وحدت نیوز(لاہور) رکن پنجاب اسمبلی و مجلس وحدت مسلمین شعبہ خواتین کی مرکزی سیکریٹری جنرل سیدہ زہرا نقوی نے کہا ہے کہ محرم الحرام امن ،محبت ،صبر وبرداشت کا درس دیتا ہے،باطل کے سامنے ڈٹ جانا اور مظلوموں کو ان کے حقوق دلانا حسینیت ہے ،شہادت سیدنا امام حسینؑ ظالم کے سامنے ڈٹ جانے اور مظلوموں کو حقوق دلانے کا پیغام دیتی ہے ،معرکہ کربلا نے حق کا پرچم بلند کیا اور باطل کو رہتی دنیا تک عبرت کا نشان بنادیا ،سیدنا امام حسین باطل کے سامنے ڈٹ گئے سرکٹا دیا مگر باطل کے سامنے جھکے نہیں ،آپ نے کربلا کے میدان میں جام شہادت نوش فرماکرواضح پیغام دے دیا دین اسلام میں بگاڑ پیدا کرنیوالے ظالم وجابر کے سامنے ڈٹ جانا ہی حسینیت ہے ۔انہوںنے مزید کہا کہ امن محبت بھائی چارگی اور رواداری کے فلسفے کو نا صرف محرم الحرام میں بلکہ پورا سال فروغ دینا چاہیے ،انتہا پسند امن کے دشمن اسلام اور پاکستان مخالف قوتوں کے ایجنٹ ہیں ،انتہاپسندی کو فروغ دینے والے اسلام وپاکستان دشمن عناصر کے ایجنٹ ہیں ۔

وحدت نیوز  (مانٹرنگ ڈیسک)  سنی اتحاد کونسل پاکستان کے چیئرمین صاحبزادہ حامد رضا نے کہا ہے کہ حسینیت اور یزیدیت کی جنگ آج بھی جاری ہے، امریکہ عہد حاضر کی یزیدی قوتوں کا سرغنہ ہے، پیغام حسینؑ کو سمجھنے، اپنانے اور پھیلانے کی ضرورت ہے، سانحہ کربلا سے طاغوتی طاقتوں کیخلاف جدوجہد کا درس ملتا ہے، اہل حق کیلئے حسینی فکر مشعل راہ ہے، خاندان رسول(ص) کیساتھ والہانہ محبت ایمان کی بنیاد ہے، حضرت امام حسینؑ جرات و استقامت اور حریت و عزیمت کا استعارہ ہیں۔ ان خیالات کا اظہار انہوں نے جامعہ رضویہ فیصل آباد میں پیغام حسینؑ کانفرنس سے خطاب کرتے ہوئے کیا۔ صاحبزادہ حامد رضا نے مزید کہا کہ شہدائے کربلا کی لازوال قربانیاں تاریخ اسلام کا روشن باب ہے۔ فاسق و فاجر حکمرانوں کی مزاحمت کرنا درس کربلا ہے۔

انہوں نے کہا کہ حسینیت حق اور یزیدیت باطل کا نام ہے، محرم کے ایام میں وحدت امت کا پیغام عام کرنے کی ضرورت ہے، تمام مکاتب فکر کے علماء بین المسالک ہم آہنگی کیلئے اپنا کردار ادا کریں، حکومت محرم کے دوران سیکورٹی کے فُول پروف انتظامات کرے۔ منبر و محراب سے نفرت نہیں محبت کا پیغام دیا جائے۔ حسینیت کا پرچم تا قیامت سر بلند رہے گا۔ اہل حق حسینی جذبے سے سرشار ہو کر ہر دور کی یزیدی قوتوں کی مزاحمت جاری رکھیں گے۔ سانحہ کربلا کے تذکرے سے دلوں میں شوق شہادت بیدار ہوتا ہے۔ استعماری طاقتوں کی سرکوبی کیلئے حسینی فکر کو مشعل راہ بنانا ہو گا۔ نواسہ رسول نے سر کٹوا کر حفاظت دین کا حق ادا کر دیا۔ ہر سچا مسلمان شہدائے کربلا سے محبت و عقیدت کو اپنا سرمایہ حیات سمجھتا ہے۔

وحدت نیوز  (لاہور)  مجلس وحدت مسلمین کے وفد کی صوبائی سیکرٹری جنرل پنجاب ایم ڈبلیو ایم علامہ سید مبارک علی موسوی کی قیادت میں محرم الحرام کے حوالے سے سی سی پی او لاہور سے ملاقات۔ ملاقات میں محرم الحرام میں مجالس و جلوس ہائے عزاء کی فول پروف سکیورٹی اور عزاداروں کو درپیش مختلف مسائل پر تفصیلی تبادلہ خیال کیا گیا۔ علامہ سید مبارک علی موسوی نے سی سی پی او لاہور سے گفتگو کرتے ہوئے کہا کہ پچھلی گورنمنٹ میں 10 دنوں میں پنجاب میں ایک ہزار سے زائد بلاوجہ ایف آئی آر درج ہوئیں جبکہ زیادہ تر ایف آئی آرز وقت کی پابندی نہ کرنے پر درج کی گئیں۔ ایم ڈبلیو ایم کے وفد نے سی سی پی او سے چادر اور چار دیواری میں مجالس سے متعلق پولیس کی طرف سے کی جانیوالی سختیوں کو عوامی بنیادی حقوق کی خلاف ورزی قرار دیتے ہوئے کہا کہ آئین پاکستان میں ہر شہری کو اپنے اپنے عقیدے کی بنیاد پر اس کے رسومات و عبادات کی انجام دہی کی مکمل آزادی حاصل ہے، انتظامیہ گلی محلوں میں شادی بیاہ و دیگر تقریبات پر خاموش جبکہ نواسہ رسول صلی علیہ وآلہ وسلم کی عزاداری کو محدود کرنے میں تلی ہوئی ہے، یہ ہماری بنیادی حقوق پر قدغن ہے، جسے ہم ہرگز قبول نہیں کریں گے، عزاداری امام مظلوم ہماری شہ رگ حیات ہے، ہم اس پر کسی بھی قسم کی قدغن کو آئین پاکستان اور ریاستی قوانین کی خلاف ورزی سمجھتے ہیں۔

انہوں نے کہا کہ لاہور کے مختلف علاقوں میں شرپسندوں کے ایما پر عزاداروں کو ہراساں کرنے کا سلسلہ جاری ہے، جس کا سدِباب نہ کیا گیا تو ہم اپنا جمہوری، آئینی و قانونی حق کو استعمال کرتے ہوئے سڑکوں پر آنے پر مجبور ہونگے۔ انہوں نے کہا کہ کالعدم تکفیری شدت پسندوں کو اب بھی انتظامیہ کی سرپرستی حاصل ہے، نئے پاکستان میں ہم ایسے کالی بھیڑوں کو بے نقاب کریں گے اور ان کیخلاف ہر قسم کی قانونی چارہ جوئی سے دریغ نہیں کریں گے، ہم مکتب اہلبیتؑ کے ماننے والے ہیں، ہم ریاستی قوانین اور آئین کو پامال کرنیوالوں کا قانونی و آئینی طور پر محاسبہ کریں گے، انتظامیہ اپنے پرانے متعصبانہ روش ترک کرے اور ہماری عبادات اور رسومات کی ادائیگی میں خلل نہ ڈالے۔ اس موقع پر سی سی پی او لاہور نے ایم ڈبلیو ایم وفد کو محرم الحرام میں میں فول پروف سکیورٹی کو یقینی بنانے اور گزشتہ معاملات کا از سر نو جائزہ لینے کی مکمل یقین دہانی کرائی۔ ملاقات میں مرکزی سیکرٹری سیاسیات اسد عباس نقوی، سید خرم نقوی، رانا ماجد، ماجد کاظمی، سابق چئیرمین آئی او حسنین جعفر زیدی، افسر رضا خان اور ڈپٹی سیکرٹری لاہور شیخ عمران موجود تھے۔

وحدت نیوز (سجاول) ڈپٹی اسپیکر سندھ اسمبلی محترمہ ریحانہ لغاری نے محرم الحرام میں امن و امان اور سیکورٹی انتظامات پر اہم اجلاس طلب کیا اجلاس میں مجلس وحدت مسلمین ضلع سجاول کے سیکریٹری جنرل حاجی مظفر علی لغاری اور ضلعی وفد نےمحرم الحرام میں ضلعی انتظامیہ کی طرف سےضلع بھر میں ناقص انتظامات پر خدشات کا اظہار کیا۔

ڈپٹی اسپیکر سندھ اسمبلی ریحانہ لغاری نےڈپٹی کمشنر ریاض احمد عباسی اور ایس ایس پی سجاول مسعود احمدبنگش کو ڈپٹی کمشنر آفس طلب کرلیا، ڈپٹی سپیکر نے ناقص انتظامات اور ملت جعفریہ کی تشویش پر متعلقہ حکام کی سرزنش کی۔ڈپٹی کمشنر اور ایس ایس پی کی طرف سے محرم الحرام میں انتظامات بہتر کرنے کی یقین دھانی اور تمام متعلقہ اداروں کو سخت احکامات جاری کردئیے۔

ددگاہ تاج محمدشاہ جاتی پر قبضہ کا معاملہ اور علم پاک اور عزاداری کے معاملے پر سول جج نے سیکورٹی خدشات کے باعث درگاہ کو سیل کرنے کا حکم اور عشرہ محرم کے بعد سول کورٹ میں قانونی طریقے سے معاملہ کو حل کرنے کے احکامات جاری ۔وفد میں مولانا محمد بخش غدیری سیکریٹری جنرل ٹنڈو محمد خان اورمجلس وحدت مسلمین ضلع سجاول کے رہنما مختیار احمد دایو،فیاض احمد شیخ،فرحت عباس کھوسہ،غلام حسین شاہ ،زوار حسین سمیجو اور علی اکبر ملاح  بھی شامل تھے۔

وحدت نیوز(اسلام آباد) واقعہ کربلا کی لازوال قربانیوں میں سے ایک قربانی امام عالی مقام کے چھ ماہ کے فرزند حضرت علی اصغر علیہ السلام کی شہادت ہے،اس معصوم کی شہادت نے یزیدیت رہتی دنیا تک کے رسوا کر کے ایک بے مثال ایثار و قربانی کی داستان رقم کی،یزیدیت کے انسانیت دشمن چہرے کو بے نقاب کردیا،امام عالی مقام کےچھ ماہ کے فرزند معصوم حضرت علی اصغر علیہ السلام کو پیاسا شہیدکر کے یذیدیت نے انسانی اقدار کو جس طرح پامال کیا دنیا میں ایسی ظلم و بربریت کی مثال نہیں ملتی،امام عالی مقام علیہ السلام کا قیام دین محمدی صلی علیہ وآلہ وسلم کے اقدار کی بحالی اور انسانیت کی بقا کے لئے تھا کربلا آج بھی حریت پسندوں کے لیے نمونہ عمل ہے،ہمیں اس لازوال قربانی سے سبق لیتے ہوئے دنیا کے ظالم استکباری قوتوں کیخلاف اسوہ حسینی ع پر عمل پیرا ہوکر قیام کرنا ہوگا کشمیر فلسطین اور یمن کے مظلوموں کے حق میں آواز بلند کرنا عین اسوہ شبیری ع ہے ان خیالات کا اظہار مجلس وحدت مسلمین پاکستان کے سربراہ علامہ راجہ ناصر عباس جعفری نے عالمی یوم علی اصغر علیہ السلام پر اپنے پیغام میں کیا۔

 انہوں نے کہا کہ تین محرم الحرم کو دنیا بھر کی طرح پاکستان میں بھی یوم علی اصغر بھر پور انداز میں منایاجارہا ہے،کربلا کے اس ننھے شہید نے اسلام کی حیات کے لئے جو قربانی دی ہے اس کی یاد کو تازہ رکھنا امت محمدی ص پر فرض ہے،یوم علی اصغر علیہ السلام اسی سلسلے کی ایک کڑی ہے،جو ہم رہتی دنیا تک مناتے رہینگے،امام عالی مقام حضرت امام حسین ؑ کی جنگ صرف اسلام کے باغیو ں کے خلاف نہیں تھے بلکہ انسانیت دشمنوں کے خلاف تھی۔حضرت امام حسین ؑ کی جنگ اقتدار کی نہیں بلکہ اسلامی و انسانی اقدار کی جنگ تھی۔

وحدت نیوز (اسلام آباد) ڈی پی او ڈیرہ کی طرف سے جمع کرائی گئی رپورٹ کو چیف جسٹس ثاقب نثار نے مسترد کردیاہے، یاد رہے کہ پہلی پیشی پر جو رپورٹ پیش کی گئی آج دوباہ وہی رپورٹ پیش کی گئی جس پر چیف جسٹس نے سرکاری وکیل کی سرزنش کرتے ہوئے کہا کہ یہ رپورٹ بار بار پیش ہو رہی ہے مجھے جامع رپورٹ اور لائحہ عمل چاہیے،شہدا کے وکیل نے چیف جسٹس کو بتایا کہ ڈیرہ اسماعیل خان میں دو گروپ سپاہ صحابہ کی حمایت سے کاروائیاں کر رہے ہیں الیاس گروپ ڈیرہ سٹی میں کاروائیاں کر رہا ہے اور اقبال گروپ پروآ میں کاروائیاں کر رہا ہے لیکن انتظامیہ نے کوئی بھی خاطر خواں یا سنجیدہ کاروائیاں نہیں کی کہ جس کا مثبت نتیجہ نکل سکے۔سماعت کے دوران وکیل نے مجلس وحدت مسلمین کی طرف سے تیار کردہ رپورٹ جس میں شہدا کی ایف آئی آراور باقی تفصیلات موجود ہیں سپریم کورٹ میں پیش کی جس کو چیف جسٹس میاں ثاقب نثار نے آئی جی کے پی کے کو بجھوا کر تفصیلات طلب کرلی ہیں۔