وحدت نیوز(کوئٹہ) سنی اتحاد کونسل پاکستان کے سربراہ صاحبزادہ حامد رضا اور مجلس وحدت مسلمین کے مرکزی سیکریٹری سیاسیات ناصر شیرازی نے کہا ہے کہ حکومت پاکستان نے طالبان سے مذاکرات کے نام پر دہشت گرد قوتوں کو مضبوط کرنے کا جو پروگرم بنایا ہے ہم اُس کو مکمل طور پر مسترد کرتے ہیں، شہداء کے ورثاء یہ پوچھنے میں حق بجانب ہیں کہ پچپن ہزار شہداء کے خانوادوں سے پوچھے بغیر مذاکرات کیسے کیے جا سکتے ہیں، پچپن ہزار بے گناہوں کے قاتلوں ، پاک فوج پر حملہ کرنے والوں، اولیا کرام کے مزارات کو بم دھماکوں سے اُڑانے والوں اور آئین پاکستان کو نہ ماننے والوں سے مذاکرات وطن کی سالمیت کو خطرے میں ڈالنے کے مترادف ہے۔ ان خیالات کااظہار اُنہوں نے کوئٹہ میں پُرہجوم پریس کانفرنس سے خطاب کرتے ہوئے کیا۔ اس موقع پرایم ڈبلیو ایم کے رکن بلوچستان اسمبلی سید محمد رضا رضوی، علامہ احمد اقبال رضوی، علامہ وزیرالقادری،مفتی محمد سعید، علامہ ابوذر مہدوی،صاحبزادہ حسن رضا ، سید فرحت حسین شاہ، میرآصف اکبر اور شیخ نوید صابرسمیت دیگر رہنما بھی موجودتھے۔

سنی اتحاد کونسل کے سربراہ صاحبزادہ حامد رضا کا کہناتھا کہ افسوس کا مقام ہے کہ حکومت نے دہشت گردوں کے ساتھ مذاکرات کے لیے یہ کمیٹی تو بنادی مگر شہداء کے ورثاء کے آنسو پوچھنے کے لیے آج تک کوئی کمیٹی تشکیل نہیں دی، ہم نے اسلام آباد کے قومی امن کنونشن میں اعلان کیا تھا کہ ہم پورے ملک میں شہداء کی یاد کو زندہ کرتے ہوئے وطن دوستی کا پیغام عام کریں گے، کل بروز اتوار کوئٹہ کی سرزمین پر منعقد ہونے والی پیام شہداء کانفرنس بھی اسی سلسلے کی ایک کڑی ہے۔ اُنہوں نے کہا کہ طالبان کو پاکستان کااثاثہ ہیں تو قراردینے والے کس منہ سے پاکستان کی نمائندگی کریں گے، اگر اتنے قتل کرنے کے بعد بھی طالبان پاکستان کا اثاثہ ہیں تو پاکستان جیلوں میں قیدپاکستان کا اتنا بڑا اثاثہ اپنے حقو ق سے محروم کیوں ہے۔ اُنہوں نے کہا کہ سمیع الحق، منورحسن او ر فضل الرحمان کو پاکستان کی نہیں طالبان کی فکر ہے وہ فوج کے جوانوں کو مروانا اور طالبان کو بچانا چاہتے ہیں، پاکستان کی اکثریت کاماننا ہے کہ طالبان فساد فی الارض کے مرتکب ہیں اس لیے وہ کسی معافی کے مستحق نہیں ہیں، اگر دہشت گردوں کے خلاف کاروائی نہ کی گئی تو شہداء کے ورثاء خود بدلہ لینے کا سوچ سکتے ہیں۔

ناصر شیرازی نے پریس کانفرنس سے خطاب کرتے ہوئے کہا کہ جہاد کے نام پر امریکہ سے ڈالر لینے والے آج کس منہ سے اسلام کی بات کرتے ہیں، پاکستان کے خلاف اعلان جنگ کرنے والے بے رحم اور سفاک دہشت گردوں کی ناز برداریوں سے مزید بغاوتوں کو دروازہ کھلے گا ، طالبان کے ساتھ محبت ملک اور قوم سے نفرت کے مترادف ہے، فوجیوں کے گلے کاٹنے والے طالبان کے لیے نرم گوشہ رکھنے والے ملک اور عوام کے دشمن ہیں۔ اُنہوں نے کہا کہ بلوچستان میں سیکیورٹی فورسز پر حملے قابل مذمت ہیں، سیکیورٹی فورسز پر حملے کرنے والے امریکی، اسرائیلی اور بھارتی ایجنٹ ہیں، پاکستان بچانے کے لیے امریکہ اور طالبان دونوں سے نجات ضروری ہے۔ اُنہون نے مزید کہا کہ ہمارا جینا مرنا اپنے وطن کے لیے ہے اور اس راہ مین ہم کسی بھی قربانی سے دریغ نہیں کریں گے، سنی اتحاد کونسل اور مجلس وحدت مسلمین دہشت گردی کے متاثرین اور مخالفین کو متحد کرے گی اور دنیا دیکھے گی کہ کس طرح بانیان پاکستان کی اولادیں اپنے وطن اور دین کی سالمیت کے لیے ملک اور اسلام دشمن قوتوں کے سامنے سینہ سپر ہوں گی اور وہ دن ضرور آئے گا کہ جب ہمارا ملک امریکہ اور طالبان کی دہشت گردی سے نجات حاصل کرے گا اور امن کا گہوارہ ہوگا۔

رہنماؤں نے مزید کہا کہ کل 2 فروری کو کوئٹہ میں عظیم الشان امن کانفرنس بیاد شھدائے پاکستان میں عوامی لائحہ عمل کا اعلان کریں گے، اس کانفرنس میں مجلس وحدت مسلمین ، سنی اتحاد کونسل پاکستان ،منہاج القرآن پاکستان،اقلیتی نمائندے اور کئی دیگر پارٹیاں بھی شریک ہو رہی ہیں۔ مجلس وحدت مسلمین اور سنی اتحاد کونسل نے محب وطن کونسل کا اجلاس فروری کے پہلے ہفتہ میں طلب کر لیا ہے جس کے نتیجہ میں ملک بھر میں طالبانائزیشن کے مقابلے میں عوامی تحریک کا آغا ز متوقع ہے، ایک درجن سے زائد جماعتیں محب کونسل میں شامل ہونے کے لیے رسمی طور پر آمادگی کا اظہار کرچکی ہیں، محب وطن قوتیں مل کر دہشت گردوں کو شکست دینے کی صلاحیت رکھتے ہیں اور آئندہ چند دنوں میں اس کا عملی اظہا ر ملک کے طول عر ض میں نظر آئے گا۔آخر میں رہنمائوں نےکہا کہ آپ صحافی دوستوں سے گزارش ہے کہ حقیقی عوامی مؤقف کو پھیلانے میں ہمارا ساتھ دیں اور طالبان کی دھمکیوں کی پرواہ نہ کریں۔

وحدت نیوز(کوئٹہ) مجلس وحدت مسلمین کے زیراہتمام کوئٹہ میں منعقدہ ''پیام شہداء و اتحاد امت کانفرنس'' میں شرکت کیلئے سنی اتحاد کونسل کے چیئرمین صاحبزادہ حامد رضا اور ان کے ہمراہ سنی اتحاد کونسل کے رہنماوں صاحبزادہ عمار سعید، مفتی محمد سعید رضوی، صاحبزادہ حسن رضا، کوآرڈینیٹر سنی اتحاد کونسل بلوچستان مولانا وزیر القادری اور تحریک منہاج القرآن کے صوبائی ناظم اعلیٰ پنجاب آصف اکبر، علماء مشائخ ونگ منہاج القرآن سید فرحت حسین شاہ، مجلس وحدت مسلمین پاکستان کے مرکزی رہنماوں سید ناصر عباس شیرازی، علامہ احمد اقبال رضوی، علامہ ابوذر مہدوی کوئٹہ پہنچ گئے۔

سربراہ مجلس وحدت مسلمین پاکستان علامہ ناصر عباس جعفری اور ''وائس آف شہدا'' کے ترجمان سینٹر فیصل رضا عابدی کل کانفرنس میں شرکت کیلئے کوئٹہ روانہ ہونگے۔ ترجمان مجلس وحدت مسلمین پاکستان علامہ حسن ظفر نقوی کا کہنا تھا کہ یہ اجتماع دہشت گردوں کیخلاف ریفرنڈم ثابت گا اور وارثان شہداء اپنے قاتلوں کیساتھ مذاکرات سے اظہار بیزاری کر کے بزدل حکمرانوں کو پیغام دینگے کہ وطن دشمنوں کیخلاف کسی قسم کی رعایت کو خانوادگان شہداء قبول کرنے کو تیار نہیں۔

وحدت نیوز(لاہور) مجلس وحدت مسلمین پاکستان کے مرکزی سیکرٹری سیاسیات سید ناصرعباس شیرازی، مرکزی رہنما علامہ سید احمد اقبال رضوی، علامہ سید جعفر موسوی، سید اسد عباس نقوی، سید قیصر حسین شاہ نے لاہور میں ہنگامی پریس کانفرنس کرتے ہوئے کہا کہ وطن عزیز میں ایک مرتبہ پھر مذاکرات کے نام پر وطن دشمنوں کو تقویت دینے کے گھناونے کھیل کا آغاز کر دیا گیا ہے، آٹھ ماہ کے تلخ تجربات کہ جس میں مذاکرات کی غیر مشروط پیشکش کا اتنا مہلک جواب ملا کہ ملک کی چولیں ہل کر رہ گئیں، آرمی جرنیل، پولیس اہلکار، پولیس افسر، زائرین، غیر مسلم شہری، عام شہری، بے دریغ شہید کئے جا رہے ہیں، جیلیں توڑی گئی، ملا برادرز کو ماورائے عدالت رہا کیا گیا اور پے در پے اسٹیٹ کو چیلنج کیا گیا، اس المناک تباہی کے بعد ایک دفعہ پھر مذاکرات کے نام پر وطن کی سالمیت اور شہداء کے پاک لہو کو بیچنے کے ناپاک عمل کا آغاز ہوگیا ہے۔

رہنماؤں کا کہنا تھا کہ طالبان دہشتگردوں نے قبل از مذاکرات اپنے سینکڑوں ساتھیوں کی رہائی کا مطالبہ کیا ہے، ایسی پری کنڈیشنز ناقابل قبول اور دہشتگردوں کی طاقتوں میں بے پناہ اضافے کا موجب جبکہ قانون نافذ کرنیوالے اداروں اور عدلیہ کا تمسخر اڑانے کے مترادف ہے۔ ان کا کہنا تھا کہ مجلس وحدت مسلمین دہشت گردوں سے مذاکرات کے نام پر ملک دشمنوں کو طاقتور کرنے کے مکروہ ترین کھیل کو مکمل مسترد کرتی ہے۔ انہوں نے کہا کہ کیا طالبان سے مذاکرات کیلئے کوئی گارنٹی موجود ہے؟ گرنٹر ہیں تو وہ کون ہیں؟ کیا تحریری گارنٹی موجود ہیں؟، ہزاروں محافظان وطن کے اعلانیہ قاتلوں سے مذاکرات کرنے ہیں تو ملک بھر میں چھوٹے چھوٹے قتل کے مقدموں میں سزا یافتہ افراد کو قید کرنے کا کیا جواز ہے؟ قاتلوں کو عام معافی دے کر ملک کو بنانا ریپبلک کا اعلان کر دیا جائے، تاکہ جس کے پاس طاقت ہو وہ مذاکرات کے نام پر اپنے مطالبات منوائے اور قانون، عدلیہ اور آئین کا تصور ختم ہو کر رہ جائے۔

رہنماؤں نے کہا کہ ہمارا سوال ہے کہ ان مذاکرات کی آئینی حیثیت کیا ہے؟ کیوں کہ آئین پاکستان ریاستی قانون کو نہ ماننے والوں، کالعدم جماعتوں سے مذاکرات کو رد کرتا ہے۔ کیا طالبان سے مذاکرات کے نام پر دہشتگردی کو دی جانیوالی رعایتیں اور مربوط معاملات ان کیمرہ نہیں ہونے چاہیے، کیا ان کی تمام تر تفصیلات میڈیا اور عام لوگوں کیلئے واضح نہیں ہونے چاہیں۔؟ خفیہ مذاکرات کا آخر کیا مطلب ہے۔ انہوں نے کہا کہ دہشتگردوں سے مذاکرات کا دم بھرنیوالے مظلومین اور شہداء کی تشفی کیلئے کیوں نہیں جاتے؟ وارثان شہداء سے رائے کیوں نہیں لی جاتی؟ صرف دہشت گردوں اور اس کے سرپرستوں کی رائے کیوں اہم ہے؟ امریکی پٹھو، عرب ممالک کے مسلسل دورہ جات اور طالبان کیلیے حکومتی نرم گوشہ کن مفادات کے پیش نظر ہے؟ اور کیا نام نہاد مذاکراتی عمل کا یہ دورانیہ متعین شدہ ہے؟ ہے تو کیا؟ نہیں ہے تو کیوں؟ وطن عزیز میں دہشت گردی کے سب سے بڑے شکار مکاتب فکر اور جماعتوں کا اعتماد میں کیوں نہیں لیا جاتا ؟ اور 4 رکنی مذاکراتی ٹیم کا ماضی شیعہ دشمنی اور تعصب سے بھرا ہے، میجر عامر، شہید عارف حسین الحسینی کے قتل میں ملوث پایا گیا ہے، رستم مہمند 1988ء سانحہ ڈیرہ اسماعیل خان کہ جس میں دسویوں افراد شہید ہوئے تھے، کا مرکزی ملزم ہے۔

رہنماؤں نے کہا کہ اس بات کے واضح ثبوت موجود ہیں کہ شیعہ اور اہل سنت کے قاتلوں کو رہا کیا جا رہا ہے۔ سید ناصر شیرازی کا کہنا تھا کہ مذہبی آزادی پر قدغن لگانا طالبان کا اعلانیہ مطالبہ رہا ہے، مذاکرات کے پردے میں مذہب کے نام پر ملک میں تباہ کن تبدیلیاں مقصود ہیں، جن کا ہدف طالبان کو حکومت میں شریک کرنا اور طالبان کے نظام کو قانونی شکل میں رائج کرنا ہے۔ مجلس وحدت مسلمین اس تمام عمل کو پاکستان توڑنے کی عالمی سازش کا حصہ قرار دیتی ہے اور بھرپور عوامی حمایت کے ساتھ فی الفور منظم اور بھرپور فوجی کارروائی کا مطالبہ کرتی ہے، دہشتگردوں سے مذاکرات کو مسترد کرتے ہوئے قانون، آئین اور عدلیہ کی بالادستی کو یقینی بنانے کا عہد کرتی ہے، اس سلسلے میں 2 فروری کو کوئٹہ میں عظیم الشان امن کانفرنس بیاد شہدائے پاکستان میں عوامی لائحہ عمل کا اعلان کرے گی۔ اس کانفرنس میں سنی اتحاد کونسل، تحریک منہاج القرآن، اقلیتی نمائندے اور کئی دیگر پارٹیاں بھی شریک ہو رہی ہیں، عوامی قوت سے دہشتگردوں کو شکست دیں گے، جس کا عملی مظاہرہ ایک مرتبہ پھر ہنگو کی سرزمین پر شہید اعتزاز حسن نے کیا ہے، حسینی عزم سے یزیدیت کو شکست فاش دیں گے اور سیاسی طالبان اور قلمی دہشت گردوں کے ہتھکنڈوں کو کامیاب نہیں ہونے دیں گے، چائیے ہمیں ہزاروں جانوں کی قربانی بھی کیوں نہ دینی پڑے۔

رہنماؤں نے کہا کہ مجلس وحدت مسلمین اور سنی اتحاد کونسل نے محب وطن کونسل کا اجلاس فروری کے پہلے ہفتہ میں طلب کر لیا ہے، جس کے نتیجہ میں ملک بھر میں طالبانائزیشن کے مقابلے میں عوامی تحریک کا آغاز متوقع ہے، ایک درجن سے زائد جماعتیں محب وطن کونسل میں شامل ہونے کیلئے رسمی طور پر آمادگی کا اظہار کرچکی ہیں۔ رہنماؤں نے کہا کہ محب وطن قوتیں مل کر دہشتگردوں کو شکست دینے کی صلاحیت رکھتے ہیں اور آئندہ چند دنوں میں اس کا عملی اظہار ملک کے طول عرض میں نظر آئے گا۔ انہوں نے کہا کہ میڈیا کے لوگ بھی دہشت گردوں کی دھمکیوں میں نہ آئیں، ان کا ڈٹ کر مقابلہ کریں، اسی میں ملکی بقا کی راز مضمر ہے، ہم دب گئے تو یہ خون آشام درندے ہم پر مسلط ہو جائیں گے۔

وحدت نیوز(راولپنڈی) مجلس وحدت مسلمین پاکستان ضلع راولپنڈی شعبہ خواتین کے زیر اہتمام ولادت رسول خدا (ص) کی مناسبت سے محفل میلاد کا انعقاد قدیمی امام بارگاہ میں کیا گیا ، جس میں خصوصی شرکت و خطاب ایم ڈبلیوایم شعبہ خواتین کی مرکزی رہنما خانم سکینہ مہدوی نے کیا۔ اس محفل میں خواتین کی بڑی تعداد نے شرکت کی ، جب کے مدعوشدہ منقبت و نعت خواں خواتین نے بارگاہ رسالت (ص)میں نذارانہ عقیدت پیش کیا ۔