وحدت نیوز(گلگت) ریاست کا تقدس اور پاک فوج کو متہم کرنے کی ہرکوشش  ناکام بنائینگے ۔ حقوق سے محروم ہونے کے باوجود ملک پاکستان کے استحکام اور اس کی سرحدوں کے دفاع میں گلگت بلتستان کے جوان کسی سے پیچھے نہیں رہینگے ۔ حکومت کی خارجہ پالیسی ناکام دکھائی دے رہی ہے، کوالالمپور سمٹ میں شرکت نہ کرکے وزیر اعظم نے بہت بڑی غلطی کی ہے ۔

مجلس وحدت مسلمین گلگت بلتستان کے ڈپٹی سیکرٹری جنرل علامہ نیئر عباس مصطفوی نے نماز جمعہ کے اجتماع سے خطاب کرتے ہوئے کہا کہ ہم اپنی فوج کو کسی صورت کمزور نہیں ہونے دینگے ۔ سامراجی طاقتیں افواج پاکستان کیخلاف نفرت پھیلانے کیلئے سرگرم ہیں اور سیاستدانوں اور بعض اداروں کی طرف سے پاک فوج کو متنازعہ بنانے کی مذموم کوشش کی مذمت کرتے ہیں ۔ وزیر ا علیٰ گلگت بلتستان عوامی ملکیتی زمینوں پر ناجائزقبضے کیلئے پاک فوج کا نام استعمال کرکے عوام میں افواج پاکستان کیخلاف نفرت کے بیج بورہا ہے ۔

 علامہ شیخ نیئرعباس نے کہاکہ چھلمس داس نومل کے حوالے سے وزیراعلیٰ بددیانتی کا مظاہرہ کررہے ہیں ۔ نومل کے عوام کےساتھ زیادتی ہرگز برداشت نہیں کی جائیگی ۔ انہوں نے کہا کہ نومل کے عوام نے تعلیمی اداروں کیلئے مفت زمین فراہم کرکے نیک نیتی کا ثبوت دیا ہے اب حکومت کی ذمہ داری ہے کہ چھلمس داس کو آباد کرنے کیلئے جلد سے جلد وسائل فراہم کرے ۔

انہوں نے خبردار کیا کہ نومل کے عوام کے ساتھ کسی قسم کا فراڈ کیا گیا تو چھلمس داس میں نہ تو ٹیکنیکل کالج رہے گا اور نہ ہی قراقرم یونیورسٹی کی تعمیرات ہونگی ۔ لہٰذا حکومت عوام اور فوج کو آمنے سامنے لانے کی سازش سے باز رہے اور وعدے کے مطابق چھلمس داس کی آباد کاری میں تمام تر وسائل بروئے کار لائے ۔

وحدت نیوز(اسلام آباد) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے لائن آف کنٹرول کی مسلسل خلاف ورزیوں پر بھارتی حکومت کو شدید تنقید کا نشانہ بناتے ہوئے کہا ہے کہ نریندر مودی بھارتی تاریخ کی وہ متعصب ترین شخص ہے جس نے اپنے ملک میں اقلیتوں پر زندگی تنگ کر کے باہمی نفاق کی بنیاد رکھی ہے۔آج ہندوستان میں مختلف مذاہب سے تعلق رکھنے والوں میں عدم برداشت عروج پر ہے اور متعدد علاقے خانہ جنگی کامنظر پیش کر رہے ہیں۔

انہوں نے کہا کہ ہندوستانی افواج کی بڑھتی ہوئی جارحیت دوایٹمی طاقتوں کے درمیان کشیدگی میں اضافے کا باعث ہے۔بھارت کی طرف سے سرحد پار بلااشتعال گولہ باری کا کوئی جواز نہیں۔مودی ایشیا کے امن کے لئے سب سے بڑا خطرہ ہے۔

انہوں نے کہا کہ پاکستان کا دفاع ناقابل تسخیر ہاتھوں میں ہیں۔ارض پاک کی طرف کسی کو میلی آنکھ سے دیکھنے کی اجازت نہیں دیں گے۔بھارت کی جانب سے کسی بھی پیش قدمی کی صورت میں پوری قوم مادر وطن کی مضبوط ڈھال بن جائے گی۔

انہوں نے کہا کہ موجودہ صورتحال کے تناظر میں عالمی قوتوں کو خاموش تماشائی بننے کی بجائے ثالثی کا کردار ادا کرنا چاہیے۔ پاکستان اور ہندوستان کے درمیان کسی بھی ممکنہ معرکے کے اثرات محض دو ملکوں تک محدود نہیں رہیں گے بلکہ اس سے پوری دنیا کا امن متاثر ہو گا۔

وحدت نیوز(کوئٹہ) مجلس وحدت مسلمین بلوچستان کے صوبائی سیکرٹری جنرل برکت علی مطہری نے کہا ہے کہ بجلی کی قیمتوں میں اضافہ غیر دانشمندانہ اقدام ہے جس سے حکومت کی ساکھ کو شدید نقصان پہنچے گا۔انہوں نے کہا مہنگائی کی چکی میں پسے ہوئے عوام مزید کوئی بوجھ اُٹھانے کے متحمل نہیں ہے۔ریاست کا فرض عوام کو ریلیف دینا ہے نا کہ ان کی مشکلات میں اضافہ کرنا۔

ان کا کہناتھاکہ موجودہ حکومت پر عوام نےاعتماد اس لیے کیا  تھا کہ وہ ایسی مثبت تبدیلی کے متمنی تھے جو ملک سے استحصال و پسماندگی کا خاتمہ کرے۔جہاں غریب و امیر کے ساتھ ریاست کا برتاؤ ایک جیسا ہو لیکن یہاں صورتحال اس کے بالکل برعکس ہوتی جا رہی ہے۔بڑھتی ہوئی مہنگائی نے غریب کے منہ سے روٹی کا نوالہ بھی چھین لیا ہے۔

انہوں نے کہا جس حکومت کی پالیسیاں عوامی ضرورتوں کے تابع نہیں ہوتیں اس کو ناکامی کا سامنا کرنا پڑتا ہے۔موجودہ حکومت کے پالیسی ساز اداروں کو چاہیئے کہ قومی حوالے سے ایسی حکمت عملی طے کریں جس سے عام آدمی کو زیادہ سے زیادہ ریلیف مل سکے۔ انہوں نے کہا کہ ملک کے متوسط اور پسماندہ طبقے پر کم سے کم بوجھ ڈالا جائے تاکہ ان کے روزمرہ معاملات میں آسانیاں پیدا ہوں۔انہوں نے حکومت سے مطالبہ کیا بجلی کی قیمتوں میں اضافے کا فیصلہ واپس لیا جائے ۔

وحدت نیوز(پشاور) مجلس وحدت مسلمین خیبر پختونخوا کے صوبائی سیکرٹری جنرل علامہ وحید کاظمی نے بجلی کی قیمتوں میں اضافے کے اعلان پر شدید ردعمل کا اظہار کیا ہے۔انہوں نے کہا کہ ملک کا متوسط طبقہ پہلے ہی منگائی کی چکی میں پس رہا ہے۔ سفید پوشی کا بھرم رکھنا مشکل ہوتا جا رہا ہے۔ بجلی کی قیمتوں میں اضافہ عوام پر مزید بوجھ ڈالنے کے مترادف ہے۔سیاست دانوں کی لوٹ مار کا بدلہ عوام سے نہ لیا جائے۔

انہوں نے کہا عوام نے تحریک انصاف کا ساتھ ایسی تبدیلی کے لیے دیا تھا جس سے طبقاتی تفریق کا خاتمہ ہو اور ہر شہری کو باوقار زندگی گزارنے کے یکساں مواقع حاصل ہو سکیں لیکن یہاں صورتحال توقعات کے بالکل برعکس ہوتی جا رہی ہے۔عام آدمی کی زندگی کو اجیرن بنایا جارہا ہے۔مہنگائی میں بے تحاشہ اضافہ اور بنیادی ضروریات زندگی کے حصول میں رکاوٹیں تحریک انصاف کی مقبولیت کے لیے سخت خطرہ ہیں۔قوم کو مزید آزمائش میں ڈالنا دانشمندی نہیں ۔عوام کے ساتھ سوتیلی ماں جیسا سلوک اب بند ہونا چاہئے۔انہوں نے بجلی کی قیمتوں میں اضافے کے فیصلے کو فوری طور پر واپس لینے کا مطالبہ کیا ہے۔

وحدت نیوز(اسلام آباد) مجلس وحدت مسلمین پاکستان کے مرکزی ڈپٹی سیکرٹری جنرل علامہ احمد اقبال رضوی نے بجلی کی قیمتوں میں اضافے کے حالیہ حکومتی فیصلے پر سخت تنقید کرتے ہوئے اسے عوامی مشکلات میں مزید اضافہ قرار دیا ہے۔انہوں نے کہا کہ تحریک انصاف کی حکومت سے عوام کو بہت ساری توقعات وابستہ تھیں۔عوام کش اقدامات سے ان ساری امیدوں پر پانی پھیرا جا رہا ہے۔ بڑھتی ہوئی مہنگائی اور بیروزگاری سے غربت کی شرح میں ہونے والا اضافہ تشویشناک ہے۔جو حکومت اپنے عوام کے بنیادی مسائل پر توجہ نہیں دیتی وہ اپنی مقبولیت کھو بیٹھتی ہے۔بنیادی ضروریات زندگی کے حوالے سے عوام کو ان گنت مسائل کا سامنا ہے۔جن کا تدارک کرنا ریاست کی ذمہ داری ہے۔حکومت کو چاہیے کہ اپنی ساکھ بچانے کے لیے قومی مسائل پر توجہ دے اور انہیں عوامی امنگوں کے مطابق حل کرے۔

انہوں نے کہ کہا گزشتہ ایک سال کے دوران اشیائے خوردونوش کی قیمتوں میں غیر معمولی اضافے نے عام آدمی کے رہن سہن کو سخت متاثر کیا ہے۔پاکستان کا متوسط طبقہ پہلے ہی مشکلات میں گرا ہوا ہے اور موجودہ حکومتی پالیسیوں کے باعث سخت مایوسی کا شکار ہے۔بجلی کی قیمتوں میں اضافہ جلتی پر تیل کا کام کرے گا۔انہوں نے حکومت سے مطالبہ کیا کہ بجلی کی قیمتوں میں اضافے کا فیصلہ فوری طور پر واپس لیا جائے اور عوامی مشکلات کو مدنظر رکھتے ہوئے روزمرہ استعمال کی اشیا کی قیمتوں میں کمی کی جائے۔

وحدت نیوز(لاہور) ڈپٹی سیکرٹری جنرل مجلس وحدت مسلمین پنجاب سید افتخار نقوی نے مسلم لیگ ن کے عہدیداروں کے بیانات پاکستان بنایا تھا پاکستان بچائیں گے کو زبانی کلامی اور کھوکھلے نعروں سے تعبیر دیا انہوں نے کہا کہ قائد اعظم محمد علی جناح کے حوالے سے لیگی رہنماؤں کے بیان قائد اعظم نے پاکستان بنایا اور نواز شریف نے پاکستان بچایا جیسے بیان جہاں بانی پاکستان محمد علی جناح کی شخصیت ک±شی ہے وہیں اب تک مادر وطن پاکستان کی بقاءکی خاطر بہنے والے شہدائے پاکستان کے پاک لہو کے ساتھ شدید ناانصافی ہے۔

سید افتخار نقوی نے کارکنان سے خطاب کرتے ہوئے کہا کہ سانحہ آرمی پبلک سکول و گلشن پارک لاہور سمیت کراچی تا کوئٹہ، خیبر تا گلگت بلتستان یہ پاکستان کی مظلوم عوام تھی جس نے اب تک 80 ہزار قیمتی جانوں کی قربانی دے کر پاکستان کو بچایا ہے ملت جعفریہ کے سینکڑوں ڈاکٹرز، انجینئرز سمیت مختلف شعبہ ہائے زندگی سے تعلق رکھنے والے بہترین افراد اس بدترین دہشت گردی کا نشانہ بنے. دہشتگردوں نے مساجد، امام بارگاہوں،، درباروں اور گرجا گھروں سمیت بازاروں اور چوراہوں کو بلا تفریق نشانہ بنایا. زبانی کلامی نعروں سے اعلیٰ عدلیہ کی جانب سے نامزد نااہل لٹیروں کا موازنہ بانی پاکستان قائد اعظم محمد علی جناح جیسی بابصیرت شخصیت کے ساتھ کرنا منافقت و شخصیت پرستی کے سوا کچھ نہیں ہے. یہ مجلس وحدت مسلمین ہی تھی جس نے دہشت گردی کے عروج کے دور میں اتحاد امت مصطفیٰ ﷺکے پرچار سمیت پاکستان میں بسنے والے تمام مذاہب کے لوگوں کے حقوق کی جنگ لڑی اور انہیں پاکستان کے نام پر متحد کرنے میں اپنا کلیدی کردار ادا کیا اور پاکستان بنایا تھا پاکستان بچائیں گے کو اپنا نصب العین قرار دے کر اس پر حقیقی معنوں میں عمل پیرا ہوئے۔

انہوںنے کہاکہ  دہشتگردوں کی نرسری کو اپنی آغوش فراہم کرنے والے ہرگز یہ دعویٰ نہیں کر سکتے کہ وہ پاکستان بچانے والوں میں شمار ہیں . انہوں نے کہا کہ ہم نے سینکڑوں لاشوں کو سڑکوں پر رکھ کر کئی کئی دن پرامن احتجاج کر کے اقوام عالم سمیت پاکستانی اداروں کو یہ باور کرایا ہے کہ پاکستان کی بقاء چاہتے ہیں تو دہشتگردی کا خاتمہ لازم ہے اور ہم ہی نے دہشت گردوں سے مذاکرات کو مسترد کیا ہے جبکہ تمام سیاسی و مذہبی جماعتیں ان دہشت گردوں سے مذاکرات کرنے کے حق میں پریس کانفرنسس کرتی نظر آتی تھیں جن میں مسلم لیگ ن سر فہرست ہے . اتنی آسانی سے آپ حقیقی فرزندانِ قائد و اقبال کی محنت پر پانی نہیں پھیر سکتے. اس پرامن ماحول کی آبیاری ہم نے اپنے خون سے کی ہے. لہٰذا آپکے کھوکھلے نعرے تمام باشعور محب وطن پاکستانی بالخصوص ملت جعفریہ پاکستان مسترد کرتے ہیں اور شدید مذمت کرتے ہیں. لیگی رہنما پرویز ملک، خرم دستگیر اور سائرہ افضل تارڑ ان نازیبا و تضحیک آمیز بیانات پر بانی پاکستان قائد اعظم محمد علی جناح و شہدائے پاکستان کی ارواح سے معذرت خواہی کریں۔