The Latest
وحدت نیوز(سکردو) مجلس وحدت مسلمین گلگت بلتستان کی صوبائی شوری کے اجلاس سے خطاب کرتے ہوئے رکن مرکزی کردار سازی کونسل شیخ محمدجان حیدری نے کہا کہ تنظیمی تربیت اور خدا سے رابطہ سید مقاومت کی بنیادی صفات تھے۔ایک تنظیمی فرد کی کامیابی کا لازمی اور ضروری امر نظم وضبط ہے اسلئے امیر کائنات نے تقوی الہی کیساتھ نظم وضبط کو ایک الہی انسان کےلئے ضروری قرار دیا۔نظم تنظیم کیساتھ غیبی اور الہی امداد پر یقین ایک تنظیمی فرد کےلئے ضروری ہے۔شھید مقاومت کی کتاب امام مھدی اور اخبار غیب کی محوریت میں سید مقاومت کی کامیابی کا ایک لازمی عنصر آپ کا امداد غیب پر یقین کامل ہے۔آپ ایک تقریر میں فرماتے ہیں کہ محصور ہونا ہمیں مکتب میں معنی نہیں رکھتا ہم کھبی کسی کے ہاتھوں محصور نہیں ہوتے کیونکہ کائنات کا ہر موجود ہماری مدد کرتاہے کیونکہ ہمارا رابطہ ہمارے رب سے ہے۔
وحدت نیوز(دادو)مجلس وحدت مسلمین پاکستان کے مرکزی رہنماء علامہ مقصود علی ڈومکی نے کہا ہے کہ سید مقاومت شہید علامہ سید حسن نصر اللہ اور شہید یحییٰ سنوار عالم اسلام کے عظیم ہیرو تھے۔ جن پر پوری امت مسلمہ کو ناز ہے۔ پاکستان کے عوام کو چاہئے کہ اس عظیم شہید کے چہلم کے موقع پر پورے پاکستان میں عظیم اجتماعات منعقد کرکے لشکر اسلام کے علمبردار کو زبردست خراج عقیدت پیش کریں۔ ان خیالات کا اظہار انہوں نے مجلس وحدت مسلمین پاکستان یونٹ جوہی کے زیر اہتمام منعقدہ عظمت شہداء کانفرنس سے خطاب کرتے ہوئے کیا۔ علامہ مقصود علی ڈومکی نے کہا کہ تحریک آزادی فلسطین نے امت مسلمہ کو آپس میں جوڑ دیا ہے۔ حماس اور حزب اللہ کے سنی اور شیعہ قائدین اور جوانوں نے مل کر جس طرح سے اسلام دشمن سامراجی ممالک اسرائیل اور امریکہ کا مقابلہ کیا ہے۔ وہ بیداری امت اور اتحاد بین المسلمین کا عملی نمونہ ہے۔ امت مسلمہ اپنے اختلافات بھلا کر مجاہدین اسلام حماس، حزب اللہ اور انصار اللہ کا ساتھ دے۔ آج فلسطین اور تحریک آزادی فلسطین امت مسلمہ کے اتحاد اور بیداری کا مظہر بن چکے ہیں۔
انہوں نے کہا کہ پارا چنار میں شیعہ سنی مسلمانوں کو آپس میں لڑانے کے لئے مسلسل سازشیں جاری ہیں۔ پارا چنار کے شیعہ اور سنی مسلمانوں کو اپنی بیداری، ہوشیاری اور وحدت سے دشمن کی اختلاف اور انتشار پر مبنی سازش کو ناکام بنانا ہوگا۔ انہوں نے کہا کہ پارہ جنار قائد شہید علامہ سید عارف حسین الحسینی رحمہ اللہ علیہ کی سرزمین ہے۔ جو ملت اسلامیہ پاکستان کے عظیم محسن اور اتحاد بین المسلمین کے علمبردار تھے۔ پارا چنار ہمارے دلوں میں بستا ہے اور ہمارے دل پارہ چنار کے غیور عوام کے ساتھ دھڑکتے ہیں۔ انہوں نے مطالبہ کیا کہ پارا چنار کا محاصرہ ختم کرتے ہوئے پارا چنار پشاور شاہراہ کو پارہ چنار کے عوام کے لئے پرامن بنایا جائے۔ صوبائی اور وفاقی حکومت کی ذمہ داری بنتی ہے کہ وہ پارا چنار میں دیر پا امن کے لئے سنجیدہ اقدامات کریں۔ مجلس وحدت مسلمین پاکستان اور ملت جعفریہ کبھی بھی پارا چنار کے مظلوم عوام کو تنہا نہیں چھوڑے گی۔ ہم قائد وحدت علامہ راجہ ناصر عباس جعفری کے حکم کے منتظر ہیں، اگر قائد وحدت نے پارہ چنار کی طرف لانگ مارچ کا حکم دیا تو ملک بھر سے قافلے قائد وحدت کے حکم پر پارا چنار کا رخ کریں گے۔
وحدت نیوز(ملتان) مجلس وحدت مسلمین ملتان کے زیراہتمام شھدائے ملت جعفریہ، شہدائے مقاومت، شہدائے قدس بالخصوص شہید سید حسن نصراللہ، اسماعیل ھنیہ، یحیی سنوار اور سید ہاشم صفی الدین کی یاد میں مسجد الحسین کے باہر شمعیں روشن کی گئیں۔ جس میں صوبائی صدر مجلس وحدت مسلمین جنوبی پنجاب علامہ سید اقتدار حسین نقوی، صوبائی سیکرٹری فنانس غلام حسنین انصاری،صوبائی سیکرٹری سیاسیات سید وسیم زیدی نے خصوصی شرکت کی، اس موقع پر گفتگو کرتے ہوئے ایم ڈبلیو ایم کے رہنمائوں کا کہنا تھا کہ آج پوری دنیا میں بسنے والے بیدار لوگ اسرائیلی بربریت اور جارحیت کے خلاف سراپا احتجاج ہیں، ظالم کے خلاف کم از کم عملی جہاد کی ضرورت ہے، پروگرام کا باقاعدہ اختتام دعائے سلامتی امام زمانہ عج سے کیا گیا۔
وحدت نیوز (اسلام آباد) مجلس وحدت مسلمین پاکستان کے سربراہ سینیٹر علامہ راجہ ناصرعباس جعفری حفظہ اللہ نے تحریک مقاومت اسلامی حزب اللہ لبنان کی قیادت شیخ نعیم قاسم کے سپرد کیئے جانے پر سماجی رابطے کی ویب سائٹ ایکس پر ایک پیغام جاری کیا ہے ۔
علامہ راجہ ناصرعباس نے کہا کہ میںخدا وند متعال سے شیخ نعیم قاسم کیلئےاستقامت اور رہنمائی چاہتا ہوں کیونکہ وہ اس غیر معمولی اورمشکل وقت میں حزب اللہ کی قیادت سنبھال رہے ہیں۔ غزہ میں اسرائیل کی جانب سے جاری نسل کشی اور لبنان میں جارحیت نے حسن نصر اللہ اور ہاشم سیف الدین کی شہادت کے باوجود حزب اللہ کے جنگجوؤں کی غیر متزلزل مزاحمت کو جنم دیا ہے۔
شیخ نعیم قاسم کا وژن اور اسٹرٹیجک مہارت اس کٹھن دور کو آگے بڑھانے میں اہم کردار ادا کرے گی۔ ان کے حالیہ بیانات اسرائیلی جارحیت کے خلاف مزاحمت اور لبنان کی خودمختاری کے تحفظ کے لیے حزب اللہ کے عزم کا اعادہ کرتے ہیں۔ ہم سب اسرائیل کے علاقائی استحکام کے لیے خطرے کو تسلیم کرتے ہیں اور اس طرح حزب اللہ صرف لبنان کی نہیں بلکہ پورے خطے کی سلامتی اور استحکام کے لیے لڑ رہی ہے۔
مجھے اس میں کوئی شک نہیں کہ شیخ قاسم کی قیادت میں حزب اللہ اسرائیلی افواج کا مقابلہ کرنے کے لیے تنظیمی طاقت کا فائدہ اٹھاتے ہوئے موثر جنگی حکمت عملیوں کا استعمال جاری رکھے گی۔ آنے والے دن اہم ہیں۔ میں حزب اللہ کو فتح کی طرف لے جانے، لبنان کی حفاظت اور وقار کو یقینی بنانے میں شیخ قاسم کی کامیابی کے لیے نیک تمناؤں کا اظہار کرتا ہوں۔
اللہ تعالیٰ امام زمانہ (عج) کے فضل سے شیخ قاسم کو اس نیک کاوش میں ہمت اور استقامت عطا فرمائے۔
اللہ شیخ قاسم کی حفاظت فرمائے اور لمبی عمر عطا فرمائے۔
وحدت نیوز(قم)شہدائے مقاومت و شہید سید صفی الدین ھاشم کی بلندی درجات و ایصال ثواب کے لئے مدرسہ الولایہ قم المقدسہ میں ایک مجلس عزاء کا انعقاد کیا گیا جس سے خطاب مجلس وحدت مسلمین کے امور خارجہ کے مسؤول جناب ڈاکٹر حجت الاسلام و المسلمین علامہ سید شفقت شیرازی صاحب نے فرمایا.
?آپ نے خطاب کے دوران مختلف اہم نکات پر گفتگو کی جن میں سر فہرست مسئلہ فلسطین کے آغاز و یہودیوں کے گریٹر اسرائیل بنانے کے ناپاک عزائم اور عالمی استعمار کی شیطنت کو موضوع سخن قرار دیا.
?گفتگو کے دوران آپ نے حماس کی مظلومیت اور لبنان میں مقاومت کی ضرورت و اہمیت پر بھی روشنی ڈالی اور استعمار کے پروپیگنڈا کے برخلاف آپ نے 7 اکتوبر اسرائیل پر کیے جانے والے حماس کے حملے کو دفاعی قرار دیتے ہوئے اسکے مختلف پہلوؤں کو بیان کیا.
?اور اسی طرح آپ نے مقاومتی رہنماؤں کے بہنے والے مقدس خون کو مقاومت کے دوام و مزید استحکام کا سبب قرار دیا۔
وحدت نیوز (اسلام آباد) ضلع کرم خصوصاً پاراچنار میں امن و امان کی بگڑتی صورتحال اور مرکزی شاہراہ کی بندش کے بعد پیدا ہونے والے بحرانی حالات کے تدارک کیلئے مجلس وحدت مسلمین پاکستان کے پارلیمانی لیڈر ایم این اے انجینئرحمید حسین کی چیئرمین ایم ڈبلیو ایم پاکستان سینیٹر علامہ راجہ ناصر عباس جعفری کی سربراہی میں تحریک تحفظ آئین پاکستان اور پشتون خواہ میپ کے سربراہ محمود خان اچکزئی ،سابق اسپیکر قومی اسمبلی اسد قیصر اور پی ٹی آئی کے ممبر قومی اسمبلی عاطف خان سے ملاقات ۔
ایم این اے انجینئر حمید حسین صاحب نے ضلع کرم کے موجودہ تازہ ترین صورتحال پر تفصیلی گفتگو کرتے ہوئے کہا کہ حالیہ دہشت گردی کے واقعہ کے بعد ضلع کرم کا زمینی رابطہ ملک کے دیگر علاقوں سے منقطع ہوگیا ہے کیونکہ ضلع کرم کو ملک کے دوسرے حصوں سے ملانے والی واحد شاہراہ ٹل پارہ چنار پچھلے 17 دنوں سے بند ہے۔جس سے علاقہ مکین محصور ہو کر رہ گئے ہیں اور انسانی المیہ جنم لے رہا ہے کیونکہ روڈ کی بندش کی وجہ سے ہسپتالوں میں ادویات کی کمی سے مریضوں کو شدید مشکلات کا سامنا ہے شدید مریضوں کو علاج کے لئے پشاور منتقل کرنا ناممکن ہے۔پچھلے 17 دنوں سے تعلیمی ادارے بند پڑے ہیں اور پمپوں میں تیل نہ ہونے کی وجہ سے کسانوں کو کھیتی باڑی میں شدید مشکلات ہیں اور لاکھوں ایکڑ اراضی بنجر ہونے کا خدشہ ہے۔
انھوں نے مزید کہا کہ ضلع کرم میں حکومتی عمل داری نہ ہونے کے برابر ہے روزانہ اہم شاہراہوں پر مسافروں کو دہشت گرد نشانہ بنا رہے ہیں لیکن حکومت ٹس سے مس نہیں ہو رہی ہے بلکہ ایسے واقعات میں حکومت ہی ملوث ہیں۔
واضح رہے کہ مجلس وحدت مسلمین کی اعلیٰ و صوبائی قیادت پاراچنار کے کشیدہ حالات کی بہتری کیلئے مسلسل سرگرم عمل ہے، سینیٹ اور قومی اسمبلی کے فلور پر اس ظلم و بربریت کے خلاف ٹھوس آواز اٹھانے کے ساتھ ساتھ اسلام آباد ، راولپنڈی اور پشاور لیول پر اعلیٰ سطح روابط اور ملاقاتوں کے ذریعے معاملات کو حل کرنے کی کوشش کی جاری ہے ، امید ہے انشاءاللہ مسائل جلد حل پزیر ہوں گے۔
گوجرانوالہ،ایم ڈبلیوایم کے مرکزی وصوبائی قائدین کی چوہدری حاجی مشتاق ورک مرحوم کی مجلس سوئم میں شرکت
وحدت نیوز(گوجرانوالہ) نوشہرہ ورکاں ضلع گوجرانوالہ میں مجلس وحدت مسلمین پنجاب کے صوبائی نائب صدر مرحوم و مغفور چوہدری حاجی مشتاق ورک کی مجلس ترحیم سے خطاب کرتے ہوئے جناب حجت الاسلام و المسلمین علامہ سید علی اکبر کاظمی نے بہت ہی خوبصورت انداز میں آیات ،روایات اور احادیث نبوی کی روشنی میں حزب اللہ کی تعریف اور حزب خدا کو بیان کرتے ہوئے مجلس عزاء سے خطاب فرما یا۔
مرکزی سیکرٹری سیاسیات جناب سید اسد عباس نقوی اور صوبائی جنرل سیکریٹری جناب سید حسن رضا کاظمی ،صوبائی ڈپٹی جنرل سیکرٹری جناب سید منتظر مھدی ، ضلعی صدر گوجرانوالہ جناب چوھدری مرتضی اور وزیر آباد کے ضلعی صدر جناب مبشر حسین زیدی بھی مرحوم حاجی مشتاق ورک کے رسم سوئم میں شریک ۔
مرکزی ، صوبائی اور ضلعی رہنماوں نے نوشہرہ ورکاں گوجرانوالہ میں ورک فیملی کے بزرگان سے تعزیت پیش کی اور مرحوم کی دینی قومی وملی خدمات کو خراج تحسین پیش کرتے ہوئے مرحوم حاجی مشتاق ورک کے لئے دعائے مغفرت بھی کی ۔
وحدت نیوز(بھٹ شاہ) اصغریہ اسٹوڈنٹس آرگنائزیشن پاکستان کے 55 ویں سالانہ کنونشن کے موقع پر یوم سیدہ زینب کبری سلام اللہ علیہا کی تقریب سے خطاب کرتے ہوئے مجلس وحدت مسلمین پاکستان کے مرکزی رہنما علامہ مقصود علی ڈومکی نے کہا ہے کہ حضرت سیدہ زینب کبری سلام اللہ علیہا اسوہ صبر و استقامت ہیں اپ نے یزیدی سلطنت کے مقابلے میں کلمہ حق کو بلند کیا اور افضل ترین جہاد کا فریضہ ادا کرتے ہوئے ابن زیاد اور یزید پلید کو للکارا اور رسوا کیا۔ سیدہ زینب کبریٰ ہر دور کے اھل حق کے لئے صبر و استقامت اور جہاد باللسان کے حوالے سے اسوہ حسنہ ہے۔ آج بھی غزہ اور لبنان کے مجاہدین اسوہ شبیری اور زینبی ادا کرتے ہوئے یزید عصر کے خلاف سینہ سپر ہیں۔
انہوں نے کہا کہ حضرت زینب کبری سلام اللہ علیہا نے 72 شہداء کربلا کی شہادت کے بعد ابن زیاد کے دربار میں، ظالموں کو للکارتے ہوئے فرمایا تھا ما رئیت اللہ الا جمیلا یعنی مجھے کربلا میں جمال خدا نظر آیا۔ شہداء کے وارثوں کو کبھی مایوس نہیں ہونا چاہیے اہل حق کو کبھی گھبرانا نہیں چاہئے۔ آج اھل غزہ و لبنان عظیم سرداروں کی شہادت اور 44 ہزار مظلوموں کے جنازے اٹھا کر بھی ثابت قدم ہیں۔
انہوں نے کہا کہ آج ہم سب پر جہاد تبیین واجب ہے۔ حق بات کہنا حق اور اہل حق کا ساتھ دینا اور وقت کے ظالم اور جابر فرعونی طاقتوں کے ظالمانہ کردار کو بے نقاب کرنا زینبی کردار کہلاتا ہے۔ آج غزہ اور فلسطین کے بہادر عوام عاشورائی کردار ادا کرتے ہوئے صبر و استقامت کا استعارہ بن چکے ہیں۔در ایں اثناء علامہ مقصود علی ڈومکی نے اصغریہ اسٹوڈنٹس آرگنائزیشن پاکستان کے اعلیٰ اختیاراتی ادارے سرپرست کونسل کے اجلاس میں بھی شرکت کی۔
وحدت نیوز(کوئٹہ)مجلس علماء مکتب اہلبیت پاکستان صوبہ بلوچستان کی صوبائی مجلس عاملہ کا اہم اجلاس کوئٹہ میں منعقد ہوا ۔اجلاس کی صدارت مجلس علماء مکتب اہلبیت بلوچستان کے صدر علامہ ڈاکٹر محمد موسی حسینی نے کی۔اس موقعہ پر مجلس نظارت کے رکن علامہ ہاشم موسوی ,MWM بلوچستان کے نائب صدر علامہ شیخ ولایت حسین جعفری , علامہ برکت علی مطہری , علامہ ذوالفقارعلی سعیدی اور علامہ علی نواز عرفانی نے خطاب کیا ۔اجلاس میں مجلس علماء مکتب اہلبیت ضلع کوئٹہ , ضلع جھل مگسی , ضلع صحبت پور , ضلع نصیر آباد اور ضلع جعفر آباد کے اراکین نے اپنی کارکردگی رپورٹ پیش کی۔
وحدت نیوز(اسلام آباد)مقامی تعلیمی ادارے میں منعقدہ تقریب میں مرکزی جنرل سیکرٹری مجلس وحدت مسلمین پاکستان سید ناصر عباس شیرازی ایڈووکیٹ بطور مہمان خصوصی شریک ہیں۔انہوں نے اپنے خطاب میں پاکستان کی نظریاتی اساس کو جغرافیائی اساس اور بنیادوں کی طرح اہم قرار دیتے ہوئے ان اقدار جن کی بنیاد پر پاکستان کا قیام ممکن ہوا کی حفاظت اور دفاع پر زور دیا ۔
انہوں نے فلسطین میں جاری نسل کشی، عورتوں اور بچوں کے قتل عام میں مغرب کو باقاعدہ شریک گردانتے ہوئے مغرب کے دوہرے معیارات کے مقابل فکری قیام پر زور دیا ۔انہوں نے پاکستان میں امید کے پہلو پر زور دیتے ہوئے وطن عزیز کی تعمیر و ترقی میں مورال بلند رکھنے اور عزم و حوصلہ کے ساتھ درپیش چیلنجز کا مقابلہ کرنے پر زور دیا اور اس سارے عمل میں جوانوں کے کردار کو کلیدی قرار دیا ۔وال آف ہوپ طلباء اور جوانوں پر مشتمل آرگنائزیشن ہے جو مختلف پہلوؤں سے تعمیر و ترقی کے عمل کو آگے بڑھا رہی ہے ۔تقریب میں اسلام آباد اور نزدیک سے کئی یونیورسٹیوں کے طلبا و طالبات کی بڑی تعداد شریک تھی۔
