وحدت نیوز(سہون شریف)مجلس وحدت مسلمین سندھ کے صوبائی ڈپٹی سیکرٹری جنرل علامہ رضا محمد سعیدی نے شہدائے سہو ن کی تیسری برسی کے موقع پر درگاہ حضرت لال شہباز قلندر ؒ پر منعقدہ شہداء کانفرنس سے خطاب کرتے ہوئے کہا ہے کہ سانحہ سہون پاکستان کی تاریخ کا ایک سیاہ ترین باب ہے جب کم و بیش سو زائرین کو دہشتگردی کی بھینٹ چڑھا دیا گیا۔شہدا کے لواحقین آج بھی انصاف کے منتظر ہیں۔اس موقع پرعلی حسین نقوی، مولانا دوست علی سعیدی،علامہ گل حسن مر تضوی،مولانا علی انور جعفری، مولانا صادق جعفری،چوہدری اظہر حسن، یعقوب الحسینی،فدا حسین، رحمان رضا ایڈوکیٹ،منیجر اوقاف زبیر بلوچ، نجف علی شاہ سکیورٹی انچارچ، منظور احمد مقامی عزاداروں و ایم ڈبلیو ایم کارکنان سمیت صحافیوں کی بڑی تعداد موجود تھی۔

انہوں نے کہا کہ تین سال گزرنے کے بعد وارثان شہداء سے کیے گئے حکومتی وعدے پورے نہ ہونا انتہائی افسوسناک امر ہے جس پر جس قدر مذمت کی جائے کم ہے۔ سندھ میں پیپلز پارٹی کی حکومت نے خوشنما و دلفریب وعدے کر کے عوام کو ہمیشہ دھوکہ دیا ہے۔انہوں نے کہا کہ سندھ حکومت کی جانب سے شدت پسندوں کے ساتھ مفاہمانہ رویہ قومی سلامتی اور ملکی امن کے لیے شدید خطرہ ہے۔سیاسی مفادات کے حصول اور اپنی حکومت بچانے کے لیے انتہا پسندوں سے دوستی دوستی کا کھیل دانشمندی کا تقاضہ نہیں۔ حکومت ملک دشمن عناصر کو اپنی صفوں سے دور رکھے۔فرقہ واریت میں ملوث افراد کو حکومتی چھتری کا میسر ہونا ملت تشیع کی پیٹھ میں چھرا گھونپنے کے مترادف ہے۔

انہوں نے کہا ملک و قوم کی تعمیر و ترقی اور امن کو بحال رکھنے میں شیعہ قوم نے ہمیشہ ایک حقیقی محب وطن کا کردار ادا کیا ہے۔انصاف کا تقاضہ تو یہ بنتا تھا کہ حکومت ہماری حب الوطنی کو تسلیم کرتے ہوئے حوصلہ افزائی کرتی لیکن حکومتی ردعمل ہمیشہ اس کے برعکس رہا۔مخصوص گروہ کی خوشنودی حاصل کرنے کے لیے ملت جعفریہ کے فعال افراد کو فورتھ شیڈول میں ڈالا جا رہا ہے۔حکومت کی حکمت عملی سمجھ سے بالاتر ہے کہ دہشت گرد عناصر دندناتے پھر رہے ہیں اور ملت تشیع کے ہونہار افراد کو جبری گمشدگی کا شکار بنایا جا رہا ہے۔حکومت کے یہ متعصبانہ اقدامات کسی بھی صورت قابل قبول نہیں۔اگر حکومت ان انتقامی کارروائیوں سے باز نہ آئی تو پھر سندھ میں ملت تشیع سے کسی بھی قسم کی حمایت کی توقع نہ رکھے۔

کانفرنس سے خطاب کرتے ہوئے دیگر مقررین نے سندھ حکومت کی ناقص انتظامی کارکردگی پر کڑی تنقید کرتے ہوئے اسے حکومتی نا اہلی قرار دیا ہے۔ دریں انثاء سانحہ سیہون شریف درگاہ میں دہشتگردی کا نشانہ بنے والے شہداء کی یا د میں شمع روشن کی گئی، کانفرنس کے اختتام پر مقامی ماتمی سنگتوں کی جانب سے ماتم داری ہوئی اورشہدا کی بلندی درجات اور وطن کے استحکام کے لیے دعا بھی کی گئی۔

وحدت نیوز(کرمان) مجلس وحدت مسلمین پاکستان کے سربراہ ، قائد وحدت علامہ راجہ ناصرعباس جعفری حفظہ اللہ نےشیعہ سنی علماءومشائخ پر مشتمل اعلیٰ سطحی وفد کے ہمراہ سردارلشکر اسلام ، مدافع حرم اہل بیت ؑ شہید قاسم سلیمانی  ؒ کے مرقدپر حاضری دی اور فاتحہ خوانی ساتھ ہی ان کی عظیم قربانی کو خراج تحسین پیش کرتے ہوئے ملت غیور پاکستان کی نیابت میں سلام عقیدت پیش کیا۔

تفصیلات کے مطابق ایم ڈبلیوایم کے سربراہ علامہ راجہ ناصرعباس جعفری حفظہ اللہ جوکہ ان دنوں سرداررشید اسلام حاج قاسم سلیمانی ؒ کے چہلم کی تقریبات میں شرکت کے لئےایران کے دورے پر ہیں انہوںنے ایم ڈبلیوایم کے ایک اعلیٰ سطحی وفدکے ہمراہ کرمان میں موجود قبرستان گلزار شہداء میں سردارمقاومت حاج قاسم سلیمانی کی قبر مبارک پر حاضری دی اور فاتحہ خوانی ۔

وحدت نیوز کی رپورٹ کے مطابق علامہ راجہ ناصرعباس جعفری کے ہمراہ جمعیت علمائے پاکستان نیازی کے مرکزی جنرل سیکریٹری ڈاکٹر امجد چشتی ودیگر اکابرین، ایم ڈبلیوایم کے مرکزی ڈپٹی سیکریٹری جنرل علامہ سید احمد اقبال رضوی، علامہ مختاراحمد امامی، علامہ سید باقرعباس زیدی، علامہ آغاسید علی رضوی، علامہ عبدالخالق اسدی، سید اسدعباس نقوی، علامہ حیدرعباس عابدی ودیگر قائدین نے گذشتہ روز شہید قاسم سلیمانی ؒ کی قبر مبارک پر حاضری دی اور وہیں شب بیداری کا بھی اہتمام کیا ۔

شیعہ سنی علمائے کرام نے شہیدِ سرفراز اسلام کو گلہائے عقیدت پیش کیئے ، رات بھر گریہ وزاری اور راز ونیاز کا سلسلہ جاری رہا جبکہ صبح کو الوداع کہہ کر وفد نے واپس قم کی راہ لی ، واضح رہے کہ اس سے قبل ملی یکجہتی کونسل کا ایک اعلیٰ سطحی وفد لیاقت بلوچ کی سربراہی میں بھی ایران کا دورہ کرچکا ہے جس میں شامل شیعہ سنی علماءومشائخ نے شہید کے اہل خانہ اور اعلیٰ حکومتی شخصیات سے پاکستان کے 22کروڑ عوام کی نمائندگی کرتے ہوئے تعزیت کا اظہار کیاتھا۔جبکہ سربراہ ایم ڈبلیوایم علامہ راجہ ناصرعباس جعفری حفظہ اللہ نے رہبرانقلاب آیت اللہ خامنہ ای کی زیر اقتداءشہید قاسم سلیمانی ؒ اور ان کے رفقاء کی تشیع جنازہ میں شرکت بھی کی تھی ۔

مظفرآباد (وحدت نیوز) علامہ سید تصور حسین نقوی پر حملہ کو تین سال ہونے پر حکومتی بے حسی اور نا اہلی کے خلاف ملت جعفریہ کی تمام تنظیمات کا مشترکہ اجلاس مجلس وحدت مسلمین آزاد کشمیر کے ریاستی سیکرٹریٹ مظفرآباد میں آغا سید طالب حسین ہمدانی کی زیر صدارت منعقد ہوا. اجلاس کے شرکاء نے علامہ سید تصور حسین نقوی کے کیس کے حوالے سے حکومتی نااہلی اور بے حسی کی شدید الفاظ میں مزمت کرتے ہوئے بھرپور احتجاج کا عندیہ دیا۔

اجلاس میں آزاد کشمیر بھر میں ریاست گیر بھرپور احتجاج کے لئیے تمام تنظیمات کے نمائندہ افراد پر مشتمل کمیٹی تشکیل دی گئی .اجلاس میں علامہ سید تصور حسین نقوی اور ان کی اہلیہ پر حملہ آوروں کی تاحال عدم گرفتاری اور ان کے سہولت کاروں کو بے نقاب نہ کیے جانے پر شدید تشویش اور غم و غصے کا اظہار کیا گیا۔

 نیز وزیراعظم آزاد کشمیر اور انتظامیہ کی طرف سے کیے گئے وعدوں کی عدم پاسداری کی بھی شدید الفاظ میں مزمت کی گئی.اور مطالبہ کیا گیا کہ حکومت اور انتظامیہ بشمول چیف سیکرٹری اور آئی جی پی معاملے کا فلفور نوٹس لیتے ہوئے راست اقدام اٹھائیں اور علامہ تصور حسین نقوی کے حملہ آوروں کو میڈیا کے سامنے پیش کیا جائے. نیز ان کی فیملی اور جماعت سے کئیے گئے وعدے پورے کئے جائیں ۔

جبکہ اس موقع پر تشکیل دی گئی کمیٹی کے چیئرمین علامہ سید فرید عباس نقوی سینئر وائس چیئر مین جعفریہ سپریم کونسل آزاد کشمیر ,جنرل سیکرٹری  شجاعت علی کاظمی,جبکہ ممبران میں آغا سید طالب حسین ہمدانی ڈپٹی سیکرٹری جنرل مجلس وحدت مسلمین آزاد کشمیر,مولانا معصوم علی سبزواری ڈویژنل صدر شیعہ علماء کونسل مظفرآباد,ناظم مغل جنرل سیکرٹری امامیہ آرگنائزیشن آزاد کشمیر ریجن,سید قمر عباس کاظمی ڈویژنل صدر امامیہ آرگنائزیشن آزاد کشمیر,سید فرزند علی نقوی نائب صدر مرکزی انجمن جعفریہ مظفرآباد,سید راشد علی نقوی صدر مرکزی انجمن جعفریہ جہلم ویلی شامل ہیں.اجلاس میں علامہ سید تصور حسین نقوی خصوصی طور پر شریک ہوئے۔

جبکہ اجلاس میں سید زوار حسین نقوی ایڈووکیٹ ریجنل ناظم امامیہ آرگنائزیشن آزاد کشمیر,سید اقتدار حسین نقوی جنرل سیکرٹری مرکزی انجمن جعفریہ مظفرآباد, سید تصور عباس موسوی جنرل سیکرٹری مرکزی انجمن جعفریہ جہلم ویلی,سید فدا حسین نقوی سیکرٹری مالیات مجلس وحدت مسلمین آزاد کشمیر,سید وقار کاظمی سیکرٹری میڈیاسیل،سید اسد علی بخاری سیکرٹری یوتھ،سید وقار علی کاظمی سیکرٹری جنرل ضلع نیلم کی علاوہ سید عامر علی نقوی سیکرٹری مالیات مجلس وحدت مسلمین آزاد کشمیر سید احسان گیلانی سیکرٹری روابط مظفرآباد اور دیگر تنظیموں کے نمائندگان شریک ہوئے.

وحدت نیوز(جیکب آباد) شہر کے مسائل اور ان کا حل کے عنوان سے گرین لینڈ ہوٹل میں اہم اجلاس منعقد ہوا۔ اجلاس میں شہر کی سیاسی سماجی اور مذہبی تنظیموں کے ذمہ داران شریک ہوئے۔ اجلاس میں شہر اور ضلع کے مسائل صحت صفائی پینے کا صاف پانی قبائلی تنازعات اور تعلیم پر تفصیلی مشاورت ہوئی۔

اس موقع پر خطاب کرتے ہوئے مجلس وحدت مسلمین پاکستان کے مرکزی ترجمان علامہ مقصود علی ڈومکی نے کہا ہے قبائلی تنازعات میں معصوم انسانوں کا قتل انتہائی افسوس ناک ہے۔

انہوں نےکہا کہ 21 ویں صدی میں بھی عوام صاف پانی معیاری تعلیم صحت اور صفائی کی بنیادی سہولیات سے محروم ہیں۔ معاشرے میں موجود نقائص کی نشاندہی کے ساتھ ساتھ ضروری ہے کہ ان اچھے انسانوں کی تعریف کی جائے جو پوری ذمہ داری کے ساتھ اپنے فرائض انجام دیتے ہیں اور انسانیت کی خدمت کرتے ہیں۔

وحدت نیوز(مشہد مقدس) موسسہ شھید عارف الحسینیؒ کی طرف سے دفتر مجلس وحدت مسلمین مشہد مقدس میں مبلغین کی تربیت کے لیے دورہ روش تبلیغ کا انعقاد کیا گیا، جس کی اختتامی تقریب کے مہمان خصوصی حجۃ الاسلام والمسلمین ڈاکٹر سید شفقت حسین شیرازی سیکریٹری امور خارجہ مجلس وحدت مسلمین پاکستان  تھے۔

انہوں نے مبلغین سے اپنے خطاب میں کہاکہ آج دشمن جدید انداز میں دین اسلام کے خلاف اپنی کارستانیوں میں مشغول ہے،خصوصی طور پر نوجوان نسل کو دین سے دور کرنے کے لیے موبایل اور انٹرنیٹ کے ذریعے نت نئے طریقوں سے اسلام کے خلاف تسلسل سے حملہ ور ہے۔لہذا ضرورت ہے کہ آج کے دور کے تقاضوں کے مطابق میدان میں اترا جائے اور دشمن اسلام کو ترکی بہ ترکی جواب دینے اور نوجوان نسل کو اس کے شر سے نجات دینے کے لیے جدید وسائل سے استفادہ کرنا بہت ضروری ہے۔

انہوں نے مزید کہا کہ رہبر معظم انقلاب اسلامی مبلغین کے لیے انفارمیشن ٹیکنالوجی سے استفادہ کرنے پر زور دیتے ہیں۔ پس ہمیں بھی دین مقدس اسلام کی تبلیغ اور نشر و اشاعت جو کہ انبیاء کا کام ہے، کے لیے انفارمیشن ٹیکنالوجی سے صحیح انداز میں فائدہ اٹھانا چاہیے،پروگرام کے آخر میں اس تربیتی کورس میں شرکت کرنے والے مبلغین میں انعامات بھی تقسیم کے گئے۔

وحدت نیوز(لاڑکانہ) مجلس وحدت مسلمین، امامیہ اسٹوڈنٹس آرگنائزیشن ، اصغریہ آرگنائزیشن اوردیگر ملی تنظیموں کے زیراہتمام لاڑکانہ میں شہید راہ اسلام قاسم سلیمانی اورمہندس ابومہدی کے چہلم کی مناسبت سے مجلس ترحیم منعقد ہوئی۔مجلس ترحیم سے خطاب کرتے ہوئے مجلس وحدت مسلمین پاکستان کے مرکزی ترجمان علامہ مقصود علی ڈومکی نے کہا ہے کہ کشمیر اور فلسطین کے مظلوم مسلمانوں کی حمایت پوری امت مسلمہ کا فریضہ ہے۔ عرب حکمرانوں نے کشمیر اور فلسطین کے مظلوموں سے یکجہتی کی بجائے اسرائیل کی حمایت کی اور قاتل مودی کو میڈل پہنائے۔

انہوں نےکہا کہ عالمی استکبار نے داعش کو تشکیل دیا اسے مضبوط کیا تاکہ امت مسلمہ کو کمزور کیا جائے اسلام کے نام پر مسلمانوں کا خون بہایا جائے۔ داعش نے پاکستان سمیت دنیا بھر میں مظلوم مسلمانوں کا خون بہایا انبیاء کرام اور اولیاء کے مقدس مزارات پر حملہ کیا۔ سردار قاسم سلیمانی اور مہندس ابومہدی نے عوام کی مدد سے داعش کا قلع قمع کیا۔ مقاومتی بلاک نے انسان دشمن امریکہ اور سامراجی طاقتوں کے مذموم عزائم خاک میں ملا دیئے۔ انہوں نےکہا کہ پاکستان کے غیور مسلمانوں نے ہمیشہ کشمیر اور فلسطین کی جدوجہد آزادی کی حمایت کی ہے اور پاکستان کے عوام نے اس راہ میں اپنا لہو دیا ہے۔