وحدت نیوز (اسکردو) مجلس وحدت مسلمین پاکستان بلتستان ڈویژن کے سیکرٹری جنرل علامہ آغا علی رضوی نے اپنے ایک بیان میں کہا ہے کہ گلگت انتظامیہ اپنی نااہلی چھپانے کے لیے حراموش سانحہ پر پردہ ڈالنے میں مصروف ہے۔ گلگت میں وزارت داخلہ کی جانب سے گذشتہ ماہ دہشتگردی کے امکانات کے حوالے سے جاری مراسلہ اور علی مسجد سے برآمد شدہ بم جسے پولیس نے ناکارہ بنا دیا اس بات کی دلیل ہے کہ گلگت میں دہشتگرد تخریبی کاموں میں لگے ہوئے ہیں لیکن مقامی انتظامیہ ان واقعات کو کنٹرول کرنے کی بجائے اور ذمہ داروں تک رسائی حاصل کرنے کی بجائے انکی وکالت میں مصروف ہے جو کہ نہایت ہی افسوسناک عمل ہے۔ گلگت انتظامیہ اگر سانحہ حراموش کو دہشتگردانہ واقعہ قرار دینے کے لیے تیار نہیں تو گذشتہ سال حراموش جانے والی اسی ڈرائیور کی گاڑی پر مناور میں دستی بم حملہ کس نے کیا تھا کیا وہ بھی کوئی چھوٹا واقعہ تھا۔؟ گلگت انتظامیہ اپنی فرائض منصبی سے جی چرانے کی بجائے حقائق کا مقابلہ کرے اور دہشتگردوں کے خلاف بھرپور کاروائی کرے۔ اگر گلگت میں دوبارہ اس طرح کے تخریبی واقعات پیش آئے تو ذمہ داری انتظامیہ پر عائد ہوگی۔

انہوں نے کہا کہ گلگت بلتستان میں امن و امان اور مذہبی روداری کو سبوتاژ کرنے کے لیے بڑے پیمانے پر سازشیں تیار کی جارہی ہیں، تمام مکاتب فکر کے علماء اور عوام اپنے ہاتھوں میں محبت اور اخوت کے دامن کو تھامے رکھیں۔ میں میڈیا کے توسط سے چلاس سے ہنزہ اور داریل سے گنگچھے تک کی عوام سے گزارش کرتا ہوں کہ اپنی آنکھیں کھلی رکھیں، ہشیار رہیں اور کسی قسم کی بھی سازش کو کامیاب نہ ہونے دیں۔ نام نہاد لیڈروں کو اور وہ افراد جنہوں نے عوام کو مسلکوں، علاقوں، قوموں اور لسانوں میں تقسیم کر کے بنک بیلنس بنائے ہیں انکے لیے اتحاد اور امن و محبت ہضم ہونے والی چیز نہیں لہٰذا اتحاد کی طاقت سے ہم گلگت بلتستان کے خلاف ہونے والی تمام تر سازشوں کا مقابلہ کر سکتے ہیں۔

وحدت نیوز(کوئٹہ)مجلس وحدت مسلمین بلوچستان کے سیکریٹری جنرل علامہ مقصود علی ڈومکی اور مرکزی سیکریٹری تنظیم سازی برادر یعقوب حسینی نے اراکین صوبائی کابینہ کے ہمراہ ضلع نصیر آباد کا دورہ کیا اس موقعہ پر گوٹھ جمعہ خان عمرانی اور ڈیرہ مراد جمالی میں کارکنوں سے خطاب کرتے ہوئے علامہ مقصود علی ڈومکی نے کہا کہ مجلس وحدت مسلمین فرقہ واریت پر یقین نہیں رکھتی لہذا اہل سنت کے ساتھ مل کر آئندہ انتخابات میں حصہ لے گی۔ ملک میں چہروں کی بجائے فرسودہ استحصالی نظام کی تبدیلی چاہتے ہیں۔ فرقہ وارانہ منافرت ، دہشت گردی ، جہالت ، غربت اور بے روزگاری کے خلاف جہاد میں ہر اول دستے کا کردار ادا کریں گے۔ جہاں اہل سنت بھائیوں کا پسینہ گرے گا وہاں ہم اپنا خون دیں گے۔

در ایں اثناء علامہ مقصود علی ڈومکی نے رکن صوبائی اسمبلی میر ماجد ابڑو کی رہائشگاہ جاکر ان کی والدہ اور بیٹی کی وفات پر تعزیت کی اور جاموٹ قومی موومنٹ کے مرکزی چیئرمین میر مجتبی ابڑو کے عشائیہ میں شریک ہوئے۔ اس موقعہ پر گفتگو کرتے ہوئے علامہ مقصود علی ڈومکی نے کہا کہ سیاسی کارکن تبدیلی کے اس سفر میں اپنا کردار ادا کریں، انتخابی نظام میں خامیاں دور کیے بغیر حقیقی جمہوریت کا قیام ممکن نہیں۔ آئین کی دفعہ 62, 63 پر عملدر آمد کو یقینی بنایا جائے۔ الیکشن میں ووٹوں کی خرید و فروخت، جعلی ووٹوں کا اندراج اور جعل سازی کو جرم سمجھتے ہوئے اس کا راستہ روکا جائے ۔ سیاسی جماعتوں کے اندر غیر جمہوری رویوں کے خلاف قانونی کاروائی کی جائے ۔ موروثی سیاست، لیڈر کی آمریت ، پارٹی الیکشن کی بجائے سلیکشن جیسے متعدد مسائل کے باعث سیاسی جماعتیں غیر جمہوری اداروں میں بدل چکی ہیں۔

وحدت نیوز (لاہور) پنجاب کے عوام نے تبدیلی اور ملک میں جاری خاندانی اقتدار کے خاتمے کیلئے فیصل آباد میں عوامی ریفرنڈم کو کامیاب کرکے ثابت کیا کہ سٹیٹس کو کے پیداوارحکمرانوں کے لئے قائد اعظم کے پاکستان میں کوئی جگہ نہیں عوام نے اس ظالم اور کرپٹ نظام کو مسترد کر دیا ہے ۔ان خیالات کا اظہار مجلس وحدت مسلمین پنجاب کے سیکرٹری جنرل علامہ عبدالخالق اسدی نے جشن غدیر کے مناسبت منعقدہ اجتماع سے خطاب کرتے ہوئے کیا انہوں نے کہا کہ پنجاب کے عوام مبارکباد کے مستحق ہیں کہ انہوں نے فیصل آباد میں منعقدہ عوامی جلسے کو کامیاب بنا کر موجودہ حکمرانوں اور ان کے بنائے فرسودہ نظام کو مسترد کردیا انہوں نے مجلس وحدت مسلمین فیصل آباد کے ذمہ داران اور کارکنان کو دھوبی گھاٹ جلسے کو کامیاب بنانے پر مبارک باد پیش کی علامہ عبدالخالق اسدی نے کہا کہ اب ہم اس فرسودہ نظام اور خاندانی سیاست کے خاتمے کے لئے ملک کے کونے کونے تک پہنچائیں گے اور غریب اور ان ظالم حکمرانوں کے ظلم سے پسے ہوئے عوام کو شعور دلائیں گے اور ان کا حقوق ان ظالم حکمرانوں سے چھین کر لینگے،علامہ عبدالخالق اسدی کا کہنا تھا کہ لاہور مینار پاکستان کا جلسہ تاریخی ہو گا عوامی بیداری کی اس لہر میں ان ظالم حکمرانوں کا بچ کر نکلنا ناممکن ہے  اور انشااللہ پاکستان ایک مستحکم اور فلاحی ریاست بننے تک ہم اپنی جد جہد جاری رکھیں گے ۔

وحدت نیوز(فیصل آباد) دھوبی گھاٹ فیصل آباد میں پاکستان عوامی تحریک کے اجتماع سے خطاب کرتے ہوئے مجلس وحدت مسلمین کے مرکزی سیکرٹری جنرل علامہ راجہ ناصرعباس جعفری کا کہنا تھا کہ انقلاب مارچ اور دھرنوں کیوجہ سے پاکستانی عوام بیدار ہو گئے ہیں، اب اس عوامی بیداری کے نتیجے میں ملنے والی کامیابی اور تبدیلی کو کوئی نہیں روک سکتا۔ ایم ڈبلیو ایم کے مرکزی رہنما نے کہا کہ یہ اس انقلابی جدوجہد کا نتیجہ ہے کہ پاکستان کے لوگوں نے وی آئی پی کلچر کو برداشت کرنے سے انکار کر دیا ہے اور پاکستان میں تکفیری گروہوں کو شکست کا سامنا ہے۔ انہوں فیصل آباد میں منعقد ہونے والے تاریخی جلسے سے خطاب کرتے ہوئے کہا کہ میں آپ کو یقین دلاتا ہوں کہ بھارت کی حمایت کرنیوالے حکمرانوں کیخلاف پاکستانی عوام مکمل بیدار ہو چکے ہیں اور بہت جلد ان سے چھٹکارہ حاصل کر لیں گے۔ علامہ راجہ ناصر عباس جعفری نے پاکستان عوامی تحریک کے سربراہ علامہ ڈاکٹر طاہر القادری اور سنی اتحاد کونسل کے صاحبزادہ حامد رضا کو مخاطب کرتے ہوئے کہا کہ میں یہ بات پہلے بھی کہہ چکا ہوں کہ جہاں آپ کا پسینہ گرے گا، وہاں ہم اپنا خون دیں گے۔ واضح رہے کہ فیصل آباد میں منعقد ہونے والے پاکستان عوامی تحریک کے جلسے میں ایم ڈبلیو ایم پنجاب کے تمام رہنما اور فیصل آباد، چنیوٹ کے اضلاع سے تعلق رکھنے والے کارکن ہزاروں کی تعداد میں موجودتھے۔جلسے کا باقائدہ آغاز ایم ڈبلیوایم کے مرکزی رہنما علامہ اعجاز بہشتی نے تلاوت کلام مجید سے کیا، جبکہ دیگر مقررین میں پاکستان عوامی تحریک کے سربراہ علامہ ڈاکٹر طاہر القادری ، سربراہ سنی اتحاد کونسل صاحبزادہ حامد رضا، سابق وزیر اعلیٰ پنجاب چوہدری پرویز الہٰی ، مسیحی رہنما جے سالک اور دیگر شامل تھے۔

مجلس وحدت مسلمین کے سربراہ علامہ ناصر عباس جعفری نے کہا ہے کہ فیصل آباد کے جلسے نے ثابت کر دیا کہ جس آواز کو پارلیمنٹ میں دبانے کی کوشش کی گئی آج اس آواز کو عوامی پارلیمنٹ سن رہی ہے، حکمران سوچتے تھے کہ ہم ہمت ہار جائینگے لیکن دنیا نے دیکھ لیا ہے کہ دو ماہ سے زائد کا عرصہ بیت گیا لیکن ہم نے حوصلوں کی جنگ نہیں ہاری، حکمران شکست کھا چکے ہیں وہ کہیں بھی عوام کا سامنا نہیں کر سکتے، کرپشن، لوٹ مار اور ظلم اب ساتھ ساتھ نہیں چل سکتے، علامہ ناصر عباس جعفری کا کہنا تھا کہ ہم وعدہ کرتے ہیں کہ خون کے خطرے تک اپنے اہل سنت بھائیوں کو تنہا نہیں چھوڑیں گے، آئیں ہم عہد کرتے ہیں کہ ہم اکھٹے جئیں گے اور اکھٹے ہی مریں گے، اب یہ پارٹنر شپ نظام کی تبدیلی تک جاری رہی گی، ان کا کہنا تھا کہ قائداعظم اور علامہ اقبال کے بیٹے اس ملک کو ظالم نظام سے نجات دلائیں گے، ہماری مشترکہ جدوجہد نے خائن حکمرانوں اور تکفیریوں کو تنہا کردیا ہے۔ انہوں نے کہا کہ گو نواز گو کا نعرہ پورے نظام کی تبدیلی کا نعرہ ہے۔ اب نواز شریف کو دنیا کی کوئی طاقت عوام کے غیض و غضب سے نہیں بچا سکتی، بھارت کے خیرخواہوں کو عوام نہیں چھوڑیں گے۔ علامہ ناصر عباس جعفری کا کہنا تھا کہ پوری پارلیمنٹ نے سانحہ ماڈل کے ملزمان کو بچانے کی کوشش کی اور مشترکہ سیشن شروع کیے، ان نام نہاد عوامی رہنماوں نے سانحہ ماڈل کے قاتلوں کی گرفتاری کا کوئی مطالبہ نہیں کیا، الٹا انہیں بچانے کی کوششیں کی گئیں۔نواز شریف اور شہباز شریف دیکھ لیں لاہور سے اسلام آباد اور اب اسلام آباد سے فیصل آباد تک بیگناہوں کا لہو تمہارے تعقب میں آپہنچا ہے،  ان دھرنوں نے نام نہادعوامی نمائندوں کے چہروں سے نقاب الٹ دی ہے، لوگوں نے دیکھ لیا ہے کہ یہ دہشتگردوں کے حامی ہیں، یہ اپنے مفاد کی خاطر تو جمع ہو سکتے ہیں لیکن عوام کیلئے اکھٹے نہیں ہو سکتے۔