The Latest
وحدت نیوز(آزاد جموں و کشمیر) مجلس وحدت مسلمین آزادکشمیر کے وفد کی صدرریاست سرداریعقوب خان سے ملاقات ، صدر ریاست مجلس وحدت مسلمین کے زیر اہتمام 23جنوری کو دربار سہیلی سرکار منعقد ہونیوالی میلادِ مصطفی ﷺ کانفرنس میں خصوصی شرکت کریں گے۔مجلس وحدت مسلمین کے وفد کی قیادت سیکریٹری جنرل علامہ تصور نقوی الجوادی نے کی، وفد میں سید تصور عباس موسوی، مولانا طالب حسین ہمدانی، محسن رضا ایڈوکیٹ، سید سجاد سبزواری، سید اعجاز کاظمی ، سید اظہر شاہ،مولانا حمید نقوی،سید شفاعت کاظمی، سید وقار حسین ،ذیشان حیدرو دیگر شامل تھے۔ ملاقات کے دوران وزیر حکومت محترمہ فرزانہ یعقوب، چوہدری رشید ، اور صدارتی مشیر راجہ ساجد بھی صدرریاست کے ہمراہ تھے۔
صدرریاست سرداریعقوب خان نے مجلس وحدت مسلمین کے وفد سے گفتگوکرتے ہوئے کہا کہ آزادکشمیر اور پاکستان میں بین المسالک و بین المذاہب ہم آہنگی کیلئے مجلس وحدت مسلمین کا کردار لائق تحسین ہے۔ آزادکشمیر تحریک آزادی کشمیر کے عنوان سے انتہائی حساس خطہ ہے ،آزادکشمیر بالخصوص مظفرآباد کے علماء و مذہبی رہنماؤں کا کردار انتہائی اہمیت کا حامل ہے۔ آزادکشمیر شیعہ سنی اتحاد کے حوالے سے دنیا بھر میں اپنی منفرد پہچان رکھتا ہے۔صدر ریاست نے کہا کہ خطہ، عزت،غیرت،احترام سب کا ایک ہے ہمارے پاس صرف ایک چیز رہ گئی ہے کہ ہم سارے اکٹھے رہیں کچھ قوتیں چاہتی ہیں کہ یہاں امن و امان کا مسئلہ پیدا ہو لہذا سب کو اسیک دوسرے کی محافل میں آنا جانا چاہیے ایک دوسرے کو کھلے دل سے سننا چاہیے تاکہ دوریاں جنم نہ لے سکیں۔ انہوں نے کہا کہ حکومت آنی جانی چیز ہے خطہ کی فلا ح و کامرانی کیلئے حکومت اور تمام شعبہ ہائے زندگی کے افراد کو ملکر تعمیری کردار ادا کرنا چاہیے۔انہوں نے کہا کہ ہم پاکستان کے علماء کو دعوت دیتے ہیں کہ وہ آزادکشمیر میں تمام مکاتب فکر کے علماء کے درمیان قائم امن و بھائی چارے کی فضاء کو مثال قرار دیتے ہوئے اپنے اپنے علاقوں میں قیام امن کیلئے کردار ادا کریں۔آزادکشمیر میں محرم الحرام اور ربیع الاول میں امن و یکجہتی کی جو فضاء قائم رہی ہے اس پر تمام مکاتب فکر کے علماء کو خراج تحسین پیش کرتا ہوں۔ رسول اسلام ﷺ کا درس امن و محبت اور بقائے باہمی کے سنہری اصولوں کی طرف رہنمائی کرتا ہے۔محبت رسول ﷺاسلامی عقیدے کی اساس ہے۔کوئی بھی مسلمان رسول اللہ ﷺ اور اہل بیت رسول ﷺ کی محبت کے بغیر مسلمان ہونے کا دعویٰ نہیں کر سکتاہے۔رسول کریم ﷺ کی سنہری تعلیمات اور اسوہ حسنہ پر عمل کرکے معاشرے کی اصلاح و فلاح کا فریضہ سرانجام دیا جا سکتا ہے۔
مجلس وحدت مسلمین آزادکشمیر کے سیکرٹری جنرل علامہ سید تصور حسین نقوی الجوادی نے مجلس وحدت مسلمین کے زیر اہتمام 23جنوری کو دربار سہیلی سرکار منعقد ہونیوالی میلادِ مصطفی ﷺ کانفرنس میں صدر ریاست کی خصوصی شرکت کی دعوت قبول کرنے پر شکریہ ادا کرتے ہوئے کہا کہ مجلس وحدت مسلمین ،آزادکشمیر میں امن و بھائی چارہ اور اتحاد بین المسلمین کیلئے عملی طور پر کوشاں ہے۔انشااللہ میلا دِ مصطفی کانفرنس اتحاد ووحدتِ امت کیلئے اہم سنگ میل ثابت ہوگی ہماری کوشش ہیکہ ریاست میں تمام مکاتب فکر کے حقوق کے تحفظ اور دوریوں کو دور کرنے کیلئے عملی اقدام کرے ہم ریاست میں بسنے والے تمام مکاتب فکر خوبصورت گل دستے سے تعبیرکرتے ہیں جسکا ہرپھول اپنی خوشبو سے ریاست کے ماحول کو معطر کررہاہے اس سلسلہ میں حکومت کو بھی پہلے سے بہتر انداز میں امن و آشتی کے ماحول کو برقرار رکھنے کیلئے موثر کردار ادا کرنا چاہیے۔تاکہ تمام مکاتب فکر خود کو عملی طور پرریاستی امور میں حصہ دار سمجھتے ہوئے ملک و ملت کی تعمیر و ترقی میں بہتر کردار ادا کرسکیں۔
وحدت نیوز(مشہد مقدس) دفتر مجلس وحدت مسلمین شعبہ مشہد مقدس میں میلاد مسعود نبی مکر م ،ختمی مرتبت رحمت اللعالمین حضرت محمد مصطفی صلی اللہ علیہ و آلہ وسلم اور فرزند آفتاب تابناک امامت و ولایت رئیس مذہب حقہ صادق آل محمد حضرت امام جعفر صادق علیہ السلام کی مناسبت سے ایک پر شکوہ جشن کا اہتمام کیا گیا ۔جش کا افتتاح تلاوت کلام اللہ ہوا ،اور نعت قصیدہ ،اور منقبت کے ذریعے آپکی خدمت میں نذرانہ عقیدت پیش کیا گیا ،آخر میں حجۃ الاسلام و المسلمین آقای تقی جعفری نے خطاب کیا اور نبی اکر م صلی اللہ علیہ و آلہ وسلم اور صادق آل محمد صلی اللہ علیہ و آلہ وسلم کی زندگانی پر روشنی ڈالی اور کہا کہ مسلمانو ں کی تمام مشکلات کا حل نبی اکرم صلی اللہ علیہ و آلہ وسلم اور آئمہ کی سیرت کی روشنی میں زندگی گزارنے سے ممکن ہے اور جب تک مسلمان ان کے فرمودات پر عمل نہیں کریں گے اس وقت تک کبھی بھی کامیاب و کامران نہیں ہو سکتے ۔
وحدت نیوز(اسلام آباد) مجلس وحدت مسلمین کے سربراہ علامہ ناصر عباس جعفری نے راولپنڈی اور بنوں بم دھماکے اور فوجی جوانوں کی شہادتوں کی شدید مذمت کرتے ہوئے کہا ہے کہ عصر حاضر کی پاکستانی لیڈر شپ ملکی تاریخ کی بزدل ترین قیادت ہے ،وزیراعظم نوازشریف اور عمران خان قوم کو صاف صاف بتادیں کہ ہم طالبان سے ڈرتے ہیں کچھ نہیں کرسکتے، کیوں قوم کو گمراہ کیا جارہا ہے، پوری اس وقت اضطراب میں ہے اور حکمرانوں کی طرف دیکھ رہی ہے لیکن حکمران کسی اور کی طرف دیکھ رہے ہیں،قابل شرم کا مقام ہے اُن سیاسی و مذہبی جماعت کے رہنماؤں کیلئے جو اپنے ووٹرز اور کارکنوں کے قتل پر تو پورا شہر بند کرا دیتے ہیں اور شٹرڈاؤن ہڑتال کی کال دیتے ہیں لیکن پاک فوج کے جوانوں کی شہادت پر ایک لفظ تک ادا نہیں کرتے اور طالبان کے خلاف لب کشائی کرنے سے گریزاں ہیں۔
اپنے مذمتی بیان میں علامہ راجہ ناصر عباس نے کہا کہ نوازشریف اور عمران خان بزدل انسان ہیں، جنہیں معصوم پاکستانیوں کی لاشیں نظر نہیں آرہیں،ہم جنرل راحیل سے سوال کرتے ہیں کہ وہ کس طرف دیکھ رہے ہیں اور مسلسل پاک فوج کے جوانوں کی شہادت پر کیوں خاموش ہیں ،دو روز میں راولپنڈی اور بنوں میں ۳۰ سے زائد فوج اور ایف سی کے جوانوں کو شہید کر دیا گیا ، کیا انہیں پاک فوج کے جوانوں سے کوئی واسطہ اور سرور کارنہیں۔علامہ ناصر عباس جعفری نے کہا کہ کیاطالبان حکمرانوں کے سامنے آکر قرآن پر ہاتھ رکھ کرکہیں کہ ہم ہی کارروائیاں کرتے ہیں، پھر انہیں یقین آئے گا۔ہم فی الفور بغیر کسی انتظار کے طالبان ظالبان کے خلاف بے رحمانہ آپریشن کا مطالبہ کرتے ہیں۔
وحدت نیوز(ملتان) مجلس وحدت مسلمین کے مرکزی ڈہٹی سیکریٹری جنرل علامہ امین شہیدی نے کہا کہ شہادت وہ عظیم منزل ہے جس کی آرزو انبیاء ، آئمہ اور اولیا ء نے کی ، شہادت کا مطلب جسم کا مردہ ہو جانا نہیں ، انسانی اذہان میں زندہ رہ جانا شہید کی کامیابی کی دلیل ہو تی ہے ، شہید ناصر عباس ایک بلند پایہ زاکر اہل بیت علیہ السلام ہو نے کے ساتھ ساتھ درد مند قومی رہنما بھی تھے ، ان خیالات کا اظہارانہوں نے دربار شاہ شمس تبریز پر منعقدہ معروف زاکر اہل بیت علیہ السلام شہید علامہ ناصر عباس آف ملتان کے چہلم کے اجتماع سے خطاب کرتے ہو ئے کیا ۔
ان کا کہناتھا کہ وطن عزیز پاکستان اپنی تاریخ کے نازک ترین دور سے گذر رہا ہے ، اس ملک کی کسی جان محفوظ نہیں ، حکمران اپنی ذمہ داریوں سے مسلسل غفلت برت رہے ہیں ، ایک قلیل مگر منظم دہشت گرد ٹولہ پاکستان پر قابض ہو نے کی کوشش میں مصروف ہے ، سیاسی جماعتیں ان دہشت گرد گروہوں کو ہم پر مسلط کر نے کی پالیسی پر عمل پیرا ہیں ، عوام ان دہشت گرد عناصر کا مقابلہ کر نے کی جرائت اور ہمت رکھتے ہیں ، جس دن حکمرانوں نے دہشت گردوں کے سامنے مکمل ہتھیارڈال دیئے عوام ان دہشت گردوں کے مقابل سیسہ پلائی دیوار بن کر سامنے آجائیں گے ۔
وحدت نیوز(ملتان) مجلس وحدت مسلمین پاکستان کے مرکزی ڈپٹی سیکریٹری جنرل علامہ محمد امین شہیدی نے معروف زاکر اہل بیت علیہ السلام شہید علامہ ناصر عباس آف ملتان کے مزار پر حاضری دی اور فاتحہ خوانی کی ،شہید علامہ ناصر عباس کے چہلم کے اجتماع سے خطاب کے بعد ایم ڈبلیو ایم ضلع ملتان کے سیکریٹری جنرل علامہ اقتدار نقوی اور دیگر تنظیمی دوستوں کے ہمراہ دربار شاہ شمس تبریز کے احاطے میں شہید علامہ ناصر عباس کی قبر مبارک پر حاضری دی ، علامہ امین شہیدی نے شہید علامہ ناصر عباس کی جرائت ، ہمت اور شجاعت کو شاندار الفاظ میں خراج تحسین بھی پیش کیا ۔
وحدت نیوز(لاہور) المصطفیٰ اسلامک یونیورسٹی اینڈ ایجوکیشنل ولیج علاقے کی ترقی اور تعلیمی معیار کو بہتربنانے کی جانب ایک اچھا قدم اور نیک کاوش ہے۔ ان کا کہنا تھا کہ تعلیم یافتہ معاشرہ ہی ملک سے فاسد نظام کا خاتمہ کرسکتی ہے۔ آٹھ ایکڑ زرقبے پر محیط یہ منصوبہ تعلیمی میدان میں ایک منفرد ادارہ ثابت ہو گا، بزدل حکمران دہشت گردوں کے سامنے بے بس ہیں۔ کراچی کے بعد پنجاب میں بھی دہشت گردوں کا جادوسر چڑھ کر بولنا شروع ہوا ہے۔ عمران خان اور نواز شریف نے قوم کو مایوسی کے سوا کچھ نہیں دیا۔ تحریک انصاف عوام سے زیادہ دہشتگردوں کے ترجمان کرتی نظر آتی ہے۔ طالبان کیخلاف کاروائی کرنے کی بجائے اس کینسر کو ملک کے طول و عرض میں پھیلا رہے ہیں۔ وطن عزیز کے غیور اور محب وطن عوام دہشت گرد اور اور اُن کے حامی قوتوں کو پاک سر زمین پر مسلط نہیں ہونے دیں گے۔ان خیالات کا اظہار مجلس وحدت مسلمین پاکستان کے مرکزی سیکریٹری جنرل علامہ راجہ ناصر عباس جعفری نے لاہور میں المصطفیٰ اسلامک یونیورسٹی اینڈ ایجوکیشنل ولیج کے تعمیراتی کا م کے افتتاح کے موقع پر منعقدہ تقریب سے خطاب کر تے ہو ئے کیا ۔
ان کا کہنا تھا کہ ملک میں تکفیری فرقہ واریت پھیلانے کی مذموم سازشوں میں مصروف ہیں۔ تکفیریوں اور شدت پسندوں کے مدارس دہشتگردی کی فیکٹریاں ہیں۔ جہاں سے بھی کوئی خود کش حملہ آور کی شناخت ہو جاتی ہے وہ کسی نہ کسی تکفیری مدرسے کا طالبعلم نکلتا ہے۔ انہوں نے کراچی میں ایکسپریس نیوز کی ٹیم پر حملے کی شدید مذمت کرتے ہوئے اسے بزدلانہ کاروائی قرار دیا ۔ بنوں میں سیکورٹی فورسز پر دہشت گردوں کے حملے اور نوجوانوں کی شہادتوں پر ظالمان کی مذمت کرتے ہوئے کہا کہ شہداء کے قاتلوں سے مذاکرات کی باتیں شہداء کے خون سے غداری ہے۔ انہوں نے بنوں میں شہید ہونے والے سیکورٹی فورسز کو خراجِ تحسین پیش کرتے ہوئے کہا کہ وطن کے باوفا بیٹوں کا خون رائیگاں نہیں جانے دیں گے۔ حکمران ہوش کے ناخن لیں اور اس ملک دشمن گروہ کیخلاف فیصلہ کن کاروائی کا اعلان کریں۔
بعد ازاں علامہ راجہ ناصر عباس جعفری نے اپنے دست مبارک سے المصطفیٰ اسلامک یونیورسٹی اینڈ ایجوکیشنل ولیج کے تعمیراتی کام کا سنگِ بنیاد رکھا ، اس موقع پر علمائے کرام اور علاقہ معززین کی بڑی تعداد بھی موجود تھی ۔
وحدت نیوز(حیدرآباد) مجلس وحدت مسلمین پاکستان ضلع حیدر آباد کے سیکریٹری جنرل علامہ امداد علی نسیمی نے وفد کے ہمراہ ایکسپریس نیوز آفس کا دورہ کیا ، علامہ امداد نسیمی نے ایکسپریس نیوز حیدر آبادکے بیورو چیف سے ملاقات میں کراچی میں گذشتہ روز ٹارگٹ کلنگ میں شہید ہو نے والے تین صحافیوں کے قتل پر تعزیت کا اظہار کیا ، فاتحہ خوانی کی اور شہید صحافیوں کی مغفرت کے لئے دعاکی ، علامہ امداد نسیمی کا کہنا تھا کہ ایکسپریس نیوز کی ڈی ایس این جی پر دہشت گردوں کی فائرنگ کی پرروز مذمت کر تے ہیں ، مجلس وحدت مسلمین ایکسپریس نیوز کے شہید اراکین کے اہل خانہ کے غم میں برابر کی شریک ہے، ایکسپریس نیوز پر پہ در پہ دہشت گرد حملے انتہائی تشویش ناک ہیں ، حکومت صحافی برادری کو مکمل تحفظ فراہم کرے ، ایکسپریس نیوز کو حق سچ کی ترویج کی پاداش میں دہشت گردی کا نشانہ بنایا جا رہا ہے۔
وحدت نیوز(لاہور) مجلس وحدت مسلمین کے سیکرٹری جنرل پنجاب علامہ عبدالخالق اسدی نے پنجاب میں بڑھتے ہوئے ٹارگٹ کلنگ کی شدید مذمت کرتے ہوئے کہا کہ کراچی کے بعد شرپسندوں نے پنجاب کا رخ کر لیا ہے پنجاب حکومت کو بارہا باور کرانے کے باوجود شرپسندوں کیخلاف ایکشن لینے سے قاصر ہیں علامہ عبد الخالق اسدی کا کہنا تھا کہ جنوبی پنجاب دہشت گردوں کے لئے جنت بن چکاہے دہشت گردوں کے ہاتھوں نہ عوام محفوظ ہیں نہ صحافی کراچی میں صحافیوں کی شہادت کی بھر پور مذمت کرتے ہیں وقت آگیا ہے کہ عوام دہشت گردوں کیخلاف اُٹھ کھڑے ہوں حکمران فقط اپنے اقتدار بچانے اور تجوریاں بھرنے میں مصروف ہیں اور عوام کو دہشت گردوں کے رحم وکرم پر چھوڑ دیا ہے ، ان کا کہنا تھا کہ سرگودہا میں فرقہ وارانہ دہشت گردی پنجاب کے امن پر کاری ضرب ہے ۔
حکومت دہشت گردوں کیخلاف ایکشن لینے میں مکمل ناکام ہوچکی ہے بے گناہوں کی قتل میں ملوث دہشت گردوں کوحکومت کی مکمل سر پرستی حا صل ہیں لاہور میں اور پنجاب بھر میں شہید کیے گئے شیعہ عمائدیں کے قاتلوں کی عدم گرفتاری اس بات کا ثبوت ہے کہ حکومت کے صفوں میں موجود کالی بھیڑیں ان مجرموں کی سرپرستی کرتی ہیں پنجاب میں دہشت گردوں کے خلاف بے رحمانہ کاروائی کے بغیر امن کے خواب دیکھنے والے احمقوں کی جنت میں رہتے ہیں ۔
وحدت نیوز(جھنگ) مجلس وحدت مسلمین کے یوتھ ونگ کے وحدت اسکاوٹس کی پہلی کیمپوری مرکز معارف اسلامی میں منعقد ہو گی۔ 13 تا 16 فروری 2014 کو رجوعہ سادات میں ہونے اسکاوٹنگ کے بیسک لیڈر کورس میں فرسٹ ایڈ، نقشہ بینی، پیراکی، رسوں کا استعمال، کیمپنگ، کوکنگ سمیت تمام اسکاوٹ سرگرمیاں اور مہارتیں شامل ہوں گی۔ وحدت اسکاوٹس کے صوبائی ہیڈکوارٹرز کو ہدایات جاری کی گی ہیں کہ اسکاوٹ کیمپ میں شامل ہونے والے کارکن اپنے ساتھ کمبل، وردیاں اور ضرورت کا سامان لیکر آئیں۔ اسکاوٹس کو بیسک کورس کا سلیبس اور مہارتوں کی ٹریننگ کے لیے پنجاب بوائے اسکاوٹ کی طرف سے خصوصی طور پر انسٹرکٹرز اس کیمپ میں شریک ہوں گے۔ وحدت اسکاوٹس کے تربیتی پروگرام میں اسلامی عقائد و نظریات، قرآن مجید، نہج البلاغہ،صحیفہ کاملہ، احکام دینی، سیرت و تاریخ اور اسلامی اخلاق سمیت مختلف موضوعات پر علما اور اسکالرز کے لیکچرز ہوں گے۔ اسکاوٹ کیمپوری میں شرکت کے حوالے سے تمام اضلاع کو شرکت کرنے والے اسکاوٹس کی فہرستیں پانچ فروری تک مرکز معارف اسلامی ارسال کر دینے کی ہدایت بھی کی گئی ہے۔
وحدت نیوز(بلتستان) مجلس وحدت مسلمین پاکستان بلتستان ڈویژن کے ڈپٹی سیکرٹری جنرل فدا حسین نے اپنے ایک بیان میں کہا ہے کہ وفاقی حکومت گلگت بلتستان کے ڈاکٹروں اور پیرامیڈیکل اسٹاف کے مطالبات کو فوری طور پر منظور کریں۔ انہوں نے کہا کہ ہم ڈاکٹروں اور پیرامیڈیکل اسٹاف کے جائز مطالبات کی بھرپور حمایت کا اعلان کرتے ہیں۔ اس سلسلے میں وفاق میں بھی آواز بلند کریں گے اور اس اہم مسئلے کی حل تک جدوجہد جاری رہے گی۔ فدا حسین نے کہا کہ جائز حقوق کی حصول کے لیے معاشرہ میں سب سے اہم خدمت سرانجام دینے اور مسیحائی کے فرائض انجام دینے والوں کو مزید سڑکوں پہ رکھنا غیر اخلاقی عمل ہے۔ وفاقی حکومت ان کی خدمات اور حساسیت کو مدنظر رکھتے ہوئے ان کے مطالبات کی منظوری کے لیے فوری اقدامات کریں، بصورت دیگر ہم بھی ان کے ہمراہ احتجاجات پر مجبور ہونگے۔ انہوں نے اپنے بیان میں توقع کا اظہار کیا کہ چیف سیکرٹری اور وفاقی وزیر اپنی اولین ترجیح میں اس مسئلے کو حل کر کے شکریہ کا موقع فراہم کریں گے۔