وحدت نیوز(کوئٹہ)مجلس وحدت مسلمین بلوچستان کے صوبائی نائب صدر و امام جمعہ علامہ علی حسنین حسینی نے کہا ہے کہ کربلا کی سرزمین میں کروڑوں زائرین کا اجتماع امام حسین علیہ السلام کی قربانی اور بی بی زینب سلام اللہ علیہا کے صبر کو نذرانہ عقیدت پیش کرنے کے لئے جمع ہوئے ہیں۔ شہداء کربلا کی یاد میں نجف سے کربلا تک پیدل واک کرنے والے زائرین کا جذبہ قابل دید ہے۔ انہوں نے اپنے جاری کردہ بیان میں کہا کہ کربلا میں زائرین کی تعداد ہر سال بڑھ رہی ہے۔ مشکلات ترین حالات اور سنجیدہ صورتحال میں بھی زائرین ابا عبداللہ علیہ السلام نے ان کی زیارت ترک نہیں کی۔ اربعین واک اتفاق اور اتحاد بین المسلمین کا بہترین مظاہرہ ہے، جس میں پوری دنیا کے مسلمان ایک ہوتے ہیں اور نواسہ رسول سے محبت کا اظہار کرتے ہیں۔ امام حسین علیہ السلام مسلمانوں کے درمیان اتحاد کا ذریعہ بن گئے ہیں۔ جس کو فروغ دینے کی ضرورت ہے۔
 
علامہ علی حسنین نے کہا کہ بین الحرمین میں ہر سال پاکستانی زائرین وطن عزیز پاکستان کا پرچم بھی بلند کرتے ہیں، جو ہم سب کے لئے باعث فخر ہے۔ حکومت کو چاہئے کہ زائرین کے لئے سہولیات کی فراہمی یقینی بناتے ہوئے آسانیاں پیدا کرے۔ تاکہ عالم اسلام کے عظیم اجتماع میں پاکستان کی بہتر نمائندگی ہو۔ انہوں نے زائرین کو پیش آنے والے حالیہ حادثات پر افسوس کا اظہار کرتے ہوئے لواحقین سے تعزیت کا اظہار کیا۔ انہوں نے کہا کہ ہم متاثرین کے غم میں برابر کے شریک ہیں۔ قافلہ سالاروں کی ذمہ داری ہے کہ وہ تمام احتیاطی تدابیر پر عمل کرتے ہوئے مسافروں کے تحفظ کو یقینی بنائیں۔ انسانی جان سے بڑھ کر زیادہ اہمیت کسی چیز کی نہیں ہے۔ اس معاملے میں غفلت برداشت نہیں کی جا سکتی ہے۔ ذمہ داران کسی بھی ممکنہ خطرے کی موجودگی کی صورت میں فوری اقدام اٹھائے۔

وحدت نیوز(کربلا)سربراہ مجلس وحدت مسلمین پاکستان علامہ راجہ ناصر عباس جعفری حفظہ اللہ اور مرکزی سیکریٹری امور خارجہ ایم ڈبلیو ایم ڈاکٹر علامہ سید شفقت حسین شیرازی کی کربلا معلیٰ میں انٹرنیشنل کانفرنس میں شرکت و خطاب ۔ کانفرنس کے دیگر مقررین میں عالمی اہل بیت اسمبلی کے سربراہ آیت اللّٰہ رضا رمضانی، اسلامی تحریک نائیجیریا کے سربراہ آیت اللّٰہ شیخ ابراھیم زکزکی ، علامہ سیّد علی رضا رضوی آف لندن سمیت دنیا بھر کے مختلف ممالک کے علماء و دانشور شامل تھے۔

علامہ راجہ ناصر عباس جعفری نے شرکائے کانفرنس سے خطاب کرتے ہوئے کہا کہ آج پاور مغرب سے مشرق کی طرف منتقل ہو رہی ہے۔ اور رھبر معظم اپنے متعدد خطابات میں اس پر گفتگو فرما چکے ہیں۔ ہمیں انکے فرمودات کی پیروی کرنی چاھئیے۔ وہ دنیا کے سب سے بڑے اسٹرٹیجسٹ ہیں۔

علاوہ ازیں انہوںنے فلسطین اور غزہ کی صورتحال پر تبصرہ کرتے ہوئے کہا کہ غزہ کی صبر واستقامت کی جڑیں بھی کربلا حسین علیہ السلام سے جڑی ہوئی ہیں غزہ والوں نے کربلا سے درس مقاومت حاصل کیا ہے۔ اھل غزہ نے اسٹریٹیجکل تو فتح حاصل کر لی ہے۔ دشمن رائے عامہ کے سامنے فتح کو شکست میں بدلنا چاھتا ہے ہمیں آج کردار زینبی ادا کرتے ہوئے اس بے نظیر مقاومت فلسطین و لبنان ویمن وعراق کا ترجمان بننا چاھئیے اور ابھی سے پلاننگ کرنی چاھئیے کہ غزہ کی مکمل فتح کے جو دنیا میں نیا نظام تشکیل پائے گا اس میں ہمارا کردار کیا ہو گا۔ ہمیں بروقت اپنے اپنے مورچے سنبھالنے چاہیں۔کانفرنس کے اختتام پر امام رضا علیہ السلام کے روضہ اقدس پر لہرانے والے علم مبارک کی زیارت بھی کرائی گئی۔

وحدت نیوز(لاہور)صوبائی سیکرٹریٹ مجلس وحدت مسلمین پاکستان صوبہ پنجاب ماڈل ٹاؤن لاہور میں اربعین حسینی (ع) کے حوالے سے برادر جناب ڈاکٹر دانش نقوی اور مجلس وحدت مسلمین پنجاب کے صوبائی سیکرٹری فلاح وبہبود و فوکل پرسن برائے عزاداری جناب شیخ عمران علی شیخ کی زیر صدارت اہم میٹنگ کا انعقاد ۔ لاہور مجلس وحدت مسلمین پنجاب کے صوبائی سیکرٹریٹ میں اربعین واک 2024ء کے حوالے سے گرینڈ میٹنگ کا انعقاد کیا گیا ۔میٹنگ میں مختلف تنظیموں کے نمائندوں کی شرکت ۔ میٹنگ میں اربعین پیس واک کے حوالے سے اہم ایشو پر گفتگو کی گئی چونکہ اربعین واک ایک عوامی موو ہے اور ہم صرف اور صرف سپوٹیو رول پلے کررہے ہوتے ہیں لہذا اس عوامی اربعین واک کو پیس فل بنانے کے لئے جتنا ہم سے ہوسکا ہم اس میں اپنا کردار پیش کریں گے ۔ ان شاءاللہ ہمارا کردار اس میں رہنمائی کا ہے اور اس واک کو پرامن بنانا ۔

نہ ہم لوگ مدعو کرتے ہیں اور نہ ہی اس کو لیڈ کرتے ہیں ۔ عزاداری سید الشہداء ایک عوامی اجتماعی عبادت ہے ۔ ہم اس اجتماع کو انتظامیہ سے ملکر ہر صورت پر امن بنانے کے لئے اپنا بھرپور کردار ادا کرتے رہیں گے ۔ انتظامیہ جہاں ہماری ضرورت محسوس کرے ہم حاضر ہیں ۔اربعین واک کو روکا نہیں جاسکتا یہ کوئی رسم نہیں بلکہ عبادت ہے اس میٹنگ میں مختلف آئمہ جماعت اور مذہبی اسکالرز بھی شریک تھے ۔ امامیہ اسٹوڈنٹس آرگنائزیشن پاکستان کا اعلی وفد بھی اس میٹنگ میں شریک تھا ۔ لاہور کے 8 بڑے روٹس پر مشی( اربعین واک) ہوگی جبکہ کئی دیگر چھوٹے چھوٹے روٹس پر بھی اربعین واک ہو گی ان شاءاللہ ۔ میٹنگ میں صوبائی کابینہ کے معزز اراکین، ضلعی کابینہ کے ممبران ،لاہور کی کئی مساجد آئمہ جماعت اور مختلف تنظیموں کے نمائندوں نے شرکت کی۔نماز ظہرین کے پوائنٹس ،اور اربعین واک پر موکب لگانے اور موکب کے انتظامات کو حتمی شکل دے دی گئی ۔ امید ہے اس سال کا اربعین گذشتہ سالوں کی نسبت بہتر اور منظم انداز میں نہایت عقیدت واحترام کے ساتھ منایا جائیگا ان شاءاللہ ۔

وحدت نیوز(اسلام آباد) سربراہ مجلس وحدت مسلمین پاکستان علامہ راجہ ناصرعباس جعفری حفظہ اللہ نے اربعین امام حسینؑ 1446 ھجری کے موقع پرمیڈیا کو جاری اپنے بیان میں کہا ہے کہ امام حسین علیہ السلام کا چہلم صدیوں سے دنیا بھر کے مسلمان مناتے اور اس میں شریک ہوتے ہیں  رسول پاک صلی اللہ علیہ وآلہ وسلم کو ان کے نواسے کی مظلومانہ شہادت کا پرسہ دیتے ہیں،اس سال کا اربعین سٹریٹیجک اہمیت رکھتا ہے۔ یہ فتنوں کا خاتمہ یزیدیوں،تکفیریوں اور عالم کفر کو مایوس و نا امید کر دے گا۔ تمام حسینی شیعہ سنی ہاتھوں میں ہاتھ دیے لبیک یا حسین ع کی صدا لگاتے گھروں سے باہر نکلیں اور اربعین امام حسین ؑ میں شریک ہوں۔ یہ اربعین عشق خدا، عشق رسول صلی اللہ علیہ وآلہ وسلم اور عشق حسین علیہ السلام کا دن ہے۔

انہوں نے کہا کہ اگر ہم کربلا نہیں پہنچ سکے تھے تو امام حسین علیہ السلام کے چہلم میں ضرور حاضر ہوں گے۔ چہلم امام حسین علیہ السلام پاکستان کے عوام کے اتحاد کے عملی اظہار کا دن ہو گا۔ گا دشمن ہمیں توڑنا چاہتا ہے ہم اس کو ناکام بنا دیں گے۔یہ دن بھائی چارے،محبت، شعور، بصیرت، آگہی کا دن کہلائے گا۔ہم ثابت کریں گے کہ ہم ظلم کے خلاف، یزیدیت، فرعونیت اور نمرودیت کے مقابلے میں باہم متحد ہیں اور دنیا بھر کے مظلوموں بالخصوص فلسطین و غزہ کے مظلومین کے ساتھ کھڑے ہیں،یہی ہماری ذمہ داری ہے اور یہی ہمارا اپنے مولا و آقا اور امام حسین علیہ السلام کے ساتھ عہد بھی ہے اور یہ عہد ہم نباہ کے رہیں گے۔