمیوں کو فروغ دینے کا عزم دہرایا۔  اس موقع پر ایم ڈبلیو ایم شعبہ اصفہان کے سینئر رکن اور شوریٰ ممبر برادر اصغر علی شاھدی کو ان کی تعلیمی کامیابیوں اور شعبہ کی خدمات کے اعتراف میں لوح تقدیر پیش کی گئی۔

وحدت نیوز(اسلام آباد)مجلس وحدت مسلمین پاکستان کے وائس چیئرمین علامہ سید احمد اقبال رضوی نے مرکزی میڈیا سیل سے جاری اپنے بیان میں کہا ہے کہ بھارت کی جانب سے ایک بار پھر جنگ بندی معاہدے کی سنگین خلاف ورزی اور پاکستان کی سرحدی خودمختاری پر بلااشتعال جارحیت کی شدید الفاظ میں مذمت کرتے ہیں۔

 بھارت کی یہ اشتعال انگیز کارروائیاں نہ صرف خطے کے امن و سلامتی کے لیے سنگین خطرہ ہیں بلکہ بین الاقوامی قوانین اور اقوامِ متحدہ کے چارٹر کی کھلی خلاف ورزی بھی ہیں۔

ہم واضح کرتے ہیں کہ پاکستان اپنی سرزمین کے تحفظ کی مکمل صلاحیت رکھتا ہے اور کسی بھی جارحیت کا منہ توڑ جواب دینے کے لیے وطن کے سپوت ہر دم تیار ہیں۔

عالمی برادری، اقوامِ متحدہ، اور انسانی حقوق کی تنظیموں سے مطالبہ کرتے ہیں کہ وہ بھارت کی اس مسلسل اشتعال انگیزی کا سخت نوٹس لیں اور خطے کے امن کو لاحق اس خطرے کے سدباب کے لیے عملی اقدامات کریں۔

ہم اپنے وطن کے ان بہادر سپوتوں کو سلام پیش کرتے ہیں جو مادرِ وطن کے دفاع کے لیے سینہ تان کر دشمن کے سامنے کھڑے ہیں، اور پوری قوم یکجہتی کے ساتھ اپنے ان سپوتوں اور وطنِ عزیز کے ساتھ کھڑی ہے۔

وحدت نیوز(کوئٹہ)مجلس وحدت مسلمین پاکستان کے زیر اہتمام کوئٹہ میں صوبائی نصاب تعلیم کانفرنس کا انعقاد کیا گیا۔ جس میں ماہرین تعلیم، علمائے کرام، اسکول، کالج، یونیورسٹی اور مدارس دینیہ سے وابستہ شخصیات شریک و دیگر سماجی و سیاسی شخصیات شریک ہوئیں۔ اس موقع پر متفقہ قرارداد میں متنازعہ نصاب تعلیم کومسترد  اور 1975 کے متفقہ نصاب کی بحالی کا مطالبہ کیا گیا۔ کانفرنس کی صدارت مجلس وحدت مسلمین پاکستان کے مرکزی سیکرٹری نشر و اشاعت اور نصاب تعلیم کمیٹی کے کنوینئر علامہ مقصود علی ڈومکی نے کی۔

شرکاء میں صوبائی صدر ایم ڈبلیو ایم علامہ سید ظفر عباس شمسی، نائب صدر اول علامہ شیخ ولایت حسین جعفری، جنرل سیکرٹری علامہ سہیل اکبر شیرازی، پروفیسر ریٹائرڈ محمد علی ہزارہ، یزدان خان اسکول کے پرنسپل عمران الحسینی، ہزارہ قومی جرگہ کے حاجی محمد اعجاز، المصطفی پبلک اسکول کے پروفیسر مختار حسین، الحمد یونیورسٹی کے پروفیسر محمد حسین حسینی، نیو کوئٹہ اسکول کے سید عبدالروف سجادی، مدرسہ خاتم النبیین کے مولانا سید علی عمران نقوی، محقق و مصنف مولانا ذاکر حسین درانی، بی این پی کے مبارک علی ہزارہ، پیپلز پارٹی کے در محمد ہزارہ اور محمد عیسیٰ چنگیزی، جامعہ بلوچستان کے ڈاکٹر لیاقت علی ہزارہ، ایم ڈبلیو ایم کے عیوض علی ہزارہ، حاجی الطاف حسین ہزارہ، حاجی غلام حسین اخلاقی، فرید احمد، سید مہدی ابراہیمی، آغا سید ضیاء اور دیگر شخصیات شامل تھیں۔ کانفرنس کے اختتام پر متفقہ قرارداد منظور کی گئی۔

اس موقع پر کانفرنس سے خطاب کرتے ہوئے علامہ مقصود علی ڈومکی نے کہا کہ ہم متنازعہ نصاب تعلیم کو مکمل طور پر مسترد کرتے ہیں اور مطالبہ کرتے ہیں کہ پاکستان کے کروڑوں شیعہ و سنی مسلمانوں کے تحفظات کو دور کیا جائے۔ ہم حکومت سے پرزور مطالبہ کرتے ہیں کہ 1975 کے طرز پر تمام مکاتب فکر کی مشاورت سے ایک متفقہ دینی نصاب ترتیب دیا جائے۔ علامہ سید ظفر عباس شمسی نے اپنے خطاب میں کہا کہ موجودہ نصاب یک طرفہ ہے اور ملت کے عقائد کو نظرانداز کرکے اسے زبردستی مسلط کرنے کی کوشش کی جا رہی ہے، جو ناقابل قبول ہے۔ پروفیسر محمد علی ہزارہ نے تجویز دی کہ صوبائی نصاب تعلیم کمیٹیاں وزرائے تعلیم، سیکرٹریز اور ڈائریکٹرز سے براہ راست ملاقاتیں کرکے ملت جعفریہ و محبان اہل بیت اہل سنت کے تحفظات پیش کریں۔ پرنسپل عمران الحسینی نے سوال اٹھایا کہ 1975 کے اس نصاب کو کیوں ختم کیا گیا، جس پر تمام مکاتب فکر کا اتفاق تھا؟ انہوں نے مطالبہ کیا کہ نصاب تحریر کرنے والی اور نظرثانی کی تمام کمیٹیوں میں اہل تشیع کی مؤثر نمائندگی دی جائے۔ پروفیسر محمد حسین حسینی نے کہا کہ کروڑوں طلبہ و طالبات کے عقائد کو نظرانداز کرکے نصاب مرتب کرنا تعلیم کے اصولوں کے خلاف ہے۔ ڈاکٹر لیاقت حسین ہزارہ نے کہا کہ قائد ملت جعفریہ علامہ سید محمد دہلوی اور علامہ مفتی جعفر حسین نے نصاب تعلیم کے مسئلے پر برسوں جدوجہد کی، اب ہماری ذمہ داری ہے کہ ان کی اس جدوجہد کو ضائع نہ ہونے دیں۔

کانفرنس کے اختتام پر قرارداد پیش کی گئی، جس میں کہا گیا کہ پاکستان ایک کثیر المذاہب اور کثیر المکاتب اسلامی ریاست ہے، جہاں آئین پاکستان تمام شہریوں کو برابر کے حقوق دیتا ہے۔ تعلیم ایک قومی فریضہ ہے، جو نہ صرف علم کی ترویج بلکہ قومی وحدت و ہم آہنگی کا ذریعہ ہونا چاہئے۔ تاہم حالیہ برسوں میں جو یکساں قومی نصاب (SNC) متعارف کرایا گیا ہے، وہ ایک مخصوص مکتب فکر کی ترجمانی کرتا ہے، اور دوسرے مکاتب فکر بالخصوص ملت جعفریہ کے عقائد، آئمہ اہل بیتؑ اور ان کے علمی و روحانی مقام کو جان بوجھ کر نظرانداز کرتا ہے۔ یہ طرز عمل نہ صرف مذہبی امتیاز بلکہ فرقہ واریت کو فروغ دینے کے مترادف ہے۔ شرکاء نے پانچ نکات پر مشترکہ طور پر اتفاق کیا۔ پہلے نکتہ میں کہا گیا کہ ہم یکساں قومی نصاب کی موجودہ شکل کو مسترد کرتے ہیں، کیونکہ یہ تکفیری سوچ کی عکاسی کرتا ہے اور یہ دین اسلام کی متفقہ تعلیمات اور ملت جعفریہ کے عقائد و نظریات کے خلاف ہے۔ دوسرے نکتہ میں حکومت پاکستان، وفاقی وزارت تعلیم اور صوبائی وزارتوں سے مطالبہ کیا گیا کہ موجودہ نصاب تعلیم کو فی الفور واپس لیا جائے۔ تمام مکاتب فکر کی نمائندگی کے ساتھ نئی نصاب ساز کمیٹی قائم کی جائے۔ نصاب میں ائمہ اہل بیتؑ، حضرت فاطمہ زہراؑ، کربلا کے شہداء کے حالات زندگی اور صحیفہ سجادیہ و دعائے کمیل جیسی اہم علمی و روحانی روایات کو شامل کیا جائے۔

شرکاء نے کہا کہ درود ابراہیمی کو مکمل اور مستند الفاظ کے ساتھ شامل کیا جائے۔ اور نصاب میں موجود تکفیری، نفرت انگیز یا جانبدار مواد کو فی الفور نکالا جائے۔ تیسرے نکتہ میں کہا گیا کہ ہم یہ باور کراتے ہیں کہ ملت جعفریہ پاکستان کا ایک پرامن، باشعور اور آئینی طور پر برابر کا شہری حصہ ہے۔ ان کے عقائد، دینیات اور تشخص کو پامال کرنا کسی صورت برداشت نہیں کیا جائے گا۔ چوتھے نکتہ میں کہا گیا کہ ہم تمام مکاتب فکر، صحافتی اداروں، انسانی حقوق کی تنظیموں، تعلیمی اداروں اور والدین سے اپیل کرتے ہیں کہ وہ نصاب تعلیم میں اس تعصب کے خلاف متحد ہو کر آواز بلند کریں۔ پانچویں نکتہ میں کہا گیا کہ ہم اس قرارداد کو جلد وفاقی اور صوبائی حکومتوں، وزارت تعلیم اور نصاب ساز اداروں تک پہنچائیں گے، اور اگر مطالبات نہ مانے گئے تو آئندہ کے لائحہ عمل کا اعلان کیا جائے گا، جس میں آئینی اور جمہوری احتجاج بھی شامل ہو سکتا ہے۔ اس قرارداد کو صوبائی نصاب تعلیم کانفرنس کے شرکاء نے متفقہ طور پر منظور کیا۔

وحدت نیوز(کوئٹہ)مجلس علماء مکتب اہلبیت پاکستان ضلع کوئٹہ کا ایک اہم اجلاس مجلس علماء کےصوبائی صدر علامہ محمد موسی حسینی کی صدارت میں  منعقد ہوا ۔

اجلاس میں تنظیمی معاملات اور آئندہ کی حکمت عملی پر مشاورت کی گئی۔ اجلاس میں کثرت رائے سے آغا احمد یاور رجائی کو ضلع کوئٹہ (علمدار روڈ) کا صدر منتخب کیا گیا۔ نو منتخب صدر نے اپنی کابینہ کا اعلان کرتے ہوئے آغا ابراہیم حسینی کو نائب صدر, آغا رحمت علی رضوانی کو جنرل سیکریٹری ,آغاسید نصراللہ حسینی کو تبلیغات سیکریٹری اور آغا منظورحسین رحمانی کو فلاح و بہبود سیکریٹری نامزد کیا۔

 اس موقع پر علامہ موسیٰ حسینی نے تنظیم کی اہمیت اور اس کے خدمات پر روشنی ڈالتے ہوئے کہا کہ مجلس علماء مکتب اہلبیت ملت کی فکری، روحانی اور سماجی رہنمائی کے لیے ایک مؤثر پلیٹ فارم ہے۔

اجلاس سے خطاب کرتے ہوئے معروف عالم دین علامہ مقصود علی ڈومکی نے "مدیریتِ مسجد" کے عنوان پر بصیرت افروز خطاب کیا۔ انہوں نے کہا کہ مساجد کو دینی و اجتماعی قیادت کا مرکز بنانے کی ضرورت ہے تاکہ ملت کے نوجوانوں کی فکری اور عملی تربیت کی جا سکے۔ انہوں نےمزید کہاکہ علماء کو چاہئے کہ باہمی مشاورت سے کوئٹہ میں مدیریت مسجد کےعنوان سے ورکشاپ منعقد کریں۔

 علامہ محمد ہاشم موسوی نے "اتحاد علماء" کے موضوع پر خطاب کرتے ہوئے کہا کہ ملت کے اتحاد و وحدت کے لیے علماء کا باہمی تعاون ناگزیر ہے۔

مجلس علماء بلوچستان کےجنرل سیکریٹری مولانا ذوالفقار علی سعیدی نے تنظیم کا تعارف پیش کرتے ہوئے اس کے اغراض و مقاصد بیان کیے اور کہا کہ مجلس علماء کا مشن علم، وحدت اور خدمت ہے۔

آخر میں ملکی سالمیت، ملت کے اتحاد اور شہداء کے درجات کی بلندی کے لیے دعا کی گئی۔