The Latest
وحدت نیوز(کراچی)مجلس وحدت مسلمین پاکستان کراچی ڈویژن کے تحت القدس کانفرنس و افطار ڈنر کا اہتمام آئیکون لان صفورہ چورنگی پر کیا گیا جس میں سربراہ ایم ڈبلیو ایم علامہ راجہ ناصر عباس جعفری سمیت پاکستان تحریک انصاف علی زیدی، علامہ شہنشاہ حسین نقوی، علامہ ناظر عباس تقوی نے القدس کانفرنس سے خطاب کرتے ہوئے کہا کہ امت مسلمہ فلسطین کے وارث ہیں، فلسطینیوں کو کبھی تنہا نہیں چھوڑیں گے، مسلم دنیا کے خیانت کار حکمرانوں کا فلسطین سے کوئی تعلق نہیں۔
اس موقع پر ایم کیو ایم کے رکن سندھ اسمبلی عباس جعفری، مرکزی تنظیم عزاداری کے رہنما سید شاہ عالم زیدی، جعفریہ الائنس کے رہنما شبر رضا، مولانا مرزا یوسف حسین، علامہ نثار قلندری، مولانا رضا حیدر، علامہ باقر حسین زیدی، شمس الحسن شمسی، مولانا جعفر علوی، مولانا امین انصاری، مفتی داؤد، یعقوب شہباز، علی حسین نقوی سمیت دیگر مہمان گرامی بھی موجود تھے۔ القدس کانفرنس سے خطاب کرتے ہوئے مقرین کا کہنا تھا کہ 23 رمضان المبارک کو دنیا بھر کی طرح پاکستان بھر میں عالمی یوم القدس منایا جائے گا، فلسطین کسی مکتب یا مسلک نہیں امت مسلمہ اور انسانیت کا مشترکہ مسئلہ ہے۔
مقررین کا کہنا تھا کہ حزب اللہ اور حماس کے جوابی حملوں نے خوف کی علامت سمجھے جانے والے غاصب اسرائیل کو بیک فٹ پر کھڑا کردیا ہے، وہ دن دور نہیں کہ جب اسرائیل صفحہ ہستی سے مٹ جائے گا، فلسطین اور کشمیر کے مسئلے آج عالم اسلام کی پشت میں استبداد کا خنجر ہے، جس کا حل عالم اسلام کے اتحاد اور اسرائیل کو کرارا جواب دینے میں مضمر ہے، پاکستان اور پاکستان کے قائدین بشمول قائد اعظم، علامہ اقبال، لیاقت علی خان اور اس کے بعد کے حکمران ایوب خان، ذوالفقار علی بھٹو اور دیگر نے فلسطین کے معاملے پر ہمیشہ اسرائیل کی مخالفت جاری رکھی لیکن اب بتدریج ایسے عناصر سر اٹھا رہے جو پاکستان میں اسرائیل کی حمایت کے لئے کوششیں کی جارہی ہیں، کبھی سرکاری ٹی وی چینل کا وفد اسرائیل کا دورہ کرتا ہے، کبھی کراچی کے اسکول میں اسرائیل کا جھنڈا لہرایا جاتا ہے اور ایک شخص خود کو یہودی پاکستانی کہہ کر اسرائیل پاکستان کے درمیان تجارت کا شوشہ چھوڑتا ہے جن کو مسترد کرنا اور ان سازشوں کو خاک میں ملانا پوری پاکستانی قوم کی اولین ذمہ داری ہے اور آئین سے وفاداری کا تقاضہ بھی یہی ہے۔ آخر میں صدر کراچی ڈویژن علامہ صادق جعفری نے القدس کانفرنس و افطار ڈنر میں شریک معزز مہمان کا شکریہ ادا کیا۔
وحدت نیوز(اسلام آباد)مجلس وحدت مسلمین پاکستان کے مرکزی سیکرٹری تنظیم علامہ مقصود علی ڈومکی نے 9 اپریل عالم اسلام کے مجاہد مبارز عالم دین اور عصر حاضر کے عظیم مفکر مصلح فیلسوف شہید آیہ اللہ سید محمد باقر الصدر کی 43 ویں برسی کے موقع پر کہا ہے کہ شہید باقر الصدر نابغہ عصر اور عظیم مفکر تھے۔ جنہوں نے علم، فلسفہ اور اقتصاد اسلامی پر معرکہ الآراء کتب تحریر کیں۔ آپ اسلامی حکومت کو بشری ضرورت قرار دیتے ہوئے اسے انسانی صلاحیتوں کے ارتقاء کا واحد ذریعہ سمجھتے تھے۔ آپ نظریہ ولایت فقیہ اور حکومت اسلامی کے زبردست حامی تھے۔ حضرت امام خمینی اور انقلاب اسلامی سے محبت کا یہ عالم تھا کہ آپ نے فرمایا کہ امام خمینی کی ذات میں یوں فنا ہو جاؤ جیسے وہ اسلام میں فنا ہو چکے ہیں۔ علامہ مقصود ڈومکی نے کہا کہ شہید باقر الصدر فقط عراق ہی نہیں، بلکہ عالم انسانیت کا عظیم سرمایہ ہیں۔
ظالم حاکم کے سامنے کلمہ حق ادا کرکے آپ نے افضل جہاد کیا۔ جو آپ کی شہادت پر منتہی ہوا۔ آپ کی بہادر بہن سیدہ آمنہ بنت الھدی بھی اپنے بھائی کی جرات مجاہدت، علم اور تقویٰ کا عکس تھیں۔ آپ صدامی مظالم کے سامنے کوہ گراں ثابت ہوئیں۔ آپ نے بعث پارٹی کی ممبرشپ کو حرام قرار دینے کا تاریخی فتویٰ صادر کیا۔ شہید باقر الصدر نے اپنے پاکیزہ خون سے اپنی صداقت کی گواہی دی۔ باقر الصدر آج بھی زندہ ہیں۔ ان کے پاکیزہ افکار کروڑوں عاشقوں کی صورت زندہ و تابندہ ہیں۔ صدام مر چکا، جبکہ باقر الصدر آج بھی زندہ و تابندہ ہے۔ انہوں نے کہا کہ سرزمین عراق نے ہر دور میں ایسی مایہ ناز شخصیات کو جنم دیا ہے جو عالم انسانیت کا سرمایہ افتخار رہے ہیں۔ عراقی عوام اور امت مسلمہ پر فرض عائد ہوتا ہے کہ وہ شہید سید باقر الصدر کے افکار اور تعلیمات کو زندہ رکھیں، اور عراق کی مقدس سرزمین کو امریکی استکبار اور طاغوت کے نجس وجود سے پاک کرتے ہوئے شہید باقر الصدر کے حکومت اسلامی کے خواب کو حقیقت کا روپ دیں۔
وحدت نیوز(ڈی جی خان)مجلس وحدت مسلمین ڈی جی خان کے فلاحی شعبے المجلس ویلفیئر آرگنائزیشن کی جانب سے القاٸم میڈیکل سنٹر بستی ناڑی فارم میں مستحقین میں راشن تقسیم کیا گیا ضلعی صدر مجلس وحدت مسلمین ڈی جی خان سید اظہر عباس کاظمی نے مستحقین میں راشن تقسیم کیا ۔
سید اظہر عباس کاظمی کا کہنا تھا کہ مہنگاٸی کے اس دور غریب عوام کا جینا مشکل ہو گیا مشکل کے اس دور میں اپنی غریب عوام کے ساتھ کھڑے ہیں ان شاء اللہ خدمت کا یہ سفر جاری رہے گا ۔
وحدت نیوز(ملتان)مجلس وحدت مسلمین جنوبی پنجاب کے صوبائی صدر علامہ اقتدار حسین نقوی، مرکزی ڈپٹی جنرل سیکرٹری سیلم عباس صدیقی، مجلس علمائے شیعہ کے صوبائی صدر علامہ قاضی نادر علوی، سید دلاور زیدی، صوبائی سیکرٹری تنظیم سازی سید وسیم زیدی، صوبائی سیکرٹری سیاسیات اور ڈویژنل صدر آئی ایس او ملتان ابوذر ہادی نے ملتان پریس کلب میں پریس کانفرنس کرتے ہوئے کہا کہ 19 سے 21 رمضان تک ایام شہادت حضرت علیؑ اور 23 سے 25 رمضان المبارک تک ایام قدس کے طور پر منائیں گے۔ ان شاء اللہ 19 سے 21 رمضان کے دوران پورے پاکستان کی طرح صوبہ جنوبی پنجاب میں ایام ِ حضرت علیؓ بڑی شان شوکت سے منائے جائیں گے، مجالس ہذا میں سیرتِ مولا کائنات حضرت علیؑ پر علماء کرام و ذاکرین عظام روشنی ڈالیں گے، ماتم داریاں ہوں گی، جلوس ہائے عزاداری نکالے جائیں گے۔ اس موقع پر انتظامیہ کی ذمہ داری ہے کہ فل پروف سیکیورٹی کے انتظامات کرے، مجالس اور جلوس کے راستوں میں تجاوزات کا خاتمہ کیا جائے، صفائی کا اتنظام کیا جائے۔
انہوں نے کہا کہ ان شاء اللہ مجلس وحدت مسلمین صوبہ جنوبی پنجاب کے سیکرٹری عزاداری فہیم جعفر ایڈوکیٹ مجلس وحدت مسلمین کی طرف سے فوکل پرسن مقرر کیے گئے ہیں، دوسرا اہم پروگرام آیام قدس 23 تا 25 رمضان المبارک ہے، حکومت پاکستان کے موجودہ حالات یہ نشاندہی کر رہے ہیں کہ اسرائیل کو تسلیم کرنے کی بات ہو رہی ہیں، جبکہ اسرائیل کو تسلیم کرنا قیام پاکستان کے مقاصد پر کاری ضرب ہے۔ ہم مطالبہ کرتے ہیں کہ جو وفد اسرائیل گیا ہے اس سے تجارت کی ہے اس پر جوڈیشل کمیشن بنایا جائے۔ ذمہ داران کو سخت سے سخت سزا دی جائے۔ 23 رمضان یوم القدس ہے، ان شاء اللہ پورے پاکستان اور پورے جنوبی پنجاب میں فلسطینی بھائیوں سے اظہار یکجہتی اور قبلہ اول بیت المقدس کی آزادی کے لیے تمام جمعہ کے اجتماعات کے بعد آزادی القدس ریلیاں نکالی جائیں گی۔ 24 رمضان کو اسلام آباد آزادی القدس سیمینار اور 25 رمضان کو ملتان میں مقامی ہوٹل میں آل پارٹیز کانفرنس منعقد کی جائیں گی۔ ملتان میں کانفرنس سے مجلس وحدت مسلمین پاکستان کے مرکزی وائس چئیرمین علامہ احمد اقبال رضوی اور مختلف سیاسی و مذہبی جماعتوں کے قائدین بھی خطاب کریں گے۔
وحدت نیوز(کراچی)معروف عالم دین، خطیب اور رہنماء مجلس وحدت مسلمین علامہ حسن ظفر نقوی نے کہا کہ یوم شہادت حضرت علی علیہ السلام پر 21 رمضان کو نکلنے والے ماتمی جلوسوں اور سیکیورٹی کے معملات کو سخت کیا جائے، اس کے ساتھ ساتھ ملک دشمنوں پر کڑی نگاہ رکھی جائے کیونکہ مسلمانوں کا مشترکہ دشمن ملک کی سلامتی کو نقصان پہنچانے کے درپے ہیں اور وہ نہیں چاہتے کہ یہاں امن قائم ہو اور مسلمانوں کے تمام مکاتب فکر آزادانہ ماحول میں اپنی مذہبی رسومات ادا کریں۔
انہوں نے مسلمانان پاکستان سے کہا کہ وہ شیر خدا علی مرتضیٰ علیہ السلام کی شہادت بھرپور طریقے سے منائیں اور مجالس اور ماتمی جلوسوں میں شریک ہوکر اتحاد بین المسلمین کا مظاہرہ کریں تاکہ اسلام دشمن قوتیں دیکھ لیں کہ یہاں بسنے والے مسلمانوں میں کوئی تفریق نہیں اور ہم سب محمد (ص) و آل محمد (ع) کے پیروکار ہیں، شہادت حضرت علی السلام پر عالم اسلام سوگوار ہے۔
وحدت نیوز(مشہد)مجلس وحدت مسلمین شعبہ مشہد مقدس کے زیراہتمام ولادت باسعادت کریم اہلبیت امام حسن مجتبی علیہ السلام کی مناسبت سے دفتر ایم ڈبلیو ایم جشن اور افطار کا اہتمام کیا گیا۔ جشن کا اغاز تلاوت کلام پاک سے کیا گیا جس کی سعادت راشد عباس نے حاصل کی۔ عارف موسوی اور ذاکر علی اسدی نے بارگاہ اہلیبیت علیہم السلام میں ہدیہ منقبت پیش کی۔ جشن سے حجتہ الاسلام والمسلمین سید عمران حیدر نقوی (تنزانیہ) نے خطاب کرتے ہوئے سیرت امام حسن مجتبی علیہ السلام پر گفتگو کی۔ اُنہوں نے کہا کہ امام حسن علیہ السلام کی حیات مبارکہ رہتی دنیا کے لیے مشعل راہ ہے، سید محمد علی نقوی نے نقابت کے فرائض انجام دیے۔
وحدت نیوز(ملتان) ایس پی کینٹ کیپٹن ریٹائرڈ قاضی علی رضا کا ممبر ڈویژنل امن کمیٹی اور رہنما مجلس وحدت مسلمین انجینئر سخاوت علی سیال کے ہمراہ 19 ماہ رمضان کے مرکزی جلوس کے روٹ کا معائنہ۔ ایس پی کینٹ کیپٹن ریٹائرڈ قاضی علی رضا نے کہا ہے کہ ایام شہادت حضرت علی علیہ السلام کی مناسبت سے منعقد ہونے والی مجالس عزا اور جلوسوں کو فول پروف سکیورٹی مہیا کی جائے گی تاکہ کوئی ناخوشگوار واقعہ پیش نہ آئے، تمام سیکیورٹی ادارے الرٹ رہیں گے۔ ان خیالات کا اظہار انہوں نے 19 رمضان المبارک کو برآمد ہونے والے مرکزی جلوس کے روٹ کا وزٹ کرتے ہوئے کیا۔
اس موقع پر منتظم جلوس ممبر ڈویژنل امن کمیٹی ملتان ورہنما ایم ڈبلیوایم انجینئر سخاوت علی سیال، ڈی ایس پی ممتاز آباد سعادت چوہان، ایس ایچ او شاہ شمس شمعون جوئیہ موجود تھے۔ ایس پی قاضی علی رضا نے کہا کہ ایام شہادت کے دوران پولیس اور سیکورٹی فورسز اپنی پیشہ ورانہ زمہ داریاں ادا کریں گے، ایس ایچ او تھانہ شاہ شمس شمعون جوئیہ نے جلوس کے انتظامات بارے بریفنگ دی۔
وحدت نیوز(مظفرآباد) بانی صدرمجلس وحدت مسلمین پاکستان آزادکشمیر و ممبر مرکزی نظارت مجلس علماء شیعہ پاکستان علامہ سید تصور حسین نقوی الجوادی سے مرکزی رہنما پاکستان تحریک انصاف آزادکشمیر و سابق امیدوار اسمبلی سید زیشان حیدر کاظمی کی ملاقات۔ ملاقات میں علامہ جوادی نے زمان پارک میں ہونے والے حملے کی پرزور مذمت کی اور سید زیشان حیدر کاظمی جو اس حملے میں زخمی ہوئے تھے، کی صحت و سلامتی اور استقامت کے لیے دعا کی۔
نیز پاکستان تحریک انصاف اور مجلس وحدت مسلمین پاکستان کے غیر متزلزل اتحاد پر قائد وحدت علامہ راجہ ناصر عباس جعفری کی بابصیرت قیادت کو خراج تحسین پیش کیا۔ سید زیشان حیدر نے علامہ جوادی کی جلد کامل صحتیابی کے لیے دعا کی اور نیک خواہشات و جذبات کا اظہار کیا۔
وحدت نیوز(لاہور)حویلی حاجی غلام صفدر لکھو ڈہر نزد رنگ روڈ لاہور میں جشن میلاد امام حسن مجتبی علیہ السلام منایا گیا ۔ جس میں علاقے کے مومنین ومومنات کی بڑی تعداد نے شرکت کی ۔ اس محفل میلاد میں علامہ علی اکبر کاظمی صوبائی صدر مجلس وحدت مسلمین پاکستان صوبہ پنجاب نے اپنے وفد کے ہمراہ شرکت کی اور شرکاء سے خطاب کیا ۔
انہوں اپنے خطاب میں مولا امام حسن مجتبی کے فضائل بیان کیے اور قرآن وحدیث کی روشنی میں فضائل اہلبیت علیہم السلام بیان کیے ۔ ماہ مبارک رمضان المبارک کی مناسبت سے بھی بہت عمدہ گفتگو کی ۔ آخر میں حالات حاضرہ اور سیاست علوی اور ہماری ذمہ داریوں کے عنواں سے حاضرین کو مخاطب کرتے ہوئے کہا کہ سیاست دیں سے کوئی الگ چیز نہیں ہے ۔ حق حکومت اصل میں اللہ کا حق ہے اس کے بعد انبیاء کرام اور ان کے نائبین برحق معصوم ہستیوں کا حق ہے ۔ اس کے بعد معصوم ہستیوں نے ان صالح مومن انسانوں کی نشانیاں بتائیں کہ جن میں یہ نشانیاں ہونگی وہی حق حکومت کے حقدار ہونگے ۔ ۔ جیسا کہ آج کے دور میں حضرت امام خمینی(رہ) اور رہبر معظم انقلاب اسلامی حضرت امام خامنہ ای(حفظہ اللہ ) امت اسلامی کی رہبری فرمارہے ہیں ۔
ان کاکہنا تھاکہ درحقیقت آئمہ طاہرین علیہم السلام کے حق کو غصب کیاگیا ۔ اس حق کو امام زمان جب ظہور فرمائیں گے تو دوبارہ حکومت الہیہ کا قیام کریں گے ۔ لوگوں نے آئمہ کا ساتھ نہیں دیا جس کی وجہ سے ہمارے امام ظاہری حکومت کا قیام نہ کرسکے آج پاکستان کی سرزمین پر 5 کروڑ شیعہ آباد ہیں !!!ہم سب ملکر اگر ایک آواز بن جائیں اور قائد وحدت کا ساتھ دیں تو دیکھیں کہ کیسے ہمارے حقوق کو بحال نہیں کیا جاتا ۔ آج ہم تھانوں ، کچہریوں کے چکر صرف اس وجہ سے کاٹ رہے ہیں اور عزاداری کے نام ایف آئی آرز کا سامنا کررہے ہیں کیونکہ ہم خود قصور وار ہیں ہم نے خاموشی اختیار کی ہوئی ہے ۔ اور مصلحتوں کی وجہ سے غیر جانبدار بن کے بیٹھے ہیں ۔
انہوں نے مزید کہا کہ آئیں مجلس وحدت کاساتھ دیں مجلس،وحدت مسلمین پاکستان آپ کے ہر مسئلے اور مشکل میں آپ کے ساتھ کھڑی ہوگی ۔ مجلس وحدت کا جب آپ عزادار ساتھ نہیں دیں گے تو مجلس کے پاس عوامی طاقت کہاں سے آئے گی ۔ پلیٹ فارم موجود ہے ۔ بابصیرت ،گاہ ، دوراندیش اور بے باک قیادت موجود ہے ۔آپ مومنین نے ساتھ دیں گے تو ہم سب ایک طاقت اور قدرت بن کر ملت کی تقدیر سنوار دیں گے ان شاءاللہ ۔ مجلس وحدت کا کام خدمت اور دیانت ہے ۔ علامہ راجہ ناصر عباس جعفری (حفظہ اللہ) نے مجلس وحدت مسلمین پاکستان کے اندر ایک ایسا سسٹم بنایا ہے کہ یونٹ اپنے ضلع ،ضلع اپنے صوبے اور صوبہ مرکز سے ایک چھوٹے سے چھوٹے ایشو کو ڈسکس کرتا ہے ۔ اتنی مشاورت کے بعد پھر کہیں فیصلہ ہوتا ہے ۔مجلس میں مشاورت ہے ۔جس قوم میں مشاورت نہیں ہوتی وہ قوم ہمیشہ شکست کھا جاتی ہے ۔
وحدت نیوز( وزیر آباد )علامہ سید علی اکبر کاظمی صوبائی صدر مجلس وحدت مسلمین پاکستان صوبہ پنجاب نے وزیر آباد کوٹ جعفر کے معروف سادات فیملی ممبر جری عباس کے جوان سال بھائی کی حادثاتی وفات کے سلسلہ میں منعقدہ مجلس ترحیم میں اپنے وفد کے ہمراہ شرکت کی اور فاتحہ خوانی کی اور لوگوں سے خطاب کیا ۔ ظہیر کربلائی صوبائی آفس سیکرٹری بھی ان کے ہمراہ تھے ۔
گوجرانوالہ ڈویژن کے تنظیمی برادران کی بھی اس مجلس ترحیم میں شرکت ۔ گوجرانوالہ ڈویژن کے مسئول برادرسید منتظر ،صوبائی نائب صدر مجلس وحدت مسلمین پاکستان صوبہ پنجاب برادر چوہدری حاجی مشتاق ورک ،ضلع گوجرانوالہ کے ضلعی صدر برادر مبشر رضوی بھی اسی مجلس ترحیم میں پہلے سے موجود تھے ۔
مجلس ترحیم میں شرکت کے بعد تنظیمی برادران کے ساتھ ایک مختصر نشست ہوئی ۔ صوبائی صدر نے کہا کہ عنقریب میں گوجرانوالہ ڈویژن کا وزٹ کروں گا ان شاءاللہ ۔ گوجرانوالہ میں ماہ شوال میں عزاداری کانفرنس کے انعقاد کے حوالے سے تنظیمی برادران نے صوبائی صدر کو بریف کیا ۔ علامہ سید علی اکبر کاظمی نے علاقے میں تنظیمی ورک پر اطمینان کا اظہار کیا ۔ اور کہا کہ آپس میں ہم آہنگی کے ساتھ امور کو انجام دیں ۔ اور تسلسل کے ساتھ آگے بڑھتے رہیں ۔
